ދިވެހިން ސިއްސުވައިލި ބިރުވެރި ފިލްމު “ފޯރފޯރޓޫސިކްސް” އިން ޑައިރެކްޝަނަށް ނުކުތް ޒުވާން ޑައިރެކްޓަރު އަޙްމަދު ޝިނާންގެ “ދޮންހިޔަލަ އާއި އަލިފުޅު”ގެ ވާހަކައަށް ހަދާފައިވާ ކުރު ފިލްމުގެ މަސައްކަތަށް ވަރަށް ގިނަބައެއްގެ ތަޢުރީފު ލިބެން ފަށައިފިއެވެ.

ރާއްޖޭގެ ފަތުރުވެރިކަން އިޝްތިހާރުކުރުމަށް ވިޒިޓް މޯލްޑިވްސް އަށް ހަދާފައިވާ ކުރު ފިލްމަކީ ރާއްޖޭގައި ޒަމާނުއްސުރެ ކިޔައި އުޅޭ މަޝްހޫރު ޚިޔާލީ ވާހަކައެއް ކަމަށްވާ ދޮންހިޔަލަ އާއި އަލިފުޅުގެ އަސަރު ގަދަ ލޯބީގެ ވާހަކަ، ކުރު ގޮތަށް، ނުހަނު މޮޅަށް ދައްކުވައިދޭ ކުރު ފިލްމެކެވެ.

2018 ވަނަ އަހަރު ވިޝުއަލް އާޓްސްގެ ދާއިރާއިންނާ އެނިމޭޝަންގެ ރޮނގުން ހިތްވަރު ދިނުމުގެ ގައުމީ އިނާމު ލިބިފައިވާ ޝިނާންގެ މި މަސައްކަތުންް، އޭނާގެ މި ފަންނުގެ ހުނަރު އައު އުސްމިނަކަށް ގެންގޮސްދީފައިވެއެވެ. މީގެ އަހަރުތަކެއް ކުރިން ރާއްޖޭގައި ހިނގައިދިޔަކަމަށް ކިޔާއުޅޭ މި ޚިޔާލީ ވާހަކައިގެ މަންޒަރުތައް ޝިނާން ކުލަކޮށްދީފައިވާ ގޮތް ވަރަށް ފުރިހަމަ އެވެ.

ޝިނާން ޑައިރެކްޓްކޮށްފައިވާ “ދޮންހިޔަލަ އާއި އަލިފުޅު”ގެ ތަރިންނަކީ މަރްޔަމް ޝިފާ އާއި ޢަލީ އާޒިމް (ދޮންއައްޔަ) އެވެ. ދިވެހިންގެ ކުރީގެ ދިރިއުޅުން ވެސް ދައްކުވައިދޭ ހަނދާންތަކުގެ ތެރެއަށް ދެ މިނިޓާއި ސޯޅަ ސިކުންތުގެ “ދޮންހިޔަލަ އާއި އަލިފުޅު”ގެ މަންޒަޒުތަކުން އުފާވެރިކަން ގެނެސްދެ އެވެ.

ޝިނާން ކޮށްފައިވާ މި ހިތްގައިމު މަސައްކަތް، މީގެ އަހަރެއްހައި ދުވަަސްކުރިންް މުނިއަވަސް އަށް ދައްކާލާފައިވެއެވެ. ފިލްމުގެ ހަމަ ކޮންމެ މަންޒަރެއް ބަލާފައި، މިއީ ހަމަ އެ ހާދިސާގެ އަސްލު ނޫންބާއޭ ހިތަށް އަރާހާ ފުރިހަމައެވެ. ވަކިން ޚާއްޞަކޮށް، ވަޅުގަނޑުވަރު، ދޮންހިޔަލަ އާއި އަލިފުޅު ދަތުރުކުރި ދޯނީގެ ފަހަތުން އަންނަ މަނަވަރުތަކާއި ހިޔަލަ އާއި އަލިފުޅު އެކުގައި ކަނޑަށް ފުންމާލާއިރު ކަނޑު އަޑިން އެ ފެންނަ މާވަރުތައް (މާސިންގާ ފިރުއައުނު މުދާ ތައް) ދައްކުވައިދޭ މަންޒަރުތައް މިއީ ހައިރާންކޮށްލާ ފަދަ ސަޅި މަންޒަރުތަކެކެވެ.

ޝިނާންގެ “ދޮންހިޔަލަ އާއި އަލިފުޅު”ގެ ސްކްރީން ޝޮޓެއް

ފިލްމުގައި ދައްކުވައިދޭ މަންޒަރުތައް ވާހަކައެއްގެ ސިފައިގައި ކިޔައިދީފައިވަނީ ލަވަކިޔުންތެރިޔާ އީމާން އެވެ. މިއުޒިކް ހެދީ ފަތުހުﷲ ޝަކީލް އެވެ. ޝަކީލަކީ ޝިނާން ޑައިރެކްޓްކުރާ ޑާކް ރެއިންގެ ބިރުވެރި ފިލްމު “ބަޅިނދު”ގެ ވެސް މިއުޒިކް ހެދި ފަންނާނެވެ.

ޝިނާން އަކީ ވިޝުއަލް އިފެކްޓްހެދުމާއި ސިނެމަޓޯގްރަފީގައި ތަފާތުތަކެއް ދައްކައިދެމުން އަންނަ އާޓިސްޓެކެވެ. ޑާކް ރެއިން އިން 2019ގައި ނެރުނު ވަރުގަދަ ދިވެހި ފިލްމު “ގޮށްރާޅު” އަދިި 2016ގައި ރިލީޒްކުރި، ނަހުލާގެ “4426” ފިލްމުން މިކަން ވަރަށް ރަނގަޅަށް ޝިނާން ސާބިތުކޮށްދީފައިވެއެވެ.

ރާއްޖޭގެ އެންމެ ވަރުގަދަ ފިލްމު ޕްރޮޑަކްޝަން ހައުސް، ޑާކް ރެއިން އެންޓަޓެއިންމެންޓްގެ އެންމެ ވަރުގަދަ އަދި ބިޔަ ޕްރޮޖެކްޓް “ރެހެންދި ޚަދީޖާ” ޑައިރެކްކުރަން ހަވާލުކޮށްފައިވަނީ އަޙްމަދު ޝިނާނާ ކަންވެސް ފާހަގަކޮށްލެވެއެވެ.

ލިޔުންތެރިޔާގެ ފުރަމަލަ

އަޙްމަދު ރަޝީދު
އަޙްމަދު ރަޝީދު
ހުރިހައި ދާއިރާއެއްގެ ލިޔުންތައްވެސް މުނިއަވަސްގެ ފައުންޑަރ އަދި ޗީފް އެޑިޓަރ ލިޔާނެއެވެ.

ގުޅުންހުރި ލިޔުން: