މި އަހަރު ކުރީކޮޅު ގެނެސްދިން ބޮލީވުޑް ފިލްމު “މަލަންގް”ގެ ކާމިޔާބީއަށްފަހު އެ ފިލްމުގެ ޑައިރެކްޓަރު މޯހިތު ސޫރީ ވަނީ އެހެން ފިލްމެއް އިޢުލާނުކޮށްފައެވެ. އަދިތުޔާ ރޯއީ ކަޕޫރާއި ޑިޝާ ޕަޓާނީއާއެކު “ދޯ ވިލަންސް”ގެ ނަމުގައި އިޢުލާނުކުރި މި ފިލްމަކީ ސިދާތު މަލޯތުރާއާއި ޝްރައްދާ ކަޕޫރު އަދި ރިތޭޝް ދޭޝްމުކްއާއެކު 2014 ވަނަ އަހަރު ގެނެސްދިން ކާމިޔާބު ފިލްމު “އޭކް ވިލަން”ގެ ސީކުއެލްއެވެ. އަދިތުޔާއާއި ޑިޝާގެ އިތުރުން މުހިންމު ރޯލުތަކުން ޖޯން އަބްރަހަމްއާއި ތާރާ ސުތަރިއާވެސް ފެންނާނެއެވެ.

“ދޯ ވިލަންސް”: އަދިތުޔާ މި ފިލްމުން ވަކިވެފައިވާކަމަށް ޚަބަރުތައް ބުނޭ

މީގެ ކުޑަ ދުވަސްކޮޅެއް ކުރިން އަދިތުޔާ މި ފިލްމު ދޫކޮށްލިކަމުގެ އަޑުތަކެއްވެސް ފެތުރުނެވެ. އޭނާ މި ފިލްމު ދޫކޮށްލީ އޭނާއާއި މޯހިތުއާ ދޭތެރޭ އުފެދުނު ކުޑަ ހިތްހަމަނުޖެހުމަކާއި ގުޅިގެންކަމަށް ވެއެވެ. މިހާރު ޚަބަރުތައް ބުނާގޮތުން އަދިތުޔާ މި ފިލްމު ދޫކޮށްލީ އޭނާއަކީ ފިލްމުގެ ލީޑް ރޯލު ކުޅޭ މީހާއަށް ވާއިރު ޖޯން އަބްރަހަމްގެ ރޯލު އޭނާގެ ރޯލަށްވުރެ ވަރުގަދަވެފައި ޝައުޤުވެރިވީމައެވެ.

މީގެ ކުޑަ ދުވަސްކޮޅެއް ކުރިން މޯހިތު ސޫރީއާއި އަދިތުޔާ ވަނީ އެކަމާ ބެހޭގޮތުން މަޝްވަރާކޮށްފައިކަމަށް ޚަބަރުތައް ބުނެއެވެ. އަދި އަދިތުޔާގެ ރޯލު ބޮޑުކޮށް، އެކްޝަން މަންޒަރުތައް އިތުރު ކުރުމަށް އަދިތުޔާ އެދިފައިވާކަމަށާއި ދުވަސްކޮޅެއްގެ ދެބަސްވުންތަކަކަށްފަހު އެ ދެމީހުންގެ ދޭތެރޭ އޮތް ގާތް ގުޅުމަށް ބުރުލެއް އަރާފާނެކަމަށް ވިސްނައި ވަރަށް ސުލްޙަވެރިކޮށް އެ ފިލްމުގައި ދެމީހުން އެއްކޮށް މަސައްކަތް ނުކުރާ ގޮތަށް ނިންމާފައިވާކަމަށްވެސް ޚަބަރުތައް ބުނެއެވެ.

އަދިތުޔާ މި ފިލްމުން ވަކިވި ޚަބަރާއި ގުޅުވައިގެން އިތުރު ވާހަކައެއްވެސް ވަނީ ފެންމަތިވެފައެވެ. އެއީ އަދިތުޔާ އިތުރު ބޮޑު ފިލްމަކަށް އެއްބަސްވެ ސޮއިކޮށްފައިވާ ވާހަކައެވެ. ކޮރޯނާ ވައިރަހާއި ގުޅިގެން “ދޯ ވިލަންސް”ގެ ޝޫޓިންގ ނުފެށި، ޝެޑިއުލްއިން ކައްސާލައިގެން ގޮސްފައިވާތީއާއި ޖޯން އޭނާގެ އިތުރު ފިލްމުތަކުގެ މަސައްކަތްތަކުގައި މާ އަވަދިނެތި އުޅޭތީ މި ފިލްމަށް އަދި ވަގުތު ދެވެން ނެތީތީ މި ފިލްމުގެ ޝޫޓިންގ ފަށާނެ ޝެޑިއުލްއެއް ތައްޔާރުކޮށްފައި ނެތްކަމަށްވެއެވެ. އެހެންވެ އަދިތުޔާއަށް “ދޯ ވިލަންސް”އާއި އޭނާ ސޮއިކުރިކަމަށް ބުނާ އަނެއް ބޮޑު ފިލްމާއި ދެ ފިލްމުންކުރެ ކޮންމެވެސް އެއް ފިލްމެއް ޚިޔާރުކުރަން ޖެހުމުން އޭނާ އެ ފިލްމަށް ސޮއިކުރީ ކަމަށްވެއެވެ. ނަމަވެސް މިއިން އެއްވެސް ވާހަކައެއް އެއިން އެއްވެސް ފަރާތަކުން ކަށަވަރުކޮށްދީފައެއް ނުވެއެވެ.

“ލޫޑޯ” (ކ) އަދި “ސަޅަކް 2” (ވ) ގެ ޕޯސްޓަރު: އަދިތުޔާ ދެން އެންމެ އަވަހަށް ފެންނާނީ މި ދެ ފިލްމުން

ބާލާޖީ މޯޝަން ޕިކްޗާސްއާއި ޓީ-ސީރީޒްގެ ކުޑައިގެ ދަށުން އެކްތާ ކަޕޫރާއި ބުޝަން ކުމާރް ޕްރޮޑިއުސްކުރާ މި ފިލްމު ރިލީޒްކުރަން ހަމަޖައްސާފައި އޮތީ މި އަންނަ އަހަރުގެ ޖެނުއަރީ 8 ވަނަ ދުވަހުއެވެ. ނަމަވެސް ކޮވިޑް-19ގެ ބަލިމަޑުކަމުގެ ސަބަބުން އެ ތާރީޚުގައި ފިލްމު ނޭޅުވި ފިލްމު ރިލީޒްކުރުން ފަސްކުރުމުގެ ފުރުސަތު ވަރަށް ބޮޑުކަމަށް ބެލެވެއެވެ.

ކުރިއަށްވެސް އަދިތުޔާގެ ޝައުޤުވެރި ފިލްމުތަކެއް އެބަހުއްޓެވެ. އޭގެ ތެރޭގައި އަނޫރާގް ބާސޫގެ “ލުޑޯ” އަދި މަހޭޝް ބަޓްގެ “ސަޅަކް 2” ހިމެނެއެވެ. މި ދެ ފިލްމު ރިލީޒްކުރާނެ ވަކި ތާރީޚެއް އިޢުލާނުކޮށްފައި ނުވިނަމަވެސް ދެ ފިލްމުވެސް ރިލީޒްކުރާނީ ޑިޖިޓަލްކޮށްކަން ވަނީ ހާމަކޮށްފައެވެ.

ލިޔުންތެރިޔާގެ ފުރަމަލަ

ސާޖިދު ޢަބްދުﷲ
ސާޖިދު ޢަބްދުﷲ
މުނިއަވަސްގެ ޑެޕިއުޓީ އެޑިޓަރ ސާޖިދު އަކީ ވާހަކަ ލިޔުމުގެ އިތުރުން ޚަބަރު ލިޔުމުގައިވެސް ހުނަރުވެރި ލިޔުންތެރިއެކެވެ.

ގުޅުންހުރި ލިޔުން: