10 އަހަރަށްފަހު ފަރްހާން އަޚްތަރު ޑައިރެކްޓްކުރާ ފިލްމު “ޖީ ލޭ ޒަރާ” ފަށަން ކެތްމަދުވެފައި ހުރިކަމަށް އޭނާ ބުނެފިއެވެ.

މިދިޔަ އޮގަސްޓް މަހު އިޢުލާންކުރި މި ފިލްމަކީ އަންނަ އަހަރު ޝޫޓިންގ ފަށަން ތައްޔާރުވަމުން އަންނަ ފިލްމެކެވެ. 2023 ގައި ރިލީޒްކުރަން ނިންމާފައިވާ “ޖީ ލޭ ޒަރާ” އަކީ ތިން އަންހެނެއްގެ ރޯޑް ޓްރިޕެއް ކިޔައިދޭ ފިލްމެކެވެ. ފާހަގަކޮށްލެވޭ ކަމަކީ ފަރްހާން ޑައިރެކްޝަނަށް ނުކުތް 2001 ގެ ފިލްމު “ދިލް ޗާހަތާ ހޭ” އަކީވެސް ތިން އެކުވެރިއެއްގެ ރޯޑް ޓްރިޕެއްގެ ވާހަކަ ކިޔައިދޭ ފިލްމެއް ކަމެވެ. އެ ފިލްމުގައި ކިޔައިދިނީ ތިން ފިރިހެނުންގެ ވާހަކައެވެ.

“ޖީ ލޭ ޒަރާ” ގެ ތަރިންނަކީ ޕްރިޔަންކާ ޗޯޕްރާއާއި ކެޓްރީނާ ކެއިފްގެ އިތުރުން އާލިއާ ބަޓްއެވެ. ޕްރިޔަންކާއަކީ ފަރްހާން އެންމެ ފަހުން ޑައިރެކްޓްކޮށް ގެނެސްދިން 2011 ގެ ފިލްމު “ޑޯން 2” ގެ ބަތަލާއެވެ. ކެޓްރީނާއަކީ ފަރްހާން މުހިންމު ރޯލެއް ކުޅުނު 2011 ގެ ފިލްމު “ޒިންދަގީ ނާ މިލޭގީ ދޮބާރާ” ގެ ބަތަލާއަށް ވީއިރު އާލިއާއަކީ ފަރްހާނާއެކު މުޅިން އަލަށް މަސައްކަތްކުރާ ބަތަލާއެކެވެ.

“ޖީ ލޭ ޒަރާ” އާ ބެހޭގޮތުން ފަރްހާން ބުނެފައިވާ ގޮތުގައި ބެލުންތެރިން ވަރަށް ޝައުޤުވެރިވާ ކަހަލަ ވާހަކައެއް މި ފިލްމުން ކިޔައިދެވޭތޯ މަސައްކަތް ކުރާނެ ކަމަށާއި ތައްޔާރީތައްވެސް ދަނީ ވަރަށް ބާރަށް ކުރިއަށް ކަމަށެވެ. އަދި ޝޫޓިންގ ފަށަން ކެތްމަދުވެފައި ހުރިކަން ފާހަގަކޮށް އޭނާ ބުނެފައިވަނީ ފިލްމު އިޢުލާނު ކުރިފަހުން ފޭނުންގެ ފަރާތުން ލިބެމުން އަންނަ ފީޑްބެކާއި ފިލްމަށް އިންތިޒާރު ކުރާ ބަޔަކު ތިބިކަން އެނގުމަކީ ފިލްމު ހަދަން ލިބޭ ވަރަށް ބޮޑު ހިތްވަރެއް ކަމަށެވެ.

މިދިޔަ ޖުލައި މަހު ރިލީޒްކުރި “ތޫފާން” އިން ފަރްހާން އެންމެ ފަހުން ފެނިގެން ދިޔައިރު “ޖީ ލޭ ޒަރާ” އަކީ 2019 ގައި ފަރްހާންވެސް ލީޑުން ފެނިގެންދިޔަ “ދަ ސްކައި އިޒް ޕިންކް” އަށްފަހު ޕްރިޔަންކާ ކުޅޭ ފުރަތަމަ ހިންދީ ފިލްމުކަން ފާހަގަކޮށްލެވެއެވެ.

ލިޔުންތެރިޔާގެ ފުރަމަލަ

ސާޖިދު ޢަބްދުﷲ
ސާޖިދު ޢަބްދުﷲ
މުނިއަވަސްގެ ޑެޕިއުޓީ އެޑިޓަރ ސާޖިދު އަކީ ވާހަކަ ލިޔުމުގެ އިތުރުން ޚަބަރު ލިޔުމުގައިވެސް ހުނަރުވެރި ލިޔުންތެރިއެކެވެ.

ގުޅުންހުރި ލިޔުން: