އަކްޝޭ ކުމާރު ނުވަތަ އަސްލު ނަމުން ނަމަ ރާޖިވް ހަރީ އޯމް ބާޓިއާގެ ފިލްމީ ހަޔާތް ފެށީ 1987 ގައި މަހޭޝް ބަޓް ޑައިރެކްޓްކުރި ފިލްމު “އާޖް” އިންނެވެ. މި ފިލްމުގައި ބޮލީވުޑްގެ ކިލާޅީ ކުމާރަށް ދިނީ ކުޑަކުޑަ ރޯލެއް ނަމަވެސް، އޭނާ ކުޅުނު ރޯލު ގިނަބައެއްގެ ލޮލުގައި އަޅައިގަތެވެ. އެއަށްފަހު ރާޖް ސިއްޕީގެ ފިލްމު “ސައުގަންދު” (1991) ގެ ލީޑް ރޯލު ހޯދުމަށް އަކްޝޭ ސަލާންޖެހިއެވެ.

ފިލްމު “ސައުގަންދު”ގައި އަކްޝޭ އާއި ޝިލްޕާ ޝެޓީ

ފިލްމީ ދާއިރާގައި އަކްޝޭ ވިދައިލީ 1992 ން 2012 އަށް ނެރުނު “ކިލާޅީ” ސީރީޒުންނެވެ. އޭގެ ފަހުން އަކްޝޭގެ ވިދުމަށް ބަދަލެއް ނާދެއެވެ.

‘ޓިޕް ޓިޕް ބަރްސާާ ޕާނީ’ ލަވައިގައި އަކްޝޭ އާއި ރަވީނާ ޓަންޑަން

ފިލްމު އިންޑަސްޓްރީއަށް ވަނުމުގެ ކުރިން، ނިއު ދިއްލީއަށް އުފަން އަކްޝޭ ކުމާރު، މާޝަލް އާޓްސް ދަސްކޮށް ފައިޓްކުރުމުގެ ހުނަރު އިތުރުކުރުމަށް ބެންކޮކަށް ދިޔައެވެ. އޭނާގެ ކުލާސްތަކަށް ފީ ދެއްކުމަށް ރެސްޓޯރެންޓް ތަކުގައި ވޭޓަރުކަން ވެސް ކުރިއެވެ. ބޮލީވުޑްގައި އަކްޝޭގެ ތަރި އަލިގަދަ ވެފައިވަނީ އެންމެ ކަމަކުން ނޫނެވެ. މާޝަލް އާޓްސް ދަސްކޮށްދިނުމަކީ ވެސް އަކްޝޭ ކުރަމުން އަންނަ ކަމެކެވެ. ބޮލީވުޑްގެ އެކްޝަން ސްޓާރަކަށް އަކްޝޭ ވީ މި ސަބަބާހުރެއެވެ. އޭނާ ކުރި ބުރަ މަސައްކަތުގެ ނަތީޖާވެސް ފޮންޏެވެ. އޭނާގެ ފިލްމުތަކުގައި ސްޓަންޓްތައް ހަދަނީވެސް އަމިއްލައަށެވެ.

އަކްޝޭ ކުމާރާއި ރަވީނާ ޓަންޑަންގެ ފިލްމެއްގެ މަންޒަރެއް

1994 ވަނަ އަހަރު އަކްޝޭ ކުމާރާއި ސައިފް ޢަލީ ޚާން އަދި ކާޖަލް އެކުގައި ފެނިގެން ދިޔަ “ޔޭ ދިއްލަގީ” އަށްފަހު ބޮލީވުޑްގެ ‘އައު ލަވަރ ބޯއީ’ އަކަށް އަކްޝޭ ވެގެން ދިޔައެވެ. އެ ފިލްމު ވެގެންދިޔައީ 1994 ގައި ރިލީޒްކުރި ފިލްމުތަކުން ހަވަނައަށް އެންމެ ކުރީގައި އުޅުނު ފިލްމަށެވެ. އެ ފިލްމުގައި ކުޅެފައިވާ ރޯލަށް ފިލްމުފެއާރ އެވޯޑްގައި އެންމެ މޮޅު އެކްޓަރުކަން އަކްޝޭ އަށް އަދި އެންމެ މޮޅު އެކްޓްރެސް ކަން ކާޖަލް އަށް ލިބުނެވެ.

ނުވަދިހައިގެ އަހަރުތަކުގައި އޮން-ސްކްރީން ހިޓް ޖޯޑެއްގެ ގޮތުގައި އަކްޝޭ ކުމާރާއި މަދޫ މަޝްހޫރުވިއެވެ. އެމީހުންގެ ކީމި ވަރަށް ބޮޑަށް ދިމާވާކަމަށް ހުރިހައި ޑައިރެކްޓަރުންވެސް ގަބޫލުކުރަން ފެށިއެވެ. އަކްޝޭގެ ކާމިޔާބު ފިލްމުތަކުގެ ތެރޭގައި ހިމެނޭ “އޭލާން”، “ހަމް ހެއި ބޭމިސާލް” އަދި “ޒާލިމް” އަކީ ބޮލީވުޑްގެ ތާރީޚްގައި ރަން އަކުރުން ލިޔެވިފައިވާ ފިލްމުތަކެކެވެ.

އަކްޝޭ އާއި މަދޫގެ ފިލްމެއްގެ މަންޒަރެއް

އަކްޝޭގެ ވާހަކަ ދައްކާނަމަ، ފިލްމު “މޮހޮރާ”ގެ ވާހަކައަކީ ކޮންމެހެންވެސް ގެންނަން ޖެހޭ ވާހަކަތަކެކެވެ. ހަމަ އެހެންމެ އަކްޝޭއާއި ސުނިލް ޝެޓީގެ ‘ބްރޯމޭންސް’ގެ ވާހަކަތައް ކޮންމެހެން ވެސް ހިމަނަން ޖެހެއެވެ. އަކްޝޭ-ސުނިލް އެކުގައި ފެނިގެން ދިޔައީ ފިލްމު “މޮހޮރާ” އިންނެވެ. އެ ފިލްމު ހިޓަކަށް ވުމުން، އޭގެ ފަހުން އެތަކެއް ޑައިރެކްޓަރުންނެއް މި ދެ އެކްޓަރުން ހިމަނައިގެން ފިލްމުތައް ހަދާފައިވެއެވެ. އެގޮތުން “ވަގްތު ހަމާރާ ހޭ” (1993)، “މޮހޮރާ” (1994)، “ސަޕޫތު” (1996)، “ހީރާ ޕޭރީ ފްރެންޗައިޒް (2000 ން ފެށިގެން މިއަދާ ހަމައަށް) ހިމެނެއެވެ.

އަކްޝޭ، ސުނިލް ޝެޓީ އަދި ރަވީނާ ޓަންޑަން، ފިލްމު މޮހޮރާގެ މަންޒަރެއްގައި

އަކްޝޭ ކުމާރާއި ސައިފް ޢަލީ ޚާންގެ ޖޯޑުވެސް ވެގެންދިޔައީ ބޮލީވުޑްގައި ވިދާލި ‘ބްރޯމޭންސް’ ޖޯޑަކަށެވެ. ފިލްމު “ޔޭ ދިއްލަގީ” އަށް ފަހު “މެއިނ ކިލާޅީ ތޫ އަނާޅީ” (1994) އިން ބޮޑު އިސްކިރީނުގައި އަކްޝޭ-ސައިފްގެ ޖޯޑުސުޕަހިޓަކަށް ވެގެން ދިޔައެވެ. އޭގެ ފަހުން، މި ދެ ތަރިން އެކުގައި “ތޫ ޗޯރު މެއިނ ސިޕާހީ” (1996)، “ކީމަތު” (1998)، “އާރްޒޫ” (1999) އަދި “ތަޝަން” (2008) ކުޅެފައިވެއެވެ.

ސައިފް އާއި އަކްޝޭ

1996 ވަނަ އަހަރު، ބޮލީވުޑްގެ ރާނީ، ރޭކާ އާއި އެކުގައި އަކްޝޭ ކުމާ ފެނިގެންދިޔައެވެ. މިއީ ފުރަތަމަ ފަހަރަށް އަކްޝޭ ނުބައިބައި ރޯލުން ފެނުނު ފިލްމެވެ. “ކިލާޅިޔޯން ކާ ކިލާޅީ” (1996) ގައި އަކްޝޭ އާއެކު ރަވީނާ ޓަންޑަން، ކުރީގެ މަޝްހޫރު ރެސްލިން ކުޅުންތެރިން ކަމަށްވާ ކްރަޝް އާއި ބްރަޔަން ލީ ފެނިގެން ދިޔައީ އަންޑަރޓޭކަރުންގެ ގޮތުގައެވެ. މިއީ ހޮލީވުޑްގެ ފިލްމު “ލަޔަންހާރޓް” (1990) އަށް ބިނާކޮށް ހެދި ފިލްމެކެވެ. މި ފިލްމަކީ އަކްޝޭގެ ‘ކިލާޅީ” ސީރީޒްގެ ހަތަރުވަނަ ފިލްމެވެ.

ފިލްމު “ކިލާޅިޔޯން ކާ ކިލާޅީ”ގައި ރޭކާ، އަކްޝޭ އަދި ރަވީނާ

ބޮލީވުޑްގެ ‘ކިލާޅީ’ އަކީ ކޮމެޑީ ފިލްމުތަކަށް ވެސް ހަމަ އެއްވަނައިގެ ތަރިއެކެވެ. ކިލާޅީ ސީރީޒާއި ބައެއް ކޮމެޑީ ފިލްމުތަކަށް ފަހު، 1997ގައި ނެރުނު ފިލްމު “އަފްލާތޫން” އިން އަކްޝޭ ފެނިގެން ދިޔައެވެ. ގުއްޑޫ ދަނާއޯ ޑައިރެކްޓްކުރި މި ފިލްމުގައި އަކްޝޭ އާއެކު އުރުމީލާ މަޓޮންޑްކަރް ހަރަކާތްތެރިވިއެވެ. މި ފިލްމުގައި މި ދެމީހުންގެ ލޯބީގެ މަންޒަރުތަކުން ހުޅުފަޅައިގެން ދިޔަ ނަމަވެސް، އޭގެ ފަހުން އެ ދެ ތަރިން އެކުގައި ފެނިފައެއް ނުވެއެވެ.

ފިލްމު އަފްލާތޫންގެ ކޯ ސްޓާރ އުރްމީލާ އާ އެކު އަކްޝޭ

1997 ގައި ޔާޝް ޗޯޕްރާ ޑައިރެކްޓްކުރި ލޯބީގެ ފިލްމު “ދިލް ތޯ ޕާގަލް ހޭ” ގައި އަކްޝޭ ކުޅުނީ ސަޕޯޓިންގ ރޯލެކެވެ. އެ ފިލްމުގެ ލީޑްގައި ޝާހްރުކް ޚާން އާއި މާދޫރީގެ އިތުރުން ކަރިޝްމާ ކަޕޫރު ހަރަކާތްތެރިވިއެވެ. މި ފިލްމުން އެންމެ މޮޅު ސަޕޯޓިން އެކްޓަރުގެ ރޯލަށް ފިލްމުފެއަރ އެވޯޑްގައި އަކްޝޭ ނޮމިނޭޓްވިއެވެ.

އަކްޝޭ އާއި ޓްވިންކަލް ކަންނާ އާ ދެމީހުންނަށް އެކަކު އަނެކަކު ދެކެ ލޯބިވެވުނީ އަކްޝޭގެ ކޮންމެވެސް “ކިލާޅީ” ފިލްމެއްގެ ޝޫޓިން ތެރެއިންނެވެ. އެ ފިލްމަކީ 1999ގައި ރިލީޒްކުރި “އިންޓަނޭޝަނަލް ކިލާޅީ” އެވެ. އަކްޝޭ އާއި ޓްވިންކަލް ކައިވެނިކުރީ 07 ޖެނުއަރީ 2001 ގައެވެ.

އަކްޝޭ އާއި ޓްވިންކަލް ކަންނާ

މިއަދު އަކްޝޭ އާއި ޓްވިންކަލް އަކީ އާރަވް އަދި ނިޓާރާގެ ފަޚްރުވެރި މައިންބަފައިންނެވެ. ކޮންމެއަކަސް، އަކްޝޭ ކުމާރުގެ ބޮލީވުޑް ހަޔާތަކީ މި ދާއިރާއަށް ޝައުޤުވެރިވާ ފަރާތްތަކަށް މުހިންމު ފިލާވަޅުތަކެއް ލިއްބައިދޭނެ ދިރިއުޅުމެކެވެ.

ލިޔުންތެރިޔާގެ ފުރަމަލަ

މަރިޔަމް ދީމާ
ތަފާތު މަޢުޟޫތަކަށް ދީމާ ލިޔާނެއެވެ. އެންްމެ ޝައުޤުވެރިވަނީ ފިލްމީ ދާއިރާ އަށެވެ.

ގުޅުންހުރި ލިޔުން: