| MUNIAVAS

ޝޫޓިން ނިމުމަކާއި ހަމައަށް އައިސްފައި އޮއްވާ، މާރިޗު މަހު އިންޑިޔާ ފުރަބަންދަކަށް ދިޔުމުން ޝޫޓިން މެދުކެނޑުނު “ސަޅަކް 2” ގެ ޝޫޓިން ޖުލައި މަހު ފަށަން ރާވަމުން އަންނަކަމަށް ފިލްމުގެ ޕްރޮޑިއުސަރު ބުނެފިއެވެ.

ފިލްމުގެ ޝޫޓިން މެދުކެނޑުނުއިރު ޝޫޓް ނުކުރެވި އޮތީ ފިލްމުގެ އެންމެ ލަވައެއް ކަމަށް މަޢުލޫމާތު ލިބެއެވެ. މިހާރު އިންޑިޔާގެ ސަރުކާރުން ޤަވާއިދުތަކަކާއިއެކު ފިލްމުތަކާއި ޓީވީ ޝޯވތައް ފެށުމުގެ ހުއްދަ ދިނުމާއެކު މި ފިލްމުގެ ޝޫޓިންވެސް ފެށުމަށް ތައްޔާރުވަމުން އަންނަކަމަށް ޕްރޮޑިއުސަރު ބުނެފައިވެއެވެ. އެގޮތުން އަންނަ ޖުލައި މަހުގެ ފުރަތަމަ ހަފުތާގައި ޝޫޓިން ފެށުމަށް ތައްޔާރުވަމުން އަންނަކަމަށް މިޑްޑޭ އަށް ދިން އިންޓަވިއުއެއްގައި ފިލްމުގެ ޕްރޮޑިއުސަރު މުކޭޝް ބަޓް ބުނެފައިވެއެވެ.

ޝޫޓްކުރަން އޮތް ލަވައިގައި ފިލްމުގެ ލީޑުން ފެންނަ 4 ތަރިން ފެންނާނެކަމަށް ވެއެވެ. އަދި އޫޓީގައި ލަވަ ޝޫޓްކުރަން ހަމަޖައްސާފައި ވީނަމަވެސް އާ ޤަވާއިދުތަކާއެކު މުމްބާއީ ސްޓޫޑިއޯއެއްގައި ލަވަ ޝޫޓްކުރަން ނިންމާފައިވާކަމަށް ވެއެވެ.

“އިއްޔެ އަހަރުމެންނަށް ވަނީ ފިލްމު ސިޓީއިން އާނބަސް ލިބިފައި. އެހެންވެ އަހަރުމެން މިދަނީ ވީ އެންމެ އަވަހަކަށް ޝޫޓިން ކުރިއަށް ގެންދިޔުމުގެ ކަންތައްތައް ރާވަމުން. އެ ލަވަ ޝޫޓްކުރުމަށް އަހަރުމެން ޖެހޭ ކުޑަ ސެޓެއް ތައްޔާރުކުރަން.”

މުކޭޝް ބުނެފައިވެއެވެ.

މި ފިލްމު ޑިޖިޓަލްކޮށް ރިލީޒްކޮށްފާނެތޯ އެހުމުން މުކޭޝް ބުނެފައިވެއެވެ.

“ފިލްމު އަދި ނުނިމެނީސް އަހަރުމެން ކިހިނެއް ޕްލޭން ކުރާނީ ފިލްމު ރިލީޒްކުރާނީ ސިނަމާގައިތޯ ނޫނީ ޑިޖިޓަލްކޮށްތޯ؟ ޝޫޓިން ނިމުނީމަ އަދި ޕޯސްޓް ޕްރޮޑަކްޝަން މަސައްކަތްތައް ކުރިއަށް އޮތީ. ދިމާވާ ކޮންމެ ކަމަކަށްވެސް ކުރިމަތިލާން މިތިބީ.”

މި ފިލްމަކީ 1991 ވަނަ އަހަރު މުކޭޝް ބަޓް ޕްރޮޑިއުސްކޮށް، މަހޭޝް ބަޓް ޑައިރެކްޓްކޮށް ގެނެސްދިން “ހިޓް” ފިލްމު “ސަޅަކް” ގެ ސީކުއެލްއެކެވެ. ސަންޖޭ ދަތު އަދި ޕޫޖާ ބަޓްގެ އިތުރުން “ސަޅަކް 2” ގެ މައިގަނޑު ރޯލުތައް ކުޅެނީ އާލިއާ ބަޓްއާއި އަދިތުޔާ ރޯއީ ކަޕޫރްއެވެ.

މިއީ 20 އަހަރުގެ މެދުކެނޑުމަކަށްފަހު މަހޭޝް ޑައިރެކްޓްކުރާ ފުރަތަމަ ފިލްމެވެ. އަދި 19 އަހަރަށްފަހު ޕޫޖާ ކުޅުނު ފުރަތަމަ ފިލްމުކަން ފާހަގަކޮށްލެވެއެވެ.