06 އޯގަސްޓް 2023ވަނަ ދުވަހުގެ ރޭ އޮލިމްޕަސް ސިނަމާގައި ފިލްމު “ނީނާ” އެޅުވި ފަހުން އެ ފިލްމުގެ މޮޅު ވާހަކަ، ރީތި ވާހަކަ ދައްކާފައިވާ ޕޯސްޓްތަކެއް މީސްމީޑިއާއިން ނުފެންނަ ދުވަހެއް މަދުވާނެ އެވެ. އޭގެ ސަބަބުތަކުގެ ވާހަކަތައް އިތުރަށް ދެއްކުމުގެ މާ ބޮޑު މާނައެއްވެސް ނެތެވެ. ސަބަބަކީ ދެއްކެން ހުރީ ހަމަ އެއް ވާހަކަތަކަކަށް ވުމެވެ.

ފިލްމު ބެލި މީހުންގެ ކޮމެންޓްތަކުގެ ޚުލާޞާއަކީ އެއީ މިހާތަނަށް އުފައްދާފައި ނެތްހާ މޮޅު ދިވެހި ފިލްމެއް ކަމެވެ. ފިލްމު ވަރަށްވެސް މޮޅެވެ. ސަޅި ދިވެހި ފިލްމެއް ބަލަން ބޭނުން ނަމަ މިއީ އެ ފިލްމެވެ.

އައި ފިލްމްސްގެ ދެވަނަ ފީޗާ ފިލްމު “ނީނާ“ގެ ފަހު ޝޯތައް މިހާރު މިވަނީ ފެށިފައެވެ. އެހެންކަމުން މާލެއިން މި ފިލްމު ނުބަލާ ތިބި ފަރާތްތަކުން ފިލްމު ބަލަން ބޭނުން ނަމަ އަވަހަށް ޓިކެޓް ހޯދުން ބުއްދިވެެރިއެވެ.

މިއީ ހިންދީ ފިލްމުތަކާއި މި ކިޔާ ޓިޕިކަލް ދިވެހި ފިލްމުތަކުގައި ހުންނަ ގޮތަށް ދޯޕައްޓާ އަޅައިގެން ނަށާ ލަވަތަކެއް ހުންނަ ފިލްމެއް ނޫނެނެވެ. އެހެން ނަމަވެސް މި ފިލްމުގައި ހިމަނާފައިވާ ހަތަރު ލަވައަކީ ހަމަ ގައިމުވެސް ބަލައިލަން، އަހާލަން ހިތްގައިމު ލަވަތަކެކެވެ. ލަވައަކަށް ދޫނުކުރާ ވަރުގެ ލަވަތަކެއް ހުރިއިރު، ފިލްމުގެ މުހިންމު މަންޒަރުތަކަކާއެކު ‘އާ އުއްމީދު’ ލަވަ މިހާރު ވަނީ ރިލީޒްކޮށްފައެވެ.

ފިލްމުގައި ހުރީ ކޮން ލަވަތަކެއް؟

🎼 އަލްވިދާ – މިއީ ޖައިޝާ ވަަހީދު ކިޔާފައިވާ ލަވައެކެވެ. ލަވައިގެ ޅެން ހެދީ ފިލްމުގެ ސްކްރީންޕްލޭ ލިޔެ ޑައިރެކްޓްކުރި އިލްޔާސް ވަހީދު (އިއްލެ) އެވެ. މި ލަވައިގެ ކުރު ޓްރެއިލާއެއް ދާދި ފަހުން ދޫކޮށްލާފައިވެއެވެ.

🎼 އާ އުއްމީދު – މަޑުމައިތިރި، ހިތްގައިމު ރާގަކަށް ހިތްގައިމު ޅެންވެރިކަމެއް ހިމެނޭ މި ލަވައިގެ ރާގު އަދި ޅެން ހެދީ މަޝްހޫރު މިއުޒިޝަން މުހައްމަދު ޢަބްދުލްޣަނީ (ތޭރަވާ) އެވެ. މިއުޒިކްހެދީ ހުސައިން ތައުފީގު އެވެ. ލަވަކިޔާފައިވަނީ މަރިޔަމް އަޝްފާ އެވެ.

ފިލްމު “ނީނާ“ގެ މުހިންމު މަންޒަރުތަކެއް ދައްކުވައިދޭ މި ލައިން ފެންނަނީ ފިލްމުގެ ލީޑް ނުޒޫ އަދި ޝަރަފް އެވެ.

🎼 އައްޒަ – މި ފިލްމުގެ އެންމެ ވަރުގަދަ ލަވައަކީ މިއެވެ. ލަވަ ކިޔާފައިވަނީ އަޝްފާ އަދި މުޙައްމަދު ޢަބްދުލްޣަނީ (ތޭރަ) އެވެ. ލަވައިގައި ހަރަކާތްތެރިވަނީ މަރިޔަމް އައްޒަ އެވެ. އައިޓަމް ލަވައެއްގެ ގޮތުގައި ހިމަނާފައިވާ މި ލަވައިން އައްޒަގެ ހުނަރުވެރި ނެށުންތައް އޭނާގެ ފަރިފަރި އަދާތަކާއެކު ދައްކައިދޭ އިރު، ފިލްމުގެ މައިގަނޑު ވާހަކަ އާއި ގުޅުންހުރި މުހިންމު ކަންތައްތަކެއްވެސް ހިނގައެވެ.

ބޮޑު ހޭދައެއް ކޮށްގެން، ލަވައިގެ ޝޫޓިންއަށްޓަކައި އައްޒަ ލާމަށް ގެންގޮސް ނެގި މި ލަވަ ހަމަ ގައިމުވެސް އެހާ އަވަހަށް ބެލުންތެރިންނާ ހަމައަށް އާއްމުކޮށް ދޫކޮށްނުލާނެކަން އެނގެއެވެ. އެހެންކަމުން، މި ލަވަ ބަލައިލުމަށްވެސް މިވަގުތު އޮތް ހަމައެކަނި ފުރުޞަތަކީ ފިލްމުގެ ބާކީ ހުރި ޝޯތަކުން ޝޯއަކަށް ދިއުމެވެ.

🎼 އަލިފާން – މިއީ ފިލްމުގެ ޕްރޮމޯޝަން ލަވައެކެވެ. އިލްޔާސް ވަހީދު އަދި ފިލްމުގެ އެއް ޕްރޮޑިއުސަރ އާސިމް ޢަލީ (ސިމްބެ)ގެ ފައްކާ ލިރިކްސްއަކަށް ހިޕްހޮޕް ރެޕް ސްޓައިލްގައި ކިޔާފައިވާ މި ލަވައިގެ އަޑުގެވެރިޔަކީ އަންދަލާ ހަލީމެވެ.

ލަވަކިޔުންތެރިޔާ އަންދަލާގެ އިތުރުން މި ލަވައިގެ މަންޒަރުތަކުން މިފިލްމުގެ ލީޑު ނުޒުހަތު ޝުއައިބު (ނުޒޫ) ފެނިގެންދެ އެވެ. “އަލިފާން“ ލަވައިގައި ކިޔައިދެނީ ނީނާގެ ހިތުގައި އަލިފާނުގެ ހުޅު ރޯވި ސަބަބުތަކާއި އެ އަލިފާނުގެ ސަބަބުން އޭނާގެ ހަޔާތަށް ލިބުނު ގެއްލުންތަކުގެ ބަދަލުހިފުމުގެ ވާހަކައެވެ. އޭނާއަށް ހާލުޖެއްސި މީހާ ކޮންމެ ހިސާބެއްގައި އޮތްނަމަވެސް ހޯދާނެ ވާހަކައާއި އެމީހާ ހޯދައިގެން ބަދަލުނުހިފައިފި ނަމަ ނީނާގެ ނަމަކަށް ނީނާ ނުކިޔާނެ ވާހަކައެވެ.

ދިވެހި ފިލްމެއް ބަލައިގެން މާޔޫސްވާން ނުޖެހި ރީތި ފިލްމެއް ބަލަން ބޭނުންނަމަ މިއީ އެ ފިލްމެވެ. ހަމަ ގައިމުވެސް ފިލްމު ބެލި މީހުންގެ ވަރަށް ގިނަ ރިވިއުތައް ފެނ،ި އަޑުއިވިއްޖެއެވެ. ފިލްމާމެދު ދެވަނަ ވާހަކައެއް ބުނި މީހަކު ނެތެވެ.

🎦 ފިލްމު “ނީނާ”ގެ އޮންލައިން މީޑިއާ ޕާޓްނަރަކީ މުނިއަވަސް އޮންލައިން

ލިޔުންތެރިޔާގެ ފުރަމަލަ

އަޙްމަދު ރަޝީދު

ހުރިހައި ދާއިރާއެއްގެ ލިޔުންތައްވެސް މުނިއަވަސްގެ ފައުންޑަރ އަދި ޗީފް އެޑިޓަރ ލިޔާނެއެވެ.

މި ލިޔުންތެރިޔާގެ ބައެއް އެހެން ލިޔުންތައް

• 20 ޑިސެމްބަރ 2024ޚަބަރު“ސޮރީ” ގެ މަންޒަރެއް!
• 18 ޑިސެމްބަރ 2024ޚަބަރުއައިފިލްމްސް އިން ލޯބިން ބުނެލަނީ ” ލޯބިން…؟ ” ކަމަށް!
• 18 ޑިސެމްބަރ 2024ޚަބަރުއައްޒަ ބަލިވެއިންކަމަށް ބުނެ ނަހޫއަށް “ސޮރީ” ބުނެފި
• 18 ޑިސެމްބަރ 2024ޚަބަރު“ސޮރީ” ފަށައިފި – ޑައިރެކްޓްކުރަނީ ނަހޫ އަދި ރަވީ!