މަޝްހޫރު ޑައިރެކްޓަރ އަމްޖަދު އިބްރާހިމް (އަމްޖޭ) ގެ 52 ވަނަ ޑައިރެކްޝަން ‘ރޭވުމުން‘ ގެ ޓިކެޓް އޮލިމްޕަހުން މިއަދު ވިއްކަން ފަށައިފި އެވެ.

ފިލްމުގެ ޑައިރެކްޓަރ އަމްޖޭ މުނިއަވަސް އަށް މަޢުލޫމާތު ދެމުން ބުނީ ފިލްމުގެ ޓިކެޓް ބްކިންއަށް ވަރަށް ރަނގަޅު ތަރުހީބެއް ލިބެމުން އަންނަކަމަށެވެ. އިތުރަށް އަމްޖޭ ބުނީ ރީތި މޮޅު ދިވެހި ފިލްމެއް ބަލައިލަން ބޭނުންނަމަ ‘ރޭވުމުން‘ ބަލަލައިލަން ދިއުން މުހިންމުކަމަށެވެ.

‘ރޭވުމުން‘ ގެ ލީޑް ރޯލުން ފެނިގެން ދާނީ މުހައްމަދު މަނިކާއި އަލަށް ތައާރަފުވާ ނާދިފާ އެވެ. ނާދިފާ އަކީ އަމްޖޭ ގެ ދަރިފުޅު ފިލްމީ ދާއިރާއަށް އަލަށް ނިކުންނަ ފިލްމެވެ. މީގެ އިތުރުން ކާސްޓުންގެ ތެރޭގައި މަރިޔަމް ޝަކީލާ (ޝަކިއްތަ)، މުހައްމަދު ޝާޒް (ތަޖޫބެ)، ފައުޒިއްޔާ ހަސަން އަދި ހަސަން މަނިކު (ރޯނު) ފަދަ އެކްޓަރުން ހިމެނެ އެވެ.

މިމަހު 24 ގައި ސިނަމާކުރުމަށް ހަމަޖެހިފައިވާ މި ފިލްމާއި ބެހޭގޮތުން އަމްޖޭ ބުނީ މި ފިލްމަކީ އިރާދަކުރެއްވިޔާ ދިވެހިން ބޭނުންވާ ހުރިހައި ރަހައެއް ހުންނާނެ އަދި އަމްޖޭ ފަންސާހެއްހައި ފިލްމު ހެދިއިރު މިއީ އަމްޖޭ އަށް ހެދުނު ވަރަށް ތަފާތު، އަދި މި މުޖުތަމައާ ގުޅޭ ފިލްމެއް ކަމަށެވެ.

އަމްޖޭގެ އަމިއްލަ ވާހަކައަކަށް ހަދާފައިވާ ލޯބީގެ މި ބިރުވެރިި ފިލްމުން ވެގެންދަނީ ބެލުންތެރިން ސިއްސުވައިލާނެ ވަރުގެ ފިސާރި ފިލްމަކަށް އަމްޖޭ ބުނެ އެވެ. ފިލްމު ކެމެރާ ކޮށްފައިވަނީ މުހައްމަދު އަބޫބަކުރު (މާއެނބޫ) އެވެ. ފިލްމު ޕްރޮޑިއުސް ކޮށްފައިވަނީ ޖޭޒް އެންޓަޓެއިންމެންޓުން ނެވެ.

އަމްޖޭ މިހައިތަނަށް ޑައިރެކްޓް ކޮށްފައިވާ ފިލްމުތަކުގެ ތެރެއިން އެންމެ 03 ފިލްމު ނޫނީ ދެން ހުރި ހުރިހައި ފިލްމުތަކަކީ ހިޓް ފިލްމުތަކެއްކަންވެސް އަމްޖޭ ބުންޏެވެ.

ޓިކެޓް ހޯދުމަށް 7632051 އަދި 9956557 އަށް ގުޅުމަށް ފިލްމުގެ ޕްރޮޑަކްޝަން ޓީމުން ބުނެއެވެ.

ލިޔުންތެރިޔާގެ ފުރަމަލަ

އަޙްމަދު ރަޝީދު
އަޙްމަދު ރަޝީދު
ހުރިހައި ދާއިރާއެއްގެ ލިޔުންތައްވެސް މުނިއަވަސްގެ ފައުންޑަރ އަދި ޗީފް އެޑިޓަރ ލިޔާނެއެވެ.

ގުޅުންހުރި ލިޔުން: