އަމިއްލަ ނަފުސުގެ ޝައްކަކީ ތިމާ ކުރިޔަށް ދިޔަނުދީ ކުރިބައްދާ އެއް ގަދަ ބާރެވެ. ސަމާލުކަންނުދެވި އެ ބާރުގެ ވާފަށުން ތިމާގެ ނަފުސު ބަނދެލައެވެ. އަދި ތިމާގެ ޤާބިލްކަން ހުރި ކަންކަމާ ދެމެދަށް ވެސް ވަހުމުގެ ބޯ ފަރުދާއެއް ވައްޓާލައެވެ.

ތިބާއީ އަމިއްލަ ފަރުދަކަސް، ޚާދިމަކަސް އަދި ތަނެއްގެ ވެރިޔަކަސް، ކޮންމެވެސް ހިސާބަކުން ތިމާގެ އަމިއްލަ ނަފުސުގެ އިތުބާރު ބަލިކަށިވެ، ޝައްކާއި ވަހުމުން ތިމާގެ ކުރިމަގަށް ހިޔަނި އަޅައެވެ.

އަމިއްލަ ޝައްކަކީ ނުރައްކާ ދުޝްމިނެކެވެ. އެ ހޮނު ތިމާގެ މަސައްކަތު މާޙަޢުލުގެ ކޮންމެ ހިސާބަކަށް ވެސް އަޅާފާނެއެވެ. އަދި ތިބާގެ ބާރުގެ ދަށުގައިވާ ކަންކަމަށްވެސް އޭނާ އަމުރުކޮށް ތިމާގެ ނަފުސާ ދެކޮޅަށް ބަޣާވާތްކޮށް ކުރި ހޯދަފާނެއެވެ. ފަހި ފުރުޞަތުތަކުން އެކަހެރިކޮށްފާނެއެވެ. ގޮތްނިންމުމާއި ފައިދާހުރި ރިސްކު ނެގުމަކީ ބޮޑު ބިރެއްގެ ސިފައިގައި ދައްކާ، ތިބާ ފަސްޖެހޭނޭ ހުރިހާ ވަސްވާހެއް ހިތަށް ވައްދަފާނެއެވެ.

ވީމާ އެ ނުރައްކާތެރި ވަބާ ބަލިކޮށްލުމަކީ ތިބާގެ ފާގަތި މުސްތަޤުބަލަށް ހަމައެކަނި އޮތް ޙައްލެވެ. އާންމު ޙާލަތާ ކަންކަން ބަދަލުކުރުމުގެ ބަދަލުގައި އެ ޙާލަތާ ރައްޓެހި ބައްޓަމަކަށް ވިސްނުން ބަދަލުކުރަން ދަސްކުރާށެވެ. އެބަދަލާއެކު ތިބާގެ އުފާވެރި މާދަމާ އަބަދުވެސް ބިނާ ކުރާށެވެ.

ނަފުސުގެ ޝައްކަށް އަލްވަދާޢު ކިޔޭނޭ ބައެއް ގޮތްތައް

ހޭލާ، ސަމާލުވެ ކުރިމަތިލުން
ނަފުސުގެ ޝައްކުން ނުކުތުމަށް އެޅިދާނޭ އެންމެ މުހިންމު އެއް ފިޔަވަޅަކީ، އަމިއްލަ ނަފުސު ތިމާގެ ވިސްނުމުން ހޭލައްވާލުމެވެ. ތިމާގެ ނަފުސުގެ ލޯ ހުޅުވި ވަރަކަށް ތިމާއަށް ތިމާހުރި ހިސާބު ސާފުވާނެއެވެ. ތިމާ ކާމިޔާބާ ދުރަށްލަނީ ކޮން ވަހުމަކުންކަން އެނގި ދަސްވަމުން ދާނެއެވެ. އަދި އެ އޮއިވަރާ ދުރަށް ފެތުމުގެ ޤާބިލްކަން މަޑުމަޑުން އިތުރުވެ، މިނިވަން އައްސޭރި ލޮލަށް ފެންނަން ފަށާނެއެވެ. ފުރަތަމަ ފުސް ކޮށެވެ. ދެން ކައިރިވަމުން ސާފުވަމުން ދާން ފަށާނެއެވެ. ބޭނުމީ ކުޑަކުޑަ ހިތްވަރެކެވެ.

އެ ޝައްކުގެ ފުންމިން ބެލުން
ކޮނެ ފަސްނަގާ ހާ ކުރުމުގައި ވަރުބަލިނުވެ ކުރިޔަށްދާށެވެ. މައިމޫ ބަލާ ކޮންނަމުން ހޯދަމުންދާށެވެ. އެ މޫ ފެޅުމުގެ ފުރުޞަތު ލިބުނީ ތިމާއަށް އެޅުނު ޅައެއްޗަކުން ކަމުގައިވުން ވެސް އެކަށީގެންވެއެވެ. އެ ވަހުމާ ބަލިކަށިކަން ތިބާގެ ވިސްނުމަށް ވިހަލަނީ ކޮން ހޮރަކުން ބޯދީފައިތޯ ފާރަލާށެވެ. އިސާހިތަކު އެ ދުޝްމަނާ ބަލިކޮށް ތިމާގެ ސިކުނޑިޔާ ނަފުސުން ފަހާ ދުރަށް ލެވިދާނެއެވެ.

އޮބާލަންވީ ބަޓަނާއި ދަނޑިވަޅު ހޯދުން
ނުކިއްސަރު ވިސްނުމާއި ވަހުމުގެ ޖަޒުބާތު އުފަންކުރަނީ ތިމާޔަށް ކުރެވުނު ކޮން ނުރަނގަޅު ޢަމަލަކުންތޯ ނަފުސާ ސުވާލުކުރާށެވެ. އެހިސާބުން ޤުރުބާންކުރަންވީ ތިމާގެ ކޮން ޝަޢުޤެއްކަމާ އަދި އަލަށް ފަށަންވީ ކޮން އަމަލެއްގެ ބަދަލެއްކަންވެސް ހޯދެމުން ދަސްވަމުން ދާނެއެވެ. އެތެރެއަށް ވަންނާށެވެ. ހުރިހާ ދޮރެއްގައި ޓަކިދޭށެވެ. ނަފުސުގެ ކޮންޓްރޯލް އަތުލާށެވެ. ލަގަން ތިމާގެ ބާރުގެ ދަށަށް ގެންނާށެވެ. ޝައްކުތަކުގައި ކޮޅުފައިން ޖަހާ ވަން ދޮރުން ބޭރުކޮށްލާށެވެ.

ކަންކުރުމުގެ ވައްޓަފާޅި ބެލުން
ކޮންމެ ކަމެއްވެސް ހިނގާދާނީ ވަކި ޠަބީޢަތަކުންނެވެ. ވަކި ހަމަތަކެއްގެ މަތިންނެވެ. ސަލާމަތްކަން ބޮޑީ ކޮން ގޮތެއްތޯ އަދި މާޒީގައި އެކަން ދަތުރުކޮށްފައި ހުރީ ކޮން މިސްރާބަކަށް ކިހިނެއްކަން ވެސް ބެލުނު ވަރަކަށް ފާރަލާ ބަލާ ހޯދާށެވެ. އެމަގުން ސީދާ މައްސަލައިގެ ހައްލު ނުފެނުނަސް، އެ ކަންކަމުގެ ވެކްސިން ހޯދޭނެއެވެ. ވަގުުތުކޮޅެއް ނަގާފާނެއެވެ. އެހެނަސް އޭގެ އެހީގައި ބަލި އިތުރަށް ނަފުސުގައި ވަކި ހިއްޕިޔަ ނުދީ ސަލާމަތްކުރެވޭނެއެވެ. މައްސަލަ ދުރަށްލުމަށް ނުވަތަ މައްސަލަޔާ ތިބާ ދުރުވުމަށް ހިނގެން އޮތް މަގުތަކުން ދަތުރު ފަށާށެވެ. އެ ވަބާއަށް ފިލާށެވެ.

ސިކުނޑީގެ ނުވަތުބުރު ނިއުޅުން
ސިކުނޑި ހެވަތާ ދެކޮޅަށް ޖެހި ނުވަތު ބުރުތައް ހޯދާ، ހެޔޮ އަތަށް އަނބުރާލާށެވެ. ނަފުސުގެ ތަޅު ނައްޓާލާށެވެ. އެއަށްފަހު ނަފުސުގެ ދޫ އެބުނާ ބަސްތައް ވިސްނާ ތަރުޖަމާކޮށް ސިނކުޑިޔަށް ބުނެދޭށެވެ. ތިމާ ހަނދާން ނެތިދާނެކަމަށް ނޯޓުކުރާށެވެ. ރައްކާކުރާށެވެ. ތަކުރާރުކުރާށެވެ.

ތިމާގެ ރޫޙަށް ޗާބީ ދޭށެވެ.
ނަފުސުގެ ޝައްކާ ހަނގުރާމަކުރެވިދާނޭ އަނެއްގޮތަކީ، ތިމާގެ ލަނޑުދަޑިޔާ ތިމާ ޙާޞިލްކުރަން ބޭނުން ކަންކަމަށް ނަޒަރުހިންގާ، ނަފުސު އެކަމުން ސަލާމަތް ކުރުމަށް ކުޅިބައި ރާވާލުމެވެ. އެގޮތުން ތިމާ ކުރާ ކޮންމެކަމެއް ކުރަނީ ކޮން ބޭނުމަކު ކީއްކުރަންކަން ހަނދާނުގައި ބަހައްޓާށެވެ. އަދި އެކަމެއް ޙާޞިލްކުރުމުގެ އަމާޒުން ވިސްނުން ކަހާލިޔަ ނުދޭށެވެ. އަބަދުވެސް ކަންކަން ކުރުމުގައި ވިސްނަންވާނީ އެއްކަލަ ޝައްކަށް ފުރުޞަތު ނުދިނުމަށެވެ. އެ ވަހުމް ނަފުސާ ސިކުނޑިން ނެރެލުމަށެވެ. ނަފުސު ކުރިޔަށް ދިއުމަށް އަބަދުވެސް ތިމާގެ ރޫޙަށް ޗާބީ ދޭން ޖެހެއެވެ.

އަނެކުންގެ ހުއްދަޔަށް އިންތިޒާރު ނުކުރުން

ތިބާގެ ކޮންމެ ނިންމުމެއް އަނެކުންގެ ޚިޔާލާ އަމުރު ހޯދައިގެން ނިންމުމަށް އިންތިޒާރު ކުރާހައި ހިނދަކު ތިބާގެ ލަގަން އެވަނީ އެބައެއްގެ އަތްމަށްޗަށް ދޫކޮށްލެވި، ދުރުހިލޭ ބައެއްގެ އާނބަހުން ނޫނީ ފިޔަވަޅެއްވެސް ނޭޅޭފަދަ ޙާލަތަކަށް ތިބާ އަނެކުންގެ ދަށުވެފައެވެ. އެހެން ކަންކުރާހާ ދުވަހަކު ތިމާގެ ސިކުނޑިން އުފަންވާ ޝައްކުގެ ސުވާލުމާކުތައް ދުވަހެއް ދުވަހަކަށް ވަމުން ދާނީ އިތުރެވެ. އެއީ ހިތްދަތި އަޅުވެތި ކަމެކެވެ. ހަމައެކަނި ތިމާއަށް ފުރިހަމަ އިތުބާރު އޮންނަ ގާތް ބައެއްގެ ޚިޔާލާ މަޝްވަރާ ހޯދުން ގޯހެއްނޫނެވެ. އަދި އެ ބަޔަކީ ތިމާގެ ހުރިހާ އުފަލާ ހިތާމައިގައި ފުރިހަމައަށް ބައިވެރިވާ ބަޔަކުކަމުގައި ވާންވާނެއެވެ. ނިންމުންތައް ނިންމާންވާނީ ފިސާރި ސާބިތުކަމާއެކު ފަސްއެނބުރި ނުބަލައެވެ. މާޒީއަކީ ހަމައެކަނި ތަޖުރިބާގެ ހިޔަނިތަކެއް ކަމަށާއި އެއީ ދަރުހެއްކަމުގައި ދެކޭށެވެ.

ބޭނުންތެރި ނިންމުންތަކަށް އިތުބާރާއެކު “ވަގުތު” ބޭނުންކުރުން

ސިނކުޑިން ދޭ ކޮންމެ ނުސިޔާނު މެސެޖެއް، ފައިދާކުރާނޭ ފަދަ ނަފުސީ ޖަވާބަކުން ބަދަލުކޮށްލަން ވިސްނާށެވެ. މިކަމަށް ސިކުނޑިއާއި ނަފުސު ދެބަސްވާން ދަސްކުރުން ވަރަށް މުހިންމެވެ. ފުރަތަމަ މިކަމަކީ ވަރަށް ދަތި އުނދަގޫ ކަމަކަށް ވެދާނެއެވެ. ނަމަވެސް ހިތްވަރުކޮށްލާފައި ކުރިމަތިލުމުން ނޫނީ ނަފުސުގެ ތިޔަ ޝައްކާ ވަހުމުން ބޭރަކަށް ނުނިކުމެވޭނެއެވެ. މަދު ދުވަސްކޮޅެއްގެ ތެރޭގައި ސިކުނޑި ތިމާގެ ނަފުސާ ބައިވެރިވެ އެހީތެރި ވާތީ ތިމާ ދެކޭނެއެވެ.

އިތުބާރާއެކު އެހީ ހޯދުން

ތިމާގެ ދިރިއުޅުމުގެ ވައްޓަފާޅި ބަދަލުކުރުމަށް އެންމެ ބާރުގަދަ އެއް ހަތިޔާރަކީ އިތުބާރު އެކުވެރީން ނުވަތަ މާހިރުންގެ ޚިޔާލާ މަޝްވަރާއެވެ. އެކަމަކު ހަނދާނުގައި ބަހައްޓަންޖެހެނީ، އެބަޔަކީ ތިމާއަށް ކިހާ އިތުބާރަކާ ޔަޤީންކަމެއް އޮންނަ ބައެއްކަމެވެ. ދުނިޔޭގައި ތިމާ ދިރިއުޅޭ އުޅުމާއި ދުނިޔެ ދެކޭ ނަޒަރު ބަދަކޮށްލާށެވެ. ހިތްވަރާއެކު ކެރިހުރެގެން ފާޅުގައި ގޮތްނިންމާ ބަސްބުނުމުގެ ހިތްވަރަކީ މިކަމުގެ ތަޅުދަނޑިއެވެ. އެހިސާބުން އެއްކަލަ ޝައްކުތައް ހަތިޔާރުބަހައްޓާތީ ތިބާ ދެކޭނެތެވެ. އޮބާލަންވީ ބަޓަނާ ދަނޑިވަޅާ ހިނގައިގަންނަވީ ކޮޅު އެނގޭނީ އެހިސާބުންނެވެ. އެދުވަހަކުން މަންޒިލާ ސަބަބު ނުހަނު ސާފުވާނެއެވެ. ހުރަސްތައް ނެތެމުން މަގުތައް ކޮށެމުން ނަފުސުގެ ޔަޤީންކަން އިތުރުވަމުން ފަސޭހަވަމުން ދާނެއެވެ.

އުޒުރުތަކުން އެއްކިބާވުން

އަމިއްލަ ނަފުސުގެ ޝައްކު ތިމާއަށް ބާރުފޯރުވާނަމަ ތިމާ ހުންނާނީ އެ ފިއްތުންތަކުގެ ޖަޒުބާތުގައި ބަނދެވި ރަހީނުވެ، އަބަދުވެސް ފައިދާހުރި ކަންކަން ނުކުރުމަށް ކޮންމެވެސް އުޒުރުތަކެއް ހޯދައިގެންނެވެ. އެފަދަ އުޒުރާ ސަބަބަށް ނަފުސު އަމުރުކުރާކަން ދެނެގަނެވޭ ހިސާބުން، ވަގުތުން އެކަމާ ފެޔަށް ޖެހުން ކޮންމެހެން ލާޒިމެވެ.

އަމިއްލަ ނަފުސަށްވުރެ އަނެކުން އިސްނުކުރުން

ވަރަށް އާންމުކޮށް ތިމާގެ ނަފުސީ ފިއްތުމާ ޝައްކުތައް ހުރިގޮތަށް ބަހައްޓާފައި އަނެކާގެ ހާސްކަމާ އުދާސް ފިލުވައި ދިނުމުގައި ތިމާ އުޅޭތީ ފެނެއެވެ. ފުރަތަމަ ތިމާގެ މައްސަލަތަކުން ދުރުހެލިވެފައި ދެން އެއަށްފަހުގައި އަނެކާއަށް މަގުދައްކާށެވެ. އަމިއްލަނަފުސަށް އަމިއްލަޔަށް ފާޑުކިޔަން ދަސްކުރާށެވެ. އަޅާލުމާ ކުލުނަށް ތިމާގެ އަމިއްލަ ނަފުސު މާ އެދެއެވެ. އެކަން އަމިއްލަ ސިކުނޑިއަށް ވިސްނައިދޭށެވެ. ތިމާގެ ނަފުސު ހިމޭންވެ އަމިއްލަ ފުދުންތެރިކަން ފެށޭ ހިސާބަކީ އެއީއެވެ. އެ އިމުން ފެށިގެން ތިމާގެ ނަފުސާ ސިނކުޑި ތިމާއަށް ކިޔަމަންވެ، ތިމާގެ ދިރިއުޅުން ދުޅަހެޔޮ މަގަށް ނަގުލުވަމުން ދާނެއެވެ. މިއީ އާދައިގެ ކަމެއް ނޫނެވެ. ބުރަ އަދި އެހާމެ އުނދަގޫ ނިންމުމެކެވެ. އެހެނަސް ބޮޑު ބަދަލެއް އެ ނިންމުމުން ފެނި، ތިމާގެ ހިތަށް ފިނިކަންލިބި، ހަމަޖެހުން ލިބިގެންދާނެއެވެ.

އަމިއްލަ ނަފުސުގެ އަގު ވަޒަންކުރުން

ހާސްކަމާ ކުއްލި ފިއްތުންތައް ކުރިމަތިވާ ވަގުތަށް އެއްކަލަ ނަފުސުގެ ޝައްކު އަބަދުވެސް އޮންނާ ފާރަޔަށް ބަލަބަލައެވެ. އެފަދަ ކޮންމެ ޙާލަތެއްގައި އޭނާގެ ޙަރަކާތް ދެގުނަކޮށް ސީދާ ހަމަލަ ފަށައެވެ. އެހެނަސް ތިބާގެ ނަފުސުގެ އަގު ވަޒަންކޮށް ކިރަމުންދާހާ ހިނދަކު ތިބާއަށް އޭނާގެ މައްޗަށް ކުރި ހޯދޭނެއެވެ. ނަފުސާ ވިސްނުމުގެ ފުރިހަމަ ކޮންޓްރޯލް ލިބޭނެއެވެ. އެހާލަތަކީ ތިމާގެ ލަނޑުދަނޑިއާއި މަންޒިލަށް އަމާޒުކޮށް ފައިތިލަ ހިއްލާލާ މަންޒިލާގާތަށް ފިޔަވަޅުއަޅަންވީ ވަގުތެވެ. އުނދަގޫ ޙާލަތާއެކު ވެސް ފަސްއެނބުރި ނުބަލާ ކުރިޔަށް ހިނގައިގަންނާށެވެ.

“އެންމެމޮޅަށް” އިންތިޒާރު ނުކުރުން

އެންމެ މޮޅު، އެންމެ ފުރިހަމަ އެއީ ޙާލަތުގެ ނިޔާއެކެވެ. އެއީ ކޮންމެ ހިނދެއްގެ ކޮންމެ ނަފުސެއްގެ ޙައްޤެއްނޫންކަން ދަންނާށެވެ. ނުވާ ފަދަ ކަންކަމާމެދު ވިސްނަންނުވާ ވަރަށް ވިސްނަން ފެށުމަކީ އެއްކަލަ ޝައްކަށް ހުޅުވޭ އެންމެ ބޮޑު ދޮރެވެ. ވާވަރަށް ތިމާގެ ފެންވަރުގައި އެހެނަސް އަބަދުވެސް އެއްފިޔަވަޅު ކުރިޔަށް އެޅުމުގެ ވިސްނުން ގެންގުޅުން ވަރަށް މުހިންމެވެ. މާދަމާގެ ހައްދާއި އިމަކީ މިއަދުގެ ޝައްކާއި ބިރެވެ. ތިމާއަށް ތިމާގެ ނަފުސާ ވިސްނުމަށް ގެނެވޭނެ އެންމެ ބޮޑު ބަދަލަކީ، ތިމާގެ ކަންފަތުގައި އަބަދަށް ގުގުމަމުން އަންނަ މިފަދަ އަޑުތައް، “ތީ އެއްވެސް މީހެއްނޫން”. “ތީ ބޮޑު ފިނޑިއެއް”. “ތީ އެކަމަށް ޤާބިލް މީހެއްނޫން”. މިހުރިހާ އަޑުތައް ކަންފަތުން ނެރެލުމެވެ. އެ ހިސާބުން ތިމާއަކީ ފުރިހަމަ މިނިވަނެކެވެ. މުސްތަޤުބަލް ރާވަން ފެށެނީ އެހިސާބުންނެވެ.

ދެއްކުނު ވާހަކައިގެ ނަތީޖާ

މި ލިޔެވި ދިޔަ ނުކުތާތަކުން ލިބުނު ނަތީޖާއަކީ ޝައްކާ ވަހުމަކީ ނުރައްކާ ބަލިމަޑުކަމެއްކަމެވެ. އެހެނަސް އެއީ ތިމާއަށް ވިސްނުންތެރިކަމާއި ކެތްތެރިކަމާއެކު އެކަމުން ނުކުމެވިދާނެ ކަމެއްކަމެވެ. އަދި ތިމާގެ އަސްލު މަންޒިލަށް ވާސިލްވުމުގެ ދަތުރު ފެށެނީ އެހިސާބުންކަމެވެ. މިއީ އާދައިގެ ފަސޭހަކަމެއްނޫނެވެ. ނަމަވެސް ވިސްނުންތެރިކަމާއި ކެތްތެރިކަމާއެކު ކުރިމަތިލާށެވެ. ތިޔަ ޝައްކާ ތިޔަ ވަހުމް ތިބާގެ ނަފުސަށްވުރެ މާ ބަލިކަށި ވާނެއެވެ. ހަތިޔާރު ނަގާށެވެ. ހަނގުރާމަ ފަށާށެވެ. ކާމިޔާބީގެ މަގުގައި ފިޔަވަޅެއް އަޅާށެވެ.

ލިޔުންތެރިޔާގެ ފުރަމަލަ

އީސާ ޝަރީފް
އީސާ ޝަރީފް
ޅެންވެރިކަމުގައި ދިވެހި އަދަބިއްޔާތަށް މިފަހުން އެންމެ ގިނަގުނަ ޚިދުމަތްތަކެއް ކުރައްވަމުން ގެންދަވާ އީސައަކީ އީއޯޕީގެ ފައުންޑަރއެވެ.
އީއޯޕީ އަކީ އަދަބިއްޔާތުގެ ދޮރުން ވަނުމަށް ހުރަސްކުރަންޖެހޭ އެއް އޮޅިއެވެ. އީއޯޕީގެ ވާޖިބެއްކަމުގައި ދެކެނީ އެ އޮޅި ގިރާކުރައްވާ ކޮންމެ ކަނދުރާއެއް އަދަބީ މަލުގެ ހާރަކުން ފަޅުފިލުވައިދިނުމެވެ.
www.easashareef.com

ގުޅުންހުރި ލިޔުން: