‘މޯލްޑިވިއަން އައިޑަލް ސީޒަން3 ގެ އޮޑިޝަން ޝޯ މިރޭ ދައްކާނެތަ؟ ރޭގެ ވަގުތެއްގައި ޓްވިޓަރ ތެރެއިން މި ސުވާލު ފެނުމުން މާބޮޑަކަށް އަޅައެއް ނުލަމެވެ. ނަމަވެސް މިއަދު އިރުއެރި ފަހުން ދެތިން މީހަކު މި ސުވާލުކޮށްފި އެވެ. އެހެންކަމުން މި ސުވާލަށް ޖަވާބެއް ލިބޭތޯ މުނިއަވަސް އިން ކުޑަކޮށް މަސައްކަތް ކޮށްލީމެވެ. ކުރެވުނު މަސައްކަތުން ލިބުނު ޖަވާބަށް ޖެހިލާނަމެވެ.

ފްރެންޗައިޒް އުސޫލުން ރާއްޖޭގައި ބާއްވާ ހަމައެކަނި ރިއަލިޓީ ޝޯވ “މޯލްޑިވިއަން އައިޑަލް” ސީޒަން 3 ގެ އޮޑިޝަންތަކުގެ ޝޯވތައް ފެބްރުއަރީ މަހުގެ 2 ވަނަ ދުވަހުގެ ރޭ (މިރޭ) ޓީ.ވީ.އެމުން ދައްކަން ފަށާނެ ބާއޭ މިއީ ހަމަ ގައިމުވެސް މިހާރު މި ޝޯ ގެ އިންތިޒާރުގައި ތިބި އެތައް ބައެއްގެ ހިތުގައި އުފެދިފައިވާނެ ބޮޑު ސުވާލެކެވެ.

މި ސުވާލަށް ސީދާ ޖަވާބެއް ލިބޭގޮތް ނުވިޔަސް، ޕީއެސްއެމް ނިއުސް ވެބްސައިޓެއްގައި މިރޭ ޝޯވް އޮންނާނެ ކަމަށް 17 ޖެނުއަރީ 2018 ގައި ގެނެސްދީފައިވަ ޚަބަރު ގެ އިތުރަށް އެހެން ޚަބަރެއް ފެންނާކަށް ނެތެވެ. ނަމަވެސް މީގެ 17 ގަޑިއިރު ކުރިން ޕީއެސްއެމް އިން މޯލްޑިވިއަން އައިޑަލް އަށް ތައްޔާރުކޮށްފައިވާ ‘އޮފިޝަލް ފޭސްބްކް ޕޭޖް‘ ގައި ކޮށްފައިވާ ޕޯސްޓެއްގައި ބުނެފައިވާގޮތުން މިރޭ މާލޭ އޮޑިޝަން ގެ ޝޯ އާއި އެކު އޮޑިޝަން ޝޯ ތައް ދައްކަން ފަށާނެ އެވެ.

މޯލްޑިވިއަން އައިޑަލް ‘އޮފިޝަލް ފޭސްބްކް ޕޭޖް‘ ގައި ކޮށްފައިވަ ޕޯސްޓެއްގައި ބުނީ ޖަޖުންތައް ތިބީ ތައްޔާރަށް ކަމަށާއި ހޮސްޓުންވެސް ތިބީ ތައްޔާރަށް ކަމަށެވެ. އަދި ބެލުންތެރިން ތިބީ އޮޑިޝަން ޕްރިމިއަރ ޝޯ އަށް ތައްޔާރަށްތޯ ވެސް ސުވާލުކޮށްފައި ވެއެވެ.

އެހެންކަމުން މިހައިތަނަށް އެނގިފައިވަގޮތުން މިރޭގެ ޝޯ އޮންނާނެކަމަށް ބަލަމާ ހިނގާށެވެ.

މޯލްޑިވިއަން އައިޑަލްގެ ކުރީގެ 2 ސީޒަން ކާމިޔާބުކަމާއެކު ބެލުންތެރިންނަށް ގެނެސްދީފައިވާއިރު، މިފަހަރުގެ ސީޒަނުންވެސް ބޮޑެތި ތަފާތުތަކެއް ފެނިގެންދާނެކަމަށް އައިޑަލްގެ ޕްރޮޑަކްޝަން ޓީމުން ބުނެއެވެ. އެގޮތުން ކުރީގެ ދެ ސީޒަނާއި ޚިލާފަށް މިފަހަރުގެ ސީޒަންގައި ޖަޖުންގެ ޕެނަލުން 4 ފަންނާނަކު ފެންނާނެއެވެ. ހަމައެހެންމެ ކުރީގެ ސީޒަންތަކުގައި ނުފެންނަ “ގޯލްޑަން މައިކް” މިފަހަރުގެ ސީޒަންގައި ފެނިގެންދާއިރު، އައިޑަލްގެ މިފަހަރުގެ ޝޯވތަކުންވެސް ބައިވެރިންނަށާއި، ބެލުންތެރިންނަށްވެސް ބޮޑެތި ސަޕްރައިޒްތަކެއް ފެނިގެންދާނެކަމަށް އައިޑަލްގެ ޓީމުން ބުނެއެވެ.

ޖަޖުންނަނީ އައިޑޮލްގެ ފުރަތަމަ ދެ ސީޒަންގައިވެސް ޖަޖުކަން ކުރި މަރިޔަމް އުނޫޝާ، ފުރަތަމަ ސީޒަންގައި ޖަޖިން ޕެނަލުން ފެނުނު އަހްމަދު އިބްރާހިމް (އައްމަޑޭ)، މިދިޔަ ސީޒަންގައި ޖަޖުކަން ކުރި އިސްމާއިލް އައްފާން އާއި އަލަށް ޖަޖިން ޕެނަލަށް އިތުރުކުރި ޒާރާ މުޖުތަބާ އެވެ.

ޕްރެޒެންޓަރުންނަކީ މިދިޔަ ދެ ސީޒަންގައި ވެސް އައިޑޮލް ޕްރެޒެންޓް ކޮށްފައިވާ މޫސާ ވަސީމް ގެ އިތުރުން ޝައިނާ ޝަރީފް އެވެ. ޝައިނާ އަކީ އާރްޖޭ އެއްގެ ގޮތުގައި ގިނަ ބައެއްގެ މަގުބޫލުކަން ހޯދާފައިވާ ޕްރެޒެންޓަރެކެވެ.

ސީޒަން 3 ގެ މާލޭ އޮޑިޝަން ބާއްވާފައިވަނީ ރަސްރަނި ބަގީޗާގަ އެވެ.

ލިޔުންތެރިޔާގެ ފުރަމަލަ

މަރިޔަމް ދީމާ
ތަފާތު މަޢުޟޫތަކަށް ދީމާ ލިޔާނެއެވެ. އެންްމެ ޝައުޤުވެރިވަނީ ފިލްމީ ދާއިރާ އަށެވެ.

ގުޅުންހުރި ލިޔުން: