ކޮވިޑް-19 ބަލިމަޑުކަމާއި ގުޅިގެން ކިޔެވުން މެދުކަނޑާލާފައި އޮތް އޮތުމަށް ނިމުމެއް ގެނެސް “ނިއު ނޯމަލްގައި” ސްކޫލުތަކުގައި ކިޔަވައި ދިނުން ފެށުމަށް ވާންޖެހޭ ތައްޔާރީތައް ކުރިއަށް ގެންދިޔުމަށް އެޑިއުކޭޝަން މިނިސްޓްރީން މިއަދު ރާއްޖޭގެ ހުރިހާ ސްކޫލަކަށް އަންގައިފިއެވެ.

ކޮވިޑް-19 ބަލިމަޑުކަމާއި ގުޅިގެން ރާއްޖެގެ ސްކޫލުތަކުގެ ކިޔެވުން މެދުކަނޑާލާފައިވަނީ މި އަހަރުގެ މާރިޗު މަހުގެ 15 ވަނަ ދުވަހުއެވެ. އެހެންނަމަވެސް ގޫގުލް ކުލާސް އަދި ޓެލިކިލާސް ބޭނުންކޮށްގެން ދަރިވަރުންނަށް ކިޔަވައިދިނުމުގެ މަސައްކަތް އެޑިއުކޭޝަން މިނިސްޓްރީން ވަނީ ކުރިއަށް ގެންގޮސްފައެވެ.

އެ މިނިސްޓްރީން މިއަދު ރާއްޖޭގެ ހުރިހާ ސްކޫލަކަށް ފޮނުއްވި ސާކިއުލާގައި ވަނީ ބަލިމަޑުކަމުގެ ހާލަތަށް ބެލުމަށް ފަހު ސްކޫލުތަކުގައި ކިޔަވައިދޭން ފަށަން ގިނަ މަޝްވަރާތަކެއް ކޮށްފައިވާ ކަމަށެވެ. އެގޮތުން ހެލްތު ޕްރޮޓެކްޝަން އެޖެންސީ (އެޗްޕީއޭ) އާއި ކަމާގުޅުން ހުރި ފަރާތްތަކުގެ ލަފާގެ މަތިން ސްކޫލުތައް ހުޅުވައި ކިޔަވައިދިނުމަށް މިހާރު ތައްޔާރުވަމުން އަންނަ ކަމަށް ސާކިއުލާގައިވެއެވެ.

ސާކިއުލާގައި އިތުރަށް ބުނެފައިވަނީ ސްކޫލުގެ ދަންފަޅިތަކުގެ އަދަދާއި ހާޒިރުވާންޖެހޭ ގްރޭޑުތައް ކަނޑައަޅާނީ ސްކޫލުގެ އާބާދީ އާއި ރަށުގެ ބަލިމަޑުކަމުގެ ހާލަތަށް ބެލުމަށްފަހުގައި ކަމަށެވެ. އަދި ސްކޫލުގެ އިދާރީ ހިންގުމާއި ކިޔަވައިދިނުމުގެ އިންތިޒާމްތަކާއި ދަރިވަރުންނާއި މުވައްޒަފުންގެ ސިއްހީ ރައްކާތެރިކަން ކަށަވަރުކުރަން މި ހާލަތުގައި ގިނަ މަސައްކަތްތަކެއް ކުރަން ޖެހޭނެ ކަމަށެވެ. އެކަމަށް ބޭނުންވާ މައުލޫމާތާއި އިރުޝާދު ފަސޭހަކަމާ އެކު ފޯރުކޮށްދޭން ގިނަ މަސައްކަތްތަކެއް ކުރަމުންދާ ކަމަށްވެސް ސާކިއުލާގައިވެ އެވެ.

ސާކިއުލާގައި އިތުރަށް ބުނެފައިވަނީ ސްކޫލުތައް ހުޅުވާނެ ތާރީހެއް ކަނޑައަޅާނީ އެޗްޕީއޭއިން ކަމަށާއި، އެހެންނަމަވެސް ސްކޫލުތައް ހުޅުވުމަށް ވާން ޖެހޭ ތައްޔާރީތައް ސާކިއުލާގައި އަންގާފައިވާ އިރުޝާދުތަކުގެ މަތީން ކުރިއަށް ގެންދިޔުމަށް އަންގާކަމަށެވެ.

ލިޔުންތެރިޔާގެ ފުރަމަލަ

އިބްރާހިމް ޚަލީލް
އިބްރާހިމް ޚަލީލް
މުނިއަވަސްގެ ޑެޕިއުޓީ އެޑިޓަރ އިބްރާހިމް ޚަލީލްގެ ޚާއްޞަ ދާއިރާ ތަކަކީ ދީނީ، އިޖްތިމާޢީ އަދި އަދަބިއްޔާތެވެ. ކަރަންޓް އެފެއާޒަކީވެސް އޭނާ ފަރިތަ ދާއިރާއެކެވެ.

ގުޅުންހުރި ލިޔުން: