މީޑިއާނެޓް އޮރިޖިނަލްސް އިން ގެނެސްދެމުން އަންނަ ޑާކް ރެއިން އެންޓަޓެއިންމެންޓްގެ ސިޓްކޮމް “ރޫމީ އާ ޖަންނަތުު”ގެ ދެ އެޕިސޯޑެއް މީޑިއާނެޓްގެ ‘އައިސް ޓީވީ’ އިން ގެނެސްދޭން ނިންމައިފިއެވެ. “ރޫމީ އާ ޖަންނަތުު”ގެ ދެ އެޕިސޯޑެއް އައިސް ޓީވީން ގެނެސްދޭން ނިންމާފައިވަނީ 15 ފެބްރުއަރީ ވާާ ހޯމަދުވަހުގެ ރޭ 21:00ގައެވެ.

މީޑިއާނެޓް މަލްޓި-ސްކްރީން އެޕުން ގެނެސްދެމުން އަންނަ މި ސީރީޒްގެ 07 އެޕިސޯޑް އެ މަންސައިގައި މިހައިތަނަށް ގެނެސްދީފައިވެއެވެ. ހަތް އެޕިސޯޑް ގެނެސްދިން އިރު، މިދިޔަ ހުކުރު ވިލޭރޭ ދައްކާފައިވަނީ މި ސީރީޒްގެ ވަރުގަދަ އެޕިސޯޑެކެވެ. އެގޮތުން ސީރީޒްގައި ވަރުގަދަ ޓްވިސްޓެއް އައިސްފައިވެއެވެ.

“ރޫމީ އާ ޖަންނަތުު”ގެ ހަތްވަނަ އެޕިސޯޑުގެ ޚުލާޞާއަކަށް ބަލައިލާއިރު، ޖަންނަތާއި ކައިވެނިކުރުމަށް ރޫމީ ތައްޔާރުވަމުން އަންނަތާ ދުވަސްކޮޅެއް ވަނީ ވެފައެވެ. އަނެއްކޮޅުން ރޫމީގެ ރައްޓެހިން ރޫމީއަށް ސަޕްރައިޒެއް ދިނުމަށްޓަކައި ރޫމީގެ ބެޗްލަރ ޕާޓީ ނުވަތަ މި ސީރީޒްގައި ރޫމީގެ އެޕާޓްމެންޓުގައި ދިރިއުޅޭ ބިޔާންކާ (މާރިޔާ ތެރޭސާ)ގެ ބަހުރުވައިން ނަމަ ‘ރޫމީގެ ހުސްހަށި ހަފުލާ’ އަށް ރޫމީ ގެންދަނީ އޮޅުވައިލުމެއްގެ ތެރޭގައެވެ. އިއްތިފާޤުން އެ ހަފުލާއަށް ރޫމީގެ ވާން އުޅޭ ބަފައިބެ ކުޑަ މާލިމީ (ރޯނު ހަސަން މަނިކް) އަށް ވެސް ދެވެއެވެ.

ރޫމީގެ ހުސްހަށި ހަފުލާ ފަޅުފިލުވުމަށް އެތަނުގައި ލަވަކިޔަނީ ދިވެހި މިއުޒިކަށް މަޝްހޫރު ބޭންޑް ‘ގަގުނަސް ތަރާނާ’ އިންނެވެ. ހުވަރަފުށީ ފަރީދާގެ އަޑާއި ބަނޑިތަކާއެކު ލަވަ ހުށައަޅައިދެނީ ފައުޒިއްޔާ އެވެ.

♩♪♫♬ އޭ ލޯބި ޢަޝީޤާ ފެނުނީމާ، މުޅި ޚިޔާލު ވަނީ ދީވާނާއޭ
އޭ ޔާރު މަށާ އަދު ވަކިވީމާ، މުޅި ނަޒަރުވަނީ ބޭޗާރާއޭ ♩♪♫♬ 

ފައުޒިއްޔާގެ ޖާޒުބީ އަޑުން ލަވަ ކިޔަމުން ދިޔައީ ހަރުމުނިޔާ އާއި ގިގުނިފަތީގެ ހިތްގައިމު މޫސީޤީ ގަގުނަސް ތަރާނާއާ އެކުގައެވެ. އެ ބޭންޑުގެ ނެށުންތެރިޔާ ލަވައަށް ފައިހަމަކުރަން ފެށިއިރު، ދިވެހިން އެފަދަ ލަވަތަކަށް ފައިހަމަކޮށް ބަނޑިތައް ލައްވާ ބީދައިން، އެންމެ ތަންފުކެއްވެސް ދޫނުކޮށް ނަށަންފެށީ އަޅުގަނޑުމެންގެ ބިޔާންކާ (މާރިޔާ ތެރޭސާ) އެވެ. ބިޔާންކާގެ ނެށުމުގެ ޖާދޫގައި އިސާހިތަކުން ކުޑަ މާލިމީ އާއި އޭޭނާގެ ރަހުމަތްތެރިޔާވެސް ޖެހި ނެށުމުގައި ބައިވެރިވެއެވެ. ނެށުމުގެ ފޯރީގައި ތިއްބާ ވިސްނާ ހަސަނު (ރެކްސް)ގެ ބަހަށް ރޫމީ ޖެހިލަނީ ކުޑަ މާލިމީގެ ގާާތަށެވެ. ކައިވެނީގެ ފޯމުގައި ސޮއި ކުރުވުމަށެވެ. ނަމަވެސް ކުޑަ މާލިމީ އެކަމުން ރެކިގެން ގޭގެ ގިފިލިފަރާތަށް ޖެހިލައެެވެ. އޭރު އެތަނުގައި ބާބަކިއުއަށް ތައްޔާރުވަމުން ދެއެވެ.

ބިޔަންކާ އާާއި ނެޑީ

މާ ބޮޑަށް ތަފުސީލުކޮށް ކިޔައިދެވިއްޖެދޯއެވެ. އެހެން ނުވާ ވަރެއްވެސް ނޫނެވެ. އެޕިސޯޑްގެ ފޯރި ހަމަ އެހާވެސް ގަދައެވެ.

ކޮންމެއަކަސް، ކުޑަ މާާލިމީގެ މުންޑުގައި އަލިފާން ރޯވެ، އަލިފާނުގެ ހާދިސާއެއް ހިނގައި އަލިފާންގަނޑުގެ ތެރޭގައި ކުޑަ މާލިމީ ތާށިވެއެވެ. އެތަން ނިއްވަން ދަނީ އެމްއެންޑީއެފް އަލިފާން ނިއްވާ ޔުނިޓްގެ ހީވާގި ސިފައިންނެވެ. (އެމްއެންޑީއެފް މީިގައި ދައްކުވައިދެނީ ހަމަ އަސްލު އެމްއެންޑީއެފްގެ ސިފައިންނެވެ.) މި ސީރީޒްގައި ޖަންނަތު އަކީ ވެސް އެ ޔުނިޓްގައި މަސައްކަތްކުރާ ސިފައިންގެ މީހެއްކަމުން ޖަންނަތު ވެސް އެ މިޝަންއަށް ދެއެވެ.

އަލިފާންގަނޑުގެ ތެރޭގައި ތާށިވެފައި ހުންން ކުޑަ މާލިމީ ހުރީ އިންތިހާާއަށް ކަންބޮޑުވެފައެވެ. އޭނާގެ ބޮލުގައި ބޮޑު ސިއްރެއް އަޅައިގެން ހުރެ އެ އަލިފާނުގައި މަރުވެދާން ބޭނުންނުވާކަމަށް އޭނާ ބުނެއެވެ. އެ ސިއްރަކީ ކޮބައިކަންވެސް އޭނާ ބުނެދެއެވެ.

އެޕިސޯޑް ނިމެނީ ރޫމީގެ އެޕާޓްމެންޓުގައި ހުރެ ކުޑަ މާލިމީގެ ހަޔާތުގެ ވާހަކަތައް ކިޔައިދޭން ފަށާ ހިސާބުންނެވެ. ޖަންނަތުގެ ބޮޑުދައިތަ ފިލަމީނާ ވެސް އެތަނުގައި ހުރެއެވެ. ވާހަކަ ކިޔައިދޭން ފަށާހިނދު، ދިވެހިރާއްޖޭގެ އަޑުގެ ކުރުވާހަކަ މުބާރާތުގެ ޓައިޓްލް މިއުޒިކު ކޮޅުން ‘ހިއުމަރ’ އެއް ގެނެސްދިނަސް، ކުޑަ މަލީމީ ކިޔައިދޭން ފަށަނީ ‘އެ ތޫފާނީ ރޭ’ގެ ވާހަކައެވެ.

ކޮންމެއަކަސް ‘އެ ތުފާނީ ރޭ’ގައި ކަން ހިނގާ ދިޔަ ގޮތާއި ކުޑަ މާލިމީ ފޮރުވައިގެން އުޅޭ ބޮޑު ސިއްރުވެސް، މީޑިއާ ނެޓްގެ އައިސް ޓީވީން މި މަހު 15ގައި ދައްކާ ޑަބަލް އެޕިސޯޑުން އެނގިގެންދާނެ ކަމަށް ބެލެވެއެވެ. އިންތިޒާރުކޮށްލަމާާ ހިނގާށެވެ.

ލިޔުންތެރިޔާގެ ފުރަމަލަ

އަޙްމަދު ރަޝީދު
އަޙްމަދު ރަޝީދު
ހުރިހައި ދާއިރާއެއްގެ ލިޔުންތައްވެސް މުނިއަވަސްގެ ފައުންޑަރ އަދި ޗީފް އެޑިޓަރ ލިޔާނެއެވެ.

ގުޅުންހުރި ލިޔުން: