| MUNIAVAS

ބައިސްކޯފުން ދައްކަމުންް އަންނަ ޔޫއްޕެ ޕްރޮޑަކްޝަންސްްގެ ދިގު ވެބް ސީރީޒް “ހުވާކޮށްފާ ބުނަން“ގެ ހަތް އެޕިސޯޑް މިހާތަނަށް ދައްކާފައިވާއިރު، ސީރީޒްގެ ފޯރި އިތުރުވާން ފަށާފައިވާކަން ފާހަގަކޮށްލެެވެއެވެ. އެގޮތުން ހަތްވަނަ އެޕިސޯޑުގައި ހައިފާ (މަރްޔަމް ޝިފާ) އާއި ނައުޝާދު (އަޙްމަދު އީސާ)ގެ މައްސަލަބޮޑު ލޯބީގެ ގުޅުމަށް ވަނީ ސިއްކަ ޖަަހާފައެވެ. ހައިފާގެ ރުންކުރު، ޝަކުވާ ބޮޑު މިޒާޖަށް ކެތްނުކުރެވިގެން، ސިޔާސީ ދާއިރާގައި ހަރަކާތްތެރިވާ ނައުޝާދު ވަނީ ހައިފާ އާއި ރުޅިވެފައެވެ.

“ތިއުޅެނީ އަހަރެންގެ މިޒާޖު ބަދަލުވުގެނެއް ނޫނޭ…. އެހެން އަންހެނެއް ފެނިގެން ތިއުޅެނީ.-” ހައިފާ އާ އެކުގައި އުޅެން ބޭނުން ނުވާކަމަށް ނައުޝާދު ބުނުމުން ރުންކުރު، ޝަކުވާބޮޑު ހައިފާގެ ޝަކުވާތައް ބަންޑުންކޮށްލައެވެ. ދެމީހުންގެ ދެމެދުގައި ހޫނުގަދަ ބަހުގެ ހަމަލާތަކެއް ކުރިއަށްދެއެވެ. އެހެން ނަމަވެސް ނައުޝާދު ބޭނުންވީ ހައިފާ ދޫކޮށްލުމަށެވެ.

ހައިފާގެ ބެސްޓް ފްރެންޑަކީ ނައުޝާދުގެ ކޮއްކޮ ޒާރާ (ވާޝިޔާ މުޙައްމަދު) އެވެ. ހައިފާއަށް ނައުޝާދު ނަގައިދީފައިވާ ފްލެޓްގެ ތަޅުދަނޑި ނައުޝާދު އާ ހަވާލުކުރަން ގޮސް، ޒާރާ އަށް ފްލެޓް ނަގައިދިންކަން އެނގިގެން އެވާހަކަ ދައްކައެވެ. ހައިފާގެ މިޒާޖު ހުންނަ ގޮތް އޭނާގެ ބޭބެއަށް އިތުރަށް އޮޅުންފިލުވައިދެއެވެ. އަދި ހައިފާގެ ފަރާތުން ދެން އިތުރު އެއްވެސް އުނދަގުލެއް ނުލިބޭނެ ކަމަށް ހައިފާ ބުނިކަމަށް ޒާރާ ބުނެއެވެ.

ޖަމްޝީދު ނުވަތަ ޖާނޫ (އަޙްމަދު ސަޢީދު)ގެ ފިހާރަ ކައިރިއަށް އޭނާގެ ރަހުމަތްތެރި ރައްޒާގު ދެއެވެ. ޖަމްޝީދުގެ ގޭގައި ބަހައްޓަން ބުނި އަންހެން ކުއްޖާ އަންނަން ތައްޔާރަށް ހުރިކަމަށް ބުނެއެވެ. ނަމަވެސް ޖަމްޝީދުގެ އަންހެނުން ބުނެ ކުރުނުކޮށްގެން އެމީހުންގެ ގޭގައި ފިރިހެން ކުއްޖެއްް ބެހެއްޓިކަމަށް ޖަމްޝީދު ބުނެއެވެ. ވަގުތުގެ ބޭނުން ހިފައިގެން ޖަމްޝީދުގެ ހިތުގައި ޝައްކު އުފެއްދުމަށް ރައްޒާގު ވާހަކަތަކެއް ދައްކައެވެ.

ޖަމްޝީދުގެ އަންހެެނުން ޝާއިރާ (ނަތާޝާ ޖަލީލް)ގެ ފައި ކައްސާލައިގެން ވެއްޓި ފަޔަށް ތަދުވެއެވެ. ގޭގައި މަސައްކަތްކުރަން ގެންގުޅޭ (ޢަލީ އާޒިމް) ލައްވާ ފައިގައި އައިސްޕެކް އަޅަން ފަށައެވެ. އެވަގުތު އެތަނަށް އައިސް ވަދެވެނީ ޝާއިރާގެ ފިރިމީގާ ޖަމްޝީދު އަށެވެ. ދެން ކަަންތައްވާ ގޮތް ބަލައިލަން ޖެހޭނީ އެޕިސޯޑް07 ބަލައިގެންނެވެ.

ބޮޑު ކާސްޓެއް ހިމެނޭ މި ސީރީޒްގައި މިހާތަނަށް ދައްކާފައިވަނީ މަދު ތަރިންކޮޅެކެވެ. ތިން ސީޒަން އަކަށް ބަހާލައިގެން ގެނެސްދޭ “ހުވާކޮށްފާ ބުނަން“ގެ ކޮންމެ ސީޒަނެއްގައި26 އެޕިސޯޑް ހިމެނޭނެއެވެ.

”ހުވާކޮށްފާ ބުނަން“ އަކީ ޔޫއްޕެގެ އަމިއްލަ ޕްރޮޑަކްޝަން ހައުސް ’ޔޫއްޕެ ޕްރޮޑަކްޝަންސް’ގެ އަލަތު ސީރީޒެވެ. ޔޫސުފް ޝަފީއު (ޔޫއްޕެ) ސްކްރީންޕްލޭ ލިޔެ، ޑައިރެކްޓްކޮށް، ޢަލީ ރަޝީދު (ގޮޅާ އައްޔަ)ގެ ކެމެރާކުރުމާއި ޕޯސްޓްޕްރޮޑަކްޝަން އެކުލެވޭ ”ހުވާކޮށްފާ ބުނަންް“ އަކީ އަސަރުގަދަ ލޯބީގެ ކަންތައްތަކެއް ފެނިގެންދާނެ، އަދި މުޖުތަމަޢުގައި ހުރި މުހިންމު މައްސަލަތަކަކަށް އަލިއަޅުވާލައި ގެނެސްދޭ ސީރީޒެކެވެ.