އަހަރުގެ ބޮޑު ފިލްމުގެ ގޮތުގައި އިޝްތިހާރު ކުރަމުން އައި “ނޯޓީ40” ރޭ އޮލިމްޕަހުގައި ޕްރިމިއަރ ކޮށްފިއެވެ. ކުލަގަދަ ރަސްމިއްޔާތަކާއި އެކު ބޭއްވި ޕްރިމިއަރ ނައިޓްގައި ފިލްމުގެ ގިނަ ފަންނާނުންތަކެއް ވަނީ ބައިވެރިވެފައެވެ.

ނޯޓީ40 ޕްރިމިއަރކޮށްދެއްވީ ޝަރަފުވެރި މެހެމާން ވީ މީޑިއާގެ ޗީފް އޮޕަރޭޓިން އޮފިސަރ މުހައްމަދު އާސިފް އެވެ. ރަސްމިއްޔާތުގައި ވާހަކަ ދައްކަވަމުން އާސިފް ވިދާޅުވީ “ނޯޓީ40 އަކީ ވީމީޑިއާ އާއި ވަރަށް ގާތްގުޅުމެއް ބާއްވައިފައިވާ ފިލްމެއް ކަމަށާއި ވީ މިޑިއާއަކީ ދިވެހި ފިލްމީ ފަންނާނުންނަށް އެހީތެރިކަން ފޯރުކޮށްދެއްވުމަށްޓަކައި މަސައްކަތް ކުރާ ބައެއް ކަމަށެވެ. 

ފިލްމާއި ބެހޭގޮތުން ޔޫއްޕެ ބުނެފައިވަނީ ފިލްމާއިމެދު ކުރެވޭ އުންމީދު ބޮޑުކަމަށާއި “ނޯޓީ40” އަހަރުގެ އެންމެ ބޮޑު ފިލްމަށް ވެގެންދާނެ ކަމަށެވެ. “ނޯޓީ 40” ގެ އެސިސްޓެންޑް ޑައިރެކްޓަރ މުހައްމަދު މަނިކު ބުނެފައިވަނީ މިއީ ކުރެވުނު ވަރަށް ބޮޑު މަސައްކަތެއް ކަމަށާއި މަނިކުއަށް ފިލްމުގައި ކުރެވުނު މަސައްކަތަކީ ވަރަށް ހިތްހަމަޖެހޭ ތަފާތު މަސައްކަތެއް ކަމަށެވެ.

ފިލްމުގެ ޕްރޮޑިއުސަރ ޝަފީގު ބުނެފައިވަނީ ބެލުންތެރިންގެ ވަރަށް ބޮޑު ތަރުހީބެއް ފިލްމަށް ލިބިފައިވާ ކަމަށާއި މިހާތަނަށް 5 ޝޯ އަށް ޓިކެޓްތައް ވިކިފައިވާ  ކަމަށެވެ.

ފާތިމަތު އާޒިފާ (އަޒޫ) ބުނެފައި ވަނީ މި ފިލްމުގައި އޭނާގެ ވަރަށް ތަފާތު ރޯލެއް ފެނިގެންދާނެ ކަމަށާއި ފަހަރެއްގައި ފިލްމް ބެލުމަށް ފަހު ބެލުންތެރިން އޭނާ ދެކެ ރުޅިއައުމަކީ ވެސް އެކަށީގެންވާނެ ކަމެއް ކަމަށެވެ. ފިލްމުގައި އޭނާގެ ކުޅެފައިވަނީ ނެގެޓިވް ރޯލެއް ކަމަށް އަޒޫ ބުންޏެވެ.

ރޭގެ ރަސްމިއްޔާތު ފަށާފައިވަނީ “ދަންމާނު” ބޮޑުބެރު ގްރޫޕް ހުށަހަޅައިދިން ލަވަތަކަކުންނެވެ. “ދަންމާނު” ބޮޑުބެރު ގްރޫޕުން ހުށަހަޅައިދީފައިވަނީ “ނޯޓީ40” ފިލްމުގެ ތަފާތު 3 ލަވައެކެވެ. އަދި ސްޓެޕް އައްޔަގެ ނެށުމުގެ ފަރި ހަރަކާތްތަކެއް ވެސް ވަނީ ފެނިގެން ގޮސްފައެވެ.

ފިލްމުގެ ގިނަ ތަރިން ބުނެފައިވަނީ މި ފިލްމަކީ ބެލުންތެރިންނަށް ވަރަށް ކަމުދާނެ ފިލްމަކަށް ވެގެންދާނެ ކަމަށާއި މިއަހަރުގެ ފާހަގަ ކޮށްލެވޭ ފިލްމަކަށް މި ފިލްމް ވެގެންދާނެ ކަމަށެވެ.

ފިލްމުން ފެނިގެން ދިޔަ ތަރިިންގެ ތެރޭގައި އަހްމަދު ސައީދު، މުހައްމަދު މަނިކު، އަލީ ސީޒަން، ޔޫސުފް ޝަފީއު، ފާތިމަތު އާޒިފާ (އަޒޫ)، ނިއުމާ މުހައްމަދު، އަލީ އާޒިމް (ދޮން އައްޔަ)، އިބްރާހިމް ޖިހާދު (ޖިމީ) ހިމެނެ އެވެ. އަދި މަރިޔަމް އައްޒަ، މުހައްމަދު ރިފްޝާން (ރިއްޕެ) އަދި އުމަރު އަޝްފާގް، އަރްޝަމް، އަލީ ޝާހިދު (ސްޓެޕް އައްޔަ)، އަހްމަދު ޝަރީފް، ގުލިސްތާނުގެ ހުނަރުވެސް ވަނީ ދައްކާލާފަ އެވެ. 

ނޯޓީ 40 އަކީ މިހާތަނަށް އެ ފިލްމެއްގައި އެންމެ ގިނަ ރަހަތައް އެކުލަވައިގެން ގެނެސްދިން އެއް ފިލްމެވެ. އެ ފިލްމުން އެކްޝަން، ލޯބި، ރޮމޭންސް، މިއުޒިކަލް، ސްޕައި، ކޮމެޑީ، ޑްރާމާ، ޖަޒުބާތު، އެކުވެރިކަން މިހެން ގޮސް ހުރިހާ ރަހައެއް ފެނިގެން ދިޔަ އެވެ. 

ލިޔުންތެރިޔާގެ ފުރަމަލަ

އަޙްމަދު ރަޝީދު
އަޙްމަދު ރަޝީދު
ހުރިހައި ދާއިރާއެއްގެ ލިޔުންތައްވެސް މުނިއަވަސްގެ ފައުންޑަރ އަދި ޗީފް އެޑިޓަރ ލިޔާނެއެވެ.

ގުޅުންހުރި ލިޔުން: