އަސްލު “ކަންބަޅި”އަކީ ކާކުކަން އެނގޭނީ 01 ފެބްރުއަރީ 2024ވަނަ ދުވަހުގެ ރޭ އޮލިމްޕަސް ސިނަމާއިން ނެވެ. އައިފިލްމްސްގެ ތިންވަނަ ފީޗާ ފިލްމު “ކަންބަޅި”ގެ މުހިންމު ކެރެކްޓަރ ޕޯސްޓަރުތައް މިއަދު އާއްމުކޮށްފައިވާއިރު، އެންމެ ކެރެކްޓަރއެއް ފިޔަވައި ކޮންމެ ކެރެކްޓަރއެއްގެ ވާތް ފަރާތު ކަންކަށިމަތިން ކަންބަޅިއެއްގެ ދަޅެއް ފެންނަން ހުރުމުން މި ޕޯސްޓަރުތަކަށް ގިނަ ބައެއްގެ ސަމާލުކަން ވަނީ ހުއްޓިފައެވެ.

މި ފިލްމުގެ މުހިންމު ރޯލަކުން ފިލްމީ ދާއިރާއަށް އަލަށް ތަޢާރަފުވާ ތުއްތު އާޓިސްޓް، އުމުރުން 6 އަހަރުގެ ސާރާ ބިންތު މުހައްމަދު ފާރިޤްގެ ދަޅެއް ފެންނަން ނެތި، ދެންތިބި ހުރިހައި ކެރެކްޓަރއަކުން ކަންބަޅީގެ ދަޅެއް ފެންނަން ހުރުމުން އަސްލު “ކަންބަޅި”އަކީ މިތަނުން ކާކުކަން ދެނެގަންނަން ހަމަ ގައިމުވެސް އުނދަގޫވާނެއެވެ. އެހެންކަމުން، އައިފިލްމްސްގެ މި ބިރުވެރި ފިލްމުގެ ޓިކެޓް ނަގަން ތައްޔާރަށް ތިބެމާ ހިނގާށެވެ. އަސްލު ކަންބަޅިއަކީ ކާކުކަން އެނގޭނީ ފިލްމު ބަލައިލީމައެވެ.

ހަމަ ގައިމުވެސް އައިފިލްސްގެ އުފެއްދުމެއް ބަލައިގެން އަދި މިހައިތަނަށް އައިއިރު މާޔޫސްވާން ޖެހިފައެއް ނެތެވެ. ފިލްމު “ބަވަތި”ން ގެނެސްދިނީ ދިވެހި ސިނަމާއަށް ތަފާތު ރަހަތަކެކެވެ. ކޮލިޓީ ތަފާތު މަސައްކަތްތަކެއް އެ ފިލްމުން ފެނިގެންދެއެވެ. ދެވަނަ ފިލްމު “ނީނާ” އަކީ އަދި މުޅީން ތަފާތު ފިލްމެކެވެ. އެހާމެ ކޮލިޓީވެސް މަސައްކަތެކެވެ.

ބިރުވެރި ފިލްމުލު “ކަންބަޅި”ގެ ކެރެކްޓަރ ޕޯސްޓަރުތަކަށް ބަލައިލުމުގެ ކުރިން، މީގެ ދެ ހަފުތާ ކުރިން ރިލީޒްކޮށްފައިވާ މި ފިލްމުގެ ފުރަތަމަ ޓްރެއިލާއަށް ޖެހިލަމާ ހިނގާށެވެ.

“ކަންބަޅިއޭ…. ކަންބަޅި އަކީ ކާކު؟“

– ފިލްމުގެ ލީޑް ޝަރަފްގެ ޑައިލޮގުކޮޅެއް

އާއްމުކޮށްފައިވާ ކެރެކްޓަރ ޕޯސްޓަރުތަކުން އަސްލު ކަންބަޅިއަކީ ކާކުކަން ޝައްކުކުރެވެނީ ސާރާ ނޫން އެހެން އެންމެނަށެވެ. ނަމަވެސް ދައްކާ މަންޒަރުން ހަޤީޤަތް ހާމަނުވުމަކީވެސް ހަމަ ވެދާނެ ގޮތެކެވެ.

ބިރުވެރި ފިލްމުލު “ކަންބަޅި”ގެ ކެރެކްޓަރތަކާއި ތަރިން:

ހުނަރުވެރި އެކްޓްރެސް ވާޝިޔާ މުޙައްމަދު (ޝިޔާ) އަކީ މި ފިލްމުގައި އާލިން އެވެ. ބިރުވެރި ފިލްމުތަކުން ހުނަރުވެރި އެކްޓިންއެއް ދައްކަމުން އަންނަ ޝިޔާ އާމެދު މި ފިލްމުންވެސް ކުރެވޭ އުއްމީދުތައް ވަރަށް ބޮޑެވެ.

ފިލްމުގެ ފިރިހެން ލީޑް ޝަރަފް އަކީ މި ފިލްމުގައި އިއްމަ އެވެ. އިއްމަގެ ކެރެކްޓަރއިން ޝަރަފުގެ ތަފާތު އެކްޓިންއެއް ފެނިގެންދާނެ ކަމަށް ބެލެވެއެވެ.

ތަންކޮޅެއް ބޯލްޑް ލުކެއްގައި މިހުރީ އަކްރަމްގެ ކެރެކްޓަރ ދައްކާނެ އިފްނާޒެވެ.

އުމުރުން އެންމެ 6 އަހަރުގެ ސާރާއަކީ ހުނަރުވެރި ތުއްތު އެކްޓްރެސްއެއްކަން މިހައިތަނަށް އާއްމުކޮށްފައިވާ މަންޒަރުތަކުން އެނގިގެންދެއެވެ. ސާރާއަށް ކަންބަޅީގައި ހުންނަ ކަހަލަ ދަޅައެއް ލިބިފައިނެތްކަން ފާހަގަވޭދޯ އެވެ.

އެޕާޓްމެންޓެއް ހޯދަން ދަނީ އާލިއާއެވެ. އާލިއާ ބަޓް ނޫނަސް، ނުޒޫއަކީ ހަމަ ގައިމުވެސް ހުނަރުވެރި އެކްޓްރެސްއެއްކަން އައިފިލްމްސްގެ ދެވަނަ ފިލްމު “ނީނާ”އިން އޮތީ ސާބިތުކޮށްދީފައެވެ. ނުޒޫ ނުވަތަ އާލިއާ ބިރުންހުރި ވަރުން ހިތަށްއަރަނީ ކީކޭހެއްޔެވެ؟

ފިލްމަކަށް ރަވީ ފާރޫޤް އެންޓަރވެއްޖެ ނަމަ ކަށަވަރުވާ ކަމެއް އެބަ އޮތެވެ. ރަވީއަށް އާދައިގެ ރޯލެއް ނުދޭނެއެވެ. އެހެންކަމުން ރަވީ ފެނިގެންދާނީ މި ފިލްމުގައި މުހިންމު ރޯލަކުން އަރީޝްގެ ގޮތުގައެވެ.

ތާތި އާދަމްގެ މަޖާ ފިލްމެއް، ސީރީއަސް ވެބް ސީރީޒެއްވެސް ވަނީ ފެނިފައެވެ. މި ފިލްމުން ޝިފާނާގެ ކެރެކްޓަރއިން ފެނިގެންދާނެ ތާތިގެ މޫނުމަތިން ހާދަގިނަ ޝުޢޫރުތަކެއް އެބަ ފެނޭދޯއެވެ.

އިޝްފާން ފެންނާނީ ސާމިހްގެ ރޯލުންނެވެ. މި ފަހުން ހުނަރުވެރި އެކްޓިންއެއް ދައްކަމުން އަންނަ އިޝްފާންގެ މިހާރުގެ ލުކް ތަފާތުވެފައި ސަޅިކަން ފާހަގަވެއެވެ.

އަލީފްގެ މި ލުކުން ފެންނަނީ ތަންކޮޅެއް ‘ގްރޯން އަޕް’ ލުކެކެވެ. ސީރިއަސްކަން ފެންނަން ހުރި އަލީފް އަކީ މި ފިލްމުގައި ރިޔާޒެވެ.

ޗަންނަ އަކީ މި ފިލްމުގައި ހަސަން އެވެ. ތަންކޮޅެއް ގައްޑާ ރޯލުތަކުން މީގެ ކުރިން ޗަންނަ ފެނިފައިވާ އިރު މި ފިލްމުން ޗަންނަ ފެނިގެންދާނީ ކޮންކަހަލަ ކެރެކްޓަރއަކުން ބާވައެވެ.

ހާޒިފަކީ މި ފިލްމުގައި ނިމާލްގެ ރޯލުން ފެނިގެންދާނެ ތަރިއެކެވެ.

ދެން މިހުރީ ފާތުންއެވެ. މަރީނާގެ ގޮތުގައި ފެނިގެންދާނެ ފާތުންގެ ސީރިއަސް ލުކުން ލައްކަ ވާހަކަތައް ބުނެދޭން އުޅޭހެން ހީއެއް ނުވޭހެއްޔެވެ؟

އާސިމް އަލީ އަދި އިލްޔާސް ވަހީދު ޕްރޮޑިއުސްކުރާ މި ފިލްމުގެ މިއުޒިކް ހަދަނީ ފިލްމު “ފްރީ ޑެލިވަރީ”ގެ ހިތްގައިމު މިއުޒިކް ހެދި ޝަހީދު ލިގެސީ އެވެ. ފިލްމުގެ ޕޯސްޓް ޕްރޮޑަކްޝަން މަސައްކަތްކުރަނީ އިއްލެގެ “ބަވަތި” އަދި “ނީނާ”ގެ ވެސް އެ މަސައްކަތްތައްކުރި އޯކޭޒް އިންކް އެވެ. ހަމަ އެހެންމެ ކެމެރާ ކުރަނީވެސް ފިލްމު “ފްރީ ޑެލިވަރީ” ކެމެރާކުރި ސަމާހް އިބްރާހިމް އެވެ.

ފިލްމުގެ ކާސްޓްގައި ހިމެނޭ ތާތި އާދަމް އަކީ މި ފިލްމުގެވެސް ޕްރޮޑަކްޝަން މެނޭޖަރެވެ.

ފިލްމު “ކަންބަޅި“ގެ އޮންލައިން މީޑިއާ ޕާޓްނަރަކީ މުނިއަވަސް އޮންލައިން

@muniavas KANBALHI Trailer Release koffi – #FanneeVaahaka #dhivehifilm #kanbalhi #dhivehitiktok #muniavasnews #fypシ゚viral #foryou #foryou #fypシ #fyp #foryoupage #viralvideo #Dhivehifilms @I Films mv #kanbalhithemovie #DhivehifilmIndustry @aachym #MaldivesCelebrities #ifilmsmv @leef 🍂 @Washiya Mohamed @Thaathi Adam @Ahmed Ifnaz Firag @Ishfan @ORKEYZ inc @Nadhyh Channa @Shahyd Legacy ♬ original sound – MUNIAVAS

ލިޔުންތެރިޔާގެ ފުރަމަލަ

އަޙްމަދު ރަޝީދު
އަޙްމަދު ރަޝީދު
ހުރިހައި ދާއިރާއެއްގެ ލިޔުންތައްވެސް މުނިއަވަސްގެ ފައުންޑަރ އަދި ޗީފް އެޑިޓަރ ލިޔާނެއެވެ.

ގުޅުންހުރި ލިޔުން: