ބައްޕަ ބަލިވެގެން އިންޑިޔާއަށް 2016 އަހަރު ކުރި ދަތުރަކީ އޭނާ ރާއްޖެއިންބޭރަށް ފުރަތަމަ ކުރި ދަތުރެވެ. އޭރު އޭނާގެ އުމުރުން އެންމެ 20 އަހަރެވެ. އެއަށްފަހު ފާއިތު މިވީ 4 އަހަރު ތެރޭގައި އޭނާ ވަނީ 17 ގައުމަކަށް ދަތުރުކޮށްފައެވެ. އޭގެ ތެރޭގައި ގިނައީ ޔޫރަޕުގެ ގައުމު ތަކެވެ.

މިދައްކަނީ ށ. ކަނޑިތީމަށް އުފަން އިބްރާހިމް ނަފީސް އެންމެން ދަންނަ ނަމުންނަމަ ނަޕީޓޯގެ ވާހަކައެވެ.

“އަބަދުވެސް ބޭނުންވޭ އެކްސްޕްލޯރކޮށް ތަފާތު މީހުންނާ ދިމާވެ، އެހެން ކަލްޗަރތައް ތަޖުރިބާކުރަން. ޓްރެވަލް ކުރުމަކީ މީހާގެ ސިކުނޑި ވަރަށް ބޮޑަށް ހުޅުވާލާކަމެއް.” ދަތުރުކުރާ ހިތްވި ސަބަބާ ގުޅޭގޮތުން ނަޕީޓޯ މުނިއަވަސް އަށް ބުންޏެވެ.

އިބްރާހިމް ނަފީސް (ނަޕީޓޯ) – ފޮޓޯ: ނަޕީޓޯ

އެކްޕްލޯރ ކުރާހިތުން އެންމެ ފުރަތަމަ ނަޕީޓޯ އެކަނި ގޮސްފައިވަނީ ލަންކާއަށެވެ. އޭރު ލަންކާގެ އެއަރޕޯޓުތަކާ ތަންތަންވެސް އޭނާއަކަށް ރަނގަޅަކަށް ނޭނގެއެވެ. އެހެންނަމަވެސް މިހާރު ލަންކާ ކީއްކުރަން ހެއްޔެވެ. އޭޝިޔާއާއި ޔޫރަޕަކީ އޭނާ އެންމެ ފަރިތަ ތަންތަނެވެ.

މިހާތަނަށް ދެވުނު ގައުމުތަކުގެ ތެރެއިން އޭނާ އެންމެ ހިތްޖެހި އޭނާ އަށް އެންމެ ކަމުދިޔަ ޔޫރަޕްގެ ގައުމު ތަކުގެ ގޮތުގައި އޭނާ ފާހަގަ ކުރީ ސްލޮވޭނިޔާ، ސްޕެއިން އަދި ނެދަލެންޑެވެ. މީގެ އިތުރުން ޔޫރަޕުން އޭނާ ގޮސްފައިވާ ގައުމުތަކުގެ ތެރޭގައި އިޓަލީ، ޕޮލެންޑް، ޗެކް ރިޕަބްލިކް، ޖަރުމަން އަދި ބެލްޖިއަމްވެސް ހިމެނެއެވެ. އަދިވެސް އިތުރުގައުމުތައްވެސް ލިސްޓުގައި ހިމެނެއެވެ.

އިބްރާހިމް ނަފީސް (ނަޕީޓޯ) – ފޮޓޯ: ނަޕީޓޯ

ވިއެޓްނާމާއި އިންޑޮނޭޝިޔާ އަކީ އޭޝިޔާއިން އޭނާގެ ފެވަރިޓެވެ. ލިސްޓުގައި ހިމެނޭ އިތުރު ގައުމުތަކަށް ބަލާލާއިރު މެލޭޝިޔާ އަދި ސިންގަޕޫރު ހިމެނެއެވެ. މީގެ އިތުރުންވެސް އިތުރު ގައުމުތައް ހިމެނެއެވެ.

ދަތުރުކުރުމުގައި މުސްތަގަުބަލަށް އޮތް ޓާގެޓަކީ ކޮބައިތޯ މުނިއަވަސް އިން އެހުމުން ނަޕީޓޯ ބުނީ “މިހާރު ބޭނުންވަނީ އަމިއްލަ ބްރޭންޑެއް އުފައްދަން.. މިހާރު އެމަސައްކަތް ކުރަމުން މިދަނީ.. ޓްރެވަލިންގ ގަ ދެން ބޭނުމީ ވީހާވެސް ގިނަ ގައުމުތަކަށް ދާން.. ތަފާތު ތަޖުރިބާ ކުރަން..”

އިބްރާހިމް ނަފީސް (ނަޕީޓޯ) – ފޮޓޯ: ނަޕީޓޯ

ނަޕީޓޯ ބުނާ ގޮތުގައި ޓްރެވަލް ކުރުމަކީ ފަހަށް ރައްކާކުރަން ދަސްވެ ވަގުތު ސަލާމަތް ކުރަން ދަސްވިކަމެކެވެ. އަދި ކޮންމެ ދުވަހަކީވެސް ތަފާތު ދުވަހެއް ކަމަށާއި ކޮންމެ ދުވަހަކުވެސް ތަފާތު އާ މީހުންނާ ދިމާވުމާއި ބައްދަލުވުމަކީ އެންމެ އުފާވާކަންތައް ކަމަށް އޭނާބުނެއެވެ.

އިބްރާހިމް ނަފީސް (ނަޕީޓޯ) – ފޮޓޯ: ނަޕީޓޯ

މުނިއަވަސްގެ އުއްމީދަކީވެސް ނަޕީޓޯ ބްރޭންޑް ވަރަށް އަވަހަށް ފެނުމާއި ނަޕީޓޯގެ އުއްމީދުތައް ހާސިލްވުމެވެ.

ލިޔުންތެރިޔާގެ ފުރަމަލަ

އާމިނަތު ސަޒްރާ
މުނިއަވަސްގެ ޑެޕިއުޓީ އެޑިޓަރ ސަޒްރާ އަކީ ކުރިން ރާއްޖެ ޓީވީގައި މަސައްކަތްކޮށްފައިވާ ތަޖުރިބާކާރު ނޫސްވެރިއެކެވެ. މުނިފޫހިފިލުމުގެ ދާއިރާގެ އިތުރުން އިޖުތިމާޢީ ދާއިރާގައިވެސް ސަޒްރާ ޚާއްޞައެވެ.

ގުޅުންހުރި ލިޔުން: