| MUNIAVAS

ހިތްގައިމު ލަވަތަކެއް ދިވެހި މިއުޒިކީ ޖައްވަށް ދޫކުރަމުން އަންނަ ޒުވާން އާޓިސްޓު މޫސާ ސަމާޢު، އަމިއްލަ ދިވެހި ލަވަތަކެއް ނެރެން ތައްޔާރުވެއްޖެއެވެ. “ޖައްވު”ގެ ނަމުގައި ސަމާޢު ގެނެސްދޭ އޮރިޖިނަލް ދިވެހި ލަވަތައް، މިއުޒިކީ ޖައްވަށް ދޫކޮށްލަން ނިންމާފައިވަނީ މި ޖުލައި މަހުގެ 22 ވަނަ ދުވަހުއެވެ.

“ޖައްވު” (އީޕީ)ގެ ނަމުގައި ނެރޭ ލަވަތަކުގައި ހިމެނެނީ ސަތޭކަ އިންސައްތަ ދިވެހި އަމިއްލަ ރާގެވެ. ޖުމްލަ ފަސް ލަވަ ހިމެނޭ މި އީޕީގެ ހުރިހައި ލަވަތަކެއް ކިޔާފައިވަނީ ސަމާޢު އެވެ.

“ޖައްވު” (އީޕީ)ގެ ލަވަތަކަށް ބަލައިލާއިރު:-

ޓްރެކް 01 : އޭ ހަނދާ
ޓްރެކް 02 : ހިނިތުންވެލާށޭ
ޓްރެކް 03 : ކޮންމެ ދުވަހެއް
ޓްރެކް 04 : އިންތިޒާރުގާ
ޓްރެކް 05 : އޭ ހަނދާ (ރީމިކްސް) ހިމެނެއެވެ.

މި ލަވަތައް މިމަހު 22ން ފެށިގެން ދިވެހި މިއުޒިކް ސްޓްރީމިންގ އެޕްލިކޭޝަން ‘ލަވަފޮށި’، އިންޓަނޭޝަނަލް މިއުޒިކް ސްޓްރީމިންގ އެޕްލިކޭޝަން ‘ސްޕޮޓީފައި، އައިޓިއުންސް، ޓައިޑަލްގެ އިތުރުން އާއްމުކޮށް މިއުޒިކް ސްޓްރީމްކުރާ އެޕްލިކޭޝަން ތަކުން އަޑުއަހައިލެވޭނެކަމަށް މޫސާ ސަމާޢު މުނިއަވަސް އަށް ބުންޏެވެ.

ސަމާޢުގެ ފުރަތަމަ އަމިލަ އީޕީ “ޖައްވު”ގެ ހުރިހައި މަސައްކަތަކީ ‘ލޯބި’ ކަމަށް ސަމާޢު ފާހަގަކުރެއެވެ.

“މީގަ ހުރިހައި މަސައްކަތެއް ކޮށްފަވަނީ ލޯބިން. ހަމަ ކޮންމެ މިއުޒިކަކީވެސް ކޮންމެވެސް ކަހަލަ ލޯބީގެ ޖަރުބާރުތަކެއް ދޭހަކޮށްދޭ މިއުޒިކެއް.” ސަމާޢު ފާހަގަކުރިއެވެ.

“މި އަލްބަމް ޑެޑިކޭޓްކޮށްލަނީ އަހަރެން ވަރަށް ލޯބިވާ ވަރަށް ޚާޢްޞަ ފަރާތަކަށް. އެހެންވީމަ އަހަރެން ވަރަށް އުފާވާނެ މި އަލްބަމް ފުރަތަމަ އަޑުއަހާ ކުއްޖަކަށް އެކުއްޖާ ވެއްޖެއްޔާ.” ސަމާޢުގެ އަލްބަމްގައި ފޮރުވިފައިވާ ލޯބީގެ ޚާޢްޞަކަން ހިއްސާކުރަމުން ބުންޏެވެ.

ލަވަފޮށީގައި 2018 ވަނަ އަހަރުން ފެށިގެން ސަމާޢު ހިމަނާފައިވާ ހުރިހާ ލަވަތަކަކަުން ލިބޭ ސްޓްރީމިންގެ ނަފާގެ 80 އިންސައްތަ އޭނާ ހޭދަކުރަން ނިންމާފައިވަނީ އަދި ކުރިމަގުގައި ހޭދަކުރާނީވެސް އިންސާނިއްޔަތަށްޓަކައެވެ.

❁ 10 އިންސައްތަ – ޓައިނީ ހާރޓްސް އަށް
❁ 10 އިންސައްތަ – ކެންސަރ ސޮސައިޓީ އަށް
❁ 10 އިންސައްތަ – ތެލެސީމިއާ ސެންޓަރަށް
❁ 10 އިންސައްތަ – ކެއަރ ސޮސައިޓީ އަށް
❁ 10 އިންސައްތަ – އާރކް އަށް
❁ 10 އިންސައްތަ – ޑެފް ސޮސައިޓީ އަށް
❁ 10 އިންސައްތަ – ބްލައިންޑް އެން ވިޒުއަލީ އިމްޕެއަރޑް ސޮސައިޓީ އަށް
❁ 10 އިންސައްތަ – ކުޑަކުދިންގެ ހިޔާ އަށް

“ޖައްވު” (އީޕީ)ގެ ޓެކްނިކަލް މަސައްކަތްތަކަށް ޖެހިލާއިރު، ލަވަތައް ލިޔެ، ރާގުތައް ކޮމްޕޯޒްކޮށް، މިއުޒިކް ކޮމްޕޯޒްކުރުމާއި، ރެކޯޑިން އާއި މިކްސިން އަދި މާސްޓަރިން ހެދީވެސް ސަމާޢު އެވެ. ލަވަތަކުގެ މިކްސިންގ އާއި މާސްޓަރިން ހެދީ ‘ޓޮނިކް ލައިވް ސްޓޫޑިއޯ’ގައެވެ.

ސަމާޢުގެ ފުރަތަމަ އަމިއްލަ އަލްބަމްގެ މަސައްކަތް ކުރަމުން އަންނަކަން ފާހަގަކުރަމުން ބުނީ އެ އަލްބަމަކީ ވޯރލްޑް މިއުޒިކް ޖޮންރާގެ އަލްބަމެއް ކަމަށާ ލަވަތަކުގައި ދެކެވިފައިވާނީ ރާއްޖޭގެ ރީތިކަމާ ރާއްޖޭގެ ސަގާފަތާއި ދިވެހީންގެ ދިރިއުޅުމުގެ ވައްޓަފާޅި ދައްކައިދޭ ދިވެހިރާއްޖެ އިޝްތިހާރުކުރެވޭ ކަހަލަ ލަވަތަކެއް ކަމަށެވެ. ސަމާޢު އިތުރަށް ބުނީ އެ ލަވަތަކުގެ މަސައްކަތްތައް 2012 ވަނަ އަހަރުން ފެށިގެން މިއަދާ ހަމައަށް ވެސް ކުރަމުން އަންނަ ކަމަށާ މިހާރު ދެ ލަވައެއް ފިޔަވައި ހުރިހާ ލަވައެއް ލިޔެ ނިމިފައިވާ ކަމަށާ ޑެމޯ މިއުޒިކްވެސް ތައްޔާރުކުރެވިފާ ވާކަމަށެވެ.

ސަމާއުގެ މި ޚާއްޞަ އަލްބަމްގައި ޖޯގްރަފީގެ ގޮތުން ރާއްޖޭގެ އަތޮޅުތައް އުފެދިފައިވާ ގޮތް ކިޔައިދޭ ލަވައެއް ވެސް ހިމެނެއެވެ.