ރާއްޖޭގެ އެންމެ ވަރުގަދަ ޕްރޮޑަކްޝަން ހައުސް، ޑާކް ރެއިން އެންޓަޓެއިންމެންޓްގެ ކުޑަދަށުން ނެރޭ އުފެއްދުންތަކުގައި މަސައްކަތްކޮށްލަން ބޭނުންވާ އަންހެން އާޓިސްޓުންނަށް ފުރުޞަތު ހުޅުވާލައިފިއެވެ. ޑާކް ރެއިން އިން މިމަހުގެ 21 ވަނަ ދުވަހު އާއްމުކޮށްފައިވާ ކާސްޓިންގ ކޯލްގައި ބުނެފައިވަނީ އުމުރުން 18 އަހަރާއި 30 އަހަރާއި ދެމެދުގެ އަންހެން އާޓިސްޓެއް ބޭނުންވާ ކަމަށެވެ.

ޑާކް ރެއިންގެ މީޑިއާ ވައިބަރ ގްރޫޕް ‘ޑާކް ރެއިން އެންޓަޓެއިންމެންޓް އޮފިޝަލް’ގައި އާއްމުކޮށްފައިވާ ޕޯސްޓެއްގައި ބުނެފައިވަނީ އަންހެން އާޓިސްޓެއް ބޭނުންވާ ކަމަށާ އުމުރުން 18 އަހަރާއި 30 އަހަރާއި ދެމެދުގެ ފަރާތްތަކުން ޑާކްރެއިންގެ އީމެއިލް [email protected] އަށް މަޢުލޫމާތު ފޮނުވުމަށެވެ. އެގޮތުން، ގުޅޭނެ މަޢުލޫމާތާއި ފޮނުވާ ފަރާތުގެ އެންމެ ފަހުގެ ފޮޓޯއެއް ފޮނުވުމަށް އެދިފައި ވެއެވެ.

ޑާކް ރެއިން އެންޓަޓެއިންމެންޓުން މިވަގުތުވެސް ގިނަ ޕްރޮޖެކްޓްތަކެއްގެ މަސައްކަތްތައް ކުރަމުން އަންނަކަން ފާހަގަކޮށްލެވެއެވެ. އެގޮތުން ފިލްމު “ބީވީމާ”ގެ ޝޫޓިން ވ. ކެޔޮދޫގައި މިހާރު ކުރިއަށް އެބަދެއެވެ. ބައިސްކޯފުން ސްޓްރީމްކުރަން ފަށާފައިވާ އެ ޕްރޮޑަކްޝަންގެ ވެބް ސީރީޒް “ގިރިޓީ ލޯބި”ގެ އެޕިސޯޑްތަކުން ހަތަރު އެޕިސޯޑް މިހާރު ބަލައިލެވެން ހުރިކަން ފާހަގަކޮށްލެވެއެވެ. މީގެ އިތުރުން ޑާކް ރެއިންގެ ބިރުވެރި ފިލްމު “ބަޅިނދު”ގެ މަސައްކަތްތައްވެސް ފަށާފައިވެއެވެ.

ޑާކް ރެއިންގެ އެންމެ ބޮޑު ޕްރޮޖެކްޓް، ފިލްމު “ނޮވެމްބަރ”ގެ ހުރިހައި މަސައްކަތްތަކެއް ނިމި، ސްކްރީނުގައި ފިލްމު އެޅުވެނޭ މާހައުލެއް އުފެދުނުހައި އަވަހަކަށް އެ ފިލްމު އަޅުވަން ތައްޔާރަށް އޮތްކަންވެސް ފާހަގަކޮށްލެވެއެވެ. ފިލްމު “ނޮވެމްބަރ”ގެ އޮންލައިން މީޑިއާ ޕާޓްނަރަކީ މުނިއަވަސް އެވެ.

ލިޔުންތެރިޔާގެ ފުރަމަލަ

އަޙްމަދު ރަޝީދު
އަޙްމަދު ރަޝީދު
ހުރިހައި ދާއިރާއެއްގެ ލިޔުންތައްވެސް މުނިއަވަސްގެ ފައުންޑަރ އަދި ޗީފް އެޑިޓަރ ލިޔާނެއެވެ.

ގުޅުންހުރި ލިޔުން: