މީގެ ދެ ހަފުތާއެއް ކުރިން، މުނިއަވަސް މެންބަރަކު، އަހަރުމެންގެ ވައިބަރގްރޫޕަށް ކަރުދާސްކޮޅެއްގެ ފޮޓޯއެއް ހިއްސާކުރި އެވެ. ކަރުދާސްކޮޅުގައި މެސެޖެެއް ލިޔެލާފައި އޮތީ ހިތްގައިމު އަތުލިޔުމަކުންނެވެ. އާދައިގެ ފޮންޓާއި ތަފާތު ފޮންޓަކުންނެވެ. އެއީ ތަފާތު އައިޑިއާތަކެކެވެ. އުފެއްދުންތެރި ހުށައެޅުންތަކެކެވެ. ސްޓައިލްވެސް ތަފާތެވެ. ބޭނުންކުރަނީ އަސްލު ކަރުދާސްކޮޅުތަކެކެވެ. ލިޔަނީ އަތުލިޔުމުންނެވެ. ލިޔުންތައް އާއްމުންނާ ހަމައަށް ފޯރުކޮށްދެނީ ޒަމާނީ މީސްމީޑިއާ މަންސަތަކުގައެވެ. މިއީ އަހޫގެ ކަރުދާސްކޮޅުތަކުގެ ވާހަކައެވެ.

އަހޫގެ މަސައްކަތްތައް ތަންކޮޅެއް ރަނގަޅަށް ބަލައިލަން މަޖޫބުކުރުވީ އެ މަސައްކަތުގެ ހިތްގައިމުކަމާއި ތަފާތުކަން ފެނިގެންނެވެ. މުޖުތަމަޢަަށް ބޭނުންވާ ނަސޭހަތުގެ ބަސްކޮޅުތަކެއް ލިޔެ ގެނެސްދެމުން އަންނަަނީ ކާކުތޯ ބަލައިލީމެވެ. އަހޫ އަކީ އާންޓިއެކެވެ. ލިޔުންތެރިއެކެވެ. ކެލިގްރަފީ ލިޔެއެވެ. މިކަންކަން ކުރަނީ މަޝްހޫރުވާކަށް ނޫނެވެ. އާޚިރަތުގެ ދަރުމައަށް ހިތްނިޔަަތްގަނެެގެންނެވެ.

އަހޫ …… ފުރިހަމަ ނަން އަދި ރަށް؟

އައިޝަތު އަހުނާ، ނ.ވެލިދޫ

އަސްލު ތީ ކިހިނެއް، ކޮން އިރަކު އަދި ކީއްވެ، ކީއްކުރަން ފެށި ކަމެއް؟

ކުރިން އިންސްޓަރގްރާމްއަށް ލީ ހަމަ އާންމުކޮށް މީހުން ފޮޓޯ ލާ އުސޫލުން އަޅުގަނޑުގެ ލޮލުގައި އަޅައިގަންނަ ރީތި އެއްޗެއް ނޫނީ މަންޒަރެއް ފެނުމުން ފޮޓޯއެއް ނަގާލާފަ. އަބަދުވެސް ހިތަށް އަރާ ތަފާތު ގޮތަކަށް ފޮޓޯ ލާން ކިހިނެއް ބާއޭ ހަދާނީ؟ ދެން ވަރަށް ކުރީއްސުރެވެސް ފެނޭ އިގިރޭސި ބަހުން ލިޔެފަ ހުންނަ މޯޓިވޭޓިވްވާ ކަހަލަ ކުދިކުދި ބުނުންތައް. އެކަމު ގިނައިން ފެންނަނީ ޕްރިންޓް ކޮށްފަ ހުންނަ ގަނޑުކޮޅުކޮޅު. ބައެއް އަތު ލިޔުންވެސް ދެކެން. އެތަނުން އެ އިނީ ބޮލަށް ވަދެފަ. އެހެން ހުއްޓާ 1441 ވަނަ އަހަރުގެ އަޟްހާ އީދު ދުވަހު ހިތަށްއެރީ އޭގެ ގަނޑުކޮޅެއް ލިޔެލަން. އެދުވަހު ފުރަތަމަ ގަނޑުކޮޅު ލިޔުނީ. ދެން އަޅުގަނޑަކީ އަބަދުވެސް އަތުލިޔުން ލިޔާ ހިތްވާ މީހަކަށްވެފަ އެގަނޑުކޮޅު ލިޔެލާފަ ޕޯސްޓްކޮށްލާފަ ހިތަށް އެރީ މިހެން މުޅި ފީޑް ބަދަލުކޮށްލަންވީއޭ. އޭރުން އަތުލިޔުންވެސް ނުހުއްޓި إن شاء الله ގެންދެވޭނޭ. ދެން ތާނަ ލިޔާ ‘ސިންގަލް ރޫލްޑް’ މޮނިޓަރ ފޮތަކާއި އާޓްލައިން ގަލަމެއް އެކަމަށް ޚާއްސަ ކުރީ. އެދުވަހުއްސުރެ މިއަދާ ހިސާބަށްވެސް މިލިޔަނީ ހަމަ އެފޮތުގައި، އެ ގަލަމުން الحمد لله. އެއީ ފެށުން.

އަހޫގެ އިންސްޓަގްރާމް ފެށި ދުވަސްކޮޅުގެ ފޮޓޯއެއް – ފޮޓޯ: އަހޫ

ކިހިނެއް “ކަރުދާސްކޮޅު” އެ ނަން އިޚްތިޔާރުކުރީ؟

ހަމަ ކަރުދާސްކޮޅެއްގައި ކަޅު ގަލަމުން ލިޔެލާފަ އަތުގައި އޮތްފޯނުން ފޮޓޯއެއް ނަގާލާފަ ޕޯސްޓްކޮށްލަނީ އިންސްޓަރގްރާމްގައި އަމިއްލަ އެކައުންޓަށް. ދެން ފޭސްބުކްގަ ޕޭޖެއް ނަހަދާނަންތޯ ވަރަށް މީހުން އަހާ. ޝެއަރ ކޮށްލަން ބޭނުންވާ ކަމަށް ބުނެ. އެހެންވީމަ އެ ކަރުދާސްކޮޅުތައް އެކަނި ލާން ޕޭޖެއް ހަދާއިރު ވަކި އިތުރު ކޮންނަމެއް ލިޔާނީ؟ އެހެންވެ ކަވަރ ފޮޓޯގައި އެހެން ޖެހީ. އަސްލަކީ ޕޭޖްގެ ނަމަކީ ހަމަ އިންސްޓަރގަވެސް އޭނދަ ނަން. ______ahu

އަހޫ ފުރަތަމަ ލިޔުނު ކަރުދާސްކޮޅު – ފޮޓޯ: އަހޫ

ކަރުދާހުގައި ލިޔެފަ އެއީ އަތުލިޔުމުންތޯ؟

4. ލައްބަ. ހަމަ އަޅުގަނޑުގެ އަތުލިޔުން އެއީ.

ކިހާވަރެއްގެ ސަޕޯޓެއް ލިބޭ؟

ފެށުނީއްސުރެ ކުރާ ހަމަ ކޮންމެކަމެއްގައިވެސް، އެއީ އާޓިކަލް ލިޔާއިރުވެސް، ކެލިގްރަފީގައިވެސް އަދި މި ގަނޑުކޮޅުތައް ލިޔުމުގައިވެސް الحمد لله އަޅުގަނޑުގެ ކުޑަކުޑަ އާއިލާ (މަންމަ، ބައްޕަ އަދި ކޮއްކޮ)ގެ ސަޕޯޓް ލިބޭ. އޭގެ އިތުރުން ފިރިމީހާގެ ސަޕޯޓްވެސް ވަރަށް ވަރަށް ލިބޭ. ގާތް ރަޙްމަތްތެރިންވެސް. اللهم بارك.

ކިހިނެއް ލިޔާ އިބާރާތްތައް އެކުލަވާލަނީ؟ އައިޑިއާ ނަގަނީ ކިހިނެއް؟

ގަނޑުކޮޅު ލިޔަނީ އާންމުކޮށް ހަފްތާއަކު އެއްދުވަހު. ގަނޑުކޮޅު ލިޔުމުގެ ކުރިންވެސް އަޅުގަނޑު ފޭސްބުކްގަ ކުދި ކުދި ނަސޭޙަތުގެ ބަސްކޮޅު، އަދި އާޓިކަލްވެސް ލިޔަން. ދެން ގަނޑުކޮޅު ލިޔަން ފެށީމަ އެ ޕޯސްޓްތައްވެސް ލިޔެލީ ގަނޑުކޮޅުކޮޅުގަ. ދެން އެ އާޓިކަލްތަކުން މުހިންމު ތަންތަންކޮޅުވެސް. އޭގެ އިތުރުން އާންމު ދިރިއުޅުމުގައިވެސް ދިމާވާ ކަމަކުން، ފެންނަ މަންޒަރަކުން އެ އަންނަ ‘ތޯޓްސް’ ހަނދާން ހުއްޓާ ލިޔެލަން އަވަހަށް ފޯނުގެ ނޯޓްސްގަ. ފިރިމީހާއާއި އާއިލާއިންވެސް ދޭނެ އައިޑިއާ. މިހެން ލިޔެލަން ވީނުންހޭ ކިޔާފަ. ދެން ބައެއް ފޮލޯވާސްވެސް ހުރޭ ބައެއް ބަސްބަސް ފޮނުވާފަ ލިޔެދޭން ބުނެފަ. އެހެން ޕޭޖްތަކުގެ ޕޯސްޓްވެސް. އެގޮތަށް އެހެން ޕޭޖެއްގެ ޕޯސްޓެއް ފޮނުވާފަ އިނިއްޔާ އަޅުގަނޑު ލިޔާއިރު އިބާރާތް ބަދަލުކޮށްލާފަ ލިޔެލެވޭތޯ ބަލަން. ދެން މިބުނާހެން ލިޔެލަން އިށީންނަ ދުވަހު ލިޔެލާ އެ ގަނޑުކޮޅުތައް ހުންނާނީ ފޯނާއި ކަވަރ އާ ދޭތެރެއަށް ލާފަ. ދެން ތަނަކަށް ނިކުމެލާ ދުވަހެއްގަ ފޮޓޯ ނަގަނީ. ދެން އެކިދުވަސް މަތިން ޕޯސްޓް ކޮށްލަނީ.

ކޮން ބައެއްގެ އެހީތެރިކަން ލިބެނީ؟

ކުރިންވެސް ބުނިހެން އަޅުގަނޑުގެ އާއިލާ. އާއިލާއިންވެސް ކޮއްކޮ. އެއީ ގިނަ ފޮޓޯ ނަގާދީފަ ހުންނާނީ ކޮއްކޮ. އޭގެ އިތުރުން ވަކިން ޚާއްސަކޮށް އަޅުގަނޑުގެ ލޯބިވާ ފިރިމީހާ އެހީތެރިކަން ފާހަގަކޮށްލަން. الحمد لله. އެއީ ގަނޑުކޮޅުގައި ލިޔާނެ އިބާރާތްކޮޅުކޮޅުން ފެށިގެން އެ ގަނޑުކޮޅު ފޮޓޯ ނަގާނެ ގޮތަކަށްވެސް އޭނަ އައިޑިއާ ދޭނެ. ނުވިތާކަށް އޭނަގެ ފޯނުން ފޮޓޯ ނަގާވެސް ދޭނެ. اللهم برك له

ފާހަގަކޮށްލަން ބޭނުންވާ އިތުރުކަމެއް އެބައޮތްތޯ؟

ނިންމާލަމުން ބުނެލަން ބޭނުމީ އަޅުގަނޑުގެ އިންސްޓަރގްރާމްގައި ތިބި ގާތްގަނޑަކަށް 5k ފޮލޯވާސް އާ، ފޭސްބުކް ޕޭޖްގައި ތިބި 5.7k ފޯލޯވާރސްއަށް ހިތުގެ އެންމެ ފުންމިނުން جزاكم الله خيرا !
ހަމަ ކޮންމެ ކަމެއްގައިވެސް އޮންނާނެ ދެއްތޯ ދެކޮޅު. ޕޮސިޓިވްސް އެންޑް ނެގެޓިވްސް. އެގޮތަށް މިކަމުގައިވެސް ލިޔުންކޮޅުތަކަށް ތަޢުރީފުކުރާ މީހުންނާއި ރަނގަޅުކޮށްލަން ޖެހޭ ކަންކަން ރީތިގޮތުގައި ބުނެދޭ މީހުން އުޅޭ. ހަމަ އޭގެ އަނެއްކޮޅުވެސް އޮވޭ. ބައެއް މީހުން މެސެޖް ކޮށްފަ ހުރޭ ‘މީހުން ކިޔަން އެނގޭގޮތަކަށް ލިޔަަން ނޭގެންޏާ ނުލިޔެބަލާށޭ.’ ‘ތިގޮތަށް ގަނޑުކޮޅުގަ ކުރަހައިގަނެފަ އަހަރުމެން ދަރިންވެސް ހުރެއޭ.’ ‘މަޝްހޫރުވާން ވެސް ތިނޫން ކަމެއް ނޭނގޭހޭ..’ ކަހަލަ އެއްޗިހި ކިޔާފަ.

ފުރަތަމަ މި ކަމަކީ މީ އަޅުގަނޑު މަޝްހޫރު ވާން ކުރާ ކަމެއް ނޫން. އަދި ކިއެއް، ދުވަހަކުވެސް މި ދުނިޔޭގައި މަޝްހޫރުކަމެއް ނޭދެން. މަޝްހޫރުވާން ކީއްކުރަންތޯ؟އެއްވެސް އިރެއްގައި ސޯޝަލް މީޑިޔާއަށް އަޅުގަނޑުގެ ފޮޓޯ ނުލާތީ އާ އަދި އެއްކޮށް ޙިޖާބްވެފަ ހުންނާތީ ބޭރަށް ނިކުމެ އުޅުނަސް ޕަބްލިކަކަށް އަޅުގަނޑެއް ނުއެއް އެނގޭ الحمد لله. އެކަމު ގަނޑުކޮޅެއް ނަގަން ދިއްކޮށްލާ ތަނުން ބައެއް މީހުން އަހާ ‘ތީ ދޯ އޭ ގަނޑުކޮޅު ލިޔާ ކުއްޖާ’. އެގޮތަށް އަޅުގަނޑު ފާހަގަވިޔަސް ވާނީ. އެހެންވީމަ ޕޯސްޓްތައް ލައިކް ނުވަންޏާ ‘ޖަސްޓް އަންފޮލޯމީ’. އެ ނިމުނީ ނުންތޯ؟

އަސްލަކީ މިއީ މާދަމާ އަޅުގަނޑު ލޯމަރާލިޔަސް ފެންނަން ހުންނާނެ އެއްޗެއް. ސޯޝަލް މީޑިޔާގައި އަޅުގަނޑު ލިޔާ ކޮންމެ އެއްޗެއް. އެއީ އާރޓިކަލްއެއް ކަމުގައިވިޔަސް، އިންސްޓަރ ސްޓޯރީއެއް ވިޔަސް، ގަނޑުކޮޅެއް ކަމުގައިވިޔަސް ލިޔާއިރު އަޅުގަނޑު ވިސްނަން އެ ލިޔުމަކުން އާޚިރަތުގައި އަޒާބު ލިބިގެން ނުދާނެ، މާދަމާ ލޯމަރާލިޔަސް އެ ދައުރުވަމުން ދިޔަޔަސް އެއަކުން އަޅުގަނޑަށް ފައިދާއެއް ވާނެ އެއްޗަކަށްވޭތޯ. މިސާލަކަށް ކިހިނެއް އަޅުގަނޑަށް އެނގޭނީ އަޅުގަނޑަށް ލިޔެވިފަ އިން ބަހެއް ނުވަތަ އާޓިކަލް އަކީ މީހަކަށް ﷲ ތަޢާލާގެ ޙިދާޔަތު ދެއްކެވުމުގެ މެދުވެރިއަކަށް ނުވާކަމެއް؟ އަދި ކުރިއަށް އޮތްތާ ނުވާނެކަމެއްވެސް؟

އެހެންވީމަ ބުނެލަން ބޭނުމީ އަޅުގަނޑު މިއަދު ލޯމަރާލިޔަސް މި ލިޔުންތައް ޝެއަރ ކުރުން ހުއްޓާ ނުލައްޗޭ! ފަސްދަށުގައި އޮތަސް އޭގެން ފައިދާއެއް ލިބުމަށް إن شاء الله އުންމީދު ކުރެވެއޭ! އަޅުގަނޑު ނެތިދިޔަޔަސް އަޅުގަނޑު ދިން ނަސޭޙަތްތަކާއި ވަކި ނުވައްޗޭ!”🥀

 

View this post on Instagram

 

A post shared by ހިމޭން 🎀 (@himeynmv)

ލިޔުންތެރިޔާގެ ފުރަމަލަ

އަޙްމަދު ރަޝީދު
އަޙްމަދު ރަޝީދު
ހުރިހައި ދާއިރާއެއްގެ ލިޔުންތައްވެސް މުނިއަވަސްގެ ފައުންޑަރ އަދި ޗީފް އެޑިޓަރ ލިޔާނެއެވެ.

ގުޅުންހުރި ލިޔުން: