އޭ އަހާއެވެ! އަޅާއަށް މަޢާފް ކުރާށެވެ. އަޅާއަށް މިކުރެވުނީ ކިހާ ބޮޑު ކުށެއްތޯއެވެ. އަހާގެ ލޮލުން ހޯސްލާފައި ފައިބަމުންދިޔަ ކަރުނަތައް މީގެ ކުޑަ ހިނދުކޮޅެއް ކުރިން އަޅާއަށް ފެނިފައިވަނީ އަލި ގަދަ ނޫރެއް ހެން ވިދަވިދާ ހުއްޓައެވެ. އަހާގެ ދެކަންފަތަކީ މިއަޅާގެ ކަންފަތަށް ވުރެ މާ ތޫނުފިލި، ދިގު އެއްޗެއްކަން މިއަދު މިއަޅާއަށް އެނގިއްޖެއެވެ. އަހާއެވެ. ތިޔައީ ނުގުޑާފަދަ ޖާހިލުކަމެއްގެ ވެރިއެކެވެ. އެކަމަކު މިއަޅާ އަހާއަށް އަޅާލާ ކޮންމެ ފަހަރަކު އަހާގެ ކިޔަމަންތެރިކަން މިއަޅާއަށް މާ ރަނގަޅަށްވެސް އެނގެއެވެ.

އޭ އަހާއެވެ! މިއަޅާގެ ފަޔަކު އަހާއަށް ގުދުރަތުން ދެއްވާފައިވާ ހަލުވިކަމެއް ނެތެވެ. އަހާގެ ފަޔަކީ ދިގު އެއްޗެކެވެ. ހަލުވި އެއްޗެކެވެ. އަހާގެ ހަށިގަނޑަކީ ބާރު ގަދައެއްޗެކެވެ. ކިތަންމެ ބަރު އެއްޗެއް އަހާގެ ކޮނޑަށް ލިޔަސް އެ އުފުލައިލާނީ އުފަލުންނެވެ.

އޭ އަހާއެވެ! މިއަޅާއަށް މަޢާފް ކުރާށެވެ. ކުށްކުރެވޭނީ އިންސާނުންނަށެވެ. އެކަމު އަހާ މިއަދު އަހަންނަށް މަޢާފްކޮށްދޭނީ ކޮން ހައިސިއްޔަތަކުން ހެއްޔެވެ. އަހާ އަކީ މިއަޅާގެ ނަޒަރުގައި މަންމަނެކެވެ. އެކަމު މިއަދު އަހާގެ އިހްސާސްތައް މިއަޅާއަށް މާ ރަނގަޅަށްވެސް އެނގެއެވެ. ބަނޑުހައިވާ ކޮންމެ ފަހަރަކު މިއަޅާއަށް ތަކުރާރުކޮށް ގޮވާ ހަދަމު ނޫންހެއްޔެވެ. އަދި މިއަޅާ އަހާއަށް ކާން ނުދީފިނަމަ މިއަޅާދެކެ އަހާ ރުޅި އައިސްގެން ބޮޑާހާކަމު ނޫންހެޔެވެ. އެކަމަކު… މިއަޅާ ވަރުބަލިވެ، ގޮތް ހުސްވާ ކޮންމެ ފަހަރަކު އަހާގެ ގައިގައި އޮޅުލައިގަނެ، އަހާގެ ކޮނޑަށް މިއަޅާ އަރަމު ނޫންހެއްޔެވެ. އަދި އަހާގެ ކޮނޑަށް މިއަޅާ އަރުވައިގެން ހިނގައިގަންނަނީ އުފަލުންކަން އަހާގެ ހިނިތުންވުމުން މިއަޅާއަށް ސިފަކޮށްދެއެވެ.

އެކަމަކު އަހާއެވެ. މިއަޅާގެ ކޮނޑަށް އަހާ އަރުވައިފިނަމަ މިއަޅާ ދުނިޔެއިން ނިމިގެން ހިނގައިދާނެއެވެ.

”މަޢާފްކުރާށެވެ. ”މިހުރިހާ ޝަކުވާއެއް ކުރިނަމަވެސް އަހާގެ ކައިރީ މިއަޅާ މާފަށް އެދެން ޖެހޭ ސަބަބެއް އެނގޭ ހެއްޔެވެ. އެއީ ކީއްވެގެންކަން އެނގޭ ހެއްޔެވެ. އެއީ މިއަޅާއަށް އަހާ އާއި އެއްވަރަށް ރޭސް ޖަހަން މަސައްކަތް ކުރެވުނީތީއެވެ. އެއީ މިއަޅާއަށް ކުރެވުނު ކުށް ހީއަކަށް ވީތީއެވެ.

ލިޔުންތެރިޔާގެ ފުރަމަލަ

އަޙްމަދު ނާފިޢު
ޢިބްރަތްތެެރި ވާހަކައާއި ބަހާއި އަދަބުގެ ޢިލްމީ ލިޔުންތައް ނާފިޢު ލިޔާނެއެވެ.

ގުޅުންހުރި ލިޔުން: