ދިވެހި ފިލްމީ މަސައްކަތަށް އިންގިލާބީ ބަދަލެއްގެނައި މެގަހިޓް ފިލްމު “ދެރިޔާ”ގެ ދެވަނަ ބައެއް އުފެއްދުމުގެ މަސައްކަތް ފަށާފައިވާކަމަށް އެ ފިލްމުގެ ޕްރޮޑިއުސަރު ޢަބްދުލް މުހައިމިން ހާމަކޮށްފިއެވެ.
1994 ވަނަ އަހަރުގެ ނޮވެމްބަރު މަހު 04ގައި ރިލީޒްކުރި ފިލްމު “ދެރިޔާ” އަކީ މުހައިމިންގެ ‘ކްލަބް ސްކޯޕް’ އާއި ޓެޑްރީގެ ‘އެޓާނަލް ޕިކްޗަރސް’ އިން ގެނެސްދިން ފިލްމެކެވެ. ފިލްމުގެ ސްކްރީންޕްލޭ ލިޔެ ޑައިރެކްޓްކުރީ ކާމިޔާބު ޑައިރެކްޓަރ މުޙައްމަދު ނިޔާޒް (ޓެޑްރީ) އެވެ. ޢަލީ ޚާލިދު، ޙައްވާ ޒާހިރާ ލީޑް ރޯލުން ފެނިފައިވާ މި ފިލްމަކީ އޭރު ދިވެހި ފިލްމްތައް ހަދަމުންދިޔަ ސްޓައިލާއި ވައްޓަފާޅިއަށް ބަދަލުތައް ގެންނަން ޕްރޮޑިއުސަރުންނަށް މަޖްބޫރު ކުރުވި ފިލްމެވެ.
ޕީއެސްއެމްގެ ދިވެހި އެފްއެމުން ގެނެސްދޭ “ފެމެލީ އަލްބަމް” ޝޯގައި ވާހަކަދައްކަވަމުން ފިލްމު “ދެރިޔާ”ގެ ޕްރޮޑިއުސަރ އަބްދުލް މުހައިމިން ވިދާޅުވީ ދެރިޔާގެ ދެވަނަ ބައެއް ތައްޔާރުކުރުމުގެ ވިސްނުމުގައި މަސައްކަތްތައް ފަށާފައިވާ ކަމަށެވެ. އެގޮތުން ފިލްމުގެ ވާހަކަލިޔުމުގެ މަސައްކަތް މިހާރު ކުރަމުން އަންނައިރު ފިލްމުގައި ހިމެނޭ ދެ ލަވައެއްގެ ރެކޯޑިންވެސް މިހާރު ނިމިފައިވާކަން މުހައިމިން ފާހަގަކުރެއްވިއެވެ.
“ދެރިޔާ” ގެ ދެވަނަ ބައިގެ މިއުޒިކްގެ މަސައްކަތް ވެސް ކުރިޔަށް ގެންދާނީ މުހައިމިންގެ ދެ ބޭފުޅެއްކަމަށްވާ އަޙްމަދު ޢާމިރާއި އިބްރާހިމް ޢާމިރެވެ. ކުރީގެ ފިލްމްގެ މިއުޒިކް ޑައިރެކްޓަރުގެ ގޮތުގައި މަސައްކަތް ކުރީވެސް އަޙްމަދު ޢާމިރުއެވެ. އޭގެ އިތުރުން އަޙްމަދު އައްފާލް ވެސް މަސައްކަތްކުރިއެވެ.
ފިލްމަށް ކާސްޓުން ހޯދުމުގައި ހުރި ބައެއް ދަތިތަކަށް އަލިއަޅުވައިލައްވަމުން މުހައިމިން ވިދާޅުވީ ފިލްމުގެ މަސައްކަތްތައް އަދި ފެށުނީ ކަމަށާ އެހެންކަމުން ފިލްމު ރިލީޒްކުރެވޭނެ ތާރީޚެއް ދަންނަވަން ނޭނގޭކަމަށެވެ.
“އަޅުގަނޑު މީގައި ޓެޑްރީއާއިވެސް މަޝްވަރާކޮށްފިން. ޓެޑްރީގެ މަޝްވާރާއާއި އެއްކޮށް ކުރިޔަށް ގެންދަން ބޭނުންވީ. ޓެޑްރީވެސް އެބަހުރި ބައެއް ހިޔާލު ދެއްވާފައި. ދެރިޔާއާއި މި ފިލްމާއި ގުޅުވާލުމުން ހުރިހާ ގޮތަކުން ފައިދާވާނެކަމަށް މި ބަލަނީ. އެކަމަކު ދެރިޔާގެ ޝޮޓަކަށް ޝޮޓެއް ނޫން. ކުރީގެ ވާހަކަޔާއި ގުޅިގެން މި ފިލްމު ކުރިޔަށްދާނީ. އެހެންނަމަވެސް މި ފިލްމުވެސް ފެނިގެންދާނީ ވަރަށް ބޮޑެތި ތަފާތުތަކާއި އެކު.” ދިވެހި އެފްއެމް “ފެމެލީ އަލްބަމް” ޝޯގައި މުހައިމިން ވިދާޅުވިއެވެ.
މުހައިމިން ވިދާޅުވީ ފިލްމު “ދެރިޔާ”ގެ ފުރަތަމަ ބައިގެ ކާސްޓުންގެ ތެރެއިން މި ފިލްމުގެ ދެވަނަ ބައިގައި މަސައްކަތްކުރަން ބޭނުންވާ ތަރިންނަށް އެ ފުރުޞަތު ހުޅުވައިލެވިފައިވާ ކަމަށެވެ. އެގޮތުން ކުރީގެ ފިލްމުގެ މުޅި ކާސްޓް އެކުގައިހެން ފެނިގެންދާ ލަވަ “ކޭކާ ދަޅާ” ލަވަ ފަދަ ލަވައެއް މި ފިލްމުގައިވެސް ހިމަނަން ގަސްދުކުރައްވާކަމަށްވެސް މުހައިމިން ފާހަގަކުރެއްވިއެވެ.
ފިލްމު “ދެރިޔާ”ގެ ވާހަކަ ލިޔުއްވީ މުހައިމިން އެވެ. މި ފިލްމުގެ ދެވަނަ ބައިގެ ވާހަކަވެސް ލިޔުއްވަނީ މުހައިމިންއެވެ.
ޢަލީ ޚާލިދާއި ޙައްވާ ޒާހިރާ ލީޑްރޯލުން ފެނިގެންދިޔަ މި ފިލްމުގައި މަރްހޫމް ޙަސަން އަލިމަނިކް (ކޮއްޔަ ހަސަން) އާއި މަރިޔަމް ވަހީދާއާއި މަރްހޫމާ ޙައްވާ ރިޔާޒާ އާއި ޢާރިފާ ވެސް މުހިއްމު ރޯލަތަކުން ފެނިގެންދިޔައެވެ.
ފިލްމު “ދެރިޔާ” އަށް ޤައުމީ އެވޯޑްއިން 8 އެވޯޑް ލިބިފައިވެއެވެ. އޭގެތެރޭގައި އެންމެ މޮޅު އަންހެން އެކްޓަރެސް އާއި އެންމެ މޮޅު ޑައިރެކްޓަރާއި އެންމެ މޮޅު ފިލްމުގެ އެވޯޑްވެސް ހިމެނެއެވެ.
ލިޔުންތެރިޔާގެ ފުރަމަލަ
މި ލިޔުންތެރިޔާގެ ބައެއް އެހެން ލިޔުންތައް
- 29 ޑިސެމްބަރ 2024ޚަބަރު“ރޯމްދުނިޔެ” އިން އީސިމް ނެގުން ދިވެހީންނަށް މާ ސަޅިވާނެ!
- 27 ޑިސެމްބަރ 2024ޚަބަރުޑާކް ރެއިން އިން މިފަހަރު “ފެށުމާއި ނިމުން”
- 24 ޑިސެމްބަރ 2024ޚަބަރުނިޝާ އާރްޖޭއަކަށް!
- 20 ޑިސެމްބަރ 2024ޚަބަރު“ސޮރީ” ގެ މަންޒަރެއް!
