ޕާލް ފޫރީއަކީ އިންޑިއާގެ ޓީވީ ސިލްސިލާތައް ބަލާ މީހުންގެ މެދުގައި މަޤުބޫލު މޫނެކެވެ. ޓީވީ ސިލްސިލާތަކުގައި މަސައްކަތްކުރާ އެންމެ ހުނަރުވެރި ތަރިންގެ ތެރޭގައި ޕާލް ޕޫރީ ހިމެނެއެވެ. “ދިލް ދި ނަޒަރް ސޭ ސޫރަތު”، “ޕިރް ބީ ނާ މާނޭ..”، “ބައްތަމީޒް ދިލް”، “ނާގިން 3” އަދި “ބޭޕަނާ ޕިޔާރް” އަކީވެސް ޕާލްގެ ހުނަރުވެރިކަން ފެންނަ މަސައްކަތްތަކެވެ. ނަމަވެސް ޕާލްގެ މަސައްކަތްތަކަށްވުރެ ބޮޑަށް މީޑިއާގައި މަޝްހޫރީ އޭނާގެ ޒާތީ ދިރިއުޅުމުގެ ވާހަކަތަކެވެ.

ޕާލްއާއެކު މަސައްކަތްކުރި ބައެއް ތަރިންނާއި ލޯބީގެ ގުޅުންތަކެއް ހިންގާ ވާހަކައަކީ މީޑިއާތަކުގައި މަޝްހޫރު ވާހަކައެކެވެ. އެގޮތުން އަސްމީތާ ސޫދު، ހިބާ ނަވާބް، ސުރްބީ ޖިޔޯތީ އަދި ކަރިޝްމާ ތަންނާއާއެކު ޕާލް ލޯބީގެ ގުޅުންތަކެއް ހިންގި ކަމަށް އަޑު ފެތުރުނެވެ. ނަމަވެސް އެންމެފަހުން ޕާލް މިވަނީ އެ ހުރިހާ ވާހަކައެއް ދޮގުކޮށްފައެވެ.

“އާނ. އަހަރެން މުމްބާއީގައި ދިރިއުޅެނީ އެކަނި. އެކަމަކު ރައްޓެހިންގެ ސަބަބުން އަހަރެންނަށް އެކަނިވެރިކަން އިހުސާސެއް ނުކުރެވޭ. ކަރިޝްމާއަކީ އޭގެ ތެރެއިން އެކަކު. އޭނަ އަހަރެންނަށް ވަރަށް ރަނގަޅު. ކަމަކަށް ބޭނުންވާ ކޮންމެ ވަގުތަކު ހިތްވަރުދޭން ހުރޭ. އަމިއްލަ އާއިލާހެން އަހަރެންނާ ދޭތެރޭ ކަންތައް ކުރާ އެކަހަލަ ވަރަށް ގިނަ ރައްޓެހިން ތިބޭ.”

ނާގިން 3 ގައި ޕާލްގެ ބައިވެރިއެއްގެ ގޮތުގައި މަސައްކަތްކުރި ކަރިޝްމާ ތަންނާއާއި އޮތް ގުޅުމާ ބެހޭގޮތުން ޕާލް ބުނެފައިވެއެވެ.

“އަހަރެން މިހުރީ ހުސްހަށިބަޔަށް. އަދި އަހަރެންގެ އެއްވެސް ކޯ-ސްޓާރަކާ ޑޭޓެއް ނުކުރަން. އެ ސްޓާރުންނާ އޮންނަ ހަމަ އެކަނި ގުޅުމުގެ އަސްލަކީ އަހަރެންވެސް އެ ދާއިރާގައި މަސައްކަތް ކުރާކަން. އަހަރެން އަދި ޑޭޓް ކުރީ އެންމެ ކުއްޖަކާ. އެއީ އަހަރެން ގްރޭޑް 10 ގައި އުޅުނުއިރު. 9 އަހަރަށްފަހު އެ ގުޅުން ނިމިގެން ދިޔައީ. މިއަދު އަހަރެން އެކްޓަރަކަށް ހެދީ އެ އަންހެންކުއްޖާ. އެއީ އޭނައަކީ ޝާހް ރުކް ޚާންގެ ވަރަށް ބޮޑު ފޭނަކަށް ވީމަ. އަހަރެން މިއަދު މިހުރި ހިސާބަށް އާދެވިފަ މިހުރީ ވަރަށް ބުރަ މަސައްކަތުން. އަހަރެން މުމްބާއީ އަށް އައީ އިންނާނެ މީހަކު ހޯދާކަށް ނޫން. އަހަރެން އައީ މަސައްކަތް ކުރަން. އަހަރެން ވަރަށް ޑިސެޕޮއިންޓްވޭ އަހަރެންގެ މަސައްކަތުގެ ވާހަކަ ނުދައްކާ، އަހަރެންގެ ކޯ-ސްޓާރުންނާ ގުޅުވައިގެން މީޑިއާއިން އެކަހަލަ ވާހަކަތައް ދައްކާތީ. އަހަރެން ބޭނުންވަނީ މީހުން އަހަރެންގެ މަސައްކަތްތަކުގެ ވާހަކަ ދައްކަން. ކޯ-ސްޓާރުންނާ ގުޅުވައިގެން އެ ދައްކާ ވާހަކަތަކަކީ އެއްވެސް ޙަޤީޤަތެއް ނެތް ވާހަކަތަކެއް.”

ޕާލް ބުނެފައިވެއެވެ.

ލިޔުންތެރިޔާގެ ފުރަމަލަ

ސާޖިދު ޢަބްދުﷲ
ސާޖިދު ޢަބްދުﷲ
މުނިއަވަސްގެ ޑެޕިއުޓީ އެޑިޓަރ ސާޖިދު އަކީ ވާހަކަ ލިޔުމުގެ އިތުރުން ޚަބަރު ލިޔުމުގައިވެސް ހުނަރުވެރި ލިޔުންތެރިއެކެވެ.

ގުޅުންހުރި ލިޔުން: