ނަދީމްގެ އަތުގައި އޮތް ކެވެލިކޮޅު ދީމާ އަތުލީ ތެޅިތެޅި އޮތް ހިތަކާއި އެކުގައެވެ.
“އެކަމަކު މީ ކޮންތާކުން ފެނުނު އެއްޗެއް؟” ދެބުމަ ގޮށް ޖެހިފައިވާ ދީމާގެ ހާސްކަމުން ދޭހަ ވަނީ އެ ކެވެލިކޮޅާއި ދީމާ އާއި ގުޅުމެއްވާ ކަމަށެވެ.
“ތީ ޒުބޭދާ މަރުވިއިރު ލައިގެން ހުރި ހެދުމުގައި އެޅިފައިވާ ކެވެލިކޮޅެއް. ތީ ދީމާގެ އެއްޗެއް ތޯ.؟” ނަދީމް ދީމާއަށް ބަލަމުން ގެންދިޔައީ ޝައްކުގެ ނަޒަރަކުންނެވެ.
“އާން. މީ އަޅުގަނޑު.-” ދީމާ ބުނަމުން ގެންދިޔަ ޖުމްލަ ފުރިހަމަ ކުރަން ހުރަސް އެޅީ ފުލުސް އޮފިސަރ ނަދީމެވެ.
“ހިންގަވާ ޕޮލިސްޓޭޝަނަށް އިތުރު މަޢުލާމާތު ސާފުކޮށްލަން.” ނަދީމްގެ ރާގުގައި ވަނީ ހަރުކަށިކަމެވެ.
“ބައްލަވާ. ތީ ވަރަށް ބޮޑު އޮޅުމެއް. ތީ އަޅުގަނޑުގެ ދަރިފުޅު ޔުނާންގެ އަންހެނުންގެ އަތުގައި އަޅުގަނޑު އެޅުވި ކެވެލިކޮޅެއް.” ދީމާ އޮޅުންފިލުވައިދިނެވެ. ޕޮލިސްޓޭޝަނަށް ގެންދާ ވާހަކަ އިވިފައި ދީމާގެ ހާސްކަން އިތުރުވެގެން ދިޔަ ކަހަލައެވެ.
“ކޮބާތަ ތިބުނާ ކަމީލާއަކީ؟” ނަދީމް ހިނގައިގަތީ ގޭތެރެއަށް ވަންނާށެވެ.
“ކަމީލާ ބަނޑު ބޮޑު. މިވަގުތު ނިދިފައި އޮތީވެސް.” ދީމާ ފަހަތުން އައިސް ނަދީމް އާއި އަރާ ހަމަކުރިއެވެ.
“މައްސަލައެއްނެތް. މިވަގުތު ކަމީލާއާއި ވާހަކަދައްކަން ޖެހޭ އެބަ. ގޮސް ގޮވާ.” ނަދީމް އަމުރުކޮށްލިއެވެ.
ހީވާ ކަހަލައެވެ. ނަދީމް ދެކޭގޮތުގައި ޒުބޭދާގެ ޤާތިލަކީ އެ ކެވެލިކޮޅުގެ ވެރިފަރާތެވެ.
ނަދީމްގެ އަމުރުވެރި ރާގުން ދީމާ އަށް އިތުރު ވާހަކައެއް ދައްކާކަށް ނުކެރުނެވެ. ތެމިފޯވެގެން ހުރެވެސް ބާރު ބާރަށް ހިނގާފައި ގޮސް ގޭތެރެއަށް ވަނެވެ.
ނަދީމްއާއި އޭނާގެ ޓީމް ގޭގެ ދޮރު ކައިރީގައި މަޑުކޮށްލައިގެން ދީމާއަށް އިންތިޒާރު ކުރަން ފެށިިއެވެ.
އެގޮތަށް މާގިނައިރަކު އިންތިޒާރުގައި ތިބޭކަށް ނުޖެހުނެވެ.

ދީމާއާއި އެކު ސިޑިން ފައިބަައިގެން އެ އަންނަނީ ކަމީލާއެވެ. ކަމީލާގެ މޫނުމަތިން ފެންނަމުން ދިޔައީ ހާސްކަމާއި ނުތަނަވަސްކަމެވެ.
“މީ ކަމީލާގެ އެއްޗެއްތަ؟” ކަމީލާ އައިސް ކުރިމައްޗަށް ހުއްޓުމާއެކު ނަދީމް ކުރިއަަށް ޖެހިލާފައި އޭނާގެ އަތުގައި އޮތް ކެވެލިކޮޅު ދައްކާލިއެވެ.
“އާން. އާން. އެކަމަކު ކިހިނެއްތޯވީ؟” ކަމީލާގެ ވާހަކައިން އެނގެނީ ދީމާ ޕޮލިހުން ދެއްކި އެއްވެސް ވާހަކައެއް އަދި ކަމީލާ އާއި ހިއްސާ ނުކުރާކަމެވެ. ދީމާ އެގޮތަށް ކަންތައް ކުރީވެސް ސީދާ ނަދީމްގެ އެދުމުގެ މަތިންނެވެ.
“އެއްވެސް އިރެއްގައި މި ކެވެލިކޮޅު ގެއްލުނުތަ؟” ކަމީލާގެ ސުވާލަށް ޖަވާބު ދިނުމުގެ ބަދަލުގައި ނަދީމް އަނެއްކާވެސް ކޮށްލީ ސުވާލެކެވެ.
“ނޫން. ނުގެއްލޭ. އަސްލު ކިހިނެއްތަ ވީ؟” ކަމީލާ އަނެއްކާވެސް ވެގެން އުޅޭގޮތް އޮޅުން ފިލުވަން ބޭނުންވާކަން އަންގާލިއެވެ.
“ސޮރީ. މިވަގުތު ކަމީލާ ގެންދާނަން.” ނަދީމްގެ އިޝާރާތަށް ދެފުލުހަކު ކަމީލާ ވަށާލިއެވެ.
އެވަގުތަކީ ޔުނާންވެސް އެތަނަށް އައިސް ހުއްޓުނު ވަގުތެވެ.
“ވަޓް. އަދި ތިހެނެއް ހައްޔަރެއް ނުކުރެވޭނެ. ކޮބާ ކަމީލާގެ ކުށަކީ؟” ރުޅި އައިސްގެން ގޮސް ޔުނާންގެ ލޮލުން އަލިފާންކަނި ބުރާކަހަލައެވެ. އޭރުވެސް ކަމީލާ ހުއްޓާނުލާ ރޮނީއެވެ.
“އިތުރު މަޢުލޫމާތު ސާފުކުރަން ބޭނުމިއްޔާ ދުރުވޭ ޕޮލިސްޓޭޝަނަށް. ފުލުހުންގެ މަސައްކަތަށް ހުރަސް އަޅަން ހިތަށްވެސް ނާރުވާތި. މިވަގުތު ކަމީލާ ގެންދާނަން.” ޔުނާން ކުރިއަށް ޖެހިލުމުން ޔުނާންގެ ހަރަކާތް ނަދީމްއަށް ވިސްނުނުކަހަލައެވެ.

ޔުނާންއަށް ހުރެވުނީއެވެ. ލޯ މަތީގައި ފެންނަމުންދާ މަންޒަރު ޤަބޫލުނުކުރެވިފައެވެ. އަނެއްކާވެސް އޭނާގެ އުޖާލާވެފައިވާ ދިރިއުޅުމުގައި އަނދިރިކަމުގެ ސާލެއް އޮޅިގެން ދަނީއެވެ.
“ދަރިފުޅާ. އަވަހަށް ހިނގާ ޕޮލިސްޓޭޝަނަށް ދާން. މަންމަ އަންނާނަން ބައްޕައަށް ގޮވާފައި.” ކަމީލާ ހައްޔަރުކުރުމުން ދީމާއަށް ވެސް ވަރަށް ފުން އަސަރުތަކެއް ކޮށްފި ކަހަލައެވެ.
އަނގައިން ބަސް ހުއްޓި ގަބުވެފައި އަދިވެސް ޔުނާންއަށް ހުރެވުނީއެވެ. ހުރިހާ ސުވާލެއް އޭނާ ކުރަމުން ދިޔައީ އަމިއްލަ ހިތާއެވެ. އަނެއްކާ ކަމީލާ އެވަރުގެ ކުށެއް ކުރީބާއެވެ.

“ދަރިފުޅާ ޔުނާން.” ޔުނާންގެ ބަނޑިފަޅައިގެން ދިޔައީ ޔާސިރު އޭނާގެ ކޮނޑުގައި ދެއަތުން ހިފައި ތަޅުވައިގަތުމުންނެވެ. ޔާސިރުގެ މޭގައި ލައްވެގެން އޮވެ ރޮމުން ދިޔައިރު ޔުނާން ހީވަނީ ކުޑަކުއްޖެއް ހެންނެވެ.
“ހިތްވަރު ކުރޭ ދަރިފުޅާ. ވެގެން އުޅޭ ގޮތެއް އޮޅުން ފިލުވަން ހިނގާބަލަ ދާން އަވަހަށް.” ޔާސިރު ޔުނާންގެ ބުރަކަށީގައި ހުއްޓުމެއްނެތި ފިރުމަމުން ދިޔައެވެ.

ހަޤީޤަތުގައި ޔާސިރުވެސް ހުރީ ކަންބޮޑުވެފައެވެ. އާއިލާގެ އަގު ވެއްޓިދާނެތީވެސް ޔާސިރު ދިޔައީ ވިސްނަމުންނެވެ. އެންމެންގެ ޤަދަރާއި އިޙްތިރާމް ލިބިފައިވާ އާއިލާއަށް ހުތުރުނަމެއް ލިބުމަކީ ޔާސިރުއަށް ކެތް ކުރެވޭ ވަރުގެ ކަމެއް ނޫނެވެ.

 

“ތީ އަޖައިބެއްނު. ކިހިނެއްހޭ ތިހެން ވާނީ؟” ޔުނާންމެން ޕޮލިސްޓޭޝަނަށް ވަދެވުނު ވަގުތު އެތެެރެއިން އިވެން ފެށި ބާރު ހަޅޭކުގެ އަޑުން ހުއްޓުން އެރިއެވެ.
އެވަގުތު އެތެރޭގައި ހުރި ދޮރު ހުޅުވާލާފައި ނަދީމް ނިކުތެވެ.
“ކަމެއް ގޯސްވީތަ؟ ކިހިނެއްވެގެން މިއުޅެނީ؟” ނަދީމްގެ ހާސްވެފައިވާ މޫނު ފެނިފައި ޔުނާން އަށް ސުވާލުކޮށްލެވުނީ ބޭއިޚްތިޔާރުގައެވެ.
“ކީކޭ ބުނާާނީ. ކަމީލާ ފިލައިފި. ކަމީލާ ގެނެސް އިންވެސްޓިގޭޓް ކުރާ ކޮޓަރީގައި ބޭންދީ. މިތަނަކީ ވަށައިގެން ކެމެރާ ހަރުކޮށްފައި ހުރިތަނެއް. އެކަމަކު އެއިން އެއްވެސް އެއްޗެއްގަވެސް ނެތް އެއްވެސް އެއްޗެއް ރެކޯޑްވެފައެއް. މިއަދާއި ހަމައަށް ހަމަ ބަރާބަރަށް އެކެމެރާތައް މަސައްކަތް ކުރި. ކަމީލާ ގެޔަށް ދިޔަތަ؟” ނަދީމް ވާހަކަދެއްކީ ވަރަށް ފަސްޖެހިފައި ހުރެއެވެ.

“ތި މޮޅެތި ޑްރާމާތައް ކުޅެން ނޫޅެ ކަމީލާ ވެއްދިތާކުން ނެރޭ.” ޔުނާން ހަޅޭލަވައިގަތެވެ. އޭރު މުޅި މީހާ ތުރުތުރު އަޅަމުންދިޔައެވެ.
ޔާސިރު ޔުނާންގެ ގައިގައި ނުހިފެހެއްޓިނަމަ ޔުނާން ނަދީމްއަށް ވަރުގަދަ ހަމަލައެއް ދިނީހެވެ.
“ރުޅި މަޑުކޮށްފަ އަޑުއައްސަވާ. މީ ހަޤީޤަތް. ކަމީލާ ހައްޔަރުކުރީ ޒުބޭދާގެ މަރުގެ ތަޙްޤީޤަށް. ޒުބޭދާގެ ހެދުމުގައި ހަރުވެފައިވާ ކަމީލާގެ މި ކެވެލިކޮޅު ފެނުމުން.” ނަދީމް ޖީބުން ނެގި ކޮތަޅެއްގައި އޮތް ކެވެލިކޮޅު ޔުނާންއަށް ދައްކާލިއެވެ.
“ކަމީލާ އަކާއި ތިކަމަކާއި ގުޅުމެއް ނޯންނާނެ.” ޔުނާން ޔަޤީންކަން ދިނެވެ.
“ކަމީލާގެ ފޮޓޯއެއް ދެވިދާނެތަ؟” ނަދީމް އަހާލިއެވެ.
“ކަމީލާ ހޯދަން ފޮޓޯއެއް ބޭނުންވާނެތީ.” އަނެއްކާވެސް ވާހަކަ ދެއްކީ ނަދީމެވެ.
ޖީބުގައި އޮތް ވޮލެޓް ނަގާ ކަމީލާގެ ޕާަސްޕޯޓް ސައިޒްގް ފޮޓޯއެއް ނަދީމް އާއި ދިމާއަށް ހޫރާލަމުން ޔުނާން ހިނގައިގަތެވެ. މާޔޫސްވެފައި ހުރެއެވެ. ކުއްލިއަކަަށް ބަދަލުވެގެން ދިޔަ ހާލަތާއި މެދު ވިސްނާ ފިކުރު ކުރަމުންނެވެ. ކަމީލާ އަނެއްކާ އެދިޔައީ ކޮންތާކަށް ބާއެވެ. ކުށެއް ނުކުރާނަމަ ފިލަންވީ ކީއްވެ ހެއްޔެވެ؟ ޔާސިރު އާއި ދީމާ ޔުނާންއަށް ގޮވަ ގޮވާ އޮއްވާ އަޑުއިވޭ ކަމަށްވެސް ނުހަދާ ޔުނާން ސައިކަލަށް އަރާ ދުއްވާލިއެވެ.

ފަޒާގައިވާ ތެތް ފިނީގެ އަސަރުން މުޅި ދުނިޔެވަނީ ކަންނެތްކޮށްލާފައެވެ. ނިދިފައި އޮތް އިޝާ ދެލޯ ހުޅުވާލަމުން މޯޅިއަކަށް ދެމިލިއެވެ. ދުވަހުގެ ހިތްގައިމުކަމުން އަދިވެސް އިޝާ ބޭނުންވީ ނުތެދުވެ އޮންނާށެވެ. ރޭގައިވެސް އިޝާ އަކަށް ހަމަ ނިންޖެއް ނުލިބުނެވެ. ޔުނާންގެ ދިރިއުޅުމާއި ކަމީލާއާއި ދޭތެރޭގައި ވިސްނެނީއެވެ. އިޝާގެ ބޮސް ޔާމިންގެ އަންހެނުންނަށްވެސް ކަމީލާ ކިޔާތީ އާއި އެދެމީހުންގެ ސިފަ ވައްތަރުކަމުންނެވެ.

ބޯވެފައިވާ އިޝާގެ ދޮން މޫނުގައި ދެއަތުން ފިރުމާލަމުން އިޝާ ތެދުވެ ފާހާނާ އާއި ދިމާއަށް ހިނގައިގަތެވެ.
އެވަގުތު ބެލް ޖަހާލި އަޑު އިވުނެވެ.
ލައިގެން ހުރި ތުނި ނައިޓީ މަތިން ޖެކެޓް ވައްޓާލަމުން ބާރު ހިނގުމެއްގައި އިޝާ ގޮސް ދޮރު ހުޅުވާލިއެވެ.
ކުރިމަތީގައި ފެންނަން ހުރި ޔާމިން ފެނިފައި އިޝާއަށް ފަހަތަށް ޖެހެވުނީ ލިބުނު ސިހުމުގައެވެ
“ކޮބާތަ ފޯނު. ހާދަ ގުޅައިފީމޭ. ވައިފް ޑޮކްޓަރަށް ދައްކާލަން ދާން ޖެހޭ އެބަ. އޮފީހުގެ އެހެން ސްޓާފަކާއި ހަވާލު ނުކުރަންވެގެން އިޝާގެ ގެޔަށް މިއައީ. މިއަދު އެގާރަ ޖަހާއިރު އޮންނަ މީޓިންއަށް ތައްޔާރުވެލައްޗޭ.” ފައިލް ދިއްކޮށްލަމުން ޔާމިން ހިނިތުންވެލިއެވެ. ނަމަވެސް އިޝާގެ ސިކުނޑި ތެރޭގައި އެނބުރެމުން ދިޔައީ ކުރީ ދުވަހެއްގެ ހަނދާންތަކެކެވެ. ޔާމިންގެ ބީހިލުމާއި ލޯބިވެތި ބަސްތަކެވެ.
“ދަނީ އިނގޭ. ސީ ޔޫ.” އިޝާގެ ޖަވާބެއް ނައުމުން ޔާމިން ހިނގައިގަތެވެ.
“ޔާމިން.” އިޝާގެ އަޑު ނިކުތީ ބޭއިޚްތިޔާރުގައެވެ. އެ ހާދިސާގެ ހަޤީޤަތް އިނގެން އިޝާ ކޮންމެހެންވެސް ބޭނުމެވެ. ވިސްނާ ވިސްނާ އިޝާގެ ސިކުނޑި ވަރުބަލި ވެއްޖެއެވެ.
“ޔާމިން މިގެޔަށް ކުރިންވެސް އައިން ދޯ؟” ހިތުގައިވާ ސުވާލުތަކުގެ ޖަވާބު ހޯދުމަށް އިޝާ މަގުކޮށަން ފެށިއެވެ.
“ނޫނޭ. މިގެޔަކަށް ނާންނަން. އަހަރެން ކީއްކުރަން މިގެޔަށް އަންނަންވީ؟”އިޝާގެ ސުވާލުން ޔާމިންއަށް ލިބުނީ ހައިރާންކަމެވެ. އެކަން އޭނާގެ މޫނުމަތިންވެސް ވަރަށް ރަނގަޅަށް ހާމަވަމުންދިޔައެވެ.
“ޔާމިން އަހަރެންދެކެ ލޯބިވޭތަ؟” އިޝާ އިސްޖަހާލީ ލަދުންނެވެ.
އިޝާގެ ސުވާލު އަޑުއިވުމާއެކު ޔާމިން ފެށީ ހޭށެވެ.
“އިޝާ. އާ ޔޫ އޯކޭ؟ އައި އޮންލީ ލަވް މައި ވައިފް. ދަނީ ދެން. ލަސްވެއްޖެ.” ޔާމިން ހެމުން ހެމުން ނިކުތެވެ.
އަނގަ ހުޅުވިފައި އިޝާއަށް ހުރެވުނީއެވެ. އެއީ ފެނުނު ހުވަފެނެއް ނޫން ކަން އިޝާއަށް ޔަޤީނެވެ.
ހިތަށް ބިރުވެރިކަން ވަނުމާއެކު އިޝާ އަވަސް އަވަހަށް އާހިލްގެ ނަމްބަރަށް ގުޅާލިއެވެ. ދެތިން ފަހަރު ގުޅިއިރުވެސް ނަމްބަރު ބިޒީއެވެ.

 

“ނަމްބަރު ބިޒީ ކުރަނީ ކީއްވެތަ؟ މިހާރު ސަތޭކަ ފަހަރު ގުޅިއްޖެ.” އާހިލް ސައިކަލްގައި އައިސް މަޑުކޮށްލުމާއެކު ޔުނާން ހިތްހަމަ ނުޖެހިފައި ބުނެލިއެވެ.
“ފޯނު އޮތީ ޖީބުގަ. ދުއްވަމުން ވާހަކަ ނުދެއްކޭނެއެއްނު.” އާހިލް ސައިކަލް ޕާކް ކޮށްލިއެވެ.
ޔުނާންގެ އޮއްސިފައިވާ މޫނު ފެނިފައި ކޮންމެވެސް ބޮޑު ކަމެއް ވެއްޖެކަން އާހިލް ދެނެގަތެވެ.
ޔުނާންއާއި އާހިލް ވާހަކަ ދައްކަން ތިބީ ދަރުބާރުގެ ބިއްދޮށުގައެވެ.
ޔުނާންގެ ވާހަކަތައް އަޑުއަހާފައި އާހިލް ހުރީ ބުނާނެ އެއްޗެއްވެސް ނޭނގިފައެވެ.
“ކޮބާ ކަމީލާ މިހާރު.” އާހިލްއަށް އަވަސް އަވަހަށް އަހާލެވުނެވެ.
“މުޅި ގެވެސް ހޯދައިފިން. ފުލުހުންވެސް ހޯދަނީ. ދެން ކީކޭ ބުނާނީ.” ޔުނާން ނިއްކުރީގައި އަތް އަޅާލިއެވެ. އޭނާގެ މުޅި ދުނިޔެވެސް ފުނޑު ފުނޑުވެއްޖެ ކަހަލައެވެ. ހަދާނެ ގޮތް ހުސްވެއްޖެއެވެ. އާހިލްގެ ހިތް ޔުނާނަށްޓަކައި ހަމްދަރުދީއިން ފުރުނެވެ. ޔުނާންގެ އަތުގައި ހިފަހައްޓައިގެން ހުރެ އާހިލް އޭނައަށް ހިތްވަރުދެމުން ދިޔައެވެ.

ކަމީލާގެ ފޮޓޯ މުޅި އިންޓަރނެޓްގައި ދައުރުވާން ފެށިއެވެ. ޓީވީއިންނާއި ރޭޑިޔޯއިން ކަމީލާ ގެއްލިގެން ހޯދަމުން ދާކަމުގެ ޚަބަރު ހުއްޓުމެއްނެތި ތަކުރާރު ކުރަމުންދިޔައެވެ.

މެމޯ ހައްދައިގެން ޔާމިން ކައުންޓަރު ފަސްދެމުން އެނބުރިލިއެވެ. އެވަގުތު ޓީވީއިން ކަމީލާގެ ނަން ކީ އަޑުއިވިފައި ޔާމިން އަށް ހުއްޓެވުނެވެ.
އެއްފަރާތުގައި ބަހައްޓާފައި ހުރި ޓީވީއަށް ޔާމިން އަށް ނަޒަރު ހުއްޓުވާލެވުނީ ކަންފަތަށް އިވެމުންދާ އަޑުތަކާއި މެދު ޔަޤީން ކުރާށެވެ.
ޚަބަރު އަޑުއިވުމާއެކު ޔާމިންއަށް ތެޅިގަނެވުނެވެ. ވާނުވާ ނޭނގޭ ހާލުގައި ޔާމިން އަށް ދުއްވައިގަނެވުނެވެ. ކަމީލާގެ ކައިރިއަށެވެ. ޔާމިން މެމޯ ހައްދަން އައީ ކަމީލާ ވެއިޓިން އޭރިޔާގައި ބައިންދާފައެވެ.

ނަމަވެސް ކަމީލާ ހުރި ހިސާބަށް އާދެވުނު އިރު ކަމީލާގެ ކުރިމަތީގައި ތިބި ހަތަރު ފުލުހުންގެ މީހުން ފެނިފައި ޔާމިން ގަނޑުވި ކަހަލައެވެ.  ކުރިޔަށް އަޅަ އަޅާހުރި ފިޔަވަޅުވެސް ހުއްޓުނީ ބޭއިޙްތިޔާރުގައެވެ.

 

ނުނިމޭ

ލިޔުންތެރިޔާގެ ފުރަމަލަ

އާމިނަތު ފަރުޒާނާ
ހުނަރުވެރި ވާހަކަލިޔުންތެރިއެކެވެ. ފީޗާ ލިޔުމަށްވެސް ވަރަށް ކުޅަދާނައެވެ.
މި ލިޔުންތެރިޔާގެ ބައެއް އެހެން ލިޔުންތައް

ގުޅުންހުރި ލިޔުން: