| MUNIAVAS

ރާއްޖެ ޓީވީ އޭ ބުނުމުން އެއީ ކޮން ޗެނަލެއް ކަން ނޭނގޭ ދިވެއްސެއް ހުރުމަކީ ވަރަށް ނާދިރު ކަމެކެވެ. ރާއްޖޭގެ އެންމެ ގިނަ ބަޔަކު ބަލާ ޓީވީ އަކީ ރާއްޖެ ޓީވީ އޭ ބުނުމަކީ ދޮގަކަށް ނުވާނެއެވެ.

ކޮންމެ އަކަސް، ރާއްޖެ ޓީވީގެ ބެލުންތެރިން ވަރަށް ވެސް އުފާވާނެ ޚަބަރެއް މިއަދު އެ ޗެނަލުން ދީފިއެވެ. މިއަދުން ފެށިގެން ބެލުންތެރިންނަށް ރާއްޖެ ޓީވީ ފެންނާނީ ހައި ޑެފިނިޝަން (އެޗްޑީ) ކޮލިޓީގައެވެ. ރާއްޖެ ޓީވީ އެޗްޑީ ކުރުމާއެކު، އެ ޗެނަލުން ގެނެސްދޭ ޕްރޮގްރާމްތަކާއި، ޚަބަރުތައް ފެންނާނީ ކުރިއަށްވުރެ ސާފުވެފައި ކޮލިޓީކޮށެވެ. މިއީ ހަމަގައިމުވެސް ރާއްޖެ ޓީވީގެ ބެލުންތެރިން ވަރަށް ވެސް އުފާވެރި ޚަބަރަކަށް ވާނެއެވެ.

ރާއްޖެ ޓީވީ އެޗްޑީ ކުރުމުގެ މަސައްކަތުގައި އެންމެ އިސްކޮށް ހަރަކާތްތެރިވި އެ ޗެނަލްގެ ޗީފް ޓެކްނިކަލް އޮޮފިސަރ އިސްމާއިލް ޖިނާހު ވިދާޅުވީ އެޗްޑީ ކުރުމުގެ މަސައްކަތަށް ހަތަރު އަހަރު ހޭދަވި ކަމަށާއި، ދިމާވި އެކި ގޮންޖެހުންތަކުގެ ސަބަބުން މަސައްކަތް ހުއްޓުނު ކަމަށާއި، ކޮވިޑް-19 އާ ގުޅިގެން ވެސް ބައެއް އިކުއިޕްމަންޓް ލިބުމުގައި ދަތިވެ މަސައްކަތްތަކަށް ބުރޫއެރި ކަމަށެވެ.

ޖިނާހު އިތުރަށް ވިދާޅުވީ އަބަދުވެސް މަސައްކަތް ކުރަނީ ރާއްޖެ ޓީވީން ގެނެސްދޭ ޕްރޮގްރާމްތަކާއި، ޚަބަރުތައް އެންމެ ކޮލިޓީކޮށް ގެނެސްދިނުމައް ކަމަށާއި، ރާއްޖެ ޓީވީ 4K އަށް ގެނައުމަށްޓަކައި ކުރިއަށް އޮތް ތަނުގައި މަސައްކަތް ކުރާނެ ކަމަށެވެ. އަދި، ގެނެވުނު ބަދަލާއެކު، އޯޑިއެންސް ބޮޑުވާނެ ކަމަށް އުންމީދު ކުރެވޭކަމަށް ވެސް ޖިނާހު ވިދާާޅުުުުވިއެެވެ.

މި މަސައްކަތުގައި ރާއްޖެ ޓީވީގެ މެނޭޖިން ޑިރެކްޓަރ އަހުމަދު ސަލީމް (ސައްލެ) އާއި، ޗެއަރމަން އަކުރަމް ކަމާލުއްދީން ފުރިހަމަ އެއްބާރުލުން ދެއްވި ކަމަށާއި، ހުރިހާ މަސައްކަތެއް ކުރިއަށް ގެންދިޔައީ އެދެބޭފުޅުންގެ އިރުޝާދުގެ ދަށުން ކަމަށް ވެސް، ޖިނާހު ވިދާޅުވިއެވެ. އަދި، ރާއްޖެ ޓީވީގެ މުވައްޒަފުންގެ މަސައްކަތް ފާހަގަކޮށް، ތަޢުރީފުކުރުމާއި އެކު ޖިނާހް ވަނީ މުވައްޒަފުންނަށް ޝުކުރު އަދާކޮށްފައެވެ.

މި އުފާވެރި ވަގުތުގައި ރާއްޖެ ޓީވީގެ ޗެއާމަން އަށާއި، މެނޭޖިންގ ޑިރެކްޓަރ އަދި އެންމެހާ މުވައްޒަފުންނަށް މުނިއަވަސް ޓީމުގެ ފަރާތުން ތަހުނިޔާ ދަންނަވަމެވެ.