ވާހަކަ ލިޔުމަކީ ކޮންމެ މީހަކަށް ވާނެ ކަމެއް ނޫނެވެ. އަދި ކުރެވޭނެ ކަމެއް ވެސް ނޫނެވެ. އެއީ އެމީހަކަށް ލިބިފައިވާ ހުނަރުވެރިކަމެކެވެ. ޤުދުތަރުން އުފެދުމުގައި ދެއްވައިފައިވާ ޚާއްޞަ ފަންނެކޭ ވެސް ބުނެވިދާނެއެވެ. އެގޮތުން ވާހަކައެއް ކިޔަމުން ދާއިރު އޭގެ އަސަރު، ކިޔާ މީހާގެ ހިތަށް ނުވަންނަ ނަމަ، އެވާހަކައެއް ކިޔާނެ ކިޔުންތެރިންނެއް ނުވާނެއެވެ. އެ ވާހަކައެއް ކިޔަން ފޫހި ވާނެއެވެ. އެހެން ކަމުން ކޮންމެ ލިޔުންތެރިއެއް ވެސް ބަލަނީ އެމީހަކު ލިޔާ ވާހަކަ އަކީ ކިޔުންތެރިން ޝައުޤުވެރި ވާނެ ވާހަކައަކަށް ހަދާށެވެ. އެގޮތުން އަޅުގަނޑުމެންގެ މި ލިޔުން މިޚާއްޞަކޮށްލާ ލިޔުންތެރިޔާ އަކީ، އެތައް ކިޔުންތެރިންނެއްގެ ލޯބި ހޯދައިފައިވާ، މިއަދު ބޮޑު “ފޭން ބޭސް” އެއް އޮތް ކުޅަދާނަ ލިޔުންތެރިއެކެވެ. އާދެ! އިބްރާހިމް ޒިހުނީއެވެ. ތިޔަ ހުރިހާ ކިޔުންތެރިންގެ ނަމުން ނަަމަ “ޒެލް”އެވެ.

ފ. ބިލެތްދޫއަށް އުފަން އުމުރުން 24 އަހަރުގެ ޒިހުނީ އަކީ މަދު ދުވަސްކޮޅެއްގެ ތެރޭގައި ވާހަކައިގެ ދުނިޔޭގައި ފިޔަ ޖަހަން ފެށި، ހުނަރުވެރި ލިޔުންތެރިއެކެވެ. އެކި ސައިޓުތަކުން ކުރިއަށް ގެންދިޔަ ވާހަކަ މުބާރަތްތަކުން ކާމިޔާބީ ވަނަތައް ހާސިލުކުރަމުން ގޮސް، މިއަދު ޒިހުނީ އަކީ، އެތައް ކިޔުންތެރިންނެއްގެ ހިތްތަކާއި ކުޅެލާފައިވާ ޒުވާން ލިޔުންތެރިއެކެވެ.

ޒެލް އަކީ ހުނަރުވެރި، މޮޅު ވާހަކަލިޔުންތެރިއެއް

އެކި ހާދިސާތަކަށް ބިނާކޮށް ލިޔެފައިވާ އެތައް ކުރުވާހަކައެއް ޒިހުނީގެ ގަލަމުގެ ތުނޑުން ކިޔުންތެރިންނަށް ދޫކޮށްލާފައި ވާއިރު، މިއިން ކޮންމެ ވާހަކަ އަކުން ވެސް މުޖުތަމަޢަށް އެތައް މެސެޖެެއް ފޯރުކޮށްދެއެވެ. އެގޮތުން ޒިހުނީ ވަނީ 60އަށް ވުރެ، ގިނަ ކުރުވާހަކަ ލިޔެފައެވެ. ރާއްޖޭގެ އެކި ސައިޓު ތަކުގައި ޒިހުނީގެ ކުރުވާހަކަތައް ކިޔައިލެވެން ހުރިކަން ފާހަގަކޮށްލެވެއެވެ.

ކުރުވާހަކައިގެ އިތުރުން ޒިހުނީ އަކީ ސިލްސިލާ ވާހަކަތައް ލިޔުމަށް ދެވަނައެއް ނެތް މޮޅު ލިޔުންތެރިއެކޭ ވެސް ބުނެވިިދާނެއެވެ. އެކަން ހެކިކޮށްދެމުން ދަނީ ޒިހުނީގެ ސިލްސިލާ ވާހަކަތައް ޝާއިއު ކުރުމަށްފަހު، ދެން އަންނަ އެޕިސޯޑަކަށް ކިޔުންތެރިން ކުރާ ފޮނި އިންތިޒާރެވެ. ކޮންމެ އެޕިސޯޑެެއް ނިމިގެން ދާއިރު ކިޔުންތެރިންގެ ހިތްތައް ތެޅިގެން ދިޔުމަކީ ގައިމުވެސް ވާހަކައިގެ ތެރެއަށް ކިޔުންތެރިން ވަދެގެން ގޮސްފައިވާކަން ހާމަވާ މައިގަނޑު އެއް ސަބަބެވެ.

ސިލްސިލާ ވާހަކަ “ބަޑި” އަދި “ވެވުނީ ލޯތްބޭ ޔާރު ހުވާ” ވާހަކަ.ކޮމްގައި ޝާއިއު ކުރަމުން އަންނަ އިރު، ޒިހުނީ އަލަށް ފެށި ސިލްސިލާ ވާހަކަ “ހާދަ ލޯބިންވީ އެކީ” ޒަވިޔަނި.އެމްވީ އިން ކިޔައިލެވޭނެއެވެ. އެގޮތުން މިތިން ވާހަކަ އަކީ ވެސް އެތައް ކިޔުންތެރިންނެއް މިހާރު ވެސް ފޫހި ކަމެއްނެތި ކިޔަމުން އަންނަ ވާހަކަތައް ކަން ފާހަގަކޮށްލަމެވެ.

ޒިހުނީގެ ވާހަކަތައް ނުކިޔައި އަޑު އަހައިލަން ބޭނުންވާ ފަރާތްތަކަށް އެ ފުރުޞަތު ވެސް އެބައޮތެވެ. އެގޮތުން ދިވެހީންގެ މެދުގައި މަޤުބޫލުކަން ހޯދާފައިވާ ލަވަ ފޮށިން ޒިހުނީގެ ބައެއް ވާާހަކަތައް އަޑު އަހައިލެވޭނެއެވެ. ވަރަށް ގިނަ ފަރާތްތަކުން ޒިހުނީގެ ވާހަކަތައް ލަވަފޮށިން އަޑު އަހައިފައިވާ އިރު، މިވަގުތު ވެސް ލަވަ ފޮށީގައި ޒިހުނީ ލިޔެފައިވާ ވާހަކަތައް ރަސްކަން ކުރަމުންދެއެވެ.

މީސް މީޑިއާގައި ވެެސް ޒިހުނީގެ ނަަމަކީ ފަނޑު ނުވެ އޮތް ނަމެކެވެ. އެގޮތުން ފޭސްބުކް “ޒެލް” ފޭޖުގައި 8000އަށް ވުރެ ގިނަ ފޮލޯވަރުން ތިބި އިރު، ވައިބާރ ކޮމިޔުނިޓީގައި 1600އަށް ވުރެ ގިނަ މެމްބަރުން އެބަ ތިއްބެވެ. އަދި މީގެ އިތުރުން އިންސްޓަގްރާމް އަދި ޓެލެގްރާމްގައި ވެސް ޒިހުނީގެ ފަބްލިކް އެކައުންޓުތައް ހުރެއެވެ.

ދިރާގުގެ ކަސްޓަމާރ ސާރވިސްގައި ސްޕަވައިޒަރެއްގެ ގޮތުގައި މަސައްކަތް ކުރަމުން އަންނަ ޒިހުނީ އަކީ ޒަވިޔަނި މީޑިއާގެ ލިޔުންތެރިއެއްކަން ވެސް ފާހަގަކޮށްލަމެވެ. އެގޮތުން ވާހަކައިގެ އިތުރުން ޒިހުނީ އަކީ ރާއްޖޭގައި ހިނގާ ތަފާތު އިޖުތިމާޢީ މައްސަލަތަކަށް ވަރަށް ބޮޑަށް އަލިއަޅުވައިލައިގެން ތަފާތު ލިޔުންތަކާއި، ޚަބަރުތައް ގެެނެސްދެމުންގެންދާ ޒިންމާދާރު ނޫސްވެރިއެކެވެ.

ލިޔުންތެރިކަމުގެ ދުނިޔޭގައި ކާމިޔާބު ކަމާއި އެކު އުދުހެމުންދާ މިހުނަރުވެރި ލިޔުންތެރިޔާއާ މުނިއަވަސް ޓީމުގެ ފަރާތުން އިންޓަރވިއު ކޮށްލީމެވެ. އެގޮތުން ޒިހުނީއާ އަޅުގަނޑުމެން ކޮށްފައިވާ ގިނަ ސުވާލުތަކަކީ ކިޔުންތެރިން ޖަވާބު އެނގެން ބޭނުންވާނެ ސުވާލުތަކަކަށް ވާނެ ކަމަށް އަޅުގަނޑުމެން އުއްމީދު ކުރަމެވެ. އެގޮތުން ޒިހުނީގެ އަމިއްލަ ދިރިއުޅުމާއި، ލިޔުންތެރިކަމުގެ ދާއިރާއާ ގުޅުން ހުރި ސުވާލުތައް އަޅުގަނޑުމެން ކޮށްލީމެވެ.

ޒިހުނީއަށް އަސްލު “ޒެލް” ކިޔުނީ ކިހިނެއް؟
އެއީ ވަރަށް ކުރީގަ ރައްޓެހި ބަޔަކާ އެކު، ގޭމެއް ކުޅެނިކޮށް ހަރުލި ނަމެއް. ދެން ޒެލް މިނަމުގަ ފުރަތަމަ އިންނާނީ އަޅުގަނޑުގެ ނަމުގެ ފަސްޓު ލެޓާރ. ޒެޑް. ދެން އިންނާނީ ލާސްޓު ލެޓާރ. އީ. ދެން އެލް އަކުރަކީ އަޅުގަނޑުގެ ފެވެރިޓް ލެޓާރ. އެހެންވެ އަޅުގަނޑަށް ވެސް ވަކި ހިސާބަކުން އޯކޭވި އެނަން. އެގޮތަށް..

ކިހިނެއް ވާހަކަ ލިޔަން ޝައުޤުވެރިވީ؟
އަޅުގަނޑުގެ ތުއްތަ ކުރިން ވާހަކަ ލިޔާނެ. އޭރު އަޅުގަނޑަށް ވާނީ 15 ވަރަކަށް އަހަރު. ދެން ތުއްތަ ލިޔާތަން ފެނިފެނި އެކަމަށް އިންޓަރެސްޓު އުފެދުނީ.

އާންމުންގެ ތެރެއަށް ވާހަކަ ލިޔުންތެރިއެއްގެ ގޮތުގަ ޒެލް މަޝްހޫރު ވެގެން ދިޔައީ ކިހިނެއް؟
ވާހަކަ.ކޮމްގަ ލިޔަން ފެށި ފަހުން އަސްލު އޯޑިއަންސެއް ބިލްޑު ކުރެވުނީ. މުބާރަތްތަކު ބައިވެރި ވިއިރު ވެސް ވަރަށް ޕޮޒިޓިވް ކޮމެންޓްސް ލިބުނު. އެކަމު އާއްމުންނަށް އަޅުގަނޑު އެނގެން ފެށީ ވާހަކަ.ކޮމްއަށް ލިޔަން ފެށީމަ. އެކަމަށް އެސައިޓަށް ވަރަށް ބޮޑަށް ޝުކުރުވެރިވަން.

https://zaviyani.mv/?p=2667&fbclid=IwAR06e-PSBFsc2wC2HqXxboYPcWLNmX5Gd8bA_riVb5SGsWOaTh9Gxvl3LLQ

މިހާ ހިސާބަށް އައި އިރު ޒެލްއަށް އެންމެ ކަމުދާ ގޮތަށް ލިޔެވުނީ ކޮން ވާހަކައެއް؟
އެހެން ވަކި ވާހަކައެއް މެންޝަން ކުރަން އުނދަގޫ! ކިޔުންތެރިންނަށް އެންމެ ކަމުދާ، އެންމެ ހިނގާ ވާހަކަތަކަކީ އަޅުގަނޑަށް ވެސް އެންމެ ކަމުދާ ވާހަކަ. އެގޮތަށް ބުނާނަމަ، ބަޑި، ގިލަން، ހަހުރަޔާ، ގިސް، ވެވުނީ ލޯތްބޭ ޔާރު ހުވާ އަދި ހާދަ ލޯބިންވީ އެކީ ފަދަ ވާހަކަތައް ފާހަގަކޮށްލެވޭ.

މިހާރު އެއްވެސް ވާހަކައެއް ލިޔަމުންތޯ ދަނީ؟
“ހާދަ ލޯބިންވީ އެކީ” އެ ސިލްސިލާ ވާހަކަ މިހާރު ލިޔަމުން މިދަނީ. ކޮންމެ ހަފުތާއެއްގެ ހުކުރު ދުވަހުގެ ހެނދުނު 10 ޖަހާއިރު، ޒަވިޔަނި.އެމްވީ އިން މިވާހަކަ ކިޔާލަން ލިބޭނެ.

ކިޔުންތެރިއެއްގެ ފަރާތުން ލިބުނު އެންމެ ޕޮޒިޓިވް އަދި ނެގެޓިވް ކޮމެންޓަކީ ކޮބާ؟
އަޅުގަނޑުގެ ޕޭޖުގަ އިންނަ ނަމްބަރަށް ކިޔުންތެރިއެއް ގުޅާފަ ބުނަނީ އޭނާގެ ލައިފްގަ ދިމާވި އެތައް ހިތާމަވެރި ކަމަކުން ދިރިއުޅުމާއި މެދު އޭނާ ނާއުއްމީދުވެ، ދުނިޔޭގަ ހުންނަން ބޭނުން ނުވެފަަ ހުއްޓާ އަޅުގަނޑުގެ ވާހަކައެއް ކިޔައިގެން ދިރުއުޅުމަށް އާ އުއްމީދެއް ލިބެއްޖޭ. އާ ހިތްވަރެއް ލިބެއްޖޭ! އެއީ އަސްލު ވަރަށް އުފާވި ދުވަހެއް. އެފަދަ ކޮމެންޓެއް ލިބުނީމަ. ދެން ނެގެޓިވް ކޮމެންޓްސް މަދުން ނަަމަވެސް ލިބޭ. އެފަދަ ކޮމެންޓްސް ތަކަކީ އަޅުގަނޑު ބަލަނީ އެއީ އަޅުގަނޑު ކުރި އަރަން ލިބޭ ފުރުޞަތެއް ކަމަށް.

ވާހަކަ ލިޔުމުގައި މިވޭތުވި ދިޔަ ދުވަސްތަކުގަ، އެންމެ ބޮޑަށް ކުރިމަތިވި އުނދަގުލަކީ ކޮބާ؟
ވަރަށް ބޮޑު ޗެލެންޖަކާ ފޭސް ކުރަން ޖެހެނު “ބަޑި” ސިލްސިލާ ވާހަކަ ލިޔަން. ވާހަކައިގެ ހާދިސާ އަކީ ޙަޤީޤީ ގިނަ ކަންތައްތަކެއް ދައްކުވާދޭ، އިޖުތިމާޢީ ބޮޑު މައްސަލަ އެއް. މީހުން ދައްކަން ބޭނުން ނުވާ ވާހަކައެއް “ބަޑި” ވާހަކައިން މިކިޔާ ދެނީ. އަޅުގަނޑުގެ މައިންބަފައިންނާ، ޢާއިލާއަށް ހަޑިއެއްޗެހި ކިޔާފަ މެސެޖުތައް ވެސް ލިބުނު. އަމިއްލަ ފުރާނައަށް ނުރައްކާވާނެ ފަދަ އިންޒާރުތައް ވެސް ލިބުނު. އެވަރުން ވެސް ކިޔުންތެރިން އަޅުގަނޑަށް ދިން ހިތްވަރުން މިވާހަކަ ލިޔެ ނިންމާލެވުނީ. އަދި ސީޒަން 1 އެއްކޮށް އަޕްކޮށް ނިމެއްޖެ. ވާހަކަ.ކޮމްގެ ވެސް ވަރަށް ބޮޑު ސަޕޯޓަކާ އެކު މިވަރު ވެގެން މިދިޔައީ.

ޒެލް އަކީ ވަރަށް ބޮޑަށް 18އަހަރުން މައްޗަށް ޚާއްޞަކޮށްގެން ވާހަކަ ލިޔާ ފަރާތެއްކަން ފާހަގަކޮށްލެވޭ. އެއީ އަސްލު ކީއްވެ؟
ބޮޑަށް ލިޔަން ބޭނުން ވަނީ އިޖުތިމާޢި ބޮޑެތި މައްސަލަތަކަށް. އެފަދަ މައްސަލަތަކަށް ވާހަކަ ލިޔާއިރު، ކިޔާ ބަޔަކަށް އެނގެން އެބަ ޖެހޭ އެކަމަކުން ނުކުންނާނެ ނަތީޖާ. ގޯސް ކަމަކުން ނުކުންނާނެ ވަގުތީ އުފާވެރި ނަތީޖާގެ ވާހަކަ ހިމަނާފަ އަޅުގަނޑު އޭގެ ބޭޑް ރިޒަލްޓު ކިޔައިދޭން ބޭނުން ވަނީ. އެހެންވެ އަސްލު 18އަހަރުން މައްޗަށް ޙާއްޞަ ކުރަނީ. އެކަމު ހުންނާނެ ވަރަށް ގިނަ ވާހަކަ 18އަހަރުން ދަށުގެ ފަރާތަކަށް ވެސް ކިޔާލެވޭ.

ޒެލްގެ ވާހަކަތައް ލަސްވެގެން ބައެއް ކިޔުންތެރިން ވަރަށް ޝަކުވާ ކުރޭ. ބުނާ ޑޭޓަށް އަޕްނުވާ މައްސަލަ ވެސް ފާހަގަކުރެވޭ! އެއީ އަސްލު ކީއްވެ؟
އަޅުގަނޑުގެ ވާހަކަތައް ގިނައިން ޝާއިއު ކުރެވިފައި ވަނީ ވާހަކަ.ކޮމްގަ. ދެން ވާހަކަ އަޕް ވާނެ ކަމަށް ކިޔުންތެރިން ގާތުގަ ބުނެވޭ ދުވަހު ސައިޓަށް ވާހަކަ އަޕްނުވެދާނެ. އެ ބޭފުޅުން ބިޒީވެގެން ނުވަތަ އެނޫންވެސް ސަބަބަކާ ހުރެ.. ދެން ކިޔުންތެރިން އެކަމާ ކޮންމެވެސް ވަރަކަށް ހިތްހަމަ ނުޖެހޭތަން ވެސް އާދޭ! އެކަމު އިރާދަފުޅުން އަޅުގަނޑުގެ ގިނަ ވާހަކަ ކިޔުންތެރިންނަކީ ވަރަށް އަންޑަސްޓޭޑިން، ވަރަށް ލޯބި ބައެއް. އަބަދުވެސް އަޅުގަނޑުގެ ވާހަަކައަށް އިންތިޒާރު ކުރޭ! އެކަމަށް ހުރިހާ ކިޔުންތެރިންނަށް ޝުކުރުވެރިވަން.

ޒެލް މިވަގުތު ލިޔުންތެރިއެއްގެ ގޮތުގައި މަސައްކަތް ކުރާ ޒަވިޔަނި މީޑިއާ އަކީ ޒެލްގެ އަމިއްލަ ތަނެއްތޯ ގިނަ ކިޔުންތެރިން ސުވާލު ކުރާތަން އެބަ ފާހަގަ ކުރެވޭ. އެކަމަށް ބުނެލާނީ ކީކޭ؟
ހެހެ! އަސްލު ޒަވިޔަނި މީޑިއާ އަކީ ފެމިލީއެއް ކަހަަލަ ތަނެއް. ޒަވިޔަނި ފެމިލީއެއް. ހިންގުންތެރިން ގާތުގަ އަޅުގަނޑު މިސުވާލުކޮށް ލިޔަސް ވިދާޅުވާނެ މީ ހަމަ އަަޅުގަނޑުގެ ތަނެކޭ! އެހެންވީމަ މީ ޢާއިލާއެއްގެ ގޮތުގަ، އެހާ ގާތްކޮށް މަސައްކަތް ކުރާ މީޑިއާއެއް ޒަވިޔަނި.އެމްވީ އަކީ..

ޒެލް ލިޔެފައިވާ ބައެެއް ވާހަކަތަކުގެ ކަވަރ

ޒެލް ވާހަކަ ސައިޓަށް ލިޔެފައިވާ ވާހަކަތަކުގެ ކަވާރ ފޮޓޯތަކަށް ވަރަށް ބޮޑަށް ހިތްދަމައިގަނޭ. ވަރަށް ރީތިކަން ފާހަގަ ކުރެވޭ. ކޮބާތޯ އެކަމުގެ ސިއްރަކީ؟
އެއީ ހަމަ އަބޯގެ މޮޅުކަން. ވަރަށް މޮޅު ވާނެ. ވަރަށް ހިތްގައިމު ވާނެ ވާހަކަ.ކޮމްގަ ހުންނަ ހުރިހާ ކަވާރއެއް ވެސް. ދެން އަޅުގަނޑުގެ ރައްޓެއްސެއް ކަމަށްވާ ރިފްޝާން ހުންނާނެ އަޅުގަނޑުގެ ޕޭޖަށް ކަވާރ ހަދާދީފަ.

ކޮބާތޯ ޢާއިލާ އަދި ބެސްޓު ފްރެންޑުގެ ފަރާތުން މިދާއިރާއިން ކުރިއަށް ދާން ލިބޭ ހިތްވަރަކީ؟
ޢާއިލާ ވަރަށް ސަޕޯރޓިވް. ރައްޓެހިން ވެސް ވަރަށް ތަރުޙީބު ދޭނެ. ދެން އަޅުގަނޑުގެ ބެސްޓު ފްރެންޑުން ކަމަށްވާ އަނޫފް އަދި ޝަހުރު ވެސް ވަރަށް އެންކަރޭޖު ކުރާނެ!

އެއްވެސް ކިޔުންތެރިއެއްް ޒެލް މަގުމަތިން ފެނިގެން އައިސް ވާހަކަދެއްކިތޯ؟
 އެހެން ކިޔުންތެރިއެކޭޭ ބުނާކަށް ނޭނގެ! އެކަމު ނުދަންނަ މީހުން ޒެލްއޭ ކިޔާފަ ގޮވާލާ އެހެން އުޅެމުން. ދެން އެއްރޭ ޑައިންމޯރގަ އިންދާ ޖެހިގެން ހުރި ޓޭބަލްގަ ތިބި 4 އަންހެން ކުދިން ދެއްކި އަޅުގަނޑުގެ “ބަޑި” ވާހަކަ ރީތި ވާހަކަ. އަޅުގަނޑު އަނެއްހެން ނޭނގޭނެ ގިނަ ބަޔަކަށް. ނަން އެނގޭނީ.

ޒެލްއަށް އެންމެ ރީތީ ކޮން ކުލައެއް؟ އަދި އެންމެ ކާހިތް ވަނީ ކޯއްޗެއް؟
އެންމެ ރީތި ކުލައަކީ ބްލެކް އެންޑް ވައިލެޓް. އެންމެ ކާހިތް ވަނީ ރިހާކުރާ ބަތާ، ތެލުލި ފަތާ، ތަރުކާރީ

އެންމެ ދާހިތް ވަނީ ކޮން ޤައުމަކަށް؟
ތުރުކީ އަދި ޕާކިސްތާނު

ލޯބިވެރިޔެއް ހުރޭތޯ؟ ލޯބިވެރިޔާ ވާހަކަ ލިޔަން ޝައުޤު ހުރޭތޯ؟
ލޯބިވެރިޔެއް ހުންނާނެ. މަލް ކިޔާނީ. މަލް ވާހަކަ ލިޔާ ހިތެއް ނުވާނެ. އެކަމު ކިޔާނެ އަޅުގަނޑު ލިޔެފަ ހުންނަ ވާހަކަތައް.

ކިތައް ކުދިންނާ ރައްޓެހި ވިންތޯ؟
ހައްހައްހާ! އެއީ ސިއްރެއް.

އެއްވެސް ވަރަކަށް ކިޔުންތެރިޔަކާ އެކު ލޯބީގެ ގޮތުން ގުޅުނިންތޯ؟ ނޫނީ އެއްވެސް ކިޔުންތެރިއެއްގެ ފަރާތުން އެކަހަލަ ކަމެއް ފާހަގަ ކުރެވުނުތޯ؟
ހެހެ! ނޫން. ލޯބީގެ ގޮތުން ނުގުޅެން. އެކަމު ކިޔުންތެރިއެއްގެ ފަރާތުން ލޯބީގެ ހުށައެޅުމެއް ލިބުނު. ހެހެ.

ތީ ވަރަށް ފޮނި ލިޔުންތެރިއެކޭ ބުނެވޭނެތަ؟
ކޮންމެ އެއްޗެއް ވެސް ބުނެވިދާނެ! އެކަމު އަސްލު ނުވާނެ ފޮންޏެއް. ކިޔުންތެރިންނަށް ވެސް އަޅުގަނޑާ ހަމަ ރީޗް ވެވޭނެ.

ސުކޫލު ދައުރުގަ ލިބުނު އެންމެ ބޮޑު ކާމިޔާބީ އަކީ ކޮބާ؟ އަދި ވަޒީފާއަށް ނުކުތް ފަހުން ލިބުނު އެންމެ ބޮޑު އުފަލަކީ ކޮބާ؟
ސުކޫލު ދައުރުގަ އެންމެ ބޮޑު ކާމިޔާބީ އަކީ އޯލެވެލްގެ ރިޒަލްޓް. އެޔަށް ފަހު، އޭލެވެލްއިން އެންމެ ބެސްޓް ސްޓޫޑެންޓުގެ އެވާރޑު ލިބިގެން ދިޔަ ދުވަސް. ދެން ވަޒީފާއިން ލިބުނު އެންމެ ބޮޑު ކާމިޔާބީ އަކީ ދިރާގުގަ ކަސްޓަމާރ ސާވިސް އެންޑް ސޭލްގެ ޑިވިޝަނަލް މެރިޓް އެވާރޑް ލިބުނު ދުވަސް..

ޙަޔާތުގެ ބައިވެރިއަކު އިޚްތިޔާރު ކުރާއިރު ބަލަނީ ކޮންކަމަކަށް؟
އެކުގައި އުޅެވޭނެ ރަނގަޅު ކުއްޖަކަށް ވާނެތޯ.

ވާހަކަ ލިޔަން ޝައުޤުވެރިކަން ހުރި ފަރާތްތަކަށް ބުނެލާނީ ކީކޭ؟
 ހިތްވަރާއި އެކު، ޝައުޤު ހުރެގެން ކުރަންޏާ ނުވާނެ ކަމެއް ނޯންނާނޭ. ހެލްޕެއް ބޭނުންވަންޏާ ހަމަ ބުނެލީމަ އެހީ ވެސް ވެދޭނަން. މިހާރު ވެސް ކުދިން އަހާ ވާހަކަ.ކޮމްގަ އެކައުންޓު ހަދަނީ ކިހިނެއްތޯ. އަދި ވާހަކައިގަ ލިޔެފައި ހުންނަ ޖުމުލަތައް ހަމަޖެހޭތޯ. އެކަންކަން ވެސް ކިޔައިދީ ހެލްޕު ވަމުން މިދަނީ އަލަށް މިކަން ކުރަން ޝައުޤު ހުންނަ ކުދިންނަށް.

މުނިއަވަސްއާ މެދު ބުނެލާނީ ކީކޭ؟
 މުނިއަވަސް އަކީ އަޅުގަނޑު އަބަދުވެސް ވަރަށް ލޯބިވާ ސައިޓެއް. މުނިއަވަސްގެ ހިންގުންތެރިން އަޅުގަނޑާއި މެދު ބެހެއްޓި ގާތް ކަމާއި، އެކުވެރި ކަމަށް ހިތުގެ އެންމެ ފުން މިނުން ޝުކުރު ވެރިވަން. އަބަދުވެސް ހަނދާނުގަ ހުންނާނެ ލިޔުންތެރިކަން ކުރިއަރުވަން މުނިއަވަސްއިން ވެސް ދެއްވި ފުރުޞަތުތައް. ވަރަށް ބޮޑަށް ޝުކުރިއްޔާ މިފަދަ ފުރުޞަތެއް ދެއްވީތީ.

ލިޔުންތެރިޔާގެ ފުރަމަލަ

އަޙްމަދު ރަޝީދު
އަޙްމަދު ރަޝީދު
ހުރިހައި ދާއިރާއެއްގެ ލިޔުންތައްވެސް މުނިއަވަސްގެ ފައުންޑަރ އަދި ޗީފް އެޑިޓަރ ލިޔާނެއެވެ.

ގުޅުންހުރި ލިޔުން: