ރާއްޖޭގެ ފިލްމީ ދާއިރާގައި އެންމެ ގިނަ ފިލްމު ޕްރޮޑިއުސްކުރުމުގެ ރެކޯޑް އޮތް މަޝްހޫރު ޕްރޮޑިއުސަރު މަޚްމާ ޙުސައިން ރަޝީދުގެ ނަމާއި ފަރިވާ ފިލްމްސްގެ ނަމަކީ ދިވެހި ފިލްމީ އުދަރެހުން ފިލައިނުދާނެ ވަރުގަދަ ނަމެކެވެ. ޙުސައިންގެ ފިލްމީ މަސައްކަތް މިވަގުތަށް އޮތީ ކުޑަކޮށް މަޑުޖެހިފައެވެ. ސަބަބުތަކެއް ވެސް ހުރެގެންނެވެ. ނަމަވެސް ޙުސައިން ހުރީ މާދަމާވެސް ފިލްމީ މަސައްކަތަށް ނުކުންނަށް ތައްޔާރަށެވެ.

މަޚްމާ ޙުސައިން އަކީ ފިލްމީ ދާއިރާގެ ޕްރޮޑިއުސަރުންގެ ލިސްޓުގައި އެންމެ ދުވަސްވީ އެއް ނަމެވެ. ރާއްޖޭގައި އެންމެ ގިނަ ފިލްމް އުފެއްދި ސްޓޫޑިއޯއަކީ ވެސް ހުސައިންގެ ފަރިވާ ފިލްމްސް އެވެ. ފިލްމު “ނަފުރަތު”، “ޔަތީމް”، “ލޯބީގެ އަނިޔާ” އަދި “ދެ ފިރިން” ފަދަ ކިތަންމެ ފިލްމެއް ހުސައިން ޕްރޮޑިއުސްކުރި ލިސްޓަށް ލެވިދާނެ އެވެ. ފިލްމު “ސަޒާ”(2011)، “ރާނީ”(2014)، “ރަންދަރި”(2015) އަދި ކުޑަކުދިންގެ ފިލްމް “ކުޑަފޫޅުގެ ވަސްވާހުން”(2018) މިއީ ޙުސައިން އެންމެ ފަހުން ޕްރޮޑިއުސްކުރީ ބައެއް ފިލްމުތަކެކެވެ.

ޙުސައިންގެ ފިހާރަ، ފަރިވާ އިލެކްޓްރޯނިކްސް ރޯވެ އަނދައި ހުލިވުން

މަޚްމާ ޙުސައިން ރަޝީދުގެ ފިލްމީ މަސައްކަތްތަކަށާއި ޙުސައިންގެ މުޅި ހަޔާތަށް މަޑުޖެހުމެއް ގެނުވީ 20 ޖެނުއަރީ 2016 ވަނަ ދުވަހު ފާމުދޭރި މަގުގައި ހުންނަ ފަރިވާ އިލެކްޓްރޯނިކްސް ފިހާރާގައި ރޯވެ ހިނގި އަލިފާނުގެ ހާދިސާއަށް ފަހުގައެވެ.

ހާދިސާގެ އިތުރު މަޢުލޫމާތު އަދި ވީޑިއޯ ބައްލަވައިލެއްވުމަށް “ވީމީޑިއާ”ގެ މި ރިޕޯޓް ޕްލޭކޮށްލައްވާށެވެ.

މަޚްމާ ޙުސައިން ހުރީ އަދި ހުންނާނީވެސް ފިލްމީ ދާއިރާއާއެކު!

މަޚްމާ ޙުސައިން ރަޝީދުގެ ފިލްމީ މަސައްކަތްތަކާއި ފިލްމީ ދާއިރާއަށް ބަހައްޓާ ގާތްކަމާއި އެ ދާއިރާއަށްޓަކައި މިހާރުވެސް ޙުސައިން ބާއްވާ ގާތްކަމަކީ ދާއިރާގެ މީހުންނަށް ރަނގަޅަށް އެނގޭ ކަމެކެވެ. އޭގެ ހެއްކަކީ ފަންނުވެރިން ޙުސައިންއަށް ދީފައިވާ އިޙްތިރާމާއި ލޯތްބެވެ. ‘ފިލްމީ ދާއިރާގެ ބާނީ’ގެ ގޮތުގައި ބައެއް ފަންނުވެރިން ޙުސައިން ސިފަކުރާއިރު، ޙުސައިން އަށް ‘ބައްޕަ’ގެ ނަމުން މުޚާޠަބުކުރާ ތަރިންނާއި ޕްރޮޑިއުސަރުން އަދި ދާއިރާގެ ޓެކްނިކަލް ފަންނާނުން އެބަ ތިއްބެވެ.

މުނިއަވަސްގެ ފަރާތުން މަޚްމާ ޙުސައިން ރަޝީދާއި ބައްދަލުކޮށްލުން

އުދަރެހަށް ހަމަހިމޭންކަން ވެރިވެ، ދުނިޔެ މައްޗަށް އަމާންކަން ވެރިވުމުން އޭގެ މާނައަކީ މޫސުން އަލިވުމެއް ނޫނެވެ. އަދި ކިއެއްތަ؟ އެއީ އަންނާން އޮތް ކޮޅިގަނޑުގެ ބާރުގަދަކަން ވަޒަންކޮށްލާން އެނގޭ ކަމަކަށްވެސް ވެދެއެވެ. ފިލްމީ ދާއިރާގައި މަޚްމާ ޙުސައިން ރަޝީދުގެ ވިދުމަށް ކޮންމެވެސް ވަރެއްގެ ފަނޑުކަމެއް އައުން އެއީ ދެންމެ މި އިޝާރާތްކުރި މިސާލުން ބުނެދޭފަދަ ކަމެއް ކަމަށް އަޅުގަނޑަށް މިހާރު ދަންނަވަން ކެރިދާނެއެވެ. އަންނަން ހުރި ފިލްމުތައް ވަރުގަދަވެފާ ގިނައީ ކަމަށް އަޅުގަނޑަށް މާނަކުރެވެއެވެ. ޙުސައިން އާއި ވާހަކަދައްކައިލުމުން އެކަން ވަރަށް ރަނގަޅަށް ސާފުވެއްޖެއެވެ. މަޚްމާގެ ދިހުމުގެ ފަނޑުވުމަކީ ކުރިއަށް އޮތް ދުވަސްތަކުގައި އެ ދިހުން އިތުރަށް ގަދަވެގެންދާނެ ކަމެއްކަން އަޅުގަނޑުމެން ޙުސައިން އާއި ކުރި ހައެއްކަ ސުވާލަށް ދިން ޖަވާބުން އެނގިއްޖެއެވެ.

މަޚްމާ ޙުސައިން ރަޝީދު

ޙުސެން ފިލްމީ ދާއިރާގަ މިހާ ގިނަދުވަސްވަންދެން މަސައްކަތްކޮށްފައިވާ އެއް ބޭފުޅަކަށް ވެފާ ހުސެންގެ ފިލްމުތަކެއް، ނޫނިއްޔާ ހުސެންގެ އެއްވެސް ފިލްމީ ހަރަކާތެއް މިހާރު ނުފެންނަނީ ކީއްވެގެންތޯ؟
އެހެން އެވަނީ މި ފަހުން އައިސް ތަންކޮޅެއް ދަތިކޮށް މި އުޅެނީ ފައިސާގެ ގޮތުން، އެހެންވީމަ އަދި އެކަންތަކަށް ނުނުކުމެވި މި އުޅެނީ. އިންޝާﷲ އިރާދަކުރެއްވިއްޔާ އަދި ވަރަށް އަވަހަށް އަހަރެން އެނބުރި ނުކުންނާނަން ދާއިރާއަށް. ފިލްމު ހަދާނަން އިރާދަކުރެއްވިއްޔާ.

ދެން މިހާރު ވެގެން މިއުޅޭ އެއްޗަކީ 2016ގަ އަހަރުމެންގެ މުޅި ވިޔަފާރި އެއްކޮށް ކަހަލަ ގޮތަކަށް އަނދާ ހުލިވެގެން ގޮސްފަ އޮތީ. އޭގަ ޙަޤީޤަތުގަ ސްޓެލްކޯގެ ވަރަށް ބޮޑު އިހުމާލެއްވޭ. މައްސަލަ އަހަރުމެން ކޯޓަށް ވެސް ލައިގެން މިއުޅެނީ. ދެން އެކަމަކު ކުރީގަ އޮތް ޝަރުޢީ ނިޒާމު އޮތްގޮތުންނާ ދެން އޭރުގެ ސަރުކާރުވެސް އަސްލު ހަޤީޤަތުގަ ހިތްހަމަނުޖެހޭ ކަހަލަ ގޮތަކަށް ދިޔައީ. މިހާރު ދެން ލަފާކުރެވޭ އަސްލު މީ އިންސާފު ލިބޭނެކަމަށް، ޝަރުޢީ ނިޒާމުވެސް ބަދަލުވެފަ އޮތީމަޔާ އެއްކޮށް. އެހެންވީމަ އެކަން ނިމިއްޖެއްޔާ ދެން ހަމަ ވަގުތުން އެނބުރި ނުކުމެވޭނެ އަނެއްކާވެސް ދާއިރާއަށް. އިރާދަކުރެއްވިއްޔާ އަދި ހަމަ ރައްޔިތުންނަށް ޚިދުމަތްކުރާގޮތަށް މިހުރީ.

އެޑިޓަރުގެ ނޯޓް: ދެހާސް ސޯޅަ ވަނަ އަހަރުގެ ޖެނުއަރީ މަހުގެ ވިހަ ވަނަ ދުވަހު ފާމުދޭރި މަގުގައި ހުންނަ ފަރިވާ އިލެކްޓްރޯނިކްސް ފިހާރާގައި ރޯވެ ހިނގި

އަލިފާނުގެ ހާދިސާގައި ސްޓެލްކޯގެ އިހުމާލެއް ނެތް ކަމަށް ސިވިލް ކޯޓާއި ހައިކޯޓުންވެސް ކަނޑައަޅައިފައިވެއެވެ.

ހައި ކޯޓުން ކޮށްފައިވާ ހުކުމް ގައި ބުނެފައިވަނީ ކަރަންޓު ޑިސްޓިރިބިއުޝަން ފޮށީގައި އަލިފާން ރޯވެގެން ހިނގާފައިވާ ކަމެއްތޯ ބެލުމަށް ފޮރެންސިކް އޮފިސަރުން މެދުވެރިކޮށް އެފޮށިން ކަރަންޓް ކޭބަލް ގެނެސް ފޮރެންސިކް ފިޒިކަލް އެގްޒަމިނޭޝަން ހެދި ރިޕޯޓުން ފޮށީގެ އެތެރޭގައި ހުރި ކަރަންޓް ކޭބަލް ރޯވެފައި ވާކަން ފާހަގަވެފައިނުވާ ކަމަށެވެ.

ހުކުމްގައި ބުނެފައިވަނީ، ސްޓެލްކޯގެ ޒިންމާ އެކުންފުނީގެ މައްޗަށް ލާޒިމު ކުރެވޭނީ އެ ކުންފުނީގެ ގާނޫނީ ވާޖިބެއް އޮތުމާއި އެ ވާޖިބަށް ދައުވާ ލިބޭ ފަރާތުން ޚިލާފުވެފައިވުން ކަމަށް ސާބިތުކޮށް ދެވިގެން ކަމަށެވެ. – މައުލޫމާަތު: ރާއްޖެ އެމްވީ –

ފަރިވާ ފިލްމްސް އަކީ ރާއްޖޭގައި ގާތްނޑަކަށް ފިލްމު ލައިބްރަރީއެއް ކަހަލަ ތަނެއް. އެހެންވީމަ ފަރިވާ ފިލްމްސް އިން އުފައްދާފައިވާ ފިލްމުތައް މިހާރު ގެންގުޅުއްވަނީ ކިހިނެއްތޯ؟ މިސާލަކަށް ސްޓްރީމިން ޕްލެޓްފޯމްތަކަށް ވިޔަފާރި އުސޫލުން ދިނުމާ ނޫނިއްޔާ ބްރޯޑްކާސްޓިންގ އަށް ދިނުމާ، ކިހިނެއްތޯއޭ ފަރިވާ ފިލްމްސްގެ އުފެއްދުންތައް ގެންގުޅުއްވަނީ؟
އެނގިވަޑައިގަންނަވާނެ، ފަރިވާ ފިލްމްސް އަކީ އެހެން މީހުންގެ އުފެއްދުންތައް ވެސް ގަނެގެން އޭގެއިން ވިޔަފާރިކުރާ ފަރާތެއް. ދެން އެގޮތުން ވަރަށް ގިނަ ފިލްމު އަޅުގަނޑުމެންނަށް ގަނެވިފަ އެބަހުރި. އަދި ވަރަށް ގިނަ ފިލްމު އަޅުގަނޑުމެން އުފައްދާފަވެސް އެބަހުރި. އެހެންވީމަ ހުރިހާ އެއްޗެއް ވެސް އަޅުގަނޑުމެން ބަރާބަރަށް މާކެޓްކުރަމުން ބަރާބަރަށް ސީޑީއާ ޑީވީޑީއާ އަދި ވީޑިއޯ ޓޭޕް ޒަމާނުއްސުރެން ހަމަ ބަރާބަރަށް ބެލުންތެރިންނަށް ފޯރުކޮށްދެމުން ދިޔައީ.

ދެން މިހާރު، މި ފަހަކަށް އައިސް ވަރަށް ބޮޑަށް ޑިޖިޓަލްވެ ދެން މިއޮތީ އިންޓަނެޓުން ބަލައިލެވޭ ފަދަ ގޮތަކަށް ދިމާވެފަ. އެހެންވީމަ މިހާރު އަޅުގަނޑުމެންވެސް މި މާކެޓްކުރަމުން މި ދަނީ އެގޮތަށް ބަލައިގެން ކުރިއަށް ގެންދަން.

ފަރިވާ ފިލްމްސް އިން އުފައްދާ ހިންދީ ފިލްމުގެ ޕޯސްޓަރެއް

މުނިއަވަސް އަށް އެނގިފަވާގޮތުން މަޚްމާ ހުސެން ވަނީ ހިންދީ ފިލްމެއް އުފެއްދުމުގެ މަސައްކަތްވެސް ކޮށްފަ. ދެން އެ ފިލްމުގެ މަސައްކަތް މިހާރު އޮތީ ކިހާ ހިސާބަކަށް ގޮސްފަތޯ؟
ތި ވިދާޅުވި ހިންދީ ންދީ ފިލްމަކީ “އާންކޯން ބަރު އާކާޝް“. އެ ފިލްމު ހަމަ ޖެއްސިގޮތަށް ވަރަށް ބާރަށް ކުރިއަށް ގެންގޮސް ނިިންމައިލިން. ނިންމާލާފަ ދެން އޭގެ ޑަބިންއާ ބެކްމިއުޒިކާ ކަންތައްތައްވެސް ހަމަ އެ ބާރުމިނުގަ ނިންމާލެވުނު. އެހެން ނަމަވެސް ވީގޮތަކީ ފައިނޭންޝަލީ ވަރަށް ބޮޑަށް ދަށަށް ދިޔައީ ފަރިވާގެ ފިހާރައެއް އެނދުމާ ގުޅިގެން. އެ ދެން ހަމަ ގާތްގަނޑަކަށް މުޅި ފަރިވާގެ އަށްޑިހަ، ނުވަދިހަ ޕަސެންޓް އެއްކޮށް އަނދައިގެން ދިޔައީ. އެހެންވީމަ އެކަމުގެ ސަބަބުން އަޅުގަނޑުމެން ފައިނޭންޝިއަލީ ވަރަށް ބޮޑަށް ދަތިވެގެން، ފިލްމު މާކެޓްކުރަން ވެސް ފުދޭވަރަކަށް ގިނަ ލާރި ބޭނުންވޭ އިންޑިޔާގަ. އެހެންވީމަ އެކަން ހުއްޓިފަ އޮތީ.

ފަރިވާ ފިލްމްސް އިން މިހާނަށް ގާތްނޑަކަށް ކިތައް ފިލްމު ހުސެންއަށް ޕްރޮޑިއުސްކުރެވިފަ ވާނެތޯ؟
އަޅުގަނޑަށް ހީވާގޮތުން ފަރިވާ ފިލްމްސް އިން މިހާރު ވާނެ 60އަށް ވުރެން ގިނަ ފިލްމު ޕްރޮޑިއުސްކުރެވިފަ. ދެން އޭގެ އިތުރުން ކުރިންވެސް ދަންނަވާލިހެން އަޅުގަނޑުމެން އަތުގަ ވަރަށް ގިނަ ފަރާތްތަކެއްގެ ފިލްމުތަކުގެ ކޮޕީރައިޓްސް ހުންނާނެ. އެހެންވީމަ ފަރިވާ ފިލްމްސްގަ ވަރަށް ގިނަ ފިލްމުތައް ހުންނާނެ.

އަޅުގަނޑުމެންގެ އެދުމަކީ އަދި އުއްމީދަކީވެސް، ފަރިވާ ފިލްމްސްގެ މަސައްކަތްތައް ފެށި، ދިވެހި ފިލްމީ ދާއިރާއަށް ފެންވަރު ރަނގަޅު އުފެއްދުންތަކެއް އިތުރުވެގެން ދިއުން. އަޅުގަނޑުމެންނަށް މި ފުރުޞަތު ދެއްވީތީ ޙުސައިން ރަޝީދަށް ވަރަށް ބޮޑަށް ޝުކުރުވެރިވަން.

އިންޓަވިއު ނެގުމުގައި އެހީތެރިވެދެއްވި ޢަލީ ރަޝީދު (ގޮޅާ އައްޔަ) ފޯރުކޮށްދެއްވި އެހީތެރިކަމަށް ފަށްފަށުން ޝުކުރުދަންނަވަން.

 

ލިޔުންތެރިޔާގެ ފުރަމަލަ

އަޙްމަދު ރަޝީދު
އަޙްމަދު ރަޝީދު
ހުރިހައި ދާއިރާއެއްގެ ލިޔުންތައްވެސް މުނިއަވަސްގެ ފައުންޑަރ އަދި ޗީފް އެޑިޓަރ ލިޔާނެއެވެ.

ގުޅުންހުރި ލިޔުން: