މި ފެށުނު ޖެނުއަރީ މަހު ދައްކަން ފަށަން ނިންމާފައިވާ ޕާކިސްތާނުގެ މަޝްހޫރު ލަވަކިޔުންތެރިޔާ އާތިފް އަސްލަމްގެ އަލަތު ޑްރާމާ ސިލްސިލާ “ސަންގީ މާހް” ގެ ފުރަތަމަ އެޕިސޯޑް، މިމަހު 7 ގައި ސިނަމާތަކުގައި ދައްކަން ނިންމައި ޓްރެއިލާ ދައްކާލައިފިއެވެ.

ޑްރާމާގެ ޕްރޮމޯތައްވެސް ދައްކަމުން އަންނަތާ ދުވަސްކޮޅެއް ވެފައިވާއިރު ތަރިންގެ ފަރާތުން މޮޅު އެކްޓިންގއެއް ފެނިގެންދެއެވެ. މި ޑްރާމާގައި އާތިފްގެ އިތުރުން ހާނިއާ އާމިރް، ސާނިއާ ސައީދު، ސާމިޔާ މުމްތާޒް، ކުބްރާ ޚާން، ނޫމާން އިޖާޒް އަދި އޭނާގެ ދޮށީ ފިރިހެން ދަރިފުޅު ޒަވިޔާރް ނޫމާން އިޖާޒް ފަދަ ތަރިން މައިގަނޑު ރޯލުތަކުން ފެނިގެންދާނެއެވެ.

“ސަންގީ މާހް” ގައި ކިޔައިދެނީ ޕާކިސްތާނުގައި އެކި ޤަބީލާތަކަށް ނިސްބަތްވާ މީހުން ދިރިއުޅޭ ސަރަހައްދުގައި އުޅޭ ޢާއިލާއެއްގެ ވާހަކައެވެ. އަދި އެބައެއްގެ ގޯސް ޤަބޫލުކުރުންތަކާއި ފިކުރިއްޔާތުގެ ސަބަބުން އަމިއްލަ ނަފްސާއި ލޯބި ޤުރުބާންކުރާ ގޮތް މި ޑްރާމާގައި ވަރަށް ފުރިހަމައަށް ދައްކުވައިދޭނެއެވެ.

މުސްތަފާ އަފްރީދީ ލިޔެ، ސައިފީ ޙަސަން ޑައިރެކްޓްކޮށް ގެނެސްދޭ މި ޑްރާމާއަކީ 2016 ގައި އޭނާ ގެނެސްދިން “ސަންގީ މަރް މަރް” ޓްރިއޯލޮޖީގެ ދެވަނަ ބައެވެ. އަދި މި ބަޔަށްފަހު “ސަންގީ ސިޔާހް” ގެ ނަމުގައި މީގެ ތިންވަނަ ބައި ގެނެސްދޭނެކަމަށް ސައިފީ ބުނެފައިވެއެވެ.

https://www.youtube.com/watch?v=69HuSxrF58I

މޫމިނާ ދުރައިދުގެ އެމްޑީ ޕްރޮޑަކްޝަންސް އިން ޕްރޮޑިއުސްކުރާ “ސަންގީ މާހް” ގެ ފުރަތަމަ އެޕިސޯޑް މިމަހު 7 ގައި ސިނަމާތަކުގައި ދައްކާލާއިރު، ޓީވީއިން ދައްކާނީ ޖެނުއަރީ މަހުގެ 9 ވަނަ ދުވަހުގެ ރޭ ހަމް ޓީވީއިން ކަމަށް ޚަބަރުތައް ބުނެއެވެ. އެގޮތުން ކޮންމެ އާދިއްތަ ދުވަހެއްގެ ރޭ ރާއްޖެ ގަޑިން 8:00 ގައި ހަމް ޓީވީއިން “ސަންގީ މާހް” ގެ އާ އެޕިސޯޑެއް ގެނެސްދޭއިރު، ހަމް ޓީވީގެ ރަސްމީ ޔޫޓިއުބް ޗެނަލް އިންވެސް މި ޑްރާމާގެ އެޕިސޯޑްތައް ބަލައިލެވޭނެއެވެ.

ލިޔުންތެރިޔާގެ ފުރަމަލަ

ސާޖިދު ޢަބްދުﷲ
ސާޖިދު ޢަބްދުﷲ
މުނިއަވަސްގެ ޑެޕިއުޓީ އެޑިޓަރ ސާޖިދު އަކީ ވާހަކަ ލިޔުމުގެ އިތުރުން ޚަބަރު ލިޔުމުގައިވެސް ހުނަރުވެރި ލިޔުންތެރިއެކެވެ.

ގުޅުންހުރި ލިޔުން: