މަސްވެރިކަމުގެ ދާއިރާއަށާއި ރާއްޖޭގެ އެހެން ދާއިރާތަކަށް އަލްމަރުޙޫމް މައިޒާން ޙަސަން މަނިކު ކޮށްދެއްވާފައި އަގުހުރި ޚިދްމަތްތައް ފާހަގަކޮށް، އެ މަރުހޫމުގެ ހަދާންތައް އާކުރުމުގެ ގޮތުން ހެޔޮއެދޭ ފަރާތްތަކަކުން ތައްޔާރުކުރައްވާ ފައިވާ “މައިޒާން ހަސަންމަނިކު 1953-2002″، ފޮތް، ރައްޔިތުންގެ މަޖިލީހުގެ ރައީސް، ރައީސް ނަޝީދު ނެރެދެއްވައިފިއެވެ. އެމަނިކުފާނު މިފޮތް ނެރެދެއްވާފައިވަނީ، 40 ވަނަ މަސްވެރިންގެ ދުވަހުގެ ޕްރޮގްރާމްތަކުގެ ތެރެއިން މިކަމަށް ޚާއްސަކޮށް ބޭއްވުނު ހަފުލާއެއްގައެވެ. މި ހަފުލާގައި އަލްމަރުޙޫމް މައިޒާން ޙަސަން މަނިކާއިއެކު އެކި ދާއިރާތަކުގައި މަސައްކަތް ކުރައްވާފައިވާ ބޭފުޅުންގެ އިތުރުން އެމަނިކުފާނުގެ އާއިލާގެ ގިނަ ބޭފުޅުން ބައިވެރިވެވަޑައިގަތެވެ.

މައިޒާން ޙަސަން މަނިކަކީ ދިވެހިރާއްޖޭގައި މެރިން ރިސާރޗް ކުރިއެރުވުމާއި، ދެމެހެއްޓެނިވިގޮތުގައި މަސްވެރިކަން ތަރައްޤީކުރުމުގެ ރޮނގުން އަގުހުރި ޚިދުމަތްތަކެއް ކޮށްދެއްވާފައިވާ ބޭފުޅެކެވެ. ދިވެހިރާއްޖޭގައި ކަނޑުތަކުގެ މާހައުލާއި، މަސްވެރިކަން މެނޭޖްކުރުމަށް ސައިންޓިފިކް ދިރާސާތަކަށް ބަރޯސާވުމުގެ މުހިންމުކަން ފާހަގަކުރައްވައި، ކަނޑުތަކާއި ގުޅޭ ދިރާސާތައް ކުރުމަށް ޚާއްސަ މުއައްސަސާއެއް އުފެއްދުމަށް އެމަނިކުފާނުގެ އިސްނެންގެވުމާއިއެކު ކުރެއްވި މަސައްކަތުގެ ނަތީޖާއެއްގެ ގޮތުން މެރިން ރިސާރޗް ސެކްޝަނެއް 1984 ވަނަ އަހަރުގެ ޖުލައި 24 ގައި ވުޖޫދަށް ގެނެވުނެވެ. އަދި އެމަނިކުފާނުގެ މޭސްތިރިކަމުގެ ދަށުން، މެރިން ރިސާރޗް ސެކްޝަން (ފަހުން މެރިން ރިސާރޗް ސެންޓަރ) ގެފަރާތުން މަސްވެރިކަމާއި ކަނޑުގެ މާހައުލުގެ މުހިންމު ދިރާސާތައް ކުރުމުގެ އިތުރުން، ކަނޑުގެ ޤުދުރަތީ ވެށި ދެމެހެއްޓުމަށްޓަކައި ކަނޑުގެ ސަރަހައްދުތަކާއި، ކަނޑުގެ މުހިންމު ބައެއް ދިރުން ހިމާޔަތް ކުރެވިގެން ދިޔައެވެ. އަދި މެރިން ރިސާރޗް ގެ ދާއިރާއިން ރާއްޖޭގެ ޤާބިލުކަން އިތުރުކުރުމަށްޓަކައި، ޒުވާން ހުނަރުވެރިން ބިނާކުރުމަށް މަރުޙޫމް މައިޒާން ޙަސަން މަނިކު ޚާއްސަ ސަމާލުކަމެއް ދެއްވިއެވެ. އެގޮތުން ގިނަ އަދަދެއްގެ ދިވެހިން މެރިން ރިސާރޗް ދާއިރާއިން ތައުލީމު ހާސިލުކޮށް ސެންޓަރުގެ ގާބިލުކަން އިތުރުވެގެން ދިޔައެވެ.

މަސްވެރިކަމާއި ދިރާސާކުރުމުގެ ދާއިރާގެ އިތުރުން، މައިޒާން ޙަސަން މަނިކަކީ ގިނަ އެހެން ހުނަރުތަކެއްގެ ވެރިއެކެވެ. މިގޮތުން އެމަނިކުފާނަކީ ހުނަރުވެރި އާރކިޓެކްޓެކެވެ. މީގެ އިތުރުން ހަސަން މަނިކަކީ ފޮޓޯގްރަފީ، އާރޓް، ޕަރފޯރމަންސް އާރޓް، އަދި މިއުޒިކުގެ ރޮނގުންވެސް ހުނަރު ލިބިލައްވާފައިވާ ބޭފުޅެކެވެ.

މިއަދު ނެރެވުނު “މައިޒާން ޙަސަން މަނިކު (1953 – 2002)” ފޮތުގައި އެމަނިކުފާނާއިއެކު އެކި ރޮނގުރޮނގުން މަސައްކަތް ކުރައްވާފައިވާ 27 ފަރާތެއްގެ ލިޔުންތައް އެކުލެވިފައިވެއެވެ. މިފޮތަކީ އަލްމަރުޙޫމް މައިޒާން ޙަސަން މަނިކުގެ ހަނދާންތައް ދިރުވައި އެމަނިކުފާނުގެ ޚިދުމަތްތަކުގެ އަގު ވަޒަންކުރާ ހެޔޮއެދޭ ފަރާތްތަކަކާއި އެމަނިކުފާނުގެ އާއިލާގެ ބޭފުޅުން އެކުލަވާލައްވާފައިވާ ފޮތެކެވެ.
މައިޒާން ޙަސަން މަނިކު ބިންގާ އެޅުއްވި މެރިން ރިސާރޗް ސެންޓަރުގެ މެންޑޭޓް އިތުރުކުރުމަށްފަހު، މޯލްޑިވްސް މެރިން ރިސާރޗް އިންސްޓިޓިއުޓަކަށް ބަދަލުކުރެވުނީ 2019 ވަނަ އަހަރުގެ ތެރޭގައެވެ. މި ބަދަލާއިއެކު ދިރާސާ ޕްރޮގްރާމްތަކަށް އިތުރު ބަޖެޓު ލިބި، މަސްވެރިކަން މެނޭޖްކުރުމަށް ސައިންޓިފިކް މައުލޫމާތު ބޭނުންކުރެވޭ މިންވަރު އިތުރުވެގެން ދިޔައެވެ. މީގެ އިތުރުން، ދިވެހިރާއްޖޭގައި މެރިކަލްޗަރ ދާއިރާއެއް ތަރައްޤީކުރުމަށް ކުރެވޭ ޢަމަލީ މަސައްކަތްތައް އިތުރު ހަރުފަތަކަށް ގެންދެވުނެވެ. މިއީ، ރާއްޖޭގައި މެރިން ރިސާރޗްގެ ދާއިރާ ކުރިއަރުވައި ފުޅާކުރުމަށް އަލްމަރުޙޫމް މައިޒާން ޙަސަން މަނިކު ކުރެއްވި ތަސައްވުރާއިއެކު މިދާއިރާއިން ގާބިލުކަން އިތުރުކުރުމަށް ކުރެއްވި މުހިންމު މަސައްކަތްތަކެއްގެ ނަތީޖާއެވެ.

ލިޔުންތެރިޔާގެ ފުރަމަލަ

އަޙްމަދު ރަޝީދު
އަޙްމަދު ރަޝީދު
ހުރިހައި ދާއިރާއެއްގެ ލިޔުންތައްވެސް މުނިއަވަސްގެ ފައުންޑަރ އަދި ޗީފް އެޑިޓަރ ލިޔާނެއެވެ.

ގުޅުންހުރި ލިޔުން: