ގަންފޮނަދޫ ލިންކު ރޯޑުން ރޭގަނޑު އަށްގަޑި ބައި ކަންހާއިރު ދުއްވަމުން އެ ދިޔަ ސައިކަލުގައި އިން އިރު އަހަރެން މޫނުމަތީގައި އެއްވެސް ހާސްކަމެއް ފެންނަން ނެތްކަން ކަށަވަރެވެ. ނުދަންނަ މީހެއް ސައިކަލު ދުއްވަން އިންކަމަކު އަހަރެން ބޭނުންވީ އޭނައާއި ދޭތެރޭ ވިސްނުމުގެ ބަދަލުގައި މިލިބުނު މިނިވަންކަމުގެ ވަގުތު ކޮޅުގެ އުފާ އެންމެ ފުނުން ހޯދާށެވެ. އެއީ ނާޒިމްއާއި އަހަރެން ބައްދަލުވި ފުރަތަމަ ރެއެވެ. ނާޒިމް ފުރަތަމަ ދިން އެ ދަޢުވަތު އަހަރެން ޤަބޫލުކުރީ ހަމައެކަނި ރޭގަނޑު ފިނީގައި ދުއްވަން ދާހިތްވާލެއް ބޮޑުކަމުންނެވެ.

އެދުވަހު ހަވީރު ވެހިފައިވާ ވާރޭގެ ސަބަބުން މަގުގެ އެކި ދިމަ ދިމާގައި ހެދިފައިވާ ވަޅުތަކުގައި ފެންހަރުލާފައި ހުއްޓެވެ. ނާޒިމް ދިޔައީ އޭގެ ކޮންމެ ވަޅަކަށް ސައިކަލު ޖަހަމުންނެވެ. އެވަގުތު ބުރައިގެން އެދާ ފެންފޮދުގެ މަޖާ ނަގަމުންނެވެ. އަހަންނަށް ވެސް އެކަން ނިކަން މަޖާކަމަކަށް ވިއެވެ. އެކި ސަކަރާތުގައި ތިބެ ކައްދޫގެ ވަކި ހިސާބަކަށް ދިއުމަށްފަހު ނާޒިމް ސައިކަލުގެ މިސްރާބު ބަދަލު ކޮށްލީ އެދިމާއިން ގޮނޑުދޮށަށް ދެވެން އޮތް ކުޑަކުޑަ ހަނިމަގަކަށެވެ. އެކަން އެގޮތަށް ކުރުމުން ވެސް އަހަރެން ސުވާލެއް ނުކުރަމެވެ. އަމުދުން އަހަރެން އެކަމާ ޖެހިލުންވާކަން އަންގަން ބޭނުން ނުވާތީއެވެ.

އެ ހިސާބަކީ ސައިކަލުގައި ގޮޑުދޮށުން ދުއްވެން އޮތް ތަނެއް ކަމުން އެތައް ހިސާބަކަށް ނާޒިމް ދުއްވިއެވެ. އަދި މޫދާ ކައިރީގައި އޮތް ރުއްބުޑެއް ކައިރިއަށް ގޮސް ސައިކަލު މަޑުކޮށްލުމަށްފަހު އެތާ އިށީންނުމަށް ދަޢުވަތު ދިނެވެ. އެރެއަކީ މިހާތަނަށް އަހަންނަށް ދުވަހަކުވެސް ނުލިބޭފަދަ އުފާވެރި ރެއެކެވެ. ފުރަތަމަ ފަހަރަށް މީހަކު އަހަރެންގެ ހިތުގެ އުދާސްތައް އަޑުއަހައިލުމަށް އަހަންނަށް ސަމާލުކަން ދީގެން އިން އިނުންވީ އަހަރެންގެ ފުރިހަމަ އިތުބާރު ނާޒިމްއަށް ދެވުނު އެންމެ ބޮޑު އަސްލަށެވެ.

އެންމެ ކުޑަ އިރުއްސުރެ ބައްޕަ ކައިރީ ހުރެމެ ބައްޕަގެ އެއްވެސް ލޯތްބެއް އަޅާލުމެއް ނުލިބި އަހަރެން ބޮޑުވީ އަހަރެންގެ ކޮން ކުށެއް އޮވެގެން ކަމެއް އަހަންނަކަށް ނޭގެއެވެ. އެއްގޭތެރޭގައި އުޅެމެ ބައްޕަ އެހެން ކުދިންނާ ވާހަކަ ދައްކާއިރު އަހަރެންގެ ކައިރީ ބުނަންޖެހޭ އެއްޗެހި މަންމަ ކައިރީ ބުނެފައި ބުނަނީ ކީއްވެ ކަމެއް އަހަންނަކަށް ނޭގެއެވެ. އެހެން ކުދިންނާއި އަހަރެން ތަފާތު ކުރަމުން ދިޔަ ކުރުންތަކުގެ ސަބަބުން އަހަރެން ދިރިއުޅުން މަތިން މުޅިން ފޫހިކޮށްލިއެވެ. މަންމަގެ ނޯކަރު ގަނޑެއްހެން އުޅެން ޖެހުމުގެ ސަބަބުން އެތަނުން ފިލައިގެން ދާން އަހަރެން ބޭނުންވިއެވެ.

މިހުރިހާ ވާހަކަ ތަކެއް ކަނުލާ ނާޒިމް އަޑުއަހަމުން ދިޔައެވެ. އެރޭ އޯގާތެރި ކަމާއެކު ނާޒިމް އަހަންނަށް އެހީވާނެކަމަށް ބުނެ އެތަނުން ގެންދާނެ ކަމަށް ބުނި ބުނުމަށް އަހަރެން އިތުބާރު ކުރީމެވެ. އޭގެ ނަތީޖާއަކަށް ވެގެން ދިޔައީ ދިމާވިތާ އެންމެ ތިން ދުވަސްތެރޭ ނާޒިމްއާއި އިންނަން ރަން ކިއުމެވެ. ނަމަވެސް ހައިރާންވި ކަމަކީ ރަންކިޔަން ފޯމު ގެނައި އިރު ފޯމުގައި ޖަހާފައިވާ ނަން ތަފާތުވުމެެވެ. ނަމަވެސް އެއްވެސް ސުވާލެއް ނުކޮށް ކުރިއަށް ދިޔައީ އެތަނުން ސަލާމަތް ކޮށްދޭނެ ކަމަށް ބުނި ބުނުމަށެވެ. ދެވަނަ ކަމަކަށް ރަނުގެ ލާރި ދީފިކަމުގައި ބުނުމަށް ބުނި ވަގުތުވެސް ހިތުގައި އެތައް ސުވާލެއް އުފެދުނެވެ. ނަމަވެސް އެކަންވެސް ކަމަކަށް ނަހަދާ ދޫކޮށްލީ ހަމަ އެންމެ ބޭނުމެއްގައެވެ. އަދި ރަންކިޔުމަށްފަހު އެނގިގެންދިޔަ ނާޒިމްގެ ދަރިއެއް ހުޅުމާލޭގަ ހުންނަ ކަމުގެ ޚަބަރަށް ވެސް އެއްވެސް ރައްދެއް ނުދީ މަޑުކުރީ ހަމަ އެ ބޭނުމުގައެވެ.

ކައިވެނި ކުރެވުނެވެ. އިސާހިތަކު އަހަރެންގެ ހަޔާތް ބަދަލުވާކަށް ގިނަ ދުވަސްތަކެއް ނުނެގިއެވެ. ނާޒިމް މީގެ ކުރިން ކިޔައިދިން ކޮންމެ ވާހަކަ އަކީ ދޮގާ މަކަރު ކަން އަހަންނަށް ހާމަ ވާންފެށިއެވެ. ދޮގަކަށް ފަހު ދޮގެއް ފަޅާ އަރަމުން ދިޔައީ ހީވެސް ނުކުރާ ގޮތްތަކަކަށެވެ. އެންމެ ކުޑަމިނުން އެކަމަކަށްޓަކައި އަހަރެން އެކައިވެނި ކުރި ކަންތައްވެސް ވީ ދައްކަދިން ކުލަ ނުޖެހޭ ހުވަފެނަކަށެވެ. ނަމަވެސް އަހަންނަށް އޭރު ވިސްނުނު ގޮތުގައި ވަގުތު ފާއިތު ވެއްޖެއެވެ. ކައިވެނި ކުރާ މީހާއާ އެކު އުމުރު ހޭދަކުރަން ޖެހޭނެކަމުގައި އަހަންނަށް ޤަބޫލުކުރެވުން އެއީ އަހަރެންގެ މޮޔަކަމެވެ.

މަސައްކަތެއް ނުކޮށް ދުވާލު ހަތަރު ދަމު ނިދަން އޮވެފައި ރޭގަނޑު ބޭރުގައި އުޅެފައި ނާޒިމް ގެއަށް އަންނަނީ ފަތިސްވާ ފަހުންނެވެ. އަހަންނަށް އޭރު އެނގިފައިވާ ގޮތުގައި ފިރިމީހާ ކޮންމެ ގަޑިއެއްގައި ގެއަށް އަޔަސް ފިރިމީހާއަށް ޚިދުމަތްކުރުމުގައި އަނބިމީހާ ތައްޔާރަށް ހުންނަންޖެހެއެވެ. އެހެންކަމުން ނާޒިމް ގެއަށް އައުމުން އެއްޗެހި ހޫނުކޮށް ކާންދީ ބޭނުންވި ކޮންމެ ކަމެއް ކޮށްދެމުން ގެންދިޔައީމެވެ. ނަމަވެސް އޭގެ ބަދަލުގައި އަހަންނަށް ލިބެމުން ދިޔައީ ބޭއަދަބީ ބަސްތަކާއި ރަހުމްކުޑަ އަނިޔާތަކެވެ. ބަންދު ކޮޓަރިއެއް ތެރޭގައި ލިބެމުން އެދިޔަ އަނިޔާތައް އަހަރެން އެންމެނަށް ސިއްރުކުރީ އެއީ އަހަންނަށް ހުރިގޮތް ކަމުގައި ޤަބޫލުކޮށްގެނެވެ. އެވާހަކަތައް ހިއްސާކުރާނެ އިތުރު ފަރާތެއްވެސް ނެތީތީއެވެ.

އެހާ އަނިޔާވެރި އެވާ ސަބަބު ފުރަތަމަ ނޭގުނު ނަމަވެސް އަހަންނަށް ފަހުން ހުރިހާ ކަމެއްވެސް އެނގުނެވެ. ނާޒިމަކީ އެއްވެސް އުޅުމެއް ނެތް ޑުރަގުގެ އަޅެކެވެ. ދަރިއަށް ހުރިހާ ކަމެއް ކޮށްދޭ ކަމަށް ބުނެ ދެއްކި ދޮގުވާހަކަތައް، އަހަރެން ނާޒިމްއަށް ކުރި އިތުބާރު މުޅިން ގެއްލުވާލިއެވެ. އެއީ އަނިޔާވެރިއެކެވެ. މަސްތުގެ ހާލަތުގައި ހުރެ އަހަރެންގެ ހަށިގަނޑުގެ އެކި ތަންތާ ސިނގެރޭޓުބުރި ޖައްސަމުން ގެންދިޔަ އިރު ނާޒިމްގެ ހިތުގައި ރަހުމުގެ ކަންފުޅެއްވެސް ނެތް ކަހަލައެވެ. ގޭތެރެއިން މީހަކަށް އަޑު އިވިދާނެތީ ލިބެމުން ދިޔަ ވޭނުގެ ރުއިން ވެސް އަހަރެން ރޮމުންދިޔައީ ކޮޓަރީގެ ކަނެއްގައި އަނގަ މަތީ އަތްއަޅައިގެން އިނދެއެވެ.

ކިތައްމެ ފަހަރަކު އަމިއްލަ ފުރާނަ ދުއްވާލަން ހިތަށް އަރަމުން ދިޔައިރުވެސް ކެތްކުރީ މި ނޫންގޮތެއް ލިބޭނެ ކަމުގެ ފޮނި އުންމީދުގައެވެ. އަހަރެންގެ ވޭނުން ފުރިގެންވި އެކަނިވެރި ހަޔާތް ފަޅުފިލުވުމަށްޓަކައި އަހަރެން ނާޒިމް ކުރެން ދެން އެދުނީ ވަރަށްވެސް ބޮޑު ކަމެއްގައެވެ. އެއީ އަހަންނަށް މަންމާއޭ ކިޔާ ގޮވާލާނެ ކުޑަކުޑަ ކުއްޖަކަށެވެ. އަހަރެން އުންމީދު ކުރީ އެ ޙާލަތަށް ދިއުމުން ނާޒިމްގެ އެ ރަހުމުކުޑަ އަނިޔާތަކުގެ ޝިކާރައަކަށް އަހަރެން ނަހަދާނެ ކަމަށެވެ. ނަމަވެސް ކޮންމެ ދުވަހަކު ލިބެމުން ދިޔަ ވޭން ދިޔައީ އިތުރު ވަމުންނެވެ.

ކުރިމަތި ލާންޖެހުނު އަނިޔާތަކާއި އަހަރެންގެ ޙާލު ހުރިގޮތުން އެންމެ ފަހުން އަހަރެންގެ ދަރިފުޅު ވިހެއީ ދުވަސް ނުފުރާ އެންމެ ހަތްމަހުގައި އެތައް ކޮމްޕުލިކޭޝަން ތަކަކާއި އެކުގައެވެ. ދެމަސް ދުވަހު އެން.އައި.ސީ.ޔޫގައި އޮތުމަށް ފަހު ފުރަތަަމަ ފަހަރަށް ދަރިފުޅު އުރާލަން ލިބުނު ވަގުތަކީ އަހަރެންގެ ހަޔާތުގެ އެންމެ އުފާވެރި ދުވަހެެވެ. އެދަރިފުޅު އަހަރެންގެ އަތަށް ލިބުނު ވަގުތަކީ އަހަންނަށް ނޭނގޭ އައު ހިތްވަރެއް ލިބިގެން ދިޔަ ވަގުތެކެވެ. އެ ކުޑަކުޑަ ދަރިފުޅަށް އެފަދަ ނުބައި މީހެއްގެ ވައި އެޅުނަ ނުދޭން ހިތާހިތުން ނިންމީމެވެ.

އަހަންނަށް ވިސްނިފައި އޮތް ވިސްނުން ބަދަލުކޮށް އެ އަނިޔާވެރިއާ އާއި ދުރަށް ދާން ނިންމާ ފޯމު ލީ ވަރަށް ހިތްވަރު ކޮށްފައެވެ. ނަމަވެސް އެކަމުގައި އަހަރެންގެ މުޅި ހިތްވަރު ހުސްކުރި އިރުވެސް ކުރިއެރުމެއް ނުލިބި އެކަނިވެރިވިއެވެ. އެއްވެސް ފަރާތަކުން އަހަންނަށް އެއްބާރުލުން ނުލިބުނުތާ، އަހަރެން ހިތްވަރު ދޫކޮށް ފަހަތަށް ޖެހުނީ ކޯޓުގައި ނާޒިމް ކުރި އާދޭހަށެވެ. ދަރިފުޅަށްޓަކައި ދިނުމަށް އެދުނު ފުރުސަތު ދިނީ ދުވަހެއްގެ ކޮޅުންވެސް ދަރިފުޅާއި ހަމައަށް އެކަން ދާ ދުވަހަކުން އެދަރިފުޅަށް މި މަންމަ އެކަން ވެސް ދަރިފުޅަށްޓަކައި ކުރިކަން އެންގުމުގެ ބޭނުމުގައެވެ. ނަމަވެސް، އެ ފުރުސަތުގެ ބޭނުންވެސް ނާޒިމް ހިފިތަން ނުފެނުނެވެ. އަހަންނަށް ކުރަމުންދިޔަ އަނިޔާގެ އިތުރުން އެތަށް ހިލޭ އަންހެނުންތަކަކާއި ގުޅުން ބާއްވަމުން ދިޔަ ދިޔުންވީ އިތުރަށް އަހަންނަށް އެ ދިރިއުޅުމުގެ މާނައެއް ނެތް ކަމަކަށެވެ.

ކަށިން ހިތްވަރު ނެރެ އަނެއްކާވެސް ފޯމު ލީމެވެ. އަދި މީހުން ކިޔާ އެއްޗެއްްސާ ކުރި މަލާމާތަކަށް ނުބަލާ އެގޮތުގައި ދެމި ހުރީމެވެ. ފޯމު ލިތާ އަހަރަކާއި ހަމަސް ފަހުން އަހަރެން ވަރި ކުރި ދުވަހަކީ އެތައް ދުވަހަކަށްފަހު މި ދުނިޔެމަތީގައި އަހަރެން ހިތްހަމަ ޖެހުމުގެ ނޭވާއެއް ލި ދުވަހެވެ. ހިތުގައި ހަމަ އެކަނި އޮތީ އެންމެ އަޒުމެކެވެ. އަހަރެން ބޭނުންވެގެން ހޯދި އެދަރިފުޅު ރަނގަޅު ހެޔޮ އިންސާނިއްޔަތުކަމުން ފުރިގެންވާ މީހަކަށް ހެދުމެވެ.

ހަޔާތުގެ މި ދަތުރުގައި އެތައް ފަހަރަކު އަހަރެންގެ ސިނކުޑީގެ ދޮރުގައި އިންޒާރުގެ ޓަކި ޖެހިއެވެ. ނަމަވެސް އެދުވަހު އަހަންނަށް ނުވިސްނުނީއެވެ. އެ ދުވަހު އެ އަޑު އަހާ އުދުއްސައިގަންނަން އެ ނެގި ފިޔަވަޅު ނުނަގާ ވިސްނުންތެރިކަމާއެކު ކުރިއަށް ދެވުނު ނަމަ އަހަރެންގެ ހަޔާތުން ބޭކާރުވެގެން އެދިޔަ ހަތަރު އަހަރެއް ނުދިޔައީހެވެ. ގައިގެ އެތަންމިތާ ވޭނުން ފުރިގެންވާ މި ލަކުނު ތަކެއްވެސް ނެތީހެވެ. ބައްޕައަކާއި ނުލާ އެކަނި ދަރިއަކު ގެންގުޅެކަށްވެސް ނުޖެހުނީހެވެ. އެ ދުވަހު ހަމަ ނުވިސްނުނީއެވެ.

ނިމުނީ

ލިޔުންތެރިޔާގެ ފުރަމަލަ

ޚަދީޖަތު ސަނާ
ޚަދީޖަތު ސަނާ
މުނިއަވަސްގެ ޑެޕިއުޓީ އެޑިޓަރ ޚަދީޖަތު ސަނާ އަކީ ލޯބީގެ، އަސަރުގަދަ އަދި ހިތާމަވެރި ވާހަކަ ލިޔުމާއި ކިޔުމުގައި ފާހަގަކޮށްލެވޭ ލިޔުންތެރިއެކެވެ. އިޖްތިމާޢީ މައުޟޫތަކަށް ސައްނު ލިޔާ ކުރުވާހަކަތަކުން ބޭނުންވާ މެސެޖް ފޯރުކޮށްދެނީ ވަރަށް އަސަރާއި އެކުގައިކަން ފާހަގަކޮށްލެވެއެވެ.
މި ލިޔުންތެރިޔާގެ ބައެއް އެހެން ލިޔުންތައް

ގުޅުންހުރި ލިޔުން: