މިއުޒިޝަންސް ޔޫނިއަން އޮފް މޯލްޑިވްސް (އެމް.ޔޫ.އެމް) އިން އެލަޔަންސް ފްރާންސެސް އާއެކު މެމޮރެންޑަމް އޮފް އަންޑަސްޓޭންޑިންއެއްގައި ސޮއެކޮށްފިއެވެ. މި އެމްއޯޔޫގެ މަގުސަދަކީ މި ދެފަރާތުން އެއްބަޔަކު އަނެއްބައެއްގެ މަންފާއާއި ލާބައަށްޓަކައި މަސައްކަތްކުރުމެވެ.

އިއްޔެ ސޮއެކުރެވުނު މި އެއްބަސްވުމުގައި އެމްޔޫއެމްގެ ފަރާތުން ސޮއެކުރީ އަޙްމަދު ޝިޔާމެވެ. އެލަޔަންސް ފްރާންސެސް ޑި މާލޭ ޑިމިޓްރީ ވާރޖްގެ ފަރާތުން ސޮއެކުރީ އެތަނުގެ ޑިރެކްޓަރ އެވެ. މި އެއްބަސްވުމަށް އަމަލުކުރަން ފަށާނީ މި ފެށުނު މާރިޗް މަހުން ފެށިގެން އެއް އަހަރުގެ މުއްދަތަށެވެ.

ސޮއެކުރެވުނު މި އެމްއޯޔޫގެ ދަށުން، މިއުޒިޝަންސް ޔޫނިއަން އޮފް މޯލްޑިވްސް އަދި އެލަޔަންސް ފްރާންސެސް އާއި ގުޅުން ހުރި މިއުޒިކީ އަދި ސަގާފީ ހަރަކާތްތަކުގައި ދެފަރާތުން މަސައްކަތްކުރާނެއެވެ. މީގެ އިތުރުން، އެލަޔަންސް ފްރާންސެސްގެ ފަރާތުން ކޯސް ހިންގާ ކޮންމެ ބުރެއްގައި އެމްޔޫއެމްގެ ދެ މެންބަރަކަށް ފަރަންސޭސިބަސް ދަސްކޮށްދިނުމުގެ ކޯސްތައް ހިންގައިދީ ސެޓްފިކެޓް ދިނުމަށް ހަމަޖެހިފައިވެ އެވެ.

ފަރަންސޭސި ބަސް ދަސްކޮށްދޭ ކުލާސްތަކުގެ ދަންފަޅިއެއް ދެން ފެށޭނީ މިމަހު 13ގައެވެ. މި ކޯހުގެ ތަޢާރަފު ދަންފަޅިއަކީ މުޅިން ހިލޭ ކުރިއަށްގެންދާ ދަންފަޅިއެކެވެ. ތަޢާރަފުކުރާ ދަންފަޅީގެ މުއްދަތަކީ ދެ މަސްދުވަހެވެ. ކުލާސް އޮންނާނީ ހަފުތާގެ ހޯމަ އަދި ބުދަ ދުވަހު އިރުއޮއްސި 06:00 އިން 07:30 އަށެވެ. އެމްޔޫއެމްގެ މެންބަރުންނަށް މި ކުލާސްތަކަށް ހާޒިރުވެ ނުވަތަ އޮންލައިންކޮށް ބައިވެރިވެވޭނެއެވެ. ހާޒިރުވެ ކުލާހުގައި ބައިވެރިވާނަމަ ކޯހަށް ބޭނުންވާ ބައެއް ފޮތްތަކުގެ އަގަށްވާ 500 ދިވެހި ރުފިޔާ ދައްކަން ޖެހެއެވެ. ނަމަވެސް އޮންލައިންކޮށް ބައިވެރިވާ ފަރާތްތަކުން ކޯހަށް ބޭނުންވާ ތަކެތި ގަތުމަކީ އިޚްތިޔާރީ ކަމެކެވެ.

އެލަޔަންސް ފްރާންސެސް މާލޭ އުފެއްދީ 2008 ގައެވެ. މިއީ ރާއްޖޭގައި ހުންނަ ފަރަންސޭސި ރަސްމީ މަރުކަޒުގެ ބައެކެވެ. މިތަނުން ފަރަންސޭސި ބަހުގެ ކޯސްތަކާއި ފަތުރުވެރިކަމާއި ވިޔާފާރިއާއި ގުޅުންހުރި ޕްރޮގްރާމުތައް ފަރަންސޭސީންނަށް އަމާޒުކޮށް ކުރިއަށްގެންދެއެވެ. މި މަރުކަޒުން ރާއްޖެއާއި ފަރަންސޭސި ސަގާފީ ހަރަކާތްތަކާއި ‘މޫވީ ނައިޓްސް’އާއި އާރޓް މައުރަޒު ފަދަ ހަރަކާތްތައްވެސް ކުރިއަށް ގެންދެއެވެ.

ލިޔުންތެރިޔާގެ ފުރަމަލަ

އަޙްމަދު ރަޝީދު
އަޙްމަދު ރަޝީދު
ހުރިހައި ދާއިރާއެއްގެ ލިޔުންތައްވެސް މުނިއަވަސްގެ ފައުންޑަރ އަދި ޗީފް އެޑިޓަރ ލިޔާނެއެވެ.

ގުޅުންހުރި ލިޔުން: