| MUNIAVAS

ރޭގަނޑުގެ އަރާމު ނިދީގެ ހުވަފެނުގެ ތެރެއަށް ނިޝާމް ގެނބިގެން ދިޔައެވެ. ނިދީގެ ތެރެއިން ކުއްލިއަކަށް އިވެން ފެެށީ ބަޔަކު ގިސްލާ ރޮމުންދާ އަޑެވެ. ފަހަރަކަށްވުރެ ފަހަރެއް އެއަޑު ބާރުވަމުންދެއެވެ. ރޯ މީހުން ރޮނީއެވެ. ގިސްލާ މީހުން ގިސްލަނީއެވެ. ބާރު ހަޅޭކުގެ އަޑުން ދެން އިވުނީ “އަހަރެމެން ސަލާމަތްކުރޭ! އަހަރެމެން މިއޮއް ކަނޑުވަނީ!” މި އަޑު އަހާފައި އެއަޑާ ދިމާލަށް ނިޝާމް ވަރަށް ބާރަށް ދުއްވައިގަތެވެ. ނަމަވެސް އެއްވެސް މީހަކު ފެންނާކަށް ނެތެވެ. އެކަމަކުވެސް ރޯ މީހުންނާއި ލަވާ ހަޅޭކުގެ އަޑު ވަކިން މަޑެއް ނޫނެވެ. ރޭގަނޑުގެ ކަޅު އަނދިރީގެ ތެރެއިން ކުއްލިއަކަށް ނިޝާމްއަށް ދެން ފެނުނީ ކަނޑުވެގެން އުޅޭ ބައެކެވެ. ރަށުގެ ދެކުނުފަރާތުން މީހުންތަކެއް ފަތާފަ ރަށާއި ދިމާލަށް އަންނަތަނެވެ. ނިޝާމް ވަރަށް ބިރުގަތެވެ. އަދި ދެން ހަދާނެ ގޮތަކާއިމެދު ވިސްނާލެވުނެވެ. އަދި ވަރަށް ބާރަށް ހަޅޭއްލަވަން ފެށިއެވެ. އެވަގުތު ނިޝާމްގެ އަތުގައި މީހަކު ހިފިއެވެ.

“ނިޝާމް މީ މަންމައޭ. ކީއްވެތަ މިހާ ދަންވަރު ތިހާ ބާރަށް ތިޔަ ހަޅޭއްލަވަނީ. ނިކަން ހޭވެރިވެބަލަ ނިޝާމް. އެނދުމަތީގަ ދެފައި ތަޅަތަޅާފަ ހަޅޭއް ތި ލަވަނީ އަނެއްކާ ހުވަފެނެއް ފެނުނީތަ؟” މިހެން ބުނުމާއެކު ނިޝާމްއަށް ސިއްސައިގެން ހޭލެވުނެވެ. އަދި ވަރަށް ހައިރާންކަމާއެކު މި ފެނުނު ހުވަފެނާއިމެދު ފުންކޮށް ވިސްނާލެވުނެވެ. އަދި ގަޑި ބަލައިލިއެވެ. އޭރު ގަޑިން މެންދަމުން އަލިވެ 3 ޖެހީއެވެ.

ނިޝާމްއަކީ ސިފައިންގެ ޚިދުމަތާއި އަލަށް ގުޅުނު މީހެއް ނަމަވެސް ނިޝާމްއަކީ ކަންކަމާއި މާބޮޑަށް ޖެހިލުންވެ ބިރުގަންނަ މީހެކެވެ. ނަމަވެސް ނިޝާމްގެ މުޅި ހަށިގަނޑު ޤައުމަށްޓަކައި ފުރާނައިން ޤުރުބާންކުރުމަށް ނިޝާމްގެ މަންމަ ނިޝާމްއަށް ހިތްވަރު ދެމުން ގެންދިޔައެވެ. އަދި ނިޝާމްވެސް މަންމަގެ އެދުމުގެ މަތިން ޤައުމަށްޓަކާ ދީނަށްޓަކާ ޤުރުބާންވުމަށް ޢަޒުމް ކަނޑައެޅިއެވެ.

އޭގެ އެއްމަސް ފަހެވެ. ނިޝާމް ސިފައިންގެ ރެކްރޫޓް ޓްރޭނިންގ ނިންމުމަށް ގިރިފުއްޓަށް ދިޔައެވެ. އޭރު ނިޝާމްގެ މޫނުމަތިން ފެންނަމުން ދިޔައީ އުފާވެރިކަމެވެ. ނަމަވެސް މާގިނަ ދުވަސްތަކެއްނުވެ އެ އުފާވެރިކަން މަޑުމަޑުން ފަނޑުވާން ފެށިއެވެ. ޓްރޭނިންގގެ ބުރަކަން ނިޝާމްއަށް އިހްސާސް ކުރެވެން ފެށިއެވެ. “މަށަށް ދެނެއް މިކަމެއް ނުވާނެޔޭ. އަވަހަށް ކެނޑެންވީއޭ.” ނިޝާމްގެ ހިތަށް އަރަމުން ދިޔައެވެ. ނަމަވެސް ނިޝާމްއާއިއެކު ޓްރޭނިންގ ހަދަމުންދާ އެހެން ކުދިންގެ ފަރާތުން ނިޝާމްއަށް ހިތްވަރު ދެމުން ގެންދެއެވެ. ޓްރޭނިންގގެ ބުރަކަން އިހްސާސްކުރެވޭ ކޮންމެ ފަހަރަކު މަންމަގެ އަޑު ނިޝާމްގެ ކަންފަތުގައި ޖެހި އިވިއިވި ހުންނަ ކަހަލައެވެ. އެހެންކަމުން މާބޮޑަށް ފިނޑިނުވެ، މަންމަގެ ބަސް އަހައިގެން ނިޝާމް ޓްރޭނިންގގައި ހިތްވަރުކުރުމަށް ޢަޒުމް ކަނޑައެޅިއެވެ. އަދި އާ ހިތްވަރަކާއިއެކު ޓްރޭނިންގ ނިންމާލުމުގެ ގަަދަ ޢަޒުމާއެކު ނިޝާމް މަސައްކަތް ފެށިއެވެ.

އެދުވަހުން ފެށިގެން ނިޝާމްއާއިއެކު ޓްރޭނިންގ ހަދަމުން ދިޔަ އެހެން ކުދިންނެކޭ އެއްފަދައިން ނިޝާމް ވަރަށް ކާމިޔާބުކަމާއި ޢަޒުމާއި ހިތްވަރާއެކު ކެރިގެން ކުރިމަތިލައި ޓްރޭނިންގ ނިންމާލިއެވެ. އަދި ކާމިޔާބުކަމާއެކު ބެޗުން ރަންވަނައެއްވެސް ނިޝާމް ހޯދިއެވެ. މިކަމާ ނިޝާމްގެ މަންމަ ވަރަށް އުފާކުރިއެވެ. އަދި ނިޝާމް ބޭސިކް ޓްރޭނިންގ ނިންމުމުން ނިޝާމް ހޯދި ފަޚުރުވެރި ކާމިޔާބީ ފާހަގަކޮށް އިންޑިޔާގެ އަސްކަރިއްޔާއިން ދިވެހި ސިފައިންނަށް ލިބުނު ޓްރޭނިންގ ފުރުސަތެއް ނިޝާމްއަށް ލިބުނެވެ.

އޭގެ އެއް އަހަރު ފަހުން މި ޓްރޭނިންގ ފުރިހަމަ ކުރުމަށްފަހު ނިޝާމް އެނބުރި މާލެ އައިސް ސިފައިންގެ ޚިދުމަތައިގެން ކުރިއަށް ދިޔައެވެ. އަދި މާގިނަ ދުވަސްތަކެއް ނުވެ ނިޝާމްއަށް މަޤާމުގެ ކުރިއެރުންް ލިބުނެވެ. މިހާރު ނިޝާމްއަކީ ސިފައިންގެ ސީނިއާ އޮފިސަރެއްގެ މަޤާމުގައި ހުންނެވި ބޭކަލެކެވެ. އޭނާގެ ޢަޒުމަކީ ޤައުމަށްޓަކައި ދީނަށްޓަކައި ކެރިގެން ޖިހާދު ކުރުމެވެ. ދުޝްމަނުން ބަލިކޮށް ދިވެހި ޤައުމަށް ނަސްރު ހޯދުމެވެ.

ކުޑަވެސް ޝައްކެއް ނެތެވެ. ތިޔައިން ހަމަ ކޮންމެ ބޭފުޅަކަށްވެސް ނިޝާމްފަދަ ކެރޭ މީހަކަށް ވެވިދާނެއެވެ. ނަމަވެސް އެއީ ހިތްވަރެއް ހުރެގެންނެވެ. ޢަޒުމަކާއި އުއްމީދެއް އޮވެގެންނެވެ. ތިމާގެ އަޤީދާ ވަރުގަދަކޮށް ތިމާއަކީ އެހެން މީހުންގެ ކުރިމަތީގައި ކެރޭ ހިތްވަރުގަދަ މީހެއްކަން ސާބިތުކޮށްދީގެންނެވެ. ޢަމަލާއި ބަހާ އެއްގޮތްވެގެންނެވެ. އޭރުން މާދަމާ ތިޔައިން ކޮންމެ މީހަކުވެސް ހުންނާނީ ނިޝާމް ފަދައިން ޤައުމަށް ތެދުވެރި ވަފާތެރި މީހެއްގެ ގޮތުގައެވެ. ދިމާވާ ކޮންމެ ކަމަކާމެ ކެރިގެން ކުރިމަތިލާ މީހެއްގެ ގޮތުގައެވެ. ޝަހީދު ޙުސައިން އާދަމް ފަދައިން މި ލޮބުވެތި ދިވެހި ޤައުމު ދިފާޢުކުރުމުގައި ދުޝްމިނުންނާއި ކެރިގެން ކުރިމަތިލާ ބައެއްގެ ގޮތުގައެވެ. ފަސްނުޖެހި ޤައުމަށްޓަކާ ޤުރުބާންވެ ޝަހީދުވި ނަމަވެސް ޤައުމަށް ނަސްރު ހޯދައިދޭ މީހެއްގެ ގޮތުގައެވެ. އޭރުން މާތް ﷲ ތިޔަ އެންމެ ބޭކަލުންގެ މަސައްކަތުގައި ބަރަކާތްލައްވައި ކާމިޔާބު ދެއްވާނެއެވެ. އަދި މި ކާމިޔާބު ވެގެންދާނީ ކުރިއަރަމުންދާ ސަވާރީއެއް ފަދައިންނެވެ. ކާމިޔާބަކަށްފަހު ކާމިޔާބެއް ޙާސިލުކުރަމުން އެއް ހަރުފަތަކަށްފަހު އަނެއް ހަރުފަތެއް ގިރާކުރަމުންނެވެ. އޭގެ އެންމެ ފުރިހަމަ ހަކަތައިގައި ވަރުބަލިކަމެއް ނެތިއެވެ. ވީމާ، ކާމިޔާބު ޙައްޤުވަނީ ކެރިގެން ކަންކަމާ ކުރިމަތިލާ މީހަކަށެވެ. އާދެ! “ކެރުމަކީ ކާމިޔާބުގެ ސަވާރީއެވެ.”