| MUNIAVAS

ދެވަނަ ބޮޑު ހަނގުރާމައިގެ ކަޅު ދުވަސްތަކަށް ފަހު ދުނިޔެ ދެކޭނެ އެންމެ ހިތްދަތި ދުވަސްތަކާ ކުރިމަތިލާން ޖެހިދާނެ ކަމުގެ ބިރު މިވަނީ ހީވެފައެވެ. ސީނުކަރައިގެ މައިދޮރުން ނިކުމެ މުޅިދުނިޔޭގައި ވަކި ހިއްޕާލި އާލަމީ ބޮޑު ވަބާގެ ކުރިމަތީ މުޅިދުނިޔެ މިވަނީ ކުޑަކަކޫ ޖަހާފައެވެ. ވިސްނުމެއް، ޚިޔާލެއް ނެތި ދުނިޔެވީ އަރާމާއި އުފަލުގައި ތިބި ކިތައްމެ އިންސާނަކު މިވަނީ ހަމަ ބިމަށް ތިރިކޮށްލާފައެެވެ.

ރާއްޖެ އިން މިބަލި ފެނުމާއެކު ދިވެހި ސަރުކާރުން މިވަނީ ރާއްޖޭގެ ތާރީޚުގައިވެސް ފުރަތަމަ ފަހަރަށް ސިއްޙީ ކުއްލިނުރައްކަލުގެ ހާލަތެއް އިއުލާނުކޮށް ވަރުގަދަ ފިޔަވަޅުތަކެއް އަޅާފައެވެ. އެހެންނަމަވެސް ތަރައްގީގެ ރޮގުން އެތައް ގުނައެއް ފަހަތުގައި އޮތް މި ދިވެހި ރާއްޖޭގެ ބައެއް ރައްޔިތުންނަށް ކަންކަން އެނގޭ ވަރާ ދިވެހިންގެ ހިތްމޮޅުކަން ފެނި ހައިރާން ވެއްޖެއެވެ.

ސިއްހީ ޚިދުމަތްދިނުމަށް ތައުލީމު ލިބިގެން ހުރި ޑޮކްޓަރުންނަށް ވުރެ، ސޯޝަލް މީޑިއާގައި އަޑުގަދަ ރައްޔިތުމީހާއަށް ކަންތައް ކުރަންވީ ގޮތް މާބޮޑަށް އެނގެއެވެ. ހަރުކަށި ފިޔަވަޅު ސަރުކާރުން ނާޅައިގެން ގޮވާ ރައްޔިތުމީހާއަށް، އެ ފިޔަވަޅުތައް އެޅުމުން އެކަމަށް ބޯލަނބާކަށް ނޭނގުނެވެ.

އިގްތިސާދީ ހީނަރުކަމާ ހެދި މުސާރަތައް ކުޑަވުމާ އެކު ފާޑު ކިޔުން އަމާޒުވީ ސަރުކާރަށެވެ. އެހެންނަމަވެސް ގަބޫލުކުރަން ޖެހޭ ހަގީގަތަކީ މި ހާލަތު ދެމިގެން ހިނގައްޖެ ނަމަ، މާލީ ގޮތުންނާއި އެހެން ގޮތްގޮތުން މުޅި ގައުމުގެ ހާލަތު ވަރަށް ދަށަށް ދާނެ ކަމެވެ. މުސާރަތައް ކުޑަ ވުމުގެ އިތުރަށް އެތައް ވަޒީފާއެއް ގެއްލި، އާ ވަޒީފާއެއް ލިބުން ދަތިކަމަކަށް ވެސް ވާނެ އެވެ. އެހެންކަމުން މިހާލަތަށް ގައުމު ދިޔައާއި ނިދުއުމަށް ސޯޝަލް މީޑިއާގައި ހަޅޭލެވުމަށް ވުރެ އަމިއްލަ ފަރުދީ ޒިންމާ އާދާކުރަން މާމުހިންމެވެ.

ސަރުކާރާއި ހެލްތު މިނިސްޓްރީގެ ކުށް ދެއްކުމަށް މަސައްކުރާ ރައްޔިތު މީހާ އޭނާގޭ އަމިއްލަ ފަރުދީ ޒިންމާ އަދާކުރެވޭތޯ އަމިއްލަ ނަފުސާ ސުވާލުުކޮށްލަބަލާށެވެ. މި ބަލި އިތުރަށް ފެތުރި، މިހާލަތު އިތުރަށް ގޯސްވާކަށް އެއްވެސް ރައްޔިތަކު ނޭދޭނޭކަންވެސް އެނގެއެވެ. އެހެންނަމަވެސް ހާލަތުން ނަސްރު ހޯދާ އަމާން އައްސޭރި އަކަށް މި ދިވެހި ބިން ގެންދިއުމަށް އަހަރުމެން ކޮންމެ މީހެއްގެ ވެސް ފަރުދީ ޒިންމާ އަދާކުރުން މުހިންމެވެ.