ދުނިޔޭގެ ތާރީޚްގައި އުފެދުނު އެންމެ މޮޅު އެއް ފިޒިސިސްޓް އަދި ކޮސްމޮލޮޖިސްޓް، ޕްރޮފެސަރ ސްޓެެފަން ހޯކިން އުމުރުން 76 އަހަރު ނިޔާވެއްޖެއެވެ.

ތިއޮރެޓިކަލް ފިޒިކްސް އާއި ކޮސްމޮލޮޖީގެ ދާއިރާއިން ފާހަގަކޮށްލެވޭ ހޯކިން ނިޔާވިކަން އޭނާގެ އާއިލާއިން މިއަދު ހެނދުނު ވަނީ މީޑިއާއަށް ކަށަވަރުކޮށްދީފައެވެ. ބުދަ ދުވަހު ހެނދުނުހެނދުނާ ހޯކިން ގެ ޢާއިލާއިން ނެރުނު ނޫސްބަޔާނެއްގައި ބުނީ ހޯކިން ނިޔާވީ އިނގިރޭސިވިލާތުގެ ކޭމްބްރިޖްގައި ހުންނަ އޭނާގެ ގޭގައި ކަމަށެވެ.

ހޯކިން ގެ އަންހެންދަރިފުޅު ލޫސީ، ފިރިހެން ދެދަރިން ކަމަށްވާ ރޮބަރޓް އަދި ޓިމް ނެރުނު ނޫށްބަޔާނުގައި ބުނީ: “އަހަރެމެންގެ ލޮބުވެތި ބައްޕަ މިއަދު ނިޔާވެފައިވުމުން އަހަރުމެންނަށް މިވަނީ ފުން ހިތާމައެއް ލިބިފައި.”

“ބައްޕައަކީ މޮޅު ސައިންޓިސްޓެއް ވަރަށް އާދަޔާޚިލާފް މީހެއް. ބައްޕަގެ މަސައްކަތާއި ލިގެސީ އެތަކެއް އަހަރުތަކެއް ވާންދެން ދެމިހުންނާނެ. ބައްޕަގެ ހިތްވަރާއި ތޫނުފިލިކަމާއި މަޖާ ކަމަކީ ދުނިޔޭގެ އެކިކަންކޮޅުތަކުން ބައްޕައާމެދު އިންސަޕްޔާވި ކަމެއް.”

ހޯކިންގ އަކީ ތިއޮރެޓިކަލް ފިޒިކްސް އާއި ކޮސްމޮލޮޖީގެ އިތުރުން މެތަމެޓީޝަނެއް، އަދި މުސައްނިފެއްވެސް މެއެވެ. ސައިންސްގެ އެކި ދާއިރާތަކުން ހޯކިންގ އެތައް ފޮތެއް ލިޔުއްވާފައިވާއިރު، ހޯކިންގެ ގެ ފޮތް، “އަ ބްރީފް ހިސްޓްރީ އޮފް ޓައިމް” އަކީ އޭގެ ތެރެއިން އެންމެ ފާހަގަކޮށްލެވޭ ފޮތެވެ. އެ ފޮތުގެ 10 މިލިއަންނަށްވުރެ ގިނަ ކޮޕީ ވަނީ ވިކިފައެވެ.

ސައިންސްގެ ދާއިރާއިން ހޯކިންގ ގިނަ ޚިދުމަތްތަކެއް ކުރެއްވި ނަމަވެސް، ވަރަށް ޒުވާން ދުވަސްވަރުން ފެށިގެން އޭނައަށް ވަނީ ނާރުތަކުގެ ބާރުކަނޑުވާ ބައްޔެއް ކަމުގައިވާ އޭއެލްއެސް (އެމިއޯޓްރޮފިކް ލެޓަރަލް ސްކްލެރޯސިސް) ޖެހިފައެވެ. މި ބަލި ޖެހޭ ފަރާތްތަކަށް ބަލިޖެހޭތާ ދެތިން އަހަރު ތެރޭގައި މަރުވި ނަމަވެސް، ހޯކިންގ މަރުވެފައިވަނީ މި ބައްޔާއިއެކު 55 އަހަރު ދިރިއުޅުމަށްފަހުއެވެ. ހޯކިން އަށް މި ބަލި ޖެހިފައިވަނީ 1963 ވަނަ އަހަރު އޭނާގެ އުމުރުން 21 އަހަރުގައެވެ.

ބައްޔާއި ގުޅިގެން ވޭތުވެދިޔަ 55 އަހަރު ހޯކިންގ ހޭދަކުރެއްވީ ފުރޮޅުލީ ގޮނޑީގައެވެ. ބައެއް އިނގިލިތަކުގެ ހަރަކާތް ކުރުމާއި، އެސްފިޔަޖެހުން ފިޔަވައި ގާތްގަނޑަކަށް އޭނާގެ ހަށިގަނޑުގެ ހަރަކާތެއް ބަލީގެ ސަބަބުން ހުއްޓުނު އިރު މި މުއްދަތުގައި ހޯކިންގ ވާހަކަދައްކައި އުޅުނީ ސްޕީޗް ސިންތެސައިޒަރއެއް މެދުވެރިކޮށެވެ.

ހޯކިންގ ނިޔާވިއިރު، އޭނާގެ 3 ދަރިންނާއި 3 ކާފަދަރިން އެބަތިއްބެވެ.

ލިޔުންތެރިޔާގެ ފުރަމަލަ

އަޙްމަދު ރަޝީދު
އަޙްމަދު ރަޝީދު
ހުރިހައި ދާއިރާއެއްގެ ލިޔުންތައްވެސް މުނިއަވަސްގެ ފައުންޑަރ އަދި ޗީފް އެޑިޓަރ ލިޔާނެއެވެ.

ގުޅުންހުރި ލިޔުން: