ލަފުޒަކުން – 01

މެންދުރުގެ ގަދައަވިން މުޅި ދުނިޔެ ވިދަމުންދާއިރު އާދައިގެ ވަރަކަށް ޖެހެމުންދިޔަ ވައިރޯޅިން ގަސްތައް ނަށަމުންދިޔައެވެ. ފަޒާގައި ރަސްކަންކުރަމުންދާ ގަދަ އަލިން ގަސްގަހުގެ ފަތްތައް ވިދަމުންދާއިރު މުތީތަކެއް ފަދައެވެ. ބަލާ ފޫހިނުވާހާ ހިތްގައިމެވެ.

މާހައުލަކީ ހުޅުމާލޭގެ ހިތްގައިމު މާހައުލެވެ. ގިނަމީހުން ދެކޭ ގޮތުގައި ހުޅުމާލެއަކީ ރާއްޖޭގެ ސުވަރުގެއެވެ. ހިތްފަސޭހަކަމުގެ ބަގީޗާއެކެވެ.

އެހާ ހިތްފަސޭހަ ތަނެއްގައިވެސް މޮޅީގެ ސާލެއް އޮޅާލައިގެން ޒާޔާ އިނެވެ. ހެނދުނު ހަތެއްގެ ފެރީގައި މާލެއިން ހުޅުމާލެ އައިގޮތަށް ޒާޔާ ބީޗްގައި ހުރި ގޮޑިއެއްގައި އިށީންދެގެން އިންނަތާ އެތައް އިރެކެވެ. އަޅި ކުލައެއްގެ ގަމީހަކާއި ކަޅު ޖިންސެއްގައި ބެގީ ޖަހައިގެން ޒާޔާ އިން އިރު ހީވަނީ އޮފީހަށް ދާން ތައްޔާރުވެގެން އިންހެނެވެ. ފަންފަން ދިގު އިސްތަށިގަނޑު ވަނީ ތަރުތީބުކޮށް މައްޗަށް ނަގާ ހުޅި އެއްޖަހާފައެވެ.

ކަޅު ކުލައިން ފަވާލެވިފައިވާ ދެލޮލުން ފެންނަނީ އުދާސްކަމެވެ. ދަބަހުގެ ވާގަނޑު ކޮނޑުގައި އަޅުވާލާފައިވާއިރު ދަބަސް އޮތީ ޒާޔާގެ އުނގު މައްޗަށް ވައްޓާލެވިފައެވެ. އަތްތިލަ މައްޗަށް ވެއްޓުނު ކަރުނަތިއްކާއެކު ހިލަގަނޑެއްހެން ގަނޑުވެފައި އިން ޒާޔާގެ ހަށިގަނޑު ހަރަކާތް ކޮށްލިއެވެ. ދަބަސް ހުޅުވާލުމަށްފަހު ރިންގް ވަމުންދާ ފޯނުގެ ސްކްރީނަށް ބަލާލިއެވެ.

“ދެއިރު ކާބޭހެއް ހެން އިރުއިރުކޮޅާއި ނުގުޅިޔަސް މިއަދު އެކަން ކުރާނަމޭ ބުނެފިން ދޯ.” ފޯނު ކަންފަތުގައި ޖައްސާލުމާއެކު ޒާޔާގެ ހިތުގައި ރޯވެފައިވާ ހުޅުގަނޑު އަދައިގަތެވެ. އަދި ކޯލް ކަނޑާލަމުން ދަބަސް ތެރެއަށް ފޯނު ހޫރާލިއެވެ. އައިސްފައިވާ ރުޅިއާއި ހިތުގައިވާ ހުރިހާ ހިތްހަމަ ނުޖެހުމެއް ބޭލީ ފޯނަށެވެ. އަރައިގެން ހުރި ކަޅު ކުލައިގެ ބޫޓް ފަޔަށް ހެޔޮ ވަރުކޮށްލަމުން ޒާޔާ ހިނގައިގަތެވެ. މަގުމަތީގައި ހިނގަމުންދާ މީހުންނާއި ދުއްވާ އެއްޗެހީގެ އިޙްސާސްވެސް ޒާޔާ އަށް ނުވާ ކަހަލައެވެ. ވާނީވެސް އެހެން ނޫން ހެއްޔެވެ؟ ހަތަރު އަހަރު ދުވަސް ވަންދެން ކާމިޔާބު މީހަކަށް ވުމަށްޓަކައި ކުރި ބުރަ މަސައްކަތުގެ އެއްވެސް އަގެއްނެތެވެ. ދެކެމުން އައި ހުވަފެންތަކުގައި ކުލަޖެހެން ކައިރިވެފައި ހުއްޓާ ހުރިހާ ކަމެއްގައި ނިމުމުގެ ސިއްކަ ޖަހަން ޒާޔާއަށް މަޖުބޫރުވެއްޖެއެވެ. ޒާޔާއަކީ ހައުސިންޑް ޑިވެލޮޕްމެންޓްގް ކޯޕަރޭޝަންގެ އެޗް އާރު މެނޭޖަރެވެ. އެންމެ އާދައިގެ އެގްޒެކްޓިވް އެއްގެ މަޤާމުން ފެށި ޒާޔާގެ ކެރިއަރ އިން މެނޭޖަރ ލެވެލް އަށް ދިއުމަށް ޒާޔާ އޭނާގެ އަރާމު ނިދިކޮޅު ނަގާލިއެވެ. ދިރިއުޅުމުގެ އެތައް އުފަލެއް ޤުރުބާން ކުރިއެވެ.

އޮފީސް ދޮރުމައްޗާއި ހަމައަށް ދެވުނުއިރު ޒާޔާގެ އަތް ފައި މުޅިން ފިނިވެއްޖެއެވެ. އޮފީހުގައި މަސައްކަތް ކުރާ އެންމެންގެ މަލާމާތުގެ ސަބަބަކަށް ޒާޔާ ވާނެކަން ވެސް ޒާޔާއަށް އެނގެއެވެ.

“މިއަދު ހާދަ ލަހުން އޮފީހަށް ތިއައީ. ބޭބީ ބަލީތަ؟” އޮފީހުގައި މަސައްކަތު މީހެއްގެ ވަޒީފާ އަދާކުރާ އުބާ ޒާޔާ ފެނިފައި ވީ ހައިރާނެވެ. ކޮންމެ ދުވަހަކު ގަޑި ޖެހުމުގެ އެތައް އިރެއް ކުރިން އޮފީހަށް އަންނަ ޒާޔާ ގަޑިޖެހިގެން އެތައް އިރެއްވީ ފަހުން އޮފީހަށް އައީމައެވެ. މަޤާމް މަތިވިނަމަވެސް ޒާޔާ ގެންގުޅޭ އުސޫލުތަކަކަށް ބަދަލެއް ދުވަހަކު އައިސްފައެއް ނުވެއެވެ.

ޒާޔާ އަކަށް އުބާގެ ސުވާލަކަށް ޖަވާބެއް ނުދެވުނެވެ. އަނގަ ހުޅުވާލާނެ ހިތްވަރުވެސް ޒާޔާގެ ނެތެވެ. ޒާޔާގެ ދަރިފުޅު ޒިޔަލް ބައްޔެއްވެސް ނޫނެވެ. ޒިޔަލްގެ ހުރިހާ ކަމެއް ފުރިހަމައަށް ކޮށްދޭނެ މީހުންވެސް އެބަތިއްބެވެ. މައްސަލައަކީ އިތުބާރުގެ މައްސަލައެވެ. ޒާޔާގެ ފިރިމީހާ ރާއިދު ގެ މައްސަލައެވެ. ޒާޔާ އޮފީސް ނިމިގެން ދެން ލިބޭ ހުރިހާ ވަގުތެއް ހުސް ކުރަނީ  ތިން އަހަރުގެ ދަރިފުޅު ޒިޔަލް އަށާއި ފިރިމީހާ ރާއިދު އަށެވެ. ޒާޔާ އޮފީހުގައި އުޅޭ ހުރިހާ ވަގުތެއްގައި ޒިޔަލް ބަލަނީ ރާއިދުގެ މަންމަ ނައީމާ އެވެ. ގޭގައި މަސައްކަތް ކުރާނެ ބޭރު މީހެއް ހުރެއެވެ. ރާއިދު ޒާޔާ އަށް ވަޒީފާ ދޫކޮށްލަން މަޖުބޫރު ކުރަނީ ރާއިދުގެ މަންމަ އާއި ބައްޕަ ދިރިއުޅުން ލަންކާއަށް ބަދަލު ކުރަން އުޅޭތީ ޒިޔަލް ބަލާނެ މީހެއް ނުހުންނާނެތީއެވެ. ބޭރުން މީހަކު ގެންނާކަށް ރާއިދު ބޭނުމެއްނުވެއެވެ. ޚުދު ރާއިދު ވެސް ބޭނުންވަނީ މަންމަ މެންނާއެކު ލަންކާއަށް ދިރިއުޅުން ބަދަލުކުރާށެވެ.

އަމިއްލަ ކެބިން އަށް ވަދެ ޒާޔާ ވަތްގަނޑު ހުޅުވާލިއެވެ. އަދި ވަތްގަނޑު ތެރޭގައި އޮތް ސިޓީ އުރައެއް ނަގަމުން ފުން ނޭވާ އެއް ފަޒާގެ ތެރެއަށް ދޫކޮށްލިއެވެ. ދެކެމުން އައި ހުވަފެންތައް ވިއްސިވިހާލިވީއެވެ. އަތް ދަބަސް ކޮނޑަށް ހެޔޮވަރު ކޮށްލަމުން ޒާޔާ މިސްރާބު ޖެހީ އޮފީސް ބޮޑު މީހާގެ ކެބިން އާ ދިމާއަށެވެ. ދެފަހަރަކު ޓަކި ޖަހައިލިއިރު ވެސް އެއްވެސް ޖަވާބެއް ނުލިބުނެވެ. އެންމެ ފަހުން ޒާޔާ ކުޑަކޮށް ދޮރު ހުޅުވާލާފައި އެތެރެއަށް ބޯ ދިއްކޮށްލިއެވެ. އެއްވެސް މީހެއް އެތަނުގައި ނެތެވެ. ނަސީބެކޭ ޒާޔާގެ ހިތަށް އެރިއެވެ. މަޑު ހިނގުމެއްގައި ގޮސް އަތުގައި އޮތް ސިޓީއުރަ މޭޒުމަތީގައި ބާއްވާލިއެވެ. އަދި ޖިންސުގެ ޖީބުން ތަޅުދަނޑި ފައްޗެއްވެސް ނަގާ މޭޒުމަތީގައި ކުރިން ބޭއްވި ސިޓީއުރަ މަތީގައި ބާއްވާލިއެވެ. އިރުކޮޅަކު މަޑުކޮށްލުމަށްފަހު ޒާޔާ ހިނގައިގަތެވެ. މިހާރު އެތަނުގައި ހުރުމުގެ އެއްވެސް ބޭނުމެއް ޒާޔާއަށް އޮތް ކަމަކަށް ޒާޔާ ޤަބޫލެއްނުކުރެއެވެ. ޒާޔާގެ ކެބިން އަށް ވަދެ ބައެއް އަމިއްލަ މުހިއްމު ސާމާނުތައް ކޮތަޅަކަށް އެޅުމަށްފަހު ޒާޔާ ބޭނުންވީ ވީހާވެސް އަވަހަކަށް އެތަނުންދާށެވެ. އެއްވެސް އެކުވެރިއަކާއި ވެސް ޒާޔާ ބައްދަލުކުރާ ހިތެއް ނެތެވެ. އޮފީސްތެރެ އަމާންކޮށް އޮތްކަންވެސް ވީ ޒާޔާ އަށް ލިބުނު ހިތްހަމަ ޖެހުމެކެވެ. ހީވާ ކަހަލައެވެ. އެންމެން ވީ މީޓިން ރޫމްގައެވެ.

 

ޓެކްސީއެއް ހުއްޓުވުމަށްފަހު އެންމެ ފަހު ފަހަރަށް ޒާޔާ އޮފީސް ބިލްޑިންގް އަށް ބަލާލިއެވެ. ކުރީގެ އެކިއެކި ހަނދާންތައް ލޯމަތީގައި ސިފަވެގެންދިޔައެވެ. ޓެކްސީއަށް އަރާ ސީޓްގައި ބުރަކަށި ޖައްސާލަމުން ދާންވީ ފެރީ ޓާމިނަލަށް ކަމަށް ބުނެ ދަބަހުގައި އޮތް ފޯނު ޒާޔާ ނެގިއެވެ. އަދި އޮފީސް ބޮޑުމީހާގެ ނަމްބަރަށް މެސެޖްކޮށްލުމަށްފަހު ފޯނު ނިއްވައިލި އެވެ.

 

 

ގެޔަށް ވަން ތަނާ ފުރަތަމަވެސް ޒާޔާގެ ކަންފަތުގައި ޖެހުނީ އޭނާގެ ދަރިފުޅު ޒިޔަލްގެ އަޑެވެ. ހުރިހާ ފިކުރުތަކެއްވެސް ފިލައި ދިޔަ ކަހަލައެވެ. ކުޑަކުޑަ ޒިޔަލް ދުވެފައި އައިގޮތަށް އައިސް ޒާޔާގެ އަތު ތެރެއަށްވަނެވެ.

“ނުވެސް ކެއި އެންމެ ރޮށިކޮޅެއްވެސް. ބުއްތަށިދީފަ މި ފެންވަރުވާލީ ހަމަ ދެންމެ.” ނައީމާ ޒާޔާގެ މޫނަށް ބަލާލަމުން ހިނިތުންވެލިއެވެ.

“ހާދަ އަވަހަކަށް އޮފީސް ނިމުނީ.” ނޭނގޭ ކަމަށް ހަދައިގެން ނައީމާ ހުއްޓަސް ޒާޔާއަށް ހުރިހާ އެއްޗެއްވެސް އެނގެއެވެ. ރާއިދުގެ ބޮލުގައި އަބަދު ނައީމާ ކޮށާކަން ވެސް ޒާޔާ ދެނެ ހުއްޓެވެ. ކައިވެންޏަށް ހަތަރު އަހަރުވީ އިރު ރާއިދުގެ ފުރިހަމަ އެއްބާރުލުން ޒާޔާއަށް އައީ ލިބެމުންނެވެ. ކުއްލިއަކަށް މިގޮތަށް ރާއިދު ނިންމަން ޖެހުމުގެ އެންމެ ބޮޑު އެއް ސަބަބަކީ ނައީމާ ކަން ވެސް ޒާޔާއަށް އޮޅިފައެއް ނެތެވެ. ނަމަވެސް ޒާޔާ ރައްދު ދޭން ބޭނުން ނުވަނީއެވެ. އެއްވެސް މައްސަލައެއް ޖެހި އެއްވެސް މީހަކާއި މޫނު ކެނޑެން ބޭނުން ނުވަނީއެވެ. ނައީމާގެ އެއްވެސް ސުވާލަކަށް ޖަވާބު ނުދީ ޒާޔާ  ޒިޔަލް އާއި ސަކަރާތް ޖަހާތަން ބަލަން ހުރެފައި އެތަނުން ދިޔުމުން ޒާޔާ ޒިޔަލް ގޮވައިގެން ގޮސް ކޮޓަރިއަށްވަނެވެ.

 

ދުވަހުގެ ހަތަރުދަން ޒާޔާ ހޭދަކޮށްލީ ކޮޓަރީގައެވެ. ޒިޔަލް އަށް ކާންދިނީވެސް ގޭގައި ގެންގުޅޭ މީހާ ކައިރީގައި ބުނެގެން ކާއެއްޗެއް ގެނެސްގެންނެވެ.

“މަންމީ. ޒިޔަލް ލައިކް ވަނީ މަންމި ދެކެ. މާމަ ދެކެ ޒިޔަލް ލައިކެއް ނުވެޔޭ.” ޒާޔާގެ މޭތެރެއަށް ބޮޑިވެގަންނަމުން ޒިޔަލް ބުނެލިއެވެ.

“އެހެންތަ؟ އެހެން ވީއިރު ދެން މަންމި ހުންނާނަން އަބަދުވެސް ދަރިފުޅު ކައިރީގައި.” ޒާޔާ ޒިޔަލްގެ ކޮލުގައި ތުންފަތް ޖައްސާލިއެވެ.

ޒިޔަލްއަށް ނިދުނުއިރުވެސް ޒާޔާ އިނީ ޒިޔަލްގެ ބޮލުގައި ފިރުމާލަ ފިރުމާލައެވެ. އޭރުވެސް ޒާޔާގެ ސިކުނޑި ތެރޭގައި އެނބުރެމުން ދިޔައީ އޮފީހުގެ އެކިއެކި ޚިޔާލުތަކެވެ. ކުއްލިއަކަށް ފޯނު ނިއްވާލެވުނު ހަނދާންވެގެން ޒާޔާ ދުވެފައި ކަހަލަ ގޮތަކަށް ގޮސް އަތް ދަަބަަސް ހާވާލަމުން އޭގެ ތެރޭގައި އޮތް ފޯނު ނެގިއެވެ. ނިއްވާލައިފައި އޮތް ފޯނު ޒާޔާ ހުޅުވާލިތަނާ ފުލުފުލުން މެސެޖްތަކާއި ކޯލް އެލާޓްތައް އަންނަން ފެށިއެވެ. ވަޒީފާއިން ވަކިވީ ސަބަބު ނޭނގި ގެންނެވެ. ޒާޔާ އުފާވެސް ވިއެވެ. ދެރަވެސް ވިއެވެ. އުފާވީ އެންމެން ޒާޔާ އާ ދޭތެރޭގައި ވިސްނާތީއެވެ. ދެރަވީ ޒާޔާގެ ހިތް ނޭދޭ ގޮތައް ކަންތައް ކުރަން ޖެހޭތީއެވެ.

އެންމެން މަތިން މިސްވާނެ ކަމަށް ބުނަމުން ޒާޔާ އޮފީސް ވައިބަރ ގްރޫޕަށް މެސެޖްކޮށްލިއެވެ. އަދި ސިމްކާޑް ފޯނުން ނަގައި އަނގަޔަށްލާ ހަފާލިއެވެ. އޭރު ހަމަ ރަނގަޅަށްވެސް ޒާޔާ އަށް ރޮވިއްޖެއެވެ. އެވަގުތު ކޮޓަރި ދޮރު ހުޅުވާލާފައި ރާއިދު ވަނެވެ. ހެވިފައި އައިސް އަތުގައި އޮތް މާބޮޑި ނަގާ ޒާޔާ އާ ދިމާއަށް ދިއްކޮށްލިއެވެ.

ޒާޔާ މޫނު އަނބުރާލީ ދުރަށެވެ.

“އަސްތާ. މަގޭ ޖާން ރުޅި އައިއްސަތަ؟” ރާއިދު ޒާޔާ އާ ޖެހި ފިތިގެން އިށީނދެލިއެވެ.

“ހުރިހާ ކަމެއް އެނގިހުރެ ނޭނގޭ ކަމަށް ނުހަދަބަލަ. ރާއިދު ކީއްވެ މަށަށް ތިހެން ތިހަދަނީ.” ޒާޔާގެ ލޮލުން ހޯސްލާފައި ކަރުނަ ފައިބައިގަތެވެ. ހިތުގައި ހުރި ހުރިހާ އުދާސްތަކެއް ކަރުނައިގެ ސިފައިގައި ބޭރުވަމުން ދަނީއެވެ.

“ޒާޔާ. އިނގެޔޭ ދެރަވާނެކަން ވެސް. އެކަމަކު އަހަރެން އެގޮތަށް ނިންމީ ވަރަށް ވިސްނާފައޭ.” ޒާޔާ ދެރަވެ ރޯތަން ބަލަން ރާއިދުއަކަށް ފަސޭހައެއް ނޫނެވެ.

“އޯކޭ. ޒާޔާ ބޭނުންވާ ކަމެއް ބުނެބަލަ.  ޕްރޮމިސް ކޮށްދޭނަން.” ޒާޔާ އެއްވެސް ޖަވާބެއް ނުދިނުމުން ރާއިދު ޒާޔާގެ ދަތް ދޮޅީގައި ހިފާ އުފުލާލިއެވެ.

“ޔަޤީންތަ؟” ޒާޔާއަކަށް ޤަބޫލެއްނުކުރެވުނެވެ. ރާއިދު ބޯޖަހާލަމުން ހިނިތުންވެލިއެވެ.

“އަހަރެމެން ދާނީ ލަންކާއަކަށް ނޫން. އަހަރެންގެ ރަށަށް. ޒިޔަލްވެސް އަދި ކުޑައެއްނު. އަހަރެއް ކޮށްލާފަ އަންނާނީ.” ޒާޔާ ވާހަކަ ދެއްކީ ސީދާ ރާއިދުގެ ލޮލަށް ބަލަން ހުރެއެވެ. ހީވާކަހަލައެވެ. ރާއިދު އެއްބަސް ވާނެހެން ޒާޔާ އަށް ހީނުވަނީއެވެ.

“ޒާޔާ ބުނަމެއްނު އަބަދުވެސް ރަށަކަށް ދާކަށް ބޭނުމެއް ނޫނޭ.” ޒާޔާގެ ވާހަކައިން ރާއިދު އެހާ ހިތްހަމަ ޖެހުނު ހެނެއް ހިއެއްނުވެއެވެ.

“އިނގޭ އެއްބަސް ނުވާނެކަން ކުރިންވެސް. ރާއިދު މަށަށް ފެންނަގޮތް ބުނާށޭ ބުނީމަ ބުނީމި.” ޒާޔާގެ ގާތަށް ރުޅިއައެވެ.

“ދާނީ އެހެންވީއިރު. ހެޕީ؟” ރާއިދު ޒާޔާގެ އަތުގައި ހިފައިގެން ގެނެސް އުނގުގައި ބައިންދާލިއެވެ.

“ދާން ބޭނުމީ މާދަމާ.” ޒާޔާ ބޭނުންވީ ވީހާވެސް އަވަހަށްދާށެވެ. ނައީމާ ކުރިމަތިންވެސް ދުރަށެވެ. އޮފީސް މާހައުލާވެސް ދުރަށެވެ. ގޭގައި ހުރިއްޔާ ޒާޔާ ހަދާނީ ނައީމާގެ އަޅަކަށް ކަން ޒާޔާއަށް ވަރަށް ރަނގަޅަށް އެނގެއެވެ.

“މި އަންނަނީ ޓިކެޓް ކަންތައް ހަމަޖައްސާފައި. ރެޑީ ވެބާ ޝޮޕިން ކޮށްލަން ދާން. ރަށަކުން ކަމަނާފާނު ބޭނުންހާ އެއްޗެއް ނުލިބޭނެއެއްނު.” ރާއިދު ސަމާސާކޮށްލީ ޒާޔާ ހެއްވާލުމުގެ ނިޔަތުގައެވެ. ނަމަވެސް ޒާޔާގެ މޫނުމަތިން ހިނިތުންވުމުގެ އަސަރެއް ނުފެނުނެވެ. ރާއިދު ނިކުތުމުން ޒާޔާއަށް އަނެއްކާވެސް ވިސްނެންފެށިއެވެ. ރަށަށް ގޮސް އުޅެވޭނެބާއެވެ. އެތަނަކީ ޒާޔާ އެއް އިރެއްގައިވެސް އުޅޭ ހިތްވާ ތަނެއް ނޫނެވެ. އުޅެން ބޭނުންވެސް ވާތަނެއް ނޫނެވެ. ރާއިދުގެ މަންމެންނާއެކީ ލަންކާ އަށް ދާކަށްވެސް ޒާޔާ ބޭނުމެއްނޫނެވެ. އެކަމަކު ރާއިދުގެ މަންމައާ އެކީ އުޅުމަށްވުރެ ރަށަށް ދިއުންވެސް ޒާޔާއަށް މާރަނގަޅެވެ. މިވީހާ ދުވަހު ރާއިދުގެ މަންމައާއެކީގައި އުޅެވުނީ ޒާޔާ ގޭގައި ނުހުރެ ވަޒީފާގައި ހުރިހާ ވަގުތެއް ހޭދަކުރާތީއެވެ.

ނިދިފައި އޮތް ޒިޔަލް އަށް ބަލާލަމުން ޒާޔާ ތުވާލި ހިފައިގެން ގޮސް ފާހާނާއަށް ވަނީ ރާއިދު އަންނަންދެން ތައްޔާރުވެލުމަށެވެ.

 

 

ދެއަތް ފުރާ ކޮތަޅު ހިފައިގެން ރާއިދު އާއި ޒާޔާ ގެޔަށް އައިސް ވަނީ އެމީހުންނަށް ބޭނުންވާ ހުރިހާ އެއްޗެއް ގަނެގެންނެވެ.

“ރާއިދު. ތި ކުރެވެނީ ރަނގަޅު ކަމެއްތަ؟ ދަރިފުޅަށް އުޅެވޭނެތަ ރާއްޖެތެރޭގައި.” ސޯފާގައި އިން ރާއިދުގެ ބައްޕަ އަހްމަދު ރާއިދު ފެނިފައި އިންތަނުން ތެދުވިއެވެ.

“ޒާޔާގެ ރަށެއްނު. އުޅެވޭނެ.” ބައްޕަގެ ކުރިމަތީގައި ރާއިދު ހުރީ އިސްޖަހައިގެންނެވެ.

“ތީ ރަނގަޅު ގޮތެއް ނޫން. އަދި ވިސްނާލާ. ބައްޕަ ނެތިން ތި ދެކުދިންގެ ނިންމުމަކަށް ގޮތް ކިޔާކަށް.” އަހްމަދު ހިތްހަމަ ނުޖެހިފައި ގޮސް އޭނާގެ ކޮޓަރިއަށްވަނެވެ.

ޒާޔާގެ މޮޅިވެފައިވާ މޫނަށް ރާއިދު ބަލާލިއެވެ. ކޮންމެ ގޮތެއްވިޔަސް ޒާޔާ ދެރަވާ ކަހަލަ ކަމެއް ރާއިދު ކުރާކަށް ބޭނުމެއްނުވެއެވެ.

“ހިނގާ ޕެކް ކުރަން ދަމާ.” ރާއިދު ޒާޔާގެ އަތުގައި ހިފައި ގަޔާ ކައިރިކޮށްލިއެވެ.

 

 

ލޯންޗުން ފައިބަމުން ރަށުގެ ފަސްގަނޑުގައި ފައި ޖެހުމާއެކު އަހަރެމެންނަށް މަރުޙަބާ ކިޔާލީ ކުއްލިއަކަށް ވެހެން ފެށި ވާރޭ އެވެ. ޒިޔަލް އުރާލައިގެން ޖެޓީ ކުރިމަތީގައި ހުރި ފިހާރައެއްގެ އަސްކަނިދޮށަށް ޒާޔާ ދުވެފައި ގޮސްވަނެވެ. އެންމެންނަށް ސަޕްރައިޒެއް ދިނުމަށްޓަކައި ޒާޔާ އޭނާ އަންނަ ވާހަކަ އެކަކު ކައިރީގައިވެސް ނުބުނެއެވެ. ނަމަވެސް ވާރޭ ހުއްޓާނުލާތާ ގިނަ އިރުވުމުން ޒާޔާ އަށް އޭނާގެ އާއިލާ މީހުންނަށް ގުޅަން މަޖުބޫރުވިއެވެ.

 

ގެޔަށް ދެވުނު އިރު އާއިލާގެ އެންމެން ވަނީ ގޭތެރެއަށް ޖަމާވެފައެވެ. އުފަލުގެ ކޮޅެއްނެތެވެ. އެތައް އަހަރު ތަކަކަށްފަހު ޒާޔާ އެނބުރި ރަށަށް އައުމުން އެންމެންގެ މޫނު މަތިންވެސް ފެންނަމުން ދިޔައީ އުފާވެރިކަމެވެ.

ރާއިދު އަށް އެމާހައުލު ވީ އާ ކަމަކަށެވެ. ނަމަވެސް އެންމެން ވާހަކަ ދައްކާ ހަދަން ފެށުމުން ރާއިދުވެސް ހުރީ ހިތްހަމަ ޖެހިފައެވެ.

“ޒާޔާ މިހާރު ހާދަ ފަލައޭ.” ޒާޔާގެ ދޮންބެ ޔަމަން ޒާޔާ އާ ދިމާކޮށްލިއެވެ.

“ފަލަވާނެއެއްނު. އެހާ ލޯބި ދެމޭ.” ރާއިދު ޔަމަންގެ ސަމާސާގައި ބައިވެރިވެލިއެވެ.

“ދެން ދޭ ރެސްޓްކޮށްލަން. ޒިޔަލް ވެސް އެހުރީ ނިދިއައިއްސަ.” ޔަމަން ޒާޔާ މެންގެ ފޮށިތައް ނަގައިގެން ޒާޔާގެ ކޮޓަރިއަށް ގެންގޮސްދިނެވެ.

“މަންމަ ދާނަން ކާން ހަދާލަން. ކައިގެންވެސް ރެސްޓް ކުރެވޭނެ.” ޒާޔާގެ މަންމަ ފާއިޒާ ޒާޔާގެ ބޮލުގައި ފިރުމާލިއެވެ.

“ރާއިދު ދޭ ޒިޔަލް ގޮވައިގެން ރޫމްއަށް. އަންނާނަން ޝޮޕް ބަންދު ކުރުމުގެ ކުރިން ޑައިޕަރ ގަނެގެން.” ޒާޔާ އަތް ދަބަހުގައި އޮތް ރާއިދުގެ ވޮލެޓް ނަގައިގެން ހިނގައިގަތެވެ.

 

މަގުމަތިން ހިނގަމުން ދިޔައިރުވެސް ޒާޔާއަށް ބެލެނީ ބަދަލުވެފައިވާ ރަށުގެ މާހައުލަށެވެ. ކުއްލިއަކަށް ކުރިމަތިން ސައިކަލެއްގައި ދިޔަ ފިރިހެން ކުއްޖެއް ޒާޔާގެ ސަމާލުކަން އަތުލައިފިއެވެ. ޒާޔާ އުޅެ ބޮޑުވި ރަށް ކަމުގައިވިޔަސް އެއީ ކާކު ކަމެއް ޒާޔާ އަކަށް ނޭނގުނެވެ. ފެނުނީ މޫނުގެ އެއްފަރާތެވެ. ލައިގެން ހުރި ކަޅު ކުލައިގެ ޓީޝާޓެވެ. ޖެލް ލައި ހަރުކޮށް ކޮޅަށް ނަގާފައިވާ ފަން އިސްތަށިކޮޅެވެ. ޒާޔާގެ ހިތުގެ ތެޅުން އަވަސްވާން ވީ ސަބަބު ޒާޔާއަކަށްވެސް ނޭނގުނެވެ. ކުރެވުނުހާވެސް ކަމަކީ ނިވައި ވަންދެން އެކުއްޖާއަށް ބެލުމެވެ.

ނުނިމޭ

ފިހާރައަށްވަދެ ނެޕީ ބޮޑި ގަނެގެން ނިކުމެވެސް ޒާޔާ އެތައް އިރެއް ވާންދެން ފިހާރަ ދޮރު މަތީގައި މަޑުކޮށްލިއެވެ. ކީއްވެ ކަމެއް ޚުދު ޒާޔާ އަކަށްވެސް ނޭނގެއެވެ. ދެލޯ ހޯދަން އެދޭ މީހާ ނުފެނުމުން ޒާޔާ މިސްރާބުޖެހީ ގެޔާއި ދިމާލަށެވެ.

“ހާދަ ލަސްވީ.” ރާއިދު ހުރީ ދޮރުމަތީގައި ކޮޅުކޮޅަށް ހިނގާލަ ހިނގާލައެވެ. ޒާޔާ ލަސްވެގެންނެވެ.

“ފިހާރަ ތެރޭގައި ތަންކޮޅެއް މީހުން ގިނައީ. ކޮބާ ޒިޔަލް.” ޒާޔާ ނެޕީ ކޮތަޅު ރާއިދުއަށް ދިއްކޮށްލިއެވެ.

“މަންމައާއެކު ނިދައިފި. ހިނގާ ރޫމް ތެރެ ހަމައަކަށް އަޅުވާލަން ދަމާ.” ރާއިދު ޒާޔާގެ އުނަގަނޑުގައި އަތް އަޅުވާލިއެވެ.

ކޮޓަރި ތެރެ ހަމައަކަށް އަޅުވާލެވުނު އިރު ހަވީރުވެއްޖެއެވެ. ޒާޔާ އާއި ރާއިދު ތިބީ މުޅިން ވަރުބަލިވެ މާނޭވާ ލެވިފައެވެ.

“ދަރިފުޅުމެން ނުވެސް ކަނީތަ؟” ފާއިޒާ ޒިޔަލް އުރާލައިގެން އައިސް ކޮޓަރިއަށްވަނެވެ. ފަހަތުން ޒާޔާގެ ދޮންބެ ޔަމަންވެސް އައިސް ވަނެވެ.

“ދެން ދާންވީ ކާން. ޒިޔަލް ކެއިތަ؟” ޒާޔާ ޒިޔަލް އުރާލަން އަތް ދިއްކޮށްލިއެވެ.

“މާމަ ކުއްޖެއް.” ޒިޔަލް ބޮޑާ ހާކާލީ ޒާޔާ ކައިރިއަށް ނުދާންވެގެންނެވެ. އެމަންޒަރު ބަލަން ރާއިދު ހުރީ ހިނިއައިސްފައެވެ.

“ހީވޭ ކަމެއްހެން. މިހާ އަވަހަށް މާމަ ކުއްޖަކަށްވީ. މާމަ އާއެކީ ކައިވެސްފީމޭ ދޯ ދޫނީ.” ފާއިޒާގެ މެޔާއިލައި ޒިޔަލް ބޮޑިކޮށްލިއެވެ.

“ރާއިދު. މިކޮޅުގަ ކުރާނެ މާގިނަ މަސައްކަތްތަކެއް ނުހުންނާނެ. ކައިރީގައި މިއޮތް ރިސޯޓަށް ދާންވީނު ވަޒީފާއަށް.” ޔަމަން ލަފާދިނެވެ.

“ރާއިދު ދާނީ މަހަށް ދޯ. އޭނަ ނިކަން ކުރާހިތްވާ ކަމެއް އެއީ. ދޮންބެމެން ދޯނިން މަހަށް ދާންވީނު.” ޒާޔާ އޭނާގެ ޚިޔާލު ފާޅު ކުރިއެވެ. ޒާޔާ ގެ ޚިޔާލަށް ރާއިދުވެސް ތާއީދު ކުރިއެވެ.

“މައްސަލައެއްނެތް. މިރޭ ނުވައެއް ޖަހާއިރު ފުރަން ރެޑީވޭ.” ޔަމަން ހިނިތުންވެލިއެވެ.

“މިރެޔޭ.” ޒާޔާ ދެބުމަ ގޮށް ޖަހާލިއެވެ.

“އާން. މިރޭ. ކޮންމެ ދުވަހަކު ރަށަކަށްވެސް ނާދެވޭނެ.” ޔަމަން ހީނގަތެވެ.

“ތެދެއް މަންމާ؟” ޒާޔާ ހުރީ ހާސްވެފައެވެ. އަމިއްލަ ރަށް ކަމުގައިވިޔަސް ރާއިދު އާއި ނުލައި އުޅެން ޒާޔާއަށް ވަރަށް އުނދަގުލެވެ.

“އެއީ ތެދެއް ދަރިފުޅާ. ދެން މަންމަމެންވެސް މިތިބީނު. ދުވަސްކޮޅަކުން ހޭނިދާނެ.” ފާއިޒާ ޒާޔާއަށް ވިސްނާދިނެވެ.

ހަވީރުގެ ފިނިފިނި ރޯޅިން މުޅި މާހައުލުވަނީ ގަނޑުކޮށްލާފައެވެ. އިރުގެ ހޫނުކަމެއްނެތެވެ. އުޑުމަތިވެސް އޮތީ ބަނަކޮށެކެވެ. ޒާޔާ އާއި ރާއިދު ޒިޔަލް ގޮވައިގެން ނިކުތީ ރަށުތެރެ ބަލައިލުމަށެވެ. ފެންނަ ކޮންމެ މީހަކަށް ޒާޔާ ހިނިތުންވެލި ނަމަވެސް ބައެއް މީހުންގެ ނަފްރަތުގެ ލޯތައް ޒާޔާއަށް ވަނީ އަމާޒުވެފައެވެ. ޒާޔާއަށް ނޭނގެނީ ސަބަބެވެ. އެންމެ ކުޑައިރުއްސުރެ ޒާޔާގެ ހިތުގައި އުފެދިފައިވާ ސުވާލެކެވެ. ފަންސަވީސް އަހަރުވިއިރުވެސް ޖަވާބެއް ނުލިބުނެވެ.

“ރާއިދު. ހީވަނީ ވިއްސާރަ އޮއްސާލަންހެން އެއުޅެނީ. ހިނގާ ގެޔަށް ދަމާ.” ޒާޔާ އުޑުމައްޗަށް ބަލައިލިއެވެ. ރާއިދު ޒިޔަލް އުރާލަމުން ބޯޖަހާލިއެވެ. ގެޔާއި ހަމައަށް ނުދެވެއެވެ. ވިއްސާރަ އޮއްސާލައިފިއެވެ.

“ރާއިދު ދޭބަލަ ދުވެފައި ޒިޔަލް ގޮވައިގެން. ވަރަށް ކައިރިއެއްނު. މިތާގަ ނެތް ނިވައި ވެލަން ވަންނާނެ ތަނެއްވެސް.” ޒާޔާ އޭނާގެ ހިނގުން ބާރުކޮށްލިއެވެ،

ރާއިދު ދުވެފައި ގޮސް ޖެހިގެން އޮތް ގޯޅި އަޅައިލިއެވެ.

ކުއްލިއަކަށް ވިދާލި ވިދުވަރާއެކު ބާރު ގުގުރިއެއް ޖަހާލިއެވެ. ޒާޔާ ބިރުން ގޮސް އެތަނުގައި ހުރި ގެއެއްގެ ދޮރާށި ތެރެއަށް ވަނެވެ. ގުގުރަންޏާ ޒާޔާ ގަންނަނީ އަމަށަކު ބިރެއްނޫނެވެ.

“މަންޖެ ހާދަ ދުވަހެއްކޮށްލާފަ ރަށަށް ތިއައީ.” މުސްކުޅި ފުރައިގެ މީހެއްގެ އަޑު ޖެހުމާއެކު ޒާޔާ ދިޔައީ ސިއްސައިގެންނެވެ. ރަށުގެ މަޝްހޫރު ބޮޑު ވިޔަފާރިވެރިޔާ ސުހާނެވެ. ބަލަހައްޓައިގެން ހުރިގޮތުންވެސް އޭނާގެ ހިތް ނިޔަތް ރަނގަޅު ނޫންކަން ޒާޔާ ދެނެގަތެވެ. ދެފަޔަށް ލެވުނުހާ ބާރެއްލާފައި ގެޔާއި ދިމާއަށް ޒާޔާ ދުއްވައިގަތީ ވެހެމުންދިޔަ ބޯ ވާރެއަށްވެސް ބެލުމެއްނެތިއެވެ. ތެމިފޯވެގެން ގެޔަށް ދެވުނު އިރު ޒާޔާ ހުރީ މާނޭވާ ލެވިފައެވެ.

“ޒާޔާ. ދޭބަލަ އެއްޗެހި ބަދަލުކުރަން. އެހެން ނޫނީ ބަލިވެދާނެ.” ރާއިދު ހުރީ ޒިޔަލް އުރާލައިގެން ކޮޓަރި ދޮރުމަތީގައެވެ. ރާއިދު އަބަދުވެސް ޒާޔާ އާ ދޭތެރޭ ވަރަށް ވިސްނައެވެ. ޒާޔާ އާއި ޒިޔަލް އަކީ ރާއިދުގެ މުޅި ދިރިއުޅުމެވެ.

ހަވީރު ވެހެން ފެށި ވާރޭ ހުއްޓާނުލައެވެ. ހީކަރުވައިގެން ގޮސް ޒާޔާ ތުރުތުރު އަޅަމުންދެއެވެ. ފެންވަރައިގެން ނިކުތް ގޮތަށް ޒާޔާ މަޑުކޮށްލައިގެން ހުރީ ލޯގަނޑު ކުރިމަތީގައެވެ. އެއީ ޒާޔާގެ އާދައެވެ. އަމިއްލަ ސިފައަށް ބެލުމެވެ. ޤުދުރަތުން ދެއްވާފައިވާ ރީތި ސިފައަށް ފަޚުރުވެރިވުމެވެ.

“ރީއްޗޭ.” ދޮރު ހުޅުވާލާފައި ވަތް ރާއިދު އައި ގޮތަށް އައިސް ޒާޔާގެ ފުރަގަހުން ބައްދާލިއެވެ.

ފިނިވެގެން ގޮސް ތުރުތުރު އަޅަމުންދާ ޒާޔާ ރާއިދުގެ ހަށިގަނޑުގެ ހޫނުކަން އިޙްސާސްވުމާއެކު ރާއިދުގެ މޭތެރެއަށް ބޮޑިވެގަތެވެ.

“ދަނީތަ؟ މިޔޮށް ވިއްސާރަ ރޭ ވެސް.” ޒާޔާ ރާއިދުގެ މޭމަތީގައި ތުންފަތް ޖައްސާ ބާރުކޮށްލިއެވެ.

ވިއްސާރަޔަސް ކަނޑުގަދައެއް ނޫނޭ. ޔަމަން ބުނީ ފުރާނެޔޯ. އެންމެ ވިހި މިނެޓް އިނީ. އެހެންވެ ބޭގް ޕެކް ކޮށްލަން މިއައީވެސް.” ޒާޔާގެ ލޯބިވެތި ފިރުމުންތަކުން ރާއިދުގެ ހިތްފުރިގެން ބަންޑުންވާން އުޅޭ ކަހަލައެވެ.

“ނަގާ ދީބަލަ ބޭގް.” ރާއިދު ޒާޔާގެ ނިތްކުރީގައި ތުންފަތް ޖައްސާލިއެވެ. ނަމަވެސް ޒާޔާ ހުރި ފިޔަވަޅުމަތީގައި ހުރީއެވެ. ސީދާ ރާއިދުގެ ލޮލަށް ބަލަހައްޓައިގެންނެވެ.

“ފާހާނާގަ ގެދޮރު އަޅަން ނޯވެ އަވަސް ކޮށްލި ނަމައެއްނު.” ރާއިދުއަށް ޒާޔާގެ ދެލޮލުން ފެންނަމުންދާ މަސްތީ އަސަރު ފާހަގަވިއެވެ. ޚުދު ރާއިދުވެސް ޒާޔާއަށް ބޭނުންވެއެވެ. އަދިވަކިން މިކަހަލަ ފިނިފިނި ރެއަކުއެވެ.

“ކޮބާ ރެޑީތަ؟” ޔަމަން ދޮރުގައި ޓަކި ޖަހާލުމާއެކު ޒާޔާ ސިހިފައި ދުރަށް ޖެހިލިއެވެ. ރާއިދު ދަބަސް ޕެކް ކޮށްލުމަށްފަހު ނިދާފައި އޮތް ޒިޔަލްގެ ކޮލުގައި ބޮސްދިނެވެ. އަދި ޒާޔާގެކޮލުގައި މަޑުމަޑުން ހިފާލުމަށްފަހު ޔަމަން އާއެކު ގެއިން ނިކުތެވެ.

ޒާޔާ ހުރީ ފެންކަޅިވެފައެވެ. ރުޅިވެސް އާދެވުނެވެ. ނަމަވެސް ރާއިދު އެދިޔައީ ޒާޔާއަށްޓަކައި ކަން ޒާޔާ ޤަބޫލުކުރެއެވެ.

އާ ދުވަހަކަށް ދުނިޔެއަށް އަލިވިލުނީ ސާފު ރީތިދުވަހެއް ގޮތުގައެވެ. ވިއްސާރައިގެ އެއްވެސް ކުލައެއްނެތެވެ. އުޑުމަތި ސާފެވެ. އިރުގެ އަލިން މުޅިދުނިޔެވަނީ ދިއްލިފައެވެ.

“ފާއިޒާއްތާ. ތެދެއް ޒާޔާ އައިއްސިތަ؟” ހަނޑޫ ދޮލަނގެއް ބޯމައްޗަށް ނަގައިގެން ހުރި ފާއިޒާ އެނބުރި ބަލާލީ ގޭގެ ދޮރާށި ހުޅުވާލި އަޑަށެވެ.

“އާން. އެބައުޅޭ ކޮޓަރީގަ.” ފާއިޒާގެ ދުފައި ރަތް ކޮށްފައިވާ ދަތްކޮޅު ދައްކާލަމުން  ކުރިމަތީގައި ހުރި ހައުލާ އަށް ފާއިޒާ ހީލިއެވެ.

ހައުލާ އަކީ ޒާޔާގެ ތިމާގެ ކުއްޖެކެވެ. ސުކޫލު ދައުރުގެ ގާތް އެކުވެރިއެކެވެ.

ފާއިޒާއަށް ޝުކުރު އަދާކުރަމުން ހައުލާ ދުއްވައިގަތީ ޒާޔާގެ ކޮޓަރިއާ ދިމާއަށެވެ. އޭރު ޒިޔަލްގެ އަތުގައި ހިފައިގެން ޒާޔާ ވެސް ކޮޓަރިން ނިކުންނަނީއެވެ.

“ހޮއެ ހޮއޭ. ހާދަ ސަޅިއޭ މިހާރު.” ހައުލާ ޒާޔާގެ ގައިގައި އޮޅުލައިގަތެވެ.

“އޭ. މަ ވެއްޓި ދާނޭ.” ޒިޔަލް އާއި ޒާޔާ ނުވެއްޓުނީ ހަމަ ކިރިޔާއެވެ.

“ވަރަށް ރުޅި. އަންގާވެސް ނުލައެއްނު އައިސްގެން އުޅޭއިރު.” ހައުލާ ތުން ދަމައިގެން ހުރެ ޝަކުވާ ކުރަން ފެށިއެވެ.

“ދެން ރުޅި ނާދެބަލަ ލަވް. ކިހާ ސަޕްރައިޒް ވެއްޖެތަ ފެނުނީމަ.” ޒާޔާ ހައުލާގެ އަތުގައި ހިފާލަމުން ހީނގަތެވެ.

“ރަނގަޅު ގަޑިއެއްގައޭ ތި އައީ. ހިނގާބަލަ އޮފީހަށް. ޒިޔަލް ސުކޫލަށް ވައްދަން ކަމަށް މިކޮޅަށް.” ޒާޔާ ޒިޔަލްގެ އަތުގައި ހިފައިގެން ގޮސް ފާއިޒާ ކައިރީގައި ބެހެއްޓިއެވެ.

“އެއްކޮށްތަ ތި ޗޭންޖްވީ މިކޮޅަށް.” ހައުލާއަށް އުފަލުގެ ކޮޅެއްނެތެވެ.

“މަންމާ. ޒިޔަލް ބަލައްޗޭ. އާދެބަލަ އަންހެނާ. ތިވާހަކަ ދެއްކިދާނެއެއްނު.” ޒާޔާ ހައުލާގެ އަތުގައި ހިފައި ދަމާލިއެވެ.

ވިއްސާރައިގެ އަސަރެއް ނެތަސް ރޭގައި ވެހުނު ވާރޭގެ ސަބަބުން މަގުތަކުގައިވަނީ ހިސާބަކަށް ފެންހެދިފައެވެ.

“މި ރަށުގައި ނޫޅޭތަ ބިޓެއްވެސް.” ޒާޔާގެ ރާގުގައި ވަނީ ސަމާސާއެވެ.

“މިރަށު މީހަކާ ނުއިންނާކަށްނު މާދުރުން މީހަކާއި އިނީ. ރަށު މީހަކާއި އިން ނަމަ ގައިމު ރަށުގައި އުޅެވޭނެއެއްނު.” ހައުލާ ވަރަށް ސީރިއަސްވެފައި ބުނެލިއެވެ.

“ދެން ސާބަސް. އެއީ މަޖަލޭ. މިރަށަކު ނޫޅޭނެ މަށަށް ކަމުދާ މީހެއް.” ވާހަކައިގައި ތިބެގެން އޮފީހާއި ހިސާބަށް ދެވުނުއިރު ވެސް ޒާޔާމެންނަށް ނޭނގެއެވެ.

“ހިނގާބަލަ ވަންނަން.” ހައުލާ ޒާޔާ އާއި ވާހަކަ ދެއްކި ކަމުގައިވިޔަސް ޒާޔާގެ ނަޒަރު ސީދާވެފައި ހުރީ މަގުގެ އަނެއްފަރާތުގައި ސައިކަލްމަތީގައި މަޑުކޮށްލައިގެން އިން ޒުވާނާއަށެވެ. ފުރަގަސްދީގެން އިނަސް، ނަން ނޭނގުނަސް ޒާޔާއަށް އެއީ ކާކުކަން އެނގިއްޖެއެވެ.

ޒާޔާ ބަލަން ހުއްޓާ އޮފީސް ތެރެއިން ނިކުތް އަންހެން ކުއްޖެއް އެޒުވާނާގެ ސައިކަލް ފަހަތަށް އެރިއެވެ. ހަމައެކަނި އެރީކީވެސް ނޫނެވެ. އުނަގަނޑުގައި އަތް އަޅުވާލަމުން ކޮނޑުމަތީގައިވެސް ބޯއަޅާލިއެވެ.

“ޒާޔާ. ނުވަންނަނީތަ؟” ހައުލާގެ އަޑުން ޒާޔާ ސިހުނެވެ. ދެފަރާތަކަށް ބޯ ހޫރާލަމުން ޒާޔާ އޮފީސް ތެރެއަށް ވަންނަން ހިނގައިގަތެވެ.

ހަފްތާއެއް ފާއިތުވެގެން ދިޔައިރުވެސް ޒާޔާއަކަށް ރަށުގެ އެމާހައުލު ކަމަކު ނުދިޔައެވެ. ރާއިދުވެސް ރަށަށް ނާންނަތާ ހަފްތާއެއްވީ އެވެ. ގުޅެނީ ދުވާލު ހަތަރު ދަމުން އެއްފަހަރުއެވެ. ހައުލާވެސް ވަޒީފާގައި އުޅޭތީ އާދެވެނީ ވަރަށް މަދުންނެވެ.

ފޫހިކަން އިންތިހާއެވެ.

ޒާޔާ ފޯނު ނަގައި ފޭސްބްކް ޕޭޖް ހުޅުވާލިއެވެ. އެޔާއެކު ޒާޔާ އަޖައިބުވެގެން ގޮސް އަނގަ ތަށްމިނަން ހުޅުވުނެވެ. މީ ޙަޤީޤަތް ހެއްޔެވެ؟ އެޒުވާނާގެ ފްރެންޑް ރިކުއެސްޓް އައިސްފައި އިނުމުން ޒާޔާ ހުރީ ހައިރާންވެ ބުނާނެ އެއްޗެއް ނޭނގިފައެވެ. ޒާޔާ އަށް ވެސް އެއީ ކާކުކަން ނޭނގޭއިރު އެޒުވާނާއަކަށްވެސް ޒާޔާއެއް ނޭނގޭނެކަން ޔަޤީނެވެ. ޒާޔާއަށް ކުރެވުނުހާވެސް ކަމަކީ ބަލަހައްޓައިގެން އިނދެވުމެވެ. ހަދާނެގޮތެއް ނޭނގިފައެވެ.

ނުނިމޭ

ނުދަންނަ އެތައް ބައެއްގެ ފްރެންޑް ރިކުއެސްޓް އަންނަ އިރުވެސް ދުވަހަކުވެސް ޒާޔާ އެއިން މީހެއްގެ ޕްރޮފައިލްއަށް ވަދެ ހާވާފައެއް ނުވެއެވެ. އެއްވެސް ޝައުޤުވެރިކަމެއްވެސް ނުހުރެއެވެ. ނަމަވެސް އެނުދަންނަ މީހާގެ ޕްރޮފަައިލް ބަލާލަން ޒާޔާ އެހާ ބޭނުންއެވަނީ ކީއްވެ ކަމެއް ޚުދު ޒާޔާއަކަށްވެސް ނޭނގެއެވެ. ސިކުނޑި ވިސްނައިދެމުން ދިޔައީ އަޅައިނުލުމަށެވެ. ނަމަވެސް ހިތް ސިކުނޑިއާ ޚިލާފެވެ. ޒާޔާ ޕްރޮފައިލް ހުޅުވާލިއެވެ.

މީހެއްގެ ފިރިއެކެވެ. ކުޑަކުޑަ ލޯބި އަންހެން ކުއްޖެއްގެ ބައްޕައެކެވެ. ޕްރޮފައިލްގައި ހުރި ފޮޓޯތަކާއި އެއްޗެހި ބަލާލުމަށްފަހު ފޯނު ބޭއްވިއެވެ. ޒާޔާ ތެދުވެގެން ކޮޓަރިއާއި ދިމާއަށް ހިނގައިގަތެވެ. ސިކުނޑީގައި އެނބުރެމުން ދިޔައީ އޭގެ ހަތަރުވަރަކަށް އަހަރު ކުރީގެ ހަނދާނެކެވެ. އެ ޒުވާނާ ޒާޔާގެ ސަމާލުކަން ހޯދާފައިވަނީ މީގެ ހަތަރު އަހަރެއްހާ ދުވަސް ކުރިންނެވެ. އާއެކެވެ. އެއީ ހަމަ އޭނާއެވެ. ތަފާތަކީ ދިގުވެފައިވާ ތުބުޅިއެވެ.

“ޒާޔާ.” ރާއިދުގެ އަޑަށް ޒާޔާ ތެދުވީ ފުންމައިގެންނެވެ.

ޒާޔާ ދުވެ ގޮސް ދޮރު ހުޅުވީ އުފަލުންހުރެއެވެ. ނަމަވެސް ދެލޮލަށް އިސާހިތަކު ކަރުނަތައް ބޮޑިވެގަތެވެ.

“އައްދޭ. އެންމެ ހަފްތާއެއްވީ އިރު ތީ އަދި ވީ ވަރު.” ރާއިދު އަށް ހީލެވުނީ އުފަލުންނެވެ. ޒާޔާ އޭނާ ދެކެ ލޯބިވާ ވަރު ހިތަށް އަރާފައެވެ. ނަމަވެސް ރާއިދުގެ މޭތެރޭގައި މޫނު ފޮރުވައިގެން އޮތް ޒާޔާގެ ހިތަށް ސިފަވަމުން ދިޔައީ އެނުދަންނަ ޒުވާނާއެވެ. ކީއްވެ ހެއްޔެވެ؟ ޒާޔާއަށް ރީތި ފިރިހެނުންގެ ގައިގައި ހުންނަން ޖެހޭ އެއްވެސް ސިފައެއް އެޒުވާނާގެ ގައިގައެއް ނެތެވެ. ހަމުގެ ކުލަ އައްޔެއްވެސް ނޫނެވެ. ތުބުޅި ދެކެ ޒާޔާ ފަކުރުގަނެއެވެ. ނަމަވެސް ދެލޯ މަރާލިޔަސް ފެންނަނީ އެޒުވާނާގެ މޫނެވެ. ޒާޔާ މަސައްކަތް ކުރަމުން ދިޔައީ އަމިއްލަ ހިތަށް ވިސްނައިދޭށެވެ. ޒާޔާއަކީ ރާއިދުގެ ހައްޤެއް ކަމެވެ. އެހެން ފިރިހެނަކާ ދޭތެރޭގައި ވިސްނުމަކީ ފާފައެއްކަން ޒާޔާއަށް އެނގެއެވެ.

“ދެން ދޫކޮށްލަބަލަ ދޯ. ކޮބާތަ ޒިޔަލް.” ރާއިދު ޒާޔާގެ ކޮލުގައި ހިފާލީ ލޯބިންނެވެ.

“ނިދާފަ އެބައޮތް މަންމަ ކޮޓަރީގަ.” ޒާޔާ ރާއިދުގެ ގައިން ދޫކޮށްލިއެވެ.

“ފިނިފިނި ހިތްގައިމު ރެއެކެވެ. ޒާޔާ ލޯގަނޑު ކުރިމަތީގައި ރީތިވެލައިގެން ހުއްޓިލައިގެން އެހުރީ ބޭރަށް ދާ ހިތް ނެތިފައެވެ. އެޒުވާނާ ފެންނަ ހިސާބަކަށް ދާކަށްވެސް ޒާޔާ ބޭނުމެއްނޫނެވެ. ނަމަވެސް ރާއިދުގެ އެދުމާއި ދެކޮޅު ހަދަންވެސް ޒާޔާއަކަށް ނުކެރޭނެއެވެ.

“އަދިވެސް ނުނިމޭ.” ރާއިދު ކޮޓަރި ދޮރުހުޅުވާލާފައި އެތެރެއަށް ބޯދިއްކޮށްލިއެވެ. ދެފަރާތަކަށް ބޯހޫރާލަމުން ޒާޔާ ކޮޓަރިން ނިކުތެވެ. ސައިކަލަށް އަރާ ދުއްވާލިއިރުވެސް ޒާޔާއަށް އިނދެވުނީ ރާއިދު އާއިވަރަށް ދުރުގައެވެ.

“މިރޭ ހާދަ ތަފާތުހެން ހީވޭ؟ ހާދަމަޑުންނޭ ތި އިންނަނީ. ދުރުގަ ތި އިންނަނީ ކީއްވެ؟” ޒާޔާގެ ބަދަލުވެފައިވާ މިޒާޖު ރާއިދު އަށް ފާހަގަވިއެވެ.

“ތީ އެހެން ނޫނީ ނުލާހިކު އަނގަ ގަދަ މީހެއްނު. މަގޭ ގައިގައި ފެންނައިރަށް ތަތްވެ ގަންނާނެ.” ޒާޔާ އެއްވެސް އެއްޗެއް ނުބުނެ އިނުމުން ރާއިދު އިތުރުކޮށްލިއެވެ. ދެންވެސް ޒާޔާގެ ޖަވާބެއްނައެވެ. ޒާޔާ އަށް ޖަވާބު ދެވޭނީވެސް އަޑުއިވޭނަމަތާއެވެ. ޒާޔާގެ ހިތާއި ކުޅެމުންދާ ޒުވާާނާ އެހުރީ ޒާޔާގެ ކުރިމަތީގައެވެ. މަގުމަތީގައި ދިއްލާފައިވާ ލައިޓް ކައިރީގައި އެކުވެރި ދެތިން ކުއްޖަކާއެކުގައެވެ. ހިތުގެ ހިނގުން އަވަސްވެ އެޔަށް ފިނި ރޭގައިވެސް ޒާޔާ ދާހިތްލާ ފޯވެއްޖެއެވެ.

“ރާއިދު. ހިނގާ ގެޔަށް. އަޅެ ވަރަށް ބޮލުގަ ރިއްސާ.” ޒާޔާ ރާއިދުގެ ބުރަކަށީގައި މޫނު ޖައްސައި ބާރުކޮށްލިއެވެ.

އެރޭގެ ހަތަރުދަން ޒާޔާ ހޭދަކޮށްލީ އެގޮތުގައެވެ. ލޮލަކަށް ނިންޖެއް ނައެވެ. ރާއިދު ނިދަންދެން ނިދާ ކަމަށް ހެދިގެން ޒާޔާ އޮތީއެވެ.

އާ ދުވަހަކަށް ދުނިޔެ އަލިވިލުނު އިރުވެސް ޒާޔާ އޮތީ ނުނިދިފައެވެ.

“މާ ބަލިއްޔާ ޑޮކްޓަރަށް ދައްކާލަންވީނު.” ކޮޓަރި ދޮރުހުޅުވާލާފައި ވަތް ފާއިޒާ އަށް ޒާޔާގެ މަތިމަރުވެފައިވާ މޫނު ފެނުމުން ހީކުރީ ޒާޔާ އަދިވެސް ބަލީ ކަމަށެވެ.

އެވަގުތު ޒިޔަލް ހޭލައިގެން ރޮއެގަތެވެ. ފާއިޒާ އަވަސް އަވަހަށް ގޮސް ޒިޔަލް ނަގައި އުރާލިއެވެ.

“މަންމަ ދަނީ މިސޮރު ގޮވައިގެން. ދަރިފުޅު ތެދުވެ ފެންވަރާލަބަލަ.” ފާއިޒާ ޒިޔަލް އުރާލައިގެން ނިކުތީ ބޭރަށެވެ.

“ރާއިދު..ރާއިދު ތެދުވެބަލަ.” ނިދާފައި އޮތް ރާއިދު ލައިގެން އޮތް ޓީޝާޓްގައި ހިފައި ޒާޔާ ދަމައިގަތެވެ.

ރާއިދު ޒާޔާގެ ހަށިގަނޑުގައި އޮޅުލައިގަތެވެ.

“އަދި ނިދާބަލަ ޒާޔާވެސް.” ރާއިދު ޒާޔާގެ މޫނުން ވަސްބަލާލިއެވެ.

“ނުތެދުވަންޏާ އޮވޭ. މަގޭ ގައިން ދޫކޮށްލާ.” ޒާޔާގެ ހަރުކަށި ރާގުން ރާއިދުއަށް ލިބުނީ ކުއްލި ސިހުމެކެވެ. މިނޫނީ ދުވަހަކުވެސް ޒާޔާ އެގޮތަށް ވާހަކަ ދައްކާފައި ނުވާތީއެވެ.  މީގެ ކުރިން ރާއިދު ކޮށްލާ އެކަހަލަ ސަމާސާއިން ޒާޔާ ވާނީ އުފަލެވެ. ޒާޔާ ދެލޯ އަޅާލަމުން ތެދުވެގެން ގޮސް ފާހާނާއަށްވަނެވެ.

ދުވަހަކީ ހުކުރު ދުވަސް ކަމުން ގޭތެރެ އޮތީ ފުރިފައެވެ. ފާއިޒާ އާއި ޒާޔާ ބަދިގެ ތެރޭގައި އަވަދިނެތި އުޅެމުން ދިޔައިރު ޔަމަން އާއި ރާއިދު ގޭތެރެ ސާފުކުރަނީއެވެ.

“އައްސަލާމް އަލައިކުމް.” މީހަކު ސަލާމް ގޮވާލި އަޑަށް ބަދިގެ ފަރާތުން ޒާޔާ ނިކުތެވެ.

ވަގުތުން ޒާޔާގެ ދެފައި ގަނޑުވި ކަހަލައެވެ. ކުރިއަށް ފިޔަވަޅެއް އަޅަން ޒާޔާއަށް ނޭނގުނުތާނގައި ވާހަކަދައްކަން އަނގަވެސް ހުޅުވައެއް ނުލެވުނެވެ.

“މީ އޮފީހުން ދިން ފޮތް ލިސްޓެއް. ގުޅޭނެ ނަމްބަރެއް ޖަހާފަ ނެތީމަ.” ކުރިމަތީގައި ހުރި އަންހެން ކުއްޖާ ހިނިތުންވެލިއެވެ.

“ތީ ކާކު؟” ޒާޔާ އަދިވެސް ހުރީ އެ އަންހެންކުއްޖާއަށް ކަޅިވެސް ޖަހައިނުލާ ބަލާށެވެ.

“ދިލާ.” އަތުގައި އޮތް ފޮތްލިސްޓް ދިލާ ޒާޔާއަށް ދިއްކޮށްލިއެވެ.

“މިކޮޅަށް އެއްކޮށް ބަދަލުވީތަ؟ ޒާޔާ އެނގެޔޭ މަށަށް. ޒާޔާއަށް މަށެއް ނޭނގުނު ދޯ.” ދިލާ އޮޅުންފިލުވައިދިނެވެ.

“މިހާރު އެނގިއްޖެ. މެރީ ކުރީތަ؟” ޒާޔާ ބޭނުންވީ ހުރިހާ މައުލޫމާތެއް އެނގިހުރެވެސް ހޯދާށެވެ. އެ ޒުވާނާގެ އަންހެނުންކަން ވެސް އެނގިހުރެއެވެ.

“ތިކަން ނިމިއްޖެ. ބޭބީ އެއްވެސް ހުރޭ.” ދިލާ އެތަނުގައި ހުރި ޖޯލީގައި އިށީނދެލީ ޒާޔާ އިށީންނުމަށް އިޝާރާތްކުރުމުންނެވެ.

“އެހެންތަ؟ ރަށު ކުއްޖަކާއެއްނޫންތަ އިނީ؟” ޒާޔާ ވާހަކަ ދެއްކީ ސީދާ ދިލާގެ ލޮލަށް ބަލަން ހުރެއެވެ. ބޭނުންވާ ހުރިހާ މައުލޫމާތެއް ޒާޔާ ބޭނުމީ ހޯދާށެވެ. ޒާޔާ އަށް ބުނެދޭން ނޭގެނީ ކީއްވެ ކަމެވެ.

“ރަށު ކުއްޖަކާ. ޝާރިފް. އެކަހަލަ ފިރިއެއް ލިބޭނީ ހަމަ ނަސީބުވެރިއަކަށް.” ނޭނގި ނަމަވެސް ދިލާ އަށް ވިކައިލެވުނީ ޒާޔާގެ ހިތުގައެވެ.

“ބޯއީ ކުއްޖެއްތަ ލިބުނީ؟” ހިތަށް ކުރަމުންދިޔަ ބުނެދޭން ނޭނގޭ އިޙްސާސްތައް ފޮރުވުމަށްޓަކައި ޒާޔާ ގަދަކަމުން ހިނިތުންވެލިއެވެ.

“ނޫން. އަންހެންކުއްޖެއް. މޫޝަން.” ޒާޔާ ޖޯލިން ތެދުވީ ދިލާ ވާހަކަ ދައްކަ ދައްކާ އޮށްވައެވެ.

“އަދި ފަހުން ދިމާވާނު.” ޒާޔާ ހިނގައިގަތެވެ.

ކޮޓަރިއަށް ވަދެ އެނދުމައްޗަށް ވެއްޓިގަތް އިރު ރާއިދު ފާހާނައިގެ އުޅޭ ކަމެއް ޒާޔާ އަކަށް ނޭނގުނެވެ.

އަޑު ހަރުކޮށް ޒާޔާއަށް ރޮއެގަނެވުނެވެ. ކޮންކަމަކާ ހެއްޔެވެ؟ ބަޔަކު އުފަލުގަ އުޅޭތީ ހެއްޔެވެ؟ ޝާރިފް އަކީ ޒާޔާ އާ ބެހޭ މީހެއް ހެއްޔެވެ؟ ދިލާ އުފަލުގައި އުޅުނަސް ޒާޔާ އަށް ކީއްހެއްޔެވެ؟ ދެރަވާންވީ ކޮންކަމަކާއި ހެއްޔެވެ؟ ޚުދު ޒާޔާ ވެސް އުޅެމުން އެގެންދަނީ ކިހާ އުފާވެރި ދިރިއުޅުމެއް ހެއްޔެވެ؟

“ޒާޔާ ރޯ އަޑަށް ރާއިދު ފާހާނާއިން ނިކުތެވެ.

“ޒާޔާ. ކިހިނެއްވީތަ؟” ވާނުވާ ނޭނގޭހާލު ރާއިދު ހާސްވިއެވެ.

“ބޮލުގައި ރިއްސަނީ.” ދޮގުހަދަން ޒާޔާއަށް މަޖުބޫރުވީއެވެ.

“ރާއިދު. މަށާއި ޒިޔަލް މާލެ ފޮނުވަބަލަ. ނޫނީ ހިނގާ ދާން އެންމެން.” ޒާޔާ ރާއިދުގެ މޭތެރޭގައި ބޮޑިވެގަތެވެ.

“ކިހިނެއް؟ ކީއްވެ؟ ކުއްލިއަކަށް މާލެ ދާން ތި ކިޔަނީ.” ރާއިދު ހުރީ ބުނާނެ  އެއްޗެއްވެސް ނޭނގިފަަައެވެ.

“ބުނެބަލަ ތި ވެގެން އުޅޭގޮތެއް.” ޒާޔާ ހިމޭންވެފައި ހުރުމުން ރާއިދު ޒާޔާގެ ދެކޮނޑުގައި ހިފައި ތަޅުވައިގަތެވެ.

ބުނާނީވެސް ވަކި ކީކޭ ހެއްޔެވެ؟ ނަމަވެސް ރާއިދުއަށް ކޮންމެވެސް ޖަވާބެއް ދޭންޖެހޭނެކަން ޒާޔާއަށް އެނގެއެވެ.

“ދެން ނޭނގެ. މިރަށް އެހާ ކަމަކު ނުދޭ.” އެންމެ ފަހުން ބުނާނެ އެއްޗެއް ނޭނގި ވިސްނަން ހުރެ ޒާޔާ ޖަވާބުދިނެވެ.

“ރާއިދު.” އެވަގުތު ރާއިދުއަށް ގޮވައިލަމުން ޔަމަން ކޮޓަރީގެ ދޮރުގައި ޓަކި ޖަހާލިއެވެ.

“ހިނގާބަލަ ވަލުގައި ހިފާލަދޭން. މިތާ އޮތް ބޮއްކުރައެއް ބާލަންވެގެން މިއުޅެނީ.” ރާއިދު ދޮރުހުޅުވާލުމުން ޔަމަން ބުނެލިއެވެ.  ކައިރީގައި ނުދަންނަ ފިރިހެން ކުއްޖެއްވެސް ހުއްޓެވެ.

“މީ ޝާރިފް. ވަރަށް ގާތް ކުއްޖެއް.” ޔަމަން ރާއިދުއަށް ޝާރިފް ތަޢާރަފްކޮށްދެމުން ހިނގައިގަތެވެ.

ކޮޓަރި ތެރޭގައި ހުރި ޒާޔާ އަށް ޝާރިފްގެ ނަން އިވުމާއެކު އަވަސް އަވަހަށް ދޮރު ކައިރިއަށް ގޮސް ދޮރުން ބޯދިއްކޮށްލިއެވެ. އޭރު އެތިން މީހުން ދޮރުން ނިކުމެގެންދަނީއެވެ.

ދުވަސްތައް މާޒީ ވަމުންދެއެވެ. ރާއިދު އެއްބަސްކުރުވައިގެން ޑޮކްޓަރަށް ދައްކަން ނަމުގައި ޒާޔާ ޒިޔަލް ގޮވައިގެން މާލެ ފުރުމަށްޓަކާ ފްލައިޓްގައި އިށީނދެލައިގެން އިނެވެ. ދެން ދުވަހަކުވެސް ރަށަށް ނުދާން ހިތުގައި އަޒުމް ކަނޑައަޅައިގެންނެވެ. އެއްވެސް ގުޅުމެއްނެތް އެނުދަންނަ ޒުވާނާ ޒާޔާގެ ހިތާއި ސިކުނޑި ކޮންޓްރޯލް ކުރާކަށް ޒާޔާ ނޭދެއެވެ. ވިސްނާ ވިސްނާ މޮޔަވާކަށް ޒާޔާ ބޭނުމެއްވެސް ނޫނެވެ. ބައެއްގެ ދިރިއުޅުމު ތެރެއަށް ވަންނާކަށްވެސް ހިތެއް ނޭދެއެވެ. ޒާޔާ އަށް ވުރެ އެޒުވާނާ އުމުރުގެ ގޮތުންވެސް ހަގެވެ. ވީ އިރު އެހާ އުފާވެރި ދިރިއުޅުމެއް އުޅޭ މީހަކު ޒާޔާއަށް ސަމާލުކަމެއް ދޭންވީ ކީއްވެހެއްޔެވެ. މާލެ ދާން ޒާޔާ ނިންމީ އެންމެ ސަބަބަކަށްޓަކައެވެ. ނުފެންނަންޏާ ޒާޔާ އަށް ޚިޔާލީ ފޮލާ ކައްކައިގެން އުޅެވޭނެއެވެ. ޒިޔަލް ގަޔާ ކައިރިކޮށްލަމުން ޒާޔާ ދެލޯ މަރައިލީ ފްލައިޓް ނައްޓާލީމައެވެ. ކުލައެއް ނެތް ހުވަފެންތަކުގައި ކުލަޖެއްސޭތޯއެވެ.

މާލޭގެ ހަލަބޮލި ފަސްގަނޑުގައި ފައި ޖެހުމާއެކު ޒާޔާ ހިތްހަމަ ޖެހުމުގެ ނޭވާއެއް ދޫކޮށްލިއެވެ. ރާއިދުގެ ބޭބެއާއެކު ގެޔަށް ދިޔައީވެސް ހިތްހަމަޖެހިގެން ހުރެއެވެ.

ޒިޔަލް ނިންދާފައި ރާއިދުއަށް ގުޅާލިއެވެ. އެތައް އިރަކު ވާހަކަދައްކާ ހީ ސަމާސާ ކުރުމަށްފަހު ޒާޔާ މެސެންޖަރ ހުޅުވާލިއެވެ. ފުލުން ފުލުން މެސެޖްތައް އަންނަމުން ދިޔައެވެ. ފަހަރަކު މެސެޖެއް ހުޅުވާލަމުން ދިޔަ ޒާޔާގެ ލޮލުގައި އަޅައިގަތީ އެޒުވާނާ ކޮށްފައިވާ މެސެޖެކެވެ. ހަމައެކަނި “ހައި” ޖަހާލާފައެވެ. ހިތުގައި ވަރުގަދަ އަޒުމެއް ކަނޑައަޅައިގެން ހުރި ޒާޔާ މެސެޖް ޑިލީޓް ކޮށްލިއެވެ. ހަމައެވަގުތު އަނެއްކާވެސް އިތުރު މެސެޖެއް އަތުވެއްޖެއެވެ. ހަމަ ކުރީގެ މެސެޖެވެ.

“ކޮޕީ ޕޭސްޓް ކުރަނީ ތޯއްޗެކެވެ. ތުން އަނބުރާލަމުން ޒާޔާ އަނެއްކާވެސް މެސެޖް ޑިލީޓް ކޮށްލިއެވެ. އަނެއްކާވެސް ހަމަ އެ މެސެޖެވެ.

ޒާޔާ ޓައިޕްކުރަން ފެށިއެވެ. ތީ ދިލާގެ ފިރިމީހާ ދޯއެވެ. ވަގުތުން ޖަވާބު އައީ ޔެސް އޭ ކިޔާފައެވެ.

‘ކިހިނެއްވީ؟’ ޒާޔާ ލިޔެލާފައި ފޮނުވާލިއެވެ. ޖަވާބުގައި އައީ ކަމެއް ނުވާ ކަމަށެވެ. އަދި ބާއި ވެސް ބުނެފިއެވެ. ޒާޔާ ގާތަށް އައީ އަމަށަކު ރުޅިއެއް ނޫނެވެ. ވާހަކަ ދެއްކީވެސް އަމިއްލައަކަށެވެ. ހާދަ ރޫޑް މީހެކެވެ. ބާއި ވެސް ކިޔާލީ ކުއްލިއަކަށެވެ.

އިރުކޮޅެއްފަހެވެ. އަނެއްކާވެސް ހައި ޖަހާލާފައި މެސެޖްކޮށްލައިފިއެވެ. ވަގުތުން ޒާޔާއަށް ޖަވާބުވެސް ދެވިއްޖެއެވެ. ވާހަކަ ދައްކަންވެސް ފެށިއްޖެއެވެ. ރާއިދުއަށް ސިއްރުންނެވެ. ދައްކާ ހުރިހައި ވާހަކައެއް ވަގުތުން ޑިލީޓް ކޮށްލެވެއެވެ. ރަނގަޅުކަމެއް ނޫންކަން އެނގެއެވެ. ނަމަވެސް ހިތަށް ހިތްހަމަޖެހުން ލިބޭތީ ކުރެވެނީއެވެ.

ދުވަސްތައް މާޒީގެ ސޮފްޙާތަކަށް ގެއްލެމުން ދެއެވެ. ޒާޔާއަކީ މިހާރު މިދުނިޔެމަތީގައި ހުރި އެންމެ އުފާވެރި މީހާއެވެ. ޝާރިފްގެ ހުރިހާ ވަގުތެއް ހުސްކޮށްފައިވަނީ ޒާޔާއަށެވެ. ދުވަސް އެއްކޮށް ވާހަކަދައްކައެވެ. މެސެޖުންނެވެ.

ފަހުންވާނެ ގޮތަކާއި ދޭތެރޭގައި އެކަކުވެސް ނުވިސްނައެވެ.

އެގޮތަށް ވާހަކަ ދައްކާތާ އެއްމަސް ފާއިތުވެއްޖެއެވެ. ޒާޔާ އެނބުރި ރަށަށް އައީ ޝާރިފްގެ އެދުމުގެ މަތިންނެވެ.

ރާއިދު ރަށުގައި ނެތް އިރު ޒާޔާ ރަށަށް އައީ ރާއިދުއަށް އަންގައިވެސް ނުލައެވެ.

އެންމެން ތިބީ އުފަލުންނެވެ. ޒާޔާ އެނބުރި އައީތީއެވެ.

ޒާޔާގެ އަތުން ފޯނު ދޫވާ އިރެއް ނާދެއެވެ. މޫނުމަތިން ހިނިތުންވުމެއް ނުފިލައެވެ. ޝާރިފް ޖަހާ ހާ ބެރަކަށް ނަށަމުން ދިޔައީ ދެލޯ މަރައިގެން ހުރެއެވެ.

އަލަށް ޝާރިފް އާ ފޯނުން ވާހަކަދެއްކި ދުވަހު ޒާޔާ އުފަލުން މޮޔަނުވީ ކިރިޔާއެވެ. ނަމަވެސް މިފަހަރު ޝާރިފްގެ އެދުމަކަށްވީ ޒާޔާއަށް ކުރަން އެންމެ އުނދަގޫވި ކަންތަކެވެ. ބައްދަލުކުރުމެވެ. މުޅި ދުނިޔެއަށްވެސް ސިއްރުންނެވެ. ކޮންމެ ފަހަރަކު ކޮންމެވެސް ސަބަބެއް ޒާޔާ ދިޔައީ ދައްކަމުންނެވެ. އެންމެ ފަހުން ދައްކާނެ އިތުރު ސަބަބެއްނެތި ޒާޔާ ޝާރިފް އާއި ބައްދަލުކުރަން އެއްބަސްވިއެވެ. ރާއިދު އާއި ދޭތެރޭގައި ވިސްނާވެސް ނުލައެވެ.

ފޯނުން ގަޑި ބަލަބަލާ އިން ޒާޔާ އިންތިޒާރު އެކުރަނީ ހަތެއް ޖަހަންދެނެވެ. ޝާރިފްއާ ބައްދަލުކުރަން ދާން ފަސްޖެހެނީއެވެ. ގަޑި ކުޑަތަންވާ ވަރަކަށް ޒާޔާގެ ހާސްކަންވީ އިތުރެވެ. ޒިޔަލްއަށް ކާން ދިނުމަށްފަހު މަންމަ އަތަށް ދީފައި ޒާޔާ ނިކުތީ ހައުލާ މެންގެއަށް ދިއުމުގެ ނަމުގައެވެ.

ގެއިން ނިކުތުމަށްފަހު ޒާޔާ މިސްރާބުޖެހީ ހައުލާ މެންގެއާއި ދިމާއަށެވެ. ޒާޔާ އަޅާ ކޮންމެ ގޯޅިއަކުން ޝާރިފްގެ ސައިކަލްވެސް ދަތުރުކުރަމުންދިޔައެވެ. ދެން ފެނުނީ ޝާރިފް ސައިކަލްގައި އައިސް ޒާޔާގެ ކުރިމަތީގައި މަޑުކޮށްލިތަނެވެ. ފަނޑު ހިނިތުންވުމެއް ތުންފަތް މައްޗަށް ވެރިކުރުވައިގެން ހުރެ ޝާރިފް ޒާޔާ އާއި ދިމާއަށް އަތް ދިއްކޮށްލިއެވެ.

ނުނިމޭ

ޝާރިފްއާއި ހަތަރު ކަޅި ހަމަކޮށްލަމުން ޒާޔާ ޝާރިފް ދިއްކޮށްލި އަތުގައި ހިފިއެވެ.
“އަރާބަލަ ސައިކަލް ފަހަތަށް.” ޝާރިފް ހިނިތުންވެލިއެވެ.
“ނުކެރޭނެ. މީހަކަށް ފެނިއްޖެއްޔާ ޔޯ.” މަގުގެ ދެފަރާތަށް ޒާޔާ ނަޒަރު ހިންގާލިއެވެ. މީހެއްގެ ހިލަމެއްވޭތޯއެވެ. ޝާރިފް ނުބުންޏަސް ޒާޔާ ހުރީ އެސައިކަލްގެ ފަހަތަށް އަރާ ހިތުންނެވެ. ޝާރިފްގެ އުނަގަނޑުގައި ހިފަހައްޓާލައިގެން ކޮނޑުމަތީގައި ބޯ އަޅާލާ ހިތުންނެވެ.
“އަރާބަލަ ދެން.” ޝާރިފް އަނެއްކާވެސް އެދުނެވެ. ޒާޔާ ބޯޖަހާލަމުން ޝާރިފްގެ ސައިކަލް ފަހަތަށް އެރިއެވެ. ރަށުގެ މަގުތަކުގައި އެއްވެސް އަލިކަމެއްނެތެވެ. ބައެއް ގޭ ގޭގައި ދިއްލިފައިވާ ބޮކިތަކުން މަގުމައްޗަށް އެޅިފައިވާ ފަނޑުއަލިކަން ފިޔަވައެވެ. ޝާރިފް ސައިކަލް މަޑުކޮށްލީ ބީޗް ކައިރިއަށެވެ. އެ ހިތްފަސޭހަ މާހައުލުގައި އެއްވެސް މީހެއްގެ ހިލަމެއްނެތެވެ. ގޮނޑުދޮށަށް ބީއްސާލާ ރާޅުގެ އަޑާއި ޖެހެމުންދާ ވައިރޯޅިއާއެކު ގަސްތައް ހެލިލާ އަޑު ފިޔަވައި އެއްވެސް އަޑެއް ނީވެއެވެ. ޝާރިފް ހިނގަމުން ގޮސް އަތިރިމަތީގައި ހުރި ގަހެއްގެ ކައިރީގައި މަޑުކޮށްލިއެވެ. ފަހަތުން ޒާޔާވެސް ގޮސް ހުއްޓުނެވެ.
“ވަރަށް ބައިވަރު ވާހަކަ ދައްކަން ބޭނުމެއްނު. ދެން ދައްކަންވީނު. މިއޮތީ މީޓްވެފައެއްނު.” ޒާޔާ ވާހަކަ ދެއްކީ ދުރު ބަލަހައްޓައިގެން ހުރެއެވެ. ސަބަބަކީ ޝާރިފްގެ ނަޒަރު ސީދާ ޒާޔާއަށް ހުއްޓިފައި ހުރުމެވެ. ނަމަވެސް ޝާރިފް އެއްވެސް ވާހަކައެއް ނުދައްކާ ކޮޅުކޮޅަށް ހިނގަންފެށިއެވެ. އިރުއިރުކޮޅާ އަތުގައި އޮތް ސިގެރޭޓް ތުބުގައި ޖަހާ ދަމާލައެވެ.
އަނެއްކާ މީ އިންސާނެއް ހެއްޔެވެ؟ ޖިންނިއެއް ނޫންބާއެވެ. ޝާރިފްގެ ހަމަހިމޭންކަމުން ޒާޔާގެ ހިތަށް ބިރުވެރިކަން ވަންނަން ފެށިއެވެ.
“އޭތް.” ޒާޔާއަށް ޝާރިފްގެ ނަމުން ގޮވާލާކަށް ނުކެރުނެވެ.
“މަށަށް ޒާޔާ ފެނުނޭ ކުރިންވެސް.” އަތުގައި އޮތް ސިގެރޭޓްބުރި އެއްލާލަމުން ޝާރިފް ވާހަކަދައްކަން ފެށިއެވެ.
“ކޮންތާކުން؟” ޒާޔާ އަށް ލިބުނީ ހައިރާންކަމެވެ.
“ތި ގޭ ކައިރިން. ފެނިގެން ވާހަކަ ދައްކާ ހިތްވީ. ހީވެސް ނުކުރަން ޒާޔާ މަށާއި ވާހަކަ ދައްކާނެކަމަކަށް.” ޝާރިފްގެ ވާހަކަތައް ޒާޔާއަށް ޤަބޫލުކުރަން ދަތިވި ނަމަވެސް ޒާޔާ ހުރީ އަޑުއަހާށެވެ. ޝާރިފްގެ ލަފްޒުތަކުން ޒާޔާގެ ހިތުގައި އާވިންދުތަކެއް ޖަހަމުންދާ ކަހަލައެވެ. އެހެން ފިރިހެނުންނާއި ޝާރިފްއާއި ތަފާތެވެ. ބުނެދޭން ނޭނގެނީ ކިހިނެއްކަމެވެ. ނަމަވެސް ޝާރިފް ތަފާތެވެ. ވާހަކަ ދައްކާ ގޮތެވެ. އަޅާލާގޮތެވެ. ކަންކަމުގައި ވިސްނާގޮތެވެ.
ޖެހިގެން ހުރި ގޭގެ ގޯތި ތެރެއިން މީހަކު ވާހަކަ ދައްކާ އަޑުއިވުމާއެކު ޒާޔާ ސިހުނެވެ.
“މީހަކު އެބައުޅޭ. އަނެއްކާާ މިތަނަށްތަ އެ އަންނަނީ.” ރުކެއްގެ ނިވަލަށް ޖެހިލަމުން ޒާޔާ ކުރިމަތީގައި ހުރި ގޭގެ ގޯތިތެރެއަށް ބަލަހައްޓައިގެން ހުއްޓެވެ. އެގޭގެ މަގުފާރު ރާނާފައިވާލެއް ތިރިކަމުން އެގޭގެ ގޯތިތެރެ އޮންނަނީ ހާމައަށް ފެންނާށެވެ.
“މީހަކު އެބަހުރިތަ؟” ޒާޔާގެ ފަހަތުގައި ޝާރިފް ހުއްޓިލިއެވެ. ގައިގައި ޖެހޭ ނުޖެހޭ ހިސާބު ކައިރީގައެވެ. ޒާޔާ ދެލޯ މަރާލީ ޝާރިފްގެ ހޫނު ނޭވާތައް ޒާޔާގެ ކޮނޑުމައްޗަށް އެޅެން ފެށުމުންނެވެ. ކުރެވެންފެށި އާދަޔާޚިލާފް އިޙްސާސްތަކަކީ މީގެ ކުރިން ދުވަހަކުވެސް ޒާޔާއަށް ވީ ގޮތެއްނޫނެވެ.
ޝާރިފްގެ ހޫނު ތުންފަތް ކޮނޑުގައި ޖެހުމާއެކު ޒާޔާއަށް ތެޅިގަނެވުނެވެ. އަދި ހަމައެވަގުތު ޒާޔާ ވަގުތުން ޝާރިފްއާ ދުރަށް ޖެހުނެވެ.
“ސޮރީ.”ޝާރިފް އިސްޖަހާލިއެވެ. ކުރެވުނު ކަންތަކުން ޝާރިފް ދެރަވެ ލަދުގަތް ކަހަލައެވެ.
“ވަރަށް ލަސްވެއްޖެ. ދެން ދަނީ.” ޒާޔާ އަކަށް ޝާރިފް ދެކެ ރުޅިއެއް ނާދެވުނެވެ. އެކަމާއި ޚުދު ޒާޔާ ވެސް ހައިރާންވިއެވެ. ސަބަބަކީ މީގެ ކުރިން ޒާޔާ ނުރުހޭ ފާޑަކަށް މީހަކު ބަލާލިކަމުގައިވިޔަސް އެމީހަކަށް ޒާޔާ އޭގެ ރައްދުދެއެވެ. ދެވަނަ ފަހަރަށް ޒާޔާ އާއި ދިމާއަށް ބަލާލަން ނުކެރޭވަރު ކޮށްލައެވެ. ނަމަވެސް މިފަހަރު އެހެން ނުވީ ކީއްވެ ހެއްޔެވެ؟
“ރުޅިއައީތަ؟” ޝާރިފް ޒާޔާގެ ކޮނޑަށް އަތް ވައްޓާލިއެވެ. ޝާރިފްގެ ކެރޭ ކަމާމެދު ޒާޔާ ހުރީ ކޮސްވެފައެވެ. ނަމަވެސް ދެފަޔަށް ލެވުނުހާ ބާރެއްލާފައި ޒާޔާ ދުއްވައިގަތެވެ. އެތަނުގައި އިތުރަށްމަޑުކުރަން ޒާޔާ ބޭނުން ނުވީއެވެ.

“ދަރިފުޅު ކޮންތާކުން؟ ޒިޔަލް މިހާރު ނިދިއައިސްގެން ގޮސް ހަލާކުވަނީ އެޔޮށްގެން.” ޒާޔާ ގެއަށް އައިއިރު ފާއިޒާ ގޭގެ ފެންޑާ ތެރޭގައި ޒިޔަލް އުރާލައިގެން ދެކޮޅު ދެކޮޅަށް ހިނގާލަ ހިނގާލަ ހުއްޓެވެ.
“ހައުލާމެން ގެއިން. ހާދަ އަނދިރިއޭ މަގުތައް؟” ޒާޔާ ބޭނުންވީ މަންމަ އިތުރު ސުވާލެއް ކުރުމުގެ ކުރިން މައުލޫޢު ބަދަލުކޮށްލާށެވެ.
“އަނދިރިވާނު. މަގުތައް. މިރަށުގެ ޅަ ފިރިހެން ކުދިންނަށް އުނދަގޫވާނެ މަގުތައް ދިއްލިފައި ހުންނަންޏާ.” ޒިޔަލް ޒާޔާއަތަށް ދެމުން ފާއިޒާ ހިނގައިގަތީ ބަދިގެ ފަރާތަށެވެ.

ބާލީސް ފައިމައްޗަށް ލައިގެން ޒިޔަލް ބާލީސް މަތީގައި ބާއްވާލައިގެން ނިންދަވަން އިން ޒާޔާ އިރުއިރުކޮޅަކާ ހިނިތުންވެލައެވެ. ކުޑަ އިރުކޮޅެއް ކުރިން ހިނގި އެހާދިސާއިން ޒާޔާ އުފާވަނީ ކީއްވެކަން ޒާޔާއަކަށް ނޭނގެއެވެ. ޝާރިފް ޒާޔާގެ ހިތުން ޖާގަ ހޯދާލިލެއް ކިހާ މޮޅުހެއްޔެވެ؟ ހަމައެކަނި ޝާރިފްގެ އަނގައިން ބޭރުވި ލަފްޒުތަކެކެވެ. ޒާޔާގެ ހިތުގެ އެންމެ ފުނުގައި އެހުރިހާ ލަފްޒުތަކެއް ފޮރުވިއްޖެއެވެ. ދުވަހަކުވެސް ފިލައިގެން ނުދާވަރަށް ޝާރިފްގެ އެނަން ހިތުގައި ލިޔެވިއްޖެއެވެ. މުޅި ދުނިޔެއަށްވެސް ސިއްރުންނެވެ.

ނިދާފައި އޮތް ޒިޔަލް ބާއްވާލުމަށްފަހު ޒާޔާ އެނދުގައި ބުރަކަށި ޖައްސާލިއެވެ. ފޯނު މަތިން ހަނދާންވީ ދެނެވެ. ޑްރެސިން ޓޭބަލް މަތީގައި އޮތް ފޯނު ނަގަން ޒާޔާ އަށް ތެދުވެވުނީ ފުންމައިގެންނެވެ.
ޝާރިފްގެ ވިއްސަކަށް މިސްކޯލް އިނެވެ. މާފަށް އެދި އެތައް މެސެޖްތަކެއް ހުއްޓެވެ. ޒާޔާ ވަގުތުން ޝާރިފްގެ ނަމްބަރަށް ގުޅާލިއެވެ.
އެއް ރިންގުން ޝާރިފް ފޯނު ބިޒީކޮށްލިއެވެ. ޒާޔާގެ ކޯލެއްގެ އިންތިޒާރުގައި އިން ކަހަލައެވެ.
ޒާޔާ ފޯނަށް ޖަވާބު ދިނުމާއެކު ފުރަތަމަވެސް ކަންފަތުގައި ޖެހުނީ ޝާރިފްގެ މޮޅިވެފައިވާ އަޑެވެ. ޝާރިފް މާފަށް އެދުނެވެ.
ޝާރިފްގެ އެ އަމަލުން ޒާޔާގެ ހިތަށް ލިބުނީ އުފަލެކެވެ. މާފަށް އެދެންވީ ކީއްކުރަން ހެއްޔެވެ؟
“ދެން އެކަހަލަ ކަމެއް ނުކުރައްޗޭ.” ޒާޔާ ވާހަކަ ދެއްކީ ހިތާއި މުޅިން ދެކޮޅަށެވެ. ހަޤީޤަތަކީ ޝާރިފްގެ ބީހުން ޒާޔާ އަށް ކަމުދެއެވެ. ހިތްއެދެނީވެސް ޝާރިފްގެ އުނގު ތެރެއަށްވަނުމަށެވެ.
ޒާޔާ ނިދީވެސް ފަތިސްވަންދެން ޝާރިފްއާއި ވާހަކަ ދައްކަން އޮތުމަށްފަހުގައެވެ. އެތަކެއް މަލެއް ފޮޅުވާ އުޑުމަތީގައި ފިޔަޖަހަމުންދާ އެތައް ތަރިއެއް ބިމަށް ބޭލުމަށްފަހުގައެވެ. ޝާރިފްގެ ދުލުން ބޭރުކޮށްލާ ކޮންމެ ވާހަކައަކުން ޒާޔާ ހެއްވާލައެވެ.

ފޯނުގެ އެލާމްގެ އަޑުން ޒާޔާގެ މެރިފައިވާ ދެލޯ ހުޅުވުނެވެ. އެހައި ލަހުން ނިދާފައި އެހާ އަވަހަށް ހޭލުމުން ޒާޔާގެ މޫނުމަތިން ފެންނަމުންދަނީ ނިދީގެ އަސަރެވެ. ޒިޔަލްގެ ތުބުގައި ބުއްފުޅި ޖައްސާލުމަށްފަހު ޒާޔާ ކޮޓަރިން ނިކުތެވެ. ޒިޔަލް ސުކޫލަށް ދިޔުމުގެ ކުރިން ސައިތައްޔާރު ކުރުމުގައި މަންމައަށް އެހީވާށެވެ.
“މަންމަ ސައިހަދާ ނިންމާލީތަ؟” ފާއިޒާ ކާމޭޒުމަތީގައި ގޮށި ޖަހާލިތަން ފެނިފައި ޒާޔާ އެހިއެވެ.
“އާން. ސައިބޯންވީނު. ޒިޔަލް ހޭނުލާތަ؟” ފާއިޒާ ހަނޑޫ ދޮލަގަށް ހަނޑޫ އަޅަން ފެށިއެވެ.
“އާން ނުހޭލާ. މިދަނީ އެފަރާތަށް ކުނި ކަހާލަން.” ޒާޔާ ހިނގައިގަތެވެ.

ދުވަހުގެ ގިނަ ވަގުތު ހޭދަވީ ޝާރިފްގެ ޚަބަރެއް ނުވެއެވެ. ޝާރިފްގެ ޚަބަރެއް ނުވެ އިރުކޮޅެއްވިޔަސް ޒާޔާގެ ހިތެއް ހަމައެއް ނުޖެހެއެވެ. ކީއްވެ ހެއްޔެވެ؟ މީ ލޯބި ހެއްޔެވެ؟ ނޫނީ ކޯޗެއް ހެއްޔެވެ؟ ފޯނު ނަގާ ދެތިން ފަހަރަކު ޝާރިފްގެ ފޯނަށް ގުޅާވެސް ލެވިއްޖެއެވެ.
“ދަރިފުޅާ. އެސޮރު ބަލާ ދާ ގަޑިވެސް ޖެހެނީއެއްނު.” ޖޯލީގައި ޝާރިފްގެ ޚިޔާލުތަކުން ސިކުނޑި ފުރާލައިގެން އޮތް ޒާޔާ ސިއްސުވާލީ ފާއިޒާގެ އަޑެވެ. މޫޑް އޮފްވެފައި ވާ ހާލު ބައިސްކަލަށް އަރާ ޒާޔާ ދުއްވާލީ ޒިޔަލް ބަލައެވެ.
ބެލް ޖަހަންދެން ސުކޫލް ކައިރީގައި ޒާޔާ މަޑުކޮށްލައިގެން ހުއްޓެވެ. އެހެން މީހުންނާއި އެކަހެރިކޮށް ވަކިންނެވެ.
“ޒާޔާ. ޒިޔަލް ބަލާ އައިއްސަތަ؟” ހައުލާ ޒާޔާ ފެނިގެން އެތަނަށް އައިސް ހުއްޓުނެވެ.
“ހޫމް. ހައު ތި އުޅެނީނު ދައްކާވެސް ނުލާ.” ޒާޔާގެ ރާގުގައި ހުރީ ފޫހިކަމެވެ.

“ހާދަ ލޯބިން އުޅޭ ދެކުދިން ނޭ ދޯ. މިރަށުގެ ޒުވާން ޖޯޑްތަކަށް ހުރި މިސާލެއް އެއީ.”
ހައުލާ އާއި ޒާޔާ އަށް އެފަހަރާ ބަލާލެވުނީ އެތަނުގައި ތިބި އަންހެންވެރިންގެ އަޑުންނެވެ. އެމީހުން.ގެ ލޯތައް ހުއްޓިފައިވާ ދިމާއަށް ޒާޔާ ބަލާލުމާއެކު ޒާޔާއަށް މުށް ކަވާލެވުނެވެ.

ނުނިމޭ

“ހާދަ ލޯބިން އުޅޭ ދެކުދިން ނޭ ދޯ. މިރަށުގެ ޒުވާން ޖޯޑްތަކަށް ހުރި މިސާލެއް އެއީ.”
ހައުލާ އާއި ޒާޔާ އަށް އެއްފަހަރާ ބަލާލެވުނީ އެތަނުގައި ތިބި އަންހެންވެރިންގެ އަޑުންނެވެ. އެމީހުންގެ ލޯތައް ހުއްޓިފައިވާ ދިމާއަށް ޒާޔާ ބަލާލުމާއެކު ޒާޔާއަށް މުށް ކަވާލެވުނެވެ.

ދިލާއާއި ޝާރިފް ސައިކަލްގައި އެކަކު އަނެކަކާއި ހީ ސަމާސާ ކުރަމުންދާ މަންޒަރު ފެނިފައެވެ. ކީއްވެ ހެއްޔެވެ؟ ދެތިން ދުވަހަކު ވާހަކަ ދައްކާލާ ބައްދަލުވެލަމަކުން ޒާޔާގެ ޙައްޤަކަށް ޝާރިފް ވާންވީ ކީއްވެ ހެއްޔެވެ؟ ޝާރިފް އަކީ މީހެއްގެ ފިރިއެއްކަން ޒާޔާއަށް އެނގޭއިރު ޝާރިފް އޭނާގެ އަނބިމީހާ އާ އެކީގައި ފެނުން މައްސަލައަކަށް ޒާޔާއަށް ވާންވީ ކީއްވެ ހެއްޔެވެ؟ ޚުދު ޒާޔާއަކީވެސް މީހެއްގެ މިލްކެކެވެ. ސިކުނޑި ތެރޭގައި ހިނގަމުންދާ ހަމަނުޖެހުންތަކާއި އެކީ ޒާޔާ އިސްޖަހާލީ ފެންކަޅިވެފައިވާ ދެލޯ އެއްވެސް މީހަކަށް ނުދައްކަން ކަހަލައެވެ. 

“ބެލް ޖެހީނު އެ.” ބެލް ޖެހިކަން ވެސް ޒާޔާއަށް ރޭކާލީ ހައުލާ ބުނީމައެވެ. 

“އަންނައްޗޭ ހަވީރު.” ޒާޔާ ހައުލާއަށް ހިނިތުންވެލީ ގަދަކަމުންނެވެ. 

ގެޔަށް އައި ގޮތަށް ޒިޔަލް އަށް ކާން ދިނުމަށްފަހު ޒާޔާ ޒިޔަލް ނިންދެވި އެވެ. ކޮންމެ ދުވަހަކުވެސް މެންދުރުގެ އެގަޑީގައި ޒިޔަލް ނިދާނެއެވެ. 

ނިދިފައި އޮތް ޒިޔަލް ކައިރީގައި މޫނުމަތީގައި ބާލީސް އަޅައިގެން ޒާޔާ އޮތީއެވެ. ކާ ހިތްވެސް ނެތެވެ. 

ފޯނަށް މެސެޖެއް އައި ތަނާ ޒާޔާ ފޯނު ނެގިއެވެ. 

ޝާރިފް ބައްދަލުކޮށްލަން ބޭނުންވާ ކަމަށް ލިޔެފައި އޮތެވެ. ނަމަވެސް ޒާޔާ ބޭނުމެއްނޫނެވެ. ޖަވާބުގައި ޒާޔާ ލިޔެލިއެވެ. 

“ތި ހާ އުފާވެރި ދިރިއުޅުމެއް އުޅޭ މީހަކު މަށާއި ދައްކަން ޖެހޭ ވާހަކައެއް ނޯންނާނެ.”

ޒާޔާ މެސެޖް ފޮނުވާލުމަށްފަހު މިނެޓެއް ނުވެ ޝާރިފް ޒާޔާގެ ފޯނަށް ގުޅިއެވެ. 

ދެތިން ފަހަރަކު ރިންގުވިތަނާ ޒާޔާ ފޯނަށް ޖަވާބު ދިނީ ޝާރިފް ގުޅާތަން ބަލަން އެތައް އިރަކު އޮތުމަށްފަހުގަ އެވެ. 

“ކޮން ކަމަކާތަ ރުޅި އައިސްގެން ތިއުޅެނީ.” ޝާރިފްގެ އަޑު ފުރަތަމަވެސް ކަންފަތުގައި ޖެހުމާއެކު ޒާޔާގެ ލޯމައްޗަށް ސިފަވެގެން ދިޔައީ މިއަދު ދިލާ އާއި ޝާރިފް އުޅުނު ގޮތެވެ. 

“ނުވޭ ކަމެއް.” ޒާޔާ ފަރުވާކުޑަ ޖަވާބެއް ދިނީ ޝާރިފް ކައިރީގައި އެވާހަކަ ދައްކާނެ ގޮތެއް ނޭނގިގެންނެވެ. ޒާޔާ އެވާހަކަ ޝާރިފް ކައިރީގައި ދައްކާނީވެސް ވަކި ކޮން ހައްޤަކުން ހެއްޔެވެ؟ 

“އަހަރެން ބޭނުން މީޓް ކޮށްލަން. ހަމައެކަނި ވާހަކަ ދައްކާލަން.” ޒާޔާ އޮތީ ބުނާނެ އެއްޗެއް ނޭނގިފައެވެ. 

“ކޮންތާކުން.” ބޭނުން ނުވިޔަސް ޝާރިފްއަށް ނޫނެކޭ ބުނާކަށް ނުކެރުނެވެ. 

“ކޮންމެވެސް ތާކުން. ދެމީހުން އެކަނި. އެއްވެސް މީހަކަށް ނުފެންނަ ތާކުން.” ޝާރިފް ހާމަކުރީ އޭނާ ބޭނުންވާ ގޮތެވެ. 

“އެކަންޏޭ. ނުފެންނަ ކޮންތަނެއް.؟” ޒާޔާ އަކަށް ޝާރިފް ބުނަން އެއުޅެނީ ކީކޭ ކަމެއް ނަގައެއް ނުގަނެވުނެވެ. 

“މި ބުނީ- ތި ކޮޓަރިން ވިޔަސް އޯކޭ އޭ.” ޝާރިފް ގެ ގޮތެއް ނެތްކަމެވެ. އައި ރުޅިން ޝާރިފް އާ ދިމާއަށް ހަޅޭލަވައިގަންނަން ޒާޔާގެ ހިތަށް އެރިއެވެ. 

“ދުވަހަކުވެސް ތިކަމެއް ނުވާނެ.” ޝާރިފްގެ ކަންފަތް މައްޗަށް ފޯނު ކަނޑާލަމުން ޒާޔާ ފޯނު ނަގާ ބިންމައްޗަށް ހޫރާލިއެވެ. ތަކުރާރުކޮށް އެތައް ފަހަރަކު ޝާރިފް ގުޅި އިރުވެސް ޒާޔާ އަޅާވެސްނުލިއެވެ. ގޯސްކޮށް ނުވިސްނުމަށް އެތައް ފަހަރަކު މެސެޖުން ޝާރިފް އެދުނެވެ. ޝާރިފް އެގޮތަށް ބުނީ ދެމީހުންނަށް ރަނގަޅަކަށް ކަން ޝާރިފް ވިސްނައިދޭން މަސައްކަތް ކުރިއެވެ. އެއްވެސް ގޯސް ނިޔަތެއް ނެތް ކަމަށް ބުނެ އެތަކެއް މެސެޖްތަކެއް ފޮނުވިއެވެ. 

 

ޒާޔާއަށް ރޮވެނީއެވެ. ޒާޔާގެ ހިތުގައި ޝާރިފްއާއި ދޭތެރޭ އެއްވެސް ގޯސް ނިޔަތެއްނެތެވެ. އަދި ދުވަހަކު ޝާރިފް އަށް ދެރައެއް ލިބޭކަށްވެސް ޒާޔާ ނޭދެއެވެ. ވީ އިރު ޝާރިފް އެހާ ކަޑަކޮށް ޒާޔާއާއި ދޭތެރޭގައި ވިސްނަންވީ ކީއްވެ ހެއްޔެވެ؟ ވަގުތީ އުފަލެއްގައި ޒާޔާ ހިއްސާކުރަންވީ ބޭނުމަކީ ކޮބައި ހެއްޔެވެ؟ ޝާރިފްގެ ނަޒަރުގައި ޒާޔާ އަކީ ތުންފުއްސެއް ހެއްޔެވެ؟ ދެލޮލުން އޮހެމުންދާ ކަރުނަތައް އަތުގެ ނުފުށުން ފޮހެލަމުން ޒާޔާ ފޯނު ނެގިއެވެ. ޝާރިފްގެ މެސެޖްތަކާއި ކޯލްތައް އަދި ފޯނުން ޝާރިފްގެ ނަމްބަރު ވެސް އެއްކޮށް ފޮހެލިއެވެ. ހިތުގައި އަޒުމް ކަނޑައެޅީ ދުވަހަކުވެސް ދެން ޝާރިފް ގެ އެ ޖާދުވީ ލަފްޒުތަކުގެ ފޮނިކަމުގައި އަލުން ނުޖެހުމަށެވެ. 

 

 

 

ކޮޓަރީގެ ދޮރު ހުޅުވާލި އަޑަށް ޒާޔާ އަވަސް އަވަހަށް ދެލޯ ފޮހެލިއެވެ. ނަމަވެސް ރަތް ވެފައިވާ ޒާޔާގެ ދެލޯ ފެނުނު ކޮންމެ މީހަކަށްވެސް ޒާޔާ އެހުރީ ވަރަށް ގަދަޔަށް ރޮއެފައި ކަން އެދެލޮލަށް ބަލާލުމުން އެނގޭނެއެވެ. 

“ބޭބީ. ސަޕްރައިޒް.” ކޮޓަރި ތެރެއަށް ރާއިދުވަނީ ހެވި ދިލިފައި ހުރެއެވެ. ކޮނޑުގައި އޮތް ދަބަސް އެނދުމަތީގައި ބެހެއްޓުމަށްފަހު އެންމެ ފުރަތަމަވެސް ރާއިދު ބޮސް ދިނީ ނިދާފައި އޮތް ޒިޔަލްގެ ކޮލުގައެވެ. 

“ނެތް ތަ މަށަށް.” ޒާޔާ ހިނިތުންވެލަމުން މަސައްކަތް ކުރީ ރާއިދު ގެ އެހީގައި ޝާރިފް ގެ ހަނދާންތަކާއި ދުރުވާށެވެ. 

“ކީއްވެތަ ޒާޔާގެ ފޯނަށް ނުގުޅެނީ.” ރާއިދު ޒާޔާގެ އަތުގައި ހިފާ ގަޔާއި ކައިރިއަށް ދަމާލިއެވެ. 

“ނޭނގެ. ހައު ވެސް ބުނެފި ތިހެން. މިތަނަށް އުރީދޫ ނެޓްވޯކް ދަށީ ކަންނޭނގެ. ހިނގާ ނަމްބަރ ޗޭންޖްކޮށްލަން.” ލިބުނު ފުރުސަތުގެ ބޭނުން ހިފަމުން ޒާޔާ ދިޔައީ ޝާރިފްއާއި ދުރަށް ދާނެ މަގު ކޮށަމުންނެވެ. 

ރާއިދު ބޯޖަހާލުމުން ޒާޔާ އަދި ވަކިން ބޮޑަށް ރާއިދުގެ މޭތެރޭގައި ބޮޑިވެގަތެވެ. 

 

 

ވަޔާއި ޖެހިލާ ބާރު ރޯޅިތަކުން ގަސްތައް ނަށަމުން ދިޔައިރު ޒާޔާ ހުރީ ޒިޔަލް ގެ އަތުގައި ހިފައިގެން ގޭގެ ދޮރުމަތީގައެވެ. 

“ތަނަކަށް ދާންތަ؟” ރާއިދު އެތަނަށް އައިސް ހުއްޓުނެވެ. 

“އާން. ނުބުނެވޭތަ؟ ހައުލާ ބުނެގެން ބޭރަށް ގޮސްލަން ވެގެން. ހިތަށް އެރި ޒިޔަލް ގޮވައިގެންނޭ ދާނީ.” ޒާޔާ މަގުގެ ދެކޮޅަށް ބަލާލީ ހައުލާ ފެނޭތޯއެވެ. 

“ދަރިފުޅު ދާނީ ޑެޑީ އާއެކީ ސައިކަލް ދުއްވާލަން ދޯ؟ ޒާޔާ ދޭބަލަ ހައު އާއެކު. ޒިޔަލް ހަވާލުކޮށްބަލަ މަށާ.” ރާއިދުގެ ވާހަކަ ރަނގަޅަށް ނުނިމެނީސް ޒިޔަލް ރާއިދުގެ ފައިގައި ހިފައި އޮޅުލައިގަތެވެ. 

ރާއިދު ޒިޔަލް ގޮވައިގެން ސައިކަލް ދުއްވާލުމުން ޒާޔާ ހިނިތުންވެލަމުން އަތް ހޫރާލިއެވެ. 

 

އެތައް އިރެއްވީއިރުވެސް ހައުލާގެ ޚަބަރެއް ނުވުމުން ޖީބުގައި އޮތް ފޯނު ޒާޔާ ނެގީ ހައުލާއަށް ގުޅާށެވެ. އެވަގުތު ކަންފަތުގައި ޖެހުނު ސައިކަލްގެ އަޑުން ޒާޔާ އަށް ބަލާލެވުނެވެ. ޝާރިފްގެ ސައިކަލްގެ އަޑުވެސް މިހާރު ޒާޔާއަށް ފާހަގަކުރަން އެނގެއެވެ. އޭރު ޝާރިފް ސައިކަލްގައި ޒާޔާ އާއި އަރާ ހަމަވަނީއެވެ. ޒާޔާ ބަލާލި ވަގުތު ޝާރިފް ވެސް ހުރީ ޒާޔާއަށް ބަލަހައްޓައިގެންނެވެ. 

ދެމީހުންގެ ހަތަރު ކަޅި ބައްދަލުވި ވަގުތު ޒާޔާ ގެ ހިތުގެ ތެޅުން އަވަސްވާން ފެށި ކަމުގެ އިޙްސާސް ޒާޔާ އަށް ކުރެވުނެވެ. 

އެވަގުތު ކުރިމަތީގައި އޮތް ގޯޅިން ދުވެފައި އައި ހައުލާ އެއީ ޒާޔާގެ ނަސީބޭ ޒާޔާގެ ހިތަށް އެރިއެވެ. ފަހަރުގައި ޝާރިފް ޒާޔާ އެކަނި ހުއްޓާ ފެނުމުން ވާހަކަ ދައްކާލަން އައިސްދާނެ ކަމަށް ޒާޔާއަށް ހީކުރެވުނީމައެވެ. 

“ސޮރީ. ލަސްވީމަ. މި ޝޯލް ގަނޑެއް އަޅަން ނޭނގިގެން. ބަލާބަލަ މީތިގަނޑު އޮތް ގޮތް.” ހައުލާ އޭނާގެ ބޮލުގައި އޮޅާފައި އޮތް ޝޯލްގެ ކަނަށް ދަމާލިއެވެ. 

“ހިނގާ ދާން.” ޒާޔާ ހައުލާގެ އަތުގައި ހިފައިގެން ހިނގައިގަތީ ޝާރިފް އާ ދިމާއަށް ބަލާވެސްނުލައެވެ. 

ބީޗާއި ދިމާއަށް ޒާޔާ މެން ހިނގާފައި ދިޔައިރުވެސް ޝާރިފް ފަސްފަހަތުން އަންނަ ކަން ޒާޔާ އަށް އެނގެއެވެ. ޝާރިފްގެ ސައިކަލްގެ އަޑު އިވޭތީއެވެ.

 

 

އަތިރިމަތީގައި ހުރި ޖޯއްޔެއްގައި ހައުލާ އާއި ޒާޔާ އިށީނދެލިއެވެ. އޭރުވެސް އަތިރިމަތީގައި އެތައް ބަޔަކު ހަވީރު ފިންޏަށް އައިސް ތިއްބެވެ. 

“ހާދަ ފާޑަކަށް ތި އިންނަނީ.” ޒާޔާގެ ހިމޭންކަން ހައުލާ އަށް ފާހަގަވިއެވެ.

“ފާޑަކަށްތަ މި އިންނަނީ. ފޫހިކަމުން މިކޮޅުގަ އަސްލު.” ޒާޔާގެ ހިތުގެ ހާލު އެއްވެސް މީހަކާއި ހިއްސާ ކުރާކަށް ޒާޔާ ބޭނުމެއްނޫނެވެ. ކުރިޔަސް އެންމެން ކުއްވެރިކުރާނީ ޒާޔާއެވެ. 

“އަބަދު ގޭގަ އޮންނަންޏާ ފޫހިވާނެދޯ. ބޭރު ތެރެއަށްވެސް ނިކުމެ އުޅެބަލަ ރާއިދު ނެތަސް.” ހައުލާގެ ވާހަކައަށް ޒާޔާ އެއްވެސް އެއްޗެއް ނުބުންޏެވެ. ހަމައެކަނި ހިނިތުންވެލީއެވެ. 

ހައުލާ އެ ހާމަކުރީ ރަނގަޅުވާހަކައެއްކަން ޒާޔާ ޤަބޫލުކުރެއެވެ. ނަމަވެސް ހިތުގައި ރޯވެއަނދަމުންދާ އަލިފާނުގެ ހުޅުގަނޑަކަށް ބަދަލެއް ނާދެއެވެ. 

“ނުހުރެޔޭ ރައްޓެއްސެއްވެސް. ހައު އެކަނި. ރައްޓެހިން ހޯދަން ވީ އުމުރުގަ މާލޭގަ ހުރީމަ ހުރިހާ ރައްޓެހިންތައް އެތިބީ މާލޭގަ.” ޒާޔާ ދެރަވެ ކަރުއެލުވާލިއެވެ. 

“މަ ވެސް މި ހުރީނު.” ހައުލާ ޒާޔާގެ އަތުގައި ހިފިއެވެ.

“ތީ އޮފީހުގައި ނުލާހިކު ބިޒީކޮށް އުޅޭ މީހެއް. ވީކެންޑް ގަ އެކަނި ފްރީ ވަނީވެސް. ރާއިދު ހުންނާނެނަމަ އަޅެ.” އަތިރިމަތީގައި ހުރި ފިހާރަ ކައިރީގައި ހުރި ޝާރިފް ޒާޔާގެ ލޮލުގައި އަޅައިގަތެވެ. 

“ހިނގާ ދާން.” ޝާރިފް ބަލަން ހުރިތަން ފެނިފައި ޒާޔާ ބޭނުންވީ ވީހާވެސް އަވަހަށް އެތަނުން ދާށެވެ. ޒާޔާ ހިނގައިގަތުމުން އިތުރު ސުވާލެއްނުކޮށް ހައުލާވެސް ޒާޔާ އާއިއެކު ހިނގައިގަތެވެ. 

 

“ކޮބާ ޒިޔަލް؟” ގެޔަށް ދިޔައިރު ރާއިދު އާއި ޔަމަން އަދި ފާއިޒާ ހަމަޖެހިލައިގެން ޖޯލީގައި ޖައްސާލައިގެން ތިބިތަން ފެނިފައި ޒާޔާ އަހާލިއެވެ. 

“ސައިކަލްގައި އިނދެ ނިދައިފި. އެހެންވެ އެހާ އަވަހަށް ގެއަށް މިއައީވެސް.” ރާއިދު އޮޅުންފިލުވައިދިނެވެ. 

“ރާއިދު ވަރަށް ގުޅިޔޭ ދަރިފުޅަށް. ހިނގާ ސައިބޯންދަމާ އެންމެން.” ފާއިޒާ ތެދުވެގެން ހިނގައިގަތީ ކާގެ އާއި ދިމާއަށެވެ.

“އަސްލުތަ؟ ނޭނގެ ގުޅި ކަމެއް.” ޖިންސް ޖީބުގައި އޮތް ފޯނު ނަގާ ޒާޔާ ބަލާލިއެވެ. ފުރަތަމަވެސް ލޮލުގައި އަޅައިގަތީ ޝާރިފްގެ މިސްވެފައި ހުރި ކޯލްތަކެވެ. ވަގުތުން ކޯލް ލޮގް އިން ޝާރިފްގެ ކޯލްތައް ޑިލިޓް ކުރުމަށްފަހު ރާއިދު އާއި ޖެހިގެން ހުރި ޖޯލީގައި ޒާޔާ އިށީނދެލިއެވެ. 

“ދޮންބެ ކޮން އިރަކުންތަ މަށާއި އެކީ އުޅޭނެ ދޮންބެދައްތަ އެއް މިގެޔަށް ގެންނަނީ؟” ޒާޔާގެ ވާހަކައިން ޔަމަން އާއި ރާއިދު ހީނގަތެވެ. 

“މަލާމަތް ކުރާނެ ކަމެއްނެތޭ. އަސްލު ވާހަކައެކޭ މިބުނީ.” ޒާޔާ ތުން ދަމާލިއެވެ. 

“ތި ކަމާ އެބައުޅެމޭ. އެކަމަކު ޒާޔާ ކޮއްކޮ ތީ މާދަންވެސް މިތަނުން ދާން ހުރި މީހެއްނު.” ޔަމަން ހެމުން ހެމުން ބުނެލިއެވެ. 

“ޒާޔާ ދެން ނުދާނަން ދޯ. މަންމަ ކައިރީގައި ހުންނާނީ ދޯ.” ކާގެއިން ނިކުތް ފާއިޒާ އެމީހުންގެ ވާހަކައިގައި ބައިވެރިވެލިއެވެ. ޒާޔާއަށް ބަލާލެވުނީ ރާއިދުގެ މޫނަށެވެ. ރާއިދު އެރަށުގައި ނޫޅޭނެކަން ޒާޔާއަށް އެނގެއެވެ. 

“ދެން ހިނގާ ސައިބޯން ދަމާ ދޯ. ތި ވާހަކަ ދައްކާނީ ދޮންބެ ދައްތައެއް މިގެޔަށް ގެނައި ދުވަހަކުން.” ޒާޔާ ރާއިދުގެ އަތުގައި ހިފައިގެން ތެދުވިއެވެ. 

 

 

ރީތި ހަނދުވަރެެއް ދީފައި އޮތް ރެއެކެވެ. ޒާޔާ ހުއްޓިލައިގެން ހުރީ ކުޑަ ދޮރު ކައިރީގައެވެ. ފުން ޚިޔާލަކަށް ގެއްލިފައެވެ. 

“ވަރަށް އަވަހަށް ނިކުމެބަލަ ބޭރަށް. ހަމަ މިހާރު. ބަލާލަބަލަ އުޑުމައްޗަށް. ވަރަށް ރީތި ދޯ.” ކަންފަތުގައި ތަކުރާރުވަމުން ދިޔައީ ޝާރިފްގެ އަމިއްލަ ދުލުން ބޭރުކޮށްފަ ހުރި ލަފްޒުތަކެވެ. އެތައް ފަހަރަކު އެރީތި ހަނދު ޝާރިފް ޒާޔާއަށް ދައްކާފައިވެއެވެ. އެ ހަނދު ހެކިކޮށް އެތަކެއް މެސެޖްތަކެއް ޒާޔާއަށް ރައްދުކޮށްދީފައިވެއެވެ. 

“އަޅެ. އަހަރެން މިސްވާ ވަރަށް އޭނަ އަހަރެން މަތިން މިސްވާނެބާ؟” ޒާޔާ އަށް ސުވާލުކޮށްލެވުނީ އަމިއްލަ ހިތާއެވެ. ނަމަވެސް ޖަވާބު ނޭނގޭ ސުވާލެކެވެ.

ފިނި ފިނި ދެއަތެއް ޒާޔާ އުނަގަނޑު ވަށާލުމާއެކު ޒާޔާ ދިޔައީ ސިއްސައިގެންނެވެ. 

“ކޮން ޚިޔާލެއްގަ؟” ރާއިދު ޒާޔާގެ އިސްތަށިގަނޑުން ވަސްބަލާލިއެވެ.

“ހިނގާ މާލެ ބަދަލުވާން. ނޫނީ ރާއިދު ކޮންމެ ދުވަހަކު ރަށަށް އާދެވޭކަހަލަ ޖޮބަކަށް ދާންވީނު.” ޒާޔާ އަދިވެސް ހުރީ ފުރާ ފުރިހަމަ ވެފައިވާ ހަނދަށް ބަލަހައްޓައިގެންނެވެ. 

“ދުރުގަ ހުންނަން އެހާ އުނދަގުލީތަ؟ މާލެ ގޮސްގެން އަދި މިވަގުތަށް ވަރަށް ދަތިވާނެއެއްނު. ވަޒީފާވެސް ދޫކޮށްލާފައެއްނު މިއައީ.” ރާއިދު ހުރީ އުފަލުންނެވެ. ޒާޔާ ރާއިދުއަށް އެހާ އަޅާލާތީއެވެ. ރާއިދު ކައިރީގައި ބަހައްޓަން ޒާޔާ ބޭނުންވާ އަސްލު ސަބަބު އެނގޭ ނަމަ ރާއިދު އުފަލެއް ނުވީސްކަން ޔަޤީނެވެ. 

ޒާޔާ އެއްޗެއް ނުބުނެ ހުރީއެވެ. އިތުރަށް ދައްކާނެ އެއްވެސް ވާހަކައެއް ޒާޔާގެ ސިކުނޑިއަކަށް ނުވިސްނުނެވެ. 

ކުއްލިއަކަށް ރާއިދު ޒާޔާ އަތްމައްޗަށް ނަގާ އުފުލާލުމާއެކު ޒާޔާ ހިނިތުންވެލިއެވެ.

“މަށަށް އިނގޭ ތިހެން ހަނދާނެކަން ކުރިންވެސް.” ރާއިދުގެ އެ އަމަލަކީ ޒާޔާއަކަށް އާ ކަމެއް ނޫނެވެ. ނަމަވެސް ތަފާތުވީ ޒާޔާގެ އުޅުމެވެ. ރާއިދުގެ އެކަހަލަ ކޮންމެ ސަމާސާއަކުން ހެވި ދިލިފައި ހުންނަ ޒާޔާގެ މޫނުމަތިން އުފާވެރިކަމެއް ފެންނަން ނެތީމައެވެ. 

“ކިހާ ދުވަހެއް ދުރުގަ ހުންނަތާ. އެހެން ނޫނަސް ޒާޔާ ފެންނަން ހުރިއްޔާ މިހެން ވާނެކަން އެނގޭނު.” ރާއިދު ބޮކީގެ އަލި ފަަނޑުކޮށްލުމާއެކި ޒާޔާ ރާއިދުގެ މޭތެރެއަށް ބޮޑިވެގަތެވެ. 

 

 

ދުވަސްތައް މާޒީގެ ސޮފްޙާތަކަށް ގެއްލެމުންދެއެވެ. ޒާޔާގެ ހިތުގެ ރިހުމަކަށް ބަދަލެއް ނާދެއެވެ. ބައެއް ފަހަރު ޝާރިފް ގުޅީމާ ވެސް ފޯނަށް ޖަވާބުދެއެވެ. ނަމަވެސް ޝާރިފްގެ އެދުންތަކަށް ޒާޔާ އައީ ނޫނެކޭ ބުނަމުންނެވެ. 

އެއްދުވަހެވެ. ގޭގައި އެއްވެސް މީހެއް ނޫޅެއެވެ. ޒާޔާ ޝާރިފް އާ ވާހަކަދައްކަން އޮތީ ގޭގެ ޖޯލީގައެވެ. 

“ދިހަ ފޫޓް ދުރުގައި ހުރެވެންޏާ ތި ދައްކާ ވާހަކައެއް އަޑުއެހިދާނެ. އަދި ދައްކާފަ ވީ ހާ އަވަހަކަށް ދާން ޖެހޭނެ.” އެންމެ ފަހުން ޝަރުތެއް ކަނޑަ އެޅުމަށްފަހު ޒާޔާ ޝާރިފްއާ ބައްދަލުކުރަން އެއްބަސްވިއެވެ. 

ޒާޔާގެ އަމިއްލަ ކޮޓަރީގައެވެ.

 

ދަންވަރުގެ ހަމަހިމޭން ވަގުތެވެ. ޝާރިފްގެ ކޯލަކަށް އިންތިޒާރުކޮށްގެން ހުރި ޒާޔާ ލޯގަނޑު ކުރިމަތީގައި އަމިއްލަ ސޫރައަށް ބަލަހައްޓައިގެން ހުއްޓެވެ.

މި ކުރެވެނީ ރަނގަޅުކަމެއް ބާއޭ ޒާޔާގެ ހިތަށް އަރަމުންދިޔައެވެ. 

ޝާރިފް ބުނި ގޮތުން އޭނާ ކޮޓަރީގައި ބައްދަލުކުރަން ނިންމީ ޒާޔާއާއި ދޭތެރޭގައި ވިސްނާފައެވެ. މީހަކަށް ފެނި ޒާޔާ ބަދުނާމު ވެދާނެތީއެވެ. 

ފޯނުގެ ރިންގް ގެ އަޑަށް ޒާޔާ ފޯނު ނަގާ ކަންފަތުގައި ޖައްސާލަމުން ދޮރު ހުޅުވާލިއެވެ. 

އެވަގުތު ޝާރިފް ކޮޓަރި ތެރެއަށް އަވަަސް އަވަހަށް ވަނެވެ. ޒާޔާ ދޮރު ތަޅުލަމުން ޝާރިފްއާ ދިމާއަށް އެނބުރިލިއެވެ.

 

ނުނިމޭ

 

ނިދާ ބޮކީގެ ފަނޑު އަލީގައިވެސް ޝާރިފްގެ މުށިކުލައިގެ އެމޫނު މަތިން ފެންނަން ހުރި ހިތްގައިމު ހިނިތުންވުން ޒާޔާގެ ހާސްވެފައިވާ ހިތް ހަމަޖައްސާލަދިނެވެ. ޒާޔާ ހުރީ ޝާރިފްގެ ހަރަކާތްތަކަށް ބަލާށެވެ. ވަށައިގެން ކޮޓަރިތެރެއަށް ނަަޒަރު ހިންގާލަމުން ޝާރިފް ބަލަމުންދިޔައީ ނިދާފައި އޮތް ޒިޔަލް އަށެވެ.
ޝާރިފް މަޑުމަޑުން އެނދުގެ އެއްފަރާތުގައި އިށީނދެލުމާއެކު ޒާޔާ އައިސް އިށީނީ އެނދުގެ އަނެއްފަރާތުގައެވެ.
“ދިހަ ފޫޓް ދޯ. ހަނދާން އެބަހުއްޓޭ.” ޝާރިފްގެ ބާރު އަޑުއިވިފައި ޒާޔާގެ ދެލޯ ދިޔައީ ބޮޑުވެގެންނެވެ.
“މިތާކު އެހާ ބާރަށް ވާހަކައެއް ނުދެއްކޭނޭ ބުނީމެއްނު. އެވާހަކައެއް ހަނދާނެއް ނެތްތަ؟” ޒާޔާ ހަނދާންކޮށްލަ ދިނެވެ.
“ތިހާ ދުރުގަ އިނީމަ އަޑެއް ނީވޭނެ ދޯ.” ޝާރިފް ވާހަކަ ދެއްކިލެއް މަޑުކަމުން ޒާޔާއަކަށް އަޑެއް ނުއިވުނެވެ. އެންމެފަހުން ޒާޔާ ޖެހުނީ ގޮސް ޝާރިފްގެ ކައިރީގައި އިށީންނާށެވެ.
ކައިރީގައި އިންނަ އިރުވެސް ޒާޔާއަށް ޝާރިފް ދައްކާ ވާހަކައެއް އަޑެއް ނުއިވެއެވެ. ކޮންމެ ފަހަރަކު ޝާރިފް ވާހަކަ ދައްކަން ޖެހެނީ ޒާޔާގެ ކަންފަތާއި ކައިރިވެލަމުންނެވެ.
“ޝާރިފްއަށް ކީއްވެތަ އެހާ އަހަރެން މުހިންމީ؟” ޒާޔާ ޝާރިފްއާއި ހަތަރު ކަޅި ހަމަކޮށްލަމުން އަހާލިއެވެ.
“ބުނަންވީ؟” ޝާރިފް ހަދިޔާ ކޮށްލީ ހިތްގައިމު ހިނިތުންވުމެކެވެ.
“އިނގޭތަ؟ ޝާރިފް އަށް މިތަނަށް އާދެވިފަ ތި އިނީ ކީއްވެކަން؟” ޝާރިފް ކުރި ސުވާލުގެ ޖަވާބު ނުދީ ޒާޔާވެސް ޝާރިފްއާ ކޮށްލީ ސުވާލެކެވެ. ބޮލުގެ އިޝާާރާތުން ޝާރިފް އެންގީ އެނގޭ ކަމުގައެވެ.
“އަސްލުވެސް އެނގޭތަ؟ އަޅެ ބުނެބަލަ؟” ޒާޔާ ހައިރާންވެފައި ޝާރިފްއަށް ބަލައިލިއެވެ. އޭރު ޝާރިފްގެ މޫނު ޒާޔާ އާއި ކައިރިވަމުންދެއެވެ.
“ބުނީމެއްނު ދުރުގަ- “ ބުނަން އުޅުނު ޖުމްލަ ޒާޔާއަކަށް ފުރިހަމައެއް ނުކުރެވުނެވެ. ޝާރިފްގެ ހޫނު ނޭވާތައް ޒާޔާގެ ކަރަށް އެޅެމުންދިޔައެވެ. ޒާޔާއަކަށް ޝާރިފް ދުރެއްވެސް ނުކުރެވުނެވެ. ހިތް އެގޮތަށް ނުރުހުނީއެވެ. އަނގައިން އިތުރު އެއްވެސް ވާހަކައެއް ޒާޔާ އަކަށް ނުދެއްކުނެވެ. ޝާރިފްގެ ކޮންމެ ހަރަކާތަކުން ޒާޔާ އަށް އިޙްސާސްވަމުން ދިޔައީ އިންތިހާ ދަރަޖައިގެ ލޯތްބެވެ. ޝާރިފްގެ ކޮންމެ ހަރަކާތަކަށް މަރުޙަބާ ކިޔަމުން ޒާޔާ އެނދުމަތީގައި އޮށޯވެލިއެވެ. މުޅި ހަށިގަނޑާއި ހިތް އެރޭގެ އެހިނދުކޮޅު ތެރޭގައި ޒާޔާ ޝާރިފް އަށް ހަދިޔާ ކޮށް ނިންމައިފިއެވެ.

ޝާރިފްގެ ކޮންމެ ބީހިލުމަކުން ޒާޔާގެ ތުންފަތަށް ވެރިވެގެން ދަނީ ހިނިތުންވުމެކެވެ. ހަމަ ހިމޭންކަން ރަސްކަން ކުރަމުންދާ އެމާހައުލުގައި ހަމައެކަނި އިވެމުންދާ އަޑަކީ ޒާޔާ އާއި ޝާރިފް ލަމުން ގެންދިޔަ ބަރު ނޭވާ ތަކުގެ އަޑެވެ. ދެހަށިގަނޑު އެއްހަށިގަނޑަކަށް ވެފައި ވާއިރު ޝާރިފް އިރުއިރުކޮޅާއި ޒާޔާގެ ނިއްކުރީގައި އޭނާގެ ތުންފަތް ޖައްސާލައެވެ.
“އެނގިއްޖެ ދޯ ކީއްވެކަން؟ އެއީ ލޯބިވާތީ.” ސިއްރު ސިއްރުން ޒާޔާގެ ކަންފަތް ދަށުގައި ޝާރިފް ސަބަބު ހާމަކޮށްލިއެވެ.
“ލޯބިވޭ ޓޫ.” ޝާރިފްގެ މޭތެރޭގައި މޫނު ފޮރުވާލަމުން ފުރަތަމަ ފަހަރަށް ޒާޔާ ޝާރިފްގެ ކުރިމަތީގައި އޭނާގެ ހިތް ހުޅުވާލިއެވެ. ޒާޔާގެ ޖަވާބުން ޝާރިފް އަދި ވަކިން ބޮޑަށް އޭނާގެ އަތު ތެރޭގައި ޝާރިފްގެ ހަށިގަނޑު ފިއްތާލިއެވެ.

ހަމަ ހިމޭން ފިނި ފިނި އެދަންވަރަކީ އެދެމީހުންގެ ލޯބީގެ ފެށުމެވެ. ދެކެމުން އައި ހުވަފެންތަކުގައި ކުލަ ޖެހިގެންދިޔައެވެ. މުޅި ދުނިޔެއަށްވެސް ސިއްރުންނެވެ. ވަށައިގެން ވަނީ ލޯތްބެވެ. އުފަލެވެ. ހިތްހަމަޖެހުމެވެ. އެކުގައި އެތަކެއް ގަޑި އިރުތަކެއް ހޭދަކުރުމަށްފަހު ޝާރިފް އެނދުން ތެދުވެ ވެއްޓިފައި އޮތް ޓީޝާޓް ގަޔަށް ހެޔޮ ވަރުކޮށްލިއެވެ.
“ދަނީތަ؟” ވެފައިވާ ވަރުބަލި ކަމާއެކު ޒާޔާ އަދިވެސް އޮތް ގޮތަށް އޮތީއެވެ.
“ދާންޖެހޭނެއެއްނު. އިރު އަރަނީނު؟” ޝާރިފް ޒާޔާގެ ދެކޮނޑުގައި ހިފާ ނެގިއެވެ. އަދި އެހާ ލޯބިން ގެނެސް މޭގައި ލައްކޮށްލިއެވެ.
“ލޯބިވޭ.” ޒާޔާގެ ފަން އިސްތަށިކޮޅުގައި ޝާރިފް ފިރުމާލިއެވެ. ޒާޔާ އެއްވެސް އެއްޗެއް ނުބުނެއެވެ. އެކަމަކު ޝާރިފް ޒާޔާގެ މޫނުގެ އެތައް މިތާގައި ބޮސް ދިނެވެ.
“މި ގުޅަނީ. ފޯނު ނަގައްޗޭ.” ދޮރުން ނިކުންނަމުން ޝާރިފް ޒާޔާގެ ނިތްކުރީގައި އަނެއްކާވެސް ތުންފަތް ޖައްސާލިއެވެ.
ޝާރިފް ދިޔުމާއެކު ޒާޔާ އެނދުމައްޗަށް ވެއްޓިގަތެވެ. ކީއްވެ ހެއްޔެވެ؟ މީހެއްގެ ހައްޤެއް ގޮތުގައި ހުރެ ޝާރިފް އާއި އެކީ ވަގުތުތަކެއް ހޭދަކުރެވުމަކުން ޒާޔާ ދެރައެއް ނުވެއެވެ. ވަނީ އުފަލެވެ. ހަޔާތުގައިވެސް ނުލިބޭހާ އުފަލާއި އަރާމު އެންމެ ރެއަކުން ޒާޔާ އަށް ލިބިއްޖެއެވެ.
ކުއްލިއަކަށް އުފަލުން ވިދަވިދާހުރި ޒާޔާގެ ދެލޯ ފުސްވެއްޖެއެވެ. ހިތަށް ވެރިވެގަތް ޚިޔާލުތަކަކުންނެވެ.
ޝާރިފް ބޭނުންވީ ހަމައެކަނި އަހަރެންގެ ފަރާތުން ވަގުތީ ހިތްހަމަޖެހުމެއް ހެއްޔެވެ؟ މިހާ ހިސާބުން މިކަން ނިމުނީ ހެއްޔެވެ؟ މިރޭގެ އެހުރިހާ ހަނދާނެއް އާ ކުރުމެއް ދެން ނޯންނާނެ ހެއްޔެވެ؟ އެ ހުރިހާ ހަނދާންތަކެއް މާޒީގެ ސޮފްހާތަކުގެ ތެރެއަށް ގެއްލި ދާނީ ހެއްޔެވެ؟
ޚިޔާލީ ކަނޑެއްގައި ފަތަމުން ދިޔަ ޒާޔާ ސިހުނީ ފޯނުގެ ރިންގް ގެ އަޑަށެވެ.
“ރުޅި އައިއްސަތަ؟” ފޯނު ކަންފަތުގައި ޖައްސާލުމާއެކު ފުރަތަމަވެސް ޝާރިފްގެ ސުވާލުން ޒާޔާ އަހަން ބޭނުންވާ އެއްވެސް ސުވާލެއް އަހާކަށް ނުކެރުނެވެ.
“އާން. އެކަމަކު ދެން އޯކޭ.” ޒާޔާ ބޭނުންވީ ޝާރިފްގެ ހިތުގައި އޮތް އެއްޗެއް އޮޅުންފިލުވާށެވެ.
“އަދިވެސް ބޭނުން. ވަރަށް ބޭނުން. އަބަދުވެސް ބޭނުން.” ޝާރިފް ވާހަކަދައްކަމުން ދިޔައީ ވަރަށް ލޯބިންނެވެ. އެކަން އެނގެނީ ޝާރިފް ބުނެލާ ކޮންމެ ލަފްޒަކުން ޒާޔާގެ ތުންފަތަށް ވެރިވާ ހިނިތުންވުމެވެ.
“ބުނީމެއްނު އެންމެ ރެއެކޭ؟” ކުރިން ޝާރިފް ދެއްކި ވާހަކަތައް ޒާޔާ ހަނދާންކޮށްލަ ދިނެވެ. ބޭނުމަކީ ހަމައެކަނި އެވާހަކަތައް ހަނދާންކޮށްދިނުން އެކަންޏެއް ނޫނެވެ. ޝާރިފް ޒާޔާއަށް އެދޭވަރުވެސް ޒާޔާ ބަލަން ބޭނުންވެއެވެ.
“އާން. އެކަމަކުވެސް ބުނަންތަ؟ އުމުރަށްވެސް ޒާޔާ ބޭނުން.” ޝާރިފް ހާމަ ކުރީ ހަޤީޤަތްކަމާމެދު ޒާޔާ އަށް ޝައްކުވަނީއެވެ. ވާނީވެސް އެހެން ނޫންހެއްޔެވެ؟ އަމިއްލަ ދެލޮލުން ޝާރިފް އާއި ދިލާ އުޅޭގޮތް ޒާޔާ އަށް އަބަދުވެސް ފެނެއެވެ.
“ޝާރިފް. މަށަށް ކަމެއް ކޮށްދީފާނަންތަ؟” ފޯނު ކަންފަތާއި ދުރުކޮށްލަމުން ޒާޔާ އެނދުން ތެދުވިއެވެ.
“ދިލާ އާއެކީ މީގެ ފަހުން މަށަށް ފެނިގެން ނުވާނެ.” އެންމެ ރެއަކުން ޒާޔާ ޝާރިފް އޭނާގެ މިލްކަކަށް ހަދައިފިއެވެ. ޝާރިފް ޒާޔާގެ ޝަރުތާއި އެއްބަސްވިއެވެ. ނަމަވެސް ދިލާ ގޮވައިގެން ދާން ޖެހޭ ތަންތަނަށް ދާން ޝާރިފް އަށް މަޖުބޫރުވާނެ ވާހަކަވެސް ޝާރިފް ހަނދާންކޮށްދިނެވެ. އިރު އަރަން ދެން ވާހަކަ ދައްކަން ތިބުމަށްފަހު ޒާޔާ ފޯނު ބޭއްވީ ޒިޔަލް ހޭލައިގެންނެވެ. އެންމެ ފަހުން ޒިޔަލް ނިންދަވަން އޮވެ ޒާޔާއަށްވެސް ނިދުނީއެވެ.

އިރުގެ ގަދައަވިން ދުނިޔެ ހޫނުކުރަމުން ދިޔައިރުވެސް ޒާޔާ އޮތީ ނިދާފައެވެ. ޒިޔަލްވެސް އޮތީ ގަދަނިދީގައެވެ. މަންމަގެ ހޫނުކަން އިޙްސާސްވާތީ ކަންނޭނގެއެވެ. އެކަމަކު އިރުކޮޅެއް ފަހުން ޒިޔަލް ރޮއެ ގަތް އަޑަށް ޒާޔާއަށް ފުންމައިގެން ތެދުވެވުނެވެ. އަވަސް އަވަހަށް ޒިޔަލް ތުބުގައި ބުއްފުޅި ޖެއްސުމަށްފަހު ޒާޔާ ފޯނުން ގަޑި ބަލާލިއެވެ.
“މަންމަވެސް ނުހުންނާނެ މިއަދަކު. އަމިއްލައަށް ކައްކަންވެސް ޖެހޭނީ. އަޅެ ކިހިނެއްބާ ހަދާނީ.” ޒާޔާ ކަންބޮޑުވީ ކުރަން ނޭނގޭ ކަމެއް ކުރަން ޖެހޭތީއެވެ. ބަދިގެ އަށް ދިއުމުގެ ކުރިން ޒާޔާ އެންމެ ފުރަތަމަ ޒިޔަލް ފެންވަރުވާ ރީތިކޮށްލިއެވެ.

ޓީވީން ކާޓޫނު އަޅުވާލުމަށްފަހު ޒާޔާ ހިނގައިގަތީ ބަދިގެ އާއި ދިމާއަށެވެ. ރަނގަޅަށް ނުނިދުމުގެ ސަބަބުން އަދިވެސް ޒާޔާގެ ދެލޮލުން ފެންނަމުން ދަނީ ނިދީގެ އަސަރެވެ.
ކައްކާނެ އެއްޗެއް ނޭނގޭތީ ޒާޔާ ސޭންޑްވިޗް ހަދާލިއެވެ. ކާންވެސް ހުރީ ހަމައެކަނި ޒާޔާ ވީމައެވެ.

“ހާދަ ބުރަކޮށްލައިގެން؟” ކާގޭ ދޮރުމަތީގައި ހުރި ހައުލާގެ އަޑަށް ޒާޔާ އިސްއުފުލާލިއެވެ.
“ދޫންޏާ. ކައްކަން ނޭނގިގެންނު މިއުޅެނީ. މަންމަ ރަށުގަ ނެތީމަ.” ޒާޔާ ހިިނިތުންވެލިއެވެ.
“އަސްލު ވާހަކައެއްތަ؟ ނޭނގޭތަ ކައްކާކަށް؟” ޒާޔާ އަށް ކައްކަން ނޭނގޭ ވާހަކަ ބުނުމުން ހައުލާ ވީ ހައިރާނެވެ.
“އާން. ދެން އެހާ އެހާއެއް ނޭނގޭ. ކޮންމެވެސް ވަރަކަށް.” ޒާޔާ ހައުލާގެ އަތުގައި ހިފައިގެން ނިކުމެ ބޭރު ޖޯލީގައި އިށީނދެލިއެވެ.
“ދެން ތި ބުނީ ތީނަގެ ރާއިދު ހުންނަނީ ނުކައި ބަނޑަށޭތަ؟” ހައުލާ ޒާޔާ އާ ދިމާކޮށްލިއެވެ.
“ދެން މާލޭގަ ރާއިދުގެ މަންމަ ކައްކައޭ. މިކޮޅުގަ މަގޭ މަންމަ.” ޒާޔާ ވެސް ހީނގަންނަމުން ހައުލާގެ ހުނުމުގައި ބައިވެރިވެލިއެވެ.
“ނެތޭ ހުރެވޭކަށްވެސް. އޮފީހުގަ ވަރަށް ބިޒީ. ހަވީރު އަންނާނަން އިނގޭ.” ޒާޔާގެ އަތުގައި ހިފާލަމުން ހައުލާ ހިނގައިގަތީ އޮފީހާއި ދިމާއަށެވެ.

މެންދުރު ފަސް ވެއްޖެއެވެ. ޒާޔާ ކޮޓަރި ތެރޭގައި ދެކޮޅު ދެކޮޅަށް އެނބުރި އެނބުރި ހުއްޓެވެ. އެހެން ދުވަސް ދުވަހު އެކެއް ޖެހުމުގެ ކުރިން ގުޅާ ޝާރިފްގެ ޚަބަރެއް ނުވުމުންނެވެ.
ކިތަންމެ ފަހަރަކު ގުޅާލަން ހިތް ބުނަމުން ދިޔަ ނަމަވެސް ޒާޔާ އަކަށް ނުކުރެނުވެ. އެންމެ ފަހުން ޝާރިފްގެ ކޯލްގެ އިންތިޒާރު ކުރުން ހުއްޓާލުމަށްފަހު ޒިޔަލްގެ އަތުގައި ހިފައިގެން ޒާޔާ ހިނގައިގަތީ ކާގެއަށެވެ. ޒިޔަލް ބަނޑު ހައިވެގެން ރޯތީއެވެ.
“ދަރިފުޅާ ޒާޔާ.” ގޭތެރެއަށް އެޅި ފުރަތަމަ ފިޔަވަޅާއެކު ފާއިޒާ ގޮވާލީ ޒާޔާއަށެވެ.
ފާއިޒާގެ އަޑަށް ޒާޔާ ނިކުތީ ދުވެފައެވެ.
“މާމަ ދޫނި ކޮބާ؟” ފާއިޒާ ޒިޔަލްގެ ކޮލުގައި ހިފާލަމުން ޒިޔަލް އުރާލަން އަތް ދިއްކޮށްލިއެވެ.
ކުޑަ ކުޑަ ޒިޔަލް ފާއިޒާގެ އަތުތެރެއަށް އައިސް ވަނީ ދުވެފައެވެ.
“ކޯޗެއްތަ ދަރިފުޅު ކެއްކީ؟” ޒާޔާ އަށް ކައްކަން ނޭނގޭ ކަން އެނގިހުރެ ފާއިޒާ އެހެން އަހާލީ ހިނިއައިސްފައި ހުރެއެވެ.
“ނުކައްކަން. ސޭންޑްވިޗް ހެދީ. ހިނގާބަލަ ކުޅި ރިހަ ކައްކަން ދޯ. އެއްކަލަ މަންމަ ކައްކާ ކަހަލަ.” ފާއިޒާ ޒާޔާ އާއި ދިމާކުރުމުގެ ކުރިން ޒާޔާ އަވަސް އަވަހަށް ވާހަކަ އޮޅުވާލިއެވެ.
“ތިއެއް ކެއްކޭނީ ހިކި މިރުސް ގަނެގެންނު. ދަރިފުޅު ދޭބަލަ ގަނެގެން އަންނަން.” ފާއިޒާ ޒިޔަލް އުރާލައިގެން އެތެރެއަށް ވަނުމާއެކު ޒާޔާ ހިނގައިގަތީ ފިހާރައާއި ދިމާއަށެވެ.

ރޭގެ ހަނދާންތައް ސިކުނޑި ތެރޭގައި އާކުރަމުން ޒާޔާ މަގުމަތީގައި ހިނގަމުންދިޔައެވެ.
ކަންފަތުގައި ސައިކަލްގެ އަޑު ޖެހުމާއެކު ޒާޔާ އަށް ފަސްއެނބުރި ބަލާލެވިއްޖެއެވެ. ޝާރިފްކަން ޔަޤީންވާތީއެވެ. ވީ ވެސް އެހެންނެވެ. ޝާރިފް އޭރު ޒާޔާ އާއި އަރާ ހަމަވަނީއެވެ.
ވަރަށް ލޯބިން ހިނިތުންވެލުމަށްފަހު ޝާރިފް ސައިކަލްގެ ސްޕީޑް ބާރުކޮށްލީ ޒާޔާ ފަސްދީ ދަމުންނެވެ.
ޝާރިފް ލޯމައްޗަށް ގެއްލެންދެން ޒާޔާއަށް ހުރެވުނީއެވެ. އެ ސައިކަލްގެ ފަހަތުގައި ޝާރިފްގެ ކޮނޑުމަތީގައި ބޯއަޅާލައިގެން އޮވެވޭނެނަމައޭ ހިތަށް އެރުމާއެކު ޒާޔާއަށް ހިންދިރުވާލެވުނެވެ.

ފިހާރައިން ނިކުތް ގޮތަށް ޒާޔާ ދުއްވައިގަތީ ގެޔާއި ދިމާއަށެވެ. ޒާޔާގެ ހިތްބުނެއެވެ. ޝާރިފް ގުޅާނެއެވެ.
ޒާޔާގެ ހީކުރުން ހަމަ ރަނގަޅެވެ. ޝާރިފްގެ އެތައް ކޯލްތަކެއް މިސްވެފައި ހުއްޓެވެ. ޒާޔާ އުފަލުން ގޮސް ޝާރިފްގެ ނަމްބަރަށް ޑައިލްކޮށްލިއެވެ. ނަމަވެސް ހަމަ އެސިކުންތުގައި ޖެހުނީ ކޯލް ކަނޑާލާށެވެ. މަންމަ ޒިޔަލް ގޮވައިގެން އައިސް ވަނީމައެވެ.

“މާދަން ވެލެންޓައިންސް ޑޭ އެއްނު. ރާއިދު ނެތީމަ ކަޑަ ދޯ.” ހައުލާ އާއި ޒާޔާ ވާހަކަ ދައްކަން ތިބީ އަތިރިމަތީގައެވެ.
“ހޫމް.” ޒާޔާ ދިނީ ފަރުވާކުޑަ ޖަވާބެކެވެ. ސަބަބަކީ ޝާރިފް ފޯނު ނުނަގާތީއެވެ. ކީއްވެ ހެއްޔެވެ؟ އެތަކެއް ސަތޭކަ ފަހަރު ގުޅިއްޖެއެވެ. އޮންލައިންގައި ވެސް އިންނަތާ ކޮންއިރެއް ހެއްޔެވެ؟
“ހާދަ ވައި ވެފަ؟” ޒާޔާ މަޑުމަޑުން އިންނަން ފެށުމުން ހައުލާ އަަހާލިއެވެ.
“ރޭގަ ނުނިދެޔޭ އެހާ ރަނގަޅަށް. އެހެންވެ ބޮލުގަ ރިއްސަނީ.” ޒާޔާ ހިނިތުންވެލީ ހައުލާ ކުރިމަތީގައި ހަމަޖެހޭގޮތް ދައްކާށެވެ. ކިޔަން ފަށައިފި އެއްޗެއް ހައުލާ ހުއްޓާނުލާނެކަން ޒާޔާއަށް އެނގެއެވެ. ހުރިހާ ކަމެއް އެނގި ސާފުވަންދެން ހައުލާގެ އަނގަ ހުއްޓައެއް ނުލާނެއެވެ. އެކިއެކި ވާހަކަތައް ދައްކަން ތިބެފައި ޒާޔާ އާއި ހައުލާ ގެޔަށް ދިޔައީ އިރުއޮއްސުނު ފަހުންނެވެ.

ރޭގަނޑުގެ އަރާމު ނިދިން މުޅި ދުނިޔެ ނިދާފައިވާއިރުވެސް ޒާޔާ އޮތީ ހޭލައެވެ. ޝާރިފްގެ ފޯނަށް ގުޅާލަ ގުޅާލައެވެ. ފޯނު ރިންގްވެ ކެނޑެމުންދާއިރު ވެސް ޝާރިފްގެ ފޯނަކަށް ޖަވާބެއް ނުދެއެވެ. ސަބަބު ނޭނގޭތީ ޒާޔާގެ ހިތަކަށް ހަމަޖެހުމެއް ނުލިބުނެވެ.
އެތަކެއް މެސެޖްތަކެއްވެސް ޒާޔާ ފޮނުވައިފިއެވެ. ނަމަވެސް އެއްވެސް ޖަވާބެއް ނުލިބުނެވެ.
އެގޮތަށް އެތައް އިރަކު އޮތުމަށްފަހު އެންމެ ފަހުން ޒާޔާ އަށް ނިދުނީއެވެ.
ހޭލެވުނުއިރު ފަތިސް ވެއްޖެއެވެ. ހޭލެވުނީވެސް ރާއިދު ގުޅީމައެވެ. ރާއިދު އާއި އިރުކޮޅަކު ވާހަކަ ދެއްކުމަށްފަހު ފޯނަށް އައިސްފައިވާ މެސެޖް ބަލާލި ތަނާ ޒާޔާގެ މަރުވެފައިވާ ހިތަށް އާ ދިރުމެއް ލިބުނު ކަހަލައެވެ. ޝާރިފްގެ ވެލެންޓައިންސް ޑޭ މެސެޖް ފެނިފައެވެ. ނަމަވެސް ޒާޔާ ހައިރާންވެސް ވިއެވެ. އެއްވެސް ފަހަރަކު ޝާރިފް ގުޅާލާފައި ނެތީމައެވެ.
އިތުރަށް ނުނިދޭނެ ކަން އެނގޭތީ ޒާޔާ ފޭސްބްކް ހުޅުވާލިއެވެ. ނިއުސްފީޑް ސްކްރޯލް ކުރަމުން ދިޔަ ޒާޔާގެ ހަރަކާތް ހުއްޓުނީ ލޮލަށް ފެންނަމުންދިޔަ ހަޤީޤަތް ޤަބޫލުކުރަން އުނދަގޫވެގެންނެވެ.

އެވަގުތު ލޯމައްޗަށް ސިފަވެގެން ދިޔައީ ޝާރިފްއާ ދިމާވި ރޭގައި އުޅެވިފައިވާ ލޯބި ގޮތްތަކެވެ. ޝާރިފް ދައްކާފައިވާ ލޯބި ވާހަކަތަކެވެ. ލޮލުން ފައިބަމުން ދިޔަ ކަރުނަތިކި ތަކާއެކު ޒާޔާ ފޯނު ނިއްވާލިއެވެ. އިތުރަށް އެނގޭކަށް އެއްޗެއްނެތެވެ. ޝާރިފްގެ ޚަބަރެއް ނުވީ ކީއްވެކަން އެނގި ހާމަވެ ނިމިއްޖެއެވެ. އިތުރަކަށް އެނގޭކަށް އެއްޗެއް ނެތެވެ. އިތުރަށް އެއްވެސް ކަމެއް އެނގޭކަށްވެސް ޒާޔާ ބޭނުމެއްނޫނެވެ.

ނުނިމޭ

ޝާރިފް ޒާޔާ ދެކެ އެއްވެސް ލޯތްބެއް ނުވާކަން ހިތާއި ސިކުނޑިއަށް ވިސްނައިދެމުން ދިޔައެވެ. ފޯނު ގަނޑު އަތުކޮޅަށް ނަގާ ހޫރާލަމުން ޒާޔާ ރޯންފެށިއެވެ. ކީއްވެ ހެއްޔެވެ؟ ޝާރިފް އެންމެ ރެއަކު ޒާޔާގެ ތަންމަތި ފަޅުފިލުވައިދިނުމުން ޝާރިފްއަކީ ޒާޔާގެ މީހަކަށް ވާނެ ހެއްޔެވެ؟ ދިލާ ފޭސްބްކްގައި ޝާރިފްއަށް ޝުކުރު އަދާކޮށްފައިވަނީ ‘ހާޓް ކޭކް’ އަކާއި އަދި ‘ހާޓް ފަށެއްގެ’ ފޮޓޯ ލާފައެވެ. ޒާޔާގެ އެއްވެސް ފޯނަކަށް ޝާރިފް ޖަވާބު ނުދިނީ އެހެންވެއެވެ. އެކަމަކު ޝާރިފް އެހެން ހަދަންވީ ކީއްވެ ހެއްޔެވެ؟ ޖަވާބު ނޭނގޭ ސުވާލުތަކުން ޒާޔާ ސިކުނޑިއަށް ކުރަމުންދާ ބާރު ކަރުނައިގެ ސިފައިގައި ދެލޮލުން ބޭރުވަމުންދެއެވެ. ޚުދު ޒާޔާގެ އަމިއްލަ ނަފުސު ވެސް ޒާޔާއަށް މަލާމަތްކުރާ ކަހަލައެވެ. ޝާރިފް ޒާޔާ ދެކެ ލޯބިވާ ކަމަށް ޒާޔާއަށް ހީކުރެވުނީމައެވެ.

އިރު އެރިއިރުވެސް ޒާޔާ އޮތީއެވެ. އެނދުގައި ބަންޑުން އޮށޯވެގެންނެވެ.
“ދަރިފުޅު ހޭލާތަ؟” ފާއިޒާ ދޮރުގައި ޓަކި ޖަހައިލިއެވެ. އަވަސް އަވަހަށް ދެލޯ ފޮހެލަމުން ޒާޔާ ގޮސް ދޮރުހުޅުވާލިއެވެ.
“ހޭލާދޯ ތިއުޅެނީ؟ ޒިޔަލް ވެސް ހޭލާތަ؟” ފާއިޒާ ކޮޓަރި ތެރެއަށް ބޯދިއްކޮށްލިއެވެ.
ޒާޔާ ބޯ ހޫރާލީ ނޫނެކޭ ބުނުމުގެ ގޮތުންނެވެ. އަނގައިގަވެސް ޒާޔާގެ ވަރު ނެތް ކަހަލައެވެ. އަރުބެދިގެން ގޮސް ޒާޔާ އަށް އިރުއިރުކޮޅާއި ހިންދިރުވާވެސް ލެވެއެވެ.
“މަންމަ މިދަނީ ސައިހަދަން. އިނގޭ.” ޒާޔާގެ ބޮލުގައި ފިރުމާލަމުން ފާއިޒާ ހިނިތުންވެލިއެވެ.

ފާޚާނާއަށް ވަދެ މޫނު ދޮވެލުމާއެކު ޒާޔާ ނިދާ ހެދުން ބަދަލުކޮށްލިއެވެ. މިއަދު ޒާޔާ ބޭރަށް ނިކުމެލާހިތް ވަނީއެވެ. އަބަދު ގޭގައި ހުންނަން ބޭނުން ޒާޔާ މިއަދު ތާޒާ ވަޔާއި އިރުގެ ހޫނުކަމުގެ އިޙްސާސް ކޮށްލާ ހިތްވަނީއެވެ.

ގޭގެ ބިއްދޮށުގައި އޮންނަ ރީތި ހިމުން ދޮންވެލިގަނޑު މަތީގައި ޒާޔާ ފައި ބީއްސާލިއެވެ. ލިބިގެން ދިޔަ ފިނި ކަމާއި އެކު ޒާޔާ ތުރުތުރުއަޅައިގަތް ނަމަވެސް ޒާޔާގެ ފިޔަވަޅު އެޅެމުންދިޔައީ ކުރިއަށެވެ. ހުސްފައިގައި ޒާޔާ ހިނގަމުން ދިޔައީ އެހާމެ މަޑުމަޑުންނެވެ. ފިކުރުތަކާއި ދުރުވަން ޒާޔާ އަބަދުވެސް އެތަނަށް އާދެއެވެ. ޝާރިފްގެ ޚިޔާލުތައް ހިތުން ފޮހެލަން ޒާޔާ އޭނާގެ އަމިއްލަ ހިތަށް ވިސްނައިދޭން މަސައްކަތް ކުރަނީއެވެ.

ކުއްލިއަކަށް ޒާޔާގެ ފިޔަވަޅު ހުއްޓުނީ އެންމެ ފުރަތަމަ ޝާރިފް އާއި ބައްދަލު ކުރި ތަނާއި އަރާއި ހަމަވުމުންނެވެ. ލޯމައްޗަށް ސިފަވެގެން ދިޔައީ އެރޭގެ ހާދިސާއެވެ. ޝާރިފްގެ ލޯބިވެތި ބެލުންތަކެވެ. ވާހަކަ ދެއްކި ލޯބި ގޮތެވެ. ޒާޔާގެ މޫނުމައްޗަށް ލުއިލުއި ހިނިތުންވުމެއް ވެރިވެގެން ދިޔައީ ބޭއިޚްތިޔާރުގަ އެވެ.
އެތައް އިރެއް ވާންދެން އެތަނުގައި ހުރުމަށްފަހު ގެޔާއި ދިމާއަށް ޒާޔާ މިސްރާބު ޖެހީ ޒިޔަލް މަތިން ހިތަށް އަރާފައެވެ. މިހާރު ޒިޔަލް ހޭލަފާނެތީއެވެ.

ވީވެސް އެހެންނެވެ. ޒާޔާ ގެޔަށް ދިޔައިރު ޒިޔަލް ހޭލައިގެން އިނީ ފާއިޒާގެ އުނގުގައެވެ.
“މަންމަ ޒިޔަލް ފެންވެސް ވަރުވާލީތަ؟” މަންމަގެ ރަނގަޅުކަމާއިމެދު ޒާޔާ އުފާވިއެވެ.
“އާން. ކާންވެސް ދީފިން.” ފާއިޒާ ޒިޔަލް ނަގައި ޒާޔާގެ އަތަށް ދިނެވެ.
“ދަރިފުޅު ދޭބަލަ ފިހާރައަކަށް ގޮއްސަ އަންނަން. ބައިސްކަލްގަ ދޭ. ތަންކޮޅެއް ދުރުގަ އެފިހާރަ ހުންނާނީ.” ފާއިޒާ ޖީބުން ނަގާ ވޮލެޓް ޒާޔާ އަތަށް ދިއްކޮށްލިއެވެ.
“އަދިވެސް ގަންނަންވީ ކޯޗެއް ކަމެއް ނުބުނަމެއްނު.” ފާއިޒާގެ ވާހަކަ ހުރިގޮތުން ޒާޔާގެ ކައިރިއަށް ހިނިއައެވެ.
“އާން. އެބުނާހެން. ބޮލުގަ ލާ ތެޔޮ ފުޅިއެއް. ރެޑް ކުލައިގެ މައްޗެއް ޖަހާފަ އިންނާނީ.” ފާއިޒާގެ ޖަވާބު އިވުމާއެކު ޒާޔާއަށް ހެވުނު ނަމަވެސް އަވަސް އަވަހަށް މަންމައަށް ފުރަގަސްދެމުން ޒާޔާ ބައިސްކަލަށް އަރާ ދުއްވާލިއެވެ.

މަގެއްގެ މަތިން ޝާރިފް ނުފެނޭތޯ ހިތާ ހިތުން ދުޢާ ކުރަމުން ގޮސް ޒާޔާ ބައިސްކަލްގައި ފިހާރައިގެ ދޮރު މައްޗަށް މަޑުކޮށްލިއެވެ.
ބައިސްކަލުން ފައިބަމުން ޒާޔާ ފިހާރަ ތެރެެއަށް ވަނީވެސް މަގުގެ ދެކޮޅު ރަނގަޅަށް ބަލާފައެވެ.
މަންމަ އެބުނި ރަތް މަތި ޖެހި ތެޔޮފުޅި ލޮލުގައި އަޅައިގަނޭތޯ ޒާޔާ ފިހާރައިގައި އެއްޗެހި ބަހައްޓާފައި ހުރި ހަރުގަނޑުތައް ބަލަމުން ދިޔައެވެ.
“އޭ ދިލާ. ކޮބާ ކޮންކަމެއް ކުރީ ވެލެންޓައިންސް ޑޭގަ؟” ޒާޔާގެ ކަންފަތުގައި ދިލާގެ ނަން ޖެހުމާއެކު ޒާޔާގެ ހިތް ބާރުބާރަށް ތެޅެން ފެށީ ކީއްވެކަމެއްވެސް ޒާޔާއަަކަށް ނޭނގުނެވެ. ނަމަވެސް ޒާޔާ ސަމާލުވެލީ ދިލާގެ ޖަވާބަކަށެވެ.
“ވަރަށް ސްޕެޝަލް ރޭގަ. ކޭކް ފަޅާ. ގިފްޓް ޝެއަރ ކޮށް. އިންސްޓާ ގްރާމް ޗެކް ކޮށްލަބަލަ. އޭރަށް ފެންނާނެ.” ދިލާގެ އަޑުގައިވާ ފޮނިކަން ޒާޔާގެ ހިތް ވަގުތުން ތޮރުފާލިއެވެ.
ތެޔޮ ފުޅި ކައުންޓަރުގައި ބެހެއްޓިއިރުވެސް ޒާޔާ ހުރީ އިސްޖަހައިގެންނެވެ. ދިލާ އާއި ވާހަކަ ދައްކަންވެސް ޒާޔާ ބޭނުމެއްނޫނެވެ. ޒާޔާ އަށް ހައްޤުވާ ޒާޔާގެ އުފާތަކުގައި ދިލާ ހުޅުޖެހީއެވެ. އަދި ޒާޔާގެ ހިތްމައްޗަށް ފައިން އަރައިގެން ހުންނައިރުވެސް ޒާޔާވީ ހެވިފައި ދިލާ އާއި ވާހަކަ ދައްކަން ހެއްޔެވެ؟ އެއީ ޒާޔާގެ ހިތް ޒާޔާއަށް ވިސްނައިދިން ގޮތެވެ.

“ޒާޔާ ކީއްތަ ކުރީ ރޭގަ؟” ދިލާ ހުރީ ޒާޔާގެ މޫނަށް ބަލަހައްޓައިގެންނެވެ. އެވަގުތު އިސްއުފުލާ ދިލާގެ މޫނަށް ޒާޔާއަށް ބަލައިލެވުނެވެ. އަހަރެންގެ އަރާމު ނިދިކޮޅު ފޭރިގެންފައި އަހަރެންގެ ހިތަށް ތަދުކޮށްފައި ކީއްކުރީހޭ އަހާނެ ކަމެއްނެތެވެ. ހިތުން ދިލާ އަށް އެތިވަރު ގޮވަމުން ދިޔަނަމަވެސް އެލަފްޒުތައް ދުލަކާއި ހަމައަކަށް ނައެވެ.
“ހަޒް ނެތޭ ރަށަކު.” ކުރު ޖަވާބެއް ދިނުމަށްފަހު ޒާޔާ އެފިހާރައިން އަވަސް އަވަހަށް ނިކުތެވެ. ޝާރިފް އާއި ދުވަހަކު ވާހަކަ ނުދައްކަން ހިތުގައި އަޒުމް ކަނޑައަޅައިގެންނެވެ.

އޭތް ޒާޔާ.” ގޭގެ ދޮރުމަތިން ޒާޔާ ހުއްޓުވީ ހައުލާ ގެ އަޑެވެ.
ހިތުގައި އެތަކެއް ވޭންތަކެއް އަޅަމުން ދިޔަނަމަވެސް ޒާޔާ ހައުލާ ގެ މޫނަށް ބަލައިލަމުން ހިނިތުންވެލިއެވެ.
“ތީ ކޯޗެއްތަ؟” ހައުލާގެ އަތުގައި އޮތް ކުޑަ ޕާރުސަލަށް ޒާޔާ އިޝާރާތް ކޮށްލިއެވެ.
“މީ ލޯބިވެރިންގެ ދުވަހުގެ ހަދިޔާ.” ހައުލާގެ ތުއި ރާގުންވެސް ދޭހަވަނީ ހައުލާ ހުރީ ނިކަން އުފަލުންކަމެވެ.
“މި ނުކަނޑާ މިއުޅެނީ އަދި ފޮޓޯ ނަގާފަ އެފްބީއަށް ލާންވެގެން. ހުރިހާ އެންމެންވެސް ކުރާ ކަމެއް ކުރަންވާނު.” ހައުލާ ގިފްޓް މައްޗަށް އެއްލާ ހިފަމުން ދިޔައެވެ. އެހާވެސް ހައުލާހުރީ އުފަލުންނެވެ.
“ދަނީ އިނގޭ. ފަހުން ދިމާވާނު.” ހަޤީޤަތުގައިވެސް ޒާޔާގެ ހިތް ކުދިކުދިވެއްޖެއެވެ. ކޮޓަރިއަށް ވަން ގޮތަށް އެނދު މައްޗަށް ވެއްޓި ޒާޔާ އަށް ރޮވެން ފެށުނެވެ. އެވަގުތު ޒާޔާގެ ފޯނުވެސް ރިންގްވާން ފެށިއެވެ. ބާލީސްދަށުގައި އޮތް ފޯނު ނަގާ ބަލައިލުމާއެކު ޒާޔާ ފޯނު ނަގައި އެނދުން ބޭރަށް ހޫރާލިއެވެ. ގުޅަނީ ޝާރިފް ކަމަށް ވާތީއެވެ. ދެން ޝާރިފް ގުޅަންވީ ކީއްކުރަން ހެއްޔެވެ؟ ގައިމު އެހާވަރަށް ޒާޔާ ގުޅިއިރު ފޯނު ނެގުން ޝާރިފް އަށް މުހިއްމު ނުވިއިރު ޒާޔާ ވަކި ޝާރިފްގެ ކޯލަށް ޖަވާބު ދޭންވީ ކީއްވެ ހެއްޔެވެ؟
ޒާޔާގެ ބަސްނާހާ ހިތް ޒާޔާ ކޮޅުކޮޅަށް އަނބުރަމުން ދިޔަ ނަމަވެސް އެންމެ ފަހުން ޒާޔާ ޝާރިފްގެ ކޯލަށް ޖަވާބު ދިނީއެވެ.
“ލޯބިވާ އަންހެނުންނާ އެކީ ލޯބިވެރިންގެ ދުވަސް ފާހަގަކޮށް ނިމުނީތަ؟” ފުރަތަމަ ފަހަރަށް ޒާޔާ ޝާރިފްގެ ކުރިމަތީގައި ހިތް ހަމަނުޖެހުން ފާޅުކުރިއެވެ.
“ހުން އައިސްގެން ނިދުނީ ރޭގަ. މިއަދު ވަރަށް ލަހުން ހޭލީވެސް.” ޒާޔާގެ ކުރިމަތީގައި ފެންނަން ހުރި ކަންތަކުގައިވެސް ޝާރިފް ދޮގު ހެދުމުން ޒާޔާވީ ހައިރާނެވެ.
“ވައިބަރ ބަލާބަލަ.” ޒާޔާ ފޯނު ކަނޑާލީ ޝާރިފްގެ ޖަވާބަކަށް އިންތިޒާރު ކުރުމެއްނެތިއެވެ.
ދިލާގެ އިންސްޓާ ޕޯސްޓް ސްކްރީން ޝޮޓް ނަގާލުމަށްފަހު ޒާޔާ ވަގުތުން ޝާރިފްއަށް ފޮނުވާލިއެވެ.
އެޔަށް ޖަވާބެއް ދޭން އެދޭ ކަމަަށްވެސް ބުނަމުންނެވެ.
ޝާރިފްގެ ޖަވާބަކަށްވީ ހަމަ ކުރީގެވެސް ޖަވާބެވެ. ޝާރިފް ދިލާއަށް އެއްވެސް އެއްޗެއް ނުދޭކަމެވެ. އެއްވެސް ކޭކެއްވެސް ނުގެންނަ ކަމެވެ. އެންމެ ފަހުން ޒާޔާ އެވާހަކަ މާގިނައިން ދައްކަން ފެށުމުން ޝާރިފް އަންނަން ފެށީ ރުޅިއެވެ. ޒާޔާ އެވާހަކަ ދައްކާ ކޮންމެ ފަހަރަކު ޝާރިފް ރުޅި އައިސްގެން ފޯނު ކަނޑާލަނީއެވެ.
ދެރަވި ނަމަވެސް ޒާޔާ އަށް ޝާރިފް ދެއްކި ވާހަކަ ޤަބޫލެއް ނުކުރެވުނެވެ. އެންމެ ފަހުން ޒާޔާ އޭނާގެ އަމިއްލަ ހިތަށް ވިސްނައިދިނީ އެވެ. އަޅާނުލުމަށެވެ. ޝާރިފްގެ އާ ކަމެއް އެދުވަހަށްފަހު ޒާޔާއަށް ދަސްވެއްޖެއެވެ. އެއީ ޝާރިފްގެ ރުޅިއެވެ. ރުޅިގަދަ ކަމެވެ. ހިތަށް އައިހާ އެއްޗެއް ގޮވާކަމެވެ.

ދުވަސްތައް މާޒީއާއި އެކުވެގެން ދިޔައެވެ. ޒާޔާ އާއި ޝާރިފްގެ ގުޅުން ދުވަހެއް ދުވަހަކަށް ދިޔައީ ބަދަހިވަމުންނެވެ. ޝާރިފް ޒާޔާއަށް ބިނާ ކޮށްދިން ހުވަފެނީ ގަނޑުވަރުގައި ޒާޔާ ދިޔައީ އެތަކެއް ކުލަތަކެއް ޖައްސަމުންނެވެ. އެ ގަނޑުވަރުގައި މާމެލާމެލީގެ ބަގީޗާއެއް ހައްދާ ޝާރިފްގެ ދެއަތުން އެމާތަކުގައި އެތަކެއް ކުލަތަކެއް ޖައްސައިދިނެވެ.

ހަމަ ހިމޭން އެދަންވަރުގައި ޒާޔާ ގެ މޫނުމަތިން ފާއްދާލި ހިނިތުންވުމާއެކު ޒާޔާ ކޮޓަރީގެ ދޮރު ހުޅުވާލިއެވެ. ކުރިމަތީގައި ހުރި ޝާރިފްގެ މޭތެރެއަށް ޒާޔާ ވަނީ ދުވެފައި ގޮހެވެ. ނަމަވެސް ޝާރިފް ޒާޔާ ދުރުކޮށްލަމުން ގޮސް އެނދުގައި އިށީނދެލިއެވެ.
“ކިހިނެއްވީތަ؟” ޝާރިފްގެ އެ އަމަލުން ޒާޔާގެ ހިތަށް ވީ ތަދެވެ. ޝާރިފް އާ ޖެހި ފިތިގެން ޒާޔާ އިށީނދެލީ ޝާރިފްގެ މޫނަށް ބަލަހައްޓައިގެން ހުރެއެވެ.
އިރުކޮޅެއްގެ ހިމޭންކަމަށްފަހު ޝާރިފް ޒާޔާއާއި ހަތަރު ކަޅި ހަމަކޮށްލިއެވެ.
“ދޮރު ހުޅުވަދީ. ދާން ވެއްޖެ.” ޝާރިފްގެ ހަރުކަށި ބަސްތައް ޒާޔާގެ ހިތަށް ތޫނު ޚަންޖަރެއް ހަރާލިފަދައެވެ. ނަމަވެސް ދެލޮލަށް ބޮޑިވެގަތް ކަރުނަތައް ހިފަހައްޓާލަމުން ޒާޔާ ތެދުވެ ހިނގައިގަތީ ދޮރާއި ދިމާއަށެވެ.
ތަޅު ހުޅުވާލަން ތަޅުގައި ޒާޔާ އަތް ޖައްސާލިތަނާ ކުއްލިއަކަށް ޝާރިފް ޒާޔާގެ އަތް ފުރަގަހަށް ގެނެސް ހިފަހައްޓާލިއެވެ. ވާނުވާ ނޭނގޭ ހާލު ޒާޔާގެ ހާސްކަންވީ އިތުރެވެ. ޝާރިފް އެހެންޏާ ނޫޅޭ ގޮތަކަށް އުޅޭތީއެވެ.
“ކީއްތަ ތިކުރަނީ؟ ކިހިނެއްތަ ތި ހަދަނީ.” ޒާޔާ އަށް ގުޑިވެސް ނުލެވުނެވެ. ޝާރިފް ހުރީ ޒާޔާއަށް އެއްވެސް ހަރަކާތެއް ނުކުރެވޭ ގޮތަށް ޒާޔާ ހައްޔަރުކޮށްލައިގެންނެވެ.
ނަމަވެސް ޖަވާބެއް ނާދެއެވެ.
ކުއްލިއަކަށް ފިނިފިނި އެއްޗެއް ޒާޔާގެ މޭގައި ޖެހުނުތަނާ ޒާޔާ އަށް ދެލޯ މަރާލެވުނެވެ. އަދި ހަމަ އެވަގުތު ޒާޔާ އޭނާގެ މެރިފައިވާ ދެލޯ ހުޅުވާވެސް ލިއެވެ.
“ހެޕީތަ؟” ޒާޔާގެ ކަންފަތާއި ކައިރިވެލަމުން ސިއްރު ސިއްރުން ޝާރިފް އަހާލިއެވެ.
ވީ އުފަލުން ޒާޔާގެ ދެލޮލުން ކަރުނަ ފާއްދާލިއެވެ. ޝާރިފް ހަށިގަނޑުގައި ޒާޔާ އޮޅުލައިގަތީ ޝާރިފްއާ ދުވަހަކު ވަކިނުވާން ހުވާ ކުރަމުންނެވެ. ޝާރިފްގެ ފަރާތުން ލިބުނު ފުރަތަމަ ހަދިޔާ ޒާޔާ ޤަބޫލުކުރީ އުފަލާއި އެކުގައެވެ. ދުވަހަކުވެސް ޒާޔާ އަކާއި އެފަށް ވަކި ނުކުރަން ޝާރިފް ކައިިރީ ޒާޔާ ވަޢުދުވިއެވެ.

ޝާރިފްގެ ލޯބި ފިރުމުންތަކުން އެތަކެއް އަރާމު ހޯދުމަށްފަހު ޒާޔާ އޮތީ ޝާރިފްގެ މޭތެރޭގައި މޫނު ފޮރުވައިގެންނެވެ.
“ލޯބިވޭ.” އިރުއިރުކޮޅާއި ޝާރިފް ޒާޔާގެ ތުންފަތުގައި ތުންފަތް ޖައްސާލައެވެ.
“ޝާރިފް. ތެދުވެބާ. ވިޝް އެއް ފުރިހަމަކޮށްލަން.” ޒާޔާ އޭނާގެ ފޭރާމެއް ނެތް ހަށިގަނޑުގައި ބެޑްސީޓް އޮޅާލިއެވެ.
ޒާޔާގެ ކޮންމެ އެދުމަކަށް ޝާރިފް ބޯލަނބަނީ އުފަލުންނެވެ.
ޝާރިފް ޒާޔާ ގެންގުޅެނީ ރާނީއެއް ހެންނެވެ.
ޝާރިފްގެ ދެފައިތިލަ މަތީގައި ޒާޔާގެ ފައިތަލަ ހަމަކޮށްލުމާއެކު ޝާރިފްގެ އަތް ޒާޔާގެ އުނަގަނޑުގައި ވަށާލިއެވެ.
“ދެން ހިނގާލަބަލަ.” ޝާރިފް ޒާޔާގެ ނިއްކުރީގައި ތުންފަތް ޖައްސާލުމާއެކު ޒާޔާ ހިނިތުންވެލިއެވެ.
ދަންވަރުގެ އެ ހަތަރު ގަޑިއިރު ވޭތުވެގެން ދާ ގޮތް ވެސް ޒާޔާ އާއި ޝާރިފްއަށް ނޭނގެއެވެ. އެކަކު އަނެކަކުގެ ލޯބީގައި މަސްތީ ދުނިޔެއަކަށް ގެއްލިފައި ތިބޭއިރު ދުނިޔޭގެ ހޭވެރިކަންވެސް ނުހުންނަނީއެވެ.

މަސް ދުވަސް ފަހެވެ. ހެނދުނު ޒާޔާއަށް ހޭލެވުނީ ރާއިދުގެ ކޯލަކުންނެވެ.
ނަމަވެސް ރާއިދުގެ ކޯލަށް ޖަވާބު ނުދީ ޒާޔާ ދުއްވައިގަތީ ފާހާނާއާއި ދިމާއަށެވެ. ޒާޔާ އަށް ފާހާނާއަށް ދެވުނީ ކިރިޔާއެވެ. ހޮޑުލެވިއްޖެއެވެ. އެތައް އިރަކު އެހާލުގައި އުޅުމަށްފަހު މޫނު ދޮވެލުމަށްފަހު ޒާޔާ ހިންދެމިލިއެވެ. މިހެން ވާންވީ ކީއްވެ ހެއްޔެވެ؟ ފާހާނާގެ ލޯގަނޑުން ފެންނަން ހުރި އަމިއްލަ ސޫރައަށް ޒާޔާ ބަލަހައްޓައިގެން ހުރެ ވިސްނަމުން ދިޔައެވެ.

ނުނިމޭ

ހިނިތުންވެލަމުން ޒާޔާ ބަނޑުގައި ފިރުމާލީ ދެލޯ މަރާލަމުންނެވެ. އާނއެކެވެ. ޝާރިފްގެ ފަރާތުން ލިބޭނެ އެންމެ އަގުބޮޑު ހަދިޔާ މިއަދު ޒާޔާއަށް ލިބުނީމައެވެ. މުޅި އުމުރު ދުވަހަށް ޝާރިފްގެ ހަނދާނެއް ޒާޔާ ކައިރީގައި ހުންނާނެތީއެވެ. ޔަޤީނެވެ. ޝާރިފް އުފަލުން ޒާޔާ އުރާލާނެވެ. އެ ޚިޔާލު ހިތަށް އައުމާއިއެކު ޒާޔާ ލަދުގަތެވެ. ޝާރިފް ޒާޔާ އުރާލާނެ ގޮތް ހިތަށް ސިފަކުރަމުންނެވެ. އަވަސް އަވަހަށް ޒާޔާ ފާހާނާއިން ނިކުތީ ޝާރިފްއަށް ގުޅާ އެ ޚަބަރު ދޭންވެގެންނެވެ. ފޯނާއި ދިމާއަށް ވެސް ޒާޔާއަށް ދެވުނީ ދުވެފައެވެ.

ނަމަވެސް ފޯނު ހުޅުވާލުމާއެކު ފުރަތަމަވެސް ޒާޔާގެ ލޮލުގައި އަޅައިގަތީ ރާއިދުގެ މިސްވެފަ އިން ކޯލެވެ. ރާއިދު މަތިން ޒާޔާ ހަނދާންވެސް ވީ ދެނެވެ. ރާއިދުއަށް އެނގިއްޖެއްޔާ ވާނީ ކިހިނެއް ހެއްޔެވެ؟ ރާއިދު އޮޅުވާލުމެއްގައި ބަހައްޓަންވީ ހެއްޔެވެ؟ އެކަން ސިއްރު ކުރެވޭނެ ހެއްޔެވެ؟ ކިހާ ދުވަހެއް ވަންދެން ހެއްޔެވެ؟
ޒާޔާ އަކީ ރާއިދުގެ ހައްޤެކެވެ. ޒާޔާގެ ސިކުނޑި ހާސްވަމުން ދިޔައީ އެކި ގޮތްގޮތަށް ވިސްނަން ފެށީމައެވެ. ސިކުނޑިއާއި ހިތް މުޅިން ޚިލާފެވެ. ޒާޔާގެ ހިތް ޒާޔާއަށް ވިސްނައިދެނީ ޒާޔާ އަކީ ހަމައެކަނި ޝާރިފްގެ މީހެއްކަމަށެވެ. އަދި ޝާރިފް އަކީވެސް ޒާޔާގެ މީހެކެވެ. ހަމައެކަނި ޒާޔާގެ އެވެ.
ފޯނު ނެގި ގޮތަށް ޒާޔާ ޝާރިފްގެ ނަމްބަރަށް ގުޅައިލިއެވެ. އެތައް ފަހަރަކު ގުޅި އިރުވެސް ފޯނަކަށް ޖަވާބެއް ނުދެއެވެ. ނިދާ ނުހޭލަނީ އޭ ހިތާ ޒާޔާ ފަހުން ގުޅަން މަޑުކޮށްލީއެވެ.

“މަންމީ.” ނިދާފައި އޮތް ޒިޔަލް ހޭލައިގެން ރޮއެގަތެވެ. ޒާޔާ ޒިޔަލް ކައިރީގައި އޮށޯވެލިއެވެ. އުފަލުން ހުރެއެވެ. ޔަޤީނެވެ. ޒާޔާ ބަނޑުބޮޑުކަން އެނގޭ އިރަށް ޝާރިފް އަދި ވަކިން ޒާޔާ ދެކެ ލޯބިވާނެއެވެ. މާބޮޑަށް އަޅައިލާނެ އެވެ. މިހާ އަވަހަށް ޒާޔާ ހޭލާ ހުރެ ހުވަފެން ބަލަން ފެށީއެވެ.
“ދަރިފުޅަށް ދޮންބެ ކިޔާނެ ކުޑަ ކުޑަ ދޫންޏެއް އަންނަން އުޅެނީނު.” ޒާޔާގެ ހެވި ދިލިފައި ހުރި މޫނަށް ޒިޔަލް ބަލަހައްޓައިގެން އޮތީ ކަޅިވެސް ޖަހައިނުލައެވެ.
ޒާޔާ ކިހާ މޮޔަ ހެއްޔެވެ؟ ޒިޔަލް އަށް އަދި އެކަހަލަ އެއްވެސް ވާހަކައެއް ނުވިސްނޭނެ ނޫން ހެއްޔެވެ؟ އެކަމަކު ޒާޔާގެ އެ އުފާ ހިއްސާކުރާނެ ކޮންމެވެސް މީހަކު ހުންނަން ޖެހޭނެ ނޫން ހެއްޔެވެ؟

“ކީއްވެތަ ގުޅީމަ ފޯނު ނުނަގަނީ؟” ކޮޓަރި ދޮރުހުޅުވާލާފައި ރާއިދު ވަތް ކަން ވެސް ޒާޔާއަށް އެނގުނީ ރާއިދުގެ އަޑުޖެހުނީމައެވެ.
ރާއިދުގެ ނުރުހިފައިވާ މޫނު ފެނިފައި ޒާޔާ އަވަސް އަވަހަށް އެނދުން ތެދުވިއެވެ.
“ކިހިނެއްތަ ވީ؟” ޒާޔާ ހިނގާފައި އައިސް ރާއިދުގެ ކުރިމައްޗަށް ހުއްޓުނެވެ.
“ކީއްވެތަ ޒާޔާ އެހާ ބަދަލުވެފަ ތިހުރީ؟ އަބަދުވެސް ޒާޔާގެ ފޯނު ބިޒީ. މިހާ ދުރުގަ ގޮއްސަ ހުންނަ އިރުވެސް ޒާޔާ އެންމެ ފަހަރަކުވެސް ގުޅާވެސް ނުލާ. ގުޅިޔަސް ފޯނު ނަގަނީ މަދުފަހަރަކު.” ހަޤީޤަތުގައިވެސް ރާއިދު ހުރީ ވަރަށް ދެރަވެފައެވެ. ޒާޔާއަށް ހުރެވުނީއެވެ. އިސްޖަހައިލައިގެންނެވެ. ދޭނެ ޖަވާބެއްވެސް ނޭނގިފައެވެ. ޒާޔާ ގަސްތުގައި ކުރާ ކަމެއް ނޫންކަން ރާއިދުއަށް ވިސްނައިދޭނީ ކިހިނެއް ހެއްޔެވެ؟ އަމިއްލަ ހިތަށް ބާރެއްނެތެވެ.
“ސޮރީ. ދެން އެހެން ނުވާނެ.” ޒާޔާ މާފަށްއެދުނެވެ. ރާއިދުގެ އެއްވެސް ސުވާލަކަށް ދޭނެ ޖަވާބެއްވެސް ނެތީއެވެ. ހަޤީޤަތް ހާމަކުރާނީ ކިހިނެއް ހެއްޔެވެ؟ ޒާޔާގެ ހިތުން އެހެން މީހަކަށް ޖާގައެއް ދެވުނު ވާހަކަ ބުނާނީވެސް ކޮން ލަފްޒަކުން ހެއްޔެވެ؟
“ހިނގާ މާލެ ބަދަލުވާން.” ރާއިދު ޒާޔާގެ އަތުގައި ހިފައި ގަޔާ ކައިރިކޮށްލިއެވެ.
“ކުއްލިއަކަށް ކީއްވެ ތިހެން ތިބުނީ؟” ޒާޔާ ރާއިދުގެ އަތު ތެރޭން އަތް މަޑުމަޑުން ދަމައިގަތެވެ.
“ޒާޔާ އާއި ޒިޔަލް މާލޭގަ އުޅޭނީ ދެން. އަހަރެން ދޭތެރެއިން ވިޒިޓް ކޮށްލާނަން.” ރާއިދު ޒާޔާގެ މޫނުގައި ދެއަތުން ހިފަހައްޓާލިއެވެ. ރާއިދު ބަލަން ހުރި ގޮތުން ރާއިދު އުޅުނީ ކީއްކުރަން ކަން ޒާޔާ ދެނެގަތެވެ.
“ރާއިދު. ޒިޔަލް އަށް ފެންނާނޭ. ހޭލައޭ އެ އޮތީ.” ރާއިދުގެ ބީހުމުން ޒާޔާ އަށް އެހާ އުނދަގޫވީ ކީއްވެބާއެވެ.
“ބޭބީ. ބަލާލަބަލަ ޒިޔަލް އަށް. އެ އޮތީ ނިދާފައި. ޒިޔަލް އަށް ވެސް އެނގޭނެއެއްނު ޒިޔަލްގެ ޑެޑީ މަންމިއާއި ދުރަގަ އެތައް ދުވަހަކު ހުރެފަކަން މިއައީ.” އެނދަށް އިޝާރާތްކޮށްލަމުން ރާއިދު ޒާޔާގެ މޫނާއި އިހުނަށްވުރެވެސް ކައިރިވެލިއެވެ. އެކަކުގެ ހޫނު ނޭވާ އަނެކަކަށް އިޙްސާސް ކުރެވޭހާ ކައިރިއަށެވެ.
ރާއިދު ހުއްޓުވަން ޒާޔާގެ ހިތް އެދެމުން ދިޔައިރުވެސް ޒާޔާއަށް ހުރެވުނީއެވެ. އަތްބެއްގެ ވާޖިބު އަދާކުރަން މަޖުބޫރެވެ.
ރާއިދުގެ މޫނަށް ޒާޔާ ބަލާލި ވަގުތު ރާއިދު އޭނާގެ ތުންފަތް ޒާޔާގެ ތުންފަތުގައި ޖައްސާލިއެވެ. އަދި ރާއިދުގެ ދެއަތުން ޒާޔާގެ ކޮލުގައި ބާރަށް ހިފަހައްޓާލިއެވެ. ދެލޯ މަރާލައިގެން ޒާޔާ ހުރީއެވެ. ލޯމައްޗަށް ސިފަވަމުން ދިޔައީ ޝާރިފްގެ ރީތި ސޫރައެވެ. އެ ހިތްގައިމު ތޫނު ބެލުމެވެ. ރާއިދުގެ ބީހުންތައް ޒާޔާގެ މުޅި ހަށިގަނޑު ހޫނުކޮށްލިއެވެ.
“ޒާޔާ.” ރާއިދު ގޮވާލިއެވެ. އަދި ޒާޔާ ލައިގެން ހުރި ޓީޝާޓްގެ ޒިބު ކަހާލަމުން ޒާޔާ ދެކޮނޑުން އެ ޓީޝާޓް ވައްޓާލުމާއެކު ޒާޔާ ރާއިދުގެ ދެއަތުގައި ހިފަހައްޓާލިއެވެ. ނަމަވެސް ރާއިދު ޒާޔާ ކޮނޑުގައި ހިފާ ކޮށްޕާލަމުން އެނދު މައްޗަށް ވައްޓާލިއެވެ.

“ރާއިދު. އަސްލުވެސް އަހަރެމެން މާލެ ފޮނުވާލަނީތަ؟ ކިހާ އެކަނިވާނެ.!” ޒާޔާ ބޯ އަޅާލައިގެން އޮތީ ރާއިދުގެ އަތްމަތީގައެވެ.
“އާން. ޒާޔާ ބުނަމެއްނު މިތާގައި ހުންނަ ހިތެއް ނުވެޔޭ.” ރާއިދު ޒާޔާގެ އިސްތަށިކޮޅާއި ކުޅެލަ ކުޅެލައި އޮތެވެ. ހަށިގަނޑަށް ލިބުނު ވަރުބަލިކަމާއިއެކު ރާއިދު އަދިވެސް އޮތީ މާނޭވާ ލެވިފައެވެ.
“މަންމަ މެން ބަދަލުވެއްޖެ މާލެއަށް އަނެއްކާވެސް. ޒާޔާ ހުންނާނީ މަންމައާއި ބައްޕަ ކައިރީގައި.” ޒާޔާ އެއްވެސް އެއްޗެއް ނުބުނުމުން އަނެއްކާވެސް ވާހަކަ ދެއްކީ ރާއިދުއެވެ.
“އެކަމަކު.” ރާއިދު ޒާޔާގެ ތުންފަތުގައި އިނގިލި ޖައްސާލަމުން ޒާޔާ ހިމޭންކޮށްލިއެވެ.
“މީ މަގޭ ފަހުގެ ނިންމުން..” ރާއިދުގެ ހަރުކަށި ރާގުން ޒާޔާ އަކަށް އިތުރަކަށް ވާހަކައެއް ނުދެއްކުނެވެ.

ޒިޔަލް އަތުގައި ހިފައިގެން މެންދުރުގެ ގަދަ ހޫނުގައި ޒާޔާ ހިނގައިގަތީ ގޭގެ ކުރިމަތީގައި އޮންނަ ބީޗާއި ދިމާއަށެވެ. އެވަގުތު ޝާރިފްވެސް ސައިކަލްގައި އެހާ ހިސާބަށް އަރާ ހަމަވަނީއެވެ. ޝާރިފް ހަދިޔާ ކޮށްލި ހިތްގައިމު ހިނިތުންވުމާއެކު ޒާޔާއަށް އިސްޖަހައިލެވުނެވެ.
ނޭނގެނީ ސަބަބެވެ. އެކަނި ތިބޭއިރު ޒާޔާ އަށް ޝާރިފް އާއި ވާހަކަ ދައްކާ ބަލަހައްޓައިގެން ހުންނަންވެސް ކެރެއެވެ. އެކަމަކު މީހުންގެ ކުރިމަތީގައި ޒާޔާއަށް އިސްޖަހައިލެވެނީއެވެ.
“ހީލާފާ ހިތް މަގޭ ހިފައިގެން ތިދަނީ.” ސިއްރު ސިއްރުން ހިތުގައި ހުރި ލަފްޒުތައް ޒާޔާ ދުލާއި ހަމައަށް ގެނައެވެ. ޖެހެމުންދާ ހިތްގައިމު ވައިރޯޅި މެދުވެރިކޮށް ޝާރިފްއަށް އެ މެސެޖް ރައްދު ކޮށްދޭން ޒާޔާ ބޭނުންވާ ކަހަލައެވެ.
އިރުކޮޅެއްވެސް ނުވެއެވެ. ޝާރިފް ޒާޔާގެ ފޯނަށް ގުޅައިފިއެވެ. އެންމެ ރިންގަކުން ޒާޔާ ފޯނަށް ޖަވާބު ދިނެވެ.
“ހާދަ ޓައިމިން ރަނގަޅޭ ދޯ. ކިހިނެއް ޝާރިފްއަށް އެނގުނީ އަހަރެން މިގަޑީގަ ނިކުންނާނެ ކަމެއް.” ޒާޔާ ވާހަކަ ދެއްކީ އުފަލުން ހުރެއެވެ.
“އެއީ ލޯބިވާތީ.” އަބަދުވެސް ޝާރިފްގެ ދުލުކުރީގައި އިންނަނީ އެއް ޖަވާބެކެވެ.
“އަހަރެން ބަނޑުބޮޑު.” އިރުކޮޅެއްގެ ހިމޭންކަމަށްފަހު ޒާޔާ ބުނެލިއެވެ.
“ކީކޭ؟” ޝާރިފްއަށް ލިބުނީ ޝޮކެކެވެ.
“ޝާރިފްގެ މި ހަނދާން އަހަރެން ބޭނުން.” ޒާޔާ ހުރީ މާކުރިން ގޮތް ނިންމައިގެންނެވެ.
“ޒާޔާ ބޭނުންގޮތެއް. އެކަމަކު މަށަށް މައްސަލައަކީ މަގޭ ދަރިއަކަށް މަށަށް ލޯބި ނުދެވޭނެތީ. އެހެން ވާކަށް މަށެއް ބޭނުމެއް ނޫން.” ޝާރިފްގެ ޖަވާބުން ޒާޔާ ހިތްހަމަނުޖެހުނެވެ.
“ތީ ކޮންކަހަލަ ޖަވާބެއްތަ؟ ޝާރިފް ތިބުނީ ދިލާ ދޫކޮށެއް ނުލެވޭނޭތަ؟ މި ދަރި ބޭނުމެއް ނޫނޭތަ؟” ޒާޔާ ދެރަވީ ޝާރިފްގެ ޖަވާބު އިވިފައެވެ.
“އެހެނެއް ނުބުނަމެއްނު. މި ބުނީ ދިލާގެ ކުށެއްނެތި ދޫކޮށެއް ނުލެވޭނޭ.” ޝާރިފް މަސައްކަތް ކުރީ ޒާޔާ އަށް ވިސްނައިދޭށެވެ. އެކަމަކު ޒާޔާއަށް މިހާރު ވިސްނެން ހުރި ވަރަކަށް ވިސްނި ނިމިއްޖެއެވެ. ޝާރިފްއަށް މުހިއްމުވީ ދިލާ އެވެ. ޒާޔާ އެއް ނޫނެވެ. ޝާރިފްގެ ނުއުފުންނަ ދަރިއެއްވެސް ނޫނެވެ. ޒާޔާ ފޯނު ކަނޑާލީ އިންތިހާއަށް ދެރަވެގެންނެވެ. އެތައް ފަހަރަކު ޝާރިފް ގުޅިއިރުވެސް ޒާޔާ ފޯނަކަށް ޖަވާބެއް ނުދިނެވެ.
ޒާޔާ ދެން ޝާރިފް އާ ދުރަށް ދާނީއެވެ. މުޅި އުމުރަށެވެ. ޒާޔާ ޝާރިފް އަށް ދިން ލޯބީގެ އެއްވެސް އަގެއްނެތެވެ.

ފަތިހުގެ ފިިނި ރޯޅިއެއް ޒާޔާގެ އުދާސްވެފައިވާ މޫނުގައި ފިރުމާލިއެވެ. ކޮނޑުގައި ދަބަސް އަޅުވާލައިގެން ޒިޔަލްގެ އަތުގައި ހިފައިގެން ޒާޔާ ފުރީ އެއާޕޯޓަށެވެ. ޖެޓީ އިން ލޯންޗް ނައްޓައިލުމާއެކު ޒާޔާ އަމިއްލަ ރަށާއި ދިމާއަށް އެންމެ ފަހު ފަހަރަށް ބަލައިލިއެވެ. އެވަގުތުވެސް ދެލޯ މަރާލުމާއެކު ޒާޔާގެ ލޮލަށް ސިފަވެގެން ދިޔައީ ޝާރިފް އެވެ. އެ ލޯބި ފިރުމުންތަކެވެ. އެކުގައި ހޭދަކޮށްފައިވާ އުފާވެރި ވަގުތުތަކެވެ.
“ޝާރިފް.” ޝާރިފްގެ ނަން ދުލާއި ހަމައަށް އައީ ބޭއިޚްތިޔާރުގައެވެ. ހިތަށް ކުރަމުން ދިޔަ ފުން އަސަރުތަކުންނެވެ. ޝާރިފްއަށް ޒާޔާ ދާކަން ނުވެސް އެނގޭނެއެވެ. އެކަމަކުވެސް ކީއް ހެއްޔެވެ؟ ޒާޔާ ދިޔަޔަސް ޝާރިފް އަށް މައްސަލައަކަށް ނުވާނެއެވެ. ޒާޔާ އަކީ ހަމައެކަނި ކުޑަ ވަގުތުކޮޅަކަށް ޝާރިފްގެ ހަޔާތަށް އައި މެހެމާނެކެވެ. މިއަދު ޒާޔާއަށް ޝާރިފް ގެ އަޅާލުމާއި ލޯބި ނުލިބުނީ ކައިވެނީގެ ސެޓްފިކެޓް ނެތީމައެވެ. ލޯބިވާނަމަ ޝާރިފް ޒާޔާ އާއި ޝާރިފްގެ ދަރިފުޅަށް އަމިއްލަ ނަން ދޭނެއެވެ. ޒާޔާ އާ ނުލާ ނޫޅެވޭނަމަ ޝާރިފް އަށް އެންމެންނަށް ވުރެ ޒާޔާ މުހިއްމު ވާނެއެވެ.
ފްލައިޓް ނައްޓައިލުމާއެކު ދެލޮލުގައި ހިފަހައްޓާފައި ހުރި ކަރުނަތައް އޮހިގަތީ ޒާޔާގެ އެއްވެސް އިޚްތިޔާރަކާ ނުލައެވެ. ޒިޔަލްގެ އަތުގައި ޒާޔާއަށް ބާރަށް ހިފަހައްޓާލެވުނެވެ. މުޅި އުމުރަށް ހިތާމަ ކުރަން ޝާރިފް ޒާޔާއަށް ޖައްސައިފިއެވެ. ޒާޔާގެ ހިތް ފިސްފިސް ކުރަމުންނެވެ.

“ގޭގަތަ؟” ނިދިފައި އޮތް ޒާޔާ އަށް ހޭލެވުނީ ރާއިދު ގުޅީމައެވެ.
“ގަޑިން ކިހާއިރެއްތަ؟” ޒާޔާ އަށް ފުރަތަމަވެސް އަހާލެވުނެވެ.
“އިރުއޮއްސެނީ. ކޮބާތަ ޒިޔަލް.؟” ރާއިދު ހުރީ ޒާޔާ ދިޔައިމަ ދެރަވެފައި ކަން ރާއިދުގެ އަޑުންވެސް އެނގެއެވެ.
“މަންމަ ކައިރީގައި. ފަހުން ގުޅާނަން.” ޒާޔާ ފޯނު ބޭއްވީ ޝާރިފްގެ ކޯލެއް އަންނާތީއެވެ.
ނަމަވެސް ޒާޔާ އެފޯނަކަށް ޖަވާބުދޭކަށް ބޭނުމެއްނޫނެވެ. މިހާރު ޝާރިފް ޒާޔާ އާ ދައްކަން ޖެހޭ ވާހަކައެއް ނޯންނާނެއެވެ. ފިކުރު ތަކުން ފޯވުމާއެކު ޒާޔާގެ ދެލޯ އަނެއްކާވެސް ފެންކަޅި ވެއްޖެއެވެ.

މާބަލް ހޮޓެލްގެ ހިތްގައިމު މާހައުލެވެ. އިވެމުންދިޔަ މަޑު މިޔުޒިކުން މުޅި ތަނަށް އިތުރު ހިތްގައިމު ކަމެއް ގެނެސްދެމުން ދިޔައެވެ.
“ޒާޔާ. ތިހެން ނުވިސްނަބަލަ އެހާވަރަށް. ހަނދާންނައްތާލަބަލަ އެކަންތައްތައް.” ޒާޔާ އާއި ޒާޔާގެ އެންމެ ގާތް އެކުވެރި ސަމާ ތިބީ މާބަލް ހޮޓެލްގެ ޓެރަސްގައެވެ.
“ސަމާ. ތިކަމެއް ނުވާނެ. އޭނަ މަތިން ދުވަހަކުވެސް.-” ޒާޔާ ބުނަން އުޅުނު ޖުމްލަ ފުރިހަމައެއް ނުކުރެވުނެވެ. ކުރިމަތިން ފެންނަމުން ދިޔަ މަންޒަރު ޤަބޫލުކުރަން ދަތިވީއެވެ.
“ސަޕްރައިޒް ވެއްޖެދޯ. އަހަރެން ހަމަ ޖެއްސީ. އިނގޭ ޒާޔާއަށް މިވަގުތަށް މުހިއްމު ވާނެކަން.”. ސަމާ ހިނިތުންވެލަމުން ޒާޔާގެ އަތްމަތީގައި އަތް ބާއްވާލިއެވެ.
“އެކަމަކު އައިމަން ކީއްވެ؟” ޒާޔާ ހެވިފައި ހުރި އައިމަންގެ މޫނަށް ބަލަހައްޓައިގެން ހުއްޓެވެ.
“ރާއިދުއާ އިނދެގެން އުޅުނަސް މަށަށް އިނގޭ އަދިވެސް ޒާޔާ އައިމަން ދެކެ ލޯބިވާކަން.”
ސަމާ ހަނދާން ކުރީ ޒާޔާގެ މާޒީއެވެ.
ޒާޔާ އެއްވެސް އެއްޗެއް ނުބުނެއެވެ. އިސްޖަހާލައިގެން ހުރީއެވެ.
“އޯކޭ. ސޮރީ. އައިމަން އަށް ޓްރަސްޓް ކުރާތީ އެއްޗެއް ހިފައިގެން އޭނަ މިތަނަށް މިގެނައީ.” ޒާޔާގެ މޫޑް ހުރިގޮތުން ޒާޔާ ހިތްހަމަ ނުޖެހުނީކަން ސަމާ ދެނެގަތެވެ.
ސީ. ވިސްކީ. ޒާޔާގެ ފެވަރިޓް.” ސަމާ އައިމަން އަތުން ފުޅި އަތުލައިގެން ޒާޔާގެ ކުރިމަތީގައި ބެހެއްޓިއެވެ.
އޭރުވެސް އައިމަން ކަޅި ޖަހާނުލާ ބަލަމުންދިޔައީ ޒާޔާގެ މޫނަށެވެ.
“ޒާޔާ. މަށާ ރުޅިތަ؟ މިހާ ދުވަސްކޮށްފަ ދިމާވީމަވެސް ހާލުވެސް އަހާނުލާނަންތަ؟” އައިމަން ޒާޔާއާއި ޖެހިގެން ހުރި ގޮޑީގައި އިށީނެވެ.
“މަގޭ ނަމްބަރުވެސް ބްލޮކް ކޮށްފަ ދޯ އިންނަނީ.” އައިމަން އެތައް ވާހަކައެއް ދެއްކި ކަމުގައި ވިޔަސް ޒާޔާ އައިމަން އަށް ބަލައިވެސް ނުލިއެވެ.
“ސަމާ. ޒިޔަލް ހޭލަން އުޅޭނެ. ތޭންކްސް ތިވަރަށް މަށާއި ދޭތެރޭ ވިސްނީތީ. މީގެއިން މަށަށް ދީބަލަ.” ޒާޔާ ވާހަކަ ދެއްކީ އަތް ދަބަސް ހާވަމުންނެވެ.
އައިމަން ދިއްކޮށްލީ ކުޑަ ފެން ފުޅިއެކެވެ. ޒާޔާ ބަލާލީ ސުވާލުގެ ނަޒަރަކުންނެވެ.
“މަށަށް ޒާޔާ އިނގެޔޭ. މީ ޒާޔާއަށް. ހަމަ ވިސްކީ.” އައިމަން ހިނިތުންވެލިއެވެ. އައިމަން އަށް އިނގެއެވެ. ޒާޔާ ދުވަހަކުވެސް ޕަބްލިކްގައި އެކަހަލަ ކަމެއް ނުކުރާނެކަމެވެ. އަދި މީހަކާއެކީ ވެސް ނުކުރާނެއެވެ. އަދި ޚާއްސަކޮށް އައިމަން އެތާ ހުއްޓައެވެ.
ސަމާ ކައިރީ ދަނީއޭ ބުނަމުން ޒާޔާ ތެދުވިއެވެ. ލިފްޓާއި ހަމައަށް ގޮސްފައި ޒާޔާ ފަހަތަށް އެނބުރިލީ ފަހަތުން އައިމަން އަންނަކަން އެނގޭތީއެވެ.
ޒާޔާ އެނބުރުނީ ރުޅި އައިސްފައި ހުރެއެވެ.
ނަމަވެސް ޒާޔާ އަށް ސިހިފައި ފަހަތަށް ޖެހެވުނީ އައިމަން ހުރީ ވަރަށް ކައިރީގައި ކަމަށްވާތީއެވެ. ފަހަތަށް ޖެހެމުން ގޮސް ޒާޔާ ލައްވީ ފާރުގައެވެ.
“ތި ދެން ކޮން ކަމެއް؟” ޒާޔާ ރުޅިއައެވެ. އައިމަން އުޅޭގޮތުންނެވެ.
“އިނގޭ މީހެއްގެ ހައްޤެއްކަން. އެކަމަކު ތި މޫނުމަތީގައި އުފާވެރިކަމެއް ނެތެއްނު.” އައިމަން ވާހަކަ ދެއްކީ ސީދާ ޒާޔާގެ ލޮލަށް ބަލަން ހުރެއެވެ.
“ކާކު ބުނީ؟ އަހަރެން ހަމަ ހެޕީ.” ޒާޔާ އިސްޖަހައިލިއެވެ.
“އެއީ ކާކު؟ މަށަށް ހަތަރުއަހަރުން ނުވިކަމެއް ކުޑަ ދުވަސްކޮޅެއް ތެރޭގައި ކުރީ.” އައިމަން ފުން ނޭވާއެއް ދޫކޮށްލަމުން ޒާޔާ އަށް ފުރަގަސްދިނެވެ.
ޒާޔާއަށް ޔަޤީންވެއްޖެއެވެ. ސަމާ އައިމަން ކައިރީގައި ހުރިހާ ވާހަކަތަކެއް ކިޔާދިނީއެވެ. ސަމާ ދެކެ ޒާޔާ ހިތްހަމަ ނުޖެހުނެވެ. އައިމަން އަކީ ސަމާގެ ބޭބެ ކަމުގައި ވިޔަސް ޒާޔާގެ ސިއްރު ސަމާ ހިފަހައްޓަން ޖެހޭނެއެއްނޫން ހެއްޔެވެ.
“އެ މީހަކު ޒާޔާދެކެ ލޯބި ނުވިޔަސް އަހަރެން ޒާޔާ ދެކެ ލޯބިވެޔޭ. އަދިވެސް” އައިމަން މަސައްކަތް ކުރީ ޒާޔާގެ އަތުގައި ހިފާށެވެ. ނަމަވެސް ޒާޔާ ހުރީ އެފަދަ ކަމަކަށް ވިސްނައިގެން ކަމުން ޒާޔާ އެއްކައިރިއަށް ޖެހިލީ ހުޝިޔާރުކަމާއި އެކީގައެވެ.
ދެލޯ އަޅާލަމުން ޒާޔާ ލިފްޓް ތެރެއަށް ދެމިގަތެވެ. އައިމަން ދެކެ ޒާޔާ ވާ ފޫހިންނެވެ.

އިރުއަރައިގެން ގޮސް އޮއްސުންވެސް މިހާރު ޒާޔާ އަށް ލަހެވެ. އެއްދުވަސް ވެސް ހީވަނީ އެއް އަހަރު ދުވަސް ހެންނެވެ.

އެއް ރެއެވެ. ޒާޔާ ފޭސްބްކް ނިއުސްފީޑް ބަލަމުން ދިޔައީ ކުރާނެ މާބޮޑު ކަމެއް ނެތީމައެވެ. ޒިޔަލްވެސް އެހެން ރޭ ރެޔާއި ޚިލާފަށް ވަރަށް އަވަހަށް ނިދައިފިއެވެ. އެއްއަތުގައި ފޯނު އޮތް އިރު ޒާޔާގެ އަނެއް އަތުން ހިފަހައްޓައިގެން އިން ވިސްކީ ތައްޓަކީ ޝާރިފްއާއި ދުރުގަ ހުރުމަށް ޒާޔާ ބޭނުން ކުރާ ހަތިޔާރެވެ.
ދިލާއާއި ޝާރިފް އެކުގައި އެހާ ގާތުގައި ނަގާފައި އިން ދިލާގެ ޕްރޮފައިލް ފޮޓޯ ޒާޔާގެ ލޮލުގައި އަޅައިގަތެވެ. މިހާ އުފަލުގައި އުޅޭއިރު މަށަށް ގުޅަނީ ކީއްކުރަން ހެއްޔެވެ؟
ކޮންފަދަ ދެއްކުންތެރިކަމެއް ހެއްޔެވެ؟
ދޮރުގައި މީހަކު ޓަކި ޖަހާލީ އެވަގުތުއެވެ. ޒާޔާ ހުރީ ދޮރު ހުޅުވަން ފަސްޖެހިފައެވެ. ޚުދު އަމިއްލަ މީހާ މަސްތުގެ ހާލަތުގައި ހުރީމައެވެ.
ހަދާނެ ގޮތަކާއި މެދު ވިސްނަން ހުއްޓާ ފޯނަށް އައީ މެސެޖްއެކެވެ. ސަމާ ގެ އެވެ.
ޒާޔާ ބާރުބާރަށް ގޮސް ދޮރު ހުޅުވިއެވެ.
“ކޮބާ ބޭސްތައް؟” ޒާޔާ އަހާލީ ސިއްރު ސިއްރުންނެވެ.
“އިންޖެކްޝަންއޭ ގެނައީ.” ސަމާ ޒާޔާއަށް ދިއްކޮށްލީ ކަރުދާސް ކޮތަޅެކެވެ.
“އަޅޭ.” ޒާޔާ އެކޮތަޅުގައި ހިފީ ފަސްޖެހިފައި ހުރެއެވެ.
ސަމާ ދިޔުމުން ޒާޔާ ދޮރުތަޅުލިއެވެ. ކޮތަޅުން އިންޖެކްޝަން ނަގަމުން ޒާޔާ ދެލޯ މަރާލިއިރު މުޅި މީހާ ހުރީ ހާސްވެ ދާހިތްލާ ފޯވެފައެވެ.

ނުނިމޭ

އަތުގައި އޮތް އިންޖެކްޝަން އަށް ބަލަން ޒާޔާ އެތައް އިރެއް ވަންދެން އެނދުމަތީގައި އިނދެވުނެވެ. އިރުއިރުކޮޅާއި ބަނޑުގައި ފިރުމާލައެވެ. ޝާރިފްގެ އެލޯބި ޒާޔާގެ ދެއަތުން ހަމަ ނައްތާލަންވީ ހެއްޔެވެ؟ ޒާޔާގެ ހިތުން ޝާރިފްދެކެ ވީ ލޯބީގެ ބަދަލު ލިބެން ޖެހެނީ  މިގޮތަށް ހެއްޔެވެ؟ އެދަރިފުޅު ޝާރިފަަށް މުހިއްމު ނުވާންވީ ކީއްވެ ހެއްޔެވެ؟ މީ ކޮންކަހަލަ ލޯތްބެއް ހެއްޔެވެ؟ ލޯބީގެ ބަގީޗާއަށް މަލެއް ފަރިވެ ފޮޅުމަކީ ލޯބިވެރިންގެ އެންމެ ބޮޑު އުފަލެވެ. ހިތްހަމަޖެހުމެވެ. ވީ އިރު ޝާރިފް އުފާ ނުވާންވީ ކީއްވެ ހެއްޔެވެ؟ ސިކުނޑި އަށް ވެރިވަމުން ދިޔަ ނުތަނަވަސް ޚިޔާލުތަކުން ޒާޔާއަށް ބޮލުގައި ހިފަހައްޓާލެވުނެވެ. އެވަގުތު ބިންމަތީގައި ވެއްޓިފައި އޮތް އަތް ދަބަސް ޒާޔާގެ ލޮލުގައި އަޅައިގަތެވެ. އޭގެ ތެރޭގައި ޒާޔާގެ ވަގުތީ ހިތްހަމަ ޖެހުމުގެ އަސްލު އޮތްކަން ހަނދާންވީ ދެނެވެ.

ކުޑަ ހިނދުކޮޅެއްގެ ތެރޭގައި ޒާޔާގެ ހުރިހާ ފިކުރުތަކާއި ޚިޔާލުތަކުން ދުރުވެލެވުނެވެ. ނަމަވެސް ލޯމަތިން ހަމައެކަނި ސިފަވަނީ ޝާރިފްގެ ހިތްގައިމު ހިނިތުންވުމެވެ. އެންމެ ފަހުން ޝާރިފްއާއި އޭނާގެ ފަރާތުން ލިބުނު ހަދިޔާގައިވެސް ޒާޔާ ނިމުމުގެ ސިއްކަ ޖަހައިފިއެވެ. ދެލޮލުން ކަރުނަ އޮހެމުން ދިޔަ ނަމަވެސް ޒާޔާގެ ތުންފަތަށް ވެރިވެފައިވަނީ ހިނިތުންވުމެކެވެ. ހަށިގަނޑުގައި އަޅަމުންދިޔަ ވޭނުގެ އެއްވެސް އިޙްސާސެއްވެސް ޒާޔާއަށް ނުކުރެވޭ ކަހަލައެވެ. މަސްތުކަމުން ހަށިގަނޑު ފޯކޮށްލައިގެން ޒާޔާ އެނދުމަތީގައި ހަށިގަނޑު ދަމާލަމުން ދެލޯ މަރާލިއެވެ. އެވަގުތުވެސް ލޯމަތީގައި ސިފަވަމުން ދިޔައީ ޝާރިފް އެވެ. ކަންފަތުގައި ހަރުލާފައިވަނީ  ޝާރިފްގެ ދުލުން ބޭރުކޮށްފައިވާ ލޯބިވެތި ލަފްޒުތަކެވެ.

ޒިޔަލް ރޯއަޑު މުޅި ގޭތެރޭގައި ގުގުމަމުން ދިޔައިރު ނައީމާ ހުއްޓާނުލާ ދިޔައީ ޒާޔާގެ ކޮޓަރީގެ ދޮރުގައި ޖަހަމުންނެވެ. އެތައް ގަޑި އިރެއް ވީއިރުވެސް ޒާޔާއަށް ރޭކާވެސް ނުލައެވެ. ލެއިން ތަތް ތެޅިފައި އޮތް ހަށިގަނޑުގައި ވޭން އަޅަމުންދާކަން އިޙްސާސް ނުވާއިރު ދޮރު ފަތް ވެއްޓޭ ވަރަށް ޖެހި ކަމުގައިވިޔަސް ޒާޔާއަށް ނޭނގޭނެ ނޫން ހެއްޔެވެ.

އެންމެ ފަހުން ރާއިދުގެ ބައްޕަ އަޙްމަދު ތަޅު ހަލާކުކޮށްލައިގެން އެތެރެއަށްވަނީއެވެ.

“ނައީމާ. އެސޮރު ނަގާބަލަ އަވަހަށް. ކޮން ވަހެއްތަ މިތަނުން މިދުވަނީ.” ތަރުތީބު ގެއްލިފައިވާ އެކޮޓަރި ތެރެއަށް ނަޒަރު ހިންގާލަމުން އަޙްމަދަށް ނޭފަތުގައި ހިފަހައްޓާލެވުނެވެ.

“ޒާޔާއަށް ކިހިނެއްވެފަތަ އެއޮތީ؟” ނައީމާ ޒިޔަލް އުރާލައިގެން ހުރެ ޒާޔާގެ ފައިގައި ހިފައި ތަޅުވައިގަތެވެ.

އެވަގުތަކީ މަޑުމަޑުން ޒާޔާ ދެލޯ ހުޅުވާލި ވަގުތެވެ. ބޮލަށް ބަރުވެފައި ވުމާއެކު ޒާޔާގެ ހަށިގަނޑަށް އެއްވެސް ހަރަކާތެއް ގެނައުން ޒާޔާއަށް ވީ އުނދަގޫކަމަކަށެވެ.

“ޔާރައްބީ. މީ ކޮންހާ ލެއެއް؟” ނައީމާ އަށް އަނގަމަތީގައި އަތް އަޅާލެވުނީ ބޭއިޚްތިޔާރުގައެވެ.

ޒާޔާގެ ޖަވާބެއް ނުލިބުނަސް އެއީ ކޯޗެއްކަން ނައީމާއަކަށް އޮޅިފައެއް ނެތެވެ.

“އަޙްމަދު ގުޅާބަލަ އެމްބިޔުލެންސަށް. މަ މިގުޅަނީ ރާއިދުއަށް. މި ވަރު ވާއިރުވެސް އަހަރެމެންނަށް އަޅެ އެނގެން ނުޖެހެނީތަ؟” ނައީމާ ހިތްހަމަ ނުޖެހުނު ވަރުން ހަޅޭލަވައިގަތެވެ.

ދެން ވާނީ ކިހިނެއްބާ އޭ ހިތަށް އަރާފައި ޒާޔާގެ ހިތް ތެޅެންފެށިއެވެ. ރާއިދުއަށް ވުރެ ބޮޑަށް އޭނާ ވިސްނަމުން ދިޔައީ ޑޮކްޓަރަށް ގެންދިޔައީމާ ވާނީ ކިހިނެއްބާއޭ ހިތަށް އަރާފަ އެވެ. މަސްތުގެ ހާލަތުގައި ހުރިކަން އެއްވެސް މީހަކަށް އެނގޭކަށް ޒާޔާ ބޭނުމެއްވެސް ނޫނެވެ.

“މަ އޯކޭ އޭ. މަންމަ މެން ނިކުމެބަލަ. އަހަރެން އެއްޗެހި ބަދަލުކޮށްލާނަން. އެމްބިޔުލެންސަށް ގުޅާހާ އަހަރެން ބައްޔެއް ނޫނޭ.” ނައީމާ ރުޅި އަޔަސް ހެޔޮ ކަމަށް ޒާޔާ ގޮތެއް ދުލެއް ނުކުރިއެވެ. މި ހުރިހާ ވެސް ކަމަކީ ޝާރިފްގެ ކަންތަކެވެ. ޝާރިފްގެ އަޅާލުން އެންމެ ބޭނުންވި ދުވަހު ހުރިހާ ކަމަކާއި ކުރިމަތިލާން މި ޖެހެނީ ޒާޔާ އެކަންޏެވެ. ހިތާ ހިތުން ޝާރިފްއަށް ކުދި ކިޔަމުން ޒާޔާ އެނދުމަތީގައި ހަޑިވެފައި އޮތް ބެޑްޝީޓް ނެގިއެވެ. ބަނޑުގައި އަޅަމުންދާ ވޭނަށް ކެތްނުކުރެވެއެވެ. ނަމަވެސް ކެތް ކުރުން ނޫންގޮތެއް މިއަދު ޒާޔާއަކަށް ނެތެވެ. ފާހާނާއަށް ވަދެ ފެންވަރާލުމަށްފަހު ޒާޔާ ކޮޓަރިތެރެ ރީތިކޮށްލިއެވެ. ހަޑިވެފައި ހުރި އެއްޗެހި ދޮންނަން އަޅާލުމަށްފަހު ސަމާ އަށް ގުޅާލިއެވެ.

“ދަރިފުޅާ ޒާޔާ. ނުވާނެ ޑޮކްޓަރަށް ނުދައްކާ ހުންނާކަށް. ކިތަށް މަސް ތަ ބަނޑަށް؟” ކޮޓަރި ދޮރު ހުޅުވާލާފައި އެތެރެއަށް ވަން ނައީމާގެ މޫނުމަތިން ފެންނަމުން ދިޔައީ ކަންބޮޑުވުމެވެ.

“ކޮބާ ޒިޔަލް؟” ނައީމާ ދެއްކި ވާހަކައާމެދު ޒާޔާގެ ފަރުވާލެއްނެތެވެ.

“ވެއްޖެ ކާފަ ކައިރީގައި. ހިނގާ ހޮސްޕިޓަލަށް ދާން މަންމައާއެކު؟” ނައީމާ ޒާޔާގެ ބޮލުގައި ފިރުމާލިއެވެ. ވިސްނައިދެވޭތޯ އެވެ.

“ސަމާ އެބައާދޭ. މަންމަ ޒިޔަލްއަށް ބަލައްޗޭ.” ކޮނޑުގައި ދަބަސް އަޅުވައިގެން ހިނގައިގަތް ނަމަވެސް ޒާޔާ އަށް ރަނގަޅަށް ހިނގައި ނުގަނެވެއެވެ. ނައީމާ ދެފަރާތަކަށް ބޯހޫރާލިއެވެ. ހިތްހަމަ ނުޖެހުނު ނަމަވެސް ނައީމާ އެއްޗެއް ނުބުނެ ހުރީ ރާއިދު އަށްޓަކައެވެ. ރާއިދު ޒާޔާދެކެ ވާ ލޯބި އިނގޭތީ މަސްލަހަތަށްޓަކައެވެ.

“ބަސްޓްވީ ތަ؟” ޒާޔާ ފެނުމާއެކު ފުރަތަމަވެސް ސަމާއަށް އަހާލެވުނެވެ.

“މަ މަރުވަނީ ކަންނޭނގެ. ހިނގާބަލަ އަވަހަށް ދާން.” ބަނޑުގައި އަތް އަޅައިގެން ހުރެ ޒާޔާއަށް ވާހަކަ ދެއްކުނީ ގަދަކަމުން ކަހަލަ ގޮތަށެވެ.

ސަމާ އަވަސް އަވަހަށް ކާރެއް ހުއްޓުވުމަށްފަހު ޒާޔާ ގޮވައިގެން ކާރަށް އެރިއެވެ.

“ޝާރިފް ގުޅިތަ؟” ކާރު ދުއްވަމުން އޭޑީކޭ އާއި ދިމާއަށް ދިޔައިރު ޒާޔާ އޮތީ ދެލޯ މަރާލައިގެންނެވެ. ދެލޯ ހުޅުވާލީ ޝާރިފްގެ ނަން ކަންފަތުގައި ޖެހުމާއެކުއެވެ.

“މިއަދު އެފިރިހެނާގެ ސަބަބުން ތިހުރީ ޒާޔާ އުޅޭ ހާލު. ލޯބިވާނަމަ ހާލު ބަލާނެ. ޒާޔާ ނިކަން ވިސްނާލަބަލަ.” ސަމާ ހުރިހާ ވާހަކައެއް ދައްކަމުންދިޔައިރުވެސް ޒާޔާ އޮތީއެވެ. ސަމާ އެބުނީ ތެދެއްކަން ޒާޔާއަށް އެނގެއެވެ. ޝާރިފް އަކަށް ޒާޔާ މުހިއްމެއް ނޫނެވެ. އަންހެނަކު ފިރިހެނަކަށްޓަކާ ވާނެ އެންމެ ބޮޑު އެއް ޤުރުބާނީ މިއަދު ޒާޔާ އެދަނީ ޝާރިފް އަށްޓަކާ ވަމުންނެވެ. ނަމަވެސް ޝާރިފް އެއް އެކަމެއް ނުދަންނާނެއެވެ.

ޒާޔާއަކީ ހަމައެކަނި ޝާރިފްގެ ތަންމަތި ފަޅުފިލުވާލަ ދިނުމަށް ޝާރިފް ބޭނުންކުރި ހަތިޔާރެކެވެ. އެދެމެދުގައި ލޯތްބެއް ނެތެވެ. އެ ގުޅުމަށް ދޭނެ ނަމެއްވެސް ނެތެވެ.

“އޮޕަރޭޝަން ކުރަން ޖެހޭނީ. ބައެއް ގަނޑު ލޭކޮޅުތައް އެތެރޭގައި އަދިވެސް އެބަހުރި. ސައުވީސް ގަޑިއިރުތެރޭގައި ގެޔަށް ދެވޭނެ. ކޮބާ ސްކޭން ރިޕޯޓް ކުރީގެ؟” ސްކޭން ރޫމްގައި ޒާޔާ އޮތީ ދެލޯ މަރާލައިގެންނެވެ.

“ނޭނގެ ޕްރެގް ކަމެއް ޑޮކްޓަރ.” ޒާޔާއަށް ދޮގު ހަދަން މަޖުބޫރެވެ.

“އޯކޭ. ކޮބާ ހަޒްބެންޑް.” ޑޮކްޓަރ ވާހަކަ ދެއްކީ ހިތްހެޔޮ ކަމާއެކުގައެވެ.

“ރާއްޖެތެރޭގަވީ. މިއަދު އަންނާނެ އެކަމް.” ޑޮކްޓަަރަށް ޖަވާބު ދިނީ ސަމާއެވެ.

އޮޕަރޭޝަންގެ ތައްޔާރީތައް ވަމުންދިޔައިރު އެންމެ ފަހަރަކުވެސް ޒާޔާގެ ލޮލަކުން ކަރުނަ ނުހިކެއެވެ. އެކަމަކުވެސް ޒާޔާ ޝާރިފްއަކަށް ނަފްރަތެއް ނުކުރެއެވެ. ނަފްރަތު ކުރަންވީ ސަބަބެއްވެސް ނެތެވެ. ލޯތްބާއި އަޅާލުން އެއީ ގަދަކަމުން ހޯދޭނެ އެއްޗެއް ނޫނެވެ. ޒާޔާ ވީ ލޯތްބެވެ. ދިނީވެސް ލޯތްބެވެ. ނަމަވެސް ބަދަލުގައި ޝާރިފް ލޯބިދިނުން މަޖުބޫރެއް ނޫނެވެ.

މަންމަ ކީއްކުރަންތަ އޭނަ އެކަނި. ތި ފޮނުވީ؟” އިރުއޮއްސުނު އިރުވެސް ޒާޔާގެ ޚަބަރެއް ނުވެގެން ހާސްވެފައި ތިއްބާ ފެނުނީ ކުއްލިއަކަށް ރާއިދު އައިސް ވަން ތަނެވެ.

“ޒާޔާ އޭ ބުނީ މަންމަ މަޑުކުރާށޭ ޒިޔަލް ކައިރީގައި. ކިޔާ ކިޔާ ގޮތެއް ދުލެއް ނުކުރިއޭ.” ނައީމާގެ އުނގުގައި އިން ޒިޔަލް ރާއިދު ފެނުމާއެކު ދުވެފައި ގޮސް ރާއިދުގެ ދެފައިގައި އޮޅުލައިގަތެވެ.

“ދަރިފުޅަކަށް ނޭނގޭތަ ޒާޔާ ބަނޑު ބޮޑުކަމެއް؟ މަންމަމެންނަށް އަންގާލިނަމަ މިހެން ނުވީސް ދޯ.” ނައީމާގެ ވާހަކައިން ރާއިދުގެ ދެލޯ ދިޔައީ ބޮޑުވެގެންނެވެ. ޚުދު ރާއިދުއަށްވެސް ލިބުނީ ޝޮކެކެވެ.

“ކޮން ހޮސްޕިޓަލަކަށް ދިޔައީ؟” ރާއިދުގެ ނިއްކުރިމަތީގައި އަތް ހާކާލީ މީހާ ހާސްވި ވަރުންނެވެ. އެހާ ބޮޑު ކަމެއް ޒާޔާ ސިއްރު ކުރާނޭ ރާއިދުގެ ހިތެއް ނުބުނެއެވެ.

“ތިއެއްވެސް ނޭނގެ. ގުޅާ ގުޅާ ފޯނެއްވެސް ނުނަގާ.” ނައީމާ އޮޅުންފިލުވައިދިނެވެ.

ރާއިދު އަވަސް އަވަހަށް ފޯނު ނަގާ ޒާޔާގެ ނަމްބަރަށް ގުޅާލަމުން ބޭރަށް ނިކުތެވެ.

ނިދިފައި އޮތް ޒާޔާގެ ކައިރީގައި އިން ސަމާ ފޯނަށް ޖަވާބު ދިނީ  ރާއިދު އެތައް އިރަކު ގުޅިފަހުންނެވެ.

އިރުކޮޅެއްވެސް ނުވެއެވެ. ދެން ފެނުނީ ރާއިދު ދުވެފައި އައިސް ޒާޔާ އޮތް އެނދު ކައިރީގައި ހުއްޓުނުތަނެވެ.

ޒާޔާގެ ވަރުދެރަވެފައިވާ މޫނު ފެނިފައި ރާއިދު މޮޔަނުވީ ކިރިޔާއެވެ.

“އިރުކޮޅަކުން ގެޔަށް ދެވޭނެ. އޮޕަރޭޝަން ކުރީ ބޭބީ ބައިގެން ދިޔައީމަ.” ސަމާ ދައްކަމުންދިޔައީ ރާއިދުއަށް އަޑުއަހަން މާ ފަސޭހަ ވާހަކަތަކެއް ނޫނެވެ.

“ޒާޔާއަށް ބަލައްޗޭ. އެބައަންނަން.” ޒާޔާގެ މޫނުގައި ފިރުމާލަމުން ރާއިދު ހިނގައިގަތެވެ.

“ވަދޭ.” ޑޮކްޓަރު ކޮޓަރީން ޖަވާބެއް އައީ ރާއިދު ދެތިން ފަހަރަކު ދޮރުގައި ޖަހާލުމުންނެވެ.

“ޒާޔާ އަށް ކިހިނެއްވީތަ؟” ޑޮކްޓަރ ގެ އިޝާރާތަށް ރާއިދު ގޮޑީގައި އިށީނދެލިއެވެ.

“ޒާޔާ ބަނޑު ބޮޑުވެފަ ބައިގެން ދިޔައީ. ހީވަނީ މަހެއް ހެން ވާނީ އަދި. އެހެންވެ ކަންނޭނގެ ޒާޔާއަށްވެސް ނޭނގުނީ. މާ ބުރަކޮށް އުޅުނީމަ މިގޮތަށް ދިމާވީމި.” ޑޮކްޓަރ ވާހަކަ ދައްކަމުން ދިޔައިރު ރާއިދުއަށް އިނދެވުނީ އިސްޖަހާލައިގެންނެވެ.

“ހާސްވާ ވަރުގެ ކަމެއް ނެތް. ގެޔަށް ގެންދަންވީ ހަމަ. މި ފޯމްގަ ސޮއެ ކޮށްލާފަ.” ޑޮކްޓަރ ހިނިތުންވެލުމާއެކު ރާއިދުވެސް ހިނިތުންވެލިއެވެ.

ނިދާ ބޮކީގެ ފަނޑު އަލީގައި ޒާޔާ އޮތީ ރާއިދުގެ އަތް މަތީގައި ބޯއަޅާލައިގެންނެވެ. ހުއްޓުމެއްނެތި ރާއިދު ދިޔައީ ޒާޔާގެ ބަނޑުގައި ފިރުމަމުންނެވެ.

“ސޮރީ. މަށަށް ޒާޔާއަށް ވަރަށް އަޅާނުލެވޭ ދޯ؟”ރާއިދު ޒާޔާގެ ދަތް ދޮޅީގައި ހިފާ އުފުލާލިއެވެ. ދެމީހުންގެ ހަތަރު ކަޅި ބައްދަލުވި ވަގުތު ޒާޔާ އަށް އިސްޖަހާލެވުނެވެ. ކުށްވެރިއެއް ފަދައިންނެވެ. އާއެކެވެ. ޒާޔާ އަކީ މިއަދު ކުށްވެރިއެކެވެ.

“ނޫން. ރާއިދު ވަރަށް ރަނގަޅު.” ދެލޯ ކަރުނައިން ބަރުވުމާއެކު ޒާޔާ ދެލޯ މަރާލިއެވެ. އެވަގުތު އެއްވެސް އިހްތިޔާރަކާނުލާ ޒާޔާގެ ކޯތާފަތް ކަރުނަ ތިކި ތަކުން ތެތްމާލިއެވެ.

“މާދަން ހިނގާ ރަށަށް ދާން. މިތާގައި ސިޑިން އަރާ ފައިބައި ހެދުން ޒާޔާއަށް ރަނގަޅެއް ނުވާނެ. އެކޮޅުގައި ޒާޔާގެ މަންމަ މެންވެސް ތިބޭނެއެއްނު.” ރާއިދު ޒާޔާގެ ނިއްކުރީގައި ތުންފަތް ޖައްސާލަމުން ޒާޔާގެ ދެލޯ ފޮހެލަދިނެވެ.

ޒާޔާ އެތަނަކަށް އަލުން ދާކަށް ބޭނުމެއްނޫނެވެ. ޝާރިފްގެ ސޫރަވެސް ދެކޭކަށް ބޭނުމެއް ނޫނެވެ. ޝާރިފްގެ ކެހިވެރި މަޅީގައި ދެވަނަ ފަހަރަކަށް ޖެހޭކަށްވެސް ބޭނުމެއް ނޫނެވެ.

“ރާއިދު. މިތާގަ ޒާޔާ ބަހައްޓާ. ޕްލީސް. ގެއިން ނުނިކުންނާނަމޭ.” ޒާޔާގެ ރާގުގައި ވަނީ އާދޭހެވެ.

“އެންމެ ފަހަރަކުވެސް އެއްވެސް ޝަކުވާއެއްނެތި އަހަރެން ބުނާ ބަސް ޤަބޫލުކޮށްފާނަންތަ؟” ރާއިދު ޒާޔާ މެޔާލާ ބޮޑިކޮށްލީ ވަރަށް ލޯބިންނެވެ. ރާއިދުގެ އޯގާތެރިކަމުން އިތުރަށް އެއްވެސް އެއްޗެއް ބުނާކަށް ޒާޔާއަކަށް ނުކެރުނެވެ.

“އެހެން ވީއިރު އާ ނަމްބަރެއް ނަގައިދީފާނަންތަ؟” ޝާރިފް އާއި ދުރުގައި ހުންނަން ޒާޔާ ބޭނުމެވެ. ނަމްބަރު ބަދަލު ކުރުން އެއީ އެވަގުތަށް އެންމެ ރަނގަޅު ގޮތް ކަމުގައި ޒާޔާ ނިންމިއެވެ. އެއްވެސް ސުވާލެއްނެތި ރާއިދު ބޯޖަހާލީ ޒާޔާ ހިތްހަމަ ޖައްސާލަ ދިނުމަށެވެ.

ރޭގަނޑު ފުރަން ޖެހޭތީ ދުވާލު އެއްކޮށްހެން ޒާޔާ އާއި ރާއިދު އުޅުނީ ޝޮޕިންގައެވެ.

ކުއްލިއަކަށް ޒާޔާގެ ލޮލުގައި އަޅައިގަތީ ކަޅު ކުލައިގެ އަތުގައި އަޅާ ޕެކިނެއް ކަހަލަ އެއްޗެކެވެ.

“އަޅޭ. ލޯބި. ޝާރިފްއާއި ވަރަށް ގުޅޭނެ.” ހިތަށް އެރި ލަފްޒުތައް ދުލާއި ހަމައަށް އައި އިރުވެސް ޒާޔާއަށް ނޭނގެއެވެ.

ރާއިދުއަށް ނުފެންނާނެހެން ޒާޔާ ކައުންޓަރަށް ގޮސް ލާރި ދައްކާލުމަށްފަހު ދަބަހަށް ލާ ފޮރުވިއެވެ.

“މެޑަމް. މިއޮތީ ސިމް. ޗެކް… ރީތި ތޯ ނަމްބަރ.” ފަހަތުން ރާއިދުގެ އަޑު އިވުމާއެކު ޒާޔާ ސިހުނެވެ. ނަމަވެސް އަވަަސް އަވަހަށް ރާއިދު އަތުން ސިމްކާޑް އަތުލަމުން ޒާޔާ ހިނިތުންވެލީ ލިބުނު ހާސްކަން ފޮރުވުމަށްޓަކައެވެ.

“ރީތި.” ޒާޔާ ދަބަހުގެ ޒިބު ކަހާލަމުން ސިމްކާޑް ދަބަސް ތެރެއަށް ވައްޓާލިއެވެ.

ރަށަށް ދެވުނީ ރޭގަނޑުގެ ނުވައެއް ޖެހިތަނާއެވެ. ޖެޓީ މަތީގައި އެޅި ފުރަތަމަ ފިޔަވަޅާއެކު ޒާޔާގެ ނިއުޅުވާލެވިފައިވާ އިސްތަށިގަނޑާއި ސަމާސާ ކޮށްލި ވައިރޯޅިން ޒާޔާ އަށް ފަހަތަށް ޖެހެވުނެވެ.

ޒާޔާގެ ހިތްބުނެއެވެ. ޝާރިފް ވަރަށް ގާތުގައި އެބަހުއްޓެވެ. ބަލަހައްޓައިގެންނެވެ. އެ ޖެހިލި ފިނިފިނި ވައިރޯޅިވެސް އެކަމަށް ހެކިދޭ ކަހަލައެވެ.

“ނުފައިބަންތަ ތި ހުންނަނީ.” ރާއިދު ޒާޔާގެ އަތުގައި ހިފުމާއެކު ޒާޔާއަށް އޭނާގެ ޚިޔާލީ ދުނިޔެއިން އެނބުރިއާދެވުނެވެ.

ގެޔަށް ދިޔަ މަގުމަތީގައިވެސް ޒާޔާއަށް ވަށައިގެން ހޯދެއެވެ. ކީއްވެ ހެއްޔެވެ؟ ޝާރިފް ހުއްޓަސް ނެތަސް ޒާޔާއަށް ކީއް ހެއްޔެވެ؟

އަމިއްލަ ސިކުނޑިއަަށް ވިސްނައިދެމުން ޒާޔާ ގޭތެރެއަށް ވަނެވެ. ދަތުރު ވަރުބަލިކަމާއެކު ޒާޔާ އަށް އޮށޯވެލުމާއެކުހެން ނިދިއްޖެއެވެ.

ދުވަސްތައް މާޒީގެ ސޮފްޙާތަކަށް ގެއްލެމުންދެއެވެ. ޒާޔާ ގެޔަކުންވެސް ނުނިކުމެއެވެ. އެއްޗެއް ގަންނަން ޖެހުނަސް ފޮނުވަނީ މަންމައެވެ. ފޭސްބްކް ވައިބަރ ވެސް ޑީއެކްޓިވޭޓް ކޮށްލީއެވެ. ޝާރިފް އަށް ޒާޔާ އާއި ވާހަކަ ދެއްކޭނެ ހުރިހާ މަގެއްވެސް ޒާޔާ ބަންދުކުރީ ޝާރިފް ޒާޔާ ދެކެ ލޯބި ނުވާކަން އެނގޭތީއެވެ.

ފިނި ފިނި ރެއެކެވެ. ޒިޔަލް ނިންދެމަށްފަހު ޒާޔާ އިނީ ގޯތި ތެރޭގައި ހުރި އުނދޯލީގައެވެ.

“ރަށަށް އައިއްސަ ޚަބަރެއްވެސް ނުވޭ.” ހައުލާގެ އަޑަށް ޒާޔާ ބަލާލިއެވެ.

“ބަލިވެ އޭ މި އުޅެނީ.” ޒާޔާ ހިނިތުންވެލިއެވެ.

“އަޅެ. ހިނގާބަލަ މަށާއެކު ފިހާރައަކަށް.” ހައުލާ ޒާާޔާ އާއި ޖެހިގެން ހުރި ޖޯލީގައި އިށީނެވެ.

“މިހާރުތަ؟ ނުހިނގޭނެ މަށަކަށް.” ޒާޔާ ބޭރަށް ދާކަށް ބޭނުމެއް ނޫނެވެ. ފަހަރެއްގައިވެސް ޝާރިފްގެ ކުރިމައްޗަށް އަރާކަށް ބޭނުމެއްނޫނެވެ.

“ހިނގާފައެއް ނޫނޭ. ސައިކަލްގަ. އަޅެ ޕްލީސް ހިނގާބަލަ.” ހައުލާ އާދޭސް ކުރަން ފެށުމުން ޒާޔާ އެންމެ ފަހުން އެއްބަސްވިއެވެ.

ސައިކަލަށް އަރާ ދުއްވާލުމާއެކު ފުރަތަމަވެސް ކަންފަތުގައި ޖެހުނު އަޑުން ޒާޔާ އަށް ފަސްއެނބުރި ބަލާލެވުނެވެ.

ބަލާލެވުނު އިރުވެސް އެއީ ޝާރިފްގެ ސައިކަލްގެ އަޑުކަން ޒާޔާއަށް އެނގެއެވެ.

ދުވަސްތަކަކަށްފަހު މާޒީގެ ހުރިހާ ހަނދާންތަކެއް ލޯމަތީގައި އާވެގެންދިޔައެވެ.

ނަމަވެސް ޝާރިފްއަކަށް ޒާޔާ ފެނުނަސް ނުފެނުނަސް މާބޮޑު ފަރުވާލެއް ނޯންނާނެއެވެ.

ޒާޔާއަކީ ޝާރިފްއަކަށް އެއްވެސް މީހެއް ނޫނެވެ.

ޒާޔާ ގެޔަށް އައިސް ވަނީވެސް ޚިޔާލީ ފޮލާ ކައްކަމުންނެވެ.

އެނދުމަތީގައި ބަންޑުން އޮށޯވެގެން އެތައް އިރަކު އޮތުމަށްފަހު ޒާޔާ ފޭސްބްކް އެކްޓިވޭޓް ކޮށްލިއެވެ. ފޫހިވެގެންނެއް ނޫނެވެ. ޝާރިފްއާ ވާހަކަ ދައްކަން ބޭނުންވާތީއެވެ. ޒާޔާގެ ނަމްބަރުން ގުޅަން ބޭނުން ނުވާތީއެވެ.

ޝާރިފް އޮންލައިންގައި އިންތަން ފެނުމާއެކު ޒާޔާގެ ހިތް އުފަލުން ފޮޅުނެވެ. ސިކުނޑި އެކަން ނުކުރުމަށް އެތައް ފަހަރަކު ބުނެ ބުނެ އޮއްވާ ޒާޔާ ޝާރިފް އަށް މެސެޖް ކޮށްލައިފިއެވެ. ޝާރިފް ވެސް ހުރީ އިންތިޒާރުގައި ކަހަލައެވެ. ވަގުތުން ޖަވާބު ދީފިއެވެ.

– އެބަ އޮތޭ ދޭންވެފަ އޮތް އެއްޗެއް. އާދެބަލަ. – ޒާާޔާ ލިޔެލާފައި ފޮނުވާލިއެވެ.

– މިދަނީ. ނިކުމޭ.- ޝާރިފްގެ ޖަވާބުން ޒާޔާ ވީ ހައިރާނެވެ. ކޯޗެއްތޯ ވެސް ނާހައެވެ.

ލޯގަނޑު ކުރިމައްޗަށް ހުއްޓި އަމިއްލަ ސޫރައަށް ބަލާލުމަށްފަހު ލައިގެން ހުރި ޓޮޕްގެ ތިރީގައި ހިފާ ޒާޔާ ދަމާލިއެވެ. މަޑު ހިނގުމެއްގައި ޒާޔާ ހިނގާފައި ގޮސް ދޮރުން ނިކުތެވެ. އޭރު މަގުގެ އަނެއްފަރާތުގައި ސައިކަލް މަތީގައި އިށީނދެލައިގެން ޝާރިފް އިނެވެ. ދީފައި އޮތް ރީތި ހަނދުވަރުން ޝާރިފް ބަލަހައްޓައިގެން ހުރީ ޒާޔާ އަށް ކަން ޒާޔާ އަށް ހަމަރަނގަޅަށްވެސް އެނގުނެވެ.

ޒާޔާ އަށް ހުރެވުނީއެވެ. ބަލާށެވެ. ހިތް އެދެމުން ދިޔައީ ޝާރިފްގެ އުނގު ތެރެއަށް ދުވެ ގޮސް ވަންނާށެވެ.

ނަމަވެސް ޒާޔާއަކަށް ނުކެރުނެވެ.

މަޑުހިނގުމެއްގައި ޒާޔާ ކުރިއަށް ހިނގައިފައި ގޮސް ޝާރިފްގެ ކުރިމައްޗަށް ހުއްޓުނެވެ.

ނުނިމޭ

“ނަމްބަރު ބަދަލު ކޮށްފަ ނުދިނީ ކީއްވެ؟” ޝާރިފްގެ ރާގުގައި ވަނީ ޝަކުވާ އެވެ. އެވަގުތު ޝާރިފްގެ ކަންފަތްމަތީގައި އެތިފަހަރެއް އަޅާފާނަމޭ ޒާޔާ ހިތަށް އެރިއެވެ. އެންމެ ފަހަރަކުވެސް ޒާޔާގެ ހާލު އަހާލިއްޔާ ވާނީ ކީއް ހެއްޔެވެ؟ މި ހުރިހާ ދުވަހު ޒާޔާ އުޅުނީ ކިހިނެއްތޯ ވެސް އަހާލުން ޝާރިފްއަކަށް މުހިއްމެއް ނުވިއެވެ. ޝާރިފްގެ މޫނަށް ބަލަން ހުރެ ޒާޔާގެ ހިތުން ކިތަންމެ އެއްޗެއް ކިޔި ކަމުގައިވިޔަސް ދުލާއި ހަމައަށް އެއްވެސް ލަފްޒެއް ނައެވެ. ވީ ދެރައިން ހިތަށް ތަދު ވުމާއެކުވެސް ޒާޔާ ޝާރިފްގެ މޭތެރެއަށް ވަނެވެ.
“ޖަވާބު ދީބަލަ. ކީއްވެހޭ މަށަށް ނަމްބަރު ނުދެނީ.” ޝާރިފް ހަރުކަށިކަމާއެކު ސުވާލު ތަކުރާރުކޮށްލި އެވެ. ޖަވާބު ދިނުމުގެ ބަދަލުގައި ޒާޔާ އަތުގައި އޮތް ޕެކިން ޝާރިފްއަށް ދިއްކޮށްލިއެވެ. ޝާރިފް ހިނިތުންވެލަމުން އޭގައި ހިފުމާއެކު ޒާޔާގެ ހިތަށް ކުޑަ ނަމަވެސް ފިނިކަމެއް ލިބިގެންދިޔައެވެ. ޝާރިފްގެ މޫނުން އުފާވެރިކަން ފެނުނީމައެވެ.
“ލޯބިތަ؟” ޒާޔާ ޝާރިފްގެ އަތުގައި ހިފަހައްޓާލިއެވެ.
“ވަރަށް. އެކަމަކު މަގޭ މަންމައަށް ފެނިއްޖެއްޔާ ރުޅި އަންނާނެ މިކަހަލަ އެއްޗެހި އަތުގައި އަޅާފައި ހުންނަންޏާ.” ޝާރިފް އޭނާގެ އަތުގައި ޕެކިން އަޅާލިއެވެ.
ވެދާނެއެވެ. ދިލާގެ ސުވާލެއް އައިސްފާނެތީ ޝާރިފް އެހެން ބުނީއެވެ.
“އޯކޭ. ތީތި ނޭޅިޔަސް އެއްލާ ނުލާ ގެންގުޅެނިކޮށް.” ޒާޔާ ވާހަކަ ދެއްކީ ހިތާއި ދެކޮޅަށެވެ. ޝާރިފްގެ އަތުގައި އެ ޕެކިން އަޅާފައި އޮއްވާ ފެނުމުން ޒާޔާ ވަރަށް އުފާވާނެއެވެ. ނަމަވެސް ޒާޔާ ބޭނުންވާ ގޮތަށް އެއްވެސް ކަމެއް ނުވާނެކަން އެނގެއެވެ.
“ދަނީ.” ޒާޔާ ހިނގައިގަތެވެ. ނަމަވެސް ޝާރިފް ޒާޔާގެ އަތުގައި ހިފެހެއްޓިއެވެ.
“ނަމްބަރު ދީ.” ޝާރިފް އަނެއްކާވެސް ބުނެލިއެވެ.
“ނަމްބަރު ނުދޭނަން.” އެހާ ހަރުކޮށިކޮށް ޖަވާބުދޭނެ ހިތްވަރު ލިބުނީތީ ޚުދު ޒާޔާވެސް ހުރީ ހައިރާންވެފައެވެ. ޝާރިފް ޒާޔާގެ އަތުން ދޫކޮށްލިއެވެ. އަދި ބަލާވެސް ނުލާ ސައިކަލަށް އަރާ ދުއްވާލިއެވެ. ޒާޔާގެ ހިތަކަށް ޝާރިފް ޒާޔާ ދެކެ ރުޅި އައިސްގެންދާ މަންޒަރު ބަލާކަށް ކެތެއްނުވިއެވެ.
އަވަސް އަވަހަށް ގެޔަށްވަދެ މެސެންޖަރ އިން ޝާރިފްއަަށް މެސެޖްކޮށްލިއެވެ.

“މި ޕެކިން މަށެއް ބޭނުމެއްނޫން. ބަލާ އާދޭ.” ޝާރިފް ފޮނުވާލި މެސެޖުން ޒާޔާގެ ހިތް ކުދިކުދިވެގެން ދިޔަކަހަލައެވެ. ނަމަވެސް ޒާޔާ އަނެއްކާވެސް ބޭރަށް ނިކުތެވެ. ދެލޮލަށް ޖަމާވެފައިވާ ކަރުނަތައް އެތެރެއަށް ހިންދާލަމުންނެވެ.

“ކީއްވެ؟ ޝާރިފް ތީތި ބޭނުންނެތީ ކީއްވެ؟” ޝާރިފް އިށީނދެގެން އިން ޖޯލީގެ ތިރީގައި ޒާޔާ ކުޑަ ކަކޫ ޖަހާލިއެވެ.
ޝާރިފް އެއްވެސް އެއްޗެއް ނުބުނެ ޕެކިން ޒާޔާ އަށް ދިއްކޮށްލިއެވެ.
ނަމަވެސް ޒާޔާ އާދޭސްކުރި އެވެ. ޒާޔާ އެހާ ލޯބިން ދިން އެއްޗެއް އަނބުރާ ނުދިނުމަށެވެ.
“މަގޭ ނަމްބަރު ދޭނަމޭ.” ޝާރިފް ރުޅި އައިސްގެން އެ އުޅެނީ ނަމްބަރު ނުދީގެން ކަން ޒާޔާ އަށް އެނގެއެވެ.
“ދެން މަށެއް ޒާޔާގެ ނަމްބަރެއް ބޭނުމެއް ނޫން.” ޝާރިފް އުޅުނީ ތެދުވެގެން ދާށެވެ. ޒާޔާ ހުރީއެވެ. ބަލަހައްޓައިގެންނެވެ. އެއީ ހަމަ ޒާޔާ ދެކެ އެހާ ލޯބިވާ ޝާރިފް ހެއްޔެވެ؟ ޒާޔާ ހިތުގައި ޖައްސާފައި ދާން ޝާރިފްއަށް ކެރިއްޖެ ހެއްޔެވެ؟

ޒާޔާ ދުވެފައި ގޮސް ގޭތެރެއަށް ވަނީ ޝާރިފް ކުރިމަތީގައި ނުރޯންވެގެންނެވެ.
އެނދުމައްޗަށް ވެއްޓި އޮވެ ހިތް ފުރެންދެން ރުއިމަށްފަހު ޒާޔާ ޝާރިފްގެ ނަމްބަރަށް ގުޅާލިއެވެ.
“ސޮރީ. މީ މަގޭ ނަމްބަރު.” ޒާޔާ ވާހަކަ ދެއްކިއިރުވެސް ޒާޔާ އަށް ރޮވެނީއެވެ.
“ސޮރީ. ދެވަނަ ފަހަރަށް ޒާޔާ ބޭރަށް ނެރުނީ ޕެކިން ދޭކަށް ނޫން. ނަމްބަރު ބޭނުންވާތީ.” ޝާރިފް ބުނެލިއެވެ. އަނެއްކާވެސް ޝާރިފްގެ ފަށުވި ލަފްޒުތަކުން ޒާޔާ ހިތް އުފާކޮށްލަ ދީފިއެވެ. އެތައް އިރެއް ވާންދެން ވާހަކަ ދައްކަން ތިބުމަށްފަހު ޒާޔާ ފޯނު ބޭއްވީ އުފަލުންނެވެ. ކަރުނައިގެ އެއްވެސް އަސަރެއް އެ ދެ ލޮލުގައި ފެންނާކަށްވެސް ނެތެވެ.
މިހާރު ޒާޔާ އެހުރީ އުފަލުންނެވެ. ޝާރިފް ޒާޔާ ކައިިރިއަށް އަންނާތީއެވެ.

ހަމަހިމޭން އެދަންވަރުގައި މުޅި ދުނިޔެ ނިދާފައިވާއިރު ޒާޔާ އޮތީ ޝާރިފްގެ މޫނަށް ބަލަހައްޓައިގެންނެވެ.
“މި ގުޅުމަށް ދޭނީ ކޮން ނަމެއްތަ؟” ޒާޔާގެ ގައިމަތީގައި އޮތް ޝާރިފްގެ ހަށިގަނޑުގައި ޒާާޔާ ބައްދާލީ ލޯބިންނެވެ.
“ލޯބި. ޒާޔާ ދެކެ އަހަރެން ވަރަށް ލޯބިވޭ. އަބަދުވެސް ލޯބިވާނަން. ދުވަހަކުވެސް ޒާޔާ މަތިން ހަނދާން ނުނެތޭނެ.” ޝާރިފް ޒާޔާގެ ނިއްކުރީގައި ބޮސް ދިނެވެ.
“ދެން ދިލާ އޯ. ޝާރިފް ދިލާ ދެކެވެސް ލޯބިވޭނު.” ޒާޔާ ދިލާގެ ވާހަކަ ދެއްކީ ޝާރިފް ބުނަނީ ކީކޭތޯ ބަލާށެވެ.
“ދިލާ ދެކެ ލޯބިވޭ. އެކަމަކު ޒާޔާ ދެކެ ވާ ވަރަކަށް ނުވޭ.” ޝާރިފްގެ ޖަވާބު ޒާޔާއަކަށް ޤަބޫލެއް ނުކުރެވުނެވެ. ބައެއް ފަހަރު ޒާޔާގެ ހިތް ބުނެއެވެ. ޒާޔާ ކައިރީގައި ދޮގު ހަދާނަމަ ޝާރިފް ދިލާ ދެކެ ލޯބިވެއެކޭ ނުބުނާނެ ނޫންހެއްޔެވެ؟ އެކަމަކު ޝާރިފްއަށް ނުވިސްނެނީ ކީއްވެ ހެއްޔެވެ؟ ދިލާ ދެކެ ލޯބިވޭ ބުނާ ކޮންމެ ފަހަރަކު ޒާޔާގެ ހިތަށް ތަދުވެއެވެ. ޝާރިފްގެ ކުރިމަތީގައި ހެވިފައި ހުންނަނީ އެންމެ ފަހަރަކުވެސް ޒާޔާގެ ހިތުގައި އަޅާ ވޭން ޝާރިފްއަށް އިޙްސާސް ވާނެ ކަމަށެވެ.

“ޝާރިފް. ކީއްވެ އެހާ އަޅާނުލަނީ މަށަށް.” ޒާޔާ ޝާރިފްގެ ފުން ދެލޮލަށް ބަލަހައްޓައިގެން އޮތެވެ.
“އަޅާލަމެއްނު. ޒާޔާއަށް ކީއްވެ އެހެން ހީވަނީ އަހަރެން އަޅައެއްނުލައޭ.” ޝާރިފް ޒާޔާގެ ފަންއިސްތަށިގަނޑުގައި ފިރުމާލިއެވެ.
“ދެން ނޭނގެ.” ޚަޤީޤަތުގައިވެސް ޒާޔާ ވަރަށް ދެރަވެއްޖެއެވެ. ޒާޔާގެ ހިތުގެ އުދާސްތައް އިތުރަށް ޝާރިފްގެ ކުރިމަތީގައި ބޭރުކުރާނީ ކިހިނެއް ކަމެއް ޒާޔާއަކަށް ނުވިސްނުނެވެ.
“ދެން ހިނގާ ދާން ދޯ.” ޝާރިފް ޒާޔާގެ ތުންފަތުގައި ތުންފަތް ޖައްސާލިއެވެ. ވަރަށް ލޯބިންނެވެ. އެހާމެ މަޑުމަޑުންނެވެ.
ޒާޔާ ބޯޖަހާލީ ހިތާއި ދެކޮޅަށެވެ.
“ރުޅި އައިއްސަތަ؟” ޒާޔާގެ ހިމޭންކަން ޝާރިފްއަށް ސިފަކުރެވުނީ ރުޅިއައިސްފައި ހުރި ކަމަށެވެ. ނޫނެކެވެ. ރުޅިއެއް ނާދެއެވެ. ޝާރިފްދެކެ ދުވަހަކު ރުޅިއެއް ނުވެސް އާދެވޭނެއެވެ. ވަނީ ދެރައެވެ. ހިތުގައި އަޅާ ވޭންތައް ބުނެދޭނީ ކިހިނެއް ހެއްޔެވެ؟ ޝާރިފް ޒާޔާގެ މީހަކަށް ވަނީ ހުވަފެނުގައި އެކަންޏެވެ. ހުންނަން ޖެހެނީ އެންމެ ދުރުގައެވެ. ޒާޔާ ހިނިތުންވެލީ ޝާރިފްގެ ސުވާލަށް ޖަވާބު ދިނުމުގެ ގޮތުންނެވެ.
“މި ގުޅަނީ އިނގޭ.” ޒާޔާގެ ކޮލުގައި ހިފާލުމަށްފަހު ޝާރިފް ކޮޓަރިން ނިކުތެވެ.

އާ ދުވަހަކަށް އިރު ފެނުން މައްޗަށް ހިއްލާލިއިރު ޒާޔާ އިނީ އަތިރިމަތީގައި ހުރި ޖޯއްޔެއްގައެވެ.
ޝާރިފް ނިދަން ދިއުމަށްފަހުގައިވެސް ޒާޔާގެ ލޮލަށް ނިދި ނައީއެވެ. އިރު އެރުމުން ޒާޔާ ހިނގާލާފައި ގޮސް އެޖޯލީގައި އިށީނީ ޝާރިފް އާއި ދޭތެރޭގައި މާގަދައަށް ވިސްނޭތީއެވެ. ޒާޔާ ބޭނުންވަނީ ޝާރިފްގެ އަނބިމީހާގެ މަޤާމެވެ. ތަންމަތި ފަޅުވިލަދޭކަށް ނޫނެވެ.
“ދަރިފުޅު މިތާގަތަ؟ ޒިޔަލް އެބަ ރޮއެޔޭ. ހުންވެސް އައިއްސަ އޮތީ. މަންމަ އަތްލިޔަވެސް ނުދިން.” ޒާޔާ ތެދުވެގެން ދުއްވައިގަތީ ފާއިޒާގެ ވާހަކަ ރަނގަޅަށް ނުނިމެނީހެވެ.

“ހެލްތް ސެންޓަރ އަށް ގެންދަން މަންމައަށް ފެންނަނީ.” ޒާޔާ ޒިޔަލް އުރައިގެން ހުރިއިރުވެސް ޒިޔަލް ރޮނީއެވެ.
“ހުއްޓާާލާ ދޫނީ.” ޒާޔާ ހިނގައިގަތީ ޑޮކްޓަރަށް ދައްކަން ދިއުމަށެވެ.

ހެނދުނުގެ ވަގުތު ކަމުން މަގުތައް ވަރަށް އަމާނެވެ. ޒިޔަލް އުރާލައިގެން ޒާޔާ ހިނގަމުން ދިޔައީ ފުދޭވަރަށް ބާރަށެވެ. އެވަގުތު ކަންފަތުގައި ޖެހުނު ސައިކަލްގެ އަޑުން ޒާޔާ އަށް ބަލާލެވުނީ ކަންފަތަށް އިވެމުންދިޔަ އަޑަކީ ތެދެއްކަން ޤަބޫލު ނުކުރެވިގެންނެވެ. އާއެކެވެ. އެ ހަމަ ޝާރިފްގެ ސައިކަލްގެ އަޑެވެ. ދުއްވަން އިނީ ޝާރިފްއެވެ. އެކަމަކު ޒާޔާ މައްޗަށް ޝާރިފް އޮތީ ނިދާފައެވެ. އޮފީސް ބޭގް އަޅުވާލައިގެން ޝާރިފްގެ ގައިގައި ބައްދާލައިގެން އިން ދިލާ ފެނިފައި ޒާޔާ އަވަސް އަވަހަަށް މޫނު އަނެއް ފަރާތަށް އަނބުރާލިއެވެ. ނަސީބެކެވެ. ޝާރިފްއަށް ޒާޔާ ނުފެނުނުކަމެވެ. ފެނުނަ ނަމަ ޝާރިފް ދެން އިތުރަށް ހަދާނެ ދޮގެއް ނޯންނާނެ ނޫން ހެއްޔެވެ.؟

ޑޮކްޓަރަށް ދެއްކުމަށްފަހު ޒާޔާ ގެޔަށް އައި މަގުމަތީގައި ޒިޔަލް އަށް އޮތީ ނިދިފައެވެ. ޒާޔާ ޒިޔަލް އެނދުމަތީގައި ބާއްވާލުމަށްފަހު ފޯނު ނެގިއެވެ. ޝާރިފް ދެކެ އައި ރުޅީގައި ޝާރިފްގެ ނަމްބަރުވެސް ފޯނުން ޑިލީޓް ކޮށްލިއެވެ. ޒާޔާ ކިހާ މޮޔަހެއްޔެވެ؟ ޝާރިފްގެ ނަމްބަރު ޒާޔާ ހިތުދަހެވެ. ހިތުން އެނަމްބަރު ފޮހެލާނީ ކިހިނެއް ހެއްޔެވެ؟ އެ ހުރިހާ ފޮނި ހަނދާންތަކެއް ފޮހެލާނީވެސް ވަކި ކިހިނެއް ހެއްޔެވެ؟ މިރަށަށް ނާދެވުނު ނަމައޭ ކިތަންމެ ފަހަރަކު ޒާޔާގެ ހިތަށް އަރައެވެ. ނަމަވެސް ތަޤުދީރުގައި ލިޔެފައިވާ ކަމެއް ބަދަލު ކުރާނީ ކިހިނެއް ހެއްޔެވެ؟

މެންދުރުގެ އެންމެ ހޫނުގަދަ ގަޑީގައި ޒާޔާ ނިކުތީ ފެންވަރާލައިގެންނެވެ. ރަނގަޅަށް ފެންވެސް ނުހިއްކާ ޒާޔާ ގުޅާލީ އެއާޕޯޓަށެވެ. މާލެ ދިއުމަށް ޓިކެޓް ބުކް ކުރުމަށްފަހު ފޯނު ބޭއްވިތަނާ ޝާރިފް ގުޅަން ފެށިއެވެ. ވަގުތުން ޒާޔާ ފޯނު ނަގާ ހޫރާލިއެވެ. ހެނދުނު ޝާރިފްއާއި ދިލާ ތިބިގޮތް ލޯ މައްޗަށް އެވަގުތު ސިފަވެގެން ވެސް ދިޔައެވެ. ދެން އިތުރަކަށް ޝާރިފް ޒާޔާ އާ ދައްކަން ޖެހޭނެ ވާހަކައެއްވެސް ނޯންނާނެއެވެ. ނުވާ ލޯތްބެއް ދައްކަން ގުޅަންވީ ކީއްކުރަން ހެއްޔެވެ؟ ޝާރިފް އެގޮތަށް ކަންތައް ކުރާއިރު ޒާޔާ އަށް ޝާރިފްއާއި ނުލާ ނޫޅެވެންވީ ވަކި ކީއްވެ ހެއްޔެވެ؟ ތަކުރާރުކޮށް އެތައް ފަހަރަކު ޝާރިފް ގުޅި ނަމަވެސް ޒާޔާ ފޯނަކަށް ޖަވާބެއް ނުދިނެއެވެ. ހިތާއި ދެކޮޅަށެވެ.

އެދުވަހު ރާއިދު ރަށަށް އައިކަންވެސް އެއީ ޒާޔާގެ ނަސީބެވެ. ފޫހިވާނެ އެއްވެސް ވަގުތެއް އޭރުން ޒާޔާއަކަށް ނޯންނާނެއެވެ.
އޭރުން އަބަދުވެސް ޒާޔާގެ ކައިރީގައި ރާއިދު ހުންނާނެއެވެ.

“ނިންޖެއް ނާދޭތަ؟” ޖޯލިފަތީގައި ފުރާ ފުރިހަމަވެފައިވާ ހަނދަށް ނަޒަރު ހުއްޓައިލައިގެން އޮތް ޒާޔާ އަކަށް ރާއިދުގެ އަޑެއް ނީވުނެވެ. ވާނީ ވެސް އެހެން ނޫން ހެއްޔެވެ؟ ޝާރިފްގެ ޚިޔާލުތަކުން ވަނީ ޒާޔާގެ ހިތާއި ސިކުނޑި ހައްޔަރުކޮށްލާފައެވެ. ހަނދާނަށް އަންނަމުން ދިޔައީ ޒާޔާގެ ހަޔާތަށް ޝާރިފް ގެނެސްދިން އުފާވެރި ދުވަހެއްގެ ހަނދާނެވެ. އެހާ ބުރަކޮށް ޒާޔާ ގޭތެރޭގައި އުޅެމުންވެސް ޒާޔާ ބޭރަށް ނިކުތީ ޝާރިފްގެ އެދުމަށެވެ. ޝާރިފްގެ ބޭނުމަކަށްވީ ޒާޔާއަށް އެރީތި ހަނދު ދެއްކުމެވެ.
މިރޭވެސް ހަމަ އެހަނދެވެ. އެކަމަކު ޝާރިފްއެއް ނެތެވެ.
“ޒާޔާ؟” ރާއިދު ޒާޔާގެ ކައިރިއަށް ހުއްޓި ޒާޔާގެ އަތުގައި ހިފުމާއެކު ޒާޔާ ދިޔައީ ސިއްސައިގެންނެވެ.
“ކީކޭ. ނިދަން ދާންވީދޯ.” ޒާޔާ އަވަސް އަވަހަށް އިށީންދެގެން އިން ޖޯލިން ތެދުވިއެވެ.
“ޒާޔާ.؟” ރާއިދު ޒާޔާގެ ދެކޮނޑުގައި ހިފަހައްޓާލިއެވެ. ހުއްޓުނު ނަމަވެސް ޒާޔާ ހުރީއެވެ. ރާއިދުއަށް ފުރަގަސްދީގެންނެވެ.
“ހާދަ މިސްވެޔޭ ކުރީގެ ޒާޔާ.” ހާމައަށް އޮތް ޒާޔާގެ ކޮނޑުގައި ރާއިދު ދަތްދޮޅި ޖައްސާލިއެވެ. ޒާޔާއަށް ޖެހެވުނީ ދުރަށެވެ. ރާއިދު ދެރަވާނެކަން އިނގެއެވެ.
-މާފްކުރާށެވެ. މިވަގުތު އަހަރެންގެ ހިތަށް ހަމަޖެހުމެއް ނެތެވެ.- ޒާޔާ ވާހަކަދައްކަމުން ދިޔައީ ހިތުންނެވެ. ރާއިދު ކުރިމަތީގައި ޒާޔާގެ ހިތް ހުޅުވާލާނެހާ ހިތްވަރެއް ޒާޔާގެ ނެތެވެ.
“ހިފާބަލަ.” ރާއިދުގެ އަބަދުވެސް އާދައެވެ. ޒާޔާ ރާއިދު އާއި ދުރުވެއްޖެއްޔާ ކުރިމަތީގައި ހުރެ އަތް ދިއްކޮށްލައެވެ. މިއަދުވެސް ރާއިދު އެހުރީ ޒާޔާގެ ކުރިމަތީގައި އަތް ދިއްކޮށްލައިގެން ސީދާ ޒާޔާގެ ލޮލަަށް ބަލަހައްޓައިގެންނެވެ.
އިސްއުފުލާލަމުން ޒާޔާ ރާއިދުގެ މޫނަށް ބަލާލިއެވެ. އަދި ހިނިތުންްވެލަމުން ރާއިދުގެ އަތު ތެރޭގައި އަތް ބާއްވާލިއެވެ.
ރާއިދު ހުރީ އެވަގުތުގެ އިންތިޒާރުގައި ކަހަލައެވެ. ޒާޔާގެ އަތުގައި ހިފައި ކުއްލިއެއް ޖެހުމާއެކު ޒާޔާ އޮތީ ރާއިދުގެ އަތުތެރޭގައެވެ.

“މާލެ ދަނީތަ؟” ޒާޔާ އެކަކު ކައިރީގައިވެސް ނުބުނާ ވާހަކައެއް ރާއިދުއަަށް އެނގުމުން ޒާޔާއަށް ބަލާލެވުނީ ސިހިފައެވެ.
“ސަޕްރައިޒް ވީތަ؟ މަށަށް އެނގުނީމަ. ރިޒަވޭޝަން ނަމްބަރ އެބައިން ފޯނަށް އައިއްސަ.” ރާއިދު ހިނިތުންވެލުމާއެކު ޒާޔާ މޫނު އަނބުރާލީ ދުރަށެވެ.
“ދާން މަޖުބޫރޭ.” ޒާޔާގެ އަޑުގައިވަނީ އާދަޔާ ޚިލާފް ރިހުމެކެވެ.
“ކަމެއްވީތަ؟ ކީއްވެތަ ޒާޔާ މޫޑީވެފަ ތިހުންނަނީ. މަށަށް ޒާޔާ ހިތްހަމަނުޖެހޭ ކަމެއް ކުރެވުނީތަ؟” ޒާޔާގެ މޫނަށް އަރާ ފައިބަމުންދިޔަ ކުލަވަރު ރާއިދު ހުރީ ބަލާށެވެ.
“ނުވޭ ކަމެއް. މަޖުބޫރުވީއޭ މިބުނީ ޒިޔަލްއަށްޓަކާ. މިތަނުގައި އެއްވެސް ވަރަކަށް ކިޔެވުން ރަނގަޅެއް ނޫން. އެހެންނޫނަސް މިތަނުގައި މުޅި އުމުރަށް ދިރިއުޅޭ ގޮތަކަށް ނޫން ދޯ އައީ އެއް.” ޒާޔާ ދޮރު ހުޅުވާލާފައި ކޮޓަރިއަށް ވަނުމާއެކު ފަހަތުން ރާއިދުވެސް ވަނެވެ.
“ބޮލުގައި ރިއްސާ ވަރަށް އެބަ. ހިނގާ ނިދަން.” ޒާޔާ ވާހަކަދެއްކީ ރާއިދުގެ މޫނަށް ބަލާވެސްނުލައެވެ. ރާއިދުގެ މޫނުމަތިންނާއި ހަރަކާތްތައް ހުރިގޮތުން ރާއިދު އެހުރީ ޒާޔާ އަށް ބޭނުންވެފައިކަން ޒާޔާއަށް ހަމަރަނގަޅަށްވެސް އެނގެއެވެ. ނަމަވެސް ރާއިދު ކުރިމަތީގައި އެއްވެސް ކަމެއް ނޭނގޭ ކަމަށް ޒާޔާ ހެދީއެވެ.
ނިދާ ބޮކި ޖައްސާލުމަށްފަހު ޒާޔާ އޮށޯވެ ދެލޯ މަރާ ބާރުކޮށްލިއިރު ވެސް ރާއިދު އޮތީ ބަލާށެވެ. ނުބުންޏަސް ޒާޔާއަށް ކަމެއްވެއްޖެކަން ރާއިދުއަށް ވިސްނުނެވެ. ފުން ވިސްނުމެއްގައި އޮވެގެން ރާއިދުވެސް އެނދުމަތީގައި ހަށިގަނޑު ދަމާލިއެވެ.

ޝާރިފްއާއި ވާހަކަ ނުދައްކާތާ ދެ ދުވަސް ވީއިރު ޒާޔާ އަކީ ދުނިޔޭގައި ހުއްޓަސް މަރުވެފައިވާ މީހެއް ފަދައެވެ. އެއްވެސް ކަމެއް ކުރާ ހިތެއް ޒާޔާ ނުވެއެވެ.
ފާހާނާއިން ނިކުތްތަނާ ޒާޔާގެ ފޯނަށް މެސެޖެއް ލިބުނެވެ. ޝާރިފްގެއެވެ. ޝާރިފްގެ އެދުމަކަށްވީ އޮން ލައިން ވުމަށެވެ.
ޒާޔާ އަވަސް އަވަހަށް އޮންލައިން ވެލިއެވެ. ހިތުގައި ކަނޑައަޅާއި ނިންމާފައި އޮތް ގޮތަކާއިމެދު ވެސް ޒާޔާއަކަށް ވިސްނައެއް ނުލެވުނެވެ. ކިތަންމެ ވަރަކަށް ޒާޔާ މަސައްކަތް ކުރާ ނަމަވެސް ޝާރިފްގެ ޚިޔާލުތަކާއި ދުރަކަށް ނުދެވުނެވެ.
“ކީއްވެ ގުޅީމަ ފޯނު ނުނަގަނީ؟ ކީއްވެ މަށާއި ވާހަކަ ނުދައްކަނީ؟” ޝާރިފް މެސެޖަކަށްފަހު މެސެޖެއް ފޮނުވަމުންދިޔައެވެ.
ޝާރިފްއަށް ކަންތައްތައް ކުރެވޭގޮތް ހަމަ ނޭނގެނީ ހެއްޔެވެ؟
“ކަމެއްނުވޭ” ޒާޔާ މެސެޖްގެ ޖަވާބުދިނީ ހިތަށް އަރަމުން ދިޔަހާ އެއްޗެއް އެއްފަރާތްކޮށްލަމުންނެވެ. އެތައް އިރަކު ވާހަކަ ދެއްކުމަށްފަހު ޒާޔާ ފޯނު ބޭއްވީ ޒިޔަލް އަށް ކާންދޭންވެގެންނެވެ. ޝާރިފްއާއި ވާހަކަ ދެއްކި ކަމުގައިވިޔަސް ޒާޔާ އުފަލެއްނުވިއެވެ. ހައްތަހާ ބޮޑަށް ދެރަވީއެވެ.

ހައުލާއާއި ދިމާނުވާތާ ގިނަ ދުވަސްވުމުން ޒިޔަލް ނިންދެވުމަށްފަހު ޒާޔާ ނިކުތީ ހައުލާ މެންގެޔަށް ދިއުމަށެވެ. ނަމަވެސް ޒާޔާ ގޭގެ ދޮރާށި ހުޅުވާލިއިރު ހައުލާ ހުރީ ދޮރުމަތީގައެވެ.
“ކާކުތަ ކަލެއަަށް މިގެ ދެއްކީ؟” ޒާާޔާ ހައުލާ އާއި ދިމާކޮށްލިތަނާ ހައުލާ ހޭންފެށިއެވެ. އެވަގުތު ޖީބުގައި އޮތް ފޯނު ވައިބްރޭޓް ވާންފެށުމާއެކު ޒާޔާ ފޯނު ނަގާ ބަލާލިއެވެ.
ނުދަންނަ ނަމްބަރެކެވެ.

“މަގޭ ފޯނަށް ނުގުޅައްޗޭ. ދިލާއަށް އެނގިއްޖެ ހުރިހާ ކަމެއްވެސް.” ޒާޔާ ފޯނު ކަންފަތުގައި ޖައްސާލިތަނާ ވާހަކަދެއްކީ ޝާރިފް އެވެ. ޝާރިފްގެ އަޑުގައިވާ ހާސްކަން ހެކިދެނީ ވަރަށް ބޮޑު މައްސަލައެއް ދިމާވެއްޖެކަމެވެ.

ނުނިމޭ

ހާސްކަން ޒާޔާ ވަށާލި ކަހަލައެވެ. ދެން ވާނީ ކިހިނެއްބާއޭ ޒާޔާގެ ހިތަށް އެރިއެވެ. ޝާރިފް ޒާޔާ އާއި އެއްކޮށް ދުރު ވާނީ ހެއްޔެވެ؟ ނޫނީ ދިލާ އެދެމީހުންގެ ގުޅުން މުޅި ރަށަށް ބޭޒާރު ކޮށްލާނީ ހެއްޔެވެ؟ ފަރުވާލެއްނެތެވެ. އެންމެންނަށް އެނގުނަސް ހެވެވެ. ޝާރިފްއާއި ދުރުގައި ނުހުރެވޭނެއެވެ. ހުރިހާ އެންމެންނާއި ކުރިމަތިލާނެހާ ހިތްވަރުވެސް ޒާޔާގެ އެބަހުއްޓެވެ. އެކަމަކު ޝާރިފްއާއި ނުލާ ޒާޔާ އަކަށް ނޫޅެވޭނެއެވެ.

“އޭތް. ކިހިނެއްވީ؟ ހިނގާބަލަ ބޭރަށް ނިކުމެލަން. ތިހެން އަބަދު ގޭގަ ހުންނާކަށް ނުވާނެ.” ޒާޔާގެ ކޮނޑުގައި ހައުލާ މަޑުމަޑުން ޖަހާލިއެވެ.

ހިނިތުންވެލަމުން ޒާޔާ ހިނގައިގަތެވެ. ލިބިފައިވާ ހާސްކަން ފޮރުވުމަށްޓަކައެވެ. ފަހަރުގައި މަގުމަތިން ނަމަވެސް ޝާރިފް ފެނިދާނެކަމުގެ އުއްމީދުގައެވެ.

ކަޅުފޮއެ ރެއެއް ފަދަ އަނދިރިކަން ވެރިވެފައިވާ މަގުތައް މަތީގައި ހިނގަމުން ދިޔައިރު ޒާޔާއަށް ދެވުނީ ވަށައި ހޯދަމުންނެވެ.

“ކޯޗެއްތަ ތި ހޯދަނީ؟” ޒާޔާގެ ހަރަކާތްތައް ހުރި ގޮތުން ހައުލާގެ ލޮލުގައިވެސް އަޅައިގަތެވެ.

“އަނދިރިކަމުން ބިރުންނު މިއުޅެނީ.” ޒާޔާ އަވަސް އަވަހަށް ބުނެލިއެވެ.

“ހިނގާބަލަ އެހެރަ ފިހާރައަށް ވަދެލަން.” ހައުލާ ކުރިމަތީގައި ހުރި ފިހާރައަށް އިޝާރާތްކޮށްލިއެވެ.

“ހައު ގޮސްލާފަ އާދޭ. އަހަރެން މަޑުކޮށްލާނަން.” ޒާޔާ ދެކޮޅު ހެދިއެވެ. އޭރުވެސް ވަށައިގެން ހޯދެއެވެ. ހައުލާ އިތުރަށް އާދޭސް ނުކޮށް ހިނގައިގަތީ ފިހާރަޔާއި ދިމާއަށެވެ.

އަނދިރި ދެކެ ބިރުގަންނަ އިރުވެސް ޒާޔާ ހުރީއެވެ. އުއްމީދުކޮށްގެންނެވެ. ޝާރިފްގެ ހިލަމެއް ވޭތޯއެވެ. ޒާޔާގެ ނަސީބުވެސް ރަނގަޅީއެވެ. ޝާރިފްގެ ސައިކަލްގެ އަޑު އިވުނުތަނާ ޒާޔާއަށް އަވަސް އަވަހަށް ބަލައިލެވުނެވެ. އޭރު ރައްޓެހި ކުއްޖަކާއެކު ޝާރިފް ސައިކަލްގައި ދުއްވާފައި ދަނީއެވެ. ޒާޔާގެ ބަސްނާހާ ހިތަށް ހަމަޖެހުމެއް ލިބުނީ ދެނެވެ. ދުރުން ނަމަވެސް ޝާރިފް ފެނުމުގެ ނަސީބު ލިބުނީމައެވެ.

“ވަރަށް ލޯބިވޭ.” ޒާޔާގެ ދޫ ހަރަކާތްކޮށްލިއެވެ. ޖެހެމުންދިޔަ ހިތްގައިމު ވައި ރޯޅީގެ އެހީގައި ޒާޔާ މަސައްކަތް ކުރީ އެ މެސެޖް ޝާރިފްއާއި ހަމައަށް ފޯރުކޮށްދެވޭތޯއެވެ. ލޮލުގެ ކޮޅަށް ޝާރިފް ގެއްލެންދެން ޒާޔާ ބަލަން ހުއްޓެވެ. އިތުރަށް ކުރެވޭނެކަމެއްވެސް ނެތެވެ. ޒާޔާ އަބަދުވެސް ހުންނަން ޖެހެނީ ޝާރިފްއާއި އެންމެ ދުރުގައެވެ.

“ހިނގާ ދާން.” ހައުލާ އެތަނަށް އައިސް ހުއްޓުނު އިރުވެސް ޒާޔާއަކަށް ނޭނގުނެވެ.

“ކޮންމެވެސް ކަމަކާ އެބަ ވިސްނަން ދޯ. ރާއިދު އާއި މައްސަލައެއް ޖެހުނީތަ؟” ޒާޔާގެ ބަދަލުވެފައިވާ މިޒާޖުން ހައުލާއަށް އަނެއްކާވެސް އަހައިލެވުނެވެ.

“ނޫން. މާލެ ދާން މިއުޅެނީ.” އެއްވެސް ވާހަކައެއް އެއްވެސް މީހަކާއި ހިއްސާ ކުރާކަށް ޒާޔާ ބޭނުމެއް ނުވިއެވެ.

“އިހަކަށް ދުވަހެއްނު ގޮއްސަ ތިއައީ. އަނެއްކާ ދަނީ؟” ހައުލާ ހައިރާންވިއެވެ.

“ހޫމް. އަސްލު ދިރިއުޅެނީ އެކޮޅުގައެއްނު. ރާއިދުގެ ފެމެލީވެސް އެކޮޅުގައެއްނު އުޅެނީ. އެހެންވެ.” ވާހަކައިގައި ތިބެގެން ގެޔާއި ހަމައަށް ދެވުނު އިރުވެސް ޒާޔާއަކަށް ނޭނގުނެވެ.

“ގުޑް ނައިޓް.” ބާއްޖަވެރި ރެއަކަށް އެދެމުން ޒާޔާ ވަނީ ގޭތެރެއަށެވެ.

 

ނިދިފައި އޮތް ޒިޔަލްގެ މޫނުގައި ފިރުމާލުމަށްފަހު ޒާޔާ އެނދުމަތީގައި އޮތް ފޯނު ނަގައި ބަލައިލިއެވެ. އޭރުވެސް ނުދަންނަ ނަމްބަރަކުން ގުޅަނީއެވެ.

އަވަސް އަވަހަށް ކަންފަތުގައި ޒާޔާ ފޯނު ޖައްސާލީ ޝާރިފް ކަމަށް ހީކޮށެވެ.

“ކަލޭ މޮޔަވެގެންތަ މަގޭ ފިރިމީހާ ފަހަތުން ތި ދުވަނީ.” ދިލާގެ އަޑުން ޒާޔާ ސިހުނެވެ. ނަމަވެސް ދިލާގެ ސުވާލުތަކާއި ޒާޔާ ކުރިމަތިލާން ޖެހެއެވެ.

“ކީކޭތަ ތި ކިޔަނީ؟” ހިންދިރުވާލަމުން ޒާޔާ އަހާލިއެވެ.

“ނޭނގޭ ކަމަށް ހަދާނެ ކަމެއްނެތޭ. މަށަށް ހުރިހާ އެއްޗެއްވެސް އެނގެޔޭ. ތީ ތިކަހަލަ އަންހެނުންގެ ވައްތަރޭ. އަބަދުވެސް ދުވާނީ މީހުންގެ ދިރިއުޅުން ހަލާކު ކުރަމުން.” ދިލާ ދުލަށް އައިހާ އެއްޗެއް ގޮވަމުންދިޔައެވެ.

“ކޮންކަހަލަ އަންހެނުންތަ؟ ތިކަހަލަ އޭ ނުބުނެ ސާފުކޮށް އެނގޭނެހެން ކިޔާބަލަ. ކަލޭގެ ދިރިއުޅުން މަ ހަލާކު ކުރަން ކުރި ކަމެއްވެސް ބުނެވެންވާނެ. މަށަށް ވެސް އިނގޭ ޓޯނަކުން އިނގޭ ތި ވާހަކަ ދައްކަނީ. ތި ޓޯނުން ވާހަކަ މަ ދައްކަން ފަށައިފިއްޔާ މާ ރީއްޗެއް ނުވާނެ. އެހެންވީމަ ލިމިޓްގަ ހުރޭ.” ދިލާ ވާހަކަ ދެއްކި ގޮތުން ޒާޔާގެ ގާތަށް ރުޅިއައެވެ.

“މިރަށު ހުރިހާ ފިރިހެނުން ކަލޭގެ ފަހަތުން ދުވިޔަސް މަގޭ ފިރިމީހާ ކަލޭގެ ފަހަތަކުން ނުދުވާނެ. އެހެންވީމަ މަގޭ ފިރިމީހާއޭ ކިޔައިގެން ދޮގު ވާހަކަ ފަތުރާނެކަމެއްނެތް.” ޒާޔާގެ ކަންފަތް މައްޗަށް ދިލާ ފޯނު ކަނޑާލިއެވެ.

އައިސްފައިހުރި ރުޅިން ފޯނުގަނޑު އަތު ތެރޭގައި ޒާޔާ އަށް ފިއްތާލެވުނެވެ. ނަމަވެސް ދެލޮލަށް ޖަމާވަމުން ދިޔަ ކަރުނަތަކާއެކު ޒާޔާއަށް ބިންމަތީގައި އިށީނދެވުނެވެ.

ދިލާ އެބުނީ ކިހާ ބޮޑު ތެދެއް ހެއްޔެވެ؟ އަހަންނަކީ ކިހާ ގޮތްކުޑަ އަންހެނެއް ހެއްޔެވެ؟ ދިލާގެ ހައްޤަކަށް އަރައިގަންނަން އަހަރެން މީ ކާކު ހެއްޔެވެ؟ ދިލާ ބުނިގޮތަށް އަހަރެން މީ ރަންޑިއެއް ހެއްޔެވެ؟ އެކަމަކު އަހަންނަށް ލޯބިވެވުނީއެވެ. ދިލާގެ ފިރިމީހާއަށް ޝާރިފްވުމުގެ ވެސް ކުރީގައެވެ. ފުރަތަމަ ނަޒަރުންވެސް އެ ސޫރަ ހިތުގައި ބިންވަޅު ނެގުނީއެވެ. ކުށަކަށްވާނަމަ ކުށެކެވެ. ނަމަވެސް ދިލާގެ ފިރިމީހާ ފަހަތަކުން އަހަންނެއް ނުދުވަމެވެ.

 

ރޮއެރޮއެ ދެލޯ ރަތްވި އިރުވެސް ޒާޔާގެ ރުއިމަކަށް ބަދަލެއް ނައެވެ. ފަތިސް ނަމާދު ބަންގި ގޮވީވެސް ޒާޔާ އެހާލުގައި އޮއްވައެވެ.

އާ ދުވަހަކަށް އަލި ވިލުނުއިރުވެސް ޒާޔާ އޮތީއެވެ. ބޯވެފައިވާ މޫނާއި ކުޑަވެފައިވާ ދެލޮލާއެކު މަންމައާއި ކުރިމަތިލާނެހާ ހިތްވަރެއް ޒާޔާގެ ނެތެވެ. އޮޕަރޭޝަނަށްފަހު ބަނޑުގައި އެހާ ވޭން އަޅާއިރުވެސް އޭގެ އެއްވެސް އިޙްސާސެއް ޒާޔާއަކަށް ނުވެއެވެ. ވާނީވެސް އެހެން ނޫން ހެއްޔެވެ؟ ހިތުގައި އަޅާ ވޭން މާބޮޑެވެ.

“ދަރިފުޅު ބަލީތަ؟” ކޮޓަރީ ދޮރުގައި ފާއިޒާ ޖަހާލިއެވެ.

ނުކައި ހުރުމުގެ ސަބަބުން ޒާޔާ ގައިގައި ތެދުވާނެހާ ހިތްވަރެއްވެސް ނެތެވެ. އެކަމަކު މަންމަ ހުއްޓާނުލާ ދޮރުގައި ތަޅާތީ ޒާޔާ ހިތްވަރުކޮށްލާފައި ތެދުވެގެން ގޮސް ދޮރު ހުޅުވާލިއެވެ.

“ސުބުޙާނަﷲ. ކިހިނެއްވެފަތަ ތިހުރީ ދެލޮލަށް.” ޒާޔާގެ މޫނާއި ދެލޯ ފެނުމާއެކު ފާއިޒާ ހާސްވިއެވެ.

“މަންމައަށް އިނގޭނު މަގޭ މައިގްރޭން މައްސަލަ ހުންނަކަން. ޒިޔަލް ބަލާލަ ދެއްޗޭ މިއަދު މަންމާ. އަހަރެން ރެސްޓް ކޮށްލަނިކޮށް ރަނގަޅުވެދާނެ.” ޒާޔާ އަނެއްކާވެސް ގޮސް އެނދުމަތީގައި އޮށޯވެލިއެވެ.

“ބޭސް ކައިގެން އޮށޯވެލަން ވާނީ. މަޑުކުރޭ. މި އަންނަނީ ހިފައިގެން.” ފާއިޒާ ހިނގައިގަތެވެ.

ނިތްކުރިމަތީގައި އަތް ބާއްވާލަމުން ޒާޔާ ދެލޯ މަރާލިއެވެ.

“ނިދީތަ. އިހަށް ތެދުވޭ ބޭސްކާލަން.” ފާއިޒާ ޖޫސްތައްޓަކާއެކު ޕެނަޑޯލް ގުޅައެއް ޒާޔާ އަށް ދިއްކޮށްލިއެވެ. ޒާޔާ އޭގައި ހިފީ މަންމަގެ ހިތްހަމަ ޖައްސާލަ ދިނުމަށްޓަކައެވެ.

މުޅި ރޭ އެއްކޮށް ނުނިދާ ހުރުމުގެ ސަބަބުން އޮށޯވެލިތަނާ ޒާޔާއަށް ނިދުނެވެ.

 

ދެ ދުވަސް ފާއިތުވެއްޖެއެވެ. ޝާރިފްގެ ޚަބަރެއް ނުވާތާ ލޮލަށްވެސް ޝާރިފް ނުފެނެއެވެ. މޮޅިވެފައި ޒާޔާ އިނީ އަތިރިމަތީގައި ހުރި އުނދޯއްޔެއްގައެވެ. އެތައް ފަހަރަކު ފޯނުގެ ކީޕެޑްގައި ޝާރިފްގެ ނަމްބަރު ޒާޔާ ޖަހައިފިއެވެ. ނަމަވެސް ގުޅާނެހާ ހިތްވަރު ނުލިބި ކޮންމެ ފަހަރަކު ނަމްބަރު ފޮހެލަނީއެވެ. ނަމަވެސް އެގޮތަށް ކެތްކޮށްލެވުނީ ޒާޔާއަށް އިރުކޮޅަކު އެވެ. ޒާޔާ ޝާރިފްގެ ނަމްބަރަށް އެންމެ ފަހުން ގުޅީއެވެ.

ވަރަށް އަވަހަށް ފޯނަށްވެސް ޖަވާބުވެސްދީފިއެވެ.

“ކަލޭ މޮޔަވެގެންތަ މަށަށް ތި ގުޅަނީ. ދޮގު ހަދައިގެން މީހުން ކައިރީގައި ވާހަކަ ދައްކާނެ ކަމެއްނެތް. މަ ނޯންނާނެ ކަލެއަށް ގުޅާފައެއް.” ޝާރިފްގެ ހަރުކަށި ލަފްޒުތައް ޒާޔާގެ ހިތް ތޮރުފާލި ކަހަލައެވެ.

ފޯނު ކެނޑުމާއެކު އަޑުގެ ނެތްކޮޅަށް ޒާޔާއަށް ރޮއެ ގަނެވިއްޖެއެވެ. އެހަމަ ޝާރިފް ހެއްޔެވެ؟ އެހާ ހަރުކަށިކަމާއެކު ޝާރިފް ވާހަކަ އެދެއްކީ ދިލާ ކައިރީގައި ހުރީމަ ހެއްޔެވެ؟ ދިލާއަށްވުރެ ޒާޔާ މުހިއްމު ކަމަށް އަބަދުމެ ޝާރިފް ބުނަމުންދާއިރު އެގޮތަށް ޝާރިފް ކަންތައް ކުރަންވީ ކީއްވެ ހެއްޔެވެ؟ ހިތް ފަޅައިގެންދާހާ ވެއެވެ. ނަމަވެސް ޒާޔާ ޝަކުވާ ކުރާނީ ކާކުގެ ކައިރީގައި ހެއްޔެވެ؟ ކޮން ލަފްޒަކުން ހެއްޔެވެ؟ ތެދެކެވެ. ޝާރިފްއަކަށް ޒާޔާ މުހިއްމެއް ނޫނެވެ. ޒާޔާއަކީ ޝާރިފް ފޫހި ފިލުވާލަން ހިނދުކޮޅަކަށް ބޭނުންކޮށްލި މީހެކެވެ. މިހާރަކުދެން އަލަކުން ޒާޔާގެ ކުރެވޭނެ ބޭނުމެއްވެސް ނެތެވެ. އަމިއްލަ މީހާގެ ހާލު ހިތަށް އަރާފައި ޒާޔާ އަށް މޫނުމަތީގައި އަތް އެޅުނެވެ. މުޅި ދުނިޔެވެސް ޒާޔާއަށް މަލާމަތް ކުރަނީއެވެ. ސާފު ހިތަކުން ވެވުނު ލޯބީގެ ބަދަލުގައި ލިބުނީ ރަންޑިއެއްގެ ނަމެވެ. މައްސަލައެއްނެތެވެ. އަހަންނަކީ ރަންޑިއެކެވެ. އެކަމާއި އެއްބަސްވެ އެލަޤަބް ލިބިގެންފީމެވެ.

 

ޒާޔާގެ ހިތާމަތަކަށް ލުޔެއް ނުލިބެއެވެ. ނަމަވެސް ޒާޔާގެ މޫނުމައްޗަށް ހިނިތުންވުމެއް ގެނެސްދެނީ ޒިޔަލްގެ މައުސޫމު މޫނެވެ. ޒާޔާގެ ހުރިހާ ވަގުތެއް ހުސްކޮށްފައިވަނީވެސް ޒިޔަލްއަށް އެކަންޏެވެ. ޝާރިފްގެ ޚިޔާލުތަކާއި މަޑުމަޑުން ޒާޔާއަށް ދުރަށް ދެވެން ފެށުނެވެ. ޝާރިފްގެ ޚިޔާލުތައް ސިކުނޑި ތެރެއިން މަޑުމަޑުން ފިލައިގެންދާން ފެށި ކަހަލައެވެ. އެ ހިތްގައިމު ހަވީރުގެ ވަގުތުގައި ޒިޔަލް ރީތިކޮށްލައިގެން ޒާޔާ ނިކުތީ ހިނގާލާށެވެ. ދުވަހަކީ ބުރާސްފަތި ދުވަސްކަމުން ރާއިދުވެސް އަންނާނެތީއެވެ.

ޒިޔަލްގެ ކުޑަކުޑަ އަތުގައި ހިފާލައިގެން ޒާޔާ ހިނގަމުންދިޔައީ އެ ރަށުގެ ހިތްގައިމު ފަންނުގައެވެ. ހަވީރުގެ ވަގުތުކަމުން މުޅި ފަންނު ސަރަހައްދުވަނީ މީހުންނުން ފުރިފައެވެ.

ފެންނަ ކޮންމެ މީހަކަށް ހިނިތުންވެލަމުން ޒާޔާ ހިނގަމުންދިޔައެވެ. ކުއްލިއަކަށް ލޮލުގައި އަޅައިގަތީ ސައިކަލްގައި ޒާޔާއާއި ދިމާއަށް ދުއްވާފައި އަންނަ ޝާރިފްއެވެ. މާޒީގެ ސޮފްޙާތައް ލޯ ކުރިމަތީގައި ފިލްމެއް ފަދައިން ޕްލޭވަމުންދިޔައެވެ. އެކުގައި ހޭދަކޮށްފައިވާ އެ ވަގުތުތަކެވެ. ޝާރިފްގެ ތުންފަތުން ލިބެމުންދިޔަ ލައްޒަތާއި އަރާމެވެ. ޒާޔާގެ ކޮންމެ އަދާއަކަށް ފިދާވި ޝާރިފްގެ އޯގާތެރިކަމާއި އެލޯބި ފިރުމުންތަކެވެ. ވަށައިގެން ތިބިހާ މީހުންނާއި އިވެމުންދާ އަޑުތައް ޒާޔާއަށް އިޙްސާސްވެސް ނުވާ ކަހަލައެވެ. ހަމައެކަނި ފެންނަނީ ޝާރިފްއެވެ.

“ކަލޭ މަށަށް ގުޅައިގެން ނުވާނެ.” ޝާރިފް އެންމެ ފަހުން ބުނެލި ޖުމްލަ ކަންފަތުގައި ތަކުރާރުވެގެން ދިޔުމާއެކު ޒާޔާއަށް ދުރަށް މޫނު އަނބުރާލެވުނެވެ. ދެން އިތުރަށް ޝާރިފްއާއި ދިމާއަށް ބަލަންވެސް ޒާޔާ ބޭނުމެއްނޫނެވެ.

ޖީބުގައި އޮތް ފޯނު ރިންގްވާން ފެށީ އެވަގުތުއެވެ.

“މި ގުޅާލީ އެއާޕޯޓުން. މާދަން ހެދުނު ފްލައިޓްއިން ފުރަން ކޮންފާމްތޯ އަހާލަންވެގެން.” ޒާޔާއަށް އާއެކޭ ބުނެވުނީ ވަރަށް އަވަހަށެވެ. ޝާރިފް ފެންނަ ހިސާބުގައި އުޅެން ޒާޔާއަކަށް ފަސޭހައެއް ނޫނެވެ. ޝާރިފްގެ ކުރިމައްޗަށް އަރާކަށް ޒާޔާ ބޭނުމެއްވެސް ނޫނެވެ. ޒާޔާ ޝާރިފް ދެކެވީ މަތިވެރި ލޯބީގެ ބަދަލުގައި ޒާޔާ އަށް ލިބުނީ ރަންޑިއެއްގެ ނަމެވެ. އެވަރުން ފުދިއްޖެއެވެ.

 

ޒިޔަލްގެ އަތުގައި ހިފާލައިގެން ޒާޔާ ހިނގައިގަތީ އެނބުރި އައިކޮޅަށެވެ. ފަސްއެނބުރި ބެލުމެއް ދެން ނެތެވެ. މީހުން ބުނެއެވެ. ތެދުވެރި ގުޅުމަކަށް ނިމުމެއް ނާންނާނެއެވެ. ހިތުން ވާ ލޯތްބަކަށް ބަދަލެއް ނާންނާނެއެވެ.

ޒާޔާގެ މަންޒިލަކީ ޝާރިފްއެއް ނޫނެވެ. އެއީ ފެނުނު ހުވަފެނެކެވެ. ދުވަހަކުވެސް ޒާޔާގެ ދިރިއުޅުމަކަށް މިކަހަލަ ދުވަހެއް ނާދެއެވެ. މީހަކަށްޓަކައި އެހާ ވަރަށް ޒާޔާ ކަރުނަ އޮއްސާފައެއްވެސް ނުވެއެވެ. ބަދަލުވީ ޝާރިފެވެ. ޝާރިފް ޒާޔާދެކެވީ ލޯތްބެއްނޫނެވެ. އެގުޅުމަށް ދޭނެ ނަމެއް ޚުދު ޒާޔާ އަކަށްވެސް ނޭނގެއެވެ.

 

އިރުއޮއްސި އުދަރެހަށް ރަތްވިލާގެ އަސަރު ވެރިވާން ފެށިއެވެ.

ޒާޔާ އިނީ ރާއިދު ފާހާނާއިން ނިކުންނާނެ އިރެއްގެ އިންތިޒާރުގައެވެ.

“ހާދަ އަވަހަށް ޒިޔަލް ތި ނިންދެވީ؟” ބޮލުން ފެންހިއްކަމުން ރާއިދު ފާހާނާއިން ނިކުތެވެ.

“އޭތް. ސެޓްވެބާ.” ރާއިދު ސިހުނީ ޒާޔާގެ އަޑުންނެވެ.

ނަމަވެސް ހަމަ އެސިކުންތުގައި ރާއިދުއަށް ހެވުނެވެ.

“ތީނަގެ ނަން ބުނެލާފަ ދޭބަލަ.” ޒާޔާވެސް ހޭން ފެށިއެވެ.

“ޒާޔާ އަދިވެސް ހަނދާން އެބަހުރިތަ؟” ރާއިދު ތުވާލި އެނދު މައްޗަށް އެއްލާލަމުން ކުޑަދޮރު ކައިރީގައި ލެގިލައިގެން ހުރި ޒާޔާގެ ކުރިމައްޗަށް ގޮސް ހުއްޓުނެވެ. ދެންމެގަ ޒާޔާ އަނގައިން ބޭރު ކުރި ލަފްޒުތަކަކީ މީގެ އަށް އަހަރު ކުރިން ރާއިދު އަށް އަލަށް ޒާޔާ ފެނިގެން ޒާޔާއާއި ދިމާއަށް ބުނެފައި ހުރި ލަފްޒުތަކެވެ.

“އާދޭ.” ރާއިދު ދެއަތް ފުޅާ ކޮށްލުމާއެކު ޒާޔާ ރާއިދުގެ އަތު ތެރެއަށް ވަނީ ދުވެފައެވެ.

ރާއިދު ޒާޔާ އަތްމައްޗަށް އުފުލާލަމުން އެނދާއި ދިމާއަށް ހިނގައިގަތެވެ.

 

“ހެޕީތަ؟” ރާއިދު ޒާޔާގެ ކަންފަތާއި ކައިރިވެލުމާއެކު ޒާޔާއަށް ސިހިފައި ރާއިދުގެ މޫނަށް ބަލާލެވުނެވެ. ވެފައިހުރި ވަރުބަލިކަމާއެކުވެސް ރާއިދު ތެދުވިއެވެ. ނުވައެއް ޖަހާއިރު ފުރަން ޖެހޭތީއެވެ.

“ކީކޭ ތި ބުނީ؟ ކާކު އެހެން ބުނަން ދަސްކޮށްދިނީ؟” ޒާޔާ ރާއިދުގެ މޫނަށް ބަލަން އޮތީ ނުރުހިފައެވެ.

“ކޯޗެކޭތަ؟” ރާއިދުއަކަށް ޒާޔާ ބުނި އެއްޗެއް އޮޅުމެއް ނުފިލިއެވެ.

“ތި ބުނީނު ދެންމެ. ހެޕީހޭ؟” ޒާޔާ އަށް ވާހަކަދެއްކުނީ އަޅައަޅައިގެންފައެވެ.

“އަޅެ. އަދި މީހަކު ދަސްކޮށްދެން ޖެހޭތަ؟ ޒާޔާ ވެސް ދޯ.” ރާއިދު ހޭންފެށިއެވެ. އަމިއްލަ މީހާއަށް ކުރެވުނު މޮޔަ ސުވާލު ހިތަށް އަރާފައި ޒާޔާއަށް ހުރެވުނީ ހިމޭނުންނެވެ. ޝާރިފް ބުނެފައިވާ ލަފްޒެއް އެހެން މީހަކަށް ނުބުނެވޭނެ ހެއްޔެވެ؟ ޒާޔާއަށް އެގޮތަށް ވިސްނެންވީ ކީއްވެގެން ހެއްޔެވެ؟

“ކައިގެންނު ދާނީ؟ އަންނާނަން ކާން ހަދާފަ.” ހެދުން ގަޔަށް ވައްޓައިލަމުން ޒާޔާ ބުނެލިއެވެ.

 

ކާގޭގައި ކާން ހަދަން ހުރިއިރު ޒާޔާ ވިސްނަމުން ދިޔައެވެ. ޝާރިފް ކޮންމެ ގޮތަކަށް ކަންތައް ކުރިޔަސް ވަރިހަމައެވެ. ޒާޔާ ޝާރިފް ދެކެ ކިތަންމެ ލޯބި ވިޔަސް ޝާރިފް ޒާޔާދެކެ ލޯބިވުން މަޖުބޫރެއްވެސް ނޫނެވެ.

ރާއިދު އާދޭތޯ ބަލައިލުމަށްފަހު ޒާޔާ ޖީބުގައި އޮތް ފޯނު ނަގާ ޝާރިފްއަށް ގުޅާލިއެވެ.

“އަހަރެން ބޭނުން މީޓް ކޮށްލަން.” ޝާރިފް ފޯނު ނެގުމާއެކު ޒާޔާ އަޑަށް ބާރުލަމުން ބުނެލިއެވެ.

“ދާނަން ކުރިންވެސް ދާ ގަޑީގަ.” ޝާރިފްގެ ޖަވާބު އަޑުއިވުމާއެކު ޒާޔާ ފޯނު ކަނޑާލިއެވެ.

ކޮންފަދަ ދުރުކަމެއް ހެއްޔެވެ؟ މީގެ ކުރިން ފޯނު ބޭއްވޭނީވެސް ފޯނު ބާއްވަން އުޅޭތާ އެތައް އިރެއްފަހުންނެވެ. އެކަމަކު މިހާރު ދެމީހުން ކުރެ އެކަކުވެސް ދައްކާނެ ވާހަކައެއް ނެތެވެ. ހާލަތު ބަދަލުވެގެން ދިޔައީ ހީވެސް ނުކުރާހާ އަވަހަށެވެ.

 

މެންދަމުން އަލިވެ އެކެއް ޖަހައިފިއެވެ. ޒާޔާ އިނީ ގަޑި ބަލާލަ ބަލާލައެވެ. އެގަޑީގެ ގޮތުން ޝާރިފް އަކަށް ގުޅާކަށްވެސް ނުކެރުނެވެ. ތިނެއް ޖެހިއިރުވެސް ޝާރިފްގެ ޚަބަރެއް ނުވިއެވެ. ނަމަވެސް ޒާޔާ އެހާ ދެރައެއް ނުވިއެވެ. މިހާރު އާދަވެއްޖެއެވެ.

އަލަމާރި މަތީގައި ހުރި ފޮށި ނަގައި ހެދުންތައް ފަތްޖަހާފައި ޒާޔާ ޕެކް ކުރަން ފެށިއެވެ. ފޯނުން ޝާރިފްގެ ނަމްބަރުވެސް ފޮހެލިއެވެ. ދެން ދުވަހަކުވެސް ޝާރިފްގެ ހިޔަނި ފެންނަ ހިސާބަށްވެސް ޒާޔާ ނުދާނެއެވެ.

 

މާލެ ބަދަލުވުމަށްފަހު ޒާޔާ ހަމައަކަށް އެޅުނެވެ. ރައްޓެހިންނާއެކީގައި ވަގުތުތައް ހޭދަކުރަން ފެށުމުން ޝާރިފްގެ ޚިޔާލުތަކާއި ދުރުވާން ފެށުނެވެ. ނަމަވެސް އެކަނިވާ ކޮންމެ ވަގުތަކު ޝާރިފްގެ ޚިޔާލުތައް ޒާޔާ ވަށާލައެވެ.

 

ފިނި ފިނި ރެއެކެވެ. ޒާޔާ ހުރީ ބެލްކަނީގައެވެ. އުޑުގައި ރަސްކަން ކުރަމުންދާ ހަނދަށް ބަލަހައްޓައިގެން ކަރުގައި ޝާރިފް އަޅުވަދީފައި އޮތް ފަށުގައި ހިފަހައްޓާލައިގެންނެވެ. ކަންފަތުގައި ގުގުމަމުން ދިޔައީ ޝާރިފް އެންމެ ފަހުން ބުނެލި ހަރުކަށި ބަސްތަކެވެ. އެ ހުރިހާ ކަމެއް ސިކުނޑި ތެރޭގައި އެނބުރިގަތުމާއެކު ޒާޔާގެ ގާތަށް ރުޅިއައެވެ. ވަގުތުން ކަރުގައި އޮތް ފަށް ނެގިއެވެ. އެވަގުތު ފޯނު ރިންގް ވާން ފެށިއެވެ. ފޯނުގެ ސްކްރީނަށް އަރާފައިވާ ނަން ފެނުމާއެކު ޒާޔާއަށް ހުއްޓުން އެރިއެވެ. ގުޅަނީ ޝާރިފް ކަމަށްވާތީއެވެ.

ޒާޔާ އެފަށް ކަރުން ނެގިކަން ޝާރިފްއަށް އެނގުނީ ހެއްޔެވެ؟ ޒާޔާ އަޅާވެސް ނުލާ ފޯނު ސައިލެންޓް ކޮށްލުމަށްފަހު ވަތްގަނޑު ތެރޭގައި ފޯނު ބާއްވާލިއެވެ. އަދި އެނދުގައި އޮށޯވެ ދެލޯ މަރާލިއެވެ.

ޖެހިގެން އައި ދުވަހުވެސް ޝާރިފް އެތައް ފަހަރަކު ގުޅިއެވެ. ނަމަވެސް ޒާޔާ ޖަވާބެއް ނުދެއެވެ.

 

“ކީކޭ ބޭބީ؟” ރާއިދު ގުޅީ ޒިޔަލް ނިންދަވަން ޒާޔާ އިންދައެވެ.

“އަހަރެން މި އަންނަނީ ޒާޔާ މިނިވަންކޮށްދޭން.” ރާއިދުގެ އަޑުގައިވަނީ ބުނެދޭން ފަދަ ނޭނގޭ ރިހުމެކެވެ.

“ވަޓް؟” ޒާޔާ ހުރީ ބުނާނެ އެއްޗެއްވެސް ނޭނގިފައެވެ. ކުއްލިއަކަށް ރާއިދު އެހެން ބުނަން ޖެހުނީ ކީއްވެބާއެވެ.

ނުނިމޭ

 

އެއްވެސް ކަމެއްނުވެ ރާއިދު އެވަރުގެ އެއްޗެއް ނުބުނާނެކަން ޒާޔާ ދެނެ ހުއްޓެވެ. ރާއިދު ނުބުންޏަސް ރާއިދު އެހެން ބުނަން ޖެހުނު ސަބަބު ޒާޔާ އަށް އެނގެއެވެ. ރާއިދު ކޯލް ކަނޑާލިއިރުވެސް ޒާޔާ އިނީއެވެ. އިތުރަށް ޒާޔާ ބުނާނެ އެއްޗެއް ޚުދު ޒާޔާ އަކަށްވެސް ނޭނގުނެވެ. ރާއިދު ކައިރީގައި ސަބަބު އަހާނެ ހިތްވަރު ޒާޔާގެ ނެތީވެސް އެވަރުގެ ކަމެއް ޒާޔާއަށް ކުރެވިފައި އޮތީމައެވެ.
ނިދިފައި އޮތް ޒިޔަލް ތަންމަތީގައި ބޭއްވުމަށްފަހު ޒާޔާ ބެލްކަންޏަށް ނިކުތެވެ. މިދުވަސް އަންނާނެކަން މާކުރިންވެސް ޒާޔާއަށް އިނގެއެވެ.
ފިކުރުތަކުން ބޯހާސްވެފައި އިން ޒާޔާ ސިހުނީ އަނެއްކާވެސް ފޯނުގެ ރިންގް ގެ އަޑަށެވެ.
“ރާއިދު ކިހިނެއްވެގެންތަ ތި އުޅެނީ؟” ފޯނު ނެގި ގޮތަށް ޒާޔާ ވާހަކަ ދައްކަން ފެށީ ރުޅިއައިސްފައެވެ.
“ވެގެން އުޅޭ ގޮތެއް އިނގޭނެ ޒާޔާއަށް.” ރާއިދުގެ ރާގުގައިވަނީ ހަރުކަށިކަމެވެ.
“ވެގެން އުޅޭގޮތް ރާއިދުއަށް ބުނެވެން ޖެހޭނެ. ބުނޭ މިހާރު.” ޒާޔާ އަމުރުކޮށްލިއެވެ.
“ޝާރިފް ކިޔާ މީހަކާއި ޒާޔާ އާއި އޮންނަނީ ކޮން ގުޅުމެއް؟” ރާއިދު ޒާޔާގެ ދުލުގައި ތަޅު އަޅުވާލި ކަހަލައެވެ. ޝާރިފްގެ ނަން އިވުމާއެކުވެސް ޒާޔާގެ ހިތް ބާރުބާރަށް ތެޅެންފެށިއެވެ.
“ޒާޔާގެ ތި ހިމޭންކަމުންވެސް ޖަވާބު ލިބިއްޖެ.” ރާއިދު އަނެއްކާވެސް ފޯނު ކަނޑާލިއެވެ.
ހަމަ ރަނގަޅަށްވެސް ޒާޔާއަށް ރޮވިއްޖެއެވެ. ޒާޔާއާއި ޝާރިފްގެ ސިއްރު ރާއިދުއަށް އެނގުނު ގޮތަކާއިމެދު ޒާޔާ ވިސްނަން ފެށިއެވެ.
ފުރަތަމަވެސް ޒާޔާ ގުޅާލީ ޝާރިފްގެ ނަމްބަރަށެވެ. ފުރަތަމަ ރިންގުން ޝާރިފް ފޯނަށް ޖަވާބުދީފިއެވެ.
“ބޭނުންވި ކަންތައް ވެއްޖެއެއްނު. އުފަލުން ހުރޭ.” ޒާޔާ ފޯނު ކަނޑާލީ ޝާރިފްގެ ޖަވާބަކަށް އިންތިޒާރު ކުރުމެއްވެސް ނެތިއެވެ.
ނަމަވެސް ދެވަނަ ސިކުންތުގައި އަނެއްކާވެސް ޝާރިފް ގުޅައިފިއެވެ.
ޒާޔާ ފޯނަށް ޖަވާބު ދިނެވެ.
ހިތަށް އައިހާ އެއްޗެއް ޝާރިފްއަށް ގޮވާލަން ބޭނުންވެފައި ހުރި ވަރުންނެވެ.
“ޒާޔާ ހަމަ ޖެހިބަލަ. އެންމެންވެސް މަށާއި ވެސް ދިމާ ކުރޭ. ޝައްކުވެގެން އެހެން އެ ކިޔަނީ. އެކަމަކު މަށެއް ޒާޔާ ދެކެ ރުޅި ނާންނަމެއްނު. ދުރަކަށްވެސް ނުދަމެއްނު.” ޝާރިފްގެ އަޑުގައިވާ މޮޅިވެރިކަމުން ޝާރިފްއަށް ވާހަކަދެއްކުނީ ވަރަށް މަޑުންނެވެ.
“ކަލޭ ހާ ގޮތެއް ނެތް މީހެއް މަށެއް ދުވަހަކުވެސް ނުދެކެމޭ. ކަލޭ ބޭނުންވީ ހަމައެކަނި އަހަރެންގެ ބޭނުންކޮށްލަން.” ރުޅި އައި ނަމަވެސް ޒާޔާއަށް ވާހަކަ ދެއްކުނީ ރޮވިފައެވެ.
“ތިހެން ނުބުނޭ ޒާޔާ. އަސްލުވެސް ޒާޔާދެކެ ވަރަށް ލޯބިވޭ.” ޝާރިފްގެ މޮޅު ދޮގުތައް އަޑުއަހަން އިތުރަށް ބޭނުން ނުވާތީ ޒާޔާ ކޯލް ކަނޑާލިއެވެ. އެތައް ފަހަރަކު ޝާރިފް ގުޅި ނަމަވެސް ޒާޔާ އަޅާވެސް ނުލިއެވެ. ދިލާ އާއި ޝާރިފް އާއި މައްސަލަ ޖެހުނު ދުވަހުން ފެށިގެން ޝާރިފްގެ ހަޔާތުން ޒާޔާ ބޭރުކޮށްލައިފިއެވެ. ޝާރިފް ޒާޔާ އަށް ވީ ހުރިހާ ވައުދުތަކެއްވެސް އުވާލާފައެވެ. ޒާޔާ ޝާރިފް ދެކެވީ ލޯބީގައި އެއްވެސް އަގެއްނެތެވެ. އެހެން ނޫންނަމަ ދިލާގެ އުފަލަށްޓަކައި ޝާރިފް ޒާޔާ ހިތާމައިގެ ކަނޑަކަށް ޤަރަޤުކޮށެއް ނުލީހެވެ.

ހިތް ފުރެންދެން ކަރުނަ ބޭލުމަށްފަހު ޒާޔާ ރާއިދުއަށް މެސެޖްކޮށްލިއެވެ.
-ރާއިދުއަށް މަށަށް އިތުބާރުނެތިއްޔާ މަށާއި ދުރުވިޔަސް އޯކޭ.-
ރާއިދުގެ ޖަވާބަކަށް އިންތިޒާރުނުކޮށް ޒާޔާ ފޯނު ސައިލެންޓްކޮށްލަމުން އެނދުގައި އޮށޯވެ ދެލޯ މަރާލިއެވެ.

 

ނިދިފައި އޮތް ޒާޔާއަށް ހޭލެވުނީ ފޯނުގެ ރިންގްގެ އަޑަށެވެ. އޭރު ރާއިދު ގުޅަނީއެވެ.
“ބޭބީ. ސޮރީ. ޝާރިފް އާއި ވާހަކަ ދެއްކުމުން އެނގިއްޖެ އެއީ ހަޤީޤަތެއް ނޫންކަން. ބައެއްގެ ރޭވުމެއްކަން. މާފްކުރޭ. ޕްލީސް.” ޒާޔާ ފޯނު ނިއްވާލިއެވެ. ރާއިދު ހާސްވާނެކަންވެސް އެނގިހުރެއެވެ.
ޝާރިފްއަށް މި ގުޅުމަށް އިންކާރު ކުރަން ކިހާ ފަސޭހަ ހެއްޔެވެ؟ ޒާޔާއަށްވެސް ރާއިދު ކުރިމަތީގައި ސީދާ ނޫނެކޭ ބުނާކަށް ނުކެރުނެވެ. ޝާރިފްދެކެ ލޯބިވާތީއެވެ. ޝާރިފްއަށް ގުޅަންބޭނުންވާތީ ޒާޔާ އަނެއްކާވެސް ފޯނު އޮން ކޮށްލިއެވެ.
ނަމަވެސް ފުރަތަމަވެސް އައީ ރާއިދުގެ ކޯލެކެވެ.
“ފޯނުގެ ޗާޖްދިޔައީ. ދެން އެވާހަކަ ނުދައްކާ.” ރާއިދު ސުވާލު ކުރުމުގެ ކުރިން ޒާޔާ ބުނެލިއެވެ.
ރާއިދުގެ ހިތް ހަމަޖައްސާލަދިނުމަށްފަހު ޒާޔާ ޝާރިފްއަށް ގުޅާލިއެވެ.
“ކޮންކަމެއްތަ ސާބިތުކޮށްދެން ތިއުޅެނީ؟ ބުނެވެން އޮންނާނެ ދޯ މަގޭ ލައިފް ސަލާމަތްކޮށްދިނީ ޝާރިފްއޭ. އެއީތަ އަސްލު މަޤްސަދަކީ.” ހިތްހަމަ ނުޖެހިފައި ހުރުމުން ޒާޔާ އަށް ވާހަކަދެއްކުނީ ރުންކުރު ފާޑަކަށެވެ.
“އަސްލު މަޤްސަދަކީ ޒާޔާގެ ހިނިތުންވުން. ޒާޔާގެ އުފާ. ޒާޔާގެ ދިރިއުޅުން.” ޝާރިފް ފަށުވި ލަފްޒުތަައް ފައްޗެއްހެން އަމުނާލުމާއެކު ޒާޔާ ހިމޭންވިއެވެ.
ޝާރިފްއަށް ޒާޔާގެ ހިތާއި އެހާ ފަސޭހައިން ކުޅެވެނީ ކީއްވެ ހެއްޔެވެ؟ ޒާޔާގެ ހިތްހަމަ ޖެހުމުގެ އަސްލަކަށް ޝާރިފްވަނީ ކީއްވެ ހެއްޔެވެ؟
“ޒާޔާ. މަށެއް ބޭނުމެއް ނޫނޭ މަށާއި ހެދި ޒާޔާގެ ދިރިއުޅުން ހަލާކުވާކަށް.” ޒާޔާގެ ހިމޭންކަން ފެނިފައި ޝާރިފް އަނެއްކާވެސް ބުނެލިއެވެ.
“ތޭންކްސް.” ޒާޔާ ޝުކުރު އަދާކުރީ ހިތަކުން ނޫނެވެ. ހިތުގައި ހުރި ވާހަކަތަކާައި ސުވާލުތައް ޝާރިފްއާ ހިއްސާ ކުރުމަކީ ޒާޔާ ދެކޭ ގޮތުގައި ބޭކާރު ކަމެކެވެ. ޝާރިފްގެ ޖަވާބެއް ހުހެއް ނުވާނެއެވެ. ޒާޔާ ޝާރިފް އާއި އަނެއްކާވެސް ވާހަކަ ދައްކަން ފެށިއެވެ. ކުރިއެކޭ އެއްގޮތަށެވެ.
ޝާރިފްގެ ލޯބިވެތި ބަސްތަކުން ޒާޔާގެ ހިތްފުރަމުން ޒާޔާ އެނދުގައި އޮށޯވެލިއެވެ.

 

ވަރަށް ލަސްވަންދެން ޝާރިފްއާައި ވާހަކަ ދެއްކުމަށްފަހު ނިދުމުން ޒާޔާ އަށް ހޭލެވުނީ ވަރަށް ލަހުންނެވެ. އޭރުވެސް ކޮޓަރި ދޮރުގައި ހުއްޓާނުލާ ޓަކި ޖަހަމުންދިޔައެވެ. ފުންމައިގެން ތެދުވެ ޒާޔާ ގަޑި ބަލައިލިއެވެ. އޭރު ދިހައެއް ޖަހަނީއެވެ. ޒިޔަލް ވެސް އޮތީ ހޭލައެވެ.
ހޭވިފައިވާ އިސްތަށިގަނޑު އަތުން ރީތި ކޮށްލަމުން ޒާޔާ ދޮރު ހުޅުވާލިއެވެ.
“ސާބަސް. އަދި ތި ހޭލެވުނީތަ؟” ކުރިމަތީގައި ހުރި ސަމާ ޒާޔާއަށް ހިނިތުންވެލިއެވެ.
“ވަދެބަލަ. އެބަ އަންނަން ޒިޔަލް އަށް ކާން ހިފައިގެން.” ސަމާ ކޮޓަރި ތެރޭގައި ބޭންދުމަށްފަހު ޒާޔާ މިސްރާބު ޖެހީ ބަދިގެއާއި ދިމާއަށެވެ. ޒިޔަލްއަށް ހެނދުނުގެ ނާސްތާ ދޭން މިހާރު ލަސްވެސް ވެއްޖެއެވެ.

“ޒާޔާ. ރޭގަ ނުނިދާ ކީއްކުރީތަ؟ ވަރަށް ލަސްވި އިރުވެސް ކޯލް ވެއިޓިންގަ އިނީ މަ ގުޅި އިރުވެސް.” ސަމާ ހުރީ ޒާޔާ ނައިސްގެން ކަހަލައެވެ. ކާ ތަށި ހިފައިގެން ޒާޔާ ކޮޓަރިއަށް ވަންތަނާ ސަމާ ސުވާލުފޮށި ހުޅުވާލިއެވެ.
“ނުކުރަން ކަމެއް. ފްރެންޑެއް ގުޅީ.” ޒިޔަލް އުރާލައިގެން އައިސް ކައިރީގައި ބައިންދަމުން ޒާޔާ ޒިޔަލް އަށް ކާންދޭން ފެށިއެވެ.
“މަށަށްތަ ތި އޮޅުވާލަނީ. މަށަށް ޒާޔާ އެނގޭތާ އަށް އަހަރުވީއޭ.” ސަމާ ދެލޯ ކުޑަކޮށްލަމުން ޒާޔާގެ މޫނަށް ބަލާލިއެވެ.
“ޝާރިފް ގުޅީ ދޯ.” އިސްޖެހިފައިވާ ޒާޔާގެ މޫނުން ހުރިހާ ކަމެއް ސާފުކޮށް ފެންނަން ހުއްޓެވެ.
“ޝާރިފް އަހަރެން ދެކެ ލޯބިވެޔޭ.” ޒާޔާ އަޑަށް ބާރުލަމުން ބުނެލިއެވެ.
“އެހެންވީއިރު އިންނަންވީނު ތި ދެމީހުން. ލޯބިވަންޏާ ކައިވެނި ކުރަންވެސް ބޭނުންވާނެއެއްނު.” ސަމާގެ ރާގުގައި ވަނީ މަލާމާތެވެ.
“އިނދެގެން ހުރެ ކިހިނެއް އަނެއްކާ އިންނާނީ.” ޒާޔާ ސީރިއަސްވެލިއެވެ.
“ވަރިވެވޭނު ދެމީހުންނަށްވެސް.” އެންމެ ފަހުން ދޭނެ ޖަވާބު ހުސްވީ ޒާޔާގެއެވެ.
ދުރަށް މޫނު އަނބުރާލައިގެން ޒާޔާ ހުރީ ހަމަ އަސްލުގަވެސް ބުނާނެ އެއްޗެއް ނޭނގިފައެވެ.
“ތި ލޯބިވާ ޝާރިފް ނާހާތަ މެރީ ކުރާކަށް.” ސަމާ ޒާޔާގެ ކޮނޑުގައި ހިފާ އޭނާއާއި ދިމާއަށް އަނބުރާލިއެވެ.
ޒާޔާ އެއްވެސް އެއްޗެއް ނުބުނެ ހުރީއެވެ. ސަމާ ކިޔަން އެ އުޅެނީ ކީކޭ ކަން ޒާޔާއަށް ނޭނގެނީކީ ނޫނެވެ. ނަމަވެސް ސަމާގެ އެއްވެސް ސުވާލެއްގެ ޖަވާބެއް ޒާޔާގެ އަތުގައި ނެތީއެވެ.
“އަންހެނާ ހޭ އަރާބަލަ ދެންވެސް. ޝާރިފް އެވަނީ ލޯތްބެއް ނޫނޭ.” ސަމާ ޒާޔާގެ އަތުގައި ހިފައި ތަޅުވައިގަތެވެ.
“ޝާރިފް ދެކެ ލޯބިވަނީ މަށޭ. މަޖުބޫރެއް ނޫނޭ އަހަރެން އޭނަ ދެކެ ލޯބިވެއޭ ކިޔާފަ އޭނަ އަހަރެން ދެކެ ލޯބިވާކަށް.” ޒާޔާ ނުރުހުނީ ސަމާގެ ވާހަކަ ހުރި ގޮތުންނެވެ.
“ޒާޔާ ލޯބިވަނީ ރާއިދު ދެކެއެއް ނޫންތަ؟” ސަމާ ހައިރާންވެފައި ސުވާލުކޮށްލިއެވެ.
“ނޭނގެ. ނޭނގެ. ލޯބި އޮޅިއްޖެ މަށަށް.” ޒާޔާ މޫނުގައި ދެއަތް އެޅިއެވެ.
“މަށަކަށްވެސް ނޭނގެ ދެން. ދަނީ ދެން. އޮފީސް ބްރޭކް ގަޑީ މިއައީވެސް. ޒާޔާ. ޝާރިފްއާ ވާހަކަ ނުދައްކަައްޗޭ. މަށަށްޓަކާ. ޕްލީސް.” ސަމާ ކޮޓަރި ދޮރުން ނިކުންނަމުން ފަހަތަށް އެނބުރި ޒާޔާއަށް ބަލާލިއެވެ. ސަމާގެ ރާގުގައިވަނީ އާދޭހެވެ.
ނަމަވެސް ޒާޔާ އެއްވެސް އެއްޗެއް ނުބުނެ ހުރީއެވެ. ދޮގުހަދަައިގެން ސަމާ ހިތްހަމަ ޖައްސަދޭން ބޭނުން ނުވާތީއެވެ.
ޒާޔާއަށް އިނގެއެވެ. ޝާރިފްއާއި ވާހަކަ ނުދައްކައި ޒާޔާއަކަށް ނުހުރެވޭނެއެވެ.

 

ދުވަސްތައް މާޒީއާއި އެކުވަމުންދެއެވެ. ނަމަވެސް ޒާޔާއާއި ޝާރިފްގެ ގުޅުމަކަށް ބަދަލެއްނާދެއެވެ. މުޅި ދުނިޔެއަށްވެސް ސިއްރުން އެގުޅުން އެންމެ ފުރިހަމަ ގޮތުގައި ކުރިއަށްދެއެވެ.
ހަމަހިމޭން އެދަންވަރުގައި ޒާޔާ ހުރީ ޝާރިފްގެ އަތުތެރޭގައެވެ. ވަށައިގެން ފެންނަނީ އަނދިރިކަމެވެ. ޝާރިފްއާއި ދުރުގައި ނުހުރެވިގެން ޝާރިފްގެ ބަހަށް ޒާޔާ އަނެއްކާވެސް ރަށަށް ދިޔައީއެވެ.
“ޕްރޮމިސްކުރޭ ދެން ދުވަހަކުވެސް ނުދާނަން ކަމަށް މަށާއި ދުރަށް.” ޝާރިފް މެޔާލައި ޒާޔާ ބޮނޑިކޮށްލަމުން އެދުނެވެ.
“ޕްރޮމިސްކުރޭ އަބަދުވެސް މަ ދެކެ ލޯބިވާނަން ކަމަށް. އަދި އަބަދުވެސް ކެއަރ ކުރާނަން ކަމަށް.” ޒާޔާވެސް ޝަރުތުކޮށްލިއެވެ. ޝާރިފް ދިއްކޮށްލައިގެން ހުރި އަތުގައި ހިފަމުންނެވެ.
“ޕްރޮމިސް.” ޝާރިފް ހިނިތުންވެލިއެވެ.
“ދެން އަބަދު މިހެން ސިއްރުންތަ އުޅެން ޖެހޭނީ.” ޒާޔާ ޝާރިފްއާއި ހަތަރުކަޅި ހަމަކޮށްލީ ދެރަވެފައި ހުރެއެވެ.
“އަދި މިހެއްނު އުޅެން ޖެހޭނީ. އުމުރަށްވެސް ޒާޔާއާއެކީ އުޅެން ބޭނުން.” ޝާރިފް ޒާޔާގެ އިސްތަށިގަނޑު އެއްފަރާތް ކޮށްލިއެވެ.
ދެލޯ މަރާލެވުނީ ޒާޔާއަށް ބޭއިޚްތިޔާރުގައެވެ. ޝާރިފްގެ ހޫނު ތުންފަތް ޒާޔާ ކަރުގައި ޖެހުމާއެކު ޒާޔާއަށް ޝާރިފްގެ ގައިގައި ބާރަށް ހިފަހައްޓާލެވުނެވެ.
އެވަގުތު އުޑުގައިވާ ތަރިތައްވެސް އެދިމާލަށް ހުއްޓުނު ކަހަލައެެވެ. ޒާޔާއާއި ޝާރިފްގެ ލޯބީގެ ހެކިވެރިންގެ ގޮތުގައެވެ.
ޒާޔާ ހުރީ ހިތްހަމަ ޖެހިފައެވެ. ޝާރިފްގެ މަސްތުން ފުރިގެންވާ އެމޫނަށް ބަލަހައްޓައިގެންނެވެ. ޝާރިފްގެ ބީހުން ހަށިގަނޑުގެ އެތައް މިތަނުގައި އިޙްސާސްކުރަމުންނެވެ. ޝާރިފްގެ ލޯބި އެންމެ ފުރިހަމަ ގޮތުގައި ލިބިގަންނަމުންނެވެ.
“ލޯބިވޭ.” ޝާރިފްގެ އަނގައިން އެލަފްޒު ނިކުތުމާއެކު ޒާޔާ ޝާރިފްގެ ގައިގައި ބައްދާލިއެވެ.
“ހިނގާ ދާން. ޒިޔަލް ހޭލިޔަސް ނޭނގޭނެ.” ޒާޔާ އެދުނެވެ.
“ގުޅަނީމި އިނގޭ އިރުކޮޅަކުން.” ޝާރިފް ޒާޔާގެ ނިތްކުރީގައި ބޮސްދިނެވެ.
“މަށަށް ނުފެންނަ ހިސާބަކަށް ރުޅިއައިސްގެންވެސް ނުދެވޭނެ އިނގޭ. ޔޫ ޕްރޮމިސްޑް.” ޒާޔާ ހިނގައިގަތުމާއެކު ޝާރިފް ހަނދާންކޮށްލަދިނެވެ.

 

ދުނިޔެއަށް އަލި ވިލުނުއިރު ޒާޔާ އޮތީ ގޭގެ ދޮރުމަތީގައި ކުނި ކަހާށެވެ. ޝާރިފް ނިދަން ދިޔައިރުވެސް ޒާޔާގެ ލޮލަަށް ނިދިނައީއެވެ.
“ކޮން ކޮޅަކުން އިރުއެރި ދުވަހެއްތަ މީ.” ރާއިދުގެ އަޑަށް ޒާޔާ ސިހުނެވެ.
“އެ ތެދެއް. މީ ހަޤީޤަތެއްތަ އަސްލުވެސް؟” ރާއިދުގެ ސަމާސާގައި ޔަމަން ބައިވެރިވެލިއެވެ.
ޒާޔާ ހިނިތުންވެލިއެވެ.
“ހާދަ އަވަހަކަށް މިއަދު ތިއައީ؟” ދެއަތް ފުރާ ކޮތަޅު ހިފައިގެން ފާއިޒާ އެތަނަށް އައިސް ހުއްޓުނެވެ.
“އެމެއް ނުހިފުނު. މާދަމާ ހުކުރެއްނު. އެހެންވެ އައީ ދެން.” ޔަމަން ދަބަސް ކޮނޑަށް ހެޔޮވަރުކޮށްލަމުން އެތެރެއަށްވަނެވެ.
“މިސްވިތަ؟” ރާއިދު ޒާޔާއާއި ކައިރިވެލިއެވެ.
“ނުވޭ.” އަނގަޔަަށް ވައްތަރެއް ޖައްސާލަމުން ޒާޔާ ކުނި ކަހަންފެށިއެވެ.

 

ރާއިދު ފެންވަރައިގެން އައިއިރު ޒާޔާ އިނީ ކާގޭގައެވެ. ސައިހަދައިގެން އިންތިޒާރުގައެވެ.
“ހާދަ ލަސްވީ ފެންވަރަން. އަންހެނަކަަށްވުރެ ކަންތައް ބޮޑު.” ޒާޔާ ސަމާސާކޮށްލިއެވެ.
ނަމަވެސް ރާއިދުގެ މޫނުމަތިން ހިނިތުންވުމެއް ނުފެނުނެވެ.
“ރާއިދު ކިހިނެއްވީތަ؟” ޒާޔާ ދެލޯ ބޮޑުކޮށްގެން ހުރެ ރާއިދުގެ މޫނަށް ބަލަންފެށިއެވެ. ދެންމެއަކާއި ޖެހެންދެން އުފާވެރިކަން ފެންނަން ހުރި އެ މޫނުމަތިން މިހާރު ފެންނަމުންދަނީ ހިތްދަތިކަމުގެ އަސަރެވެ.
ރާއިދުއަށް އެއްވެސް ޖަވާބެއް ނުދެވުނެވެ. ރާއިދުގެ ލޮލުން ވިދަވިދާހުރި ކަރުނަތައް ޖަވާބަކަށް ފުދޭ ކަހަލައެވެ.
“ރޮނީ ކީއްވެތަ؟ ބުނެބަލަ ވީގޮތެއް؟” ޒާޔާ ރާއިދުގެ ކައިރިއަށް ގޮސް ހުއްޓި ރާއިދުގެ އަތުގައި ހިފާލި އެވެ.

ނުނިމޭ

ޒާޔާއަށް ހުރެވުނީ ފެންކަޅިވެފައެވެ. ރާއިދު އެހައި ހިތުގަ ޖެހިގެން ރޮނިކޮށް އަދި ޒާޔާ ދުވަހަކުވެސް ދެކެފައެއް ނުވެއެވެ.
ރާއިދު ރޮމުން ޒާޔާ ގައިގައި އޮޅުލައިގަތެވެ. ރާއިދުގެ އަޑަށް ފާއިޒާއާއި ޔަމަންވެސް އަވަސް އަވަހަށް އެތަނަށް އައިސް ހުއްޓުނެވެ. ރާއިދު ފެނިފައި ހައިރާންވެފައި އެންމެންނަށްވެސް ބަލަން ތިބެވުނީއެވެ. ވީނުވީއެއް ނޭނގިގެންނެވެ.
“އަޅެ ރާއިދު. ބުނެބަލަ ވީގޮތެއް.؟” އެންމެ ފަހުން ޒާޔާއަށްވެސް ރޮވިއްޖެއެވެ.
“މަ- މަންމަ އެކްސެޑިންޓް ވެއްޖެ.” ރާއިދުއަށް ރޮވޭތީ ރަނގަަށް ވާހަކަވެސް ނުދެއްކުނެވެ.
“ވަޓް. ކިހިނެއް؟ ކޮންއިރަކު.” ޒާޔާއަށް ރާއިދުގެ މޫނަށް ބަލަން ހުރެވުނީ ރާއިދު ދެއްކި ވާހަކަ ޤަބޫލުކުރަން ދަތިވެފައެވެ.
“ވީއެއްނުވީއެއް ބެލިދާނެ ފަހުންވެސް. މިވަގުތު ރާއިދުގެ މަންމަ ބޭނުންވާނެ ރާއިދު މަންމަ ކައިރީގައި ހުންނަން. އަވަހަށް ދެކުދިން ފުރަންވީ.” ފާއިޒާ ލަފާދިނީ އަވަހަށް ފުރުމަށެވެ. ފާއިޒާ ވެސް ހުރީ އިންތިހާއަށް ދެރަވެފައެވެ.
“އަހަރެން އެބައަންނަން ފްލައިޓުން ޖާގަ ލިބޭތޯ ގުޅާލާފަ.” ޔަމަން ޖީބުގައި އޮތް ފޯނު ނަގައިގެން ކާގެއިން ނިކުތެވެ.
ރާއިދު ގައިގައި ބައްދާލައިގެން ހުރިއިރުވެސް ޒާޔާއަށް ވިސްނެނީއެވެ. ޝާރިފްގެ ކައިރީގައި ޒާޔާ ވަނީ ވަޢުދެއްވެފައެވެ. ދުވަހަކުވެސް މިރަށުން ނުދިއުމަށެވެ. ދުވަހަކުވެސް ޝާރިފް އާއި ދުރަށް ނުދިއުމަށެވެ. މަޖުބޫރީ ހާލަތު ބުނެދިނަސް ޝާރިފް އެއްބަސް ނުވާނެކަން ޒާޔާ އަށް އެނގެއެވެ. ހަދާނެ ގޮތް ހުސްވެފައި ޒާޔާ އަށް ހުރެވުނީ ކިހާއިރެއް ވަންދެން ކަމެއްވެސް ނޭނގެއެވެ.
“ޒާޔާ. މަގޭ މަންމައަށް ޒާޔާގެ އަޅާލުން ވަރަށް ބޭނުންވާނެ. އިނގޭ ޒާޔާއަށް މަންމަ އެހާ ކަމުނުދާކަންވެސް. އެކަމަކު މަންމަ އެ އޮތީ މިހާރު ވަރަށް ހާލެއްގަ.” ރާއިދުގެ ރާގުގައިވަނީ އާދޭހެވެ.
“ހިނގާބަލަ ކޮޓަރިއަަށް. އެހާ ވަރަށް ނުވިސްނާ. ހުރިހާ ކަމެއްވެސް ރަނގަޅުވާނެ އިރާދަކުރެއްވިއްޔާ.” ރާއިދު ދެއްކި ވާހަކައަކަށް ޒާޔާ އެއްވެސް ޖަވާބެއް ނުދެވުނެވެ. މިވަގުތު ޒާޔާ އެންމެ ބޭނުންވަނީ ޝާރިފްގެ ޖަވާބެކެވެ. ކިހާ ހެއްވާ ހެއްޔެވެ؟ ރާއިދުގެ އަތްބެއް ގޮތުގައި ހުރެވެސް ޒާޔާގެ މުޅި ދިރިއުޅުން ކޮންޓްރޯލް ކުރަނީ ޝާރިފްއެވެ. ޝާރިފްގެ ހުއްދަ ލިބިގެން ނޫނީ ޒާޔާ އެއް ކަމެއްވެސް ނުކުރެއެވެ. އެހާވެސް ޒާޔާ ޝާރިފްދެކެ ލޯބިވެއެވެ.

ރާއިދު ކޮޓަރީގެ އެނދުމަތީގައި ބޭއްވުމަށްފަހު ޒާޔާ ނަމުގައި ނިކުތީ ސައި ބަލައި ކާގެއަށެވެ.
ކޮޓަރިން ނިކުތް ގޮތަށް ޒާޔާ ފުރަތަމަވެސް ޝާރިފްގެ ނަމްބަރަށް ޑައިލް ކޮށްލިއެވެ. ތަކުރާރުކޮށް އެތައް ފަހަރަކު ގުޅުމުންވެސް ލިބުނީ އެއް ޖަވާބެކެވެ. ފޯނަށް ޖަވާބު ނުދޭކަމެވެ.
ލިބުނު މާޔޫސް ކަމުގައި ޒާޔާ ގޮސް ވަނީ ކާގެއަށެވެ.
“ޒާޔާ. ފުރަން ތައްޔާރުވޭ. ހަވީރު ފްލައިޓުން ޖާގަ ލިބިފަ އިނީ.” ފަހަތުން ޔަމަންގެ އަޑު އިވުމާއެކު ޒާޔާ ފަސްއެނބުރުނެވެ.
“މިހާ އަވަހަށް ޓިކްޓްވެސް ނެގީތަ؟” ޔަމަން އަތުގައި ހުރި ޓިކެޓްތަކަށް ބަލަން ޒާޔާއަށް ހުރެވުނީ ދެލޯ ބޮޑުކޮށްލައިގެންނެވެ. ޒާޔާގެ ހިތް ރޯންފެށީ ކުއްލިއަކަަށެވެ. ޒާޔާ ދާން ބޭނުން ނުވާތީއެވެ.

-ދުވާލު ހަތަރު ދަމު ނިދުން ކަމަކީ. ކިތަންމެ ވަރަކަށް ގުޅިޔަސް ފޯނު ނުނަގާނެ.-
ޒާޔާ ހިތުން ޝާރިފްއަށް ކުދި ކިޔާލިއެވެ.
“ބަލަ ވީހާވެސް އަވަހަށް ފުރަން ނޫންތަ ބޭނުމީ.” ޔަމަން ޒާޔާ އަށް ޓިކެޓްތައް ދިއްކޮލިއެވެ.
ޒާޔާ އެއްވެސް ޖަވާބެއް ނުދީ ސިންކުމަތީގައި ދޮވެފައި ހުރި ތަށިތައް ހަރުގަނޑުގައި އަތުރަން ފެށިއެވެ. ޒާޔާގެ ބަދަލުވެފައިވާ މޫނުގެ ކުލަވަރު ޔަމަން އަށް ފާހަގައެއް ނުކުރެވުނެވެ. ޒާާޔާގެ ޖަވާބެއް ނައުމުން ޔަމަން މާބޮޑު ކަމަކަށް ނުހަދާ ހިނގައިގަތެވެ.

ކޮޓަރި ތެރޭގައި ދެކޮޅު ދެކޮޅަަށް ހިނގާލަ ހިނގާލަ ހުރި ޒާޔާ އިރުއިރުކޮޅާ ބިތުގައި ހަރުކޮށްފައި ހުރި ގަޑި ބަލާލައެވެ. އޭރު ތިނެއް ޖަހަނީއެވެ.
“ނިދިޔަސް ބޮޑުވަރު. ކަންނެތްވިޔަސް ބޮޑުވަރު” ޒާޔާ ޝާރިފްއާއި ދިމާއަށް ކުދި ކިޔަމުން ދިޔައެވެ. ޝާރިފްގެ ކޯލަކަށް ޒާޔާ އިންތިޒާރު ކުރާތާ އެތައް އިރެކެވެ.
“ހިނގާ ފުރަން ދާން.” ފޯނު ކަންފަތުގައި ޖަހައިގެން ހުރެ ރާއިދު އައިސް ކޮޓަރިއަށް ވަނެވެ.
“އަދި ނުވޭނު.” ޒާޔާގެ އަޑު ނިކުތީ ބޭއިޙްތިޔާރުގައި ކަހަލައެވެ. ދާން ބޭނުން ނުވާލެއް ބޮޑުކަމުންނެވެ.
“ތަންކޮޅެއް ކަނޑުގަދައޭ. ވަރަށް މަޑުން ދުއްވަން ޖެހޭނީވެސް.” ރާއިދު އެނދުމަތީގައި އިށީނދެލިއެވެ.
ޒާޔާ ވިސްނަނީއެވެ. ރާއިދު ކައިރީގައި ދާން ބޭނުން ނުވާ ވާހަކަ ބުނާނެ ގޮތަކާއި ދޭތެރޭގައެވެ.
ރާއިދު އެ ހާލަތުގައި ބުނުން ރަނގަޅު ނޫންކަންވެސް ޒާޔާއަށް އެނގެއެވެ.
“ކޮބާތަ ޒިޔަލް؟” ރާއިދުގެ އަޑަށް ޒާޔާ ސިހުނެވެ. އެވަގުތު ރާއިދު ޒާޔާއަށް ބަލަން ހުރުމުން ޒާޔާގެ ހާސްކަން ރާއިދުއަށް ފޮރުވަން ޒާޔާ ކުރި މަސައްކަތްވީ ނާކާމިޔާބެވެ.
“ޒާޔާ.” ރާއިދު އެނދުން ތެދުވެގެން މަޑުމަޑުން ހިނގާފައި ގޮސް ޒާޔާގެ ކުރި މައްޗަށް ހުއްޓުނެވެ.
“އިނގޭ ޒާޔާ މަންމަ ކައިރިއަށް ދާން ބޭނުން ނުވާކަން. މަންމަގެ އުސޫލުތައް ހުންނަގޮތް ޒާޔާއަށް ކަމުނުދާކަން ވެސް. އެކަމަކު.” ރާއިދު ޒާޔާގެ ދަތްދޮޅީގައި ހިފައި ހިއްލާލިއެވެ. ރާއިދު ބުނަމުން ދިޔަ ލަފްޒުތައް ހުއްޓާލީ ޒާޔާގެ އުދާސްވެފައިވާ ދެލޯ ފެނިފައެވެ.
ރާއިދު ޒާޔާ ގެނެސް މޭގައި ލައްކޮށްލިއެވެ.
ޒާޔާ ދެލޯ މަރާލީ ދެލޯ ފުރި ބާރުވުމުންނެވެ. ރާއިދުގެ އޯގާތެރިކަމާއި ލޯބި ހިތަށް ސިފަކުރެވޭތީއެވެ.
ނަމަވެސް ޒާޔާގެ ހިތުގެ ހާލަތު ރާއިދު ކުރިމަތީގައި ޒާޔާ ބަޔާން ކުރާނީ ކިހިނެއް ހެއްޔެވެ؟ ޒާޔާގެ މޭގައިވާ ހިތުގެ ރިހުމުގެ އަސްލަކީ ޝާރިފްއޭ ބުނާނީ ކޮން ލަފްޒަކުން ހެއްޔެވެ؟
“ރެޑީ ވެލަނީ އިނގޭ. ޒިޔަލް ވެއްޖެ މަންމަ ކައިރީގައި.” ޒާޔާ ހިނިތުންވެލީ ހިތުގެ ކެކުޅުންތައް ގަދަކަމުން އެއްކައިރި ކޮށްލަމުންނެވެ.
ރާއިދު ބޯޖަހާލަމުން ޒާޔާ ގަޔާއި ދުރުކޮށްލުމަށްފަހު ނިކުތީ ބޭރަށެވެ.
ޒާޔާ ހުރީ ރާއިދު ނުގޮސްގެންނެވެ. އަވަސް އަވަހަށް ކޮޓަރި ތަޅުލަމުން އެނދުމަތީގައި އޮތް ފޯނާއި ދިމާއަށް ޒާޔާ ދުއްވައިގަތެވެ.
ޒާޔާ ފޯނަށް ބަލާލިއިރު ޝާރިފްގެ މިސްވެފައިވާ ދެކޯލު އިނެވެ. ޒާާޔާ އަވަސް އަވަހަށް ފޯނުގެ ކީޕެޑްގައި ޝާރިފްގެ ނަމްބަރު ޖަހާލީ ގުޅަން ވެގެންނެވެ. ނަމަވެސް ދެފަހަރުވެސް ނަމްބަރު ޖަހާފައި ޒާޔާއަށް ފޮހެލެވުނީއެވެ. ޝާރިފްގެ ރުޅި ހުންނަ ގޮތް ވަރަށް ރަނގަޅަށް ޒާޔާއަށް އެނގެއެވެ. މާލެ ދާން ޖެހޭ ވާހަކަ ބުނާ އިރަށް ޝާރިފް އެއްބަސް ނުވާނެއެވެ. އަނެއްކޮޅުން ނުބުނެ ހިނގައްޖެ ނަމަ ޒާޔާގެ ދުވަސް ދިޔައީއެވެ. ފިކުރުތައް ޒާޔާ ވަށާލި ކަހަލައެވެ. ހަދާނެގޮތް ހުސްވެއްޖެއެވެ. ރާއިދު ޒިޔަލް ގޮވައިގެން އައިއިރުވެސް ޒާޔާ ހުރީ ތައްޔާރު ނުވެއެވެ. ރާއިދު ދެފަހަރަކު ދޮރުގައި ޓަކި ޖަހާލުމުން ޒާޔާ އަވަސް އަވަހަށް ހެދުން ބަދަލު ކޮށްލިއެވެ.

ލޯންޗުގައި އިށީނދެ ސީޓްގައި ބުރަކަށި ޖައްސާލަމުން ޒާޔާ ފުން ނޭވާއެއް ދޫކޮށްލިއެވެ. އެންމެ ފަހު ފަހަރަށް ރަށާއި ދިމާއަށް ޒާޔާ ބަލާލިއެވެ.
އެވަގުތު ޒާޔާގެ ފެވަރިޓް ކަޅު ކުލައިގެ ޓީޝާޓް ލައިގެން ޝާރިފް ސައިކަލްގައި ދުއްވާފައި ދާތަން ޒާޔާއަށް ފެނުނެެވެ. ހިނިތުންވެލެވުނީ ޒާޔާއަށް އުފަލުންނެވެ. އެންމެ ފަހު ވަގުތުގައިވެސް ދެލޯ އެންމެ ދެކެން އެދޭ ސޫރަ ފެނުމުންނެވެ.
-މަށަށް މާފުކުރައްޗޭ. ތަޤުދީރުގަ ދިމާވާން ހުރިއްޔާ އަދި ދިމާާވާނެ. އަބަދުވެސް ޝާރިފްދެކެ ލޯބިވާނަން. ތި ހަނދާންތައް ދުވަހަކުވެސް މި ހިތަކުން ނުފިލާނެ.- ޒާޔާ ހިތުގެ ފުން މިނުން ޝާރިފްއަށް މެސެޖެއް ފޮނުވާލިއެވެ.
މަދު ސިކުންތު ކޮޅެއްގެ ތެރޭގައި ޒާޔާގެ ލޯމަތިން ޝާރިފް ގެއްލުނެވެ. ހިތް ރޮމުން ދިޔަ ނަމަވެސް ކެތްކުރުން ނޫން ގޮތެއް ޒާޔާއަކަށް މިއަދަކު ނެތެވެ.

ރާއިދުއާއެކު މަންމައަށް ޚިދުމަތް ކުރުމުގައި ޒާޔާ ވަގުތުތައް ހޭދަކުރަން ފެށިއެވެ. މާލެ އައިތާ ދެ ދުވަސް ވީ އިރު އެންމެ ފަހަރަކުވެސް ޒާޔާ ޝާރިފްގެ ކޯލަކަށް އެއްވެސް ޖަވާބެއް ނުދެއެވެ. ޝާރިފްއާއި ކުރިމަތިލާނެހާ ހިތްވަރުވެސް ޒާޔާގެ ނެތީއެވެ.

ދުވަސްތައް މާޒީވަމުން ދެއެވެ. ރާއިދުގެ މަންމަގެ ހާލު ރަނގަޅުވަމުން ދިޔުމާއެކު ރާއިދު އެނބުރި ޒާޔާގެ ރަށަށް ދިޔައެވެ. ޒާޔާ އާދޭސް ކުރުމުންވެސް ރާއިދު ޒާޔާ މާލޭގައި ބެހެއްޓީއެވެ. ރާއިދުގެ ކަންފަތަށް ކުރިން އަރާފައިވާ އަޑުތަކުން ކަމަށްވެސް ވުން އެކަށީގެންވެއެވެ.

ފުރަ މެންދަމެވެ. ޓީވީ ހުޅުވާލައިގެން ޒާޔާ އިނީ ފޫހިވެގެންނެވެ. ބައެއް ފަހަރު ފޯނު ހާވާލައެވެ. ކުއްލިއަކަށް ޒާޔާގެ ކަންފަތުގައި ޖެހުނު ލަވައިން ޒާޔާއަށް ޓީވީ އަށް ނަޒަރު ހުއްޓާލެވުނެވެ.
– ރާނީއެ ލިބިފާވަ ސިފަ ރީތި ޝާހީ
ތިބާ ތީ ޝާއިރެއް ކުރާ ސޫރަ ބާވައޭ
ޚިޔާލީ ލަފްޒަކުން މިސާލީ ޅެން ބަހުން ކިޔާނީ
ލޯބި ގުލްޝަނަށް ފޮޅުވަދިން މަލޭ ތިބާ ތީ –

އަނގައިން ނިކުތް “އާހް” ގެ އަޑާއެކު ޒާޔާ ޓީވީ ނިއްވާލިއެވެ. އެ ލަވައިގެ އެލަފްޒުތައް އެއީ ޝާރިފްގެ އެންމެ ފެވަރިޓް ލަފްޒުތަކެވެ. އެތައް ފަހަރަކު ޒާާޔާއަށް އެލަފްޒުތައް ޝާރިފް ހަދިޔާކޮށްފައިވެއެވެ. ޒާޔާއަށް ތަޢުރީފު ކުރަމުންނެވެ.
ޒާޔާ ފޯނު ނަގާ ޝާރިފްގެ ނަމްބަރަށް ގުޅާލީ ހިތަށް ކުރަމުންދިޔަ ފުން އަސަރުތަކުންނެވެ.
ޝާރިފް ޖަވާބު ދިންލެއް ވަރަށް އަވަހެވެ. ހީވަނީ ޝާރިފް ޒާޔާގެ ކޯލެއްގެ އިންތިޒާރުގައި ހުރިހެންނެވެ.
ފޯނު ކަންފަތުގައި ޖައްސާލައިގެން ދެމީހުންވެސް ތިބީއެވެ. ވެދާނެއެވެ. ދައްކަން ހުރި ވާހަކަތައް ގިނަކަމުން ފަށާނެ ކޮޅެއް ނޭނގުނީއެވެ.
ޝާރިފްވެސް އެއްވެސް ވާހަކައެއް ނުދައްކައެވެ. އެތައް އިރަކަށްފަހު ޒާޔާ ފޯނު ކަނޑާލިއެވެ. ދެރަވެގެންނެވެ. ޝާރިފް އެހުރީ ހިތްހަމަ ނުޖެހިފަކަން ޒާޔާއަށް އެނގެއެވެ. ކީއްވެ ހެއްޔެވެ؟ ޒާޔާގެ މަޖުބޫރީ ހާލަތު ޝާރިފް ޤަބޫލުކުރަން ޖެހޭނެ ނޫންހެއްޔެވެ؟

ޒާޔާގެ ޚިޔާލީ ވާފަށް ކެނޑުނީ ފޯނުގެ ރިންގްގެ އަޑަށެވެ. ގުޅަނީ ޝާރިފްއެވެ.
ޒާޔާ އަވަސް އަވަހަށް ފޯނު ނަގާ ކަންފަތުގައި ޖައްސާލިއެވެ.
“ކީއްވެ ފޯނު ނުނެގީ” ފުރަތަމަވެސް ޝާރިފް ކުރީ ޒާޔާގެ ހިތުގައި އޮތް ސުވާލެވެ.
“ނުކެރުނީ. އިނގޭ ޝާރިފް ހުންނާނީ ރުޅިއައިއްސަކަން.” ޒާޔާ އޮޅުންފިލުވައިދިނެވެ.
“ފޯނު ނުނަގާ ހުރީމަ ވަކި މަ އުފާވާނެތަ؟ ދެން ކީއްކުރަން ތި ގުޅީ.” ޝާރިފްގެ ރާގު ގައިވަނީ ހިތްހަމަ ނުޖެހުމުގެ އަސަރެވެ.
“ލޯބިވާތީ.” ޒާޔާ ދިނީ ކުރު ޖަވާބެކެވެ. ޝާރިފް ޒާޔާގެ އެ ޖަވާބަށް ރައްދު ދޭނެކަން ޒާޔާއަށް އިނގެއެވެ.
“ލޯބިވާނަމަ އެހެން ނުހަދާނެ. ކޮންއިރަކު އަންނަނީ؟” ޝާރިފް ހަރުކަށިކަމާއެކު ބުނެލިއެވެ.
“ދާނަމޭ. ވަރަށް އަވަހަށް.” ރާއިދު ޒާޔާ ރަށަށް ނުގެންނާނެ ވާހަކަ ބުނެފައި އޮތް އިރުވެސް ޒާޔާއަކަށް ޝާރިފް ދެރަ ކުރާކަށް ނުކެރުނެވެ. ކޮންމެވެސް ގޮތެއް ހަދާފައި ނަމަވެސް ޒާޔާ އެނބުރިދާން ބޭނުމެވެ.

އިރުއަރަން ދެން ޝާރިފްއާއި އެކީ އެތައް މަލެއް ފަރިކޮށް ޒާޔާ ފޮޅުވިއެވެ. ކޮން ކަހަލަ ލޯތްބެއް ބާވައެވެ. އެކަކު އަނެކަކުދެކެ ބައެއް ފަހަރު އިންތިހާއަށް ރުޅި އާދެއެވެ. ދުވަހަކު ވާހަކަ ނުދައްކަން ހުވާ ކުރެއެވެ. އެކަމަކުވެސް ވަތްކެއް ނުވެވެއެވެ. ރުޅިން ތިބިޔަސް ހާލުބެލެއެވެ. އެކަކު ގުޅާ އިރަށް އަނެކަކަށް ވާހަކަ ނުދައްކައެއްވެސް ނުހުރެވެއެވެ.

އަނެއްކާވެސް ޒާޔާގެ ހަޔާތަށް ބަހާރު މޫސުމް އައިސްފި އެވެ. މުޅި ދުވަސް ޝާރިފްއަށް ޒާޔާ ހުސްކޮށްލައެވެ. ކޮންމެ ކަމެއް ކުރަނީވެސް ޝާރިފްއަށް އެނގި އޭނާ ބުނާ ގޮތަކަށެވެ.
ޝާރިފްގެ އުފަލަކީ ޒާޔާގެވެސް އުފަލެވެ. ޝާރިފް ދުލުން ބޭރު ކުރާ ކޮންމެ ބަހަކީވެސް ޒާޔާގެ ހިތުގެ ފިނިކަމެވެ.

އެއްރެއެއްގެ ރޭގަނޑެވެ. ޒިޔަލް ނިންދެވުމަށްފަހު ޒާޔާ ކާގެޔަށްވަނެވެ. ތަށިތައް ނަގާ މޭޒުމަތި ރީތިކޮށްލުމަށެވެ. ނަމަވެސް ދޮރުގައި މީހަކު ޓަކި ޖަހާލުމުން މަސައްކަތްތައް ބެހެއްޓުމަށްފަހު ޒާޔާ ގޮސް ދޮރު ހުޅުވާލިއެވެ.
“ރާއިދު؟” ކުރިމަތީގައި ހުރި ރާއިދު ފެނިފައި ޒާޔާއަށް ލިބުނީ ޝޮކެކެވެ.
“ތައްޔާރުވެބަލަ ބޭރަށް ދާން.” ރުންކުރު ޖަވާބެއް ދިނުމަށްފަހު ރާއިދު ގޮސް ވަނީ އޭނާގެ މަންމަގެ ކޮޓަރިއަށެވެ. ޒާޔާއާއި އެއްވެސް ވާހަކައެއްވެސް ނުދައްކައެވެ. ރާއިދުގެ އަމަލުތައް ހުރިގޮތުން ޒާޔާ ހުރީ ބުނާނެ އެއްޗެއްވެސް ނޭނގިފައެވެ. ރާއިދުގެ ފަހަތުން ގޮސް ވީގޮތެއް އޮޅުން ފިލުވަން ޒާޔާ ބޭނުންވެސް ވިއެވެ. ނަމަވެސް ރާއިދުގެ މަންމަމެން ކުރިމަތީގައި އެއްވެސް ހަމަނުޖެހުމެއް ހިންގާކަށް ޒާޔާ ބޭނުމެއްނޫނެވެ.

ޒާޔާ ހިނގައިގަތީ ކޮޓަރިއާއި ދިމާއަށެވެ.
“ދީބަލަ ޒާޔާގެ ފޯނު.” ފަހަތުން ރާއިދުގެ އަޑު އިވުނުތަނާ ޒާޔާ އަނެއްކާވެސް ސިހުނެވެ.
“ކިހިނެއްވެގެންތަ ރާއިދުއަށް-” ޒާޔާގެ ވާހަކަ ހުއްޓުވާލީ ޒާޔާއާއި ދިމާއަށް ދިއްކޮށްލަމުން ހުޅުވާލި ރާއިދުގެ އަތެވެ. ރާއިދުގެ އެ އިޝާރާތް ހެކިދިނީ އެއްވެސް ސުވާލެއް އޭނާއާއި ނުކުރުމަށެވެ.
ރުޅި އައި ނަމަވެސް ޒާޔާ އޭނަގެ ފޯނު ރާއިދުގެ އަތަށް ޖަހާފައި ގޮސް ކޮޓަރިއަށް ވަނެވެ.

ރާއިދުގެ ސައިކަލް ފަހަތުގައި އިން އިރުވެސް ޒާޔާ ރާއިދުއަކާއި އަނގަޔަކުން ނުބުނެއެވެ. ރާއިދުވެސް އެއްވެސް ވާހަކައެއް ނުދައްކައެވެ.
ރާއިދު ސައިކަލް މަޑުކޮށްލީ ގޮސް ގޯމެޓް ރެސްޓޯރެންޓް ކުރިމަތީގައެވެ. ޒާޔާއަށް ރާއިދުގެ މޫނަށް ބަލާލެވުނީ ސުވާލުގެ ނަޒަރަކުންނެވެ.
“އާދޭ.” ރާއިދު އެތެރެއަށް ވަންނަން ހިނގައިގަތުމުން ފަހަތުން ޒާާޔާވެސް ހިނގައިގަތެވެ.

ގޯމެޓްގެ ހިތްގައިމު މާހައުލަށް ނަޒަރު ހިންގަމުން ޒާޔާ އެތަނުގައި ހުރި ކުޑަކުޑަ ސިޑިން މައްޗަށް އެރިއެވެ. ދޮރު ހުޅުވާލާފައި އެތެރެއަށް ވަން ޒާޔާގެ ދެފައި ގަނޑުކޮށްލީ އެއްފަރާތުގައި ހުރި މޭޒެއްގައި އިން ޝާރިފް ފެނިފައެވެ. ރާއިދު ހިނގަމުންދިޔައީ ސީދާ ޝާރިފްއާއި ދިމާއަށެވެ. ވާން މިއުޅެނީ ކޮންކަމެއްބާއޭ ހިތަށް އަރާފައި ޒާޔާއަށް ހިންދިރުވާލެވުނެވެ.
ޒާޔާގެ ފިޔަވަޅު އަނެއްކާާވެސް ނެގެން ފެށުނީ ރާއިދުގެ އިޝާރާތަށެވެ. ރާއިދު ގޮސް ޝާރިފް ކައިރީގައި އިށީނެވެ.
ހަމަޖެހޭ ގޮތް ދައްކަމުން ޒާޔާ ޝާރިފްގެ ކުރިމައްޗަށް ހުރި ގޮޑީގައި އިށީނދެލިއެވެ.

ނުނިމޭ

ދެލޯ އެދެމުން ދިޔައީ ހިތް ފުރެންދެން ޝާރިފްގެ މޫނަށް ބަލާށެވެ. އެކަމަކުވެސް ރާއިދު ޖެހިގެން އިނުމުން ޒާޔާއަށް އިސް އުފުލާލަންވެސް ނުކެރުނެވެ.

“ވާހަކަ ދައްކަބަލަ؟” ރާއިދު މޭޒުމަތީގައި އަތް ބާއްވާލަމުން ޝާރިފްއަށް ބަލާލިއެވެ.

“މި އުޅެނީ ކިހިނެއްވެގެންތަ؟” ހިތް ނުތަނަވަސް ވާން ފެށުމުން އެންމެ ފަހުން ޒާޔާގެ އަނގަ ހުޅުވުނެވެ.

އަދި އިސްއުފުލާ ޝާރިފްގެ މޫނަށް ނަޒަރު ހުއްޓާލިއެވެ. އެވަގުތު ޝާރިފްވެސް އިނީ ޒާޔާގެ މޫނަށް ބަލަހައްޓައިގެންނެވެ.

ދެމީހުންގެ ހަތަރު ކަޅި ބައްދަލުވި ވަގުތު މުޅި ކައުނުވެސް ހުއްޓުނު ކަހަލައެވެ. ދެލޮލުން ފޮނުވަމުންދިޔަ މެސެޖްތަކުން ލިބެމުންދިޔަ އިޝާރާތްތައް އެކަކު އަނެކަކަށް ހަމަ ރަނގަޅަށްވެސް ދޭހަވެއެވެ. ޝާރިފްގެ ތޫނު ލޮލުގައި އެތައް ފަހަރަކު ބޮސް ދޭން ޒާޔާގެ ހިތް އެދެމުން ދިޔައެވެ. ޝާރިފްގެ އަތުން ލިބުނު ލޯބިވެތި ފިރުމުންތަކާއި އެ މޭގެ ހޫނުކަމަށް ޒާޔާގެ ހިތް އެދޭވަރު ބަޔާން ކުރަންވެސް ދައްޗެވެ.

“ކީއްވެގެންތަ އެންމެން ތި ދެމީހުންގެ ވާހަކަ އެދައްކަނީ؟” ރާއިދުގެ އަޑާއެކު ޒާޔާ އަވަސް އަވަހަށް އިސް ޖަހާލިއެވެ.

“ރާއިދުއަށް ހީވޭތަ ރާއިދުގެ އަންހެނުން މަގޭ ކައިރިއަަށް އައިސްދާނެހެން؟” ޝާރިފްގެ ސުވާލުން ޒާޔާ ހަމަ ރަނގަޅަށްވެސް ރަކި ވެއްޖެއެވެ. ޒާޔާ އަށް އިޙްސާސްވީ އެއީ ޝާރިފް ޒާޔާއަށް ކޮށްލި މަލާމާތެއް ހެންނެވެ.

“މަށަށް ޔަޤީން ނުދާނެކަން.” ރާއިދު ވިކާލީ ހަމަ ސީދާ ޒާޔާގެ ހިތުގައެވެ. ޝާރިފްއާއި ރާއިދުގެ ސުވާލުތަކާއި ޖަވާބުތަކުން ޒާޔާއަށް ނޭވާ ހިފަހައްޓާލައިގެން އިނދެވުނީ ކިރިޔާއެވެ.

“ދެން އެހެންވީއިރު ތި ސުވާލު ކުރުމުގެ ބޭނުމަކީ ކޮބާ؟” ރާއިދުގެ އަނގަ ބައްދާލަމުން ޝާރިފް ޒާޔާގެ މޫނަށް ބަލާލިއެވެ. ވީވެސް އެހެންނެވެ. ރާއިދު އެއްވެސް އެއްޗެއް ނުބުންޏެވެ. ތަނަށް ވެރިވެގެން ދިޔައީ އާދަޔާ ޚިލާފް ހިމޭންކަމެކެވެ. އެކަކުވެސް ވާހަކައެއް ނުދައްކައެވެ. ވެދާނެއެވެ. އަދިވެސް ރާއިދުގެ ހިތުގައި އުފެދިފައިވާ ޝައްކު ނުފިލަނީއެވެ.

“ސުވާލުކުރާނެތާ ދޯ. އެކަހަލަ ވާހަކަ އަޑުއިވެންޏާ. ކުރިމަތީގައި ތިބެ ވާހަކަ ދައްކާލުމަކުން ގޯހެއް ނެތެއްނު.” ރާއިދު ހިނިތުންވެލިއެވެ.

ޝާރިފް ބޯޖަހާލީ ރާއިދު އާއި އެއްބަސްވުމުގެ ގޮތުންނެވެ.

“އޯކޭ. ތޭންކްސް. ޒާޔާ. ހިނގާ.” ރާއިދުގެ އިށީންދެގެން އިން ގޮނޑި ދުުރުކޮށްލަމުން އަތުން ޒާޔާއަށް އިޝާރާތްކޮށްލިއެވެ.

ގޮޑިން ތެދުވަމުން ދިޔައިރުވެސް ޒާޔާއަށް ބެލެނީ ހަމަ ޝާރިފް އަށެވެ. ޝާރިފް ފެންނަ ހިސާބަކުން ދުރަށްދާން ޒާޔާގެ ހިތް ނޭދެނީއެވެ. އެގޮތަށް އެކަން ވާން ނެތްކަން ޒާޔާއަށް ވަރަށް ރަނގަޅަށް އެނގެއެވެ. ނަމަވެސް ހިތް މަރުވެފައިވާ ހާލު ޒާޔާ ރާއިދު އާއި އެކު އެތަނުން ނިކުތީއެވެ.

 

ބެލްކަނީގައި ހުރި ކުޑަ ޖޯއްޔެއްގައި ޒާޔާ އިށީނދެލީ ރާއިދު ފާޚާނާ އަށް ވަނީމައެވެ. އުޑުމަތީގައި ވިދަމުންދާ ތަރިތަކަަށް ޒާޔާ ނަޒަރު ހުއްޓާލީ ޝާރިފްގެ ހިތްގައިމު ސޫރަ ހިތަށް ސިފަކޮށްލަމުންނެވ.

‘އަޅެ. ޝާރިފްވެސް ހަމަ މިގަޑީގައި އެ ތަރިތަކަށް ބަލަން އިންނާނެނަމަ.’ ހިތަށް އެރި ލަފްޒުތައް ދުލާއި ހަމައަކަށްނައެވެ.

ޒާޔާއަށް ހިތްހަމަޖެހުމެއް ނެތެވެ. އެހާ ކައިރިން ފެނިފައި ވެސް ޒާޔާ އަށް ޝާރިފް އާއި ރަނގަޅަށް ވާހަކަވެސް ނުދެއްކުނުތާގައި ހިތްފުރެންދެން ބަލައިވެސް ނުލެވުނެވެ. ޝަކުވާ ކުރަމުން ޒާޔާ ގެންދިޔައީ އަމިއްލަ ހިތާއެވެ.

އެވަގުތު ހިތް ވިސްނައިދިނީ ޝާރިފްގެ އަޑު އަހާލުމަށެވެ. ޒާޔާ ފޯނުން ޝާރިފްގެ ނަމްބަރަށް ޑައިލް ކޮށްލިއެވެ.

ދެފަހަރަކު ރިންގްވިތަނާ ޝާރިފް ފޯނަށް ޖަވާބުދިނެވެ.

“ދިލާ އެބައުޅޭ. ފަހުން ގުޅާނަން.” ޒާޔާއަށް އެއްވެސް އެއްޗެއް ނުބުނެވެންދެން ޝާރިފް ފޯނު ކަނޑާލިއެވެ.

ޝާރިފް އެގޮތަަށް ކަންތައް ކުރުމުން ޒާޔާ ގާތަަށް އައީ އަމަށަކު ރުޅިއެއްނޫނެވެ. ދިލާ ދެކެ އެހާ ލޯބިވަންޏާ ޒާޔާ ޝާރިފްގެ ދިރިއުޅުމަށް ގެނައީ ކީއްކުރަން ހެއްޔެވެ؟ ދިލާ ދެކެ އެހާ ބިރުގަންނަންޏާ ޒާޔާ އާއި ގުޅުމެއް ބާއްވަންވެސް ވީ ފަހެ ކީއްވެ ހެއްޔެވެ؟ ރާއިދު ހުއްޓަސް ނެތަސް ޝާރިފް ބޭނުންއިރަކު ޒާޔާ ވަގުތު ދޭން ޖެހެއެވެ. އެކަމަކު ދިލާގެ ހިޔަނި ފެންނަ ހިސާބުގައި ޝާރިފް ހުންނަން ޖެހުނަސް ޝާރިފް އަށް ޒާޔާ އާއި ވާހަކަ ނުދެއްކެއެވެ. ޒާޔާ ޝާރިފް އަށްޓަކައި ވަގުތު ހުސްކުރާއިރު ޝާރިފް އަށް އެވަރު ނުވާންވީ ކީއްވެ ހެއްޔެވެ؟ މުޅިންވެސް ޖަވާބު ނޭނގޭ ކަމަށް ޒާޔާގެ ހިތް ބުނާ ސުވާލުތަކެވެ.

 

ރާއިދު ފާހާނާއިން ނިކުތްއިރުވެސް ޒާޔާއަށް އިނދެވުނީ ފެންކަޅިވެފައެވެ.

“ސޮރީ. އަދިވެސް ހިތްހަމަ ނުޖެހިފަތަ؟” ރާއިދު ހީކުރީ ޝާރިފްގެ ކުރިމައްޗަށް ނުވެސް ބުނެ ގެންދިޔުމުން އެކަމާ ޒާޔާ ހިތްހަމަ ނުޖެހިފައި ހުރީ ކަމަށެވެ.

“އަދިވެސް ޖަވާބު ނޭނގޭ ސުވާލެއް އޮތީތަ؟ ރާއިދު މަށަށް އިތުބާރު ނުކުރާއިރު އެކުގައި އުޅުމުގެ ބޭނުމެއް އެބައޮތްތަ؟ ބުނެބަލަ.؟” ޝާރިފްދެކެ އައި ރުޅި ޒާޔާ ބާލާލީ ރާއިދުއަށެވެ. އިންތަނުން ތެދުވެގެން ބާރުބާރަށް ހިނގާފައި ގޮސް ޒާޔާ އެނދުގައި އޮށޯވެ  ރާއިދުއަށް ފުރަގަސްދިނެވެ.

ޒާޔާ އެހާ ބޮޑަށް ރުޅި އައިސްފައި ހުރުމުން ރާއިދު އިތުރަށް އެއްވެސް އެއްޗެއް ނުބުނެ އައިސް އޮށޯވެލިއެވެ.

 

ހެނދުނު ޒާޔާ އަށް ހޭލެވުނީ ޒިޔަލް ހޭލައިގެން ރޯއަޑަށެވެ. ފުރަތަމަވެސް ޒާޔާ އަށް ބަލާލެވުނީ ބާލީސް ދަށުގައި އޮތް ފޯނަށެވެ. އެއްފަހަރު ނަމަވެސް ޝާރިފް ގުޅާފައި އޮތްތޯއެވެ. ޒިޔަލްގެ ތުބުގައި ބުއްފުަޅި ޖައްސާލުމަށްފަހު ޒާޔާ ފޯނު އެނދުމައްޗަށް އެއްލާލީ ލިބުނު މާޔޫސްކަމުގައެވެ. ޝާރިފްގެ އެއްވެސް ކޯލެއް ޒާޔާއަށް ލިބިފައި ނުވާތީއެވެ.

އޭރުވެސް ކޮޓަރިތެރޭގައި ރާއިދު ނެތްކަމެއް ޒާޔާއަކަަށް ފާހަގައެއް ނުކުރެވުނެވެ.

ވާނީވެސް އެހެން ނޫން ހެއްޔެވެ؟ އަބަދުމެ ޒާޔާގެ ހިތާއި ސިކުނޑީގައި އެނބުރެމުންދަނީ ޝާރިފް އެވެ.

ފޯނު ރިންގްވިތަނާ ޒާޔާ ފޯނާއި ދިމާއަށް ދިޔައީ ދުވެފައެވެ.

ނަމަވެސް ފޯނުގެ ސްކްރީނަށް އަރާފައިވާ ރާއިދުގެ ނަން ފެނިފައި ޒާޔާ އަނެއްކާާވެސް އުދާސް ވެއްޖެއެވެ. އުއްމީދު ކުރި މީހާއަށް ނުވުމުންނެވެ. ހިތަށް ކެތްނުވާ ވަރުމުން ޒާޔާއަށް އެނދު ކައިރީގައި ތަށިމުށި މަތީގައި އިށީނދެވުނެވެ. އޭރު ދެލޯ ފުރިގެން ބަންޑުން ވެއްޖެއެވެ. ޝާރިފްގެ އަޅާލުމާއި ލޯތްބަށް އާދަވެފައި ހުރި ޒާޔާއަށް އެލޯބި ނުލިބި ދިރިހުރެވޭނެބާއެވެ. ޝާރިފްއާއި ނުލާ ޒާޔާއަށް އުޅެވޭނެބާއެވެ.

ފޯނުގެ ބީޕްއަޑާއިއެކު، ޒާޔާ އަތުގެ ނުފުށުން ދެލޯ ފޮހެލުމަށްފަހު ފޯނަށް ބަލާލިއެވެ. ރާއިދުގެ މެސެޖެކެވެ. ޝައްކު ކުރެވުނީތީ މާފަށް އެދެމުން ރާއިދު އެދިފައިވަނީ ރާއިދު ކައިރިއަށް ރަށަށް ދިއުމަށެވެ. ފަތިހު ފްލައިޓްއިން އެނބުރި ރަށަށް ދިޔައިރު ޒާޔާއަށް ނޭންގީ ނިދިފައި އޮތުމުން ކަމަށްވެސް އޭގައި އޮތެވެ.

ރާއިދުއާއި ދޭތެރޭގައި ފަރުވާކުޑަ ކުރެވޭތީ ޒާޔާ ދެރަވެއެވެ. ނަމަވެސް ޒާޔާއަށް އެގޮތަށް ކަންތައް ކުރެވެނީ ގަސްތަކުނޫނެވެ.

ފޯނުގެ ސްކްރީނުގައި އަތް ހާކާލަމުން ޒާޔާ ދެލޯ މަރާލިއެވެ. ރާއިދު ދެރަވާނެ ވަރު ހިތަށް ސިފަކޮށްލެވުނީމައެވެ. ޒާޔާ އާއި ދޭތެރޭގައި ކިރިޔާ ޝާރިފް ފަރުވާކުޑަ ކޮށްލީމަވެސް ދެރަވާ ވަރު އިނގޭނީ ހަމަ ޒާޔާއަށެވެ.

 

ދެ ދުވަސް ފާއިތުވެއްޖެއެވެ. ޝާރިފްގެ އެއްވެސް ކޯލަކަށް ޒާޔާ ޖަވާބެއް ނުދެއެވެ. އެންމެ ބޭނުންވި ވަގުތު، ވަގުތު ނުދީފައި ދެން ޝާރިފް ޒާޔާއަށް ގުޅާކަށް ނުޖެހޭނެ ނޫން ހެއްޔެވެ؟

ފާއިތުވި ދެ ދުވަސް ތެރޭގައި އެއްފަހަރުވެސް ރާއިދު ޒާޔާއަކަަށް ނުގުޅައެވެ. އެކަމާއި ޒާޔާ ހައިރާންވެސް ވިއެވެ.

އެތައް އިރެއް ވަންދެން ވިސްނަން ހުރުމަށްފަހު ޒާޔާ ނިންމީ ރަށަށް ދިއުމަށެވެ. ރާއިދު އެންމެ ފަހުން ފޮނުވި މެސެޖްގައިވެސް ރާއިދު އެގޮތަށް އެދިފައި އޮތުމުންނާއި ބޮޑު ޗުއްޓީ ދުވަސްވަރާއި ގާތްވެފައިވެސް އޮތުމާއި އެކީގައެވެ.

 

ނަސީބު ރަނގަޅުކަމުން ޒާޔާއަށް ރަށަށް ދެވުނު ދުވަސް އެއީ ރާއިދުވެސް ރަށުގައި ހުރި ދުވަހެކެވެ. ޒާޔާ އާއި ޒިޔަލް ކުއްލިއަކަށް ފެނުމުން ރާއިދު އުފަލުން ގޮސް މޮޔަވި ކަހަލައެވެ. ޒާޔާގެ ގައިގައި ބައްދާލިއިރުވެސް ރާއިދުގެ ދެލޯ ވަނީ ފެންކަޅިވެފައެވެ.

“ކީއްވެ ނުގުޅަނީ؟” ޒާޔާ ރާއިދުގެ ބުރަކަށީގައި ފިރުމާލިއެވެ.

“ޒާޔާ އަހަރެން މިސްވޭތޯ ބަލާލަން.” ރާއިދު ޒާާޔާގެ ނިތްކުރީގައި ބޮސްދިނެވެ.

“ހަވީރު ފުރަން ޖެހޭ. އެކަމަކު މާދަމާ އައިއްސަ ޒާޔާ ކައިރީގައި މަޑުކުރާނަން އިނގޭ.” ރާއިދު ޒިޔަލް އުރާލައިގެން ހުރެ ބުނެލިއެވެ.

 

“ދަރިފުޅު ކޮޓަރިންވެސް ނުނިކުންނަނީތަ؟” ހަވީރު ރާއިދު ދިޔުމުންވެސް ޒާޔާ އޮތް ގޮތަށް އޮތީއެވެ. ބޭރަށް ނިކުންނަން ޒާޔާ ބޭނުން ނުވަނީއެވެ.

ޒާޔާ ރަށުގައި އުޅޭ ކަމެއް ޝާރިފްއަށް އެނގޭކަށް ޒާޔާ ބޭނުމެއް ނޫނެވެ.

“ޒިޔަލް ގޮވައިގެން ހިނގާލަން ގޮއްސަ މިއައީ. ގެޔަށް އައި މަގުމަތީގައި އުރާލައިގެން އައީ. ގެެޔާއި ހަމައަށް އައިއިރު ނިދިފައި އޮތީ.” ފާއިޒާ ޒިޔަލް ނަގާ އެނދުމަތީގައި ބާއްވާލިއެވެ.

“މަންމާ. ކޯޗެއްތަ ކާންހުރީ؟ ވަރަށް ބަނޑު ހައި.” ބަނޑުހައިވިކަންވެސް ޒާޔާއަށް ހަނދާންވީ އަދި ކިރިޔާއެވެ.

“މަންމަވެސް އަދި ނުކަމޭ. ހިނގާބަލަ ހުރި އެއްޗެއްވެސް ބަލާލަން.” ފާއިޒާ ކާގެޔާއި ދިމާއަށް މިސްރާބު ޖެހުމާއެކު ފަހަތުން ޒާޔާ ވެސް ހިނގައިގަތެވެ.

 

އިރުއޮއްސޭ މަންޒަރު ބަލާލަން އަތިރިމައްޗަށް ނިކުމެލާ ހިތްވެފައި ޒާޔާ ގޭގެ ދޮރުމަތީގައި ހުއްޓެވެ. ނަމަވެސް އެތާ ހުއްޓާވެސް ޝާރިފްއަށް ފެނިދާނެތީ ޒާޔާ ފަސްޖެހެނީއެވެ.

ކުއްލިއަކަށް ޒާޔާގެ ކަންފަތުގައި އަންހެނުންތަކެއްގެ ހުނުމުގެ އަޑެވެ. ކަރު އަނބުރާލަމުން ޒާޔާ ބަލާލިއެވެ.

އޭރު ދިލާ އާއި އޭނާގެ ރައްޓެހި ދެކުއްޖަކު ޒާޔާ އާއި އަރާ ހަމަވަނީއެވެ.

“އެންމެންގެ ތުންފުއްސެކޯ. އަންހެނުންނަށްވެސް ހުތުރު.” ދިލާ ބަހުން ޖަހާލީ ސީދާ ޒާޔާއަށް ކަން ޒާޔާ ދެނެހުއްޓެވެ. ހުތުރު ލަޤަބެއް ޒާޔާ އަށް ދިނުމަށްފަހު ދިލާ މެން އަނެއްކާވެސް ހީނގަތެވެ. އެތައް ފަހަރަކު ދިލާއަށް އެތިވަރު ގޮވައިގަންނަން ޒާާޔާގެ ހިތަށް އެރިއެވެ. ނަމަވެސް ޝާރިފްގެ އަންހެނުންނަށް ވީތީ ޒާޔާ ހިމޭނުން ހުރީއެވެ.

 

ދިލާގެ ވިހަ ބަސްތައް ހިތުން ފިލުވާލުންވީ ދަތި ކަމަކަށެވެ. ޒާޔާއަކީ އެންމެންގެ ތުންފުއްސެއް ނޫނެވެ. ޝާރިފްދެކެ ޒާޔާ ވަނީ ލޯތްބެވެ.

ނިދަން ބޭނުން ވިޔަސް ޒާޔާ އަކަށް ނުނިދުނެވެ. ދެފަރާތަށް ފުރޮޅި ފުރޮޅި އޮއްވާ ފޯނު ރިންގްވާން ފެށިއެވެ.

“ކިހިނެއްވީ؟” ޝާރިފްގެ ކޯލަށް ޒާޔާ ޖަވާާބު ދިނީ ހަޅޭއްލަވައިގަންނަމުންނެވެ. ދިލާގެ މަލާމާތުގެ ބަސްތައް އަދިވެސް ސިކުނޑި ތެރޭގައި އެނބުރޭތީ އައިސްފައި ހުރި ރުޅިންނެވެ.

“ހާދަ ރުޅިއެއް. ކީއްވެ އައި ވާހަކަ ނުބުނީ؟” ޝާރިފް ވާހަކަ ދެއްކީ މަޑުމައިތިރިކަމާ އެކުގައެވެ.

“ކާކުތަ ބުނީ ޝާރިފްއަށް އަންގަން ޖެހެޔޭ މަގޭ ހުރިހާ ކަމެއް.” ޒާޔާ އަޑަށް ބާރުލަމުން ބުނެލިއެވެ.

“ކީއްވެތަ ތި ގޮތަށް ތި ވާހަކަދައްކަނީ. ނިކުމެބަލަ ބޭރަށް.” ޝާރިފް އެދުނެވެ.

އައިސްފައި ހުރި ރުޅިން ޝާރިފްގެ ކުރިމަތީގައި ހުރެ އެއްޗެހި ގޮވާލަން ބޭނުންވެފައި ހުރިލެއް ބޮޑުކަމުން ޒާާޔާ ފޯނު ބޭއްވުމަށްފަހު ބޭރަށް ނިކުތެވެ.

ފާރުގައި ލެގިލައިގެން ހުރި ޝާރިފް ފެނިފައި ޒާޔާ ފިނިވެއްޖެއެވެ. ޝާރިފްގެ ކުރިމަތީގައި އިސްޖަހައިލެވިއްޖެ އެވެ. ނުފެންނަ ހިސާބުގައި ހުރެ ހަރުކަށިކޮށް ވާހަކަ ދައްކަން ކެރުނަސް ކުރިމަތީގައި ހުރެ ޝާރިފް އާއި އެގޮތަށް ވާހަކަ ދައްކާކަށް ޒާޔާ އަކަށް ނުކެރެއެވެ.

ޝާރިފް އައި ގޮތަަށް އައިސް ޒާޔާގެ ގައިގައި އޮޅުލައިގަތެވެ. މޫނާއި އެތައް މިތާގައި ބޮސް ދޭ އިރު ހީވަނީ ޤަރުނެއް ކޮށްފައި ޒާޔާ ފެނުނު ހެންނެވެ.

“ފަކުރެއް ނުގަނޭތަ މަދެކެ. އެންމެންގެ ތުންފުއްސެއްދެކެ.” ދިލާގެ މަލާމާތުގެ ބަސްތައް ހިތަށް އައުމާއެކު ޒާޔާ ބުނެލިއެވެ.

“ކާކުތަ އެހެން ބުނީ. ޒާޔާއަކީ އެކަހަލަ މީހެއް ނޫން.” ޝާރިފްގެ އަޑުގައިވަނީ ސީރިއަސްކަމެވެ.

“ނޫނޭ. މަ މީ ހަމަ އެކަހަލަ މީހެއް.” ޒާޔާ ޝާރިފްގެ އަތް އޭނާގެ ހަށިގަނޑުން ދުރުކޮށްލިއެވެ.

“ދިލާ ދެކެ ލޯބިވޭތަ؟ ނޫނީ ލޯބިވަނީ އަހަރެން ދެކެތަ؟” ޒާޔާ ބަލަން ހުރީ ސީދާ ޝާރިފްގެ ލޮލަށެވެ.

“ދެމީހުން ދެކެވެސް. އެކަމަކު ބޮޑަށް ލޯބިވަނީ ޒާޔާ ދެކެ.” ޝާރިފްގެ ޖަވާބުން ޒާޔާ ގާތަށް އައީ ރުޅިއެވެ. ދުވެފައި ގޮސް ޒާޔާ ވަނީ ގޭތެރެއަށެވެ. ޒާޔާ ކުއްލިއަކަަށް ގޮސްފާނެ ކަމަށް ހީކުރެވިފައި ނުވާތީ ޝާރިފް އަށް ޒާޔާ ހިފަހައްޓާނެ ފުރުސަތެއްވެސް ނުލިބުނެވެ.

 

ކޮޓަރިއަށް ވަދެ ތަޅުލިއިރު ޒާޔާއަށް ހަމަ ރަނގަޅަށްވެސް ރޮވިއްޖެއެވެ. ދެމީހުން ދެކެ ލޯބި ވެވިދާނެއެވެ. އެކަމަކު އެއްފަހަރަކާއެއް ނޫނެވެ. ޝާރިފް ޒާޔާ ދެކެ ލޯބި ނުވާކަމުގެ އިޙްސާސް ފުރަތަމަ ފަހަރަށް ޒާޔާ އަށް އިޙްސާސް ކުރެވިއްޖެއެވެ. ދިލާ އެބުނިހެން ޒާޔާއަކީ ތުންފުހޭ ޓިޝޫއެކެވެ. ޝާރިފް ވެސް ޒާޔާ އާއި ދޭތެރޭގައި ކަންތައް އެކުރަނީ އެހެންނެވެ.

ތަކުރާރުކޮށް ޝާރިފް ގުޅަމުންދިޔައެވެ. ނަމަވެސް ޒާޔާ އެންމެ ފަހުން ޝާރިފްގެ ނަމްބަރު ބްލޮކް ކޮށްލީއެވެ. ޝާރިފް ޒާޔާގެ ހަޔާތުންވެސް ބްލޮކް ކޮށްލަން ހިތުގައި ޢަޒުމް ކަނޑައަޅަިއގެންނެވެ.

 

ގިނަ ވަގުތު ޒާޔާ އުޅެނީ ފޯނުވެސް ނިއްވާލައިގެންނެވެ. ރާއިދުއަށް ޒާޔާގެ މަންމަ ނަންބަރަށް ވެސް ގުޅޭނެކަން ޒާޔާއަށް އެނގެއެވެ. ފޯނު ނިއްވައިލީ އިތުރު ނަންބަރަކުން ވިޔަސް ޝާރިފް ގުޅާފާނެތީއެވެ.

 

ރީތި ހަނދުވަރެއް ދީފައި އޮތް ރެއެކެވެ. ޒާޔާ ފޯނާއި ކުޅެން އިނީ ގޭގެ ޖޯލީގައެވެ.

ގޭގެ ދޮރާށި ހުޅުވާލި އަޑަށް ޒާޔާ އިސްއުފުލާލިއެވެ.

ކުރިމަތީގައި ހުރީ ޒާޔާ ދަންނަ އެކަމަކު ވާހަކަ ދައްކައި ނޫޅޭ އަންހެނެކެވެ. ސަހާ އެވެ.

“ނިކުމެވިދާނެތަ ދޮރުމައްޗަށް. މީހަކު އެބަހުރި ހޯދަން އައިސް.” ފާޑަކަށް ހެވިފައި ހުރެ ސަހާ ނިކުތީ ބޭރަށެވެ.

ވާނުވާ ނޭނގޭތީ ހާސްވެ ހުރެ ޒާޔާ ބޭރަށް ނިކުތެވެ.

ކުރިމަތީގައި ހުރި ދިލާ ފެނިފައި ޒާޔާއަށް ލިބުނީ ކުއްލި ސިހުމެކެވެ.

 

ނުނިމޭ

ދިލާ ފެނުމާއެކު ފުރަތަމަވެސް ޒާޔާގެ ކަންފަތުގައި ތަކުރާރުވަމުން ދިޔައީ ދިލާގެ މަލާމާތުގެ ބަސްތަކެވެ.
“ކަލޭ ހިތްފުރޭނީ ކިތައް ފިރިހެނުން ލިބުނީމަތަ؟” ދިލާ މޫނުމަތިން އަލިފާން ކަނި ބުރަމުންދާކަހަލައެވެ.
“މަ ކަހަލަ ތުންފުއްސެއްގެ ހިތެއް ނުފުރޭނެއެއްނު. އެވަރުވެސް ނޭނގޭތަ؟” ޒާޔާ ދިލާގެ ކުރިމައްޗަށް ހުއްޓިލިއެވެ.
“އޮޅިގެންވެސް ތިބުނީ ރަނގަޅަށް. އެކަމަކު މަގޭ ފިރިމީހާ ނުދާނެ ތި ޒާޔާ އެއް ކައިރިއަކަށް. އެހެންވީމަ އޭނައޭ ކިޔައިގެން ދޮގުވާހަކަ ދެއްކުން ހުއްޓާލާ.” ދިލާ ޝަހާދަތް އިނގިލި ޒާޔާއަށް ދިއްކޮށް ލަމުން އަމުރުކޮށްލިއެވެ.
“ކަލޭގެ ފިރިމީހާ އައިސްފާނެތަ މަގޭ ކައިރިއަށް.” ޒާޔާ ހިނިއައިސްފައި ހުރެ އަހާލިއެވެ.
“އައްޗީ. މި ރަށު ހުރިހާ ފިރިހެނުން ކަލޭ ކައިރީގައި އަޅާފައި އޮތަސް މަގޭ ފިރިމީހާއެއް ނުދާނެ.” އަޑަށް ބާރުލަމުން ދިލާ ބުނެލީ ޒާޔާގެ ވާހަކަ ރަނގަޅަށް ނުނިމެނީހެވެ.
“އެހެންވެއްޖެއްޔާ ކީއްވެ ތި އަންހެނާ މިރޭ މިވަގުތު މިތާގަ ތިހުރީ. އަދި މަށާ ތި މަޢުޟޫއަށް ވާހަކަދައްކަން ޖެހުނީ.؟” ޒާޔާ ބޭނުންވީ ދިލާގެ އަނގަ ބައްދާލާށެވެ. އެކަމަކު ދިލާއަކީ ނިކަން ގޮތެއްގައި ހުންނަ މީހެއްކަން ޒާޔާއަށް އެނގެއެވެ. ޒާޔާ ބުނާ ކޮންމެ އެއްޗަކަށް ރައްދު ދޭނެކަންވެސް ޒާޔާއަށް ހަމަރަނގަޅަށް އެނގެއެވެ.
“ތިކަހަލަ ގޮތެއްނެތް އަންހެނަކު ކުރިމައްޗަށް މިއައީ އަންނަން ޖެހިގެން. މަގޭ ފިރިމީހާއާ ބެހޭގޮތުން އެއްވެސް ޚަޤީޤަތެއް ނެތް ވާހަކަތަކެއް ފަތުރާތީ. މީގެ ފަހުން އަހަރެމެންނާއި ނުބެހޭތި.
މަގޭ ފިރިމީހާ ބުނި މިރަށަކު ނުހުންނާނޭ ތިހާ ހުތުރު ކުނި އަންހެނެއް.” ފާނޑަކަށް ހީނގަންނަމުން ދިލާ ހިނގައިގަތެވެ.
އައި ރުޅިން ދިލާގެ ގައިގައި ޖަހާފާނަމޭ ޒާޔާގެ ހިތަށް އެރިއެވެ.
ނަމަވެސް ހަމަ އެހިނދުކޮޅުގައި ޒާޔާގެ ދިގު އެސްފިޔަތައް ތެމިއްޖެއެވެ.
ޝާރިފް ހަމަ އެހެން ބުނެފާނެ ހެއްޔެވެ؟
ނޫނީ ދިލާ ޒާޔާ ދެރަކޮށްލަން އެހެން ބުނީ ބާއެވެ؟

ދެފަޔަށް ލެވުނުހާ ބާރެއްލާފައި ޒާޔާ ދުއްވައިގަތީ ކޮޓަރިއާއި ދިމާއަށެވެ. ހަމަ މިވަގުތުވެސް ޒާޔާ ޝާރިފްއާއި ވާހަކަ ދައްކަން ބޭނުމެވެ. އެނދުމަތީގައި އޮތް ފޯނު ނަގަމުން ޒާޔާ ވިސްނަންފެށިއެވެ. ޝާރިފްއަށް ގުޅަންވީބާއެވެ. ދިލާ އައި ވާހަކަ ބުނަންވީ ބާއެވެ. ޒާޔާއަށް އެއްޗެހިކީ ވާހަކަވެސް ބުނަންވީ ބާއެވެ. ޒާޔާ ދައްކާ ވާހަކަ ޝާރިފް ޤަބޫލުކޮށްފާނެ ހެއްޔެވެ؟ މުޅިންވެސް ޖަވާބުނެތް ސުވާލުތަކެކެވެ.

އެތައް އިރަކު ވިސްނަން އިނދެފައި އަތުގައި އޮތް ފޯނު އެނދު މައްޗަށް އެއްލާލަމުން ޒާޔާ އެނދުގައި އޮށޯވެލިއެވެ.
އެވަގުތު ޝާރިފްގެ އިންޓަރނެޓް މެދުވެރިކޮށް ފޮނުވި މެސެޖެއް ޒާޔާއަށް ލިބުނެވެ. ފޯނުން ނަމްބަރު ބްލޮކް ކޮށްލާފައި އިނުމުން ޝާރިފް އަަށް މެސެޖްކޮށް ގުޅާވެސް ނުހެދޭތީ އެންމެ ފަހުން އިންޓަރނެޓް މެދުވެރިކޮށް ކުރީއެވެ.
ޝާރިފް ބަލަން ބޭނުންވީ ޒާޔާ އެހާ ދުރުވެގެން އުޅޭ ސަބަބެވެ. ޒާޔާ ޖަވާބުގައި ފޮނުވާލީ ދައްކާނެ އިތުރު ވާހަކައެއް ނެތީ ކަމަށެވެ. ނަމަވެސް ޝާރިފް އެދުނީ ބައްދަލުކޮށްފައި ވެގެން އުޅޭ ގޮތް ކިޔައިދިނުމަށެވެ.

ޝާރިފްގެ އެތައް އާދޭހަކާއެކު އެންމެ ފަހުން ޒާޔާ އެއްބަސްވިއެވެ. ހަމައެކަނި ޝާރިފްގެ އާދޭހަކަށް ނޫނެވެ. ޒާޔާވެސް ޖަވާބު ހޯދަން ޖެހޭ ބައިވަރު ސުވާލުތަކެއް ހުރީމައެވެ. އަދި މި ގުޅުން ވަކި ގޮތަކަަށް ނިންމަންވެސް ޒާޔާ ބޭނުންވާތީއެވެ.

ފިނި ފިނި ހިމޭން ދަންވަރުގެ އެވަގުތު ވަރަށް އަމާނެވެ. އެއްވެސް މީހެއްގެ ހިލަމެއްނެތެވެ. ޝާރިފް އާއި ޒާޔާ ވާހަކަދައްކަން ތިބީ ޒާޔާގެ އަމިއްލަ ކޮޓަރީގައެވެ.
“ޒާޔާ. ވެގެން އުޅޭގޮތެއް ބުނެދީފާާނަންތަ؟” ޝާރިފްގެ މޮޅިވެރި އަޑު އެންމެ ފަހުން ނިކުތެވެ.
“ޝާރިފް. މިކަން މިހާ ހިސާބުން ނިމުނީ. ޝާރިފް ނުލާހިކު ހެޕީ ދިލާއާއި އެކު. އެކަން މަށަށް ވަރަށް ރަނގަޅަށް އެނގިއްޖެ.”
ޒާޔާ އިސްއުފުލާ ޝާރިފްގެ ފުން ދެލޮލަށް ނަޒަރު ހުއްޓާލިއެވެ.
“މިތާގަ މިދައްކަނީ އަހަރުމެން ދެމީހުންގެ ވާހަކައޭ. އިތުރު މީހުން-”
“އޯ. ހާދަވަރެއްވީ. އާން އެހެއްނު ވާނީ. މަށަށް އެ ހޫރުޕަރީގެ ނަންގަނެވިއްޖެ ވިއްޔަ.” ޝާރިފްގެ ވާހަކަ ޒާޔާ މެދުކަނޑާލީ ރުޅި އައިސްގެން ފާޑަކަށް ހަޅޭއްލަވައިގަންނަމުން ނެވެ.
“ކޮން ފާޑެއްތަ ތީ.” ޝާރިފްގެ އަޑުގައިވަނީ ނުރުހުމެވެ. ޝާރިފް ޒާޔާގެ އަތުގައި މަޑުމަޑުން ހިފާލިއެވެ. ޝާރިފް އުޅުނީ ޒާޔާ ގެނެސް މޭގައި ލައްކޮށްލާށެވެ. އެކަމަކު ޝާރިފްއަށް ރުޅި މޫނު ދައްކާލަމުން ޒާާޔާ ޖެހުނީ ދުރަށެވެ. ޒާޔާގެ އެ އަމަލުން ޝާރިފް އިށީނދެގެން އިން އެނދުން ތެދުވިއެވެ. އަދި މަޑުމަޑުން ކޮޓަރިތެރޭގައި ދެކޮޅަށް ދެކޮޅަށް ހިނގަންފެށިއެވެ. ޒާޔާ އިނީ ފަރުވާތެރިކަމާއެކު ޝާރިފްގެ ހަރަކާތްތަކަށް ބަލާށެވެ.
“ޒާޔާ ދެކެ އަހަރެން ވާ ލޯބި ބަޔާންކޮށްދޭނީ ކިހިނެއް.؟” އެތައް އިރެއްގެ ހަމަ ހިމޭންކަމަށްފަހު ޝާރިފްގެ ބުނެލިއެވެ. ނަމަވެސް އެއްވެސް ޖަވާބެއް ޒާޔާގެ ފަރާތުން ނުލިބުނެވެ.
ޒާޔާގެ ހަމަހިމޭންކަމުން ޝާރިފްގެ ހިތަށް ހަމަޖެހުމެއް ނުލިބުނު ކަހަލައެވެ. ޝާރިފް އަނެއްކާވެސް ޒާޔާއާއި ޖެހިގެން އިށީނެވެ.  އިސްޖެހިފައިވާ ޒާޔާގެ މޫނުގައި ދެއަތުން މަޑުމަޑުން ހިފަހައްޓާލިއެވެ.
ޝާރިފްގެ ހޫނު ނޭވާތައް ޒާޔާއަށް އިޙްސާސް ކުރެވޭހާ ވަރަށް ޝާރިފް ޒާޔާގެ މޫނު ކައިރިކޮށްލިއެވެ. ބޭއިޚްތިޔާރުގައި ޒާޔާއަށް ޝާރިފްގެ ހަށިގަނޑުގައި އޮޅުލައިގަނެވުނެވެ. ޝާރިފްގެ ހަށިގަނޑުން ދުވަމުން ދިޔަ މީރު ވަހާއި ޝާރިފްގެ ބީހިލުން ޒާޔާގެ ހިއްސުތައް ހޭލައްވާލި ކަހަލައެވެ.
ޝާރިފްގެ ކޮންމެ ހަރަކާތަކަށް ޒާޔާ ލަދުން ބޮޑިވެގަނެވެ. ޝާރިފްގެ މޭގެ ހޫނުކަން އިޙްސާސްކުރަމުންނެވެ. މާގިނައިރުތަކެއް ނުވެ ދެހަށިގަނޑު އެއްހަށިގަނޑަކަށްވެ ނިމިއްޖެއެވެ. މުޅި ދުނިޔެއަށްވެސް ސިއްރުންނެވެ.

“ދަނީ އިނގޭ؟” ބޮލުން ޓީޝާޓް ވައްޓާލަމުން ޝާރިފް ސައިޑް ޓޭބަލް މަތީގައި އޮތް ފޯނު ނެގިއެވެ.
“އަހަރެން ނުދާށޭ ބުނެފިއްޔާ ހުންނާނަންތަ؟” ޒާޔާ އޭނާގެ ފޭރާމެއް ނެތް ހަށިގަނޑުގެ ބައެއްގައި ރަޖާ އަޅާލާ ނިވާ ކޮށްލިއެވެ.
“ދާން ޖެހޭނެކަން އެނގޭނު.” އަނެއްކާވެސް ޝާރިފްގެ އަނގައިން ނިކުތީ ޒާޔާ މާ ހިތްހަމަ ޖެހޭކަލަ ޖަވާބެއް ނޫނެވެ.
ހިތަށް ތަދުވި ނަމަވެސް ޒާޔާ އެއްވެސް އެއްޗެއް ނުބުނެއެވެ. ޒުވާބުކުރަން ބޭނުން ނުވާތީއެވެ.
“މިގުޅަނީ އިނގޭ ނިކުމެފަ.” ޝާރިފް ޒާޔާގެ ގައިގައި ބައްދާލިއެވެ. ބޮލުގެ އިޝާރާތުން އާއެކޭ ބުނެލަމުން ޒާޔާ ގޮސް ދޮރުހުޅުވިއެވެ.

 

ޝާރިފް ދިޔުމުން ޒާޔާ އެނދުމަތީގައި އޮށޯވެލިއެވެ. ނިތްކުރިމަތީގައި އަތް ބާއްވާލަމުން ޒާޔާ ވިސްނަންފެށިއެވެ. އުޅެ އުޅެވެސް ޝާރިފްއެއް ޒާޔާއަކަށް ދަހެއް ނުވިއެވެ. ކީއްވެ ހެއްޔެވެ؟ ޝާރިފްއާއި ދުރުގައި ހުންނަން ކިހާ މަސައްކަތެއް ޒާޔާ ކޮށްފި ހެއްޔެވެ؟ އެކަމަކު ކޮންމެ ފަހަރަކުވެސް ވަކިނުވެވެނީއެވެ. ލޯބީގެ ހަޤީޤީ މާނަ ޒާޔާއަށް ޝާރިފް ރަނގަޅަށް ދަސްކޮށްދީފި ކަހަލައެވެ. ޒާޔާގެ ދެލޯ ބަރުވެގެން އެސްފިޔަތައް ލެއްޕުނުއިރުވެސް ޒާޔާ ވިސްނަމުން ދިޔަ ވިސްނުމަކަަށް ބަދަލެއް ނާދެއެވެ.

އާދުވަހަކަށް ދުނިޔެ މަރުޙަބާ ކިޔާލީ ގަދަ ވަޔާއި ވިއްސާރަޔާ އވެސް އެކުގައެވެ. ނިދިފައި އޮތް ޒާޔާ އަށް ހޭލެވުނީވެސް ވަރަށް ބާރު ގުގުރިއެއްގެ އަޑަށެވެ.
ދޮރު ހުޅުވާލާފައި ރާއިދުވަނީ ތެމިފޯވެގެންނެވެ. ކޮނޑުގައި އޮތް ދަބަސް ޓައިލްސް މަތީގައި ބެހެއްޓުމަށްފަހު ފުރަތަމަވެސް ރާއިދުގެ ލޮލުގައި އަޅައިގަތީ ނިދިފައި އޮތް ޒާޔާއެވެ.
ފަނޑު ހިނިތުންވުމެއް ތުންފަތަށް ވެރި ކުރުވައިގެން ރާއިދު މަޑުމަޑުން ހިނގާފައި ގޮސް އެނދު ކައިރީގައި ހުއްޓިލިއެވެ. އެވަގުތު ރާއިދު ލޮލުގައި އަޅައިގަތީ ޒާޔާގެ ފޯނުގެ ސްކްރީނަށް އައިސްފައިވާ މިސްޑްކޯލް ތަކާއި މެސެޖްތަކެވެ. ދެބުމަ ގޮށް ޖަހާލަމުން ރާއިދު ޒާޔާގެ ކައިރީގައި ބާއްވާފައި އޮތް ފޯނު ނެގިއެވެ.

ނުނިމޭ

އާދުވަހަކަށް ދުނިޔެ މަރުޙަބާ ކިޔާލީ ގަދަ ވަޔާއި ވިއްސާރަޔާ އވެސް އެކުގައެވެ. ނިދިފައި އޮތް ޒާޔާ އަށް ހޭލެވުނީވެސް ވަރަށް ބާރު ގުގުރިއެއްގެ އަޑަށެވެ.
ދޮރު ހުޅުވާލާފައި ރާއިދުވަނީ ތެމިފޯވެގެންނެވެ. ކޮނޑުގައި އޮތް ދަބަސް ޓައިލްސް މަތީގައި ބެހެއްޓުމަށްފަހު ފުރަތަމަވެސް ރާއިދުގެ ލޮލުގައި އަޅައިގަތީ ނިދިފައި އޮތް ޒާޔާއެވެ.
ފަނޑު ހިނިތުންވުމެއް ތުންފަތަށް ވެރި ކުރުވައިގެން ރާއިދު މަޑުމަޑުން ހިނގާފައި ގޮސް އެނދު ކައިރީގައި ހުއްޓިލިއެވެ. އެވަގުތު ރާއިދު ލޮލުގައި އަޅައިގަތީ ޒާޔާގެ ފޯނުގެ ސްކްރީނަށް އައިސްފައިވާ މިސްޑްކޯލް ތަކާއި މެސެޖްތަކެވެ. ދެބުމަ ގޮށް ޖަހާލަމުން ރާއިދު ޒާޔާގެ ކައިރީގައި ބާއްވާފައި އޮތް ފޯނު ނެގިއެވެ.

އެވަގުތު ޒިޔަލް ހޭލައިގެން ރޮއެގަތެވެ. ނިދިފައި އޮތް ޒާޔާއަށް ހޭލެވުނީ ވެސް އެވަގުތުއެވެ. އަދި ޒާޔާއަށް ނިދުނުތާ މާގިނަ އިރުތަކެއްނުވެއެވެ. އެހެންވެ ޒާޔާގެ ބޮލަށް ހުރީ ފާޑަކަށް އެނބުރުން އަރާފައެވެ. ކައިރީގައި ހުރި ބުއްފުޅި ނަގާ ޒިޔަލްގެ ތުބުގައި ޖެއްސީ ރާއިދުއެވެ.

ޒާޔާއަށް ކަމެއް ވާނީ ޒާޔާގެ ދެލޯ ހުޅުވިގެން ނޫން ހެއްޔެވެ؟ ރާއިދު ކޮޓަރި ތެރޭގައި ހުރި ކަމެއްވެސް ޒާޔާއަށް ރޭކާނުލައެވެ. އަނެއްކާވެސް އަރާމު ނިދީގެ ތެރެއަށް ޒާޔާ ގެބިގެން ދިޔައީއެވެ.

ސިގެރެޓަކަށްފަހު ސިގެރެޓެއް ހުލިވަމުން ދިޔައެވެ. އަތުގައި އޮތް ޒާޔާގެ ފޯނަށް ނަޒަރު ހުއްޓާލައިގެން ރާއިދު އިނީ ގޭގެ ފެންޑާގައެވެ.
އެ ދަންވަރު ޒާޔާއަށް އެތައް ފަހަރަކު ޝާރިފް ގުޅާފައި އެވަނީ ކީއްކުރަން ހެއްޔެވެ؟ އަނެއްކާ ޒާޔާ މަށަށް ކެހި ދިނީ ހެއްޔެވެ؟ ކުރިންވެސް ޝާރިފްއާއި ޒާޔާ އާ ބެހޭގޮތުންވަނީ ތަފާތު އަޑުތަކެއް އަރާފައެވެ.
އަތުގައި އޮތް ސިގެރެޓް ބުރި ހޫރާލަމުން ރާއިދު ނިތްކުރީގައި އަތް ހާކާލިއެވެ. ހިތަށް ލިބުނު ނުތަނަވަސްކަން ހައްތާާހާވީ އިތުރެވެ. ޒާޔާ އަތުން ބީވުމަކީ ރާއިދުއަށް ކެތް ކުރެވޭ ވަރުގެ ކަމެއް ނޫނެވެ.

“ދަރިފުޅާ ރާއިދު. އައީތަ؟ މަންމަ އުޅެފިން ޔަމަން އާ ދެކުދިންނަށް ގުޅާލަންވެސް. ތި މީހުން ވީ ހިސާބެއް ބަލާލަން. މިހާ ގަދަ ވިއްސާރައިގައި ކަނޑު މައްޗަށް ނިކުތުން އެހާ ރަނގަޅެއް ނުވާނެ.” ބަދިގެ ފަރާތަށް ނިކުމެ ނިކުމެ ހުރި ފާއިޒާ ހިތަށް ހަމަޖެހުމެއް ލިބުނީ ރާއިދު މެންނަށް އެއްވެސް ނުރައްކަލެއް ނެތްކަން ޔަޤީންވީމައެވެ.
“ގަދަކަމުން ހިފުނު އެން ކޮޅުވެސް މަރުވީ. އެހެންވެ އައީ ދޯ ރާއިދު.” ފާއިޒާގެ ސުވާލަށް ޖަވާބު ދިނީ ތެތް އިސްތަށިގަނޑުން ފެން ހިއްކަމުން ނިކުތް ޔަމަންއެވެ.
“ސައިހަދަންތަ ދެކުދިންނަށް؟” ފާއިޒާ ހިނިތުންވެލަމުން އަހާލިއެވެ.
“ކޮފީ ބޮއެފިން މަންމާ. ނިދާލާފައި ތެދުވެ ކާނީ.” ރާއިދު ގޮސްވަނީ ކޮޓަރިއަށެވެ.
ޔަމަންވެސް އެގަޑީގައި ކާކަށް ބޭނުމެއްނުވިއެވެ. އޭނާވެސް ބޭނުންވީ އަރާމުކޮށްލާށެވެ.

ނިދިފައި އޮތް ޒާޔާގެ މޫނަށް ފޫހިކަމެއްނެތި ރާއިދު ބަލަހައްޓައިގެން އޮތެވެ. މާޒީގެ ފޮނި ހަނދާންތައް ލޯމައްޗަށް ސިފަވާ ކޮންމެ ފަހަރަކު ރާއިދުއަށް ހިނިތުންވެލެވެއެވެ.
ނަމަވެސް ހަމަ ދެވަނަ ސިކުންތުގައި އެ ހުރިހާ އުފާވެރިކަމެއް ވިއްސިވިހާލި ވެގެންދެއެވެ. ރާއިދުގެ ހިތުގައި އުފެދިފައިވާ ހުރިހާ ސުވާލުތަކަށް ޖަވާބު ނުލިބެނިސް ދެން ރާއިދު އަކަށް ހަމައެއް ނުޖެހޭވެނެއެވެ. ރާއިދުގެ ހިތަށް ކެތްވަނީކީވެސް ނޫނެވެ. ޒާޔާއަށް ގޮވާ ހޭލައްވަން ކިތަންމެ ފަހަރަކު ރާއިދުގެ ހިތަށް އެރިއެވެ. ނަމަވެސް ޒާޔާއަށް ގޮވާކަށް ރާއިދުގެ ޒަމީރު އެއްބަސްނުވީއެވެ. އެހާވެސް ޒާޔާދެކެ ރާއިދު ލޯބިވެއެވެ.

“ޑެޑީ.” ކުޑަކުޑަ ޒިޔަލް ހޭލައިގެން ތެދުވެ ރާއިދުގެ ގައިގައި އޮޅުލައިގަތެވެ. ވާނީވެސް އެހެން ނޫން ހެއްޔެވެ؟ ޒިޔަލް ހޭލާއިރު ރާއިދު ނުހުންނަތާ އެތައް ދުވަހެކެވެ.
“ދަރިފުޅު ހަންގްރީވީ ދޯ. ހިނގާ މާމަ ކައިރިއަށް ސައިބޯލަން. މަންމި އަދި ނުހޭލައޭ.” ރާއިދު ޒިޔަލްގެ ކޮލުގައި ތުންފަތް ޖައްސާ ބާރުކޮށްލިއެވެ.
ލިބުނު އުފަލުގައި ޒިޔަލް ރާއިދުގެ އަތު ތެރޭގައި ބޮޑިވެގަތެވެ.

 

ފާއިޒާ އާއި ޒިޔަލް ހަވާލު ކުރުމަށްފަހު ރާއިދު އެނބުރި ކޮޓަރިއަށް ވަން އިރު ޒާޔާ އެނދުން ތެދުވަނީއެވެ.
ރާއިދު ފެނިފައި ޒާޔާއަށް ލިބުނީ ކުއްލި ސިހުމެކެވެ. ހިނިތުންވެލަންވެސް ޒާޔާއަކަަށް ނޭނގުނެވެ.
“ޝާރިފް ގުޅިތަ؟” ރާއިދު ޒާޔާގެ ކުރި މައްޗަށް އައިސް ހުއްޓުނެވެ. ރާއިދުގެ ސުވާލުން ޒާޔާގެ ނޭވާ ހާސްކޮށްލި ކަހަލައެވެ.
“ކީއްވީ؟ ކުއްލިއަކަށް ތިހެން ތިއެހީ؟” ޒާޔާއަށް ވާހަކަދެއްކުނީ ގަދަކަމުން ކަހަލަ ގޮތަކަށެވެ.

ޖަވާބު ދިނުމުގެ ބަދަލުގައި ރާއިދު ޖީބުން ނެގީ ޒާޔާގެ ފޯނެވެ. ޒާޔާއަށް ތެޅިގަނެވުނެވެ. ރާއިދުއަށް އެމަންޒަރު ރީއްޗަށްވެސް ފެނުނެވެ.
“ޒާޔާ ކޮންކަމަކާތަ ތިހާ ހާސްވަނީ؟” ޒާޔާގެ އަމަލުތައް ހުރިގޮތުން ރާއިދުގެ ޝައްކު ޔަޤީނަށް ބަދަލުވަނީ ކަހަލައެވެ.
“ތި ފޯނު ކިހިނެއްވީތަ؟” އެ ފިނި ފިނި ދުވަހުވެސް ޒާޔާ ހުރީ ދާހިއްލާ ފޯވެފައެވެ. ރާއިދު ފޯނުގައި ހުރި ޝާރިފްގެ މިސް ކޯލަތައް ޒާޔާއަށް ދައްކާލިއެވެ.
ޒާޔާގެ އަނގަ ބަންދުވި ކަހަލައެވެ. ނަސީބެކެވެ. ވާހަކަ ދައްކާފައި ހުރި ކޯލް ހިސްޓްރީ ޒާޔާއަށް ފޮހެލެވުނު ކަމެވެ.
“ތިކަމާ ތަ ރާއިދު ހިތް ހަމަ ނުޖެހިފައި ތިހުރީ؟ ތީގަ ނެތެއްނު އަހަރެންގެ މައްސަލައެއް. އެއްފަހަރުވެސް ޖަވާބު ދީ ވާހަކަ ނުދައްކަމެއްނު.” ޒާޔާ އަމިއްލަ ނަފްސު ދިފާޢު ކުރުމުގެ މަސައްކަތް ފެށިއެވެ.
“ގައިމު ގުޅަން ޖެހޭ ސަބަބެއްވެސް އޮންނާނެތާ؟ ގުޅަން ކެރޭނީވެސް ޒާޔާ ވާހަކަ ދައްކާތީއެއްނު.” ރާއިދު އަދިވެސް ހަޤީޤަތް އޮޅުން ފިލުވަން މަސައްކުރަނީއެވެ. ޒާޔާ ދައްކާ އެއްވެސް ވާހަކައެއްގައި ބުރަދަނެއް ނެތް ކަން ރާއިދުއަށް އިޙްސާސްވާތީއެވެ.
“މަށެއް ޝާރިފްއަކާއި ވާހަކައެއް ނުދައްކަން. އެކަމަކު ދިލާ އައި މިގެޔަށް ރޭގައި.” ޒާޔާ ޝާރިފްގެ ގުޅުން ސިއްރުކުރަން ޒާޔާއަށް ކުރަން ޖެހުނު ކޮންމެ ކަމެއް ޒާޔާ ކުރާނެއެވެ. ރާއިދުގެ ކުރިމަތީގައި އޭނާ އެހާވަރަށް ދޮގު އެހަދަނީވެސް އެހެންވެއެވެ.
“ކޮން ދިލާއެއްތަ؟” ރާއިދު ވިސްނަން ހުރެފައި އަހާލިއެވެ.
“ދިލާ ނޭނގެދޯ އަދި ރާއިދުއަކަށް. އެއީ ޝާރިފްގެ ވައިފް. އަހަރެން އެމީހުންނޭ ކިޔާފައި ދޮގު ވާހަކަ ފަތުރަނީއޭ ކިޔާފައި މިގެޔަށް އައިސް ވަރަށް އެއްޗެހި ކިޔާފައި ދިޔައީ. އެހެންވީމަ ޝާރިފްގެ ފޯނުން ދިލާވެސް ގުޅާފާނެއެއްނު. ޝާރިފް އަކީ މަށަކަށް ގުޅާ މީހެއްނޫން.” ޒާޔާ މޮޅު ގޮތަކަށް ވާހަކަ އަނބުރާލިއެވެ. ރާއިދުއަށް ފަސޭހައިން ޤަބޫލު ކުރެވޭފަދަ ގޮތަކަށެވެ. ކަންތައް ވީވެސް އެހެންނެވެ.
ޒާޔާގެ ވާހަކަތައް ރާއިދުއަށް ޤަބޫލުކުރެވުނެވެ.
“ނަމްބަރު ބްލޮކް ކޮށްލާ. އޭރުން ނުގުޅޭނެއެއްނު.” ފޯނުން ޝާރިފްގެ ނަމްބަރު ރާއިދު ބްލޮކް ކޮށްލިއެވެ. ޒާޔާގެ ކުރިމަތީގައެވެ. ޒާޔާގެ ހިތް ފުނޑު ފުނޑުވެގެންދިޔަ ކަހަލައެވެ. ޝާރިފްއާއި ވާހަކަ ނުދައްކާ ހުރުމަކީ ޒާޔާއަކަށް ކުޅަދާނަ ވާވަރުގެ ކަމެއްނޫނެވެ.
ނަމަވެސް ކުރާނީ ވަކި ކީއް ހެއްޔެވެ؟ ރާއިދު ދެން ޝާރިފްގެ ނަމްބަރު ބްލޮކް ލިސްޓްގަ އިނދޭތޯވެސް ބަލާނެއެވެ.
ފެންކަޅިވެގެން ގޮސް ރޮވެން ކައިިރިވުމާއެކު ޒާޔާ ރާއިދު މޭތެރޭގައި މޫނު ފޮރުވާލިއެވެ.
“ބޭބީ. ދެރަވީތަ؟ ސޮރީ. އަހަންނަށް މާބޮޑަށް ނެގެޓިވް ވެވުނީ ދޯ.” ޒާޔާގެ ފަން އިސްތަށިކޮޅުގައި ރާއިދު ފިރުމަމުން ދިޔައެވެ.
ޒާޔާ ދެލޯ މަރާލިއެވެ. ހިތުގައިވާ އުދާސްތައް ރާއިދުގެ ކުރިމަތީގައި ބޭރު ކުރެވެންނެތީމައެވެ. ޔަޤީނެވެ. ޒާޔާގެ ހިތުގައިވާ މާޔޫސްކަމަކީ ކޮބައިކަން އެނގިއްޖެއްޔާ ރާއިދު އެގޮތަކަށް ޒާޔާގެ ގައިގައި ނުފިރުމާނެއެވެ. އެންމެ ފަޅި ސިކުންތަކުވެސް ރާއިދު ޒާޔާގެ ކައިރިޔަކު ނުހުންނާނެއެވެ.

 

ދެ ދުވަސް ފާއިތުވެއްޖެއެވެ. ގަދަ ވަޔާއި ވިއްސާރައާއި އެކުގައެވެ. މޫސުން ތަން ނުދޭތީ ރާއިދުމެންނަށްވެސް ނުފުރުނެވެ. ހުއްޓާނުލާ ވާރޭ ވެހޭތީ ބޭރަކަަށްވެސް ނުދެވެއެވެ.
ޝާރިފް ނުފެނި އުޅެން ޒާޔާ އަށް ކިހާ އުނދަގޫވާކަން ޒާޔާ އަށް އެދުވަހު އިޙްސާސް ކުރެވުނެވެ. ޝާރިފް މިހާރު ހުންނާނީ ވަރަށް ރުޅި އައިސްފައި ކަންވެސް ޒާޔާއަށް އެނގެއެވެ. އެކަމަކު ޝާރިފްއަށް ގުޅޭނެ އެއްވެސް ގޮތެއްނެތެވެ. ރާއިދު ހުއްޓާ ޝާރިފްގެ ނަމްބަރަށް ގުޅާކަށްވެސް ޒާޔާއަކަށް ނުކެރޭނެއެވެ.
“ހާދަ ފުން ވިސްނުމެއްގައި؟” ރާއިދުގެ އަޑަށް ޒާޔާ ސިހުނެވެ.
“ނޫން.” ޒާޔާ އަވަސް އަވަހަށް ދެފަރާތަކަށް ބޯ ހޫރާލިއެވެ.
“ހިނގާބަލަ ބޭރަށް ނިކުމެލަން. ފިހާރައަކަށްވެސް ދާން ޖެހޭ އެބަ. މިވަގުތު ވާރޭވެސް ހުއްޓާލާފަ އެއޮތީ.” ޝާރިފް ޒާޔާގެ އަތުގައި ހިފާލިއެވެ.
ބޯ ޖަހާލަމުން ޒާޔާ ތެދުވީ ރާއިދުގެ އަތް ދުރުކޮށްލަމުންނެވެ.

ރާއިދުގެ ސައިކަލް ފަހަތުގައި އިން އިރުވެސް ޒާޔާއަށް ވަށައިގެން ހޯދެނީއެވެ. މަގެއްގެ މަތިންވެސް ޝާރިފްގެ ހިޔަނި ނަމަވެސް ފެނޭތޯއެވެ.

ފިހާރަ ބަންދުކޮށްފައި ހުރުމުން ހުޅުވަންދެން ރާއިދު ސައިކަލް މަޑުކޮށްލީ އަތިރިމަތީގައި ހަދާފައި ހުރި ހަޓެއްގެ ކައިރިއަށެވެ. އަވަސް އަވަހަށް ޒާޔާ ސައިކަލުން ފައިބައިގެން ގޮސް އެ ހަޓް ތެެރެއަށް ވަނެވެ.
“އިރުކޮޅަކުން ހުޅުވާނެ ދޯ؟” ރާއިދުވެސް ޒާޔާގެ ފަސްފަހަތުން އައިސް ހަޓް ތެރެއަށް ވަނެވެ. ނަމަވެސް ޒާޔާގެ ޖަވާބެއް ނުލިބުނެވެ.
ރާއިދު ޒާޔާގެ މޫނަށް ނަޒަރު ހުއްޓާލިއެވެ. އޭރު ޒާޔާ އެއްދިމާއަކަށް ބަލަން ހުރިތަން ފެނިފައި ރާއިދުވެސް އެނބުރި ބަލާލިއެވެ.
އެވަގުތު ތަންކޮޅެއް ދުރުގައި ސައިކަލްމަތީގައި އިށީނދެލައިގެން އިން ޝާރިފް ރާއިދުއަށް ފެނުނެވެ. އަނެއްކާވެސް ރާއިދުގެ ހިތުގައި ސުވާލު އުފެދުނެވެ. ޒާޔާ އެހާ ޝައުޤުވެރިކަމާއެކު ޝާރިފްއަށް ބަލަންވީ ސަބަބެވެ.
“ހިނގާ ދަމާ.” ރާއިދު ޒާޔާގެ އަތުގައި ހިފިއެވެ.
“ހިނގާ.” އިސް އޮބާލަމުން ޒާޔާ ބުނެލީ ހިތާއި ދެކޮޅަށެވެ.

“ރާއިދު. ހިނގާބަލަ ދޯންޏަށް އަރާލާފައި އަންނަން.” ރާއިދުމެން ގޭގެ ދޮރު މައްޗަށް ސައިކަލްގައި އައިސް މަޑުކޮށްލިއިރު ޔަމަން ނިކުމެ ހުއްޓެވެ.
ޒާޔާ އަވަސް އަވަހަށް ސައިކަލުން ފޭބުމާއެކު ރާއިދުގެ ފަހަތަށް ޔަމަން އެރިއެވެ. ރާއިދު ސައިކަލް ދުއްވާލުމާއެކު ޒާޔާ ދުވެ ގޮސް ކޮޓަރިއަށް ވަދެ ތަޅުލިއެވެ.
ލިބުނު ފުރުސަތު ނަގާލާކަށް ޒާޔާ ބޭނުމެއް ނުވިއެވެ.
އަވަސް އަވަހަށް ޝާރިފްގެ ނަމްބަރަށް ގުޅާލިއެވެ.
“ވާ ވަރުވީތަ މަށަށް ތިގުޅީ؟” ފުރަތަމަވެސް ޒާޔާއަށް ކުރިމަތިލާން ޖެހުނީ ޝާރިފްގެ ރުޅިގަނޑާއެވެ. ނަމަވެސް ޒާޔާ ޝާރިފްއަށް ވީގޮތް ކިޔާދިނެވެ.
“އެހެން ވިޔަސް ހެޔޮ. ގުޅެން ޖެހޭނެ ޒާޔާއަށް މަށަށް.” ޝާރިފްގެ ރުޅި މައިތިރި ވާގޮތެއް ނުވިއެވެ.
“އަހަރެންވީމަ ޖެހޭނެ ގުޅެން. ޝާރިފް ދިލާ ކައިރީ އޮންނައިރު މަށަށް ގުޅައިގެންތަ އިންނަނީ.” ޝާރިފްގެ ވާހަކަތައް ހުރިގޮތުން ޒާޔާގެ ގާތަށްވެސް ރުޅިއައެވެ.
“ދެން ނުގުޅީމަ ވީނު. މީގެ ފަހުން މަށަށް ގުޅައިގެން ނުވާނެ.” ޝާރިފް ޒާޔާގެ މޫނު މައްޗަށް ފޯނު ކަނޑާލިއެވެ.
ޒާޔާ ހަމަ އެސިކުންތުގައި ޝާރިފްއަށް ގުޅިއެވެ. ނަމަވެސް ކޮންމެ ފަހަރަކުވެސް ޝާރިފްގެ ނަމްބަރު ބިޒީ ވަނީއެވެ. ޝާރިފް ޒާޔާގެ ނަމްބަރު ބްލޮކް ކޮށްލިއެވެ.
ޒާޔާއަށް ހުރެވުނީ ހަދާނެ އިތުރުގޮތެއް ނޭނގިފައެވެ. ވީ ދެރައިން ޒާޔާގެ ލޮލުން ކަރުނަ ހިލުނެވެ. ޝާރިފްއަށް އެހެން ބުނެލަން ކިހާ ފަސޭހަ ހެއްޔެވެ؟ ޒާޔާ ދެރަކޮށް ހިތުގައި ޖައްސަން ޝާރިފް ފަސްނުޖެހުނެވެ. ޒާޔާ އެނދުމައްޗަށް ވެއްޓިގަނެ ރޯން ފެށިއެވެ.

އިރާކޮޅު އަނެއްކާވެސް ވާރޭ އޮއްސާލިއެވެ. ޒިޔަލްގެ ބޮލުގައި ފިރުމާލަ ފިރުމާލަ ޒާޔާ އޮތެވެ. ޒިޔަލް ނިންދަވާށެވެ. އަދިވެސް ޒާޔާގެ ސިކުނޑި ތެރޭގައި އެނބުރެމުން ދިޔައީ ޝާރިފްގެ ރުޅިވެރި ބަސްތަކެވެ.
“ޒާޔާ. ޒިޔަލް އެ ނިދީނު. އަދިވެސް ފިރުމަނީތަ؟” ޒާޔާގެ ކައިރީގައި ރާއިދު އައިސް އޮށޯވެލިއެވެ.
“ވާހަކައެއް ބުނަންތަ؟” ބުރު ނޭނގޭ ވަރަށް އެނބުރެމުންދިޔަ ފަންކާއަށް ނަޒަރު ހުއްޓާލައިގެން އޮވެ ރާއިދު އަހާލިއެވެ.
“ހޫމް.” ޒާޔާގެ ޖަވާބު ކުރެވެ. އެއްވެސް ޝައުޤުވެރިކަމެއް ނެތް ކަހަލައެވެ.
“މިއައީ ބައްޕައަށް ގުޅާލާފައި. ހަފްތާއެއް ފަހުން އަހަރެމެން އެއްކޮށް މާލެއަަށް ބަދަލުވަނީ.” ރާއިދު ބުނެލީ ޒާޔާ އަޑުއަހަން ބޭނުންވާ ކަހަލަ ލަފްޒުތަކެއްނޫނެވެ. ނަމަވެސް ނުރުހުން ވެވޭކަށްވެސް ޒާޔާއަކަށް ނެތެވެ.
“އޯކޭ.” މިފަހަރުވެސް ޒާޔާ ދިނީ ކުރު ޖަވާބެކެވެ. ނަމަވެސް ޒާޔާގެ ހިތެއް މާލެ ބަދަލުވާކަށް ނޭދެއެވެ.
ޒާޔާގެ މަޑުމައިތިރިކަން ރާއިދުއަށް ސިފަވީ ޒާޔާ އަދިވެސް ކުރީ ދުވަހު ވީ ކަންތައްތަކާއި ހިތްހަމަނުޖެހިފައި ހުރި ކަމަށެވެ.
އިރުކޮޅަކު ޒާޔާއަށް ބަލަން އޮވެފައި ރާއިދު ޒާޔާގެ ހަށިގަނޑު ގާތަށް ދަމާލިއެވެ.
ނަމަވެސް ޒާޔާގެ މާބޮޑު ޝައުޤެއްނެތެވެ. ރާއިދު ދެރަވިއެވެ. ނަމަވެސް ރާއިދު އެހާ ފަސޭހައިން ދުލެއް ދޭކަށް ބޭނުމެއްނުވިއެވެ.
ރާއިދުގެ ބީހުންތަކުން ޒާޔާގެ ހިއްސުތައް ހޭލައްވަމުން ދިޔައެވެ. އިސާހިތަކު ރާއިދުގެ އަތު ތެރޭގައި ޒާޔާ ހައްޔަރުވެއްޖެއެވެ.

ހެނދުނުގެ ނާސްތާ ގަޑީގައި މާލެ ބަދަލުވާ ވާހަކަ ރާއިދު ޒާޔާގެ އާއިލާއާއި ހިއްސާކޮށްލިއެވެ. ފާއިޒާމެން ދެރަވި ނަމަވެސް އަބަދު ރާއިދުމެންނަށް ރަށުގައި ނޫޅެވޭނެކަން ޤަބޫލުވެސް ކުރެއެވެ.
“އަދި ޗުއްޓީއެއްގައި އަންނާނަންދޯ. އެސޮރު ނެތީމަ މިގެ ވަރަށް ފަޅުވާނެ.” ފާއިޒާ އެންމެ ދެރަވަނީ ޒިޔަލް ނުފެންނާނެތީއެވެ.
ޒާޔާ އެއްވެސް އެއްޗެއް ނުބުނެއެވެ. އަދިވެސް ޒާޔާ އެވިސްނަނީ ޝާރިފްއާއި ދޭތެރޭގައެވެ. ޝާރިފްއާއި ރުޅި ހަދާފައި ހުންނާކަށް ޒާޔާއަކަށް ފަސޭހައެއް ނޫނެވެ. އެއްވެސް ހިތްހަމަޖެހުމެއްވެސް ޒާޔާއަށް ނުލިބޭ ކަހަލައެވެ.

 

ހަވީރު ރާއިދު މަހަށް ފުރުމުން ޒާޔާ ޝާރިފްގެ ފޯނަށް ގުޅަން ފެށިއެވެ. ނަމަވެސް ލިބުނީ ހަމަ އެއްޖަވާބެކެވެ. ނަމްބަރު ބިޒީ ކަމަށެވެ. އެތައް ފަހަރަކު ގުޅި އިރުވެސް ޝާރިފްގެ ފަރާތުން އެއްވެސް ކޯލެއް ޒާޔާއަކަށް ނުލިބުނެވެ.
އެންމެފަހުން ޒާޔާ ވަރުބަލިވެގެން ހުއްޓާލީއެވެ.

އެކަމަކު މަގެއްގެ މަތިންވެސް ޝާރިފް ފެނިދާނެކަމަށް ޒާޔާ ދެން ނިކުތީ ބޭރަށެވެ. ޒިޔަލްގެ އަތުގައި ހިފައިގެން ހިނގާލުމުގެ ނަމުގައެވެ.
ގޭގެ ދޮރުމައްޗަށް ނިކުތް ތަނާ ޒާޔާ އަށް ޝާރިފް ފެނުނެވެ. ވަރަށް ބާރަށް ސައިކަލްގައި އަންނަނިކޮށެވެ. ޒާޔާއަށް ކަޅިވެސް ޖަހާނުލާ ހުރެވުނީ ބަލާށެވެ. ޝާރިފް އަޅާވެސް ނުލިއެވެ. ޒާޔާގެ ހިތަށް ތަދު ކޮށްލުމަށްފަހު ޝާރިފް ޖެހިގެން އޮތް ގޯޅި އަޅައި ޒާޔާއަށް ގެއްލުނެވެ.
ހަޤީޤަތުގައިވެސް ވަރަށް ބޮޑަށް ޒާޔާގެ ހިތުގައި ޖެހިއްޖެއެވެ.
“މަންމާ. ދޭބަލަ ޒިޔަލް ގޮވައިގެން ހިނގާލަން.” އެވަގުތު ދޮރާށި ހުޅުވާލާފައި ނިކުތް ފާއިޒާ ފެނިފައި ޒާޔާ ބުނެލިއެވެ. ޒާޔާގެ ވާހަކަ ރަނގަޅަށް ނުނިމެނިސް ކުޑަކުޑަ ޒިޔަލް ދުވެފައި ގޮސް ފާއިޒާގެ އަތުގައި ހިފިއެވެ.
ޒާޔާ އެނބުރި ގޮސް ގޭތެރެއަށްވަނެވެ. ޝާރިފްގެ ކުރިމައްޗަށް އަރާކަށް އިތުރަކަށް ޒާޔާގެ ހިތްވަރެއްނެތެވެ.
ކޮޓަރީގެ ދޮރު ހުޅުވާލާފައި ވަން ގޮތަށް ޒާޔާ އެނދުމައްޗަށް ވެއްޓިގަތެވެ. ޝާރިފްގެ ރަޙްމުކުޑަ އަމަލުތަކުން ޒާޔާގެ ހިތަށް ލިބެމުންދަނީ ބަޔާން ނުކުރެވޭހާ ހިތްދަތި ވޭންތަކެކެވެ. ނަމަވެސް ޝާރިފްއަށް ވަރިހަމަތާއެވެ.
ޒާޔާ ސިހުނީ ފޯނުގެ ރިންގްގެ އަޑަށެވެ. ބާލީސް ދަށުގައި އޮތް ފޯނު ނަގާ ބަލާލި ވަގުތު ޒާޔާއަށް ފުންމައިގެން ތެދުވެވުނެވެ.
“ޝާރިފް.” ޒާޔާއަށް އުފަލުން ރޮވުނު ކަހަލައެވެ.
“ވާހަކައެއް އޮޅުންފިލުވަދޭން މިގުޅީ.” ޝާރިފްގެ އަޑުގައިވާ ސީރިއަސްކަމުން ޒާޔާގެ ހިތް ތެޅިލިއެވެ. މޫނުމަތީގައިވާ އުފާވެރިކަން ވަގުތުން ގެއްލުނެވެ. އަނެއްކާ ޝާރިފް އެއުޅެނީ ކޮން ވާހަކައެއް ދައްކަންބާއޭ ޒާޔާއަށް ހިތާ ހިތާ ސުވާލުކޮށްލެވުނެވެ.

 

ނުނިމޭ

“ބުނެ-ބާ؟” ޒާޔާގެ އަޑު ދިޔައީ ކެނޑި ކެނޑިގެންނެވެ. ޝާރިފްގެ އަޑުގައިވަނީ މީގެ ކުރިން ދުވަހަކުވެސް ނުވާހާ ސީރިއަސްކަމެވެ. އެކަން ޒާޔާއަށް ވަރަށް ރަނގަޅަށް ވިސްނިއްޖެއެވެ. އޮޅުންފިލުވަން ބޭނުންވެސްވެއެވެ. ނަމަވެސް ހިތް އެހާ ބިރުވެސް ގަނެއެވެ.
“މިރޭ އަހަރެން ދާނަން. ނުނިދާތި.” ޝާރިފް ފޯނު ކަނޑާލިއެވެ. ޒާޔާގެ ޖަވާބަކަށް އިންތިޒާރު ކުރުމެއްވެސް ނެތިއެވެ. ޒާޔާ ގާތަަށް އައީ އަމަށަކު ރުޅިއެއްނޫނެވެ. ވަގުތުން ޒާޔާ ޝާރިފްގެ ނަމްބަރަށް ގުޅާލިއެވެ. ދެތިން ފަހަރަކު ގުޅުމުންވެސް ލިބުނު ބިޒީ ޓޯން އިން ޒާޔާގެ ނަމްބަރު އިނީ އަދިވެސް ބްލޮކް ކޮށްފައިކަން ޒާޔާއަށް އެނގުނެވެ.
ހިތާ ހިތާ ޝާރިފްއަށް ކުދި ކިޔަމުން ޒާޔާ އެނދުގައި އޮށޯވެލިއެވެ. އަދިވެސް ހުއްޓުމެއްނެތި ތެޅެމުންދާ ހިތަކަށް ހަމަޖެހުމެއް ނުލިބެއެވެ. ޝާރިފް ދައްކަން އުޅެނީ ކޮންވާހަކައެއް ކަން ނޭނގި ޒާޔާ ހަމަ ހާސްވަނީއެވެ.

ފާރުގައި ހަރުކޮށްފައިވާ ގަޑިއަށް ނަޒަރު ހުއްޓާލައިގެން ޒާޔާ ހުންނަންތާ ގަޑިއެއްހާ އިރު ވެއްޖެއެވެ. ޝާރިފްގެ ފޯނަކަށް ޒާޔާއަކަށް ނުގުޅެއެވެ. އެހެންވެ ޝާރިފް ގުޅަންދެން މަޑުކުރުން ނޫން ގޮތެއް ޒާޔާއަކަށްނެތެވެ.
މިހާރު އެކެއް ޖަހަނީއެވެ. ޝާރިފް ދެން ނާންނާނެހެން ހީވާތީ ޒާޔާ އެނދުގައި އޮށޯވެލިއެވެ. ނިދޭތޯއެވެ. ނަމަވެސް މިރޭ ނިދި ވަނީ ޒާޔާގެ ލޮލާއި މުޅިން ރުޅިވެފައި ކަހަލައެވެ. ވާނީވެސް އެހެން ނޫން ހެއްޔެވެ؟ ޝާރިފް ދައްކަން އެ އުޅޭ ވާހަކަ ނޭނގެންދެން ޒާޔާގެ ހިތަކަށް ފިނިކަމެއް ނުލިބޭނެއެވެ. ތަފާތު ޚިޔާލުތަކުން ސިކުނޑި ފުރާލައިގެން އޮތް ޒާޔާ ސިހުނީ ފޯނުގެ ރިންގްގެ އަޑަށެވެ. ޒާޔާ އަވަސް އަވަހަށް ފޯނު ނަގާ ކަންފަތުގައި ޖައްސާލަމުން ގޮސް ދޮރު މަޑުމަޑުން ހުޅުވާލިއެވެ.
އެވަގުތު ރިލޭޝަންގެ މީރު ވަސް މުޅިތަނަށް ފަތުރާލަމުން ކޮޓަރިތެރެއަށް އައިސް އެވަނީ ޝާރިފްއެވެ.
އެތައް ދުވަހަކަށްފަހު ރަނގަޅަށް ޝާރިފް ފެނުމާއެކު ޒާޔާގެ ހިތް އެދުނީ ހިތް ފުރެންދެން ޝާރިފްއަށް ބަލަން ހުންނާށެވެ. ނަމަވެސް ޒާޔާގެ ސިކުނޑި އެކަމާއި މުޅިންދެކޮޅު ހެދިއެވެ.
ޝާރިފް ޒާޔާއާއި ދިމާއަށް ބަލާވެސް ނުލާ ސައިޑް ޓޭބަލްމަތީގައި ފޯނާއި ސިނގެރޭޓް ފޮށި ބާއްވާލިއެވެ. އަދި ވަރަށް މަޑުމަޑުން އެނދުގެ އެއްފަރާތުގައި އިށީނދެލިއެވެ. ޝާރިފްގެ އެއްވެސް ސަމާލުކަމެއް ނުލިބުމުން ޒާޔާ މަޑުމަޑުން ހިނގާފައި ގޮސް ޝާރިފްއާއި ޖެހިގެން އިށީންނަމުން އިސްޖަހާލިއެވެ.
“ޒާޔާ ލޯތްބެއް ނުވޭ ދޯ އަސްލު އަހަރެންދެކެއެއް؟” ޝާރިފްގެ ސުވާލުން ޒާޔާ ސިހުނެވެ. އަދި އެ ސުވާލު ޝާރިފް ޒާޔާއާއި ކުރުންވީ ޒާޔާއަށް ހައިރާން ކުރުވަނިވި ކަމަކަށެވެ. މިފަދަ ދަން ގަޑިއެއްގައި ޝާރިފް އެތަނުގައި އެ އިނދެވެނީވެސް ޒާޔާ ޝާރިފްދެކެ ވާ ލޯބިންކަން ޝާރިފްއަށް ނުވިސްނުނުކަމެވެ.
“ދައްކަން އުޅުނު ވާހަކަ ދައްކަބަލަ؟” ޝާރިފްގެ ވާހަކަ ހުރިގޮތުން ޒާޔާއަށްވެސް ވާހަކަދެއްކުނީ ވަރަށް ހަރުކަށިކޮށެވެ. ޒާޔާގެ ސުވާލާއެކު ޝާރިފް ޒާޔާގެ މޫނަށް ނަޒަރު ހުއްޓާލިއެވެ. އޭރުވެސް ޒާޔާއިނީ އިސްޖަހާލައިގެންނެވެ.
“ވަރަށް ލޯބިވޭ ބުނެފިއްޔާ ޤަބޫލުކުރާނަަންތަ؟” ޝާރިފް ޒާޔާ ދަތްދޮޅީގައި ހިފައި ހިއްލާލިއެވެ. ކުއްލިއަކަށް ހިތަށް ލިބުނު އުފަލުގައި ޒާޔާ ޝާރިފްގެ މޭތެރޭގައި ބޮޑިވެލަމުން ދެލޯ މަރާލިއެވެ.
“ތިއެއްނޫނެއްނު ބުނަން އުޅުނު ވާހަކައެއް. ދެން ބުނެބަލަ އަސްލު ކޮން ވާހަކައެއްކަން.” ޝާރިފްގެ އަތު ތެރޭގައި ބޮޑިވެގެން އޮވެ ޒާޔާ ޝާރިފްގެ މޫނަށް ބަލާާލިއެވެ.
“ޒާޔާ ނުދައްޗޭ މަށަށް ނުފެންނަ ހިސާބަށް. ވަޢުދުވޭ ނުދާނަން ކަމަަށް.” ޝާރިފް ޒާޔާގެ އަތުގައި ހިފާލީ ވަރަށް މަޑުމަޑުންނެވެ. އަދި ޝާރިފްގެ ރާގުގައިވަނީ އާދޭހެވެ. ޝާރިފްގެ އެސުވާލަށް ޖަވާބުދިނުންވީ ޒާޔާއަށް ވަރަށް އުނދަގޫކަމަކަށެވެ. އެތައް އިރެއްވީއިރުވެސް ޒާޔާއަށް ޖަވާބު ނުދެވުނީ އެހެންވެއެވެ. ރާއިދު ޒާޔާ ގެންދާނެކަން ޒާޔާއަށް ވަރަށް ރަނގަޅަށް އެނގެއެވެ.
“ޕްރޮމިސް؟” ޝާރިފް ޒާޔާގެ ކުރިމަތީގައި އަތް ހުޅުވާލިއެވެ. ޒާޔާއަކަށް ޝާރިފްގެ އެދުމާއި ދެކޮޅު ހަދާކަށް ނުކެރުނެވެ. ހުޅުވާލެވިފައިވާ ޝާރިފްގެ އަތްތިލަ މަތީގައި އަތް ބާއްވާލަމުން ޒާޔާ ވަޢުދުވިއިރުވެސް ޒާޔާގެ މޫނުމަތިން އެއްވެސް އުފާވެރިކަމެއް ފެންނާކަށްނެތެވެ. ނިދާބޮކީގެ ފަނޑު އަލީގެ ސަބަބުން ޒާޔާގެ މޮޅިވެރިކަން ޝާރިފްއަކަަށްވެސް މާބޮޑަކަށް ފާހަގަވިހެނެއް ހިއެއްނުވެއެވެ.
އާދައިގެ މަތިން އެ ހަމަ ހިމޭން ދަންވަރުވެސް ވެގެންދިޔައީ ޒާޔާއާއި ޝާރިފްގެ ހަޔާތުގައި ލިޔެވުނު ޚާއްސަ ރެޔެއްގެ ގޮތުގައެވެ. ހިތްގައިމު ފޮނި ހަނދާންތަކެއް އެރޭގެ ކޮންމެ ފަޅި ސިކުންތެއްގައި އެކުލެވުނެވެ.
ޒާޔާގެ ކަރުގައި މޫނު ޖައްސާލައިގެން ޝާރިފް އޮތީ މާނޭވާ ލެވިލެވިއެވެ.
“ވަރުބަލިވީތަ؟” ޒާޔާ ޝާރިފްގެ ކަންފަތް ދޮށުގައި ސިއްރު ސިއްރުން އަހާލިއެވެ.
ޝާރިފް މޫނު ހިއްލާލަމުން ޒާޔާގެ ތުންފަތުގައި އޭނާގެ ހޫނު ތުންފަތް ޖައްސާލިއެވެ.
އެޔާއެކު ޒާޔާ ދެލޯ މަރާލިއެވެ.
“ލަސްވެއްޖެ ދޯ؟ އޯކޭތަ ދިޔަޔަސް؟” ޝާރިފް ޒާޔާގެ ހުއްދައަކަަށް އެ އެދުނީ އަލަށެވެ. އެހެންނޫނީ ލަސްވެގެން އަވަސް އަވަހަށް ގުޅާނަމޭ ބުނެފަ ޝާރިފް ދަނީއެވެ.
“މަޑުކުރާށޭ ބުންޏަސް ނުހުރެވޭނެއެއްނު.” ޒާޔާ ހިނިތުންވެލަމުން ޝާރިފްގެ ފަން އިސްތަށިކޮޅާއި ކުޅެން ފެށިއެވެ.
“މީހަކަށް ފެނުމުގެ ކުރިން ދާން ޖެހޭނު.” ޝާރިފް ޒާޔާގެ ގައިމަތިން ތެދުވެ ޓީޝާޓް ބޮލުން ވައްޓާލިއެވެ. ޒާޔާއަށް އޮވެވުނީ ބަލާށެވެ. ޝާރިފް އަބަދުވެސް ޒާޔާގެ ކައިރީގައި ހުންނާނެނަމައޭ ޒާޔާގެ ހިތަށް އަރަމުންދިޔައެވެ. ދެރަވުމާއެކު ޒާޔާގެ ލޮލުން ކަރުނަ ހިލުނެވެ. ނަމަވެސް ޒާޔާ ޝާރިފް ނުހިފަހައްޓައެވެ. ކިތަންމެ ބޭނުންވިޔަސް ޝާރިފްއަށް ޒާޔާގެ ކައިރީގައި އަބަދު ނުހުރެވޭނެކަން ޒާާޔާއަށް އެނގެއެވެ. ނަމަވެސް ޒާޔާ ދެރަވަނީ ޝާރިފްގެ އަމަލުތަައް ހުންނަ ގޮތުންނެވެ. ދާން ޖެހޭތީ ދެރަވެގެންވެސް ޝާރިފް ނޫޅޭތީއެވެ. ހަނދާންވެސް ވަނީ ބައެއް ފަހަރުއެވެ. އަދި ބައެއްފަހަރު އެހާ އަޅާވެސްނުލާތީއެވެ. ޒާޔާގެ ނިއްކުރީގައި ބޮސް ދިނުމަށްފަހު ޝާރިފް ދިޔައީއެވެ.

އިރު ފެނުން މައްޗަށް ބޯ ހިއްލާލިއިރުވެސް ޒާޔާ އޮތީ ނުނިދިފައެވެ. ޝާރިފްގެ ޚިޔާލުތައް ޒާޔާގެ އަރާމު ނިދިކޮޅުވެސް ނަގާލީއެވެ.
ކުއްލިއަކަށް މީހަކު ދޮރުގައި ޓަކި ޖަހާލުމާއެކު ޒާޔާ ދިޔައީ ސިއްސައިގެންނެެވެ. އަވަސް އަވަހަށް ބާލީސް ދަށުގައި އޮތް ފޯނު ނަގައި ޒާާޔާ ގަޑި ބަލާލިއިރު ހެނދުނު ހަތެއް ޖަހަނީއެވެ. ދެތިން ފަހަރަކު ޝާރިފް ގުޅާފައިވެސް އޮތެވެ. އަވަސް އަވަހަށް ޝާރިފްގެ ކޯލް ލޮގް ޑިލީޓް ކޮށްލުމާއެކު ބާރު ހިނގުމެއްގައި ގޮސް ޒާޔާ ދޮރުހުޅުވާލިއެވެ.
“ނުނިދާތަ ތިއުޅެނީ އަދިވެސް؟” ދޮރުމަތީގައި ހުރި ރާއިދު ފެނިފައި ހާސްކަން ޒާާޔާ ވަށާލިއެވެ. ޝާރިފްއާއި އެހާ ގައިގޯޅިކޮށް އުޅުމަށްފަހު ޒާޔާ ހުރީ ފެންވެސް ނުވަރައެވެ.
“ނޫން. ނިދިފައި ހޭލެވުނީ.” ޒާޔާ އެއްފަރާާތަަށް ޖެހިލަމުން ކޮޓަރިއަށް ވަންނަން ރާއިދުއަށް ތަން ދެއްކިއެވެ.
މޭޒުމަތީގައި ދަބަސް ބެހެއްޓުމަށްފަހު ރާއިދު ގޮސް ވަނީ ފާހާނާއަށެވެ. ޒާޔާ އެނދުގައި އޮށޯވެލިއެވެ. އަދިވެސް ޒާޔާގެ ހިތަކަށް ހަމަޖެހުމެއް ނުލިބެއެވެ.
“ޒާޔާ. އާދެބަލަ މިތަނަށް.” ރާއިދު ފާހާނާއިން ނިކުމެ އެނދުގައި އޮށޯތް އިރުވެސް ޒާޔާއަށް ރޭކާާނުލައެވެ.
“ހިނގާ ނިދަން ދޯ.” ޒާޔާގެ ޖަވާބުން ރާއިދު ހައިރާންވި ކަހަލައެވެ. ޒާޔާގެ މޫނަށް ސުވާލުގެ ނަޒަރަކުން ރާއިދުއަށް ބަލަހައްޓައިގެން ހުރެވުނީއެވެ.
ޒާޔާގެ ހިތަށް ތަދުވިއެވެ. ރާއިދު ދެރަވިކަން އެނގުމާއެކު ޒާޔާ ރާއިދުއާއި ގާތަށް ޖެހިލިއެވެ.
އެޔާއެކު ރާއިދުގެ ދެއަތް ޒާޔާގެ ހަށިގަނޑު ވަށާލައިފިއެވެ. ޒާޔާ ދެލޯ މަރާލީ ހިތްހަމަ ޖެހިގެން އޮވެއެވެ. ރާއިދުގެ ބީހުންތަކުން ޒާޔާގެ ހިތުގެ އުދާސްތަކަށް ލުއި ކަމެއް ގެނެސްދިން ކަހަލައެވެ.

“ދަރިފުޅުމެން ދިޔައީމަ މަންމަ ހާދަ އެކަނިވާނޭ.” ފާއިޒާއާއި ރާއިދު ވާހަކަ ދައްކަން ތިބީ ގޯތިތެރޭގައި ބަހައްޓާފައި ހުރި ޖޯލީގައެވެ.
“ދާހިތެއް ނުވެޔޭ މަންމާ. އެކަމަކުވެސް ދާން ޖެހޭނެއެއްނު. ޒިޔަލްގެ ކުރިމަގަށް ވިސްނާފަވެސް.” ރާއިދުވެސް ރަށުން ދާން ޖެހޭތީ ދެރަވާކަން ހާމަކޮށްލިއެވެ.
“ބުނެފިންތަ ޒާޔާ ކައިރީގައި ހަވީރު ފުރާ ވާހަކަ.” ފާއިޒާގެ ސުވާލަށް ރާއިދު ބޯޖަހާލީ އާއެކޭ ބުނުމުގެ ގޮތުންނެވެ.

ބަންދުކޮށްފައިވާ ފޮށިތަކަށް ބަލަހައްޓައިގެން ޒާޔާ މޮޅިން އިންނަތާ އެތައް އިރެކެވެ. ޝާރިފް ރުޅި އަންނާނެކަން ޒާޔާއަށް އިނގޭތީ ޒާޔާ ކަންބޮޑުވެއެވެ. ޒާޔާ ރަށުން ދާން ޖެހޭނީ ޝާރިފްއާއި ގުޅުން ކަނޑާލާފައި ކަމަށް ތަކުރާރުކޮށް ޝާރިފް ބުނެފައިވާތީއެވެ. ކުރާނެކަމެއް ނެތެވެ. ޒާޔާގެ މަޖުބޫރީ ހާލަތު ޝާރިފްއަށް ވިސްނައިދޭނެ ގޮތެއް ޒާޔާއަކަށް ނުވިސްނެއެވެ. ކޮންމެ ވަގުތީ ގުޅުމަކަށް ނިމުމެއް އަންނާނެއެވެ. އެ ގުޅުމަށް ދޭނެ ނަމެއް ދެއަހަރު ވީއިރުވެސް ނެތް އިރު އެގުޅުން ދެމި ނޯންނާނެ ނޫން ހެއްޔެވެ؟ ޒާޔާގެ ދިރިއުޅުމަކީ ރާއިދުއާއި ޒިޔަލްއެވެ. ހަޤީޤަތަކީއެއީއެވެ. ވީއިރު ޝާރިފްއަކީ ޒާޔާގެ ކާކު ހެއްޔެވެ؟ ސުވާލު ކުރެވުނީ ޒާޔާގެ އަމިއްލަ ހިތާއެވެ. ޝާރިފްދެކެ ޒާޔާ ލޯބިވާކަން ޔަޤީނެވެ. ނަމަވެސް އެކުގައި ދިރިއުޅެވެން ތަޤުދީރުގައި ލިޔެވިފައި ނެތީއެވެ.

ހަވީރުގެ ހިތްގައިމު ފިނި ރޯޅިތަކުން މާހައުލަށް އިތުރު ތާޒާ ކަމެއް ގެނެސްދީފައި ވާއިރު ޒާޔާ ރާއިދުގެ އަތުގައި ހިފާލައިގެން ޖެޓީ އާއި ދިމާއަށް ހިނގަމުންދެއެވެ. އާއިލާގެ ބައެއް މެމްބަރުން ޒާޔާމެން ފުރުވުމަށްޓަކައި ގޮސް ތިއްބެވެ. ފާއިޒާ ޒިޔަލް އާއި ހުއްޓާނުލައި ލޯބިކުރަމުން ދިޔައެވެ.
އޭރުވެސް ޒާޔާގެ ދެލޯ ހޯދަނީ ޝާރިފްއެވެ. ނަމަވެސް ޝާރިފްއެއް ނުފެނުނެވެ. އެންމެންނާއި ސަލާމް ކުރުމަށްފަހު ޒާޔާމެން ލޯއްޗަށް އެރިއެެވެ.
ސީޓުގައި ބުރަކަށި ޖައްސާލިތަނާ ސައިކަލްގައި ބާރުބާރަށް ދުއްވަމުން ދިޔަ ޝާރިފް ޒާޔާގެ ލޮލުގައި އަޅައިގަތެވެ. ޒާޔާ ކަޅިވެސް ޖަހާނުލާ ބަލަމުން ދިޔައެވެ. މަދު ސިކުންތުކޮޅަކަށް ނަމަވެސް އެންމެ ފަހު ވަގުތު ޝާރިފް ފެނުމުން ޒާޔާގެ ހިތަށް ލިބިގެން ދިޔައީ ބުނެދޭންވެސް ނޭނގޭ ހަމަޖެހުމެކެވެ. އެކަމަކު ޝާރިފްގެ އަމަލުތައް ހުރި ގޮތުން އޭނާ އެދިޔައީ ވަރަށް ރުޅިއައިސްފައިކަން ޒާޔާ ދެނެގަތެވެ. ކުރާާނެ ކަމެއްނެތެވެ. ޒާޔާއަށް މަޖުބޫރެވެ.

އެއާޕޯޓަށް ޗެކިން ވުމަށްފަހު ޒާޔާ ގޮސް ވަނީ ފާޚާނާއަށެވެ. ދޮރު ތަޅުލުމަށްފަހު އަތް ދަބަސް ތެރޭގައި އޮތް ފޯނު ޒާޔާ ނެގީ ޝާރިފް ގުޅާނެކަން އެނގޭތީއެވެ. ވީވެސް އެހެންނެވެ. އޭރުވެސް ޝާރިފް ގުޅަނީއެވެ. އެތަކެއް ކޯލްތަކެއްވެސް ޝާރިފްގެ މިސްވެފައި ހުއްޓެވެ.
“އަހަރެން ކައިރީގައި ވީ ވައުދުތައް ކޮބާ؟ ޒާޔާ ނުޖެހޭނެ ދާކަށް. ގޮސްގެން ނުވާނެ.” ފޯނު ނަގާ ކަންފަތުގައި ޖައްސާލުމާއެކު ފުރަތަމަވެސް ޒާޔާއަށް ކުރިމަތިލާާން ޖެހުނީ ޝާރިފްގެ ރުޅިއާއެވެ.
“ޝާރިފް-” ޒާޔާ ބުނަން އުޅުނު ޖުމްލަ ފުރިހަމައެއް ނުކުރެވުނެވެ.
“ދާނަންތަ؟ ނުދާނަންތަ؟” ޝާރިފް ޒާޔާ ވާހަކަ ދައްކާނެ ފުރުސަތެއް ދޭކަށް ބޭނުމެއް ނުވިއެވެ.
“މިހާ ހިސާބަށް އައިއްސަ ދާން ޖެހޭނެ ދޯ.” ޒާޔާ ވާހަކަދައްކަމުން ދިޔައީ ވަރަށް މަޑުމަޑުންނެވެ.
“ފުރަތަމަ ތިހާ ހިސާާބަށް ދާކަށްވެސް ނުޖެހޭދޯ. މިހާރު އެނގިއްޖެ ތީކަން ޒާޔާ ބޭނުންވާ ގޮތަކީ. މަށާ ދުރަށް ދިޔުން. އެކަމަކު ހަނދާން ކުރާތި. ޒާޔާ ދިޔުމަށްފަހު ގުޅުން ނިމުނީ. އެގޮތް ބޭނުންވާތީ ޒާޔާ ދާނީވެސް.” ޝާރިފް ފޯނު ކަނޑާލިއެވެ. އެވަގުތު ޒާޔާގެ ދެލޯ ފުރިގެން ބަންޑުންވެއްޖެއެވެ. ޝާރިފް ޒާޔާއާާއި ދޭތެރޭގައި ނުވިސްނަނީ ކީއްވެ ހެއްޔެވެ؟ ޒާޔާއަކީ މީހެއްގެ އަތްބެއްކަން ޝާރިފްއަށް އެނގޭނެއެވެ. ކޮންމެ ތަނެއްގައި ހުއްޓަސް ޒާޔާ އަބަދުވެސް ޝާރިފްގެ ހަނދާންކުރާނެއެވެ. ޝާރިފްއާއެކީ ހޭދަކުރި ދުވަސްތައް ދުވަހަކުވެސް ޒާޔާގެ ހިތަކުން ނުފިލާނެއެވެ. ޝާރިފްގެ ހަޔާތުން ޖާގައެއް ނުލިބުނަސް ޝާރިފްގެ ހިތުން ޖާގައެއް ލިބުމުން ޒާޔާއަށް ފުދެއެވެ. ޝާރިފްގެ ހިތްގައިމު ފޮނި ލަފްޒުތަކުން ޒާޔާގެ ހިތް މިލްކުކޮށް ފެށުނު އެގުޅުން ޝާރިފް ނިންމާލި ކަމުގައިވިޔަސް ޒާޔާ އަދިވެސް ދެކެނީ ޝާރިފްއަކީ ޒާޔާގެ މިލްކެއްގެ ގޮތުގައެވެ. އަބަދުވެސް އެ ލޯބި ދެމިއޮންނާނެއެވެ. މުޅި އުމުރަށެވެ.

ފާހާނާއިން ނިކުންނަމުން ޒާޔާ ފުން ނޭވާއެއް ބޭރުކޮށްލިއެވެ. ދެލޯ ފޮހެލުމަށްފަހު ޒާޔާ ކުރިއަށް ހިނގައިގަތެވެ. ފަސްއެނބުރި ބެލުމެއްނެތެވެ. އެހެނަސް ޝާރިފްގެ ލޯބި ހިތުގެ އެންމެ ފުނުގައި ފޮރުވާލަމުންނެވެ. ދެރަވި ނަމަވެސް ޒާޔާ ހިނިތުންވެލިއެވެ. ކޮންމެވެސް ދުވަހަކުން ޝާރިފްއާއި އަނެއްކާވެސް ބައްދަލުވާނެއެވެ. އެއީ ޒާޔާގެ ހިތް ވިސްނައިދިން ގޮތެވެ.

“ބެލްޓް އަޅުވަބަލަ ޒިޔަލްގެ.” ރާއިދުގެ އަޑުން ޒާޔާގެ ޚިޔާލީ ވާފަށް ކެނޑުނެވެ. ޖެހިގެން އިން ސީޓްގައި އިން ކުޑަކުޑަ ޒިޔަލްގެ ބެލްޓް އަޅުވާލަމުން ޒާޔާ ރާއިދުއަށް ހިނިތުންވެލިއެވެ. އެޔާއެކު ބާރުގަދަ އަޑުފައްގަނޑާއެކު ފްލައިޓް ނައްޓާލިއެވެ. ޒިޔަލްގެ އަތުގައި ހިފަހައްޓާލަމުން ޒާޔާ ދެލޯ މަރާލިއެވެ.
“ޝާރިފް. ވަރަށް ހަނދާންވާނެ.” ހިތަށް އެރި ލަފްޒުތައް ދުލުގެ ކުރިއާއި ހަމައަށް އައެވެ. ނަމަވެސް ހަމައެކަނި ޒާޔާއަށް އަޑުއިވޭ ވަރަށެވެ.

ނިމުނީ

ލިޔުންތެރިޔާގެ ފުރަމަލަ

އާމިނަތު ފަރުޒާނާ

ހުނަރުވެރި ވާހަކަލިޔުންތެރިއެކެވެ. ފީޗާ ލިޔުމަށްވެސް ވަރަށް ކުޅަދާނައެވެ.

މި ލިޔުންތެރިޔާގެ ބައެއް އެހެން ލިޔުންތައް

• 12 ސެޕްޓެމްބަރ 2024ވާހަކައެކު މަށާވީ ހަނދާނޭ – 02
• 7 ސެޕްޓެމްބަރ 2024ވާހަކައެކު މަށާވީ ހަނދާނޭ – 01
• 12 ޖެނުއަރީ 2021ވާހަކަމާފުކުރާށޭ ކަލާ
• 28 އޭޕްރިލް 2020ބިރުވެރިލޯބިވެވުނީ އެވެ.