އިންޑިއާ ކަނޑުން އެކިއެކި ޤައުމުތަކަށް މަސްބޭނޭނެ އެންމެ މަތީ މިންވަރު ކަނޑައެޅުމާބެހޭ ގޮތުން ގައުމުތަކުގެ މެދުގައި މަޝްވަރާކުރުމަށް އިންޑިއާ ކަނޑުގައި ކުރެވޭ ކަނޑުމަހުގެ މަސްވެރިކަން ބަލަހައްޓާ ސަރަހައްދީ ޖަމިއްޔާ، އިންޑިއަން އޯޝަން ޓޫނާ ކޮމިޝަން (އައި.އޯ.ޓީ.ސީ)ގެ ބައްދަލުވުމުގައި ދިވެހިރާއްޖެއިން ބައިވެރިވެއްޖެއެވެ. މި ބައްދަލުވުން ބޭއްވީ ސެޕްޓެމްބަރު މަހުގެ 15 ގައެވެ.

މިބައްދަލުވުމުގެ މަޤްސަދަކީ އިންޑިއާ ކަނޑުގެ ކަނޑުމަހުގެ ބާވަތްތަކުގެ ސްޓޮކް ދެމެހެއްޓެނިވި ގޮތެއްގައި ބަލަހައްޓައި، އިންޑިއާ ކަނޑުން ބޭނޭ ކަނޑުމަހުގެ އެންމެ މަތީމިންވަރުގެ ތެރެއިން ވަކި ވަކި ގައުމުތަކަށް މަސްބޭނޭނެ މިންވަރު ނިންމުމުގައި ގެންގުޅޭނެ މިންގަނޑުތައް ކަނޑައެޅުމަށް ކަމަށް މިނިސްޓްރީ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރުން މަޢުލޫމާތު ދެއްވައެވެ. މިއީ އައި.އޯ.ޓީސީގެ ޓެކްނިކަލް ކޮމިޓީ އޮން އެލޮކޭޝަން ކްރައިޓީރިއާ (ޓީ.ސީ.އޭ.ސީ) އިން މިކަމާގުޅޭގޮތުން ބޭއްވި 6 ވަނަ ބައްދަލުވުމެވެ. މިބައްދަލުވުމުގައި ދިވެހިރާއްޖޭގެ ފަރާތުން ބައިވެރިވީ މިނިސްޓްރީ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރގެ ކަމާބެހޭ އޮފިޝަލުންނެވެ.

ކަނޑުމަހުގެ މަސްވެރިކަމުގެ އެންމެ ދިގު ތާރީޚެއް އޮތް އިންޑިޔާ ކަނޑުގެ އައްސޭރިފަށު ޤައުމެއްގެ ހައިސިއްޔަތުން، ދިވެހިރާއްޖެއިން އިސްނަގައިގެން ވަނީ މިކަމާ ގުޅޭ ޕްރޮޕޯސަލެއް ތައްޔާރުކޮށް، އިންޑިއާ ކަނޑުގެ އައްސޭރިފަށުގެ 8 ގައުމެއްގެ ތާއީދާއެކު 2017 ގައި ބޭއްވުނު އައި.އޯ.ޓީ.ސީ ގެ 21 ވަނަ ބައްދަލުވުމުގައި ހުށަހަޅައިފައެވެ. އަދި ވޭތުވެދިޔަ 3 އަހަރު ބޭއްވުނު ޓީ.ސީ.އޭ.ސީގެ ބައްދަލުވުންތަކުގައިވެސް މިކަމާބެހޭ މަޝަވަރާތައް ކުރިއަށް ގެންގޮސްފައިވެއެވެ. ދިވެހިރާއްޖެއިން ހުށަހެޅި ޕްރޮޕޯސަލްގެ އިތުރުން، ޔޫރަޕިއަން ޔޫނިއަން (އީ.ޔޫ) ގެ ފަރާތުންވެސް މިކަމާ ގުޅޭގޮތުން ޕްރޮޕޯސަލެއް ހުށަހަޅައިފައިވެއެވެ. އީ.ޔޫ ގެ ޕްރޮޕޯސަލާ ޚިލާފަށް، ރާއްޖެއިން އިސްނަގައިގެން ހުށަހަޅާފައިވާ ޕްރޮޕޯސަލަކީ ދުރަށް ހިޖުރަކުރާ ކަނޑުމަހުގެ ބާވަތްތައް މެނޭޖްކުރުމުގައި ކުދި ޖަޒީރާ ޤައުމުތަކަށާއި ތަރައްޤީވަމުން އަންނަ އައްސޭރިފަށުގެ ޤައުމުތަކަށް ލިބެންޖެހޭ ހާއްޞަ އިނާޔަތްތަކާއި ދޭންޖެހޭ އަހައްމިއްޔަތުތަކަށް ރިޢާޔަތްކޮށް ފަރުމާކުރެވިފައިވާ ހުށަހެޅުމެކެވެ. އަދި މިޕްރޮޕޯސަލް ބިނާވެފައިވަނީ ވަކިވަކި ގައުމުތަކަށް މަސްބޭނޭނެ އެންމެ މަތީ މިންވަރު ކަނޑައެޅުމުގައި މިފަދަ ޤައުމުތަކުން އިޖްތިމާއި ގޮތުންނާއި އަދި އިޤްތިޞާދީ ގޮތުން މަސްވެރިކަމަށް ބަރޯސާވާ މިންވަރަށް އިސްކަންދީފައިވާ (ރައިޓްސް-ބޭސްޑް) އެލޮކޭޝަން އޮނިގަޑެއްގެ މައްޗަށެވެ.

އެހެން އަހަރުތަކެކޭވެސް އެއްފަދައިން، މިބައްދަލުވުމުގައިވެސް ވަކިވަކި ގައުމުތަކަށް މަސްބޭނޭނެ އެންމެ މަތީ މިންވަރު ކަނޑައެޅުމަށް ކުރެވޭ މަސައްކަތުގައި އިންޑިއާ ކަނޑުގެ ކަނޑުމަހުގެ ވަސީލަތްތަކުން ލިބޭ މަންފާ އެންމެންނަށް އިންސާފުވެރިކަމާއި ހަމަހަމަކަމާއެކު ލިއްބައިދިނުމުގެ އުސޫލަށް އިސްކަންދިނުމަށް ދިވެހިރާއްޖެއިން ވަކާލާތުކޮށްފައި ވެއެވެ. މިކަމާ ގުޅޭގޮތުން ދިވެހިރާއްޖެއިން މިހާތަނަށް ކުރެވުނު މަސައްކަތްތަކަށް އިންޑިއާ ކަނޑުގެ އައްސޭރިފަށުގެ ގިނަ ޤައުމުތަކެއްގެ ތަރުހީބާއި އެއްބާރުލުން ލިބިފައިވާއިރު، ދިވެހިރާއްޖެއިން އިސްނަގައިގެން ހުށަހަޅާފައިވާ ޕްރޮޕޯސަލަކީ މިފަދައިން ވަކިވަކި ގައުމުތަކަށް މަސްބޭނޭނެ އެންމެ މަތީ މިންވަރު ކަނޑައެޅުމަށް މަގުދައްކައިދޭ އެންމެ ރަނގަޅު އުސޫލުތައް އެކުލެވޭ ހުށަހެޅުންކަމަށް އައި.އޯ.ޓީ.ސީގެ ގިނަ މެންބަރު ޤައުމުތަކުން ގަބޫލްކުރެއެވެ.

ދިވެހިރާއްޖެ އައި.އޯ.ޓީ.ސީގެ ފުރިހަމަ މެންބަރަކަށް ވެފައިވަނީ 13 ޖުލައި 2011 ގައެވެ.

ލިޔުންތެރިޔާގެ ފުރަމަލަ

އަޙްމަދު ރަޝީދު
އަޙްމަދު ރަޝީދު
ހުރިހައި ދާއިރާއެއްގެ ލިޔުންތައްވެސް މުނިއަވަސްގެ ފައުންޑަރ އަދި ޗީފް އެޑިޓަރ ލިޔާނެއެވެ.

ގުޅުންހުރި ލިޔުން: