| MUNIAVAS

ފެންމަތީގައި އޮންނަގޮތަށް ޕްލާސްޓިކް ފުޅި ބޭނުންކޮށްގެން ހަދާފައިވާ ޖަޒީރާ ރަށެއް ދެކުނިން ހެއްޔެވެ. ރާއްޖޭގައި މި އޮންނަ ފަދަ ކުޑަކުޑަ ޖަޒީރާ ރަށެއް މިވަނީ މެކްސިކޯ ސިޓީގެ މޫދުގައި ހަދާފައެވެ. އިނގިރޭސި އާޓިސްޓެއް ކަމަށްވާ ރިޗަރޓް ސޯވާ ‘ރިޝީ’ ހަދާފައިވާ މި ރަށް ޚާއްޞަވަނީ ވަރަށް ގިނަ ސަބަބުތަކާއި ހުރެއެވެ.

ރިޝީ އެއްމެ ފުރަތަމަ މިގޮތަށް ތައްޔާރުކުރި ރަށް ވަނީ 2005 ގައި އައި ތޫފާނެއްގައި ހަލާކުވެފައެވެ. އެ ރަށުގެ ބަދަލުގައި ރިޝީ ނިންމީ އެފަދަ އެހެން ރަށެއް ތައްޔާރު ކުރުމަށެވެ. އެގޮތުން ކެރީބިއަން ކަނޑުގައި އޮންނަ މެކްސިކޯގެ ރަށެއް ކަމަށްވާ ‘އިސްލާ މުޚޭރޭސް’ Isla Mujeres (އަންހެންވެރިންގެ ރަށް) ގެ ފަޅުތެރޭގައި އޮންނަ ‘ކެންކޫން’ Cancun ރަށް ކައިރީގައި މިފަދަ ރަށެއް ތައްޔާރުކުރި އެވެ. ޖޮއެކްސީ އައިލެންޑް Joyxee Island ގެ ނަމުގައި ހެދި މިރަށަށް މެހެމާނުން ދިއުމުގެ ފުރުޞަތު 2008 ން ފެށިގެން ވަނީ ހުޅުވާލާފައިވެ އެވެ.

ރިޝީ ފަހުން ހެދި ރަށުގެ ވަށަމިނުގައި 20 މީޓަރު (66 ފޫޓް) ހުރެއެވެ. ފަހުން އެރަށް ވަނީ 25 މީޓަރަށް (82 ފޫޓަށް) ބޮޑުކޮށްފައެވެ. އަދި އެ ރަށުތެރޭގައި ގަސް އިންދައި، ކުޅިއެއްވެސް ވަނީ އުފައްދާފަ އެވެ. މި ރަށް ތައްޔާރުކޮށްފައިވަނީ ގާތްގަނޑަކަށް 100،000 ފުޅި ބޭނުންކޮށްގެން ނެވެ. މި ރަށުގައި ތިން ފަންނެއް beaches ހިމެނޭއިރު، ގެއަކާއި ދެ ފެންގަނޑާއި، އިރުގެ ހަކަތައިން މަސައްކަތްކުރާ ފަށްވާރު waterfall އަކާއި ކޯރެއް ހިމެނެއެވެ. މީގެ އިތުރުން ރާޅުގެ ބާނިން މަސައްކަތްކުރާ ދޮންނަ މެޝިނަކާއި ސޯލާ ޕެނަލެއްވެސް މި ރަށުގައި ހުރެއެވެ. ރިޝީ ގެ މި ޕްރޮޖެކްޓަށް ހިލޭސާބަހަށް މަސައްކަތްކުރާ ބައެއް ފަރާތްތަކުން އެހީތެރިކަން ފޯރުކޮށްދީފައި ވެއެވެ. ރިޝީ ގެ މި ރަށަށް އިތުރު ތަރައްޤީތައް ގެނައުން މެދުނުކެނޑި ކުރިއަށް ގެންދިއުމަށް ނިންމާފައި ވުމުން ކޮންމެ ދުވަހަކީވެސް ރަށުގެ ތަރައްޤީއަށްޓަކައި މަސައްކަތް ކުރެވޭ ދުވަހެކެވެ.

މި ހިތްގައިމު ހުވަފެނުގެ ފެށުން

މި ހިތްގައިމު ހުވަފެން ފެށުނީ 1977 ގައެވެ. ޖަރުމަނުވިލާތުގެ ކޮންމެވެސް ހިސާބެއްގައި ހުރި ރިޗަރޓް ސޯވާ ނުވަތަ ރިޝީ ގެ ގޭގެ ބެލްކަނީގައި ހުރެފައި ކުރަހައިލެވުނު ވަރަށް އާދައިގެ ކުރެހުމަކަށް ފަހުގައެވެ. އެއީ ޔޫއެފްއޯ އެއް ހިމެނޭ ކުރެހުމެވެ. އެއްމެ މަޖާކަމަކީ އޭނާ އަކީ އަސްލު ކުރެހުންތެރިއެއްވެސް ނޫންކަމެވެ. އޭނާ އާއިލާއާއި އެކު އިނގިރޭސިވިލާތުގެ މިޑްލްސްބްރޯ އިން ޖަރުމަނަށް ބަދަލުވީ ބަދިގެ ހެދުމުގެ މަސައްކަތްކުރާ ކުންފުންޏެއްގެ ވަޑިއެއްގެ ގޮތުގައެވެ. މާބޮޑު އުފެއްދުންތެރި މަސައްކަތްތަކެއް އޭނާއަކަށް ނުވެސް ކުރެވެއެވެ. އެހެން ލިބޭ ވަގުތު ތަކުގައި ބައެއް ކަސްޓަމަރުންނަށް ޤުދުރަތީ މަންޒަރުތައް ކުރަހައިދޭން ފެށީ އެދުވަސްވަރު އެވެ. ފުދޭވަރަކަށް ރަނގަޅަށް އެކަން ވައިގައި ހިފުމުން އަދާކުރަމުން ދިޔަ ވަޒީފާ ދޫކޮށްލީ ކުރެހުމުގެ މަސައްކަތަށް ވަގުތު ދިނުމަށެވެ. ހަމަ އެދުވަސްވަރު އޭނާގެ އަންހެނުންނާއި ދެމެދުގައި މައްސަލަޖެހި، އޭނާ ދޫކޮށްލާފައި އަނބިމީހާ ދަރިންކޮޅު ގޮވައިގެން އިނގިރޭސިވިލާތަށް އެނބުރި ދިޔައެވެ.

ރިޝީ ކުރެހި އާދައިގެ ކުރެހުމުގެ ސަބަބުން ފެންމަތީގައި އޮންނަ ރަށެއް ތައްޔާރުކުރުމަށް މަގު ފަހިވި

ދިރިއުޅުމަށް ދިމާވި ފުން ހިތާމައިގެ ނިމުން އައީ އުފާވެރިކޮށް

ލޯބިވާ އަނބިމީހާއާއި ދަރިންނާއި ވަކިވާންޖެހުން އެއީ އެކަން ބަރުދާސްތު ކުރަން އެހައި ފަސޭހަ ކަމަކަށް ނުވި ކަމެކެވެ. ފުން ހިތާމައިގައި އޭނާ ނިންމީ ދުނިޔޭގެ އެކި ކަންކޮޅުތަކަށް ދަތުރުކޮށް އޭނާގެ އެއްމެ ފަހުގެ މަންޒިލް ހޯދުމަށެވެ. މިގޮތަށް ދަތުރުކުރުމުގެ ތެރޭގައި އޭނާ ތަފާތު ދީންތަކަށްވެސް ވަނެވެ. ޕޯޓްރެއިޓްސް ކުރަހައިގެން ވިއްކުމާއި ޔޫރަޕްގެ ބައެއް ޤައުމުތަކުގެ މަގުތަމީގައި މިއުޒިކް ކުޅެގެން ކައިބޮއެ އުޅެވޭވަރަށް ފައިސާ ހޯދިއެވެ. އެތައް އަހަރުތަކެއް މިގޮތަށް ޔޫރަޕްގައި ހޭދަކުރުމަށްފަހު އެމެރިކާގެ ބައެއް ހިސާބުތަކަށްވެސް ދަތުރުކުރިއެވެ. އެއްމެ ފަހުން އޭނާގެ ފަހު މަންޒިލް ކަމަށްވާ މެކްސިކޯ އަށް ވާސިލް ވެވުނީ 1996 ގައެވެ. މެކްސިކޯ ގެ ޤަދީމީ ދަނޑުވެރިންކަމަށްވާ ‘އަޒްޓެކް ދަނޑުވެރިން’ އިހުގައި މޫދުގައި ކުދިކުދި ރަށްތައް ހަދައިއުޅުނުކަން އެނގި އެކަމުން ހަނދާނަށް އައީ އޭނާ ކުރެހި ޔޫއެފްއޯ ގެ ކުރެހުމުގެ މަތިންނެވެ. ޕްލާސްޓިކް ހުސްފުޅިއާއި އުކާލެވޭ ޕްލާސްޓިކްގެ އެކި ބާވަތްތައް ބޭނުންކޮށްގެން ފެންމަތީގައި އޮންނަ ރަށެއް ތައްޔާރުކުރުމަށް އޭނާ ނިންމީ އެވަގުތު އެވެ.

ރިޝީ ގިޓާ ކުޅުމަށް ވަރަށް ޝައުޤުވެރިކަން ހުންނަކަމަށް މި ފޮޓޯއިންވެސް އެނގެއެވެ.

ރިޝީ އެއްމެ ފުރަތަމަ އުފެއްދި ޕްލާސްޓިކް ފުޅީގެ ރަށް

ސެން ޕެޓްރޯ ޕޮޗްތުލާ ގެ ‘ޒިޕްލޮއިޓް’ ނަމަކަށް ކިޔާ ފަންނުގައި ރިޝީ ފެންމަތީގައި އޮންނަ ރަށެއް ހެދުމަށް ނިންމި އެވެ. ޒިޕްލޮއިޓް އަކީ ހަތްދިހައިގެ އަހަރުތަކުން ފެށިގެންވެސް ހެމޮކް އަދި ހިޕީ އުނދޯލި ވަރަށް ގިނަ ސަރަޙައްދެކެވެ. އަދި މަސްތުވާތަކެތި ބޭނުންކުރުމަށް ދެވި ހިފައިފައިވާ މީހުންވެސް ގިނަ އާބާދީއެއް އޮންނަ ތަނެކެވެ. މުޅި މެކްސިކޯގައި ބަރަހަނާކޮށް މީހުން އުޅޭ ހަމައެކަނި ފަންނަކީވެސް އެއެވެ. އެހެންކަމުން މީހުން ގިނަ ކާރޫބާރޫ ބޮޑުތަނެއްގައި ގިނަ ކުނިބުނި އުފެދިފައި އޮންނަ އޮތުން ވެގެން ދިޔައީ ރިޝީ ގެ މަސައްކަތަށް ފަސޭހައެއް ލިބުނު ކަމަކަށެވެ. އެހިސާބުން ރިޝީ މަސައްކަތް ފެށިއެވެ. އުކާލާފައިވާ ހުސް ޕްލާސްޓިކް ފުޅިތައް އެއްކޮށް ދަލުން ހަދާފައިވާ ގޯނިތަކެއްގައި ޖަމާކުރަން ފެށިއެވެ. ހުސްފުޅީގެ މި ގޯނިތައް މޫދުގައި އަތުރައި އޭގެ މަތީގައި ފްލައިވުޑް ފިލާ އެތުރިއެވެ. ފިލާތައް މަތީގައި ލަކުޑިން ކުޑަކުޑަ ޖިފުޓިއެއް ހެދިއެވެ. ޕްލާސްޓިކް ހުސްފުޅިން އޭނާ މިފަދަ ރަށެއް ހެދުމުން ރަށްފުށުގެ މީހުން އެކަމާ ރުހޭގޮތެއް ނުވިއެވެ. އެމީހުން ފުލުހުންނަށް ގުޅިއެވެ. އެތަނުގައި އެފަދަ ރަށެއް ހެދުމުގެ އެއްވެސް ޙައްޤެއް އޭނާއަށް ނެތުމުން އެތަން ދޫކޮށް ދާން ޖެހުނެވެ. އޭނާގެ ދިރިއުޅުމަށް ފަހިކަމެއް ގެނެސްދިން ކަމަކަށް ވެގެން ދިޔައީ ތޫފާން ‘ޕޯލިން’ އެ ސަރަޙައްދަށް އަރައި މުޅި އެ އަވަށްގަނޑާއި އޭނާގެ ރަށްވެސް ހަލާކުވެގެން ދިޔަ ހިސާބުންނެވެ. އޭނާގެ ނަސީބު އަތުގައި ހިފީ އެ ހިސާބުންނެވެ.!!!

ރިޝީ ޕްލާސްޓިކް ފުޅި އެއްކޮށް ދަލުން ހަދާފައިވާ ގޯނީގައި ބަންދުކުރަނީ

ފެންމަތީގައި އޮންނަ ދެވަނަ ރަށެއް ހެދުމުގެ މަސައްކަތް ފެށުން

މެކްސިކޯގެ ކެރީބިއަން އައްސޭރިފަށުގައި އޮންނަ ޕުއަރްތޯ އަވެންޓޫރާސް Puerto Aventuras ގެ ފަޅުތެރޭގައި ރިޗަރޓް ސޯވާ ގެ ހުވަފެނީ ރަށް ހެދުމުގެ މަސައްކަތް ދެވަނަ ފަހަރަށް ފެށިއެވެ. އަނެއްކާވެސް ޕްލާސްޓިކް ފުޅި އެއްކޮށް ދަލުގެ ގޯނީގާއި ޖަމާކުރަން ފެށިއެވެ. މިފަހަރު ގޯނިތައް މޫދުގައި އަތުރާފައި އޭގެ މަތީގައި އޮނުން އޮނިގަނޑެއް ހަދާ އޭގެ މަތީގައި ފްލައިވުޑް ފިލާ އެތުރި އެވެ. ފިލާގަނޑުގެ މައްޗަށް ދޮންވެލި އެޅިއެވެ. ދޮންވެލީގައި ހެދޭ ޒާތުގެ ގަސްތައް އިންދިއެވެ. ފަނުގެ އޮށި ބޭނުންކޮށްގެން ގެއެއް އެޅޭވަރަށް ރަށް ބޮޑުކުރަމުން ދިޔައެވެ. މިފަހަރު އޭނާ ރަށް ހެދުމަށް އެ ސަރަހައްދުގައި ދިރިއުޅޭ މީހުންގެ ހުއްދަ ލިބުނެވެ. ހަތަރު އަހަރު ދުވަހުގެ މަސައްކަތުން އޭނާގެ ރަށަކީ ދިރިއުޅެވޭ ވަރުގެ ޖާގަ އޮތް ތަނަކަށް ހެދުނެވެ. ތިން ފަންނާއި، ތަރުކާރީ އާއި މާމެލާމެލީގެ ބަގީޗާ އަކާއި ދެފަންގިފިލާ ހިމެނޭ ގެއެއް ހެދިއެވެ. ފުރާޅު ހެދީ ޓެރަސް އަކަށް ބޭނުންކުރޭވޭ ގޮތަށެވެ. ގަސްކާނާ އުފެއްދޭ ފަދަ ފާޚާނާއަކާއި އިރުގެ ހަކަތައިން މަސައްކަތްކުރާ އަވަނެއްވެސް އޭނާ ތައްޔާރުކުރި އެވެ. ފެންވެރުމަށްޓަކައި ވާރޭފެން ނެގޭނެ އިންތިޒާމެއްވެސް ހަމަޖެއްސިއެވެ. ރިޗަރޓް ސޯވާ އަކީ ޙަޤީޤަތުގައިވެސް ތިމާވެށްޓަށް ލޯބިކުރާ އެންވަޔަރަމެންޓަލިސްޓެކެވެ. މާނައަކީ އޭނާ ތައްޔާރުކުރި ރަށުގެ ސަބަބުން ތިމާވެށްޓަށް އެއްވެސް ނޭދެވޭ އަސަރެއް ކޮށްފާނެފަދަ އެއްވެސް ކަމެއް ނުކުރެ އެވެ.

ފެންމަތީގައި އޮންނަގޮތަށް ޕްލާސްޓިކް ހުސްފުޅިން ހެދި މި ރަށް އަވަށްޓެރިންގެ މެދުގައި މަޝްހޫރު ތަނަކަށް ވެގެންދިޔައެވެ. ފަތުރުވެރިންވެސް އެރަށަށް ޒިޔާރަތްކުރުމަށް ބޭނުންވާން ފެށިއެވެ. އަދި ރިޝީ އަށް އެހީތެރިވެދިނުމަށް ތިބިކަމަށްވެސް ބުނަމުން ދިޔައެވެ. ނަމަވެސް ދުވަސްކޮޅެއް ފަހުން އެ ސަރަހައްދުގައި ދިރިއުޅޭ މީހުންނަށް އެ ރަށާއި ހެދި އުނދަގޫވާން ފެށިއެވެ. ރަށް އެ ހިސާބުން ނަގައި އެއްލާލާނެ ކަމުގެ އިންޒާރުދީ ބިރުވެސް ދެއްކިއެވެ. މިހިސާބުން ރިޗަރޓް ނިންމީ ޕުއަރްތޯ އަވެންޓޫރާސް ކެނަލް އާއި ހަމައަށް ރަށް ގެން ދިއުމަށެވެ. ރުޅި އައިސްފައި ތިބި އަވަށްޓެރިންނާއި ދުރަށެވެ.

މިފަދަ ސަޅި ހިތްގައިމު ރަށެއް މީގެކުރިން ދެކުނިން ހެއްޔެވެ؟

2005 ވަނަ އަހަރުގެ ޖުލައި މަހު އައި ތޫފާން ‘އެމިލީ’ އާއި އެކު ރިޝީގެ ރަށް އެއްކޮށް ހަލާކުވެގެން ދިޔައެވެ. 7 އަހަރު ދުވަސްވަންދެން ކުރި ބުރަ މަސައްކަތް މަދު މިނެޓް ކޮޅެއްގެ ތެރޭގައި ހަލާކުވެގެން ދިޔައީ އެވެ. 250،000 ހުސްފުޅި ބޭނުންކޮށްގެން ހެދި 66 ފޫޓް، 54 ފޫޓް ގެ ރަށް ހަލާކުވެ ދިއުމުން އޭނާ ނިންމީ ދެކުނަށް ދަތުރުކުރުމަށެވެ.

އެއްމެ ފަހުން ޖޮއެކްސީ އައިލެންޑް އުފެއްދުން

ރިޝީ އާއި އޭނާ ގެންގުޅޭ ކުއްތާ އަށް ހުރިހައި އެއްޗެއް ގެއްލިގެން ދިޔަފަދަ އެވެ. ނަމަވެސް އޭނާ އަށް އެހީތެރިކަން ލިބިގެންދިޔައީ ވަރަށް އަވަހަށެވެ. އެ ސަރަޙައްދުގައި މަސައްކަތްކުރާ ‘އިކޮލޮޖިކަލް ޕާކެއް’ ގެ ލީޑަރު، އޮސްކާ ކޮންސްޓާންސޭ އަށް ރިޝީ ތައްޔާރުކުރި ރަށް ވަރަށް ކަމުދިޔައެވެ. އެ ރަށް އަލުން ހެދުމަށް އޭނާ ރިޝީއަށް 20،000 އެމެރިކާ ޑޮލަރު ދިނެވެ. ބައެއް އެހެން އިންވެސްޓަރުންނަށްވެސް މި ޕްރޮޖެކްޓާއި މެދު ޝައުޤުވެރިކަން އުފެދުނެވެ. އަލުން އާ ރަށެއް ހެދުމަށްޓަކައި އިސާހިތަކުން 40،000 އެމެރިކާ ޑޮލަރު ޖަމާކުރެވުނެވެ.

މިއީ ރިޝީ ތައްޔާރުކުރި ރަށުގައި ހަދާފައިވާ ގޭގައި ހުންނަ އޭނާގެ ނިދާ ކޮޓަރި އެވެ.

އެއްމެފަހުން ރިޗަރޓް ސޯވާ ގެ ފެންމަތީގައި އޮންނަ ރަށް ހެދުމުގެ މަސައްކަތް ފެށިއެވެ. މި ރަށް ތައްޔާރުކޮށްފައިވަނީ ގާތްގަނޑަކަށް 100،000 ފުޅި ބޭނުންކޮށްގެން ނެވެ. މި ރަށުގައި ތިން ފަންނެއް beaches ހިމެނޭއިރު، ގެއަކާއި ދެ ފެންގަނޑާއި، އިރުގެ ހަކަތައިން މަސައްކަތްކުރާ ފަށްވާރު waterfall އަކާއި ކޯރެއް ހިމެނެއެވެ. މީގެ އިތުރުން ރާޅުގެ ބާނިން މަސައްކަތްކުރާ ދޮންނަ މެޝިނަކާއި ސޯލާ ޕެނަލް އެއްވެސް މި ރަށުގައި ހުރެއެވެ. ރިޝީ ގެ މި ޕްރޮޖެކްޓަށް ހިލޭސާބަހަށް މަސައްކަތްކުރާ ބައެއް ފަރާތްތަކުން އެހީތެރިކަން ފޯރުކޮށްދީފައި ވެއެވެ. ރިޝީ ގެ މި ރަށަށް އިތުރު ތަރައްޤީތައް ގެނައުން މެދުނުކެނޑި ކުރިއަށް ގެންދިއުމަށް ނިންމާފައި ވުމުން ކޮންމެ ދުވަހަކީވެސް ރަށުގެ ތަރައްޤީއަށްޓަކައި މަސައްކަތް ކުރެވޭ ދުވަހެކެވެ.

މެކްސިކޯ ސަރުކާރުގެ އެއްބާރުލުން ރިޝީއަށް ލިބުނެވެ. އެ ސަރުކާރުން ނިންމީ ރިޝީ ގެ ޖޮއެކްސީ އައިލެންޑް އަކީ އިކޮލޮޖިކަލް ބޯޓެއް ކަމުގައެވެ. އެހެންކަމުން އެ ރަށަށް ހިނގަނީ ބޯޓަކަށް ހިނގާ ޤާނޫނީ ޙުކޫމަތެވެ. އެގޮތުން އެ ރަށުގައި ލައިފް ޖެކެޓާއި ބޯޓެއްގައި ހުންނަން ޖެހޭ ލައިޓްތައް ބެހެއްޓުމާއި އަލިފާން ނިވި ވެސް ބަހައްޓަން ޖެހުނެވެ. މީގެ އިތުރުން ފުރަތަމަ އެހީގެ ކިޓެއްވެސް ބަހައްޓަން ޖެހުނެވެ.

މުރާޖަޢާ

ރިޝީގެ މި މަސައްކަތާއި ކެރުންތެރިކަމަށް އަހަރެންގެ ހިތުގައި ވަރަށް ބޮޑު ޖާގައެއް ދެވުނެވެ. އެއްމެ ފުރަތަމަވެސް މި ރަށުގެ ވީޑިއޯ ފެނިފައި އަހަރެންގެ ހިތަށް އެރީ ރާއްޖެކަހަލަ ޕްލާސްޓިކް ފުޅީގެ ކުނިބުނިން ފުރިފައިވާ ތަނެއްގައި މިފަދަ ކަމެެއް ކޮށްލުމަކީ ކިހާ ފައްކާވަނޭ ކަމަކަށް ވާނޭ ނޫންބާވައެވެ. މީގެ އިތުރުން ރިޝީ އެކަނިކޮށްލާފައި އޭނާގެ އަންހެނުން ދިއުމުން އެގޮތް މިގޮތަށް ގަނަތެޅުމަށްފަހު އެއްމެ ފަހުން އޭނާގެ އެއްމެ ފަހުގެ މަންޒިލް މަޤްސޫދަށް ވާޞިލް ވެވުނުކަމީ ރިޝީ ގެ ހިތްވަރުގަދަ ކަން ނޫން އެހެން ކޮންކަމެއް ހެއްޔެވެ؟ އޭނާ ދެކުނު ހުވަފެން އަސްލަކަށް ހެދިއެވެ.