| MUNIAVAS

މިއީ މީސްމީޑިއާ ތެރެއިން ތަންކޮޅެއްކުރިން އަތުޖެހުނު ލިޔުމެކެވެ. މިއީ ގޫގަލްގެ ސީއީއޯ ސުންދަރު ޕިޗާއީގެ ތަޤުރީރެއްކަމަށް ވެސް ބުނެވެއެވެ. އެކި ރިވާޔަތްތަކުގައި ޚިލާފުތައް އެބަހުއްޓެވެ. އެހެންކަމުން އިނގިރޭސިބަހުން ދިވެހިބަހަށް އަނބުރާލުމުގައި އަޅުގަނޑުވެސް “ފޮނިތޮށި ކާފޫރުތޮޅި” އެޅިކަމަށްވިޔަސް އަސްލަކީ 2015 ވަނަ އަހަރުތެރޭ ދުށް މިދެންނެވި ލިޔުމެވެ.

މީހުން ތޮއްޖެހިފައިވާ ރެސްޓޯރަންޓެއްގެ ތެރޭގައި އިން ކަނބަލެއްގެ ގައިގައި އައިނައިތަނެއް ނޭނގި ކުއްލިއަކަށް ކުރަތްޕެއް ޖައްސައިފިއެވެ. ދެނަކާ ދެނެއް ނެތެވެ. މިކަނބުލޭގެ ގަތްބިރުން އަޑުގައި ނެތްތަނަށް ހަޅޭލަވަން ފަށައިފިއެވެ. މޫނުމަތީގެ ކުލަވަރު ބަދަލުވެ، ތުރުތުރު އަޅާއަޑެއް ނެރެމުން، ކުރަފި ގައިން ނައްޓާލެވޭތޯ ދެއަތުން މަސައްކަތްކުރަމުން ފުންމަންފަށައިފިއެވެ. އެކަނބުލޭގެއާއެކު ތިބި ގުރޫޕްގެ އެންމެންވެސް ތިބީ ބިރުގެންފައި ކަމުން އެކަނބުލޭގެއަށްވެސް ބިރުން ތެޅިގަނެވުނީއެވެ. އެންމެފަހުން އެގޮތަކުން މިގޮތަކުން ގައިން ކުރަފި ފޮޅާލައިފިއެވެ. އެސޮރު ގޮސްޖެހުނީ އެގުރޫޕްގައި އިން އެހެން ކަނބަލެއްގެ ގައިގައެވެ. ކުރިން ކުޅެވުނު ޑުރާމާގެ ރިޕީޓެއް ފެށުނީއެވެ. މިވެރިން މިކަންތައްގަނޑުން ސަލާމަތްކޮށްދެވޭތޯ ވެއިޓަރެއް އެދިމާއަށް އަވަސްވެގަތެވެ. ކުރަފި “އުކުމުގެ” މި “ރިލޭ”ގައި އެކަނބުލޭގެ ފޮޅާލިގޮތަކުން އެސޮރުގޮސްޖެހުނީ ވޭޓަރުގެ ގައިގައެވެ.

ވޭޓަރު ގުޑައިވެސްނުލައި އޭނާގެ ގަމީހުގައި ޖެއްސި ކުރަފީގެ ހަރަކާތްތަކަށް، ވިސްނުންތެރިކަމާއެކު ބެލިއެވެ. އަދި ހުށިޔާރުކަމާއެކު ކުއްލިއަކަށް ކުރަފީގައި އަތުން ހިފައި ބޭރަށް އެއްލާލައިފިއެވެ.

ކޮފީގެ ފޮދުވަރުވަރު އަރުތެރެއަށް ދަމަމުން، މިކުޅިގަނޑު ދެކެން ތަންކޮޅެއް ދުރުގައި އިންއިރު އަޅުގަނޑުގެ ސިކުނޑީގެ ރާޑަރަށް އެރި ސުވާލުތަކަކާއި މެދު އިތުރަށް ވިސްނަން ފެށިއްޖެއެވެ. މިހާދިސާގައި އެކަނބަލުން އުޅުނުގޮތަށް ޒިންމާވާންޖެހެނީ ކުރަފި ހެއްޔެވެ؟ އެހެންކަމަށްވާނަމަ އެގޮތަށް ވޭޓަރު ނޫޅުނީ ކީއްވެހެއްޔެވެ؟ ވޭޓަރު އެކަން ޙައްލުކުރީ ވަރަށް ފުރިހަމައަށެވެ. ބޮޑުހައިޖާނަކަށް ނުހަދައެވެ.

އެކަނބަލުންނަށް އެހާލަތް އުނދަގޫ ޙާލަތަކަށް ވީ ކުރަފީގެ ސަބަބަކުންނޫނެވެ. ކުރަފި ޖެއްސުމުން ލިބުނު އުނދަގުލާއި ކުރިމަތިލުމުގެ ޤާބިލްކަން އެކަނބަލުންގެ ނެތުމުންނެވެ.

އަޅުގަނޑަށް ވިސްނުނީ އަޅުގަނޑަށްވެސް އުނދަގޫވަނީ، ގާތްމީހަކު ނުވަތަ ވެރިއަކަށް ހުންނަ މީހަކު ހިތްހަމަ ނުޖެހިގެން އަޑުލައިހެދުމަކުން ނޫންކަމެވެ. އުނދަގޫވަނީ އެގޮތަށް އަޑުލައިހެދުމުން ލިބޭ އުނދަގޫ ތަޙައްމަލުކުރުމުގެ ޤާބިލްކަން ނެތުމުން ލިބޭ އުނދަގުލުންކަމެވެ.

އުނދަގޫވަނީ މަގުމަތީގައި ވެހިކަލްތައް ތޮއްޖެހުމުން ނޫންކަމެވެ. އުނދަގޫވަނީ، ވެހިކަލްތައް ތޮއްޖެހުމުން ލިބޭ އުނދަގޫ ތަޙައްމަލުކުރުމުގެ ޤާބިލްކަން ނެތުމުން ލިބޭ އުނދަގުލުންކަމެވެ. ކުރިމަތިވާ މައްސަލައަށްވުރެ ބޮޑަށް އެކަމާއި ތެޅިގަތުމުން ދިރިއުޅުމުގައި ހައިޖާނު އުފެދޭ ކަމެވެ.

މިހާދިސާއިން ލިބޭ ޢިބްރަތްތައް ބައިވަރެވެ. ދިރިއުޅުމުގައި ކަމެއް ދިމާވީމާ އެކަމާއި ތެޅިނުގަންނަންވީއެވެ. ވިސްނުންތެރިކަމާއެކު ކުރިމަތި ލާނީއެވެ. އެކަނބަލުން ތެޅިގަތީއެވެ. ވޭޓަރު ކުރިމަތިލީއެވެ. ތެޅިގަތުމަކީ ކުރެވޭނުކުރެވޭ ކަމެއް ނޭނގި އުޅެވޭގޮތެކެވެ. އެހެނަސް ކުރިމަތި ލެވޭނީ ވިސްނުންތެރިކަމާއި ޙިކުމަތްތެރިކަމާއެކުގައެވެ.

މީހަކު އުފަލުން ހުންނަނީ އޭނާގެ ދިރިއުޅުމުގައި ހުރިހާކަމެއް ބަރާބަރުވީމައެއް ނޫނެވެ. އޭނާ އުފަލުން ހުންނަނީ އޭނާގެ ދިރިއުޅުމުގައި ހުރި ކަންތައްތަކާއި މެދު ރަނގަޅަށް ދެކޭތީ އެވެ.

ކުރުކޮށްދަންނަވާނަމަ، ދިރިއުޅުމާއިމެދު ރަނގަޅު “އެޓިޓިއުޑެއް” ހުރީމައެވެ. ދުނިޔެ ހިނގަނީ ތޮށަލި ދުޅައަށްކަމާއި އަޑިގަނޑަކަށްފަހު އުސްގަނޑެއް އަންނާނެކަން ވިސްނޭތީއެވެ. މާތްﷲ ޞުބްޙާނަހޫ ވަތަޢަލާގެ މިންވަރުފުޅަށް ޝުކުރުވެރިވާން އެނގޭތީއެވެ.

ލިޔުމުގެ އަސްލު ފާލަން: ގަމުޠާހާ ޑޮޓް ބޮލޮގްސްޕޮޓް ޑޮޓް ކޮމް