ކިޝޯރް ކުމާރަކީ ހިންްދީ ލަވައިގެ އިތުރުން، އިންޑިޔާގެ އެތަކެއް ބަހުރުވައަކުން ވެސް ލަވަކިޔާފައިވާ މަޝްހޫރު ފަންނާނެކެވެ. ލޯބިން ކިޔާ ‘ކިޝޯރް ދާ’ އަކީ ލަވަކިޔުމުގައި ވަަރަށް އާދަޔާޚިލާފު އަދާއެއް ގެންގުޅޭ، ނުހަނު އަސަރާއި އެކު ލަވަކިޔި ފަންނާނެކެވެ. ކޮންމެ ޒާތެއްގެ ނުވަތަ ފީލްއެއްގެ ލަވައަކަށް ވެސް އެ ލަވައަކާ އެންމެ ގުޅޭގޮތަށް ކިޔާފައިވާ މި ފަންނާނަކީ ދުނިޔޭގެ އެތަކެއް މިލިޔަން މީހުންގެ ހިތް ފަތަހަކޮށްފައިވާ ލަވަކިޔުންތެރިއެވެ. ޖުމްލަ ހަތަރު ދަހަރު (40 އަހަރު) ވަންދެން ކިޝޯރް ވަނީ ލަވަކިޔާފައެވެ.

އަޝޯކް ކުމާރްގެ ބޭބެ ބޭނުންވީ އަޝޯކް ކުމާރް އެކްޓަރަކަށް ވުމަށެވެ. ނަމަވެސް އެކްޓިން ކެރިއާ ސީރިއަސްކޮށް ގެންދާކަށް ކިޝޯރް ބޭނުމެއް ނުވިއެވެ. ނަމަވެސް ކިޝޯރް ކުމާރް ވަނީ 22 ފިލްމެއްގައި އެކްޓްކޮށްފައެވެ. އޭގެ ތެރެއިން 16 ފިލްމު ވީ ފްލޮޕަށެވެ. މީގެ ސަބަބަކީ ކިޝޯރްގެ ހިތް އަބަދުވެސް އޮތީ ލަވަކިޔުމާއި އެކުގައި ކަމަށް ވުމެވެ.

ކިޝޯރް ކުމާރްގެ އަމިއްލަ ސްޓައިލެއްގައި ލަވަކިޔުމަށް ނަސޭހަތްތެރިވީ އެސްޑީ ބަރްމަންއެވެ. އެގޮތުން ކިޝޯރް ގެންގުޅޭ ޔުނީކް ސްޓައިލަށް ލަވަކިޔަން ފެށީ އެމެރިކާގެ ލަވަކިޔުންތެރިންކަމަށްވާ ޖިމީ ރޮޖާސް އާއި ޓެކްސް މޯރޓަންގެ ސްޓައިލް ނަކަލުކޮށްގެންނެވެ. ނަތީޖާއެއްގެ ގޮތުން ކިޝޯރްގެ އަޑަކީ އެކްޓަރ ދޭވް އާނަންދު، ރާޖޭޝް ކަންނާގެ އިތުރުން އެދުވަސްވަރުގެ މަޝްހޫރު އެތަކެއް ފަންނާނުންނާ އެންމެ ގުޅޭ އަޑަށް ވަނީ ވެފައެވެ.

ކިޝޯރް ކުމާރް ދުނިޔޭގައި ހުރިނަމަ، މި އަހަރު ފުރޭނީ 91 އަހަރެވެ. ހިންދީ ލަވައިގެ ރަސްގެފާނު ކިޝޯރް ކުމާރްގެ އުފަންދުވަސް ފާހަގަކުރެވެމުން އަންނައިރު، ކިޝޯރް ކުމާރާ ބެހޭގޮތުން މީގެ ކުރިން ނޭނގޭ ނުވަތަ އެހައި އާއްމު ވެފައި ނުވާ ބައެއް ކަންކަން ހިއްސާކޮށްލާނަމެވެ.

– ކިޝޯރް ކުމާރް އުފަންވުމާއެކު، އޭނާއަށް ކިޔާފައިވާ ނަމަކީ އަބްހާސް ކުމާރް ގަންގޫލީ އެވެ. ފިލްމީ ސިނާޢާތުގައި އޭނާ މަސައްކަތް ފެށީ ކޯރަސް ލަވަކިޔުންތެރިއެއްގެ ގޮތުގައި ‘ބޮމްބޭ ޓޯކީސް’ އާއެކުގައެވެ. އޭނާގެ ފުރަތަމަ ލަވައަކީ ފިލްމު “ޒިއްދީ” އަށް ކިޔާފައިވާ ‘މަރްނޭ ކި ދުއާއެނ ކިޔޫން މާންގޫ’ އެވެ. ލަވައަށް އެކްޓްކޮށްފައިވަނީ ދޭވް އާނަންދު އެވެ.

– ލަވަކިޔުމުގެ އެއްވެސް ރަސްމީ ތަމްރީނެއް ކިޝޯރް ކުމާރަށް ލިބިފައެއް ނުވެެއެވެ. ނަމަވެސް އޭނާއަކީ އުފަންވުމުގައިވެސް ލަވަކިޔުންތެރިއެއްކަން ސާބިތުކޮށްދެނީ ބޮލީވުޑްގެ ފިލްމުތަކުގެ އިތުރުން ބެންގޯލީ، މަރާޓީ، ގުޖުރާތީ، އޮރިޔާ، ކަންނާޑާ، މަލަޔާޅަމް އަދި އައްސާމީ ލަވަތައްވެސް ކިޔާފައިވާތީއެވެ.

– ކިޝޯރް ކުމާރް އެންމެ ގިނައިން ލަވަކިޔާފައިވަނީ ރާޖޭޝް ކަންނާގެ ލަވަތަކެވެ. އެ ލަވަތަކުގެ އަދަދު 240 އަށް ވުރެން މައްޗަށް އަރައެވެ. މީގެ އިތުރުން ޖީތެންދުރާ، ދޭވް އާނަންދު، އަމީތާބް ބައްޗަން އެކްޓްކޮށްފައިވާ ގިނަ ލަވަތަކެއްވެސް ވަނީ ކިޝޯރް ކުމާރް ކިޔާފައެވެ.

– ލިޖެންޑަރީ ލަވަކިޔުންތެރިޔާ ކިޝޯރް ކުމާރް ވަނީ ފިރިހެން އަޑުގެ އިތުރުން އަންހެން އަޑުންވެސް ލަވަކިޔާފައެވެ. އެގޮތުން ފިލްމު “ހާފް ޓިކެޓް”ގެ ‘އާކެ ސީދީ ލަގޭ ދިލް ޕޭ’ އަކީ ކިޝޯރް ދެއަޑުން ކިޔާފައިވާ ލަވައެކެވެ. މި ލަވައިގެ އަންހެން ބައި ކިޔުމަށް ކުރިން ހަމަޖެއްސީ ލަތާ މަންގޭޝްކަރް ލައްވައެއެވެ.

– ކިޝޯރްގެ ލަވަތަކުގެ ތެރެއިން ވަރަށް ބޮޑު މަޝްހޫރުކަމެއް ލިބިގެންދިޔަ ލަވަ ‘ޕާންޗް ރުޕައްޔާ ބާރާ އާނާ’ އަކީ އޭނާ އިންޑޯރްގެ ކޮލެޖްގައި އުޅުނު އިރު، ކެންޓީނުން ލިބުނު 5.75 ރުޕީސް އިން އިންސްޕަޔަރ ވެގެން ހަދާފައިވާ ލަވައެކެވެ.

 

– ކިޝޯރް ކުމާރަކީ އޭނާގެ ލަވަކިޔުމަށް ލިބެން ޖެހޭ އުޖޫރައާމެދު ވަރަށް ބޮޑު ސަމާލުކަމެއް ދިން ފަންނާނެކެވެ. އެގޮތުން އޭނާ ލަވައެއް ކިޔަނީ އެ ލަވައަށް ލިބެން ޖެހޭ ފުރިހަމަ އަދަދަށް ފައިސާ ލިބުނުކަން އޭނާގެ ސެކްރެޓަރީ ޔަގީންކަން ދިނުމުންނެވެ.

– ކިޝޯރް ކުމާރްގެ ފްލެޓްގެ ބޭރުގައި ބޯޑެއް ޖަހާފައި ބެހެއްޓިއެވެ. އޭގައި ލިޔެފައިވަނީ ‘ބީވެއަރ އޮފް ކިޝޯރް’ (ކިޝޯރާއި މެދު ހުޝިޔާރުވެ ތިބޭތި). މިހެންނެވެ.

ލިޔުންތެރިޔާގެ ފުރަމަލަ

އަޙްމަދު ރަޝީދު
އަޙްމަދު ރަޝީދު
ހުރިހައި ދާއިރާއެއްގެ ލިޔުންތައްވެސް މުނިއަވަސްގެ ފައުންޑަރ އަދި ޗީފް އެޑިޓަރ ލިޔާނެއެވެ.

ގުޅުންހުރި ލިޔުން: