މިވާހަކަތައް ކިޔައިދޭ މީހާގެ މައިފުށުގެ ބޮޑުބޭބެއެއްކަމުގައިވާ އިއްޔުބޭގެ ހައްވޭގެ ޒަކީ (ތުނޑީ ޒަކަރިއްޔާގެ ޤާސިމްގެ ޒަކީ) ވާހަކަ ކިޔައިދެއްވިއެވެ. ތިމަންނާމެން ކުޑައިރުގައި މިހާރު މިހުންނަ ގޮތަށް ހަނޑުލެއް ނުލިބެއެވެ. ކަނީ ކުދިބަތާ ބިންބި އާއި ދޮނަޅަ ފަދަ ތަކެއްޗެވެ. ތިމަންނާގެ އިއްޔުބޭ ކާފާ ބިންބި ކަނޑާން ވެލަށް (ދަނޑަށް) ދާއިރު ކާފަދަރިންކަމުގައިވާ ރަޝާދާއި ޚާލިދާއި ތިމަންނަ ގެންދެއެވެ. (ރަޝާދު އަކީ އިއްޔުބޭގެ މޫސާގެ ދޮށީ ފިރިހެންދަރިއެވެ. ރަޝާދު އުފަންވީ 1955ގައެވެ. ޚާލިދު އަކީ އިއްޔުބޭގެ ޔޫސުފް/ފަޅުއަވަށު ޔޫސުބްގެ ދޮށީ ފިރިހެން ދަރިއެވެ. އުފަންވީ 1959ގައެވެ. އިއްޔުބޭގެ ހައްވޭގެ ޒަކީ އުފަންވީ 1954 ގައެވެ.)

ބިންބިވެލުން (ބިންބި ދަނޑުން) ބިންބި ކަނޑަންވާއިރުގައި ބިންބިގަސްތައް އޮންނާނީ ބިންމައްޗަށް ވެއްޓިފައެވެ. ބިންމަތީ ކަކޫ ޖައްސައިގެންތިބެ ބިންބި ކެނޑުމުގެ މަސައްކަތްކުރަމުންގޮސް ހަވީރުވާއިރު ދެކަކުލުން ހަންގޮސް ދިލަނަގާ ވަރުވެދާނެއެވެ.

ބިންބި ކަނޑަމުންދާއިރު ތަންކޮޅެއް މަދުން އޮށްހުންނަ ކުރާގަނޑުގައި އަތްޖައްސާފައި ޔަޤީންކުރުމަށް އަހަމުއެވެ. ކާފާއޭ މިކުރާ ގަނޑު ކަނޑަމުހޭ؟ އެކުރާ ގަނޑު ކަނޑަމުހޭ؟ ދެން ކާފަ ބަލައިލާފާ ބައެއްފަހަރު އިޝާރާތުން އަނެއްބައިފަހަރު އާނ،ހޫނ، ނޫން ބުނަމުން ގެންދާނެއެވެ.
އެއްދުވަހަކު މިސުވާލުކުރުމުން ކާފަ މަސައްކަތް ހުއްޓާލާފައި ހުރިހާ ކުދިންނަށް ބަލާލާފައި އެބަ ބުނެއެވެ.

މަހުތަމެންނޭވޭ، ތިން އޮށް އިނުއްވާ ކަނޑާންވާޅޭ (ދަރިފުޅުމެންނޭވޭ ތިން އޮށް އިނިއްޔާ ކަނޑާން ވާނޭ).

ތިމަންނަ ދެރަވެލާފައި ބުނެފީމޭ ކާފާއޭ މިނުކަނޑައި، މިމަސައްކަތް ނުކޮށެއް އުޅެވޭކަން ނޯންނާނެހޭ.

ކާފަ ބުންޏެވެ. މަހުތާއޭ ބަލާށޭ ދިވެހިރާއްޖޭ ވެރިކަމަށް ދަންނަ ބޭކަލަކު އަރައިތޯ. ދިވެހިރާއްޖޭ ވެރިކަމަށް ދަންނަ ބޭކަލަކު އަރައްޖުއްވާ މުހައްމަދު ތަކުރުފާނަށް ވުރިން (މުހައްމަދު ތަކުރުފާނުގެ ގެންނެވި ކުރިއެރުމަށްވުރެން) ރާއްޖެ މަތިވާޅޭ. މަތިވެގެން އެދިޔަ ގޮތަށް ގޮހޮ މީހުންނަށް އެމީހަކަށް އެމީހަކު ނޭނގީގެން ގޮހޮ ދެން ރާއްޖެ ވާނޫ ހަލާކޭ. އެދަން ބޮނޑީން ރާއްޖެ ޣައިރު ދީނަށް ވެދާޅޭ. ދެން އެޔޯ ރާއްޖޭގެ ދޮހާ ދިޔާވޭ. އެހައި ހިސާބަށް ދަން އިރޭ ހުކަރަ ހޯމަޔަކު ޞަލަވާތެއް ނުކިޔަވާޅަތޭ، ނަމާދެއް ނުކެރާޅަތޭ، ރޯދެއް ނުހިފާޅަތޭ، އެންމެން ބޯނޫ ބަނގަރަލޭ، އަމެޔާ ބައްޕަޔާ ތަޅާޅަތޭ، ބަފަޔާ ދަރުވާ ތަޅާޅަތޭ، އަދި ކޮބައިހޭ ބޯން ކަމުނުދާޅޭ އުޑުން މިވެހެން ވާރޭފެން ވިސް.

ތިމަން ހިތަށް އަރަޔޭ ރާއްޖެ މިއަދު މިއޮތީ ރާއްޖެއަށް އަންނާނޭކަމަށް އެދުވަހު ކާފަ ތިމަންނާމެނަށް ކިޔައިދިން ގޮތާ ހާދަހާ އެއްގޮތަށެވެ. ހަމަ ތަފާތެއްވެސް ނެތިއެވެ.

ދަންނައެ:
މިވާހަކައިގައި މިބަޔާންކުރާ އިއްޔުބޭ އަކީ ތުއްދިޔަގެ ދޮންފުތަގެ އިދުރީސްއެވެ. އަޅުގަނޑުގެ މައިފުށުގެ މުނިކާފައެވެ. ކޮލެރާތެރޭގައި މުނިކާފަ ނިޔައުވީ އިރު 91 އަހަރެވެ. ނިޔައުވީ ތާރީޚަކީ 14 މާރިޗު 1978މ. އެވެ. މިތާރީޚުން ބަލާއިރު އުފަންވީ އައްސުލްޠާނު މުޙައްމަދު މުޢީނުއްދީނު 2 ވަނަ (ކުޑަބަންޑާރައިން)ގެ ދުވަސްވަރު 1887މ. ގައެވެ. މުނިކާފަގެ ހަޔާތުގައި 8 ރަސްކަލުންނާއި 2 ރައީސުންގެ ވެރިކަން ރާއްޖެ ދެކެފައިވެއެވެ. މިވާހަކައިގާ ބަޔާންކުރާ ހާދިސާ ހިނގާފައިވަނީ 1960ގެ ފަހުކޮޅުގެ އަހަރުތަކުގެތެރޭގައި ކަމަށްފެނެއެވެ. މުނިކާފައަށް ރަޙުމަތްލައްވާ ސުވަރުގޭގެ މަތިވެރި ނިޢުމަތްދެއްވާށިއެވެ. އާމީން.

ލިޔުންތެރިޔާގެ ފުރަމަލަ

ޠާހާ އަބޫބަކުރު
ތާރީޚީ ހޯދުުންތައް ހޯދައި ތާރީޚް ލިޔުމާއި ދިވެހި ބަހާއި ބަހުގެ އަދަބިއްޔާތުގެ ލިޔުންތަކަކީ ޠާހާ ގެ އެންމެ ފާހަގަ ކޮށްލެވޭ ދާއިރާ އެވެ.

ގުޅުންހުރި ލިޔުން: