“ކިސްއެއް ދީ.. މިތަނަށް.. އޭރުން އެއްވެސް ބަހަނާއެއް ނުދައްކާ ދާނަން..” ތުންފަތުގައި ޝަހާދަތް އިނގިލި ޖައްސާލަމުން ޔޫޝައު ލާނެތް ގޮތަކަށް ހީލާފައި އެހެން ބުނެލުމުން އައިކާއަށް ދެލޯ ބޮޑުކޮށްލެވުނެވެ. އައިކާ ޔޫޝައުއާ ދިމާއަށް އިލޮށިފަތި މަޅައިގަތުމާއެކު ޔޫޝައު ދުއްވައިގަތެވެ. އައިކާވެސް ޔޫޝައުގެ ފަހަތުން އިލޮށިފަތި ހިފައިގެން ދުއްވައިގަތެވެ. ދެމީހުން ދުވަމުން ގޮސް ޔޫޝައު އުޅޭ ގެ ހުންނަ މަގަށް ލަނބާލިތަނާ އެމަގުން ނުކުތް މީހެއްގެ ގައިގައި ލައިގެންފައި ޔޫޝައު އެމީހާއާއެކު ވެއްޓުނެވެ. އައިކާވެސް އައި ބާރުމިނުގައި ކޮންޓްރޯލް ނުކުރެވި ޔޫޝައުގެ ގައިގައި އަޅައިގެންފައި ވެއްޓުނީ އަނެއްމީހާގެ ގައިމައްޗަށެވެ.

އައިކާ ވެއްޓުނު ވަގުތު އޭނާގެ އަތް ވިދުނު ގޮތަކުން އަތަށް ތަދުވިއެވެ. ނަމަވެސް ހިތްވަރުކޮށްފައި ތެދުވަންވެގެން ބިންމަތީގައި އަތް ވިއްދާލިއެވެ. އޭނާގެ މޫނުމައްޗަށް އިސްތަށިގަނޑު ވެރިފައި އޮތުމުން ދެމީހުންނަކަށް ދެމީހުންގެ މޫނެއް ނުފެނެއެވެ.

“އައްދޯއި.. ނަގޫ**..” އައިކާގެ ތެދުވަންވެގެން ހިފާލި ވަގުތު އޭނާގެ ފައި އެޅުނީ އެޒުވާނާގެ އެންމެ ނާޒުކު ދިމާގައެވެ. އެވަގުތު އެޒުވާނާގެ ދުލުން ހުތުރު ބަސްތަކެއް ބޭރުވިއެވެ. އައިކާއަށް އެއްވެސް އިޚްތިޔާރަކާއިނުލާ އެޒުވާނާގެ މޫނަށް ބަލާލެވުނެވެ. އެވަގުތު އޭނާއަށް ސިހުމެއް ލިބުނީ އެއީ މާޒް ކަމަށް ވީތީއެވެ. މާޒްގެ ދުލުން އެފަދަ ހުތުރު ބަހެއް އޭނާ އަޑުއެހި މީ ފުރަތަމަ ފަހަރެވެ. އެހެންކަމުން އޭނާއަށް ހައިރާންކަމާއެކު މާޒް އަށް ބަލަން އޮވެވުނީއެވެ.

“އައްދޯއި.. އާހް..” މާޒްއަށް އެދިމާގައި އަތްއަޅަމުން އެއްވެސް އިޚްތިޔާރަކާއިނުލާ ބުނެވުނެވެ.

“ތަންކޮޅެއް ބަލާލައިގެން އުޅެބަލަ..” މާޒް ރުޅިވެރިކަމާއެކު ބުނެލަމުން އައިކާއާ ދިމާއަށް ބަލާލިއެވެ. މާޒްއަށް އެއީ ކާކުކަން އެނގުމާއެކު ވަގުތުން އޭނާގެ ރުޅިގަނޑު ފިނިވެއްޖެއެވެ.

“އިކާ! ތަނަކަށް ތަދުވިތަ؟” މާޒް އޭނާއަށް ވަމުންދިޔަ ތަދަކަށް ނުބަލާ އައިކާއަށް ސަމާލުކަންދީ އައިކާގެ ތަނަކަށް ތަދުވިތޯ ސުވާލުކުރިއެވެ. އޭރު ޔޫޝައުވެސް ތެދުވެގެން އައިކާ ނެގުމަށްޓަކައި ގާތްވަނީއެވެ.

“ނޫން.. އެކަމް ސޮރީ.. ގަސްތުގައެއް ނޫން..” މާޒްއަށް ވަރަށް ތަދުވާނެކަން ވިސްނުމުން އައިކާ ބުނެލިއެވެ.

“އިޓްސް އޯކޭ.. ސޮރީ އަހަރެންނަށް އެކަހަލަ އެއްޗެއް ބުނެވުނީމަ.. ގަސްތަކު ނޫން..” ނޭނގުމެއްގެ ތެރޭގައި ނަމަވެސް އޭނާއަށް އައިކާއާ ދިމާއަށް އެފަދަ އެއްޗެއް ކިޔުމުން މާޒް ދެރަވިއެވެ.

“އިކާ އޯކޭ ދޯ؟ މާޒް އޯކޭތަ؟” ޔޫޝައު އައިކާ ނަގާފައި މާޒް ތެދުވަން އަތް ދިއްކޮށްލަމުން އަހާލިއެވެ.

“އޯކޭ ވާނީ މިވަރަކަށް.. މަގޭ ދުވަސް ކިރިޔާ ނުދިޔައީ.. އެކަމް ދެން އިކާ ވީމަ މާފުކޮށް ހިތްހެޔޮކޮށްފިން..” މާޒް އެހެން ބުނެލާފައި އެނބުރި ގެޔާއި ދިމާއަށް ދާން ހިނގައިގަތެވެ. އޭނާ ލައިގެން ހުރި ހުދުކުލައިގެ ގަމީހާއި ކަޅު ފަޓުލޫނު ވަނީ ހިރަފުހުން ތަތްތެޅިފައެވެ. އޭނާ ގެއަށް ދިޔައިރު ހިތާހިތުން ކުދިކިޔަމުން ދިޔައެވެ. ހުރިހާ ކަމަކީވެސް ޔޫޝައުގެ ކަންތަކެވެ. ގައިމުވެސް އޭނާ ކޮންމެވެސް ގޯނާއެއް ނުކުރަނީހެއް އައިކާ އިލޮށިފަތި ހިފައިގެން އޭނާ ފަހާ ނުދުވާނެއެވެ. ލޯބިވެރިންނެއް ކަމަކު އެކަހަލަ ސަމާސާކޮށްގެން ނުވާނެ ނޫން ހެއްޔެވެ؟ މިހާ ދުއްވާ އެއްޗެހި ގިނަ ޒަމާނެއްގައި އެކްސިޑެންޓެއްވެސް ހިނގުމަކީ ދުރުކަމެއް ނޫނެވެ. އެވަރު ޔޫޝައުއަށް ނުވިސްނެނީ ހެއްޔެވެ؟ އަންހެންކުއްޖަކު ކާމިޔާބު ކުރެވުނަސް އެއީ ދެން ތަންފުކެއް ބޮޑުވަރެއް ނޫން ހެއްޔެވެ؟ ކަން ހިނގިގޮތް ނޭނގިހުރެ މާޒްއަށް ކުށްވެރިކުރެވުނީ ޔޫޝައުއެވެ. މިއަދު އޭނާއަށް ކޮންމެ ގޮތެއްވިޔަސް އައިކާއަށް ގެއްލުމެއް ނުލިބުނީތީ އޭނާ ހިތްހަމަޖައްސާލައިގެން ހުރެ ގެއަށް ވަތްތަނާ ރަމްޒިއްޔާގެ ސުވާލުތަކާއި ކުރިމަތިވިއެވެ. މާޒް އެއީ ކުޑަކުޑަ އެކްސިޑެންޓެއް ވީކަމާއި އޭނާއަށް އެއްވެސް ކަމެއް ނުވާކަމަށް ބުންޏެވެ.

**********

“ބޭބީ ކީއް ތިކުރީ؟ މާޒްގެ.. ގޮއްވާލީނު ތި..” ގެއަށް ދަމުން ޔޫޝައު ލާނެތް ގޮތަކަށް އެހެން ބުނެލުމުން އައިކާ ގާތަށް ކުޑަކޮށް ރުޅިއައެވެ. ހުރިހާ ކަމެއްވެސްވީ ޔޫޝައުއާ ހެދިއެވެ. އެކަމަކު ކުށްވެރި މިވީ އޭނާއެވެ.

“މީ ޔޫޝްގެ ކަންތަކޭ.. ހަމަ ރީތިކޮށް ދާށޭ ބުނީމަ ދިޔަނަމަ އެހެނެއް ނުވީހެއްނު..” އައިކާ ހިތްހަމަނުޖެހިފައި ބުނެލިއެވެ.

“އަހަރެން ނުދިޔަޔަސް ބޭބީ ކުނިކަހަން އޮތްނަމަވެސް އެހެނެއް ނުވީހެއްނު.. ވެއްޖެވިއްޔަ އަހަރެން ފަހާ ދުވަން..” ޔޫޝައު މަޖާވެލާފައި ބުނެލިއެވެ.

“ހުހް.. މަޖަލެއް ނޫނޭ.. އެކަހަލަ ޑާރޓީ އެއްޗެހި ބުނާތީ ވާގޮތޭ އެއީ..” އައިކާ ހުރީ ދެންމެ އެވީ ގޮތަކުން ރުޅިއައިސްފައެވެ.

“ޑާރޓީ އެއްޗިއްސޭ!!؟ ގައިމު އެއަށްވުރެ މާ ޑާރޓީ ކަންތައް ކުރަން ޖެހޭނެ ދުވަހެއްވެސް އަންނާނެ.. އެދުވަހަކުންވެސް އެހެންތަ ހަމަ ހަދާނީ؟” ޔޫޝައު ލާނެތް ގޮތަކަށް ހީލަމުން ބުނެލިއެވެ. ޔޫޝައު އެބުނީ ކީކޭކަން އެނގުމުން އައިކާ ވަރަށް ލަދުގަތެވެ. ނަމަވެސް އޭނާ އެކަން ފޮރުވާލުމަށް ރުޅިވެރިކަން ދައްކާލިއެވެ. އިލޮށިފަތި މަޅައިގެންފައި ހަމަ މިހާރު ދާށޭ ބުނެލިއެވެ. ޔޫޝައުވެސް ފަހުން އަންނާނަމޭ ކިޔާފައި ދިޔައީ އިތުރަށް އައިކާ ރުޅި ނާރުވަންވެގެންނެވެ.

**********

“މަންމާ! އައިސް ކިއުބް އެބަހުރިތަ؟” މާޒް ރަމްޒިއްޔާ ގާތުގައި އަހާލިއެވެ.

“ހޫމް.. ހުންނާނެ ފުރިޖްގަ.. ކިހިނެއްވީ؟” ރަމްޒިއްޔާ އެހެން އަހާލުމުން މާޒް ބުނީ ވަރަށް ފިނިކޮށް އެއްޗެއް ބޯލަން ބޭނުންވީ ކަމަށެވެ. ރަމްޒިއްޔާ ހީލާފައި ކޮޓަރިއަށް ދިއުމުން މާޒް އަވަސްއަވަހަށް ބަދިގެއަށް ވަދެ ތަށްޓަކަށް އައިސް ކިއުބް އަޅައިގެން ކޮޓަރިއަށް ދިޔައެވެ. ކޮޓަރިއަށް ވަދެ ތަޅުލާފައި ފަޓުލޫނު ބާލާފައި އައިސް ކިއުބް ތަށި ހިފައިގެން ގޮސް އެނދުގައި އިށީނދެ ބޮނޑިތާންކުރަން ފެށިއެވެ. އޭރުވެސް އެތަން ހުރީ ކޮންމެވެސް ވަރަކަށް ދުޅަވެފައެވެ. އިރުކޮޅެއް ވަންދެން ބޮނޑިތާން ކުރުމަށްފަހު ތަށި ބަހައްޓާފައި އެނދުގައި އޮށޯވެލައިގެން އޮއްވާ އޭނާއަށް ނިދުނު އިރެއްވެސް ނޭނގުނެވެ.

“ދަރިފުޅާ! ކީއް ތިކުރަނީ؟ ނުކުމެބަލަ ސައިބޯން.. މިހާރު އެހެރަ ދިހައެއް ޖަހަނީއޭ..” ރަމްޒިއްޔާ ދޮރުގައި ޓަކި ޖަހަމުން ގޮވާ އަޑަށް މާޒްއަށް ހޭލެވުނެވެ.

“އާނ.. މަންމާ މި ނުކުންނަނީއޭ..” މާޒް ރަމްޒިއްޔާއަށް އިވޭވަރަށް ބުނެލިއެވެ. މާޒްގެ އަޑު އިވުމުން ރަމްޒިއްޔާ ހިތްހަމަޖެހިގެން ހުރެ ބަދިގެއަށް ދިޔައެވެ.

“ވަޓް!!؟ މިހެން ހުއްޓާތަ އަހަރެންނަށް ނިދުނީ!!؟” މާޒް ފާޚާނާއަށް ދާން ތެދުވި ވަގުތު ކޮޓަރީގައި ހުރި ބޮޑު އަލަމާރީގެ ލޯގަނޑުން އޭނާގެ ސޫރަ ފެނުމުން ޤަބޫލުނުކުރެވިފައި އޭނާއަށް މަޑުމަޑުން ބުނެވުނެވެ. އޭނާއަކީ ދުވަހަކުވެސް ބަރަހަނާ ހާލުގައި ނިދާ މީހެއްނޫނެވެ. ނަމަވެސް މިއަދު ކަން ހިނގިގޮތުން އެހެން އެކަންވީއެވެ. އޭނާއަކީ ދުވާލު ނިދާއިރު ދޮރު ތަޅުލާ މީހަކަށް ނުވީނަމަވެސް މިއަދު ދޮރު ތަޅުލާފައި ބެހެއްޓުނުކަންވެސް ނަސީބެކޭ އޭނާގެ ހިތަށްއެރިއެވެ. މިފަދަ ޚިޔާލުތަކެއްގައި ހުރެ އޭނާ ގޮސް ފާޚާނާއަށްވަދެ ފެންވަރާލައި ތައްޔާރުވެލައިގެން ބޭރަށް ނުކުތްއިރު ރަމްޒިއްޔާ އިނީ އޭނާގެ އިންތިޒާރުގައެވެ.

“ދަރިފުޅު ބަލީތަ؟ މަންމަ ހާދަ ވަރަކަށް ގޮވައިފީމޭ..” ރަމްޒިއްޔާ މާޒް ފެނުމާއެކު ސުވާލުކޮށްލިއެވެ.

“ނޫނޭ މަންމާ.. ހަމަ އޮށޯވެލައިގެން އޮއްވާ ނިދުނީ..” މާޒް އެހެން ބުނެލުމުން ރަމްޒިއްޔާ ހީލިއެވެ.

“ދެންވެސް އަވަހަށް ސައިބޯން އުޅޭ.. ބައްޕަވެސް އެތައްއިރަކު އިނދެފައި ފިހާރައަށް ގޮސްފި.. ދަރިފުޅުވެސް ސައި ބޯލައިގެން ދެން ދޭ އިނގޭ ފިހާރައަށް..” ރަމްޒިއްޔާ ތަށިތައް ގާތްކޮށްލަދެމުން އެހެން ބުނެލުމުން މާޒް އާނއެކޭ ބުނެލިއެވެ.

މާޒް ސައި ބޮއިގެން ފިހާރައަށް ދިޔައިރު މަންސޫރު އިނީ ފުން ވިސްނުމަކަށް ގެއްލިފައެވެ. އޭނާ ވިސްނަމުން ދިޔައީ މާޒް ގާތުގައި އޭނާއަކީ މާޒްގެ އަސްލު ބައްޕަ ނޫންކަން ބުނެދޭނެ ގޮތަކާއިމެދުގައެވެ. މާޒް ގާތުގައި އެވާހަކަ ބުނުން މިހާރުވެސް މާ ލަސްވެއްޖެކަމުގައި އޭނާގެ ހިތް ބުނަނީއެވެ. އަނެއްކާ އޭނާ އެވާހަކަ ބުނުމުން މާޒްގެ ހިތް އޭނާއާމެދު ގޯސްވެދާނެބާއެވެ.

“ބައްޕާ!” މާޒް ގޮސް މަންސޫރު ގާތުގައި ހުރި ގޮނޑީގައި އިށީންނަމުން ގޮވާލިއެވެ. އެއާއެކު މަންސޫރަށް ސިހިފައި ބަލާލެވުނެވެ.

“ދަރިފުޅު ތިއައީ ދޯ؟ ބައްޕަ ވަރަށް ގިނައިރު އިނިން ދަރިފުޅު ނުކުމޭތޯ..” މަންސޫރު ހަމަޖެހޭގޮތް ދައްކަމުން ބުނެލިއެވެ.

“ބައްޕަ ކޮންމެވެސް ކަމަކާ ވަރަށް ބޮޑަށް ވިސްނާހެން އެބަހީވޭ..” މަންސޫރުގެ މޫނަށް ބަލާލަމުން މާޒް ބުނެލިއެވެ. އެއާއެކު މަންސޫރު ފުން ނޭވައެއް ދޫކޮށްލިއެވެ.

“އާނ.. ވަރަށް ބޮޑަށް ވިސްނޭ އެބަ.. ވިސްނަންޖެހޭ ކަންތައްތައްވެސް ހުންނާނެތާ..” މަންސޫރު އެހެން ބުނެލުމުން މާޒް ހައިރާންވިއެވެ. އެހާ ހަމަޖެހޭ އުފާވެރި ދިރިއުޅުމެއްގައި އުޅޭ މީހަކު އެހާބޮޑަށް ވިސްނަންޖެހޭ އޮންނާނީ ކޮންކަމެއްބާއޭ އޭނާގެ ހިތަށްއެރިއެވެ. އަނެއްކާ މަންމައާއި ބައްޕައާއި މައްސަލައެއް ޖެހުނީބާއެވެ. އެކަމަކު އެދެމީހުން އުޅޭގޮތުން އެކަހަލަ އެއްވެސް ނިޝާނެއް ނުފެނެއެވެ.

“ބައްޕަ ވާހަކައެއް އެހިއްޔާ ދަރިފުޅު ތެދުތެދަށް ޖަވާބު ދޭނަންތަ؟” މަންސޫރު ކުއްލިއަކަށް އެހެން އަހާލުމުން މާޒް ހައިރާންވިއެވެ. އަނެއްކާ ބައްޕަ އެ އަހަން އުޅެނީ ކޮން ވާހަކައެއްބާއޭ މާޒްގެ ހިތަށްއެރިއެވެ.

“އާނ.. ބައްޕައަށް ހީވަނީތަ އަހަރެން ބައްޕައަށް ދޮގު ހަދާފާނެއޭ؟ އަހަރެން ދުވަހަކުވެސް ބައްޕައަކަށް ދޮގެއް ނުހަދަމެއްނު..” މާޒް އެހެން ބުނެލުމުން މަންސޫރު ބޯޖަހާލިއެވެ.

“ކުރިން ރެއަކު ދަރިފުޅު ވާރެޔާ ތެމިގެން އައިމެއްނު.. އެރޭ ވީގޮތް ކިޔައިދީބަލަ.. ދަރިފުޅު ނުބުންޏަސް ވަރަށް ބޮޑު ކަމެއް ވެއްޖެކަން ދަރިފުޅުގެ މޫނުމަތިން ވަރަށް ރަނގަޅަށް އެނގުނު.. އެކަމަކު އެރޭ އެއްވެސް ސުވާލެއް ނުކުރީ އެއީ އެވާހަކަ ދައްކަން އެންމެ ރަނގަޅު ވަގުތުކަމަށް ނުފެނުނީމަ..” މަންސޫރު އެހެން ބުނެލުމުން މާޒް ފަސްޖެހުނެވެ. އައިކާގެ ވާހަކަ ބުނުމުން މަންސޫރު ހިތަށް އަރާނީ ކީކޭބާއޭ އޭނާގެ ހިތަށްއެރިއެވެ. ނަމަވެސް ބައްޕަ ގާތު ތެދުތެދަށް ޖަވާބުދޭނަންކަމަށް ވަޢުދުވެސް ވެވިއްޖެއެވެ. އެހެންކަމުން މާޒް އެރޭ ކަންތައް ވީގޮތް މަންސޫރަށް ކިޔައިދިނެވެ.

“ތިވީ ވަރަށް ދެރަގޮތެއް.. އެކަމަކު މީ ދުނިޔެ.. ދުނިޔޭގަ އުޅޭއިރު ވަރަށް ގިނަ ކަންތައްތަކާ ކުރިމަތިލާން ޖެހޭނެ.. ކޮންމެ ކަމެއްވެސް ވާނީ ރަނގަޅަކަށް..” މަންސޫރު ދެރަވެފައި އިނދެ ބުނެލީ މާޒްއަށް ހިތްވަރެއް ލިބޭނެފަދަ ގޮތަކަށެވެ.

“އެކަމަކު ބައްޕާ.. އަހަރެން އިކާދެކެ ވަރަށް ލޯބިވޭ.. ދުވަހަކުވެސް އެހެން ކުއްޖަކުދެކެ ލޯބިވެވޭނެކަމެއް ނޭނގެ..” މާޒް އިނީ އޭނާގެ ހިތުގެ އުދާސްތައް މަންސޫރުގެ ކުރިމައްޗަށް ބަންޑުންކޮށްލަން ނުހަނު ބޭނުންވެފައެވެ. އޭނާގެ ހިތަށް ހަމަޖެހުމެއް ލިބޭތޯއެވެ.

“ދަރިފުޅާ! ތިހެން ވިސްނާކަށް ނުވާނެ.. ބައްޕަގެ ޒުވާން އުމުރުގަ ބައްޕަވެސް ތިހެން ބުނީމޭ.. އޭރު ބައްޕަ އިނދެގެން އުޅުނު މީހާ ހިލޭ ފިރިހެނަކާ އެކީ އޮއްވާ ފެނުނީމަ ބައްޕަގެ ހިތަށް ވަރަށް އަސަރުކުރި.. އެމައްސަލަގަނޑުގެ ތެރޭގަ ބައްޕަ އޭނަ ވަރިކުރީ.. އޭގެފަހުން ބައްޕަ ވަރަށް ދުވަސްވަންދެން އެއްވެސް ކުއްޖަކާ ރައްޓެހިވެސްނުވެ ހުރިން.. ބައްޕަގެ މަންމަމެން ވަރަށް ކީ އެހެން ކުއްޖަކު ހޯދައިގެން އިންނާށޭ.. އޭނައަށްވުރެ މާރަނގަޅު ކުދިން ލިބޭނެޔޭ.. އެކަމް ބައްޕަ އޭނަދެކެ އެހާ ލޯބިވާތީ އެވާހަކަ ޤަބޫލެއްނުކުރަން.. އަބަދުވެސް ޤަބޫލުކުރީ ދެން އިތުރު ކުއްޖަކުދެކެ ލޯތްބެއް ނުވެވޭނެޔޭ.. އެހެން އުޅެނިކޮށް ދަރިފުޅުގެ މަންމައާ ދިމާވީ.. ދެން މަންމައާ ގުޅުން އުފެދި ކައިވެންޏާ ހަމައަށް އައީ.. އޭރަކު ބައްޕަ މަންމަދެކެ ކުޑަކޮށްވެސް ލޯތްބެއް ނުވޭ.. އެކަމަކު ބަލާބަލަ މިހާރު.. މަންމައަށްވުރެ ބޮޑަށް ލޯބިވާ އިތުރު އެކަކުވެސް ނެތް.. އިރާދަކުރެއްވިއްޔާ ދަރިފުޅަށްވެސް އައިކާއަށްވުރެ މާރަނގަޅު ކުއްޖަކު ލިބޭނެ.. ދަރިފުޅަށްވެސް ދެން އެންމެ ރަނގަޅުވާނީ އައިކާގެ މަތިން ހަނދާން ނައްތާލާފައި ރަނގަޅު ކުއްޖަކު ހޯދައިގެން ދިރިއުޅުމެއް ފެށިއްޔާ.. ތިހެން އުމުރު ބޭކާރުކޮށްލާކަށް ނުވާނެ ދަރިފުޅާ..” މަންސޫރު ބެލީ އޭނާގެ ދިރިއުޅުމުން މިސާލު ދައްކައިގެން މާޒްއަށް ވިސްނައިދެވޭތޯއެވެ.

“ނޫން ބައްޕާ.. ތިކަމެއް ނުވާނެ.. އަހަރެންގެ ހިތް ބުނަނީ އައިކާ އަދި އަހަރެންގެ ގާތަށް އަންނާނެޔޭ.. އަހަރެން އެދުވަހަކަށް އިންތިޒާރު ކުރާނަން..” މާޒް އޭނާގެ ފަހުބަސް އިއްވުމުން މަންސޫރު އިތުރަކަށް އެވާހަކައެއް ނުދެއްކިއެވެ. ކިތަންމެ ވަރަކަށް އެވާހަކަ ދެއްކިޔަސް މިވަގުތު މާޒްގެ ވިސްނުން ބަދަލުނުވާނެކަން އޭނާއަށް އެނގޭތީއެވެ.

“އަދި ބައްޕަ ދަރިފުޅު ގާތު ދައްކަންޖެހޭ ވަރަށް މުހިންމު ވަރަށް ބޮޑު ވާހަކައެއް އެބައޮތް.. އެކަމަކު އެވާހަކަ ދައްކާނީ މިހާރަކު ނޫން.. މަންމަވެސް އިނދެގެން އެވާހަކަ ދައްކާނީ.. ފަހަރެއްގަ އެވާހަކަ ދެއްކީމަ ދަރިފުޅުގެ ހިތް ބަދަލުވެސް ވެދާނެ.. ދެން ބައްޕަ މިވަގުތު ގޮސްލަނީ އިނގޭ.. އަދި އަންނާނަން ބަންދުކުރުމުގެ ކުރިން..” މަންސޫރު އެހެން ބުނެފައި ދިޔައީ މާޒް ސުވާލުތަކެއްގެ ތެރެއަށް ދޫކޮށްލާފައެވެ.

ބައްޕަ އެހެން އެބުނީ ކީއްވެބާއެވެ. އޭނާ ގާތުގައި ދައްކަންޖެހޭ އެހާބޮޑު އަދި އެވާހަކައެއް ދެއްކުމުން އޭނާގެ ހިތް ބަދަލުވެދާނެފަދަ ވާހަކައަކީ ކޮބައިބާއޭ މާޒްގެ ހިތަށްއެރިއެވެ. އަދި މަންމަ އިންދާ ނޫނީ އެވާހަކަ ނުދައްކަން އުޅޭ ސަބަބަކީ ކޮބައިބާއެވެ. މިފަދަ އެތައް ސުވާލެއް މާޒްގެ ހިތަށްއަރާ ފައިބަމުން ދިޔަ ނަމަވެސް އޭނާއަށް އިތުރަށް އެކަމާ ދޭތެރޭ ވިސްނާނެ ފުރުސަތެއް ނުލިބުނީ ފިހާރައަށް ކަސްޓަމަރެއް އައުމުންނެވެ. އެމީހާ ގަންނަން އައި އެއްޗެހި ގަނެގެން ދިޔަތަނާ އަނެއްކާވެސް އެހެން މީހަކު އައެވެ. ދުވަހަކީ ހުކުރު ދުވަހަށްވުމުން ފިހާރަ ބަންދުކުރަން ވަންދެންވެސް އޭނާއަށް ވަރަށް ބާރުބޮޑެވެ. އެހެންކަމުން ހުކުރު ދުވަހު އާންމުކޮށް އެގާރަ ޖަހާއިރު ބަންދުކުރާ ފިހާރަ މިއަދު އޭނާއަށް ބަންދުކުރެވުނީ އެގާރަ ގަޑި ބައިވެސްވީ ފަހުންނެވެ. އޭނާ ފިހާރަ ބަންދުކޮށްފައި ގޮސް ކޮޓަރިއަށް ވަދެފައި އޭނާގެ ނުވަ އަހަރުގެ ކޮއްކޮ އެލީނާއަށް ގޮވާލިއެވެ.

“ކީކޭ ދޮންބޭ؟” އެލީނާ އައިސް ކޮޓަރިއަށް ވަންނަމުން ސުވާލުކޮށްލިއެވެ.

“އަން.. މި ގަމީހާއި ފަޓުލޫނު ގެންގޮސް މަންމަ އަތަށް ދީފަ ބުނޭ އިސްތިރިކޮށްދޭށޭ އިނގޭ.. ދޮންބެ މި ވަންނަނީ ފެންވަރަން..” މާޒް އޭނާގެ އަލަމާރިން މަޑު ނޫކުލައިގެ އަތްދިގު ގަމީހަކާއި ކަޅު ފަޓުލޫނެއް ނަގާ އެލީނާ އަތަށް ދެމުން ބުނެލިއެވެ. އެލީނާ ދިއުމުން މާޒް ކޮޓަރި ތަޅުލާފައި ތުވާލި އޮޅާލައިގެން ފާޚާނާއަށް ވަނެވެ. ފެންވަރާ ތާޒާވެލައިގެން ނުކުތްތަނާ އޭނާގެ ފޯނު ރިންގުވާ އަޑު އިވުމުން އޭނާ ގޮސް ބަލާލިއިރު ގުޅަނީ ސަނާއެވެ.

“ހެލޯ! މާޒްތަ؟ މިއަދު ހުކުރުން ފައިބައިގެން މިގެއަށް ކާން އަންނައްޗޭ..” ސަނާ އެހެން ބުނެލުމުން މާޒް ވިސްނާލިއެވެ. އޭނާ ހަމަ އައިކާމެން ގެއަށް ދާންވީބާއެވެ. ހަމަ ޔަޤީނުންވެސް ޔޫޝައު ދާނެއެވެ. ވީމާ އޭނާ ދިއުމުން އައިކާ ހިތްހަމަޖެހޭނެބާއެވެ. އައިކާއާއި ޔޫޝައު އޭނާގެ ކުރިމަތީގައި ލޯބިން އުޅޭތަން ދެކެން އޭނާއަށް ފަސޭހަވާނެބާއެވެ. ނުވާނެއެވެ. އެކަމަކު ސަނާ އެހެން ބުނުމުން ދެކޮޅު ހަދާނީވެސް ކިހިނެއް ހެއްޔެވެ؟ ސަނާއާއި ނާޒިމްއަކީ އޭނާއަށް މައިންބަފައިންފަދަ ބައެކެވެ. ވީއިރު އެމީހުން އެދުމުން އޭނާ ނުގޮސްފިނަމަ އެމީހުން ދެރަވާނެއެވެ.

“ހެލޯ މާޒް.. ކީއްވެ އެއްޗެކޭ ނުބުނީ؟ ނާދެވޭނެތަ؟” މާޒްގެ ޚަބަރެއް ނުވުމުން ސަނާ އަހާލިއެވެ.

“ނޫން.. ދާނަން އިނގޭ..” މާޒް އަވަސްއަވަހަށް ބުނެލިއެވެ. ސަނާވެސް އެންމެ ރަނގަޅޭ ބުނެފައި ބޯނު ބޭއްވީ މާޒް މިހާރު އުޅޭނީ ހުކުރަށް ދާން ތައްޔާރުވާންކަން އެނގޭތީއެވެ. މާޒް ފޯނު ބޭއްވިތަނާ ދޮރުގައި ޓަކި ޖަހާލިއަޑު އިވުމުން ގޮސް ދޮރު ހުޅުވާލިއިރު އެލީނާ ހުރީ އޭނާ އިސްތިރިކުރަން ދިން އެއްޗެހި ހިފައިގެން އައިހެވެ. މާޒް އެއެއްޗެހީގައި ހިފައިގެން ވަދެ ކޮޓަރި ތަޅުލިއެވެ. އަދި ރީތިވެލައިގެން ނުކުމެ އޭނާގެ މަންމައަށް ގޮވާލިއެވެ.

“މަންމާ! މިއަދު މެންދުރު ކާކަށް ނާންނާނަން އިނގޭ.. ސަނާއްތަ ބުނެފި އެގެއަށް ކާން ދާން.. އެހެންވެ..” މާޒް އެހެން ބުނެލުމުން ރަމްޒިއްޔާ އާނއެކޭ ބުނެލިއެވެ.

މާޒް ހުކުރުން ފައިބައިގެން އައިކާމެން ގެއަށް ދިއުމަށް މިސްރާބު ޖެހިތަނާ ޔޫޝައު ގޮވާލި އަޑުއިވިފައި އެނބުރި ބަލާލިއެވެ. އޭރު ޔޫޝައު އޭނާއާ ދިމާއަށް ހުރެ އަންނަނީއެވެ.

“ކޮބާ މިހާރު ކިހިނެއްތަ؟” ޔޫޝައު އައިސް މާޒްއާ އަރާ ހަމަކުރަމުން އަހާލިއެވެ. ޔޫޝައު އެ އިޝާރާތްކުރީ ކޮންކަމަކަށްކަން އެނގޭތީ މާޒް ހީލަމުން މިހާރު ވަރަށް ބޮޑުތަން ރަނގަޅުކަމަށް ބުނެލިއެވެ.

“މާޒްވެސް ތިދަނީ އިކާމެން ގެއަށްތަ؟” ޔޫޝައު އެހެން އަހާލުމުން މާޒް ބޯޖަހާލިއެވެ.

“އެހެންތަ؟ އަހަރެންވެސް މިދަނީ އެގެއަށޭ.. ހިނގާ ދަމާ..” ޔޫޝައު އެހެން ބުނެލުމާއެކު މާޒްވެސް އަވަހަށް ހިނގާށޭ ބުނެލިއެވެ. އެދެމީހުން އެކުގައި ހިނގާލާފައި ދާތަން ފެންނަ ކޮންމެ މީހަކަށް ހީވާނީ އެއީ އެތައް ޒަމާނެއްވަންދެން އެކުގައި އުޅެފައި ތިބި ގާތް ދެ ރަޙުމަތްތެރިންހެންނެވެ. އެހާވެސް އެދެމީހުންގެ ގުޅުން ވަނީ ބަދަހިވެފައެވެ. ޔޫޝައު މާޒްއާ އެހާ ގާތްކޮށް ވާހަކަދައްކަމުން ދިޔަ މަންޒަރު ފެނުމުން ލިހާމްއަށް ހައިރާންވެފައި ބަލަން ހުރެވުނެވެ. އޭނާ ހީކޮށްގެން ހުރީ މާޒްގެ ވާހަކަ އޭނާ ދެއްކުމުން ޔޫޝައު މާޒްއާ އެއްވެސް ގުޅުމެއް ނުބާއްވާނެކަމަށެވެ. ނަމަވެސް ކަން މިވީ އޭނާ ހީކުރިފަދަ ގޮތަކަށް ނޫނެވެ.

“އަނހާ! ތި އައީ ދޯ؟ ހިނގާ އަވަހަށް ބަދިގެއަށް ދަމާ..” މާޒްއާއި ޔޫޝައު އައިސް ވަތްއިރު ސިޓިންގރޫމުގައި އިން ނާޒިމް ބުނެލިއެވެ. ނާޒިމްގެ ފަހަތުން މާޒްއާއި ޔޫޝައުވެސް ބަދިގެއަށް ވަނެވެ. އޭރު ސަނާއާއިއެކު އައިކާވެސް މޭޒުމަތި ތައްޔާރުކުރުމުގައި އުޅެއެވެ.

“އަވަހަށް ކާން ފަށާ.. އެބަ އަންނަން އައުފްއަށް ގޮވާފަ..” ސަނާ އެހެން ބުނެފައި ދިޔައީ އައުފްއަށް ގޮވާށެވެ. އޭނާ ދިޔައިރު އައުފް ބަދިގެއާ ދިމާއަށް އަންނަނީއެވެ.

“މަންމާ ވަރަށް ބަނޑުހައިވެއްޖެ.. އަދިވެސް މާޒްބެމެން ނާދޭތަ؟”

“މާޒްބެވެސް ޔޫޝައުބެވެސް އެބައިން.. އެހެންވެގެން ދަރިފުޅު ބަލާ މިދަނީ.. އާދޭ އަވަހަށް..” ސަނާ ހީލާފައި އެހެން ބުނެލުމުން އައުފް ދުވެފައި ކަހަލަ ގޮތަކަށް އައިސް ބަދިގެއަށް ވަނެވެ.

“މާޒްބެމެން ހާދަ ލަހުންނޭ ތިއައީ.. އައުފް މިހާރު ބަނޑުހައިވެގެން މަރުވާވަރު ވެއްޖެ..” މާޒްއާ ޖެހިގެން ހުރި ގޮނޑީގައި އިށީންނަމުން އެހެން ބުނެލިގޮތުން އެންމެނަށްވެސް ހެވުނެވެ.

“މާޒްބެމެން ދިޔައީ މާޒްބެމެން ގޭ ކައިރީ ހުންނަ މިސްކިތަށޭ.. އެމިސްކިތުން ތަންކޮޅެއް ލަހުން ނަމާދުކޮށް ނިމުނީ.. އައުފް ދިޔައީ އަނެއް މިސްކިތަށް ދޯ؟” މާޒް އެހެން ބުނެލުމުން އައުފް ބޯޖަހާލިއެވެ. ދެން ކެއުމުގެ ވަގުތުގައި މާގިނަ ވާހަކަތަކެއް ނުދެކެވެއެވެ.

ކައިގެން ނުކުމެފައިވެސް މާޒްއަށް އައުފްއާއެކު އެތައްއިރަކު ވާހަކަދައްކަން އިންނަން ޖެހުނެވެ. ޔޫޝައުވެސް އެމީހުންނާ ބައިވެރިވެގެން މަޖާކޮށް ހީ ހެދިއެވެ. މާޒް ގެއަށް ދަންދެންވެސް އައިކާ ހުރީ ޔޫޝައުއާއި ބައްދަލު ނުކުރަން ނިންމައިގެންނެވެ. އޭނާ ޔޫޝައުއާއި ގާތުގައި އުޅޭތަން ފެނުމުން މާޒްގެ ހިތަށް ތަދުވާނެކަން އެނގޭތީއެވެ. ނަމަވެސް އެއީ ކިހާ ހެއްވާ ކަމެއްކަންވެސް އޭނާއަށް އެނގެއެވެ. އެހެނަސް އެނގި އެނގި ހުރެ މާޒްގެ ހިތަށް ތަދުކުރާކަށް އޭނާ ބޭނުމެއް ނޫނެވެ.

މާޒް ދިއުމުން އައިކާ ޔޫޝައުއާއެކު އުނދޯއްޔަށް ނުކުތެވެ. އަދި މިރޭ ބައްދަލުކުރަން ދާނެ ތަނަކާއިމެދު ވާހަކަދެއްކިއެވެ. އެދެލޯބިވެރިން އިރުކޮޅަކު ވާހަކަދައްކަން ތިބުމަށްފަހު ޔޫޝައު ގެއަށް ދާން ނުކުތީ ލިހާމް ގުޅުމުންނެވެ. އޭނާ ނުކުންނަމުންވެސް މިރޭ އަށްގަޑި ތައްޔާރުވެގެން ހުރުމަށް އައިކާއަށް ހަނދާންކޮށްދިނެވެ.

**********

ރޭގަނޑުގެ ވަގުތެވެ. އައިކާ އަލަމާރިން ފަހަރަކު ހެދުމެއް ނަގައި ބަލަމުން ދިޔައީ އޭނާ ލާނެ ހެދުމެއް ނުނިންމިގެންނެވެ. އެއް ހެދުން ނަގައި ލޯގަނޑު ކުރިމަތީ ހުރެ ގައިގައި ޖައްސާލާފައި ކަމުނުގޮސްގެން އެހެން ހެދުމެއް ނަގައި ބަލާލައެވެ. ހައްތަހާވެސް އޭނާއަށް ރީތި ހެދުމެވެ. ނަމަވެސް ޔޫޝައުއަށް ބޮޑަށް ކަމުދާނީ ކޮން ހެދުމެއްކަން އޭނާއަށް ނޭނގެނީއެވެ. އެތައްއިރަކު ވިސްނާފައި އޭނާ އެތަނުން އެއް ހެދުން ނެގިއެވެ. ކަކުލާއި ހަމައަށް ހުރި އެ ހެދުން އާދައިގެ ގޮތަކަށް ފަރުމާކޮށްފައި ހުރިނަމަވެސް ފޮތިގަނޑުގައި ހުރި ގަދަ ނޫކުލައާއި ރީނދޫކުލަ ގުޅުވާލާފައި ވާގޮތުން ނުހަނު ރީއްޗެވެ. މޭމަތީގައި ރޭނދާ އަޅާފައި ހުރިއިރު އުޅަނބޮށްޓާއި ހަމައަށް ހުރި އަތުގެ ކުރީގައިވެސް ވަނީ ރޭނދާ އަޅާފައެވެ. ބަނޑާއި ދިމާއިން އަޅާފައިވާ ބަންދުގެ ސަބަބުން އެ ހެދުމަށް އިތުރު ފުރިހަމަކަމެއް ގެނެސްދެއެވެ.

އައިކާ އެ ހެދުން އިސްތިރިކޮށްލައި ކޮނޑެއްގައި އަޅުވާލާފައި ތުވާލި ހިފައިގެން ފާޚާނާއަށް ވަނެވެ. ފެންވަރާލައިގެން މެޔާއި ހަމައަށް ތުވާލި އޮޅާލައިގެން ނުކުމެ އަނގައިން މަޑު ރާގެއް އަޅުވާލަމުން ގައިގައި ލޯޝަން ލާން ފެށިއެވެ. ޔޫޝައުއާ ބައްދަލުކުރަން ދާއިރު އޭނާ ބޭނުންވަނީ ވީހާވެސް މީރުވަސް ދުއްވާލާށެވެ. ލޯޝަން ލައި ނިމިގެން އެ ހެދުންލައި ލޯގަނޑު ކުރިމަތީ ހުއްޓި ބަލާލިއެވެ. ގަޑި ބަލާލިއިރު އަށެއް ޖަހާ ފަސް މިނެޓް ހިނގާފައި ވާތަން ފެނުމުން އޭނާ އަވަސްއަވަހަށް ފުނާ ނަގައި ފުނާ އަޅަން ފެށިއެވެ. ފުނާ އަޅާ ނިމުމުން މޭކަޕް ސެޓް ނެގިއެވެ. އާންމުކޮށް މޭކަޕްކޮށް ނޫޅޭ އައިކާ މިރޭ ލުއި ގޮތަކަށް މޭކަޕްވެސް ކޮށްލިއެވެ. ޔޫޝައު ހިތް ރުހޭނެފަދަ ގޮތަކަށް ތައްޔާރުވާން އޭނާ ބޭނުމެވެ. މޭކަޕްކޮށް ނިމުމުން އޭނާ އަވަސްއަވަހަށް ބޭރަށް ނުކުތެވެ.

އައިކާ ނުކުމެ އިރުކޮޅެއް ވީތަނާ ޔޫޝައު އައިސްފިއެވެ. އައިކާ ފެނުމުން ކަޅިޖަހާނުލާ ޔޫޝައުއަށް ބަލަން ހުރެވުނީއެވެ. އައިކާ ލަދުން ހުރެ ޔޫޝައުއަށް ގޮވާލުމުން ސިހިފައި ވަރަށް ފުރިހަމައޭ ބުނެލިއެވެ. އައިކާ ރަކި ގޮތަކަށް ހީލާފައި ތޭންކްސް އޭ ބުނެލިއެވެ.

“ކޮބާ ރެޑީތަ؟” ޔޫޝައު އެހެން އަހާލުމުން އައިކާ ބޯޖަހާލިއެވެ.

“ހިނގާ ދަމާ..” ޔޫޝައު އެހެން ބުނެލުމުން އައިކާވެސް ހިނގާށޭ ބުނެ ހިނގައިގަތެވެ. ދެމީހުން މިސްރާބުޖެހީ ރަށުގެ އަތިރިމައްޗާއި ދިމާއަށެވެ. ޤުދުރަތީ ރީތިކަމާއިއެކު މިނިވަން މާހައުލެއްގައި ބައްދަލުކޮށްލުމަށް ޢަޒުމު ކަނޑައަޅައިގެންނެވެ. އާދައިގެ ވަރަކަށް ވައިޖެހެމުން ދިޔައިރު ހިތްތަކަށް ހަމަޖެހުން އޭގެ އެންމެ ފުރިހަމައަށް ލިބޭނެ އެއް މަންޒިލަކަށް އަތިރިމަތި ވާނެއެވެ. ވަކި ހިސާބަކަށް ދެވުނުތަނާ ވިއްސާރައިގެ ކޮޅުމަތި ފެންނަން ފަށައިފިއެވެ. ވައި ބާރުވާންވެސް ފަށައިފިއެވެ. އައިކާ އެދުނީ ގެއަށް ދިއުމަށެވެ. ނަމަވެސް ޔޫޝައު ހުރީ ގެއަށް ދާފަދަ ގޮތަކަށް ނޫނެވެ. އޭނާ ބޭނުންވަނީ އޭނާ އެރަށުގައި ހޭދަކުރާ އެންމެފަހު ރޭ އައިކާއާ އެކުގައި މިނިވަންކަމާއެކު ހޭދަކޮށްލާށެވެ.

“ބޭބީ ރިލޭކްސް.. ވިއްސާރައެއް ނާންނާނެއޭ.. އެހާ ލަސްނުވަނީސް ގެއަށް ދާނީ..” ޔޫޝައު އައިކާގެ ހިތްހަމަޖައްސައިދިނުމަށް ބުނެލިއެވެ. ނަމަވެސް އައިކާގެ ހިތް ނުތަނަވަސްވަމުން ދިޔައެވެ. ކޮންމެވެސް ގޯހެއް ވެދާނެހެން އޭނާއަށް ހީވަނީއެވެ. ނަމަވެސް ޔޫޝައު ހިތްހަމަނުޖެހިދާނެތީ އިތުރަށް އެވާހަކަ ދައްކާކަށް އޭނާއަކަށް ނުކެރުނެވެ. އަނެއްކޮޅުން އޭރު ތިބީ ގާތްގަނޑަކަށް އެމީހުންގެ މަންޒިލަށް އާދެވިފައެވެ. އެހާ ދުރަށް އައިސްފައި ހިތްހަމަޖެހުމެއް ނުލިބި އެނބުރި ދާން އޭނާގެ ޒަމީރުވެސް އެއްބަހެއް ނުވެއެވެ. ނަމަވެސް އޭނާގެ ހިތް އަންގަނީ އެނބުރި ގެއަށް ދިއުމަށެވެ.

“ހިނގާ މިތާ އިށީނދެލަން.. މިހާ ފިނި ވައިރޯޅިތައް ޖެހޭއިރު ކިހާ އަރާމު ދޯ..” ޔޫޝައު އައިކާގެ އަތުގައި ހިފައިގެން ދޮންވެލިގަނޑު މަތީގައި އިށީންނަމުން ބުނެލިއެވެ. އައިކާވެސް ހިނިތުންވެލަމުން ބޯޖަހާލިއެވެ.

“ބޭބީ.. އަހަރެން ބޭބީގެ އުނގުގަ ބޯއަޅާލައިގެން އޮވެލަންތަ މިރޭ؟ އަހަރެން ވަރަށް ހަނދާންވާނެ ބޭބީ މަތިން.. ވަރަށް ދެރަވޭ ދާން ޖެހޭތީ.. އެކަމްވެސް ދާން ޖެހޭނެތާ.. އޮފީހުގެ މަސައްކަތް އެހެން މީހަކާ ހަވާލުކޮށްފަ އަބަދަކު މިހެން ނޫޅެވޭނެއެއްނު..” ޔޫޝައުވެސް ހުރީ އައިކާއާ ވަކިވާން ޖެހޭތީ ދެރަވެފައެވެ. އައިކާ އޭނާގެ ފައި ދަމާލަމުން ޔޫޝައު އޭނާގެ އުނގުގައި ބޭއްވިއެވެ.

“އަހަރެންވެސް ވަރަށް ދެރަވޭ މިހާ އަވަހަށް ވަކިވާން ޖެހޭތީ.. އެކަމް އަހަރެންނަށް އަންޑަސްޓޭންޑްވޭ..” އައިކާ އެހެން ބުނެލުމުން ޔޫޝައު ހީލިއެވެ.

“ބުނަންތަ؟ ބޭބީ މިރޭ ހާދަ ރީއްޗޭ.. މިހެދުން ލާފަ ހުންނައިރު އަދި މާ ރީތި.. ބޭބީ މޭކަޕް ނުކުރިޔަސް ހަމަ ރީއްޗޭ.. އަސްލު އަހަރެންނަކަށް އެހާ ކަމަކުނުދޭ މޭކަޕް ކުރީމަ.. އޭރުން ނެޗުރަލް ބިއުޓީ ގެއްލޭނީ.. އަދި ބުނަންތަ؟ އަހަރެންނަށް ވަރަށް ރީތި އަންހެންކުދިން ޝޯލް އަޅާފަ ހުންނައިރު..” އައިކާގެ އިސްތަށިގަނޑާއި ކުޅެލަމުން ޔޫޝައު ބުނެލިއެވެ. ޔޫޝައުގެ ލޯބިވެތި ވާހަކަތަކަށް ގެއްލިފައި އައިކާއަށް އިނދެވުނުއިރު އައިކާވެސް ޔޫޝައުގެ އިސްތަށިގަނޑާއި ކުޅެމުން ދިޔައެވެ.

“ޔޫޝް ދެން އަންނާނީ ކޮންއިރަކުން؟ މާލެ ގޮސްފަ އަހަރެން މަތިން ހަނދާން ނައްތާނުލައްޗޭ..” އައިކާ އެހެން ބުނެލުމުން ޔޫޝައު އައިކާއަށް ބަލާލިއެވެ. އައިކާގެ މޫނުމަތިން އޭނާ ދެރަވެފައި ހުރިވަރު ހާމަވެއެވެ.

“ތިހެން ނުބުނައްޗޭ ދެން.. އަހަރެން ދުވަހަކުވެސް ބޭބީ މަތިން ހަނދާނެއް ނުނެތޭނެ.. އިރާދަކުރެއްވިއްޔާ އަދި ވަރަށް އަވަހަށް އަންނާނަން..” ދެމީހުން ލޯބީގެ އަހުދުތަކާއި ވަޢުދުތައް ވުމުގައި ތިއްބާ ބޮޑުތިކި ވާރޭ ވެހިގަތީ އެކަމަށް އިންޒާރުދޭތާ އެތައްއިރެއް ވީފަހުންނެވެ. ޔޫޝައު ތެދުވެ އައިކާ އަތުގައި ހިފައިގެން ދުއްވައިގަތީ އެންމެ ކައިރީގައި ހުރި އޮޑި ހަރުގެއާ ދިމާއަށެވެ. ހަރުގެއަށް ވަދެވުނުއިރު ދެމީހުންވެސް ތިބީ ފުދޭވަރަކަށް ތެމިފައެވެ.

“އަޅެ އޭރުވެސް އަހަރެން ބުނީމެއްނު ހިނގާށޭ ގެއަށްދާން.. ނުލާހިކު ބޯކޮށް ވާރޭ އެއައީ.. ނޭނގެ އަވަހަށް ހުއްޓާނެ ކަމެއްވެސް.. މާ ލަސްވަންޏާ މަންމަ ކަންބޮޑުވާނެ.. ބައްޕަވެސް އެބަހުރި ރަށުގަ.. ބައްޕަ އަހަރެން ހޯދަންވެސް ނުކުމެދާނެ.. މިކަހަލަ ތަނެއްގަ ތިއްބާ ފެނިއްޖެއްޔާ ވަރަށް ގޯސްވާނެ.. ހިނގާ ގެއަށް ދާން..” އައިކާ ކަންބޮޑުވީވަރުން އެއްފަހަރާ ހުރިހާ އެއްޗެއް ކިޔާލިއެވެ.

“ބޭބީ ރިލޭކްސް.. ރިލޭކްސް.. އަހަރެން މިހުރީނު.. އެއްވެސް ކަމެއް ނުވާނެ.. ވަރަށް އަވަހަށް ވާރޭ ހުއްޓާލަފާނެ.. ހުއްޓާލީމަ ދާނީއޭ..” ޔޫޝައު ބެލީ އައިކާ ހަމައަކަށް އެޅުވޭތޯއެވެ. އެވަގުތު ޖަހާލި ބާރު ގުގުރިއާއެކު ތޫލި އަޑަކުން ހަޅޭއްލަވައިގެންފައި ޔޫޝައުގެ ގައިގައި ބައްދައިގަތެވެ. ގަދަ ވަޔާއިއެކު ވެހެމުންދިޔަ ބޯ ވާރޭގެ ސަބަބުން އައިކާގެ ހަށިގަނޑު ތުރުތުރުއަޅަމުން ދިޔައެވެ. ރޭގެ ފިނިކަމާއިއެކު އައިކާ އެހާ ގާތުގައިވުމުން ޔޫޝައުގެ ހިއްސުތަކަށްވެސް އެނގުންވެލައިގެން ދިޔައެވެ. ނަމަވެސް އޭނާ ކެތްކުރަމުން ދިޔައެވެ. އައިކާއަށް ލިބިދާނެ ދެރައަކާއިމެދު ވިސްނާފައެވެ. އޭނާއަށް އައިކާދެކެ ވެވުނު ސާފުތާހިރު ލޯބީގައި ލައްގަނޑެއް ޖެހޭކަށް އޭނާ ބޭނުމެއްނުވެއެވެ. ނަމަވެސް މި ފިނި ވާރޭގެ ތެރޭގައި ތެމިގެން ދެވޭކަށްވެސް ނެތެވެ. އެކަމަށް އައިކާގެ ހާލަތު ތަން ނުދޭތީއެވެ.

ފަހަރަކަށްވުރެ ފަހަރެއް އައިކާގެ ހަށިގަނޑުގައިވާ ތުރުތުރުލުން ދިޔައީ އިތުރުވަމުންނެވެ. ކަންތައް މިހެންވާނަމަ ނަތީޖާ ރަނގަޅު ނުވާނެކަން ޔޫޝައުއަށް އެނގުނެވެ. އައިކާއަށް ދެރަގޮތެއް ވާކަށް އޭނާ ނޭދެއެވެ. އެހެންކަމުން އަމިއްލަ ނަފްސަށް އިތުބާރުކޮށް އޭނާ އައިކާ ގޮވައިގެން އިށީނދެ އޭނާގެ ގަޔާލައި ބޮނޑިކޮށްލިއެވެ. އަދި އައިކާގެ އަތުގައި އަތް އުނގުޅަމުން ހޫނުކަން އިހުސާސްކޮށްދެމުން ދިޔައެވެ. އަނެއްކާވެސް ޖަހާލި ބާރު ގުގުރިއަކާއެކު އައިކާ އަނެއްކާވެސް ޔޫޝައުގެ ގައިގައި އިހުނަށްވުރެ ބާރަށް ބައްދާލިއެވެ. ރޭގެ ފިނިކަމާއި ހުރެ ހަށިގަނޑުގައި ކެކި އުތުރެމުން އައި އިހުސާސްތަކުގެ މައްޗަށް ގަދަވެ ހުރި ޔޫޝައުގެ ކެތްތެރިކަން ކޮޅުންލާގޮތްވިއެވެ. އަމިއްލަ އިޚްތިޔާރުން ބޭރުވެވި އައިކާގެ ތުރުތުރުއަޅަމުންދިޔަ ތުންފަތުގައި ބޮސްދޭން ފެށުނެވެ. އައިކާވެސް ހޫނަކަށް ބޭނުންވެފައިވާލެއް ބޮޑުކަމުން ޔޫޝައުގެ ބޮލުގެ އިސްތަށިގަނޑުގެ ތެރެއަށް އަތް މަހާލަމުން ފުރިހަމައަށް އެކަމުގައި ބައިވެރިވެވުނެވެ.

 

ނުނިމޭ

ލިޔުންތެރިޔާގެ ފުރަމަލަ

ސާޖިދު ޢަބްދުﷲ
ސާޖިދު ޢަބްދުﷲ
މުނިއަވަސްގެ ޑެޕިއުޓީ އެޑިޓަރ ސާޖިދު އަކީ ވާހަކަ ލިޔުމުގެ އިތުރުން ޚަބަރު ލިޔުމުގައިވެސް ހުނަރުވެރި ލިޔުންތެރިއެކެވެ.

ގުޅުންހުރި ލިޔުން: