ބައިނަލްއަޤުވާމީ ހަމަތަކާއި، ވާރލްޑް ބޭންކު އަދި އައި.އެމް.އެފް ފަދަ މާލީ އިދާރާތަކުގެ ލަފާގެ މަތިން ދަރަނި ބެލެހެއްޓުމުގެ އިދާރީ އޮނިގަނޑު ހަރުދަނާ ކުރުމުގެ ގޮތުން ދަރަނި ނެގުމުގެ އެންމެހާ އިދާރީ ކަންކަން އެއްފުރާޅެއްގެ ދަށަށް ގެނައުމުގެ މަސައްކަތުގެ ތެރެއިން ދައުލަތުގެ ޓްރެޜަރީ ބިލާއި ބޮންޑް ރަށްވެހިބާޒާރަށް ވިއްކުމުގެ އިދާރީ މަސައްކަތް މިއަދު މިނިސްޓްރީ އޮފް ފިނޭންސަށް ބަދަލުކޮށްފި އެވެ.
ދައުލަތަށް ބޭނުންވާ ފައިސާ ހޯދުމަށް ފައިސާ ޗާޕްކުރުމުގެ ބަދަލުގައި، ރަށްވެހިބާޒާރު ތަރައްޤީކުރުމަށާއި، ދަރަނީގެ ޕޯޓްފޯލިއޯ ސިންދަފާތުކުރުމަށް، ޓްރެޜަރީ ބިލާއި ބޮންޑް ފުރަތަމަ ތަޢާރަފް ކުރެވުނީ 10 ސެޕްޓެމްބަރ 2006 ގައެވެ. މިކަން ކުރުމަށް މިނިސްޓްރީ އޮފް ފިނޭންސްގައި އެކަށީގެންވާ ވަސީލަތާއި އަދި ފަންނު ނެތުމުން، ރާއްޖޭގެ މަރުކަޒީ ބޭންކުގެ ފުރިހަމަ އެއްބާރުލުމާއިއެކު އެޖެންސީ އެޤްރީމަންޓެއްގެ ދަށުން ދައުލަތުގެ ޓްރެޜަރީ ބިލާއި ބޮންޑް ރަށްވެހިބާޒާރަށް މިހާތަނަށް ވިއްކައިދީފައިވަނީ މިމިނިސްޓްރީގެ ފިސްކަލް އޭޖެންޓެއްގެ ހައިސިއްޔަތުން މަރުކަޒީ ބޭންކުންނެވެ. މަރުކަޒީ ބޭންކުން ދައުލަތުގެ ސެކިޔުރިޓީސް ވިއްކުމުގެ އިދާރީ މަސައްކަތް ކުރިން ކުރި ނަމަވެސް، މި ސެކިޔުރިޓީސް އާއި ގުޅުންހުރި ދަރަންޏާއި، ދައުލަތުގެ ޖުމްލަ ދަރަނި ރިކޯޑްކޮށް ބެލެހެއްޓަމުގެ އެންމެހާ މަސައްކަތް އަބަދުވެސް ކުރަމުން ދިޔައީ މިނިސްޓްރީ އޮފް ފިނޭންސުން ނެވެ.
ދައުލަތުގެ ދަރަނި ބަލަހައްޓާ ނިޒާމު ހަރުދަނާ ކުރުމަށް މިނިސްޓްރީ އޮފް ފިނޭންސުން ކުރަމުން އަންނަ މަސައްކަތުގެ ތެރެއިން، ރަށްވެހިބާޒާރަށް ޓްރެޜަރީ ބިލާއި ބޮންޑު ވިއްކުމުގެ ވަސީލަތްތަކާއި، ފަންނު މަރުކަޒީ ބޭންކާއި، ބައިނަލްއަޤުވާމީ އިދާރާތަކުގެ އެހީތެރިކަމާއެކު މިނިސްޓްރީ އޮފް ފިނޭންސްގައި ބިނާކުރެވި، މަރުކަޒީ ބޭންކާއި ހަވާލުކޮށްގެން ކުރަމުން ދިޔަ އިދާރީ މަސައްކަތް މިހާރު މިވަނީ މިނިސްޓްރީ އޮފް ފިނޭންސަށް ބަދަލުކުރެވިފައެވެ. ޓްރެޜަރީ ބިލާއި ބޮންޑު ވިއްކުމުގެ އަމަލީ މަސައްކަތްތަކަށް ގެނެވުނު ހެޔޮ ބަދަލާއި އެކު، އެ މިނިސްޓްރީ އާއި ދައުލަތުގެ ޓްރެޜަރީ ބިލާއި ބޮންޑު ފަދަ ތަކެތި ގަންނަ ފަރާތްތަކާއި އެކު އޮންނަ ގުޅުން އިތުރަށް ބަދަހިވެ، އެފަރާތްތަކަށް ދިމާވާ ގޮންޖެހުންތައް ހައްލުކޮށް ރަށްވެހިބާޒާރު ފުޅާކޮށް ތަރައްޤީ ކުރުމަށް ފަސޭހަވެގެން ދާނެ ކަމަށް މިނިސްޓްރީން ހާމަކުރައްވައެވެ. އަދި މިގެނެވުނު ބަދަލާއެކު މަރުކަޒީ ބޭންކުގެ މަނިޓަރީ ޕޮލިސީ ތަންފީޒްކުރުމުގައި މަރުކަޒީ ބޭންކަށާއި، އަދި ދައުލަތުގެ މާލީ ސިޔާސަތު ތަންފީޒުކުރުމަށް ފަސޭހަވެގެންދާނެ ކަމަށްވެސް މިނިސްޓްރީ އޮފް ފިނޭންސުން ހާމަކުރައްވައެވެ.
ދައުލަތުގެ ޓްރެޜަރީ ބިލާއި ބޮންޑު ވިއްކުމުގެ އިދާރީ މަސައްކަތް މިނިސްޓްރީ އޮފް ފިނޭންސަށް ބަދަލުކުރެވުނު ނަމަވެސް، މިފަދަ ކަންކަމުގައި މަރުކަޒީ ބޭންކާއި އެ މިނިސްޓްރީއިން އަބަދުވެސް މަސައްކަތްކުރާނީ އެއްމިސްރާބަކަށް ދިއުމަށް ކަމަށާއި. އެގޮތުން ރަށްވެހިބާޒާރަށް ވިއްކާ މިފަދަ ދައުލަތުގެ ސެކިއުރިޓީތަކުގެ ރެގިއުލޭޓަރަކީ ކުރިއެކޭވެސް އެއްގޮތަށް މަރުކަޒީ ބޭންކެވެ. އަދި ސަރުކާރުގެ ބޭންކަރގެ ހައިސިއްޔަތުން މިސެކިއުރިޓީތަކުގެ ސެޓްލްމަންޓްވެސް ހިންގާނީ މަރުކަޒީ ބޭންކުންނެވެ. އަދި މީގެ އިތުރުން މާލީ ރަށްވެހިބާޒާރު އިތުރަށް ހަރުދަނާ ކުރުމަށް މަރުކަޒީ ބޭންކާއެކު ގިނަ މަސައްކަތްތަކެއް މިހާރުވެސް ދަނީ ކުރަމުންނެވެ. އޭގެ ތެރޭގައި ރަށްވެހިބާޒާރަށް އައު ޓްރެޜަރީ ސެކިއުރިޓީތައް ތައާރަފް ކުރުމާއި، ސެކިއުރިޓީ ވިއްކުމުގެ ކަންކަން ހަރުދަނާ ކުރުމަށް އިންފްރާސްޓަރަކްޗަރ ބިނާ ކުރުމާއި ޤާނޫނީ އޮނިގަނޑު އިތުރަށް ހަރުދަނާ ކުރުމުގެ މަސައްކަތްތައް ހިމެނޭ ކަމަށް މިނިސްޓްރީ އޮފް ފިނޭންސުން ހާމަކުރައްވައެވެ.
ލިޔުންތެރިޔާގެ ފުރަމަލަ
މި ލިޔުންތެރިޔާގެ ބައެއް އެހެން ލިޔުންތައް
- 29 ޑިސެމްބަރ 2024ޚަބަރު“ރޯމްދުނިޔެ” އިން އީސިމް ނެގުން ދިވެހީންނަށް މާ ސަޅިވާނެ!
- 27 ޑިސެމްބަރ 2024ޚަބަރުޑާކް ރެއިން އިން މިފަހަރު “ފެށުމާއި ނިމުން”
- 24 ޑިސެމްބަރ 2024ޚަބަރުނިޝާ އާރްޖޭއަކަށް!
- 20 ޑިސެމްބަރ 2024ޚަބަރު“ސޮރީ” ގެ މަންޒަރެއް!
