ކޮމެޑީ ތަރި ޚުއާން ޖޯޔާ ބޯޖާއަށް އެންމެ ފުރަތަމަ މަޝްހޫރުކަން ލިބުނީ މީގެ 22 ވަރަކަށް އަހަރު ކުރިން ޖެސޫސް ކުއިންޓެރޯ ޕްރެޒެންޓް ކުރާ ޓީވީ ޝޯއިން ފެނިގެން ދިޔަ ހިސާބުންނެވެ.

އޭނާ އެންމެ މަޝްހޫރުވި ސްޕެއިންގެ ރޭގަނޑު ދަންވަރު ޝޯ ‘ރެޓޯނެސް ކޮލޮރާއޯސް’ގެ ވީޑިއޯ ކްލިޕް އާއްމުވި ހިސާބުންނެވެ. އެ ޝޯގައި އޭނާ ކިޔައިދެނީ ރެސްޓޯރެންޓެއްގެ ބަދިގޭގައި އަތްގާތްކޮށްދޭ މީހެއްގެ ގޮތުގައި (ކިޗަން ހެލްޕަރެއްގެ ގޮތުގައި) މަސައްކަތްކުރި އިރު އޭނާއަށް ކުރިމަތިލާން ޖެހުނު ބަދުނަސީބު ތަޖުރިބާއެއްގެ ވާހަކަތަކެކެވެ.

2007 ވަނަ އަހަރު ޔޫޓިއުބަށް ލާފައިވާ އެ ޝޯގެ ވީޑިއޯގައި ބޯޖާ ކިޔައިދެނީ އޭނާ މަސައްކަތްކުރި ރެސްޓޯރެންޓްގައި ބޭނުންކުރި އަތްގަނޑުލީ 20 ތެލި ސާފުކުރުމަށްޓަކައި އެއް ރެއަކު މޫދުގައި އެޅުމަށްފަހު (ލޮނުގަނޑު ތެރެއަށް ފައްތާފައި ބެހެއްޓުމަށްފަހު) އަނެއް ދުވަހު ހެނދުނު ގޮސް ތެލިތައް ނަގަން ބެލިއިރު އެތަނުގައި ހުރީ އެންމެ ތެއްޔެއް ކަމަށާ އެކަމާ ގުޅިގެން ދެން ކަންތައްތައް ހިނގައިދިޔަ ގޮތުގެ ވާހަކަތަކެވެ.

ދިމާވި ކަންތަކުގެ ވާހަކަތައް ބޯޖާ ހިއްސާކުރިއިރު ބޯޖާގެ އިތުރުން ޝޯ ހުށައަޅަން އިން މީހާގެ ހިނިގަނޑު ފަޅައިގެންގޮސް މޭޒުމަތީގައި އަތުން ތަޅާތަން ފެނެއެވެެ. ހީހީ އަވަދިވެގެން ގޮސް ދެމީހުންނަށް ރޮވެއެވެ. ބޯޖާ އެވަރަށް ހޭ އިރު، އޭނާގެ އަނގައިގައި މަދު ދަތެއް ފިޔަވައި އެހެން ދަތެއް ނެތުމުން އެ ޖަހާލާ ހިނިގަނޑުގެ މަޖާކޮށް ދެގުނަވެގެން ދެއެވެ.

އޭގެ އަހަރުތަކެއް ފަހުން ގާތްގަނޑަކަށް 2014 ވަނަ އަހަރުން ފެށިގެން އިންޓަނެޓް ބޭނުންކުރާ މީހުން އެ ކްލިޕް އަލުން ޕޯސްޓް ކުރަން ފެށީ ގުޅުން ނެތް ސަބްޓައިޓްލްތަކަކާ އެކުގައެވެ. ގުޅުން ނެތް ގޮތަށް އަޑުއަޅައިގެންނެވެ. އެޑޮލްފް ހިޓްލަރުގެ އެންމެ ފަހު ދުވަސްތައް ދައްކުވައިދޭ ފިލްމު “ޑައުންފޯލް”ގެ މަންޒަރެއްގެ ނަކަލުކުރުންތަކާއި ހަމަ އެއްފަދަ ގޮތަކަށެވެ.

ސަބްޓައިޓްލް ހިމެނޭ ވީޑިއޯ ބަލައިލާ ރަނގަޅަށް ހީލާށެވެ.