ފަތިހުގެ ތެތްފިނިކަމުގެ ތެރެއިން ގައިގައި ޖެހެމުން ދިޔަ ވައިގެ ސަބަބުން އަހަރެންގެ އަތުގައިވާ ހިމަ ލޯލިތައް ހުރީ ކޮޅަށްޖެހިފައެވެ. ނަމަވެސް އެހިތްގައިމު އިހުސާސް ދޫކޮށް އެތެރެއަށް ވަންނަ ކަހަލަ ޚިޔާލެއް އަހަރެންގެ ނެތެވެ. އުމުރުން ބާވީސް އަހަރުވި އިރު މީ އަހަރެން ރާއްޖެތެރޭ ރަށެއްގައި ހޭދަކުރާ ފުރަތަމަ ފަތިހެވެ. ހާދަ ހިތްގައިމެވެ. މިކަހަލަ މާހައުލެއް ދޫކޮށް މާލެ ފަދަ ބައިހަރުބޯ ކާރުބާރު ބޮޑު ތަނަކަށް ގޮސް އުޅޭއިރު އެމީހުންގެ ހިތަށް ކުރާނެ އަސަރު ހަމަ ރަނގަޅަށްވެސް މިއަދު އަހަންނަށް އިޙުސާސް ކުރެވިއްޖެއެވެ.

ކުއްލިއަކަށް އަހަރެންގެ ލޮލިގައި އަޅައިގަތީ މަގުގެ އަނެއްކޮޅުން ޓެނިހަކަށް އަރައިގެން ދުވެފަ އަންނަ ރީތި ހަށިގަނޑެއްގެ ވެރިއަކަށެވެ. ފިރިހެންވަންތަ ގޮތެއް ހުރި އެ ޒުވާނާއަކީ ހަމަ އަހަރެން ކަހަލަ މީހަކަށް ނުވެނުދާނޭ އަހަރެންގެ ހިތް ބުނެލިއެވެ. އެހެން ނޫންނަމަ މިފަދަ ވަގުތެއްގެ އަރާމު ނިދި ދުއްވާލާފައި ނިކުންނާނެ ހެއްޔެވެ؟ ކަންފަތަށް ހެޑްފޯނެއް ޖަހާލައިގެން ދިޔަ އެމީހާގެ ދުވުމުގައި އަހަރެންގެ ހިތްލެބެމުން ދިޔަކަން އިޙުސާސް ކުރެވުނެވެ. އެމީހާގައިގައި ރަށްފުށުގެ ގޮތްގަނޑު ނެތްކަމީ ޔަޤީންކަމެކެވެ. އަހަރެންގެ އެޚިޔާލީ ދުނިޔެއިން ބޭރުކޮށްލީ އަހަންނާއެކު މި ދަތުރުގައި ބައިވެރިވި ހާނިސާއެވެ.

ހާނިސާ އަކީ އަހަންނާ ޚިލާފަށް ސަކަ މިޒާޖެއްގެ ވެރިއެކެވެ. ދަތުރަށް އާނ ބަސް ބުނީވެސް ހާނިސާއާއި އެކު އޮތް ދަތުރެއްކަން އެނގުނީމައެވެ. ނުދަންނަ ތަންތަނާ ނުދަންނަ މީހުނާ ވާހަކަ ދެއްކުމަކީ އަހަރެން ނިކަން ފަސްޖެހޭކަންކަމެވެ. ނިދި ކުނި މޫނާއެކު ހާނިސާ ދެއަތް ދެއަތަށް އުގުޅަމުން ސުވާލުފަތި އަމުނަންފެށިއެވެ. އަހަރެން އެގަޑީގަ އެތާ ހުރެގެންނެވެ. ދެމީހުންގެ ކުޑަ ދިމާ ކުރުމަކަށްފަހު އެތެރެއަށްވަނީ ތައްޔާރުވެގެން ކުރަން އައި މަސައްކަތައިގެން އުޅުމުގެ ނިޔަތުގައެވެ.

ގަޑިން ނުވައެއްޖެހި އިރު އަހަރުމެން ތިބީ ރަށުގެ ކައުންސިލް ދޮރުމަތީގައެވެ. މި ދަތުރަކީ ރަށްރަށުގައި ހިންގާ އެކި ޕްރޮޖެޓްތަކާއި ބެހޭ ގޮތުން މަޢުލޫމާތު އެއްކުރުމަށް ސިލްސިލާކޮށް ބޭއްވެމުންދާ ދަތުރުތަކެކެވެ. އަހަންނަށް މި ރަށުން ފެނުނު މަންޒަރުތަކުން ފާހަގަ ކުރެވުނީ ރާއްޖެތެރޭ މީހުންގެ ހިތްހެޔޮކަމާއި އޯގާވެރިކަމެވެ. ރާއްޖެތެރޭ މީހުންނަކީ ލޯބި ދިނުމުގައި ނަމޫނާ ދައްކާ ބައެއްކަމަށް މީހުން ބުނާތީ އަޑުއެހީމެވެ. މިއަދު އެކަން ލޮލަށް ފެނި އަތުންވެސް ހިފިއްޖެއެވެ.

މެންދުރު ކެއުމަށް އިންސާފުކޮށްލުމަށްފަހު ރަށުގެ އަތިރިމަތީ ޖޯއްޔެއްގައި ދެމީހުން އިށީންދެލީ ޖެހެމުން ދިޔަ ފިނި ވައިރޯޅިއާއި ތަނުގެ ހިންގައިމުކަން ލިބިގަތުމަށެވެ. ފޯނަށް ބަލަން އޮވެ ފޫހިވެގެން އަހަންނަށް އެއްލުނު ކަޅިއަކުން ފެނުނީ އެއްކަލަ ޒުވާނާއެވެ. ކަނޑު ނޫކުލައިގެ ޓައީއެއް އަޅާލާފައި މަޑުނޫކުލައިގެ ގަމީހެއްލާ ބޫޓަކަށް އަރައިގެން ހުންނަ އިރު އޭނާގެ ފިރިހެންވަންތަކަން މާ ރަނގަޅަށްވެސް ދައްކުވައިދެއެވެ. ފޯނެއްގައި ހުރެ ވާހަކަތަކެއް ދައްކަމުންދިޔައިރު އެޖަހާލާ ހިނިގަނޑު ކިތަންމެ ދުރުގައި ހުއްޓަސް އަހަންނަށްއަޑުއިވޭކަހަލައެވެ.

އެޒުވާނާއަށް އަހަރެން ބަލާކަން އެނގުނީ ބާވައެވެ. ފޯނުކޯލު ނިންމާލުމަށްފަހު އޭނާގެ މިސްރާބު ސީދާ ހުރީ އަހަރުމެންނާ ދިމާއަށެވެ. އަހަރެން އަވަހަށް ނުވާކަމަށް ހެދި އަނެއް ފަރާތަށް އެނބުރުނީމެވެ. އަހަންނަށް އޭނާ ނުފެންނަކަމެވެ. އޭޒުވާނާގެ ފިޔަވަޅުގެ އަޑު އަހަރެންގެ ބޮލު ތެރޭގައި ގުގުމަމުން ދިޔައެވެ.

“މިރަށު ކުދިންކޮޅެއް ނޫން ދޯ؟”

އަހަރެން ދިޔައީ ސިއްސައިގެންނެވެ. އަހަރެން ޖަވާބު ދިނީ ތެޅިތެޅި އޮތް ހިތަކައިގެންނެވެ. އެގޮތުގައި އިރުކޮޅަކު ވާހަކަ ދެއްކުމުގައި ހޭދަކުރުމަށްފަހު އަހަރުމެންގެ މަސައްކަތަށް އެނބުރި ދިޔައިރު އަހަރުމެންނަކީ ވަރަށް ގާތް ރަޙުމަތްތެރިންނަށް ވެއްޖެއެވެ. އަދި ދިމާވާނެ ކަމުގެ ޔަޤީންކަންދީ ފޯނު ނަންބަރުވެސް އެއްބަޔަކު އަނެއްބަޔަކާއި ބަދަލު ކުރެވުނެވެ. އޭނާގެ ވާހަކައިން އޭނާއަކީ މިރަށު މީހެއް ނޫންކަމާއި އެއީ ޑޮކްޓަރެއްކަން އެނގުނެވެ. އަދި މިރަށަށް އައީ ހަފުތާއަކަށް މަރުކަޒުގައި މަސައްކަތް ކޮށްލުމަށްކަން އެނގުނެވެ. ކޮންމެއަކަސް މާބޮޑު އަމިއްލަ ވާހަކަތަކެއް ނޭނގުނަސް ވަރަށް ގާތްބަޔަކަށް އަހަރުމެން ވެއްޖެއެވެ.

އަހަރުމެންގެ މި ހަފްތާގެ ދަތުރުގައި އަހަރުމެންނާއެކު އަމީޒްގެ ބައިވެރިވުން ލިބުމަކީ އަހަންނަށް އިތުރު ހިތްވަރެއް ލިބުނު ކަމެކެވެ. މަސައްކަތު ނޫން ގަޑިއެއް ވިއްޔާ އެކީގައި ހޭދަކުރަމުންގޮސް ދެދުވަހެއް ތެރޭ އެކަކު އަނެކަކާއި ކައިރިވެވުނު ވަރުން އަހަރެން ލަދުވެސް ގަނެއެވެ. އަހަންނަކީ މީގެ ކުރިން ދުވަހަކުވެސް އެއްވެސް ފިރިހެނަކާއި ކައިރިވެފައިވާ މީހެއްވެސް ނޫނެވެ. ނަމަވެސް އަމީޒުގެ ކޮންމެ އިޝާރާތަކަށް އަހަންނަށް ދެވެމުން ދިޔައީ އަމިއްލަ އިޚްތިޔާރެއްގައި ނޫނެވެ. އެކަމަކަށް އަހަރެން އެންމެ ނޭދޭ ކަންތަކުގައި އަހަރެން ގެނބިގެން ދިޔައީ ޚުދު އަހަންނަށްވެސް ނޭނގިއެވެ.

އެންމެ ފަހުން ވަކިވާންޖެހުނު ވަގުތު އައިސް ޖެހުނީ ކުޑަކުޑަ ހިނދުކޮޅެއްގެ ތެރޭގައެވެ. އެންމެ ފަހު ވަގުތު ކޮޅުގައިވެސް އަމީޒުގެ ފަރާތުން ލިބުނު ޔަޤީންކަމަކީ އަހަންނަށް ލިބުނު ހަމައެކަނި ހިތްވަރެވެ. އަދި ހަމަ އަވަހަށް ބައްދަލުވާނެކަމާއި، ރަނގަޅު ދިރިއުޅުމެއް ފެށޭނެ ކަމުގެ ޔަޤީންކަން އަމީޒު އަހަންނަށް ދިނެވެ. ހިތާއި ދެކޮޅަށް އަހަރެންގެ ހުރިހާ އިޙުސާސްތަކެއް އަމީޒުއާއި ހަވާލު ކުރުމަށްފަހު އަހަރެން މާލެ އެނބުރި އައީމެވެ.

މާލެ އައިސް ދެދުވަސްވި އިރުވެސް އަމީޒުގެ ފަރާތުން އެއްވެސް ކޯލެއް ނައުން ވެގެންދިޔައީ އަހަރެންގެ ހިތަށް ތޫނު ކަށިތަކެއް ހެރުން ކަހަލަ ކަމަކަށެވެ. ނިއްވާލާފައޭ ބުނާ އެ ނަންބަރަށް އަހަރެން ގުޅަމުންދިޔަ އަދަދު ނޭނގޭނެއެވެ. އެރަށު ސިއްޙީ މަރުކަޒަށް ގުޅުމުން އަމީޒު އޭގެ ދެދުވަސްކުރިން އެރަށުން ފުރި ވާހަކަ ލިބުނެވެ. ފޯނު އަތުން ދޫނުކުރާ ހާލު އަހަރެން ތެޅިފޮޅުނީމެވެ. ދެކެ ދެނެވޮޑިގެންވާނީ ހަމަ ﷲއެވެ.

އޭގެ ހަފުތާއެއް ފަހެވެ. އަހަންނަށް ނިދިފައި އޮއްވާ ހޭލެވުނީ ނުބައި ޒާތެއްގެ ހުވަފެނެއް ފެނިގެންނެވެ. އަމީޒު މީހަކާ އިންނަނީއެވެ. އަހަންނަކާ ނޫނެވެ. އެހެން މީހަކާއެވެ. އަވަހަށް ތެދުވެ އެ ނަންބަރަށް ގުޅާލީމެވެ. މިފަހަރު ރިންގުވިއެވެ. ދެތިން ފަހަރު ގުޅިއިރުވެސް ފޯނެއް ނުނަގައެވެ. މެސެޖެއް ކޮށްލަން ބަލާލިއިރު އެ ނަންބަރު ހުޅުވިކަމުގެ މެސެޖު މީގެ ގަޑިއެއް އިރު ކުރިން އައިސްފައި އޮތެވެ. އަހަރެން އަނެއްކާވެސް ހުއްޓުމެއް ނެތި ގުޅަން ފަށައިފީމެވެ. އެތައް ފަހަރަކު ގުޅި ފަހުން ފޯނު ނެގީ އަންހެން ކުއްޖެކެވެ. ތުރުތުރުލާ އަޑަކުން އަމީޒު ކޮބާތޯ ސުވާލު ކޮށްލީމެވެ. އެކޮޅުން އަމީޒް ނިދާފައި އޮތްކަމުގައި ބުނުމުން އެއީ ކާކުތޯ ސުވާލުކޮށްލީމެވެ. އަހަރެންގެ ހިތަށް ޚަންޖަރެއް ހަރާލި ކަހަލައެވެ. އެކޮޅުން ބުނި ގޮތުގައި އެއީ އަމީޒުގެ އަންހެނުންނެވެ. އަހަރެން އިތުރަށް ބުނާނީ ފަހެ ކީކޭބާވައެވެ. އަހަންނަކަށް އިތުރަށް ބަހެއް ނުބުނެވުނެވެ. އެކޮޅުން އެތައް ފަހަރަކު ހަލޯއޭ ގޮވުމަށްފަހު ފޯނު ކަނޑާލިއެވެ. އަހަރެންގެ ހިތުގައި އަޅަމުން ދިޔަ ވޭނުގެ އާހު ރަނގަޅު ގިސްޖެހުމަކާއެކު ބޭރުވާން ފެށިއެވެ. އެންމެ ފަހުން އަޑުވީއްލާ ރޯންފެށީ ހިތުގައި  އަޅަމުންދިޔަ ވޭން ކުޑަކުރުމަށެވެ.

އެގޮތަށް އެތަށް އިރަކު ރުއިމަށްފަހު އަހަރެން ތެދުވީ އާ އަޒުމަކާއެކު ކުރިއަށް ދިއުމަށެވެ. އަމީޒުއަށް އަހަރެންގެ ދިރިއުޅުމުގައި ނުހިފެހެއްޓޭނެ ކަމުގައި ދެއްކުމުގެ ނިޔަތުގައެވެ. އަމީޒުގެ ހަނދާންވާ އެއްވެސް ކަމެއް އަދި އެއްޗެއްވެސް އަހަރެންގެ ދިރިއުޅުމުގައި ބަހައްޓާކަށް އަހަރެން ބޭނުމެއް ނުވިއެވެ. އޮފީހުން ވަކިވާން ވަގުތުން ސިޓީ ލިޔެ ފޮނުވީމެވެ. އާއިލާގެ އެއްވެސް މީހެއް ނެތް ތިންބުރީގެ ގެއެއްގެ ވެރި އަހަރެން އުޅުނު އެޕާރޓްމެންޓް ކުއްޔަށް ދިނުމަށް ޕޯސްޓް ކޮށްލީމެވެ. އޭރުގައި ތިބި ހުރިހާ ރައްޓެހިންނާ ދިރިއުޅުމާ ދުރަށް ދިއުމަށް ނިންމީ އައު ހިތްވަރަކާއި އެކުގައެވެ. ފޯނު ނިއްވާލާ ސިމް ކުދިކުދި ކޮށްލީމެވެ. މެއިލްތަކާއި އައިޑީތައް ދޫކޮށްލީމެވެ. އިސާހިތަކު ފަސޭހައިން އެޕާރޓްމެންޓް ކުއްޔަށް ދޫކޮށްލެވުމަށްފަހު އެހެން ތަނަކަށް ކުއްޔަށް ބަދަލުވީމެވެ. ފަހަތަށް އެންމެ ފަހަރަކުވެސް ބަލައިނުލުމުގެ ނިޔަތާއި އެކުގައެވެ.

ވަޒީފާއަކަށް ނުދިޔަ ކަމުގައިވިޔަސް އަހަންނަށް އުޅެވޭ ވަރަށް އަހަންނަށް ލިބެއެވެ. ނަމަވެސް އެ ޚިޔާލުތަކާއި އެކު ގޭގައި އޮންނާކަށް އަހަންނެއް ބޭނުމެއް ނޫނެވެ. ވަޒީފާއަކަށް ފޯރމް ލީމެވެ. އިސާހިތަކު ވަޒީފާ ހަމަޖެހި ވަޒީފާއަށް ނިކުންނަން ފެށުމުން އަހަރެންގެ ހިތާމަތަކަށް ލުޔެއްވެސް ލިބެންފެށިއެވެ. އެހެންވެސް އުޅެވުނީ މަދު ދުވަސްކޮޅެއްގައެވެ. އަހަންނަށް ގޮތްނޭގޭ ގޮތްތަކެއް ވާންފެށިއެވެ. އެހެންޏާ ނުފެންނަ ކަހަލަ އަސަރުތަކެއް އަހަރެންގެ ހަށިގަނޑުން ފެންނަންފެށިއެވެ. އަހަރެންގެ އަޒުމުގައި ސިއްކަ ޖެހިގެންދިޔައީ އަމީޒުގެ ދަރިއަކަށް އަހަރެން ބަލިވެ އިންކަން އެނގުނު ހިސާބުންނެވެ. ކަންކުރާނެ ގޮތެއް ނޭގި އަހަންނަށް ހަތަރު އަދަރެސް ފެނުޖެހުނު ކަހަލައެވެ. މިކަން ހިއްސާ ކުރާނީވެސް ވަކި ކާކު ކައިރީބާވައެވެ.

ވަރަށް ވިސްނުމަށްފަހު ގޮތެއް ނިންމީމެވެ. އަހަރެންގެ އަތުގައި ފައިސާ އެބަހުއްޓެވެ. ފައިސާއަށް ނުކުރެވޭ ކަމެއް ވަކި އޮންނާނެ ހެއްޔެވެ؟ އަހަރެންގެ ބަނޑުގައިވާ އަމީޒުގެ ބޭވަފާތެރިކަމުގެ ނިޝާން ދުއްވާލަން ނިންމީ އަހަންނަށް އެހެން ގޮތަކަށް އަލިމަގެއް ނުފެނިގެންނެވެ. އަދި އެފަދަ ބޭވަފާތެރިއެއްގެ އެއްވެސް ހަނދާނެއް ބޭނުންނުވާތީއެވެ. ރާއްޖޭން ބޭރުގެ ނަން މަޝްހޫރު ހޮސްޕިޓަލަކުން އެޕޮއިންޓްމެންޓެއް ހައްދައި ހުރިހާ ކަމަކަށް ތައްޔާރުވެގެން އަހަރެން ފުރީ ވިސްނާނެ ވަރަކަށް ވިސްނާ ނިންމާފައެވެ.

ދުވަހުގެ ނުވައެއް ޖަހާއިރަށް އޮތް އެޕޮއިންޓްމެންޓަށް އަހަރެން ގޮސް އިނީ މުޅި ހަށިގަނޑު ތުރުތުރުލާ ހާލުގައެވެ. އެކަނި މާއެކަނި އިންއިރު އަހަރެންގެ މޭ ބާރަށްތެޅޭ އަޑު އަހަންނަށް ހަމަ ރަނގަޅަށްވެސް އިވެއެވެ. ގަޑިން ނުވައެއް ޖެހި އިރަށް އަހަންނަށް އެތެރެއިން ގޮވާލިއެވެ. ޑޮކްޓަރު އަހަރެން ބެލުމަށްފަހު ހުރިހާ ކަމެއް ހަމަޖެއްސުމަށް ނަރުސްކުދިން ކުރެން އެދުނެވެ. އަދި އަހަރެން ކައިރީ ހަމަޖެހިލުމަށް ބުންޏެވެ. ނަމަވެސް ހަމަޖެހެވޭނީ ވަކި ކިހިނެއް ހެއްޔެވެ؟ ކުރަން މިއުޅެވެނީ ކިހާ ވަރެއްގެ ކަމެއްކަން އަހަންނަށް ވިސްނެއެވެ. ފާފައިގެ މައްޗަށް އަނެއް ފާފަ ކުރަން ދެވޭކަން އަހަންނަށް އެނގެއެވެ.

އަހަރެން ހަމަޖެހެވޭތޯ މަސައްކަތް ކުރީމެވެ. ނަމަވެސް ދެން ހިތަށް ވެރިވާން ފެށީ މީގެ ކުރިން ހިތަށް ނާރާ އެއްޗެހިތަކެކެވެ. އަހަންނަށް އޮޅުވާލާ ދޮގު ބުނީ އަމީޒުއެވެ. މިކުޑަ ފުރާނައެއް ނޫނެވެ. މި ފުރާނަ އަހަރެންގެ ހަށިގަނޑު ތެރޭގައި ވިންދު ޖަހަންފެށީ އަހަންނާ އަމީޒުގެ ފާފައިގެ ސަބަބުންނެވެ. އޭގައި މިކުޑަ ފުރާނައިގެ އޮތީ ކޮން ކުށެއް ހެއްޔެވެ؟ އެއް ފާފަ ކުރެވިއްޖެއެވެ. އަދި އޭގެ އިތުރުންވީ ކުށެއްނެތް ކުޑަ ފުރާނައެއްގެ މަރާ ހަވާލުވާން ހެއްޔެވެ؟

އަހަރެން ޚިޔާލުތަކުގައި ގެނބިފައިވަނިކޮށް ނަރުހުން އަހަރެން ގޮވައިގެން ގޮސް އެކަމަށް ތައްޔާރުކޮށް ޑޮކްޓަރަށް އެންގިއެވެ. ޑޮކްޓަރު އައީ އެކަމަށް ތައްޔާރުވެގެންނެވެ. ނަމަވެސް އަހަރެން ތައްޔާރެއް ނޫނެވެ. އަހަންނަށް މީ ވާވަރު ކަމަކަށް ނުވިއެވެ. ޑޮކްޓަރުންގެ ފަރާތުން މާފަށް އެދުމަށްފަހު އަހަރެން ދުވެފައި ނިކުތީ ﷲގެ ހަޟުރަތަށް ޝުކުރުވެރިވާ ހާލުގައެވެ. އަހަރެން މި ދަރިފުޅު ވީ އެންމެ ރަނގަޅަކަށް ބަލާނެ ކަމުގައި އަޒުމް ކަނޑައެޅީމެވެ.

ހޮސްޕިޓަލުން ނިކުތް މަގުމަތިން އަހަންނަށް ދިމާވީ މީގެ ދެތިން އަހަރު ކުރިން އަހަންނާ އެކު ސުކޫލުގައި ކިޔަވަން އުޅުނު ކުއްޖަކާއެވެ. މާހިން އަކީ ހުތުރު މީހެއް ނޫނެވެ. އަބަދުވެސް ސީރިއަސް މޫޑެއްގައި ފެނުނު މާހިންގެ މޫނުމަތިން މިއަދު ފެންނަމުން ދިޔައީ ހިތާމައިގެ އަސަރެވެ. ގޮތް ހުސްވެފައިވާ މަންޒަރެވެ. އަހަންނަށް ބޭއިޚްތިޔާރުގައި މާހިންއާއި ކައިރިވެލާ ވެގެން އުޅޭގޮތާއި ބެހޭގޮތުން ސުވާލު ކޮށްލީމެވެ. މާހިންގެ ލޯބިވާ އަނބިމީހާ ވަނީ ވިހަން ވައްދާފައެވެ. ދެމައިންގެ ހާލު ސީރިއަސްއެވެ. އަހަރެންގެ ހިތުގައި މާހިންއާއި ދޭތެރޭ ހަމްދަރުދީ އުފެދުނެވެ.

އަހަރުމެން އިންތިޒާރު ކޮށްގެން ތިބީ އަދިވެސް އުފާވެރި ޚަބަރަކަށެވެ. ނަމަވެސް އެދެމައިން މިދުނިޔެ ދޫކޮށްފަދިޔައީ މާހިން މުޅިން އެކަނިކޮށްފައެވެ. މާހިންއާއި އެކު އަހަރެން ހުރެދިނީ އޭނާއަށްޓަކައި އަހަރެންގެ ހިތުގައި އޮތް ހަމްދަރުދީއެއްގެ ބޮޑުކަމުންނެވެ. އަހަންނަށް ފެނިގެންދިޔައީ ފުރާނައިގެ މުހިންމު ކަމެވެ. ﷲ އަހަންނަށް ހެޔޮގޮތް ދެއްކެވީތި ޝުކުރުވެރިވަމެވެ. އަލުން އަނބުރާ ރާއްޖެ އަންނަން ބޭނުން ނުވާތީ އެކޮޅުގައި އުޅޭނެ ގޮތެއް ހޯދުމުގެ މަސައްކަތް ފެށީ މާހިން ގެ ދެމައިން ވަޅުލުމުގެ ކަންތައް ނިމުމުންނެވެ.

މީވެސް އުނދަގޫ ކަމެކެވެ. ދެދުވަހެއް ވި އިރުވެސް އަހަންނަށް އެކަން ކާމިޔާބު ވާގޮތެއް ނުވިއެވެ. މިކަމުގައި ބިޒީކޮށް އުޅުނަސް އަހަރެންގެ ހާލާ ދޭތެރޭ ނުވިސްނޭ އެންމެ އިރުކޮޅެއްވެސް ނާދެއެވެ. މާހިންއަށް އަހަރެން މިކޮޅުގައި މަޑުކުރަން އުޅޭކަން އެނގުމުން ޚިޔާލުދިނީ އެގޭގައި އޭނާއާއި އެކު އުޅުމަށެވެ. އެގޮތުން އޭނާއަށްވެސް އެކަނިވެރިކަން އިޙުސާސް ކުރެވޭލެއް ކުޑަވާނެކަމަށް ބުނެ އެތައް ވާހަކައެއް ދެއްކުމުން އެކަމާ އެއްބަސްވީ ހިތާ ދެކޮޅަށެވެ. އޭނާއާއި އެކު އުޅޭނަމަ އަހަރެންގެ ހާލަތު ނުފޮރުވޭނެތީއެވެ. ވަގުތީ ގޮތުން މާހިންގެ ހިތްހަމަ ޖައްސާލުމަށްޓަކައި އަހަރެން އާނ ބަސްބުނީ ފަހުން އެހެން ގޮތެއް ލިބޭތޯބެލުމުގެ ނިޔަތުގައެވެ.

މާހިންއަކީ ވަރަށް އޯގާތެރި މީހެކެވެ. އޭނާގެ އެ ހިތްދަތި ކަމުގައިވެސް އަހަންނަށް ވަރަށް އަޅައިލައެވެ. ފާއިތުވަމުން ދިޔަ ކޮންމެ ދުވަހެއް އަހަންނަށް ކުރަމުންދާ އަސަރު ބޭރުމަތިން ދައްކުވައިދެމުންދިޔައެވެ. މާހިންއަށް ސިއްރު ކުރެވޭތޯ އަހަރެން ވަރަށް ބެލީމެވެ. އެންމެ ފަހުން މާހިންއަށް އެކަން ފަޅާއަރައިގެން ދިޔައީ އަހަރެން އެކަމަށް ތައްޔާރުވެސް ނުވެ ހުއްޓައެވެ. އެކަހަލަ ދުވަސްވަރެއް ކައިރިން ފެނިފައި ހުރި މީހަކަށްވާތީ މާހިންއަށް މިކަންކަން ވަރަށް ރަނގަޅަށް ނަގައިގަނެވުނެވެ. އޮޅުވާލެވޭތޯ އަހަރެން ކުރި މަސައްކަތްވެސް ބޭކާރުވުމުން އެންމެ ފަހުން އަހަންނަށް ޖެހުނީ ތެދަށް ކިޔާދޭށެވެ.

މާހިންގެ ފަރާތުން އަހަންނަށް ލިބުނީ އަޖައިބު ކުރުވަނިވި ރައްދެކެވެ. އޭނާ އެދުނީ އޭނައާ އަވަހަށް ކައިވެނި ކުރުމަށެވެ. ވަކި ދެވަނަ ކަމެއް ވެގެން ނޫނެވެ. އަހަރެންގެ ބަނޑުގައިވާ ދަރިފުޅަށްޓަކައެވެ. އޭނާގެ ނިމިދިޔަ ދަރިފުޅަށްޓަކައެވެ. އަހަރެން ދޭނީ ވަކި ކޮން ޖަވާބެއްބާއެވެ. އަހަންނަށް ބޭނުންވެފައިވަނީ އެކަހަލަ ފުރުސަތެކެވެ. އަހަރެން އެފުރުސަތުގެ ބޭނުން ހިފީމެވެ.

ފާއިތުވަމުންދިޔަ ކޮންމެ ދުވަހަކުން އަހަންނަށް ފެނުނީ މާހިންގެ ރަނގަޅުކަމެވެ. އޭނާގެ އޯގާތެރިކަމެވެ. މަޑުމަޑުން އަހަރުމެންގެ ދިރިއުޅުން ހަމައަކަށް އެޅެމުންދިޔައެވެ. އަހަންނަށް ލިބުނީ ލޯބިލޯބި ފިރިހެން ކުއްޖެކެވެ. އާޒިމްގެ އުފަންވުންވީ މާހިންގެ ލޯބި އަހަރުމެންނަށް ދެގުނައަށް ލިބެންފެށި ކަމަކަށެވެ. އާޒިމްގެ ކޮންމެ އަޑަކަށް މާހިން ހުންނަނީ ތައްޔާރުވެއެވެ. ﷲ ދެއްވި ރަޙުމަތެއްގެ ބޮޑުކަމާއެވެ. އަހަރެން ވިހާ ގަދަވުމުން މާހިން އަހަރެން ވަރިކުރިއެވެ. އަދި އަހަންނަށް ތަޢުބާ ވުމަށް ފުރުސަތު ހުޅުވައިދިނުމަށްފަހު އަހަރެން ގަބޫލުކުރީ ހެޔޮހިތުންނެވެ. މިފަދަ ނަސީބެއް އެންމެނަށްވެސް މިންވަރު ކޮށްދެއްވާށި. އާމީން!

އާޒިމް ބޮޑުވަމުން ދިޔަ ވަރަކަށް އަހަންނަށް އަމީޒުގެ ހަނދާންތަކާއި ކައިރި ކުރުވަން ފެށިއެވެ. މާހިންއަށް އަމީޒު ނޭގުނަސް މިއަދުވެސް އަމީޒުގެ ތަސްވީރު އަހަރެންގެ ހިތުގައި ބިންވަޅުނެގިފައިވެއެވެ. އެތަސްވީރާއި އާޒިމް ކުޑަވެސް ތަފާތެއް ނެތެވެ. އަމީޒު ދޫކޮށް އެހަނދާންތަކާއި ދުރުވާން ނިންމީ އަހަންނެވެ. ނަމަވެސް…. އެ ހަނދާންތަކަކާއި ވައްކެއްނުވެވުނެވެ.

(ނިމުނީ)

ލިޔުންތެރިޔާގެ ފުރަމަލަ

ޚަދީޖަތު ސަނާ
ޚަދީޖަތު ސަނާ
މުނިއަވަސްގެ ޑެޕިއުޓީ އެޑިޓަރ ޚަދީޖަތު ސަނާ އަކީ ލޯބީގެ، އަސަރުގަދަ އަދި ހިތާމަވެރި ވާހަކަ ލިޔުމާއި ކިޔުމުގައި ފާހަގަކޮށްލެވޭ ލިޔުންތެރިއެކެވެ. އިޖްތިމާޢީ މައުޟޫތަކަށް ސައްނު ލިޔާ ކުރުވާހަކަތަކުން ބޭނުންވާ މެސެޖް ފޯރުކޮށްދެނީ ވަރަށް އަސަރާއި އެކުގައިކަން ފާހަގަކޮށްލެވެއެވެ.
މި ލިޔުންތެރިޔާގެ ބައެއް އެހެން ލިޔުންތައް

ގުޅުންހުރި ލިޔުން: