‘އޮމްނިއާ ވޭލާ‘ އިން ލޯންޗް ފެރީގެ ޚިދުމަތް ތ. އަތޮޅާއި ލ. އަތޮޅުގެ ރަށްތަކަށް މިމަހުގެ 23 ގައި ފެށުމަށް ތައްޔާރުވަމުން އަންނަކަމަށް ބުނެފި އެވެ. އޮމްނިއާ ވޭލާއިން ފަށާ ފެރީ ޚިދުމަތުގެ ތެރެއިން މާލެއިން ތ. އަތޮޅަށް އަދި ލ. އަތޮޅަށް ދަތުރުތައް ކުރުމުގެ އިތުރުން ތ. އަތޮޅުގެ ރަށްތަކާއި ލ. އަތޮޅުގެ ރަށްތަކާއި ދެމެދުގައިވެސް ދަތުރުތައް ފެށުމަށްވަނީ ނިންމާފަ އެވެ.

“ޚިދުމަތް ފަށާއިރު މިވަގުތު މިވަގުތު ތ އަދި ލ ގެ ދަތުރު މިއުޅެނީ ހަފުތާއަކު އެއް ދަތުރު. އެއީ އަންގާރަ އަދި ބުދަ ދުވަހު. އަންގާރަ ދުވަހު އޮންނާނީ ތ. އަތޮޅުން ލ. އަތޮޅަށް.” ފެރީ ޚިދުމަތާއިބޭހޭ މަޢުލާތު ދެއްވަމުން އޮމްނިއާ ވޭލާއިން ތ. އަތޮޅާއި ލ. އަތޮޅާއި ދެމެދުގެ ފެރީ އޮޕަރޭޝަންސް ގައި އިސްކޮށް ހަރަކާތްތެރިވެލައްވަމުން އަންނަ މުޙައްމަދު ޖަމީލު ވިދާޅުވި އެވެ.

ތ. އަތޮޅުން ލ. އަތޮޅަށް ކުރާ ދަތުރު ފަށަނީ ތ. ވިލުފުށިންނެވެ. ލ. އަތޮޅުގެ ދަތުރު ފަށަނީ ފޮނަދޫން ނެވެ. ތ. އަތޮޅުގައި ފެރީ ޖެއްސުމަށް މިވަގުތު ހަމަޖެހިފައިވަނީ ވިލުފުށި، މަޑިފުށި، ދިޔަމިގިލި އަދި ގުރައިދޫގަ އެވެ. އަދި ލ. އަތޮޅުގައި ފެރީ ޖައްސަން މިވަގުތަށް ރާވާފައިވަނީ އިސްދޫ، ކަލައިދޫ، ދަނބިދޫ، މާބައިދޫ، ގަން އަދި ފޮނަދޫގައި ކަމަށް މުޙައްމަދު ޖަމީލު މަޢުލޫމާތު ދެއްވައެވެ.

ގަލްފް ކްރާފްޓް ދެ އިންޖީނު އެޅި ސްޕީޑް ލޯންޗް ފެރީ ގެ ދަތުރުތައް ކޮންމެ އަތޮޅަކުންވެސް ފުރުމަށް ހަމަޖެހިފައިވަނީ ހެނދުނު އެވެ. ފަސިންޖަރުންނަށް ލަގެޖްބޭގެއް ނުވަތަ ފޮއްޓަކާއި އަތްދަބަހެއް އަދި ފޮށިގަނޑެއް އުފުލޭނެ ކަމަށާއި މީގެ އިތުރުން އެއް ރަށުން އަނެއްރަށަށް ފޮނުވާލަން ޖެހޭ ތަކެތި ގެންގޮސްދިނުމުގެ ޚިދުމަތްވެސް ދޭނެކަމަށް ޖަމީލު ވިދާޅުވި އެވެ.

މިވަގުތު ފެރީގެ ޚިދުމަތްދިނުމަށް ބޭނުންކުރާ ލޯންޗްތަކަކީ 250 ހޯސްޕަވަރުގެ ދެ އިންޖީނު އެޅި ލޯންޗްތަކެއް ނަމަވެސް، ފެބްރުއަރީ 25 ގެ ފަހުން 250 ހޯސްޕަވަރުގެ 04 އިންޖީނު އެޅި 43 ފޫޓް ދިގުމިނުގެ ލޯޗް ތަކުން ޚިދުމަތް ދެވެން ފަށާނެ ކަން ޖަމީލު ފާހަގަކުރެއްވި އެވެ.

އޮމްނިއާ ވޭލާއިން މިހާރުވެސް ރާއްޖޭގެ ބޮޑު ސަރަހައްދަކަށް ލޯންޗް ފެރީގެ ޚިދުމަތް ދެމުން އަންނައިރު، ތ. އަތޮޅާއި ލ. އަތޮޅަށް ފެރީގެ ޚިދުމަތް ދިނުމަށް ކަނޑައަޅާފައިވާ އަގާއިމެދު ގިނަބަޔަކު އަންނަނީ ފާޑުކިޔަމުން ނެވެ. ލ. އަތޮޅުން މާލެއާއި ދެމެދު ފެރީގެ ޚިދުމަތްދިނުމަށް ނިންމާފައިވަނީ 900 ރުފިޔާ އަށެވެ. ތ. އަތޮޅުން މާލެއަށް ދަތުރުކޮށްދެނީ 550 ރުފިޔާ އަށެވެ. އަދި މި ދެއަތޮޅުގެ ރަށްތަކުގެ ދެމެދުގައި ޚިދުމަތް ދެނީ 325 ރުފިޔާ އަށެވެ. ފެރީގެ އަގާއި މެދު ފާޑުކިޔާ ބައެއް ފަރާތްތަކުން ބުނަމުންދަނީ ގާތްގަނޑަކަށް 900 ވަރަކަށް ރުފިޔާއިން ފްލައިޓްތަކުގައި ދަތުރުކޮށްލަން މާ ރަނގަޅު ކަމަށެވެ.

“އާނ. ފްލައިޓްގަ ވެއްޖެއްޔާ 35 ނުވަތަ 40 ވަރަކަށް މިނެޓުން އެބަދެވޭދޯ ވެލާނާ އެއާޕޯޓަށް. އަނެއްކާ މާ އަރާމުގަ.” ލ. ފޮނަދޫ ރައްޔިތެއްގެ ޝުޢޫރު ހުރީ މިހެންނެވެ. ނަމަވެސް އޮމްނިޔާ ވެލާ ފެރީގެ ޚިދުމަތާއި އެއްކޮޅަށް ވާހަކަދައްކާ މީހުން ބުނަނީ ލޯންޗްގައި 4 ވަރަކަށް ގަޑިއިރުން ދަތުރުކޮށްލަން މާ ރަނގަޅު ކަމަށެވެ.

“އެބުނާގޮތަށް 900 ކޮންމެވެސް ވަރަކަށް ލިބޭ ޓިކެޓަކީ ލިމިޓެޑް ޓިކެޓްތަކެއް. އެ ނުލިބިއްޖެއްޔާ 1400 ވަރަކަށް ހޭދަނުކޮށް ހިޔެއްނުވޭ ފްލައިޓްގަ މާލެ ދަންޏާ ދެވޭނެހެން. މިސާލަކަށް ގަމުން ކައްދުއަށް ދަތުރެއް ޓެކްސީގަ މިކުރެވެނީވެސް 400 ވަރަކަށް ރުފިޔާއަށް. ދެން ފެއަރ ޓިކެޓް ނޫނިއްޔާ އަގު އުޅެނީ 1200 އަށް ވުރެން މަތިކޮށް. ވެލާނާ އެއަރޕޯޓުން މާލެދާން ފެރީއަށް ލަގެޖް އެރުވުމަށް އިތުރު މަސައްކަތްތަކެއް ކުރުމުގެ އިތުރުން އޭގައި ދަތުރުކުރަން ޚަރަދުވޭ. ޚަރަދު އެކަންޏެއް ނޫން. ފްލައިޓްތައް އަބަދުވެސް ވަރަށް ޑިލޭވުން މިއީ އާ ކަމެއް ނޫން. އެހެންވީމަ މާލެ ދާން ރަށު ގަ ގެއިން ނިކުންނަ މީހާ މާލޭގެ ބިމަށް މި ފޯރަނީވެސް ހަތަރު ފަސް ގަޑިއިރު ފަހުން. އެހެންވީމަ ވަކިން ކޮންތާކު އެ ޖެހެނީ؟” ގަމުން ވާހަކަ ދެއްކި މީހާ ގެ ޚިޔާލު ހުރީ މިހެންނެވެ.

ފެރީ ޓިކެޓްގެ އަގާއިމެދު ވަރަށް ގިނަ ފާޑުކިޔުންތައް ލިބެމުން އަންނަކަމާއި ލިބެމުންދާ އެދެވޭ ފާޑުކިޔުންތަކާއި ޚިޔާލުތަކަށް ބަލާފައި ކުރިއަށް އޮތްތަނުގައި އަގަށް ބަދަލު ގެނައުމުގެ ވިސްނުމުން އޮމްނިއާ ވޭލާ އިން ގެންގުޅޭ ކަން ޖަމީލު ފާހަގަކުރެއްވި އެވެ.

އޮމްނިއާ ވޭލާ ގެ އަމާޒަކީ މުޅި ރާއްޖެއަށް ހައިސްޕީޑް ލޯންޗް ފެރީގެ ޚިދުމަތް އަތްފޯރާ އަގެއްގައި އިތުބާރާއި ޔަގީންކަމާއެކު ފޯރުކޮށްދިނުމެވެ. އޮމްނިއާ ވޭލާ އިން ދޭ ލޯންޗް ފެރީގެ ޚިދުމަތް ހޯދުމަށް ރަށްރަށުން ގުޅަން ޖެހޭ އެޖެންޓުންނަށް ގުޅޭނެ ނަންބަރުތައްވެސް މިހާރު ވަނީ އާއްމުކޮށްފަ އެވެ.

ލިޔުންތެރިޔާގެ ފުރަމަލަ

ޢަލީ އަޖްވާން
އަޖްވާން އެންމެ ޝަޢުޤުވެރިވަނީ ފިލްމީ އަދި މިއުޒިކީ ޚަބަރާއި މަޢުލޫމާތު ގެނެސްދިނުމަށެވެ.

ގުޅުންހުރި ލިޔުން: