‏މިއީ ދުނިޔޭގެ ތާރީޚުގައި ލިޔެވިފައި ނެތް، އަދި ފެންނާނެ ކަމަށް އުންމީދުކުރި ސަފްޙާއެއް ނޫނެކެވެ. މިއީ ތާރީޚުގައި ކަޅު އަކުރުން ލިޔެވިގެންދާނޭ ހިތްދަތި ދުވަސްތަކެކެވެ. މިއީ 21 ވަނަ ގަރުނުގައި ނާމާންކަމާއި ބިރުވެރިކަން އެންމެ ބޮޑަށް ވެރިވި ވަގުތުވެސް މެއެވެ. ދުނިޔޭގެ ހުރިހާ ގައުމެއް ކަަހަލަގޮތަކަށް މިއަދު މިއޮތީ ކުޑަކަކޫ މައްޗަށް ތިރިވެެ، ތެދުވެ ދުއްވައިގަނެވޭނޭ އިރެއްގެ އިންތިޒާރުގައެވެ.

ދިރި އުޅުމުގެ އުފަލާއި އަރާމާއި، ފިނި މީރުކަމުގެ ދާނެއްގައި ޣާފިލުކަންމުގެ ގަދަ ނިދިން އަހަރަމެން ނިދާފައި ތިއްބާ ކޮރާނާގެ ހިތްދަތި ޚަބަރާއި އެކު ހޭލެވުނު އިރު އިހުގެ ހާލަތު ބަދަލުވެއްޖެއެވެ. އާންމު ދިރިއުޅުމަށް ބޮޑެތި ބަދަލުތަކެއް ގެންނަން ޖެހިއްޖެއެވެ. މުޅި ދިރިއުޅުން ހަތަރު ފާރުގެ ތެރޭގައި ތަހަންމަލުކުރަން މަޖުބޫރުވިއެވެ. ދިރިއުޅުމުން ކުރިއަށް ދާން ރޭވުނު ކިތަންމެ ކަމަކުން އަތްނަގައި، މަޑުޖައްސާލަންޖެހުނެވެ.

ފުރަބަންދާއެކު، ކުޅިވަރާއި މަޖަލުން އަހަރުމެން ދުރުވާންވީ ވަގުތަކީ މިއީ ނޫންތޯއެވެ. މުސީބާތުގެ މިވަގުތަކީ އަހަރަމެންގެ ހިތް، ވެރި ރައްބަށް އިތުރަށް ޚާލިޞްކުރަންވީ ވަގުތެއް ނޫންތޯއެވެ. ފުރަބަންދުގައި މާތް ﷲ އަށް އިސްތިޣްފާރުކުރުން ގިނަކޮށް، ގިނަގިނައިން ތަޢުބާވާންވީ ވަގުތަކީ މިއީ ނޫންތޯއެވެ. ހާލަތު ބަދަލުވެ މަސައްކަތުގެ މާހައުލަށް ނިކުތުމުގެ ކުރިން ވެރި ރައްބަށް އަޅުކަން އަދާކުރުމަށް މިއަށް ވުރެ ވަކިން ބޮޑު ފުރުސަތެއް އެބައޮތްތޯއެވެ؟

2020 ވަނަ އަހަރުގެ ބަރަކާތްތެރި ރަމަޟާން މަހަށް އަޅުގަނޑުމެން މަރުޙަބާކީ މި ބިރުވެރިކަމުގެ ތެރޭގައި ވަނިކޮށެވެ. މި ކަން ވެސް ވީ އަޅުގަނޑުމެން އިންސާނުންނަށް ތަފާތު ތަޖުރިބާއަކަށެވެ. ބަރަކާތްތެރި ރަމަޟާން މަހަކީ ގިނަ ބަޔަކަށް މޮޅެތިހައި އެއްޗެހި ކެއުމާއި، ބުއިމާއި އުފާފާޅުކުރުމަށް ބާވައިލެއްވި މަހެއް ކަމަށް ހީކުރި ހީކުރުން މިއަދު މުޅީން ބަދަލު ވެއްޖެއެވެ. ރޯދަމަހެއްގެ ޙަޤީޤީ ކުލަވަރުން މިއަދު ޚުދު އަޅުގަނޑުމެންނަށް ވެސް ބަރީޢަވެވޭކަށް ނެތެވެ. އެހެނީ އަޅުގަނޑުމެންނަށް މިއަދު ތަޖުރިބާކުރަން ޖެހިފައިވަނީ ނިކަން ދަތި އުނދަގޫ ދުވަސްތަކެކެވެ.

ނިކަން ވިސްނާލާށެވެ. ދުނިޔޭގެ އެކި ކަންކޮޅުތަކުގައި ކާނެ އެއްޗެއް ނެތް ބަޔަކު އުޅޭކަން މިއަދު އިޙްސާސް ކުރެވޭ ހެއްޔެވެ؟ ނުތަކާވަރަށް ކެއްކުމާއި ބޭކާރު ތަކެތި ގެއަށް ފުނިކޮށްގެން އެ ތަކެތި އިސްރާފުކުރުމަކީ ކިހައި ބޮޑު ކަމެއް ކަން ތަސައްވަރު ކުރެވޭ ހެއްޔެވެ؟ ލިބޭ ފައިސާ ފޮތި ދުނިޔޭގެ އަރާމާއި އުފަލަށްޓަކައި ތަޅައި ބުރުވުމުގެ ބޭނުމެއް ނެތްކަން ވަޒަން ކުރެވޭ ހެއްޔެވެ؟ ދުނިޔޭގައި އަޅުގަނޑުމެން ނޫނަސް ދަތި އުނދަގޫ ޙާލަތުގައިވާ ފަޤީރުންގެ ދިރިއުޅުގެ ވައްޓަފާޅި ކޮންމެވެސް ވަރަކަށް ފަހުމު ކުރެވޭނެ ކަން ކަށަވަރުވާނެއެވެ.

ލިޔުންތެރިޔާގެ ފުރަމަލަ

މުޙައްމަދު ރިފާޒް
ރިފާޒަކީ ސަން އޮންލައިން އާއި ޗެނަލް 13 ގައި މަސައްކަތްކޮށްފައިވާ ތަޖުރިބާހުރި ނޫސްވެރިއެކެވެ.

ގުޅުންހުރި ލިޔުން: