އެޑިޓަރުގެ ބަސް:
މުނިއަވަސްގެ ވާހަކަ ލިޔުންތެރިޔާ މުޙައްމަދު މުނީރު (ނީރު)ގެ ކުރު ވާހަކަ ސީރީޒް ‘އެ ވާހަކަ’އިގެ ދަށުން މި ރަމަޟާން މަހު ކޮންމެ ދުވަހަކު ކުރު ވާހަކައެއް ގެނެސްދިނުމަށް ނީރު ހުރީ އަތުކުރި އޮޅާލައިގެންނެވެ. އުއްމީދަކީ، މުނިއަވަސްގެ ކިޔުންތެރިންނަށް މި ވާހަކަ ސީރީޒުން މުނިއަވަސްފިލުވައިލުމުމުގެ ފުރުޞަތުލިބިގެން ދިޔުމެވެ.

ފުލުހުންގެ މަސައްކަތްތަކަށް ނުވަތަ ފުލުހުންނަށް ތަޢުރީފު ކުރާކަށް އަހަރެން ބޭނުމެއް ނޫނެވެ. އެމީހުންގެ މަސައްކަތް އަހަރެން ބަލައެއް ނުގަންނަމެވެ. ބަލައިގަނެވޭކަށް ނުވެސް ނެތެވެ. ޢަމަލާއި ބަސް ދިމައެއް ނުވެއެވެ. ކުއްވެރިއެއް ނުހޯދެއެވެ. ކުށެއް ސާބިތުވާ ކަމަކަށް ނުވެއެވެ. މިއަދު ހައްޔަރު ކުރިއްޔާ މާދަމާ ދޫކޮށްލާނެއެވެ. އެކިމީހުނަށް ހަދަނީ އެކިގޮތެވެ. އިންސާފެއް ހަމައެއް ލަމައެއް ނޯވެއެވެ.

ސަބީނާ އާއި ރޫބީ ބައްދަލުވީ މާލެ ގޮސްފައި ރަށަށް އައި ދަތުރު ދޯނިމަތިންނެވެ. މީގެ ކުރިން ދުވަހަކު ވެސް ރޫބީ އެރަށަށް އައިސްފައެއް ނުވެއެވެ. އޭނާ ބޭނުން ވަނީ ދުވަސްކޮޅަކު އެރަށުގައި މަޑުކޮށްލާށެވެ. ދަންނަ އެއްވެސް މީހަކު އެރަށުގައި ނޫޅޭތީ އެހީތެރިއެއް ބޭނުން ވެއެވެ. ހުންނާނެ ތަނަކާއި ކެއިން ބުއިމުގެ ކަންތައް ހަމަޖައްސާނެ ގޮތެއް ހޯދަން ޖެހެއެވެ. ކޮންމެ ކަމަކަށް ޚަރަދުކުރާނެ ފައިސާ އޭނާގެ އަތުގައި ހުއްޓެވެ.

ސަބީނާ އާއި ރޫބީގެ މެދުގައި ރަހުމަތްތެރިކަން އުފެދޭން ހޭދަވީ މަދު ވަގުތުކޮޅެކެވެ. އެދެމެދުގައި އެތައް ވާހަކައެއް ދެކެވުނެވެ. އެތައް މަޝްވަރާއެއް ކުރެވުނެވެ. ރޫބީ ބޭނުންވި އެހީތެރިކަން ފޯރުކޮށް ދިނުމަށް ސަބީނާ އެއްބަސްވި އެވެ.

އަހަރުމެނާއި ރޫބީ ދިމާވީ ސަބީނާގެ ފަރާތުންނެވެ. ސަބީނާއަކީ އަހަރުމެންގެ ގާތް ރައްޓެއްސެކެވެ. އަބަދުހެން އެކުގައި އުޅޭ ދުވަސްވީ އެކުވެރިއެކެވެ. ގުރޫޕްގެ ޚާއްސަ ބައިވެރިއެކެވެ.

ޒަމާނީ ފެޝަނަށް ލޯބިކުރާ ރޫބީއަކީ ރީތި ޒުވާނެކެވެ. އަންހެންވަންތަ ރީތި ފުރިހަމަ ހަށިގަނޑެއް އޭނާއަށް ލިބިފައި ވެއެވެ. ބޭނުންކުރާ ޒަމާނީ ހެދުންތަކާއި ރީތިވުމަށް ބޭނުންކުރާ ސާމާނުގެ ސަބަބުން އޭނާގެ ރީތިކަމާއި ފުރިހަމަކަން އިތުރުވެފައި ވެއެވެ.

އަހަރެންނާއިމެދު ރޫބީ ޚާއްސަގޮތެއް ބަހައްޓާކަން އަހަރެންގެ އިތުރުން ގުރޫޕްގެ މީހުނަށް ފާހަގަވިއެވެ. އެމީހުން އެ ވާހަކަ ދައްކަން ފެށިއެވެ. އެއީ އަންހެންވަންތަކަމުން ފުރިގެންވީ ރީތި ހަށިގަނޑެކެވެ. ތާޒާކަމާއި އާރޯކަން އެބަހުއްޓެވެ. މަށަށް މަށަށް ގޮވާލަ ގޮވާލަ ތިބި މީހުންތައް ބައިވަރެވެ. މިކަހަލަ ފުރުސަތެއް ލިބޭނީ މަދު ފަހަރަކު އެވެ. ވަގުތުގެ ބޭނުން ހިފާށެވެ. މާދާމާ ވެސް ފުރުސަތު ގެއްލިދާނެއެވެ.

ފުރަތަމަ ފެނިލުމާއިއެކު ވެސް އަހަރެންގެ ހިތުގައި ރޫބީއާމެދު ޝަޢުޤުވެރިކަން އުފެދުނެވެ. ގަޔާވިއެވެ. އެރީތިކަމާއި ފުރިހަމަކަން ހިތުގެ ހިނގުމާއި ކުޅެލިއެވެ. ބީހިލާ ހިތް ވިއެވެ. މަލުގެ ފޮނިކޮޅު ބޯލަން ބޭނުންވިއެވެ. އަހަރެން އެވާހަކަ ނުދެއްކީ އެވެ. ވެދާނެގޮތަކާއިމެދު ވިސްނާލާފައި ފަސްޖެހެވުނީ އެވެ. މަސްލަހަތު އިސްކުރެވުނީއެވެ. މާބޮޑަށް ސަބީނާއަށް ވެސް ބެލުނީއެވެ.

އަހަރެމެންގެ ރޭވުމުގެ ބޮޑުބައި ވަރަށް ކާމިޔާބެވެ. ކޮންމެ ރެއަކު ކަހަލަ ގޮތަކަށް ރެސްޓޯރެންޓަށް ގޮސް އޭނާގެ ޚަރަދުގައި ކަމެވެ. ސިނގިރޭޓް ގަންނަމެވެ. ކޮޓަރީގައި ތިބޭއިރު ފޫހި ފިލުވާލުމަށް ކާލާނެ ބައެއް ކަހަލަ ލުއިކާނާ ވެސް ގަންނަމެވެ. އަހަރުމެން ބޭނުން ވަރަކަށް އޭނާ ދެއެވެ. ޚަރަދާއިމެދު އެއްވެސް ވަރަކަށް ނުވިސްނައެވެ. ފެންނަނީ ހިތްހެޔޮކަމާއި ގާތްކަމެވެ. ކަންބޮޑު ވުމަކީ އޭނާ ދަންނަކަމެއް ހެނެއް ވެސް ހިޔެއް ނުވެއެވެ.
─━━━━━━⊱✿⊰━━━━━━─
އަހަރުމެންގެ ރަސްމީ ވިޔަފާރީގެ މައިމުގޫ ކަމުގައިވި ހަރުސަރު ރަށަށް އައީ ފަސްވަރަކަށް ދުވަސް ފަހުންނެވެ. ރޫބީ ފެނުމާއިއެކު އޭނާގެ ކަޅި ހުއްޓުނެވެ. އެސްފިޔަ ޖަހާލަން ވެސް ހަނދާން ނެތުނު ކަހަލައެވެ. ފެންބޮވައިގެންފައިވާ މީހަކަށް ފެންފޮދެއް ފެނުނު ކަހަލައެވެ.

ހަރުސަދުގެ އެ ޢަމަލާއިމެދު ހިތްހަމަ ނުޖެހުނު ނަމަވެސް އަހަރެން ކެތްތެރިވީމެވެ. އަހަރެންގެ ސަބަބުން ވިޔަފާރިއަށް ހުރަސްއެޅޭ ފަދަ އެއްވެސް ކަމެއް ވާކަށް އަހަރެން ބޭނުމެއް ނޫނެވެ. މި ވިޔަފާރިއާ ނުލައި އަހަރެންނަކަށް ނޫޅެވޭނެއެވެ. ކެތްތެރިކަމާއި ވިސްނުން އިސްކުރުމަކީ އެންމެ ބުއްދިވެރި ގޮތެވެ.

އަހަރުމެންގެ ރަސްމީ ވިޔަފާރީގެ ތެރެއަށް ރޫބީ ވެއްދީ ހަރުސަދެވެ. އެކަމާއި ގުޅުންހުރި ހުރިހާ މަޢުލޫމާތެއް އޭނާއަށް ދިނެވެ. އޭނާއާމެދު އަހަރުމެނަށް ސަތޭކަ އިންސައްތަ ޔަގީންކަން އޮތެވެ. އޭނާގެ ސަބަބުން ވިޔަފާރިއަށް ގެއްލުމެއް ނުވާނެއެވެ. ކުރަންޏާ ކުރާނީ ފައިދާއެވެ. އެކަމާއި ރޫބީ އުފާކުރިއެވެ. ނުހަނު ގަޔާވިއެވެ. އޭނާގެ ފަރާތުން ވެދެވޭން އޮތް ކޮންމެ އެހީއެއް ވެދޭނެ ކަމުގެ ޔަގީންކަން ދިނެވެ.

ލަދަކާއިހުރެ ތަދެއް ނުފިލާނެއެވެ. ގެއްލިއްޖެ ވަގުތެއް އަނބުރާ ނުލިބޭނެއެވެ. ހަރުސަދަކީ އަންހެނުންނަށް ވަރަށް ފޯރި ހުންނަ މީހެކެވެ. ވަގުތުގެ ބޭނުން ހިފުމަށް އޭނާ އަވަސްވެގަތެވެ.

ހަރުސަދުގެ ރޭވުން ކިތަންމެހާ ވެސް ކާމިޔާބެވެ. އޭނާގެ އަވާގައި ރޫބީ ޖައްސަން މާގިނަ ވަގުތެއް ނުނެގިއެވެ. އިންތިޒާރުގައި ހުރި ކަހަލައެވެ. އެންކޮޅު އެއްލުމާއިއެކު ހިފިއެވެ.
─━━━━━━⊱✿⊰━━━━━━─
ހަރުސަދާއި ރޫބީއަކީ ދެ ލޯބިވެރިންނެވެ. ހަރުސަދާއިއެކު ވަގުތުތައް ހޭދަކުރަމުންދިޔަ ރޫބީގެ ކިބައިން ފެންނަމުން ދިޔައީ އުފަލާއި ހިތްހަމަ ޖެހުމެވެ. އެފަދަ ލޯތްބަކަށް އޭނާ އެދިއެދި ހުރި ވަރެވެ.

އެކުގައި ކިތަންމެ ވަގުތެއް ހޭދަކުރި ނަމަވެސް ބޭނުންވާ ކަންތައް ނުވާކަމަށް ހަރުސަދު ބުނުމުން އަހަރުމެނަށް ލިބުނީ ހައިރާންކަމެވެ. އެވާހަކަތައް ގަބޫލުކުރާކަށް ފަސޭހައެއް ނުވިއެވެ. ހަރުސަދު ދޮގުހަދައި އޮޅުވާލަނީއެވެ. ނޫނީ ރޫބީ ހިމާޔަތް ކުރަން ކޮންމެވެސް މޮޅު ވާހަކައެއް ދައްކަނީއެވެ.

ދިހަވަރަކަށް ދުވަސް އަހަރުމެނާއިއެކުގައި ހޭދަކުރުމަށްފަހު ރޫބީ ފުރައިގެން ދިޔައެވެ. ވަރަށް އަވަހަށް އަންނާނެ ކަމަށާއި ރަނގަޅު ހަދިޔާއެއް ގެނެސްދޭނެ ކަމަށް ބުންޏެވެ. މާލޭގައި ހުރިއިރު ވެސް ރޫބީ އާއި އަހަރުމެނާއި އޮތް ގުޅުން ބަރާބަރަށް ކުރިޔަށް ދިޔައެވެ. އެ ގާތްކަން އަބަދު ވެސް އޮންނާނެކަމަށް އޭނާ ބުނި ބުނުން އެގޮތުގައި ކުރިޔަށް ދިޔައެވެ.

ރޫބީ ދެވަނަ ފަހަރަށް އެރަށަށް އައީ ދަންވަރު މާލެއިން ފުރި ދޯންޏަކުންނެވެ. ރަށަށް އާދެވުނުއިރު ފަތިސްވުމާއި ގާތްވެއްޖެ އެވެ. އޭނާ ބޭނުންވި ފަދައިން ނިދާލާ އަރާމުކޮށްލުމަށް އަހަރުމެން އޭނާއަށް ވަގުތު ދިނީމެވެ. އެދުވަސް އެއްކޮށް ކަހަލަ ގޮތަކަށް އޭނާ ހޭދަކުރީ ކޮޓަރީގައެވެ.
─━━━━━━⊱✿⊰━━━━━━─
ރޭގަނޑު ދިހައެއް ޖަހާކަން ހާއިރެވެ.

ހަދިޔާ ހިފައިގެން ރޫބީ އައީ އަހަރުމެންގެ ރަސްމީ ޖަގަހަ އަށެވެ. އެއީ ހަރުސަދުގެ ކޮޓަރިއެވެ. ހަރުސަދުގެ ކޮޓަރިއަކީ އަހަރުމެންގެ ވިޔަފާރީގެ މައި މަރުކަޒު ވެސް މެއެވެ. އަނެއްކާ ވެސް ބައްދަލުވުމުން އެންމެން ވެސް ތިބީ ވަރަށް ހިތްހަމަ ޖެހިފައެވެ.

އަތްދަބަސް ހުޅުވާލަމުން ރޫބީ ނެގި ކޮތަޅު މޭޒުމަތީގައި ބަހައްޓާލިއެވެ. ކޮތަޅު ހުޅުވީ ހަރުސަދެވެ. ކޮތަޅުން ނެގި ތަކެތި ފެނުމާއިއެކު އެންމެންގެ މޫނުމަތި އުޖާލާވެ އަލިވެގެން ދިޔައެވެ. ޝުކުރުން ފުރިގެންވީ ބެލުމަކުން ރޫބީއަށް ބަލައިނުލާ އެކަކު ވެސް ނެތެވެ. އެންމެން ވެސް ރޫބީއަށް ޝުކުރު އަދާކުރިއެވެ. ލޯތްބާއި އޯގާތެރިކަމާއިއެކު ރޫބީގެ ބުރަކަށީގައި ފިރުމާލަމުން ނިތްކުރީގައި ހަރުސަދު ބޮސް ދިނެވެ. ރޫބީގެ ހިތް އުފަލުން ފުރުނެވެ.

ވިޔަފާރީގެ ކަންތައް ކުރިޔަށް ގެންދާނެ ގޮތަކާއިމެދު މަޝްވަރާ ކުރަން ފެށުނެވެ. ރޫބީ ބޭނުންވަނީ އެކަމަށް އޭނާ ކުރި ޚަރަދު އެކަންޏެވެ. ފައިދާއަށް އެންމެ ރުފިޔާއެއް ވެސް އޭނާ ބޭނުމެއް ނުވެއެވެ. ފައިދާއިން އަހަރުމެން ބޭނުން ކޮންމެ ކަމެއް ކުރިޔަސް އޭނާގެ ޝަކުވާއެއް ނެތެވެ. ބޭނުންވަނީ އެންމެ ގުޅިގެން އެކުގައި ކުރިޔަށް ދިއުމެވެ.

ކޮޓަރީގެ ދޮރުފަތަށް އެރި ކުއްލި ލޮޅުމާއިއެކު އެންމެން ދިޔައީ ސިއްސައިގެންނެވެ. ހައިރާންކަމާއިއެކު ސުވާލުތަކުން ފުރިފައިވާ ފަދައަކުން އެކަކު އަނެކަކަށް ބަލާލެވުނެވެ. ކަމެއް ކުރާކަށް އެންމެ ސިކުންތެއް ވެސް ނުލިބުނެވެ.

ކޮޓަރިތެރެއަށް ފުލުހުންވަނީ ތަޅު ހަލާކު ކޮށްލައިގެންނެވެ. އެކިމީހުން އެކި ދިމާއަށް ދުއްވައިގަތެވެ. ފިލޭނެ ގޮތެއް ނެތަސް ފިލަން ބޭނުންވިއެވެ. ހަދާނެގޮތް ހުސްވެ ހަތަރު އުދަރެސް ފެނުޖެހިފައިވާ ފަދައަކުން ރޯލަރޯލާ ރޫބީ އިނެވެ. އޭނާގެ އެއްވެސް މީހަކު އެތަނުގައި ނެތެވެ. އެހީތެރިކަމެއް ހިމާޔަތެއް އެދިގެން އަތްދިއްކޮށްލެވޭނީ ވެސް ދަންނަ މީހަކު ހުރި ނަމަތާއެވެ.

ފުލުހުން ދައްކާލި ކޯޓުއަމުރާއިއެކު އެންމެން ހައްޔަރުކުރިއެވެ. ރަށުގައި ހުރި ފުލުހުންގެ މަރުކަޒަށް ގެންދިޔައެވެ. ކޮޓަރީގައި ހުރި އެކަމާއި ގުޅުންހުރި ހުރިހާ އެއްޗެއް ވެސް ގެންދިޔައެވެ.

މަސްތުވާތަކެތި ބޭނުންކޮށް އޭގެ ވިޔަފާރިކުރަމުންދިޔަ މައިގޭންގު އަތުލައިގަތް ވާހަކަ ރަށުތެރެއަށް ފެތުރުނީ ކުއްލި އަކަށެވެ. އެއްބަޔަކު އެކަމާއި އުފާކޮށް ހިތްހަމަ ޖެހުން ފާޅުކުރިއެވެ. އެކަމާއި ކަންބޮޑުވި މީހުންނާއި އެއީ ދެދުވަހެއްގެ ކަމެއްކަމަށް ބުނި މީހުން ވެސް މަދެއް ނޫނެވެ. މާދަމާ ދޫކޮށްލާނެއޭ ވެސް ބައެއް މީހުންބުންޏެވެ.

ފުލުހުންގެ ސުވާލުތަކަށް ޖަވާބު ދިންއިރު ކޮންމެ މީހަކު ވެސް މަސައްކަތްކުރީ ތިމާ ސަލާމަތް ވާށެވެ. އަނެކާއަށް ވާނެ ގޮތެއް ނުބަލައެވެ. އެންމެންގެ ބުނުން ދިމާވިއެވެ. ހުރިހާ ކަމެއް ވެސް ކުރީ ރޫބީ އެވެ. އޭނާއަކަށް ސަލާމަތެއް ނުވެވުނެވެ. ކޮޓަރިން ފެނުނު ތަކެއްޗާއިއެކު އަތޮޅު ޕޮލިހަށް ރޫބީ ގެންދިޔައެވެ.
─━━━━━━⊱✿⊰━━━━━━─
ލިބުނު ކާމިޔާބާއިއެކު އަހަރުމެން ސަލާމަތްވީ ކަމަށް ނިންމައިގެން ތިބި ނަމަވެސް ކަންތައްވީ އެހެނެއް ނޫނެވެ. ތަހުޤީޤުގެ ބޮޑުބައި ނިންމާލުމަށްފަހު ދައްކާލި ވީޑިއޯއާއެކު އެންމެން ދިޔައީ ސިއްސައިގެންނެވެ. އިތުރަށް ދައްކާނެ ވާހަކައެއް ދެއްކޭނެ ބަހަނާއެއް ނެތެވެ. ހުރިހާކަމެއް އޮތީ ހާމައަށް ފެންނާށެވެ. މަސްތުވާތަކެތީގެ ވިޔަފާރި ކުރުމާއި އެތަކެތި ބޭނުން ކުރުމުގައި އަހަރުމެން ހަރަކާތްތެރި ވަނިކޮށް ނަގާފައިވާ އެތައް ވީޑިއޯއެއް ފުލުހުންގެ އަތުގައި ހުއްޓެވެ.

ލިބުނު ހައިރާންކަމާއިއެކު އެތައް ސުވާލެއް އުފެދުނެވެ. ޝައްކާއި ވަހުމާއިއެކު ސިކުނޑީގެ މަސައްކަތް އެހެން ދިމާއަކަށް މިސްރާބު ޖެހިއެވެ.

” ސަބީނާ … ” އަހަރެންގެ ހަނދާނަށް އައީ އޭނާއެވެ. އެއިން އެއްވެސް ވީޑިއޯއަކުން އޭނާއެއް ނުފެނެއެވެ. އަހަރުމެނާއިއެކުގައި އުޅުނު ނަމަވެސް ކިތަންމެ ގާތްކަމެއް ބޭއްވި ނަމަވެސް އޭނާއަކީ އަހަރުމެންގެ ވިޔަފާރީގައި ބައިވެރިވާ މީހެއް ނޫނެވެ. އެކަމަށް ތާއިދުކުރާ މީހެއް ވެސް ނޫނެވެ. އެކަން ހުއްޓާލުމަށް އެތައް ފަހަރަކު އެދެފިއެވެ. ލަނޑެއް ލިބިދާނެކަމަށް ތަކުރާރުކޮށް ބުނަމުން ދިޔައެވެ.

” ރޫބީ ….. ” ހަރުސަދުގެ ބުނުމާއިއެކު އަހަރެންގެ ވިސްނުން ބަދަލުވިއެވެ. ވީޑިއޯތަކާއިމެދު އިތުރަށް ވިސްނާ ލެވުނެވެ. އެއްވެސް ވީޑިއޯއަކުން ރޫބީއެއް ނުފެނެއެވެ. އެ ވީޑިއޯތަކުގައި އެކިފަހަރު އެކިދިމާއަށް މިސްރާބު ބަދަލުވެއެވެ. ސަބީނާއަކަށް އެފަދަ ވީޑިއޯއެއް ނުނެގޭނެއެވެ. އެއިން އެއްވެސް ކަމެއް ކުރަނިކޮށް އޭނާ އެކޮޓަރިއަކަށް ނުވެސް ވަދެއެވެ.

ވީޑިއޯތައް ނެގުމަށް ބޭނުންކޮށްފައިވަނީ ހަށިގަނޑުގައި ހަރުކުރާ ވައްތަރުގެ ކުޑަކުޑަ ސިއްރު ކެމެރާއެކެވެ. ކޮންމެވެސް ގަހަނާއެއްގެ ގޮތުގައި ނުވަތަ ކޮންމެވެސް ގޮށެއް ކަހަލަ އެއްޗެއްގެ ގޮތުގައި ބޭނުން ކޮށްގެނެވެ. އެހެން ނޫންނަމަ އަހަރުމެނަށް ވެސް އެކެމެރާ ފެނުނީހެވެ. އެއާމެދު ވިސްނާލެވުނީހެވެ.

ވިސްނާ ފިކުރުކުރުން ނޫން އެހެން ގޮތެއް ނެތެވެ. ބަހަނާއެއް ނުދެއްކޭ ވަރަށް ހެކި އެބަހުއްޓެވެ. ސަލާމަތްވާނެ އެހެން މަގެއް އޮތްތޯ ބަލަން މަޖުބޫރު ވިއެވެ. ކޮންމެވެސް ގޮތެއް އޮންނާނެކަމުގައި އަހަރެންގެ ހިތް ބުނަމުން ދިޔައެވެ.
─━━━━━━⊱✿⊰━━━━━━─

ނިވާކަންކުޑަ ހާމަކަންބޮޑު ޒަމާނީ ހެދުންތަކާއި ޒަމާނީ ގޮތްތަކަށް ލޯބިކުރާކަން ދައްކަމުންދިޔަ ރޫބީ އެފަދަ ހެދުންތައް ބޭނުން ކުރަމުން ދިޔައީ އޭގެދަށުން އެހެން އެއްޗެއް ލައިގެންކަން އަހަރުމެނަށް އެނގުނީ މާފަހުންނެވެ. އެކަމަށް ހާއްސަ އަދި އޭނާގެ ހަށިގަނޑާއި ގުޅުންބޮޑު އެފޮއްޗަކީ ބޮޑު އޮޅުވާލުމެކެވެ. އެއިން ކަމަކާއިމެދު ވިސްނާލާނެ ފުރުސަތެއް ނުލިބުމުގެ އިތުރުން އެއިން ކަމަކާއިމެދު ޝައްކު ކޮށްލާނެ ޖާގައެއް ވެސް އަހަރުމެނަށް ނުލިބުނެވެ.

އަހަރުމެން އަތުލައިގަތުމަށް ރޫބީ ކުރި މަސައްކަތް މޮޅުކަން ގަބޫލުކޮށް އޭނާއަށް ތަޢުރީފު ކުރެވުނެވެ. ފުލުހުންގެ ބެލުމުގެ ދަށުން ތަމްރީނު ލިބިގެން މޮޅު ރޭވުންތަކާއިއެކު އައިސް އަހަރުމެނާއި ކުރިމަތިލީ ރޫބީއަކީ އެކަމަށް އެންމެ އެކަށީގެންވާ ޒުވާނާކަން އަހަރެންނަށް ޔަގީނެވެ. އޭނާގެ ވިސްނުންތެރިކަމާއި ރޭވުންތެރިކަން ކާމިޔާބެވެ. ސަލާމަތްވެވޭނެ އެއްވެސް މަގެއް ނެތްވަރަށް އޭނާ ހެކިހޯދިއެވެ.

ރޫބީއާ މެދު އަހަރުމެނަށް ވިސްނާލެވުނުއިރު ވާނެ އެއްޗެއްވެ ނިމިއްޖެއެވެ. އޭނާއަކީ ސީ.އައި.ޑީ ޕޮލިހެކެވެ. ކުޅަދާނަ އެކްޓަރެކެވެ. ކާމިޔާބުކަމާއިއެކު މަސައްކަތް ނިންމައި ފުރިހަމަ ހިމާޔަތާއި ރައްކާތެރިކަމާއިއެކު އޭނާ ފުރައިގެން ދިޔައެވެ. ޕޮލިހުންނަށް ނުވަތަ ޕޮލިހުންގެ މަސައްކަތަށް ތަޢުރީފުކުރަން ބޭނުން ނުވިޔަސް މިފަހަރަކު އެހެނެއް ނުވިއެވެ. ހިތާއި ދެކޮޅަށް ނަމަވެސް ފުރަތަމަ ފަހަރަށް އަހަރެން އެކަން ކުރީމެވެ.

ނިމުނީ

❈────────•✦•❅•✦•───────❈

ލިޔުންތެރިޔާގެ ފުރަމަލަ

މުޙައްމަދު މުނީރު (ނީރު)
މުޙައްމަދު މުނީރު (ނީރު)
ވާހަކަ ލިޔުމުގައި ގަލަން ނަމަކަށް "ނީރު" ބޭނުންކުރާ މުޙައްމަދު މުނީރަކީ ހުނަރުވެރި ވާހަކަ ލިޔުންތެރިއެކެވެ. ވާހަކަފޮތްތައް ކަރުދާހުގައި ޗާޕްކޮށްފައިވެސް ވެއެވެ.

ގުޅުންހުރި ލިޔުން: