ފެން ހުސްކުރި ފުޅިއެއްގެ ފުލުގައި ލިޔެފައިވާ މެސެޖު

ޕްލާސްޓިކް ފުޅިން ނުރައްކާތެރި ކެމިކަލް ބޭރުކުރެއެވެ. ފުޅީގެ ފުލުގައި ޖަހާފައިވާ ޚާއްޞަ ފާހަގައަށް ސަމާލުކަން ދޭށެވެ. ތިނެސްކަނެއްގެ ތެރޭގައި ޖަހާފައި ހުންނަ ނަންބަރުން އަންގައިދެނީ ފުޅި ހަދަން ބޭނުންކޮށްފައިވަނީ ކޮންކަހަލަ ޕްލާސްޓިކެއް ކަމެވެ.

– ފުޅީގެ ފުލުގައި ޕީއީޓީ ނުވަތަ ޕީއީޓީއީ (PET or PETE) ޖަހާފައި ތިނެސްކަނެއްގެ ތެރޭގައި 1 ޖަހާފައިވާނަމަ އެއީ އެންމެ ފަހަރަކު ބޭނުންކުރަން ރައްކާތެރި ފުޅިއެކެވެ. އަހަރެމެން ބޯން ބޭނުންކޮށް އުޅޭ މިނަރަލް ވޯޓަރ ފުޅިތަކުގައި ޖަހާފައި ހުންނަނީ މި ނިޝާނާއި ނަންބަރެވެ. މިފަދަ ފުޅިތައް އޮކްސިޖަން އަށް ނުވަތަ އިރުގެ އަލިކަންވެސް ހިމެނޭ ގޮތަށް، ގަދަ ހޫނަށް ހުށަހެޅުމުން އެފަދަ ފުޅިން ވިހަ މާއްދާތައް ފުޅީގައި ހުންނަ ތަކެއްޗާއި އެކުވާނެ އެވެ. އެހެންކަމުން މިނަރަލް ވޯޓަރ ހުސްކުރި ފުޅިއަށް ފެން އަޅައިގެން ބޭނުންކުރުމާއި ފަނި ނުވަތަ ޖޫސް އަޅައިގެން ބޭނުންކުރުމަކީ ވެސް ރައްކާތެރި ކަމެއް ނޫނެވެ.

– ފުޅީގައި ނުވަތަ ޕްލާސްޓިކް ތަށީގައި ޕީވީސީ އަދި ޕީސީ (PVC and PC) ޖަހައި، ނަންބަރު 3 ނުވަތަ 7 ޖަހާފައި ވާނަމަ އެފަދަ ފުޅި ބޭނުންކުރުމާއި ދުރުހެލިވާށެވެ. ސަބަބަކީ އެފަދަ ފުޅީގައި ނުވަތަ ޕްލާސްޓިކް ތަށީގައި ހުންނަ ވިހަ މާއްދާތައް ފެނަށް ނުވަތަ ކާބޯތަކެއްޗަށް ވަންނާނެ އެވެ. އެފަދަ އާލާތެއްގައި މާގިނަދުވަސް ވާންދެން ކާބޯތަކެތި ބަހައްޓާފައި ހުއްޓާ ބޭނުންކޮށްފިނަމަ ނުރައްކާތެރި ސިއްޙީ މައްސަލަތަކަކާއި ކުރިމަތިލާންވެސް ޖެހިދާނެ އެވެ. މިފަދަ ޕްލާސްޓިކްގެ ތެރޭގައި ކާބޯތަކެތި ބަންދުކުރަން ބޭނުންކުރާ އަލިކޮށް ހުންނަ ޕްލާސްޓިކް ރެޕަރ އާއި ކައްކާ ތެޔޮ (ކުކިންގ އޮއިލް) ފުޅި ހިމެނެ އެވެ.

ޕްލާސްޓިކްގެ ބާވަތެއް ކަމަށްވާ ޕޮލިތައިލީން އަށް ދީފައިވާ ނަންބަރަކީ (2 އަދި 4) ކެވެ. ޕޮލިޕްރޮޕައިލީން (5 އަދި PP) އަށް ދީފައިވާނީ މި ނަންބަރާއި ކޯޑެވެ. މިއީ އެއް ފަހަރަށް ވުރެން ގިނަފަހަރު ބޭނުންކުރަން ރައްކާތެރި ޕްލާސްޓިކެވެ. ޖަގު، ދިޔާ އޯމޯ ފުޅި، ތެޔޮ ފުޅި، ކުޅޭ ތަކެއްޗާއި ބައެއް ޕްލާސްޓިކް ކޮތަޅު ތައްޔާރުކޮށްފައި ހުންނަނީ ‘2’ އަށް ގިންތިކޮށްފައިވާ ޕްލާސްޓިކުންނެވެ. މިފަދަ ޕްލާސްޓިކް ފުޅިވެސް ރައްކާތެރިވަނީ ފިނިކޮށްފައި ހުންނަ ތަކެތި އެޅުމަށް އެކަންޏެވެ.

3- ސާފުތާހިރުކަމަށް ފަރުވާކުޑަވުމާއި ބެކްޓީރިއާ

ބޭނުންކޮށްފައި ހުންނަ ޕްލާސްޓިކް ފުޅިން ފެންބުއިމެކޭ ފާޚާނާ ތަށީގައި ދޫ ހޭކުމެކޭ ހަމަ އެއްވެސް ތަފާތެއް ނެތެވެ. ނުވަތަ ކުއްތާއެއް ގެންގުޅެފައިވާ ކުޅޭއެއްޗެއްގައި ދޫލުމެކޭ ހަމަ އެއްވެސް ތަފާތެއް ނެތްކަމަށް ސައިންސްވެރިން ބުނެއެވެ. އެހެނީ އެފަދަ ފުޅީގައި އަށަގަނެފައި ހުންނަ ބެކްޓީރިޔާ ޖަރާސީމުގެ އަދަދު އިތުރުވެގެން ދަނީ ރައްކާތެރި ހައްދަށް ވުރެން މާބޮޑަށްވެސް މައްޗަށެވެ. އެހެންވާން މެދުވެރިވަނީ އަހަރެމެންގެ އަތް ނުސާފުކޮށް ހުއްޓާ ފުޅީގައި އަތްލުމުން، ފުޅިން ރީތިކޮށް ފެން ނުހިއްކުން ނުވަތަ ފުޅިއަށް ހޫނުފެން އަޅައިގެން ގެންގުޅުމުންނެވެ.

އެހެންވީމާ މިކަމަށް އޮތީ ކޮން ހައްލެއް ހެއްޔެވެ؟ ފުޅި ރަނގަޅަށް ދޮންނާށެވެ. ދޮންނާނީ ތާފަނާފެން ބޭނުންކޮށްގެން ތަށި ދޮންނަން ބޭނުންކުރާ ސައިބޯންޏެއް ލައިގެންނެވެ. ނުވަތަ ރާހުތް ބޭނުންކުރެވިދާނެ އެވެ.

ފުޅި ކިތަންމެ ރަނގަޅަށް ދޮވުނަސް، އެފަދަ ފުޅި ބޭނުންކުރުމުން ކާނާ ވިހަވުން ނުވަތަ ހެޕަޓައިޓިސް ޖެހުންފަދަ ކަމަކާވެސް ކުރިމަތިލާން ޖެހިދާނެ އެވެ. ދިރާސާތައް ދައްކާގޮތުން ފުޅީގައި އެންމެ ގިނައިން ބެކްޓީރިއާ ޖަރާސީމު ހުންނަނީ ފުޅީގެ ކަރާއި ތުން ހިމެނޭ ހިސާބުގައެވެ. މަތިޖަހަން ތުރެޑް ކަނޑާފައި އެހުންނަ ބައިގައެވެ. އެހެންކަމުން އަބަދުވެސް ރައްކާތެރި ފަޅީގައި ހުރުމަށްޓަކައި އެފަދަ ފުޅިން ފެންބުއިމަށް ފެންބޯ ހޮޅި ބޭނުންކުރާށެވެ.

2- ބޯން ބޭނުންކުރާ މިނަރަލް ވޯޓަރ އައިސްފައިވަނީ ކޮންތާކުން؟

ފެން ގަންނައިރު އެ ގަނެވޭ ފެނަކީ އިތުބާރުހިފޭ ބްރޭންޑަކަށް ވުން މުހިންމު

ބަންދުކޮށްފައި ހުންނަ ފެން ތައްޔާރުކުރުމަށް ބޭނުންކޮށްފައިވަނީ ސާފު ފެންއާރުތަކުން ނަގާ ފެނުންކަމަށް ވަރަށް ގިނަ ކުންފުނިތަކުން ތައްޔާރުކުރާ ފުޅީގެ ލޭބަލްގައި ލިޔެ އިޝްތިހާރުކޮށްފައި ހުންނާނެ އެވެ. ނަމަވެސް ހަޤީޤަތަކީ އެފަދަ ފުޅީގައި ހުންނަ ފެނެކޭ ގޭގެ އިސްކުރުތަކުން އަންނަ ފެނެކޭ މާބޮޑު ތަފާތެއް ނުހުންނާނެ އެވެ.

އެހެންކަމުން ބަންދުކޮށްފައި ހުންނަ ފެން ގަންނައިރު އެ ގަނެވޭ ފެނަކީ އިތުބާރުހިފޭ ބްރޭންޑަކަށް ވުން މުހިންމެވެ.

1- އެހާ ސިއްޙަތަށް ރައްކާތެރިއެއް ނޫނެވެ.

ފެން އުފައްދާ ކުންފުނިތަކުން ބޭނުންވަނީ އެމީހުންގެ މާރކެޓް ޒުވާނުންނާއި ކުޑަކުދިންނާއި ކުޅިވަރުކުޅޭ މީހުންނަށް އަމާޒުކުރާށެވެ. އެހެންކަމުން ބަންދުކޮށްފައި ހުންނަ ފެން އެމީހުން އުފައްދައި އިޝްތިހާރުކުރާނީ އެ ފެނުގައި ތަފާތު މީރު ރަހަތައް ހިމަނައިގެންނެވެ. އެއީ ގިނަ އަދަދަކަށް ހަކުރު އެކުލެވޭ ޒާތްޒާތުގެ ބުއިންތަކަށްވުރެން ޞިއްޙަތަށް ފައިދާހުރި ބުއިންތަކެއް ކަމަށް ވަކާލާތު ކުރަމުންނެވެ.

ނަމަވެސް މިކަމުގެ ޙަޤީޤަތަށް ޖެހިލާއިރު، މިފަދަ ފެނުގައިވެސް ކޯކް، ފެންޓާ އަދި ސްޕްރައިޓް ފަދަ ބުއިންތަކުގައި ހަކުރު އެކުލެވޭ މިންވަރަށް ހަކުރު ހުރެއެވެ.