ހދ. ކުޅުދުއްފުށި ސިޓީއަށް އުފަން ޒުވާން އިޖުތިމާޢީ ޚިދުމަތްތެރިޔާ ކުޅުދުއްފުށީ ރިއޯ، އަކުބަރީ މުޙަންމަދު އަކީ އުމުރުން އެންމެ 29 އަހަރުގެ ޖިންސުއްލަތީފެކެވެ. އޭނާއަކީ މެދުކެނޑުމެއްނެތި އުމުރުން 15 އަހަރުންފެށިގެން އުލޫމުލް ޤުރްއާންގެ ނަމުގައި އެރަށުގައި ޤުރުއާން ކުލާހެއް ހިންގަމުން އަންނަ ހީވާގި ކަނބަލެކެވެ. އެ ކުލާހަށް 11 އަހަރުވީއިރު ޢިޖުތިމާޢީ އިތުރު އެތައް ޙަރަކާތްތަކެއް އޭނާ ހިލޭސާބަހަށްވެސް ރަށުގެ ރައްޔިތުންނާ ސްކޫލުތަކުގެ ދަރިވަރުންނަށް އިންތިޒާމް ކޮށްދެއްވާފައި ވެއެވެ. މިގޮތުން ސްކޫލް ކުދިންގެ ބައެއް ކޭމްޕްތަކާއި މާލެއިން ޤާރީން ގެންނަވައި އުނގަންނައި ދެއްވުމުގެ އިތުރުން ޖަނާޒާ ކޯސްތައްވެސް އިންތިޒާމްކޮށް ހިންގަވާފައިވެއެވެ.

އަކުބަރީ ހިންގާ “ޢުލޫމުލް ޤުރްއާން” ކުލާސް

އަކުބަރީއަކީ މިހާރު އަންހެނުންގެ ތަރައްޤީއަށް މަސައްކަތްކުރާ ކޮމެޓީގެވެސް މެމްބަރެކެވެ. އޭނާގެ ގިނަ ވަގުތު ހޭދަ ކުރައްވަނީ އާންމު ޚިދުމަތާއި އުނގަންނައި ދެއްވުމުގައެވެ. މިގޮތުން 17 ޑިސެމްބަރ 2021 ވަނަ ދުވަހު ފެށުމަށް ހަމަޖެހިފައިވާ ޅެން ހަދަން ދަސްކޮށްދޭ ބޭސިކް ކޯހުގެ އޮރިއަންޓޭޝަން މިރޭ (16 ޑިސެމްބަރ 2021) ގައި ބޭއްވުމަށް ދަނީ ތައްޔާރުވަމުންނެވެ. މިއީ އީ.އޯ.ޕީ އާއި މަޝްހޫރު ޒުވާން ޅެންވެރިޔާ ހާރޭ އާއި ގުޅިގެން އަކްބަރީ ރަށަށް ކޮށްދެއްވާ ޚިދުމަތުގެ އިތުރު ބޮޅެކެވެ.

މުނިއަވަސް އިން ކުރި ސުވާލަކަށް ޖަވާބުދެއްވަމުން އަކުބަރީ ބުނުއްވީ، 2019 ގައިވެސް މިކަން ކުރަން ވަރަށް ރޭވިކަމަށާއި އެކަމަކު ޕެންޑަމިކްގެ ސަބަބުން ފަސްކުރަން ޖެހުނީކަމަށެވެ.

“އަޅުގަނޑާ ހާރޭ އެފްބީއިން ދިމާވީ. މެސެންޖާއިން މިވާހަކަ ދެންނެވީމަ ހާރޭ ވިދާޅުވީ ތިމަންނަ މިހުރީ ތައްޔާރަށޭ އެކަމަކު ރޯގާގެ ސަބަބުން ކުރިޔަށް ނުގެންދެވިފަ އޮތީ. މިހާރު މިރޭ އިރާދަކުރެއްވިއްޔާ ކޯހުގެ އޮރިއަންޓޭޝަން ބޭއްވޭތޯ މި މަސައްކަތް ކުރަނީ. މިއަދު ހާރޭވެސް މިކޮޅަށް ދުރުވެއްޖެ. އީ.އޯ.ޕީ އާއެކު ވާރޗުއަލް ބައްދަލުވުމެއް ރޭވުމުގެ މަސައްކަތް އެބަ ކުރަން. އަސްލު ކޯސް ފެށޭނީ 17 ވާ ހުކުރު ދުވަހު ހަވީރު.” – އަކްބަރީ

މުނިއަވަސް އަށް އެނގިފައިވާ ގޮތުގައި މި ކޯހުގައި މިހާރުވެސް 35 ދަރިވަރަކު ބައިވެރިވެފައިވެއެވެ. އޭގެތެރޭގައި ސްކޫލް ކުދިންނާއި އާންމުން ހިމެނެއެވެ. ކްލާސްތައް ބޭއްވުމަށް ހަމަޖެހިފައިވަނީ އަކުބަރީގެ އަމިއްލަ ކްލާސްރޫމްތަކުގައެވެ. ދެގަޑިއަކަށް ބަހާލައިގެން ހަވީރު ސްކޫލް ކުދިންނަށް އަދި ރޭގަނޑު އާންމުންނަށް ކިޔަވައިދިނުމަށް ވަނީ ރާވާފައެވެ.

“ކިޔެވުން އޮންނާނީ އަޅުގަނޑުގެ އަމިއްލަ ކްލާސް ރޫމްތަކުގައި. ޖުމްލަ 30 ދަރިވަރަކަށް އެއްފަހަރާ އެތާ ކިޔެވޭނެ. ޕްރޮޖެކްޓަރާ ޓީވީ އަދި ކޮމްޕިއުޓަރ ފަދަ ވަސީލަތްތައް ހުންނާނެ. އިތުރަށް ބޭނުންވާނެ ކަންކަން ދެނެގަތުމަށް މިހާރުވެސް މިދަނީ ޓީޗަރާ ވާހަކަދައްކަމުން.” – އަކްބަރީ

މިކޯހާބެހޭ ގޮތުން އީ.އޯ.ޕީގެ އިސް ފަރާތާވެސް މުނިއަވަސް އިން ވާހަކަ ދައްކާލެވުނެވެ. ޢީސާ ޝަރީފު ވިދާޅުވީ، މީ ވަރަށް ޚާއްޞަ އިވެންޓަކަށް ވެގެންދާނެކަމަށެވެ. އެހެނީ ހާރޭއަކީ މިވަގުތު ރާއްޖޭގައި ހުރި އެންމެ ހުނަރުވެރި ޒުވާން ޅެންވެރިޔާ ކަމަށްވެފައި އަދި އޭނާއަށް އެހީތެރިވުމަށް އަޅުގަނޑުމެން އެރަށުން އީ.އޯ.ޕީ އިން ވަރަށް އިތުބާރުކުރާ ކުޅަދާނަ ފަންނާނެއް ކަމަށްވާ އާދަމް އިބުރާހީމް (ދުރުމި، ކުޅުދުއްފުށި) ޙަރަކާތްތެރި ވެލައްވާނޭ ކަމަށެވެ. އޭނާއަކީ އަޅުގަނޑުމެން އޮންލައިންގައި ކިޔަވައިދިން ވަރަށްގިނަ ކޯސްތަކުން ވައްޓަފާޅިއާ ތަޖުރިބާ ޙާޞިލް ކުރައްވާފައިވާ މޮޅު ޅެންވެރިއެއްކަމަށެވެ.

އަކުބަރީ ވިދާޅުވީ ކޯހުގެ ދިގުމިނަކީ 5 ދުވަސްކަމަށެވެ. އަދި ނިންމުމުގެ ރަސްމިއްޔާތައް އީ.އޯ.ޕީގެ ވެރިޔާ ޢީސާ ޝަރީފު ގެނެވޭތޯ މިހާރުވެސް މަސައްކަތް ކުރައްވަމުން ގެންދަވާ ކަމަށެވެ.

ލިޔުންތެރިޔާގެ ފުރަމަލަ

ސާޖިދު ޢަބްދުﷲ
ސާޖިދު ޢަބްދުﷲ
މުނިއަވަސްގެ ޑެޕިއުޓީ އެޑިޓަރ ސާޖިދު އަކީ ވާހަކަ ލިޔުމުގެ އިތުރުން ޚަބަރު ލިޔުމުގައިވެސް ހުނަރުވެރި ލިޔުންތެރިއެކެވެ.

ގުޅުންހުރި ލިޔުން: