ނޭޝަނަލް ސެންޓަރ ފޮޮރ ދި އާޓްސް އިން ބާއްވަމުން އަންނަ އޮފީސް ޑްރާމާ މުބާރާތުގައި މިއަހަރު 07 ފަރާތަކުން ބައިވެރިވެފައި ވާކަމަށް އެންސީއޭ އިން ބުނެފި އެވެ. 

އެންސީއޭ ހިންގުމާއި މިވަގުތު ހަވާލުވެ ހުންނެވި މުޙައްމަދު ފާރިޝް ޠާހާ މުނިއަވަސް އަށް މަޢުލޫމާތު ދެއްވަމުން ވިދާޅުވީ ޑްރާމާ ބައިވެރިކުރާ އޮފީސް، ކުންފުނިތަކަށް ފައިދާވާނެ ގޮތަށް މިފަހަރު މި މުބާރާތުގެ ޤަވާޢިދުތަކާއި އުޞޫލުތަކަށް ބަދަލުގެނެސްފައި ވާނެ ކަމަށެވެ. އެގޮތުން އުފައްދާ ޑްރާމާގެ ރައިޓްސް، އެއް އަހަރު ދުވަހަށް އެންސީއޭ އަށް ބޭއްވުމަށްފަހުން އޭގެ ފަހުން، އެ ޑްރާމާގެ ރައިޓްސް އެ އުފެއްދި އޮފީސް ނުވަތަ ކުންފުންޏަކަށް ލިބިގެންދާނެ ކަމަށެވެ. މިހެން ހެދުމުން އެ ޑްރާމާއެއް އުފެއްދި ފަރާތުން އެވޯޑްތަކަށް ހުށައެޅުމުގެ ފުރުޞަތުވެސް ލިބިގެންދާނެ ކަމަށް ފާރިޝް ފާހަގަކުރެއްވި އެވެ.

މިއަހަރުގެ މުބާރާތުގައި ބައިވެރިވަފައި ވަނީ މޯލްޑިވްސް ކަރެކްޝަނަލް ސަރވިސް، މޯލްޑިވްސް އެއަރޕޯޓްސް ކޮމްޕެނީ ލިމިޓެޑް،  މިނިސްޓްރީ އޮފް އެންވަޔަރަމެންޓް އެންޑް އެނަރޖީ، ވޭސްޓް މެނޭޖްމެންޓް ކޯޕަރޭޝަން ލިމިޓެޑް، ފެނަކަ ކޯޕަރޭޝަން، މޯލްޑިވްސް ޕޯޓްސް ލިމިޓެޑް އަދި މާލޭ ވޯޓަރ އެންޑް ސްވަރޭޖް ކަމްޕެނީ ޕްރައިވެޓް ލިމިޓެޑް އެވެ.

މުނިފޫހިފިލުވުމުގެ ދާއިރާއަށް ފަންނާނުން އިތުރުކޮށް، ފަންނުވެރީންނަށް ހިތްވަރުދީ، އަގުވަޒަންކޮށް، އެކުވެރި ވާދަވެރި މާހައުލެއްގައި ފަންނުވެރިކަން ތަރައްޤީކޮށް ދެމެހެއްޓުމަށް އެންސީއޭ އިން 2015 ވަނަ އަހަރުން ފެށިގެން ބާއްވަމުން އަންނަ މި މުބާރާތުގައި ބައިވެރިކުރާ ޑްރާމާތަކުގެ މަސައްކަތް ނިންމައި، ކްލެސިފިކޭޝަން ސެޓްފިކެޓާއި ޓްރެއިލާއާ އެކު އެންސީއޭ އަށް ހުށަހަޅަން ޖެހެނީ މެއި 10ގެ ކުރިންނެވެ.

1438 ވަނަ އަހަރުގެ ޑްރާމާ މުބާރާތުގެ ނަތީޖާ ފާޅުކުރުމުގެ ތެރެއިން – ފޮޓޯ: އެންސީއޭ

ފާރިޝް ވިދާޅުވީ މި ޑްރާމާ މުބާރާތަކީ ސަރުކާރުގެ އޮފީސްތަކާއި ކުންފުނިތަކަށް އެކަނި ހުޅުވާލެވިފައިވާ މުބާރާތެއްގެ ގޮތުގައި ގިނަބަޔަކަށް ފާހަގަވެފައިވީ ނަމަވެސް، މި މުބާރާތުގައި ކުރިއަށް އޮތްތަނުގައި ރާއްޖޭގެ އަމިއްލަ އޮފީސްތަކާއި ކުންފުނިތަކަށްވެސް ބައިވެރިވެވޭ ގޮތަށް ހުޅުވާލުމަށް ވިސްނަމުން އަންނަ ކަމަށެވެ.

ނޭޝަނަލް ސެންޓަރ ފޮޮރ ދި އާޓްސް އާއި ޓެލެވިޛަން މޯލްޑިވްސް ގުޅިގެން ބާއްވާ މި މުބާރާތުގެ ޑްރާމާތައް މިފަހަރުވެސް ދައްކާނީ އަންނަ ރަމަޟާން މަހު އެވެ. މުބާރާތުގައި 12 ކެޓަގަރީއަކުން އެވޯޑް ދޭ އިރު، ފަސް ކެޓަގަރީއަކަށް، ޓްރޮފީއާ އެކު ފައިސާގެ އިނާމު ވެސް ދެ އެވެ. އެގޮތުން އެންމެ މޮޅު ޑްރާމާއަކަށް 50،000ރ، އެންމެ މޮޅު ބަތަލު/ބަތަލާ އަށް 15،000ރ، އެންމެ މޮޅު ސަޕޯޓިން ބަތަލު/ބަތަލާ އަށް 10،000ރ. ގެ ފައިސާގެ އިނާމު ދޭނެ އެވެ.

މި މުބާރާތުގައި 2015 ވަނަ އަހަރު 05 އޮފީހަކުން، 2016 ވަނަ އަހަރު 06 އޮފީހަކުން އަދި މިއަހަރު 07 އޮފީހުން ބައިވެރިވެފައި ވެއެވެ.

ލިޔުންތެރިޔާގެ ފުރަމަލަ

މަރިޔަމް ދީމާ
ތަފާތު މަޢުޟޫތަކަށް ދީމާ ލިޔާނެއެވެ. އެންްމެ ޝައުޤުވެރިވަނީ ފިލްމީ ދާއިރާ އަށެވެ.

ގުޅުންހުރި ލިޔުން: