އެމެރިކާގެ ނޭޝަނަލް ލައިބްރަރީ އޮފް މެޑިސިން ބުނާގޮތުން ‘ޓްރީޗަރ ކޮލިންސް ސިންޑްރަމް’ އަކީ ކޮންމެ 50،000 މީހުންގެ ތެރެއަށް އެކަކަށް ކުރިމަތިވާ ޖެނެޓިކް ޑިސޯޑަރ އެކެވެ. މިކަމުގެ ސަބަބުން މޫނުގެ ކަށްޓާއި ޓިޝޫތައް އުފެދި ތަރައްޤީވާ ގޮތަށް ބަދަލު އާދެއެވެ. އެއްމެ ބޮޑަށް އަސަރުކުރަނީ ކޮލުގެ ކަށްޓާއި ދަތްދޮޅީގެ ކަށްޓާއި ދަތްދޮޅި އަށެވެ.

ޓްރީޗަރ ކޮލިންސް ސިންޑްރަމް ގެ ސަބަބުން މޫނަށް އައިބުކަން ގެނެސްދެއެވެ. ނަމަވެސް މިކަމުގެ ސަބަބުން ކުއްޖާގެ ތޫނުފިލި ކަމަކަށް އަސަރެއް ނުފޯރައެވެ. އެހެންކަމުން މިފަދަ ކުދިންނަށް ގަނާކުރެވޭ ހިނދު އެކުދިންނަށް ގަނާކުރާކަން އެކުދިން ދެނެގަނެ އެވެ.

މިއީ ޖޯނޯ ލެންކެސްޓަރ ގެ ވާހަކަ އެވެ. އޭނާ އަކީ ޓްރީޗަރ ކޮލިންސް ސިންޑްރަމް ޖެހިފައިވާ މީހުންގެ ތެރެއިން އެންމެ މަޝްހޫރު މީހާ އެވެ.

2015 ވަނަ އަހަރު ބޭއްވުނު ނޯރޑް ބްރޭކްތުރޫ ސަމިޓްގައި ޖޯނޯ ވަނީ އޭނާގެ ހަޔާތުގައި ކުރިމަތިވި އެއްމެ ހިތްދަތި ތަޖުރިބާ ހިއްސާކޮށްފަ އެވެ. “އަހަރެން އުފަންވީ ޖެނެޓިކް (މައިންބަފައިންގެ ކިބައިން ވާރުތަކުރާ) ހާލަތެއްގެ ސަބަބުން އަހަރެންގެ މޫނުގެ ސިފައަށް އަސަރުކޮށްފައިވާ ކުއްޖެއްގެ ގޮތުގައި. އަހަރެންގެ ދަތްދޮޅީގެ ކަށްޓެއް ނެތް. އަދި އަހަރެންގެ ދެލޯވެސް ހުންނަނީ ތިރިއަށް އެލި ވަަޅުވަދެފަ. އަހަރެންގެ ކުޑަކުޑަ ކަންފަތްދެކެ އަހަރެން ލޯބިވަން، ރޭގަނޑުވެސް ކަންފަތަށް ފިންޏެއް ނުވޭ. އެކަމަކުވެސް އަހަރެން އަޑުއެހުމަށް ބޭނުންކުރާ އެހީ (ހިޔަރިންގ އެއިޑް) އެއް ބޭނުންކުރަން.”

ޖޯނޯ އަކީ ހަށިގަނޑު ރީތިކޮށް ބެހެއްޓުމަށް ވަރަށް ބޮޑަށް މަސައްކަތްކުރާ ޒުވާނެއް

މިއަދު ޖޯނޯ ގެ ޓްވިޓަރ ފޮލޯކުރާ 12.4 ހާސް މީހުން، 61.2 ހާސް އިންސްޓަގްރާމް ފޮލޯކުރާ މީހުން، އަދި ފޭސްބްކް ފޮލޯކުރާ 84.4 ހާސް މީހުން އެބަތިބި އެވެ. އެހެންނަމަވެސް އަދިވެސް އޭނާގެ ދިރިއުޅުމަކީ ވަރަށް ބޮޑެތި ގޮންޖެހުންތަކެއް ހުރި ދިރިއުޅުމެކެވެ.

ޖޯނޯ އުފަންވިތާ 36 ގަޑިއިރުގެ ތެރޭގައި އޭނާގެ މައިންބަފައިން ވަނީ އޭނާ ދޫކޮށްލާފަ އެވެ. ހަމަ އެއްމެ ސަބަބަކާއި ހުރެއެވެ. އޭނާއަށް ލިބިފައިވާ ހުތުރު އަދި އައިބު ސިފައެވެ. މިކަން އޭނާ ކިޔައިދިނީވެސް ނޯރޑް ކޮންފަރެންސް 2015 ގައެވެ.

“އަހަރެން އުފަންވުމާއިއެކު އަހަރެންގެ އަސްލު މައިންބަފައިން ތިބީ ޝޮކެއްގެ ތެރޭގަ. އަހަރެން އުފަންވިތާ 36 ގަޑިއިރު ފަހުން ހޮސްޕިޓަލުން ނެރެވުނު. އިޖްތިމާޢީ ޚިދުމަތްދޭ ފަރާތަކުން އަހަރެން ބަލައިބޮޑުކުރާނެ މީހަކު ހޯދި. އަހަރެން ބަލައިބޮޑުކުރީ ޖީން ނަމަކަށް ކިޔާ އަންހެނެއް.”

ޖޯނޯ ގެންގުޅެ ބޮޑުކުރި އޭނާގެ ފޯސްޓަރ ޕޭރެންޓް ޖީން

ޖޯނޯ ގެ އަސްލު މައިންބަފައިންނާއި ޖޯނޯ ގުޅުވުމަށް ޖީން ވަރަށް ބުރަކޮށް މަސައްކަތް ކުރިއެވެ. ނަމަވެސް ޖީން ފޮނުވި ސިޓީތަކުން އެއްވެސް ސިޓީއަކަށް ޖަވާބުދިނުމެއް ނެތި އަނބުރާ ފޮނުވާލީ އެވެ. އެހެންކަމުން 1990 ވަނަ އަހަރު މެއި މަހުގެ 18 ވަނަ ދުވަހު ޖޯނޯ އަކީ ޤާނޫނީގޮތުން ޖީން ގެ ދަރިއަކަށް ހެދުމަށްޓަކައި އެޑޮޕްޓްކުރި އެވެ.

އަމިއްލަ މަޔަކުވެސް ލޯބިނުވާާނެހާ ބޮޑަށް ލޯބިދިން ބެލެނިވެރިއެއް ޖޯނޯ އަށް ލިބިފައިވިޔަސް، އޭނާ ހެދިބޮޑުވަމުން ދިޔަ ދުވަސްވަރަކީ އުނދަގުލާއި ދަތިކަން އިންތިހާއަށް މައްޗަށް ދިޔަ ދުވަސްތަކަކަށެވެ. އެޑްލެއިޑް ނައޮ އަށް ޖޯނޯ ދިން ބަސްދީގަތުމެއްގައި ބުނެފައިވަނީ:

“މަށަށް އިހްސާސް ކުރެވުނު އަހަންނަކީ އިތުރު އެހެން މީހެއް ނެތް އެކަނިހުރި މީހެއް ކަމަށް. އަދި އަހަރެން ކަހަލަ މީހަކަށް އުޅޭ ހަމަ އެކަނި މީހަކީ އަހަރެން ކަމަށްވެސް. މީހުންނަކީ ނަސީބުވެރި ބަޔަކަށް ވެގެންދަނީ ނުވަތަ ޕްރޮފެޝަނަލް ފުޓްބޯޅަ ކުޅުންތެރިއަކަށް، ޑޮކްޓަރަކަށް ނުވަތަ ގާނޫނީ ވަކީލަކަށް ވެގެން ދިއުމަކީ ނަސީބުހުރި ކަމަކަށް ވާއިރު އަހަރެން މި ހާލުގައި އުޅެން ކުރިމަތިވީ ކީއްވެބާއޭ ހިތަށް އަރާ.”

އެކިކަންކޮޅުތަކަށް ޒިޔާރަތްކޮށް ނުކެޅުންތެރިކަމާއި އައިބުތައް ހުންނަ ކުދިންނާ ޖޯނޯ ބައްދަލުކުރޭ

އެކަނިވެރިކަމުގެ އިހްސާސްތައް ކުރެވެން ފެށުމުން ޖޯނޯ އަށް ވަރަށް ބޮޑު މާޔޫސްކަމެއް ލިބެން ފެށިއެވެ. އެކަމުން އަރައިގަތުމަށްޓަކައި މިއަދު ޖޯނޯ ގެންދަނީ ދުނިޔޭގެ އެކި ކަންކޮޅުތަކުގައި ތިބި ތަފާތު އެކިއެކި ނުކުޅެދުންތެރިކަން ހުންނަ ކުދިންނަށް ޒިޔާރަތް ކުރަމުންނެވެ. އެފަދަ ކުދިންނާއި އެކުދިންގެ މައިންބަފައިންނަށް ހިތްވަރު ދެމުންނެވެ. އޭނާގެ ސަބަބުން މިފަދަ ކުދިންނަށް ހިތްވަރު ލިބިގެންދެ އެވެ. މީގެ އިތުރުން ޖޯނޯ މިހެން ކުރަންފެށި ދަތުރުތަކުގެ ތެރެއިން ދަތުރެއްގައި ވަނީ އޭނާާދެކެ ލޯބިވާ ހަޔާތުގެ ބައިވެރިއެއް ހޯދާފައެވެ. ލޯރާ ނަމަކަށް ކިޔާ ރީތި ޅަދޮނޅު އަންހެންކުއްޖެވެ.

ޖޯނޯ އާއި އޭނާހެ ހަޔާތުގެ ބައިވެރިޔާ ލޯރާ

ޖޯނޯ އަށް އޭނާގެ ހަޔާާތުގެ ބައިވެރިޔާ އާއި އެއްމެ ފުރަތަމަ ބައްދަލުވެވުނީ ޖިމް އެއްގައި ޖޯނޯ މަސައްކަތްކުރި ދުވަަސްކޮޅުގަ އެވެ. އެންޑީޓީވީ މެދުވެރިކޮށް ބީބީސީ އަށް ޖޯނޯ ދިން ބަސްދީގަތުމެއްގައި ބުނީ، “އަހަންނަށް އޭނާާ އާއިއެކު ހޭދަކޮށްލެވޭ ކޮންމެ ވަގުތަކީ ވަރަށް އަރާމާއި ހަމަޖެހުން ލިއްބައިދޭ ވަގުތުކޮޅެއް.” ޖޯނޯ އާއި އޭނާގެ ހަޔާތުގެ ބައިވެރިޔާ ދާދިފަހުން ވަނީ ވެސްޓް ޔޯރކްޝިއާ ގެ ‘ނޯރމެންޓަން’ އިން ގެއެއް ގަނެފައެވެ.

ބީބީސީ އިން ވަނީ ޖޯނޯ ހިމަނައިގެން ވަރަށް އަސަރުންފުރިފައިވާ އިބްރަތްތެެރި ޑޮކިއުމެންޓަރީ އެއް ތައްޔާރުކޮށްފަ އެވެ. “ލަވް މީ، ލަވް މައި ފޭސް.” ގެ ނަމުގައި ހަދާފައިވާ މި ފިލްމުގައި ދައްކުވައިދެނީ ޖޯނޯގެ ހަޔާތުނާމާ އެވެ. އެ ހަޔާތުނާމާގެ ހިތްދަތި، ތޫފާނީ ގަދަ ކޮޅިގަނޑުގައި އޭނާގެ ހަޔާތުގެ ފަންސިގަނޑު ދުއްވި ގޮތެވެ. އަދި އޭނާގެ އަސްލު މައިންބަފައިންނާއި ބައްދަލުކުރުމަށް ކޮށްފައިވާ މަސައްކަތްތަކެވެ.

ފަސްދޮޅަސް މިނެޓްގެ މި ޑޮކިއުމެންޓްރީ ހަމަ ކޮންމެހެންވެސް ބަލައިލުން މުހިއްމެވެ.

https://www.youtube.com/watch?v=n8byW9aPOkY

މަސްދަރު: ސްޕޮޓްލައިޓް ސްޓޯރީޒް

ލިޔުންތެރިޔާގެ ފުރަމަލަ

އަޙްމަދު ރަޝީދު
އަޙްމަދު ރަޝީދު
ހުރިހައި ދާއިރާއެއްގެ ލިޔުންތައްވެސް މުނިއަވަސްގެ ފައުންޑަރ އަދި ޗީފް އެޑިޓަރ ލިޔާނެއެވެ.

ގުޅުންހުރި ލިޔުން: