ދުވެވުނު އެންމެ ބާރަކަށް މިޝަލް ދުވަމުން ދަނީއެވެ. އަމިއްލަ ނަފުސު ސަލާމަތް ކުރުމަށެވެ. ކުޑަކޮށްވެސް މަޑުކޮށްލުމެއް ނެތެވެ. ފަސް އެނބުރި ބަލަމުންނެވެ. އަޅަމުންދިޔަ ފިޔަވަޅުތަކަށް މަޑުޖެހުމެއް ނެތެވެ. ހިކި ފަންތަކާއި ގަސްތަކުގެ ހިކި ފަތްތައް ފައިދަށުވެ މުގުރެމުންދާ އަޑު އިވެމުންދެއެވެ. މިޝަލްގެ ކުރުވެފައިވާ ނޭވާގެ އިހްސާސް، އެ ފުރަމެންދަމުގައި ރަށުގެ ވަލުތެރެއަށް ވެސް ކުރެވެމުންދާ ކަހަލަ އެވެ. ހަލުވިކޮށް އަޅަމުންދާ ފިޔަވަޅުތަކާއި އޭނާގެ މޫނަށް ވެރިވެފައިވާ ބިރުވެތިކަމުގެ އިހްސާސް ތަކުންނެވެ.

” މިޝަލް ދުވާނެ ވަރަކަށް ދުވޭ! މޮޅިއްޔާ މަގޭ އަތްދަށުން ސަލާމަތްވެގެން ރައްކާވެވޭތޯ ނިކަން ބަލާބަލަ!” މިޝަލް ގެ ފަހަތުން ދުވަމުން އަންނަ މީހާ އަނެއްކާވެސް ހަޅޭއްލަވައިގަތެވެ.

އެމީހާ މިޝަލްގެ ފަހަތުން ދުވަމުން ދަނީއެވެ. އެމީހާގެ އަތު ނުޖެހި ސަލާމަތް ވެވޭތޯ މިޝަލް މަސައްކަތް ކުރަނީ އެވެ. ލޮލުން ފައިބަމުންދާ ކަރުނަތައް ކޮތާފަތް މައްޗަށް ފައިބަމުންދެއެވެ. ރާއްޖެ އާދެވުނު މޮޔަ ހިތަށް އަރާފައެވެ. މީގެ ހަފުތާއެއް ކުރިން އޭނާގެ އަމިއްލަ ދިރިއުޅުމައިގެން ނުލާހިކު ހަމަޖެހިގެން އުފަލުގައި ދިރިއުޅުނެވެ. މިޝަލް ހިތްއެދޭ ގޮތަށް އުޅެވުނެވެ. އެހެނަސް މިއަދު އޭނާ ދުވަމުން އެދަނީ އަމިއްލަ ދިރިއުޅުން ސަލާމަތް ކުރުމަށެވެ. އަމިއްލަ ފުރާނަ ސަލާމަތްކުރުމަށެވެ. ރާއްޖެ އަށް އެނބުރި އައުމުން މިފަދަ ހާލެއް ޖެހިދާނެކަމަށް މިޝަލް ގެ ޚިޔާލަށްވެސް ގެނެވިފައެއް ނުވެއެވެ. ޚުދު މިޝަލް ގެ ބައްޕަ މިވަރުގެ ބޮޑު އޮޅުވައިލުމެއް އުފަންދަރިއަކަށް އޮޅުވާލާފާނޭ ހީވެސް ނުވެއެވެ.

“މިޝަލްލްލްލްލް.” އެމީހާ ވަށައިގެން ހޯދާ ބަލަމުން ހަޅޭއްލަވައިގަތެވެ. އޭރު މިޝަލް ހުރީ ގަހެއްގެ ނިވަލުގައި ފިލައެވެ.

ނޭވާ ހިފަހައްޓާލިއެވެ. ތުރުތުރުލަމުންދާ ހަށިގަނޑު ކޮންޓްރޯލް ކުރެވޭތޯ މިޝަލް މަސައްކަތްކުރަން ފެށިއެވެ. ދެލޯ މަރައި ތަގުޅިކޮށްލި އެވެ. އެވަގުތު އޭނާގެ މުޅި ދިރިއުޅުން ފިލްމެއްގެ ސިފައިގައި ސިފަވާން ފެށިއެވެ.

މިޝަލް ދިރިއުޅެމުން ދިޔައީ އަވަށްޓެރި ސްރީލަންކާ ގައެވެ. އޭނާގެ ބައްޕައާއެކު އެވެ. އާއިލާގައި ހުރި ހަމައެކަނި މީހަކީވެސް އެ ބައްޕަ އެވެ. މިޝަލް އަކީ ސަކަ މިޒާޖުން ފުރިފައިވާ ލޯބިލޯބި ކުއްޖެކެވެ. މިޝަލް އަށް އޭނާގެ ތިމާގެ އެއްވެސް މީހަކާއި ބައްދަލުވެވިފައެއް ނެތެވެ. ތިމާގެ މީހުން ތިބިކަމެއްވެސް ކުރިއަކުން އެނގިފައެއް ނެތެވެ. އެކަމަކު ވަރަށް ކުއްލިގޮތަކަށް އެއްދުވަހަކު އޭނާގެ ބައްޕަ ގެއަށް އައިސް ބުނީ އާއިލާ އާއި ބައްދަލުކޮށްލަން ރާއްޖެ އަށް ދާ ވާހަކައެވެ. މިޝަލް ގެ ރައްޓެހިންނެކޭ އެއްފަދައިން އޭނާގެވެސް ތިމާގެ މީހުން ތިބިކަން އެނގުމުން ބުނަންވެސް ނޭނގޭފަދަ އުފާވެރިކަމެއް އިހްސާސް ކުރެވުނެވެ.

އެކަމަކު މިޝަލް އަށް ނޭނގި ފަރުދާގެ ފުރަގަހުން ތަދުބީރު ކުރެވެމުންދިޔަ ކަންތައްތަކުގެ ކުޑަވެސް ހިލަމެއް ނުވާކަހަލަ އެވެ. އޭނާގެ ބައްޕަ ރާވަމުން ދިޔައީ ކޮންކަހަލަ ޕްލޭނެއްކަމެއް ހިތަށްވެސް ނާރައެވެ. އެހެނަސް!….. އެހެނަސް މިޝަލް ރާއްޖެ ގެނެވުނީ ދެބެގެންގެ ދެދަރި ކުއްޖަކާ ކައިވެނި ކުރުވުމަށެވެ. އަމިއްލަ ބައްޕަގެ އެ ޕްލޭން އޭރު މިޝަލް އަކަށް ނޭނގެއެވެ. އެފަދަ ކަމެއް ޚުދު އޭނާގެ ބައްޕަ ކޮށްފާނެކަމަށް ދުވަހަކުވެސް ހިތަށްވެސް ނާރައެވެ. އެކަމަކު މިޝަލް ގެ މުޅި ހަޔާތް ބަރުބާދުވިޔަ ދޭކަށް މިޝަލް ފުރުޞަތެއް ނުދޭނެ އެވެ. ކައިވެނީގެ އެއްދުވަސް ކުރިން މިޝަލް ފިލައިގެން ނިކުތީ އަމިއްލަ ނަފުސު ސަލާމަތް ކުރުމަށެވެ. އަމިއްލަ ހަޔާތަށް ކުރިމަތިވާން އުޅުނު ބޮޑު މުސީބާތުން ސަލާމަތް ވުމަށެވެ.

ރާއްޖޭގެ އާބާދީ މަދު ރަށެއްގައި މިޝަލް ގެ ދިރިއުޅުން ވޭތިކޮށްލާނެ ގޮތެއް އެއީ މިޝަލް ގެ ޚިޔާލަށް ގެންނަންވެސް ފަސޭހަ ކަމެއް ނޫނެވެ. އެ ރަށުގައި މިޝަލް ދަންނަ އެއްވެސް މީހަކު ނޫޅެއެވެ. މިޝަލް ކުރާނެ ކަމެއްވެސް، މަޖާކޮށްލަން ދާނެ ދިމާއެއްވެސް އެ ރަށަކު ނެތެވެ. މި ހުރިހައި ކަމަކަށްވުރެން ބޮޑު އެހެން ކަމެއްވެސް އެބައޮތެވެ. ހަރުކަށި ދީނީ ފިކުރު އެރަށުގައި ވަކިހިއްޕާލާފައި ވަނީ އިންތިހާއަށެވެ. ރާއްޖޭގެ ހުރިހައި ރަށްރަށުގެ ތެރެއިން އެކަމުގައި އެންމެ ކުރީގައި އުޅޭނީ އެރަށް ކަމާއިމެދު ގިނަބަޔަކު އިއްތިފާގުވާނެއެވެ. ނާތަހުޒީބު ބައެއް ޘަޤާފަތްތައްވެސް އެހައިބޮޑަށް ހަރުލާފައި ވެއެވެ. އެ ހުރިހައި ކަމެއްގެ ތެރެއިން މިޝަލް އަށް އެންމެ ކަމުނުދާ ކަމަކީ ކަންކަން ނިންމުމުގައި ހަމަ އެއްވެސް ފުރުޞަތެއް އަންހެނުންނަށް ލިބިފައި ނެތުމެވެ. ފިރިހެނުންގެ ކުރިމަތީގައި އަންހެންވެރިން ތިބެން ޖެހެނީ އިސްޖަހައިގެންނެވެ. ހަމަ ގައިމުވެސް މިޝަލް ގެ ކައިވެނި ހަމަޖެއްސި ފިރިހެންކުއްޖާ ނިސްބަތްވާ ބޮޑު ޢާއިލާ ތެރޭގައި ކަންކަން ހުރީ މިފަދަ ނާތަހުޒީބު ގޮތަކަށެވެ.

“ކޮބާ ހީވެ!… އަތުވެއްޖެއްނު!” ތެޅިގަންނަމުން މިޝަލް ލޯހުޅުވައިލީ ދާދި ގާތުން އެމީހާގެ އަޑު އިވުމުންނެވެ. ބިރުވެރި ހުވަފެނެއްފަދަ ސިބްޢަތުﷲ އެހުރީ މިޝަލްގެ ކުރިމަތީގައެވެ. ކައިވަތެއްހައި ކައިރީގަ އެވެ.

“އަހަރެން ދޫކޮށްލާ!” މިޝަލްގެ އަތުގައި ސިބްޢަތުﷲ ހިފައި ދަމާފައި ގެންދަން ފެށުމުން މިޝަލް ހަޅޭއްލަވަން ފެށިއެވެ.

“ކީކޭ؟؟ ކަލޭ ހީކުރީތަ މަށަށް އަތުނުވާ ހިސާބަށް ކަލެއަށް ދުވެވިދާނޭ! ނޫން މިޝަލް ނޫން. ކަލޭ އުފަންވީވެސް އަހަންނަށްޓަކައި. ތީ ހަމައެކަނި އަހަރެންގެ ޙައްޤެއް.” މިޝަލް ގެ އަތުގައި ހިފާ ދަމަމުން ސިބްޢަތުﷲ ބުންޏެވެ.

އަޑުން އަޑުނަގައިފާ މިޝަލް ރޮނީއެވެ. ހަޅޭއްލަވަނީ އެވެ. އޭނާ ދޫކޮށްލާތޯ އާދޭސްކޮށް ސަލާންޖަހަނީ އެވެ. އެކަމަކުވެސް އެއްވެސް ރަހުމެއް، ހަމްދަރުދީއެއް ނެތި ބިންމަތީގައި މިޝަލް ދަމާކޫއްތަމުން ދިޔައެވެ. ގަސްގަގުގެ ގޮފިތަކާއި އޭތިމީތީގައި ޖެހި މިޝަލް ގެ ގައިން ލޭކޮށެމުން ދިޔަނަމަވެސް ސިބްޢަތުﷲގެ ހިތަށް އެއްވެސް އެއްޗެއް ނާރާ ކަހަލައެވެ. މިޝަލް ގެ އާދޭހަކަށް، ލޮލުން ފައިބަމުންދިޔަ ކަރުނައަށް، ގައިން އޮހެރެމުންދިޔަ ލެޔަށް ގުޑާވަރަށް ވުރެން ސިބްޢަތުﷲގެ ހިތް ހަރުވެފައި ހިލައެވެ.

“ސިބްޢަތުﷲ ޕްލީޒް އަހަރެން ދޫކޮށްލާ.” އަޅަމުންދާ ވޭނާއިއެކު މިޝަލް ހަޅޭއްލަވަމުން ގެންދިޔައެވެ.

ސިބްޢަތުﷲ އަށް ދެމުނު އެންމެ ބާރަކަށް ބިންމަތީގައި މިޝަލް ދަމަމުންދިޔައިރު އޭނާ ހުރީ ހަމަ ރަނގަޅަށްވެސް ކޮންޓްރޯލުން ނައްޓާފައެވެ. މިޝަލް ގެ ހަށިގަނޑަށް އަޅަމުންދިޔަ ވޭން ތަހައްމަލު ކުރެވުނީވެސް ވަކިވަރެއް ވާންދެނެވެ. މިޝަލް ގެ ހެޔަށް ގޮތްވެ ހަށިގަނޑުން އެއްކޮށް ވާގި ދޫވެއްޖެ އެވެ. ސިބްޢަތުﷲ އަށް ރޭކާލީ މިޝަލް ގެ ހަށިގަނޑުގެ ބަރުހެލިވުމުން ނެވެ. ފަސް އެނބުރި ބަލައިލިއިރު މިޝަލް ގެ ހެވެއް ނެތެވެ. މިޝަލް ކައިރީގައި ކަކޫމައްޗަށް އިށީންނަމުން މިޝަލް ގެ މޫނުމައްޗަށް އެޅިފައިހުރި އިސްތަށިތައް އެއްފަރާތްކޮށްލި އެވެ. އެ ޗާލު މޫނަށް ބަލަން ފެށިއެވެ. އިސާހިތަކުން ސިބްޢަތުﷲގެ ލޮލަށް ކަރުނަ ޖަމާވެއްޖެ އެވެ. ލޮލަށް ޖަމާވި ކަރުނަފޮދު ފޮހެލަމުން މިޝަލް ގެ މޫނާއި ދިމާއަށް ގުދުވިއެވެ.

“މި ހުރިހާ ކަމެއްވެސް މިހެން މިވަނީ ހަމަ މިޝަލް ގެ ސަބަބުން.” ދަތްކުނޑި ވިކައިލަމުން މިހެން ބުނެފައި އަތްދަނޑިމައްޗަށް މިޝަލް ނަގަމުން ވަލުން ނިކުތުމަށް ހިނގައިގަތެވެ.

***~~~***~~~***

މަޑުމަޑުން މިޝަލް ގެ ލޯ ހުޅުވައިލި އެވެ. ވަށައިގެން ހޯދާ ބަލައިލުމަށްފަހު އަމިއްލަ ހަށިގަނޑަށް ބަލައިލިއެވެ. އޭރު މިޝަލް އޮތީ ކައިވެނީގެ ހެދުމުގައެވެ. ގަހަނާ އަޅައި ޒީނަތްތެރި ކޮށްފައެވެ. ލިބުނު ހައިރާންކަމާއެކު ދެލޯ ބޮޑުކޮށްފައި އަނެއްކާވެސް ވަށައިގެން ހޯދަން ފެށިއެވެ.

“ދަރިފުޅާ އާދޭ. މިހާރު ކައިވެނީގެ ވަގުތު ޖެހެނީ.” އިވުނު އަޑަށް އިސްއުފުލައި ބަލައިލިއިރު ކޮޓަރީ ދޮރުމަތީގައި ބޮޑުދައިތަ ކޮޅަށް ހުއްޓެވެ.

“ބޮޑުދައިތާ.” އެނދުން ފައިބައިގެން ދުވެފައިގޮސް ބޮޑުދައިތަގެ ގައިގައި އޮޅުލައިގަތެވެ.

“ކިހިނެތް މިވަނީ؟ އަހަރެން… އަހަރެން ބޭނުމެއް ނޫން…” މިޝަލް އަށް ބުނެވުނީ މިހިސާބަށެވެ. ބޮޑުދައިތަގެ އިނގިލަތަކުން މިޝަލް ގެ ތުންފަތުގައި ޖައްސާ ބާރުކޮށްލިއެވެ. މިޝަލް ބުނަން އުޅުނު ޖުމްލަ ހުއްޓުވުމަށެވެ.

“މިހާރު ދެން ތިވާހަކަ ނުދައްކާ. ކިތަންމެ ބަހަނާއެއް ދެއްކިޔަސް، ކިތަންމެ ގަދައެއް ހެދިޔަސް އަހަރުމެން އަންހެނުން ޖެހޭނީ އެންމެފަހުން ހަތިޔާރު ބަހައްޓަން. އަހަރުމެންނަކަށް ނޫނެކޭ ނުބުނެވޭ. ދަރިފުޅާ، ދިރިއުޅުމަކީ އުނދަގޫކަމެއް، ޚާއްޞަކޮށް އަހަރުމެން އަންހެނުންނަށް. އަހަރުމެންގެ އަމިއްލަ ދިރިއުޅުމުގެ ކަންކަންވެސް އަމިއްލައަށް ނުނިންމޭނެ. އެހެންވީމަ މާތްﷲ އާ ވަކީލުކޮށްލާފަ ވާނެއެއްޗެއް ވުމަށް ދޫކޮށްލާ. ދަރިފުޅުވެސް ގޮތްދޫކުރޭ. އެހެންނޫނީ އަނިޔާވާނީ ހަމަ ދަރިފުޅަށް. މިހާރު ވާން މިއުޅޭ ކަންތައް ވިޔަދީ. ﷲ އިރާދަފުޅުން ދައްކަވާނެ މަގެއް ދައްކަވަންދެން ބަލަން ހުރޭ.”

ބޮޑުދައިތަ ނަސޭހަތްދެމުން ދިޔައިރު އެ ވާހަކަތައް އަޑުއަހަން މިޝަލް އަށް ހުރެވުނީ ބުނާނެ އެއްޗެއްވެސް ނޭނގިފައެވެ.

“އެކަމަކު ކިހިނެތް …. މިހާރުވެސް މިތާނގައަހަރެން ނޭވާހާސް އެބަވޭ. އަދި ބޮޑުދައިތަގެ އެ ޖަނަވާރެއް ފަދަ ދަރިފުޅު ސިބްޢަތުﷲ ދެކެ އަހަރެން ހާދަ ބިރެއް ގަނެޔޭ ބޮޑުދައިތާ. އައިއެމް ސޮރީ ސިބްޢަތުﷲ އަށް ޖަނަވާރެކޭ ބުނަން ޖެހޭތީވެސް. އެކަމަކު ކިހިނެތް އަހަރެން އޭނައާއެކު ދިރިއުޅޭނީ؟” ދެލޯ ފުރާ ކަރުނަ އޮއްސަމުން މިޝަލް އާދޭސްކުރަން ފެށިއެވެ.

“މަށަށް އެނގެޔޭ، އެނގެޔޭ. އެކަމަކު އެނގެއެއްނު ފިރިހެންވެރިން ބޭނުންވާނެ އެމީހުންގެ މުހުތާދެއް ވެއްޖެއްޔާ އެކަން ފުއްދަން. އެމީހުން އެދޭކަމަކާ މީހަކު ދެކޮޅު ހަދައިފިއްޔާ، އެމީހުން ބަދަލުވެގެންދާނެ ޖަނަވާރުން ފަދަ ބަޔަކަށް. ސިބްޢަތުﷲ އަށް ވެސް އެހެން ވެފަ އެހެރީ. އެއީކީ ކުރިން އެހާ ވިޔާނުދާ ކުއްޖެއް ނޫން. އެހެންވީމަ ދަރިފުޅު މިވަގުތަށް މިކަމަށް އެއްބަސްވުން އެންމެ ރަނގަޅީ. ބޮޑުދައިތައަށް އެނގޭ ކޮންމެވެސް ދުވަހަކުން މިޝަލް މި ކައިންޏަށް އެއްބަސްވެވުނީތީ އުފާކުރާނެކަން.” ބޮޑުދައިތަ މިހެން ބުނި ނަމަވެސް ޚުދު ބޮޑުދައިތައަށް ވެސް ހުރެވުނީ ފުން ވިސްނުމެއްގައެވެ. ބޮޑުދައިތަ އަށް މިއަދު ހުންނަން ޖެހިފައި އެވަނީ ނަގާނެ ކޮޅެއް ނޭނގޭ ހާލުގައެވެ. އަމިއްލަ ބޮޑުދައިތަ ދަރިފުޅުގެ ދިރިއުޅުން ނަރަކައަކަށް ހަދަން ބޭނުމެއް ނުވެއެވެ. އަނެއްކޮޅުން ފިރިމީހާ އާއި ފިރިހެން ދަރިފުޅާއި އެ ބޮޑު ޢާއިލާގެ ބާރުގަދަ ފިރިހެންވެރިންނާއި ދެކޮޅުހެދޭކަށްވެސް ނެތެވެ.

“މިޝަލް ގެންނާށޯ.” އެތަނަށް ވަން އެހެން އަންހެނަކު ބުންޏެވެ.

“ކައިވެނީގެ ސާޢަތް ޖެހުނީ. ހުރިހާ ކަމެއްވެސް ރަނގަޅުވާނެ ކަމަށް ނިކަން ވިސްނަބަލަ.” ބޮޑުދައިތަ މިހެން ބުނަމުން މިޝަލް ގެ ބުރުގާ ރަނގަޅުކޮށްލައިދިނެވެ.

ކައިވެނީގެ ރަސްމިއްޔާތު އޮތީ ރަށު ސްކޫލް ހޯލުގައެވެ. ހަ ވަރަކަށް ޑެސްކް ކައިރިކޮށްފައި ފޮތިގަނޑެއް އަޅާފައިހުރި އިރު، ވަށައިގެން އަތުރާފައި ހުރި އަށެއްކަ ގޮނޑީގައި ގާޒީ އާއި ހެކިވެރިންނާއި ސިބްޢަތުﷲ އާއި އޭނާގެ ބައްޕަމެން ތިބީ މިޝަލް ގެ އިންތިޒާރުގައެވެ. މިޝަލް ގެ އަތުގައި ހިފަހައްޓާލައިގެން ބޮޑުދައިތަ ގޮސް މަޑުކޮށްލުމުން މިޝަލް އިށީންނަންވީ ގޮނޑި ދެއްކީ ސިބްޢަތުﷲ ގެ ބައްޕަ އެވެ. އޭރުވެސް މިޝަލް ލޮލުން ކަރުނައިގެ ސައިލެއް އުފެދި ބަންޑުންވާން ކައިރިވެފައި ހުއްޓެވެ. ހިތް އެދި ގޮވަމުން ދަނީ ދުއްވައިގަތުމަށެވެ. ފިލައިގެން ދިއުމަށެވެ. އެކަމަކުވެސް އެވަރުގެ ހިތްވަރެއް ނުލިބުނެވެ.

“އއ. ހިމަންދޫ ބާބުއްސަލާމް ގޭ ނަސީރު ޢަލީގެ ދަރިފުޅު ސިބްޢަތުﷲ ޢަލީ އާއި ކައިވެނި ކުރުމަށް ހ. ރަންކަރަ ބަޝީރު ޢަލީ ގެ ދަރިފުޅު މިޝަލް ޢަލީ ޤަބޫލުތަ؟” ގާޒީ ގެ ސުވާލު މިޝަލް އަށް އަޑުއިވުނެވެ. ނަމަވެސް ޖަވާބު ދޭހާ ހިތްވަރެއް ނުލިބުނެވެ. ހިތް ގިސްލާ ރޮމުންދާއިރު އެކަން ހިފަހައްޓައިގެން އިންނަން މަޖުބޫރުވެފައިވާތީ ތުން ފިއްތައިގެން އިނދެވުނީ އެވެ.

“ޤަބޫލު.” ދެ ދަތްޕިލަ ޖައްސާ ބާރުކޮށްގެން އިނދެ ހަރުކަށި ގޮތަކަށް މިޝަލް ޖަވާބު ދިނެވެ.

“އއ. ހިމަންދޫ ބާބުއްސަލާމް ގޭ ނަސީރު ޢަލީގެ ދަރިފުޅު ސިބްޢަތުﷲ ޢަލީ އާއި ކައިވެނި ކުރުމަށް ހ. ރަންކަރަ ބަޝީރު ޢަލީ ގެ ދަރިފުޅު މިޝަލް ޢަލީ ޤަބޫލުތަ؟” ގާޒީގެ ސުވާލު ތަކުރާރު ކޮށްލި އެވެ.

“ޤަބޫލު.”

“ޤަބޫލު.” މިޝަލް ވެސް ޖަވާބު ތަކުރާރު ކޮށްލި އެވެ. ހިތް ނޭދުނަސް، ރޫހު ނޭދުނަސް، ސިބްޢަތުﷲ އަކީ އޭނާގެ ފިރިއެއްކަމަށް ޤަބޫލުކުރިއެވެ. ކައިވެނި ކުރެވުނީ ޖަނަވާރެއްފަދަ ސިބްޢަތުﷲ އާކަން އެނގިހުރެ އެވެ.

ގާޒީ ގެ ސުވާލު މިފަހަރު އަމާޒުކުރީ ސިބްޢަތުﷲ އަށެވެ. ގާޒީގެ ސުވާލު ރަނގަޅަށް ނުވެސް ނިމެންދެން މިޝަލް އަކީ އަތްބެއްކަމަށް ސިބްޢަތުﷲ ގަބޫލުކޮށްފި އެވެ. މަރުހަބާގެ ސަލާންގަލާން ކޮށް އުފާފާޅުކުރަމުން އެއްބަޔަކު ދިޔައިރު މިޝަލް ގެ ހިތް ބާރަށް ތެޅިފޮޅެނީ އެވެ. އަންނަން އޮތް ބިރުވެރި ދުވަސްތައް ހިތަށް ސިފަވާތީ އެވެ.

ކައިވެނިކޮށްގެން ގެއަށް ގޮސް ވަނުމާއެކު އެންމެ ފުރަމަވެސް ޖެހުނީ މާމަގެ ކުރިމަތީގައި ވަގުތުކޮޅެއް ހޭދަކުރާށެވެ. ކައިރީގައި ބޮޑުދައިތަ ވެސް ހުއްޓެވެ.

“މިޝަލް.” މާމަ މިޝަލް އަށް ގޮވާލި އެވެ. ކަރުނުން ފުރިފައިވާ މިޝަލް ގެ ދެލޯ ފެނުމުން މާމަ އާއި ބޮޑުދައިތަވެސް ތިބީ ދެރަވެފައެވެ. އެހެނަސް އެމީހުންނަށް ކުރެވޭނެ ހަމަ އެއްވެސް ކަމެއް ނެތެވެ. ރުހުނަސް ނުރުހުނަސް ހުރިހައި ކަމެއް ވެ ނިމިއްޖެ އެވެ.

“ދަރިފުޅުގެ ތި ރީތި ދެލޯ ތިގޮތަށް ޚަރާބު ކުރުމުގެ ބޭނުމަކީ ކޮބާ؟” މިޝަލް ގެ ލޮލުން ކަރުނަ ފޮހެދެމުން މާމަ ބުންޏެވެ.

“ހުރިހައި އެންމެންވެގެން އަހަރެންގެ ދިރިއުޅުން ޚަރާބުކުރި އިރު އަހަރެންވާ މި ޚަރާބު ކުރަނީ ހަމަ އެކަނި އަހަރެންގެ ދެލޯދޯ.” މާމަ އާއި ޖަދަލު ނުކުރިޔަސް ދިފާޢުގައި މިޝަލް އަށް އެއްޗެއް ނުބުނެ ނުއިނދެވުނެވެ. މިޝަލް އަށް ބުނެވުނީވެސް އެންމެ ޖުމްލަ އެކެވެ. އިތުރަށް ރޮވެން ފެށުމުންނެވެ.

“އެނގެއެއްނު ދަރިފުޅުގެ ހިތުގެ އަޑު މާތްﷲ އައްސަވާވޮޑިގެންވާކަން؟” މާމަ ސުވާލުކުރި އެވެ. ކުޑަކުއްޖެއް ފަދައިން އާނއެކޭ ބުނުމަށް މިޝަލް ބޯ ޖަހައިލި އެވެ.

“ދެން އެހެންވެއްޖެއްޔާ އެކަލާންގެއާ ވަކީލުކޮށްލައިގެން ދިރިއުޅެވޭތޯ މަސްކަތްކުރޭ. ފަހުން އުފާވެރިކަން ލިބޭނެ.” މިޝަލް ގެ ބޮލުގައި ފިރުމާލަމުން މާމަ ބުންޏެވެ.

ބޮޑުދައިތައާއި އެކުގައި މިޝަލް ގެ ހުރިހައި ދެބެންގެ ދެދަރި ކުދިންތައް ވެސް ހިނގައްޖެއެވެ. އެމީހުން ދިޔައީ މާމަވެސް ގޮވައިގެންނެވެ. މިޝަލް އެކަނިމާއެކަނި އެ ކޮޓަރީގައި ބައިންދާފައެވެ. މިޝަލް އާއި އެކުގައި ހަމައެކަނި ވަނީ ލޮލުން ފައިބަމުންދިޔަ ކަރުނައާއި ގަންފައިވާ ބިރެވެ. ކޮޓަރި ތެރޭގައި އޮތް ހަނުހިމޭންކަން ފިޔަވައި ދެން އިވެމުންދިޔަ އަޑަކީ ކޮޓަރީގެ ފާރުގައި ބަހައްޓާފައިވާ ބަރުގަނޑުލީ ބޮޑު ގަޑީގެ އަޑެވެ. ގަޑީގެ ބަރު ދެފަރާތަށް ހެއްލެމުންދިޔައިރު ގަޑީގެ ޓިކް-ޓޮކް އަޑު ފިޔަވައި އެހެން އެއްވެސް އަޑެއް ނުއިވެއެވެ. އެ އަޑުންވެސް މިޝަލް އަށް ލިބެމުންދިޔައީ ބިރުވެރިކަމެވެ.

ސިބުޢަތުﷲ ގެ ކޮޓަރިތެރެއަށް ވަށައިގެން މިޝަލް ބަލަން ފެށިއެވެ. އެއީ ބޮޑު ކޮޓަރިއެކެވެ. މިޝަލް އިށީންދެގެން އިން އެނދުގެ ބޯލާކޮޅުގެ ބިތް ފިޔަވައި އެހެން ހުރިހާ ބިތެއްގައިވެސް ލާފައި ހުރީ މަޑު އަޅިކުލައެކެވެ. އެނދުގެ ބޯލާކޮޅު ބިތުގައި ލާފައި ހުރީ ގަދަ ނޫކުލައެވެ. އޭނާ އިށީންދެގެން އިނީ ކިންގް ސައިޒުގެ އެނދެއްގައެވެ. އެނދުގެ އެއްފަރާތުގައި ބޮޑު އަލަމާރިއެއް ހުރިއިރު، ޑްރެސިންގް ރޫމަކާއި ޑްރެސިން ޓޭބަލެއް ހުއްޓެވެ. އެނދުގެ ވާތްފަރާތުން ކޮޓަރީގެ އެއްކަނެއްގައި މޭޒެއް ހުރިއިރު މޭޒުމަތީގައި ހުރީ ދީނީ އެކިއެކި ފޮތްތަކެވެ. މުޅި ކޮޓަރިތެރެ ޒީނަތްތެރިކޮށްފައިވަނީ އަގުބޮޑު ފަރުނީޗަރުންނެވެ. ވަށައިގެން ބަލަނިކޮށް މޭޒާއިދިމާއިން މިޝަލްގެ ލޮލުގައި އަޅައިގަތީ ބިއްލޫރިން ހަދާފައިވާ ބިތެކެވެ. މިޝަލް ކޮޅަށް ތެދުވެ އެ ބިތާއި ދިމާއަށް ހިނގައިގަތެވެ. ބިއްލޫރިގަނޑުގެ ބޭރުން ރީތިކޮށް ހައްދާފައިވާ މާ ބަގީޗާއެއް ސާފުކޮށް ފެނުނީ ބިއްލޫރިގަނޑާއި ކައިރިއަށް ޖެހިލުމުންނެވެ. ބަނަވެފައި އުޑުމައްޗަށް ބަލައިލުމުން ވާރޭ ވެހެމުން ދާކަން އެނގުނެވެ. ބިއްލޫރިގަނޑަށްވެސް ބައެއް ތިކިތައް ޖެހެމުންދެއެވެ. ވެހެމުންދާ ވާރޭގެ ތިކިތައް ގަސްތަކުގައި ޖެހެމުންދިޔައިރު ގަސްގަހުގައި ފޮޅިފައިވާ މާމެލާމެދި ނަށަމުންދިޔައީ ވާރޭގެ ތިކިތަކުން ލިބެމުންދާ ފިނިފިނި ގޯނާއާއި ގަޔާވާތީއޭ ހީވާކަހަލަ އެވެ. މާތަކުން ކިތަންމެ އުފާވެރިކަމެއް ފެނުނަސް މިޝަލްގެ ދެލޮލުން ފެންނަމުންދިޔައީ ހިތާމައެވެ. ހިތުގެ އެންމެ ހިމަނާރުވެސް ރޮމުންދިޔައީ ވޭނާއި އަސަރާއި އެކުގައެވެ. ކުއްލިއަކަށް ކޮޓަރީގެ ދޮރު ހުޅުވުނު އަޑަށް މިޝަލްގެ ހަށިގަނޑު ގަނޑުވިކަހަލަ އެވެ.

އިވުނު އަޑާއިއެކު މިޝަލް އެނބުރި ބަލައެއް ނުލައެވެ. ދޮރުމަތީގައި ހުންނާނީ އެ ފޫހި ފޫހި ސިބުޢަތުﷲ ކަން ޔަޤީންވާތީ އެވެ. މިޝަލްގެ މުޅި ހަށިގަނޑު ތުރުތުރުލާން ފަށައިފިއެވެ. ދޮރުލައްޕައިލި އަޑާއިއެކުގައެވެ. ފިޔަވަޅުތަކެއްގެ އަޑު އިވެމުން، ކައިރިވަމުން ދިޔައީ އޭނާ އާއި ދިމާއަށެވެ.

“މިޝަލް.” އެ އަޑާއިއެކު މިޝަލް އަށް ތެޅިގަނެވުނެވެ.

(20 މިނެޓް ކުރިން)

ކައިވެނީގެ ރަސްމިއްޔާތު ނިމިގެން ސިބުޢަތުﷲ އިނީ އޭނާގެ ރައްޓެހިންނާއި ދެބެގެންގެ ދެދަރި ކުދިންނާއިއެކުގައެވެ. ދެބެންގެދެދަރި ކުދިންތައް ތިބީ ސިބުޢަތުﷲ ގެ ކައިވެނި ކުރެވުމުން ނުހަނު އުފަލުންނެވެ. ނަމަވެސް ސިބުޢަތުﷲ ގެ މޫނުމަތިން އުފާވެރިކަމުގެ ކަންފުޅެއްވެސް ނުފެނެއެވެ. އޭރުވެސް އޭނާގެ ހިތުތެރޭގައި އަނދަމުންދިޔައީ ނަފުރަތާއި ރުޅިވެރިކަމުގެ ތޫފާނީ ހުޅުގަނޑެކެވެ.

ވަގުތުތައް ހޭދަވަމުންދިޔައެވެ. ރައްޓެހިންގެ ތެރޭގައި ސިބުޢަތުﷲ އިނީއެވެ. ގަޑިންވީ ކިހާއިރެއްކަމެއް ނުވެސް އެނގޭކަހަލަ އެވެ. ނަމަވެސް އޭނާގެ އިންތިޒާރުގައި އޭނާގެ ކޮޓަރީގައި މިޝަލް އިންނާނެކަން ސިބުޢަތުﷲ އަށް ރަނގަޅަށް އެނގެއެވެ. އޭނާ ބޭނުންވަނީވެސް އެގޮތެވެ. އޭނާ އަށް މިޝަލް އިންތިޒާރު ކުރުވާށެވެ. އިންތިޒާރުގެ އެ ވަގުތުތައްވެސް ބިރުވެރި ވަގުތުތަކަކަށް ހަދާށެވެ. ސިބުޢަތުﷲ ދެކެ އިތުރަށް ބިރުގަންނުވާށެވެ. ސިބުޢަތުﷲ ބޭނުންވަނީ މިޝަލްގެ ހަޔާތް އެއްކޮށް ބަރުބާދުކޮށްލާށެވެ.

“ސިބުތު ދާކަށް ނުވޭތަ. މިހާރު ހާދަ ދަން ވެއްޖޭ.” ދެބެންގެ ދެދަރި ކުއްޖަކު ސިބުޢަތުﷲ އަށް ބުންޏެވެ. އާނބަސް ބުނުމަށް އޭނާ ބޯ ޖަހައިލިއެވެ.

(20 މިނެޓް ފަސް)

ސިބުޢަތުﷲ ކޮޓަރިއަށް ދިޔައީ މެންދަމު 12 ވެސް ޖެހިފަހުންނެވެ. ކޮޓަރީގެ ދޮރު ހުޅުވައިލުމާއެކު އޭނާގެ ހިނދުރި ފުރާލީ މިޝަލް ޖަހައިގެން އިން މީރުވަސްދުވާ ސެންޓުގެ ވަހުންނެވެ. އެވަސް އޭނާގެ ހިތާއިހަމައަށްވެސް ވާސިލް ވެއްޖެއެވެ. އެ މީރުވަހުގެ އިޙްސާސް ކޮށްލުމަށް އޭނާ ދެލޯ މަރައިލިއެވެ. ތުންފަތް މައްޗަށް އުފާވެރިކަމުގެ ހިނިތުންވުމެއް ކުޅެލީ އެވަގުތުއެވެ. ނަމަވެސް އެ މީރުވަސް ދުވާ ސެންޓުގެ މަސްތުން، އަސްލަށް ރުޖޫޢަވާކަށް މާކަގިނަ ވަގުތެއް ނުނެގިއެވެ. ކުއްލިއަކަށް އޭނާ ދެލޯ ހުޅުވައިލިއެވެ. ދުވަމުންދިޔަ ވަހަށް ސަމާލުކަމެއް ނުދީ ކޮޓަރީގެ ދޮރުލައްޕައިލިއެވެ. ޖެހި ބުދެއްހެން އޭނާގެ އެނދުގައި އިށީންދެ އިން ސޫރައަށް ނަޒަރުހިންގައިލިއެވެ. ނުލަފާ ވައްތަރަކަށް ހިނިތުންވަމުން މިޝަލް އާއި ދިމާއަށް ދެތިންފިޔަވަޅު އެޅިއެވެ.

“މިޝަލް.” ސިބްޢަތުﷲ، މިޝަލް އަށް ގޮވައިލުމާއިއެކު ބިރުންގޮސް މިޝަލްގެ ހަށިގަނޑު ތެޅިގަތްކަން އޭނާއަށް ހަމަ ރަނގަޅަށްވެސް ފާހަގަ ކުރެވުނެވެ. އޭނާ ބޭނުންވާ ގޮތަކީވެސް އެއީއެވެ. އެކަމަކުވެސް މިޝަލްގެ ފަރާތުން އެއްވެސް ހަރަކާތެއް ނާދެއެވެ. ނުވިތާކަށް ޖަވާބެއްވެސް ނުދެއެވެ. ސިބްޢަތުﷲ ގެ މިސްރާބު ހުރީ ސީދާ މިޝަލް އާއި ދިމާއަށެވެ.

“މިފަރާތަށް އެނބުރޭ މިޝަލް.” ސިބްޢަތުﷲ ގެ ބަރު އަޑުން އިންޒާރުދިނެވެ. ނަމަވެސް މިޝަލް އެ އިންޒާރާއި އެއްގޮތަށް އަމަލެއް ނުކުރިއެވެ. އެނބުރި ބަލައެއް ނުލިއެވެ.

“އެއް ވާހަކައެއް މާގިނަފަހަރަށް ތަކުރާރު ކުރުމަކީ އަހަރެން ކުރާހިތްވާ ކަމެއް ނޫން. އަހަރެން ބުނެފިން ދޯ މިފަރާތަށް އެނބުރޭށޭ.” މިފަހަރު ސިބްޢަތުﷲ ގެ ބަރު އަދި ބާރު އަޑުން ހަޅޭއްލަވައިތުމާއެކު އަވަސް އަވަހަށް ސިބްޢަތުﷲ އާއި ދިމާއަށް މިޝަލް އެނބުރިއްޖެއެވެ. އެވަގުތު މިޝަލް އިނީ ބިރުން ތުރުތުރު އަޅައަޅަ އެވެ.

ބިރުން ވިރިވިރި އިން މިޝަލް ގެ މޫނު ފެނިފައި ސިބްޢަތުﷲ ހޭންފެށިއެވެ. ކުރިއަށް، މިޝަލް އާއި ކައިރިއަށް ދެފިޔަވަޅެއް އަޅަމުންނެވެ. އެވަގުތު މިޝަލް އަށް ބޭއިޚްތިޔާރުގައި ފަހަތަށް ދެފިޔަވަޅެއް އެޅިއްޖެއެވެ. ފާރުގައި ގޮސް ލައިގަންނަންދެން ފަހަތަށް ޖެހިލެވުނެވެ.

“އަހަރެން ދެކެން ބޭނުމީ ތީތި. ތި ގޮތަށް އަހަރެންދެކެ ބިރުން އިންނަތަން.” މިހެން ބުނަމުން މިޝަލް އާއި އޭނާއާއި ދެމެދުގައިވާ ހުސްކަން ނިމުމަކަށް ގެނެސްފިއެވެ. މިޝަލްގެ އުރަމަތީގައި ސިބްޢަތުﷲ ގެ މޭމަތި ޖައްސައި ބާރުކޮށްލިއެވެ.

“ދުރަށްދޭ.” ދުރަށް ކޮއްޕާލެވޭތޯ މަސައްކަތް ކުރަމުން މިޝަލް ހަޅޭއްލަވައިގަތެވެ. ނަމަވެސް ސިބްޢަތުﷲ ގެ ދެ އަތުން މިޝަލްގެ ދެއަތް ފާރާއި ލައި ފިއްތާލައި ތަޅުއެޅިވިއެވެ.

މިޝަލް ގެ ދެލޯ ބޮޑުވެގެންދިޔައެވެ. އެވަގުތު ސިބްޢަތުﷲ އަށް ލިބުނު ނަސްރަށްޓަކައި ހިނިތުންވިއެވެ. އޭނާ ބޭނުންވަނީ އެހެން އެންމެން އޭނާދެކެ ޖެހިލުންވެ ބިރުގަންނަ ގޮތަށް މިޝަލް ވެސް އޭނާދެކެ ބިރުގަންނަގޮތް ވުމަށެވެ. އޭނާގެ ކުރިމަތީގައި ކުޑަކަކޫ ޖެއްސުމަށެވެ. އޭނާ ބޭނުންވަނީ މިޝަލް ރޫޅި ހަލާކުވާތަން ދެކޭށެވެ.

“ހަނދާންވޭތަ ކަލޭ މަށާ ނީންނާނަމޭ ކިޔާފަ ފިލި ދުވަސްމަތިން.!!؟؟!!” މިޝަލް ގެ ބޮޑުވެފައިވާ ދެލޮލަށް ބަލައިލަމުން ސިބްޢަތުﷲ މިފަހަރު ފިލިގަތީ ސިންގާއެއް ފަދައިންނެވެ.

“އެދުވަހު ކަލޭ ހަމައެކަނި އަހަރެންގެ ހިތް ހަލާއްކުކޮށްލީކީ ނޫން. އެދުވަހު ކަލޭ އަހަރެންގެ އީގޯ އަށް ހަރޓް ކުރި.” މިހެން ބުނަމުން މިޝަލް ގެ އަތަށް ބާރުކޮށްލިއެވެ. އެވަގުތު މިޝަލް ގެ އަތުގައި އަޅާފައި އޮތް ކެވެލިގަނޑުން މިޝަލް ގެ އަތުގައި ލޭކޮށައިލިއެވެ.

“އައްދޯތް……. މަންމާ…..” ވީ ތަދުން މިޝަލް ހަޅޭއްލަވައިގަތެވެ. ދެ ލޯމަރައިލެވުނެވެ.

“ކޮން އަމަޔަކަށް ގޮވާކައްތަ އޭނ؟!! ތި ދެލޯ ނުމަރާތި. ހަމަ މިހާރު ލޯހުޅުވާ!!” މިޝަލް ގެ އަތަށް ކުރިއަށްވުރެން ބާރުކޮށްލަމުން މިޝަލް ގެ ލޯ ހުޅުވަންދެން ހިފަހައްޓައިލި އެވެ.

“ހާދަ ބަސްއަހާ ކުއްޖެކޭ ދޯ!” މިޝަލް އަށް މަލާމާތްކޮށްލަމުން ސިބްޢަތުﷲ ބުންޏެވެ. އެވަގުތު ރުޅިވެރިކަމުގެ ދެލޮލުން ސިބްޢަތުﷲ އަށް މިޝަލް ބަލައިލިއެވެ.

“އަހަރެން ދޫކޮށްލާ ސިބުތޫ.” ސިބްޢަތުﷲ ގެ އަތްދޮށުން ސަލާމާތްވާން ގަދަދައްކަމުން މިޝަލް އެދުނެވެ.

“ކަލޭ ދޫކޮށްލާށޭ! ކަލެއަށް އަންޑަސްޓޭންޑް ނުވޭދޯ ކަލޭ މިވަގުތު ތާށިވެފަ ތިހުރީ ކޮންތަނެއްގަ ކަމެއްވެސް؟” ސިބްޢަތުﷲ އިތުރަށް ފިލިގަތެވެ. މިޝަލްގެ ހަށިގަނޑު އޭނާ އާއި އިތުރަށް ކައިރިކޮށްލަމުންނެވެ. ޖެހި ކުއްލި ލަތްކަކާއިއެކު މިޝަލް ގެ ހަށިގަނޑު ތަޅުންގަނޑުމައްޗަށް ޖެހިއެވެ.

“ތީ…. ކަލޭ އޮންނަން ޖެހޭނެ މަޤާމަކީ ތީ. އަހަރެންގެ ފައިބުޑުގަ… ތަޅުންގަނޑުގަ. ސާފުވެއްޖެތަ؟” ސިބްޢަތުﷲ ގެ ފައިބުޑުގައި ތަޅުންމައްޗަށް ގުޅައަކަށް ޖެހިފައި އޮތް މިޝަލް އާއި ދިމާއަށް ސިބްޢަތުﷲ ބުންޏެވެ.

“އަހަރެން ކަލެއަށް ކީއްކޮށްގެން ތި އަހުވައެއް ތި ދައްކަނީ؟ ކީއްވެގެން…. ކީއްވެގެން ކަލޭ އަހަންނަށް ތިހެން ތިހަދަނީ؟” ފުހިފުހިފައި ރޮމުން މިޝަލް ސުވާލުކުރަން ފެށިއެވެ.

“ކީއްވެގެންހޭ؟” ސިބްޢަތުﷲ ބާރަށް ހޭންފެށިއެވެ.

“ކަލެއަށް އެނގޭނެ އަހަންނަކީ ކިހާ ފޮނިބޮޑު މީހެއްކަންދޯ. އެއްވެސް މީހަކު އަހަރެންގެ އީގޯ އަށް ހަރޓް ކޮށްފިއްޔާ އޭގެ މާނައަކީ އެކަން ކުރި މީހެއްގެ ދުވަސް އެދިޔައީ… އެނގިއްޖެތަ؟” ސިބްޢަތުﷲ ގެ ބަރު އަޑުން އަނެއްކާވެސް ފެލިގަތެވެ. މިޝަލް އާއި ދިމާއަށް ގުދުވެ މިޝަލް ގެ ދަތްދޮޅީގައި ހިފައިފައި މިޝަލް ގެ ބޯ ފަހަތަށް ލަންބައިލިއެވެ. އަނެއް އަތުން މިޝަލްގެ އިސްތަށިގަނޑުގައި ހިފިއެވެ. މުއްކަވާލާފައި އިސްތަށިގަނޑުގައި ހިފަމުން މިޝަލް ގެ މޫނު ސިބްޢަތުﷲ ގެ މޫނާއި ކައިރިކޮށްލިއެވެ. އެވަގުތު ވީ ތަދުން މިޝަލް އަށް ހަޅޭއްލަވައިގަނެވުނެވެ.

“ކަލޭ ތި ހުންނަނީ ކަލޭގެ ތި ރީތިކަމާމެދު ނިކަން ފޮނިބޮޑުވެފަ ދޯ؟” ދަތްކުނޑި ވިކައިލަމުން ސިބްޢަތުﷲ ބުންޏެވެ. ސިބްޢަތުﷲ ގެ މި ސުވާލުން މިޝަލް އަށް ލިބުނީ އިތުރު ހައިރާން ކަމެކެވެ.

ސިބްޢަތުﷲ އިތުރަށް ދަތްކުނޑިވިކައިލިއެވެ. އަނެއްކާވެސް މިޝަލްގެ އިސްތަށިގަނޑު ސިބްޢަތުﷲ ގެ އަތަށް ހެޔޮވަރުކޮށްލަމުން ދަމައިގަތެވެ. ވީތަދުން މިޝަލް އަށް ރޮއެގަނެވުނެވެ. ބާރަށް ހަޅޭއްލަވައިގަނެވުނެވެ. އެމަންޒަރު ފެނިފައި ސިބްޢަތުﷲ އަށް އިތުރު ހިތްހަމަޖެހުމެއް ލިބުނެވެ. މިޝަލްގެ ގިސްލުމާއި، ލޮލުން ފައިބަމުންދިޔަ ކަރުނައިން ސިބްޢަތުﷲ އުފާ ޙާޞިލްކުރަމުން ދިޔައެވެ.

“ކަލޭ ހަމަ އަސްލުވެސް ހީކުރަންދޯ ތީ މާ ރީތިމީހެއްކަމަށް؟ އެކަމަކު ބުނަން!… އަހަންނަށް ތީ ވަރަށް ހުތުރު މީހެއް. މީނދަ މަގޭ އަނބިގޮއްޔެ މިޝަލް އަކީ މަށަށް ކުޑަކޮށްވެސް ރީތި މީހެއް ނޫން…. އެނގިއްޖެތަ؟” ސިބްޢަތުﷲ ފިލިގަންނަމުން މިޝަލްގެ މޫނުމަތީގައި އޭނާގެ އިނގިލިތަކުން ހިފަހައްޓައިލިއެވެ.  މިޝަލްގެ ކޮލަށް ސިބްޢަތުﷲ ގެ އިނގިލިތައް ކޮއްޕާލައި، އޭނާގެ ހޫނު ނޭވާ އެޅޭހާ ގާތަށް މޫނު ކައިރިކޮށްލިއެވެ. ސިބްޢަތުﷲ ގެ ހޫނު ނޭވާ ޖެހުމުން މިޝަލް އިތުރަށް ބިރުގަތެވެ. ރުޅިވެރިކަމާ ނަފުރަތުގެ އަލިފާނުން އަނދަމުންދާ ސިބްޢަތުﷲ ގެ މޫނަށް މިޝަލް އަށް ބަލަން އިނދެވުނީ ދެލޯ ބޮޑުކޮށްގެންނެވެ.

“ތީ ހުތުރު އަދި ފޮނިކަމާ ބޮޑާކަމުން ފުރިފަހުރި ކުއްޖެއް. ކަލޭ އަމިއްލަ ނަފުސާމެދު ވަރަށް ޕްރައުޑްވޭ ދޯ! ކަލޭގެ ރީތިކަމަށް، ކަލެޔަށް ލިބިފަވާ ތަޢުލީމަށްޓަކައިވެސް ވަރަށް ފޮނިބޮޑުވަން ދޯ. އެކަމަކު މިރޭ….!” ސިބްޢަތުﷲ ބުނަން ފެށި ޖުމްލަ ފުރިހަމަ ނުކޮށް ނޯށްދަމާލިއެވެ.

“އެކަމަކު މިރޭ ކަލޭގެ ތި ޝަރަފާ، ކަލޭގެ ތި ބޮޑާކަމާ، ކަލޭގެ ތި ފޮނި އުޅުމާ، ކަލޭގެ އަބުރު ވެއްޔާ މޮޑެލާނަން. ކަލޭގެ ފަޚްރާ، ކަލޭގެ ހުވަފެންތައް ކުދިކުދި ކޮށް ކޮށާލާނަން. އެއީ ކަލޭ އަހަރެންގެ ހުވަފެންތައް ހަލާކުކޮށްލި ގޮތަށް. އެކަމަކު އެއަށްވުރެން އަނިޔާވެރިކޮށް… އެނގިއްޖެތަ؟” މިޝަލްގެ ދެކޮލަށް ފިއްތާލައި އިނގިލިތަކުން އިތުރަށް އޮބައިލަމުން އެނދުމައްޗަށް ކޮއްޕައި ވައްޓައިލިއެވެ.

ސިބްޢަތުﷲ ދެން ވަނީ ފާޚާނާ އަށެވެ. ފާޚާނާއަށް ވަދެ ބާރުބާރަށް ދޮރުފަތް ލައްޕައިލިއެވެ.

މިޝަލް އަށް އެނދުމަތީގައި އިނދެވުނީއެވެ. އެއްވެސް ހަރަކާތެއް ނެތިފައެވެ. ބިރުންގޮސް އޭނާގެ ހިތް ތެޅެމުންދިޔައީ އަމަށަކު ވަރަކަށް ނޫނެވެ. ސިބްޢަތުﷲ އެއުޅެނީ އަނެއްކާ ކީއްކުރަންބާވައެވެ؟ މިޝަލް އަށް ގޯސްކޮށް ކުރެވުނީ ކޮންކަމެއް ބާވައެވެ؟ މިޝަލްގެ ކުށަކީ ކޮބައިކަން ޚުދު މިޝަލް އަކަށްވެސް ނޭނގެއެވެ.

ހިތްވަރުކޮށްފައި މިޝަލް ތެދުވެއްޖެއެވެ. އޭނާގެ އިސްތަށިގަނޑުގައި ސިބްޢަތުﷲ ހިފެހައްޓިލެތް ބާރުކަމުން ބޮލަށް ތަދުވާކަން އިހްސާސްކުރެވެން ފެށީވެސް އަދިކިރިޔާއެވެ. މަޑުމަޑުން އަމިއްލަ ކޮލުގައި އިނގިލިތައް ޖައްސައިލިއެވެ. މަޑުމަޑުން ކޯތާފަތުގައި ފިރުމާލީ ވަމުންދިޔަ ތަދަށް ލުޔެއް ލިބޭތޯ އެވެ. އޭނާ އަކީ ނާޒުކު ހަންގަނޑެއް ލިބިފައިވާ ކުއްޖެކެވެ. މައުސޫމު ކުއްޖެކެވެ. ބައްޕަގެ ލޯތްބާއި އޯގާތެރިކަމުގެ ދާވަނީގައި ބޮޑުވެ އިހަކަށްދުވަހު ފޮޅުނު ނާޒުކު ފިނިފެންމަލެއްފަދަ ކުއްޖެކެވެ. ބައްޕަގެ ފަރާތުން އެއްވެސް ހަރުކަށިކަމެއް ނުފެނެއެވެ. ރުޅިއައިސްގެން މިވީހާތަނަށް އެއްވެސް އެއްޗެއް އަޑުހަރުކޮށް ބުނެފައެއް ނެތެވެ. އެހެން ނަމަވެސް މިއަދު އޭނާ މި ނަރަކައެއް ފަދަ ދުނިޔެއަށް ކޮއްޕައިލީ ޚުދު އޭނާގެ ބައްޕަގެ ރުހުމުގައެވެ. އަލަތު ފިރިމީހާގެ ފަރާތުން މިފަދަ އަނިޔާވެރި ރެޔެއް ފެންނަމުން އެދަނީ އެ ބައްޕަގެ ސަބަބުންނެވެ.

“ކޮބާ ތައްޔާރުތަ؟” ސިބްޢަތުﷲ ގެ އަޑު ޖެހިފައި މިޝަލް އަށް ތެޅިގަނެވުނެވެ. ބިރުންހުރެ ނަމަވެސް ސިބްޢަތުﷲ އާއި ދިމާއަށް އެނބުރެވުނީ އެއްވެސް އިޚްތިޔާރަކާ ނުލައެވެ.

“ޕްލީޒް އަހަންނަށް އަނިޔާނުކުރާތި.” ބަލިކަށި އަޑަކުން މިޝަލްގެ އާދޭހުގެ އިލްތިޖާ އިއްވަމުން ފަހަތަށް ޖެހިލިއެވެ.

“އަސްލުވެސްތަ!” ނުލަފާ ރާގެއްގައި ސިބްޢަތުﷲ ޖަވާބުދިނެވެ. މިޝަލް އާއި ދިމާއަށް ކުރިއަށް ޖެހިލަމުންނެވެ.

ކުރާނެ އެއްވެސް ކަމެއް، ހަދާނެ އެއްވެސް ގޮތެއް މިޝަލް އަކަށް ނުވިސްނުނެވެ. ރުޅިވެރިކަމުގެ އަނގުރު އަލިފާނުން ދޮންވެފައިވާ ސިބްޢަތުﷲ ގެ ކިބައިން ސަލާމަތްވުމަށް އޭނާ ކިތަންމެހާވެސް ބޭނުމެވެ. ފަހަތަށް ޖެހެމުންގޮސް އެނދުގައި މިޝަލްގެ ފައިގެ ދުނިދަށް ޖެހުމާއެކު އެނދުމައްޗަށް އުޑުތިލަމައްޗަށް ވެއްޓިއްޖެއެވެ. ސިބްޢަތުﷲ ހެމުން ކުރިއަށް ޖެހެންފެށިއެވެ.

“ކޮބާ ހީވޭ… ކަލެއަށް ގޮސް ތި ލެޑެވުނީ ކަލޭގެ މަގާމުގަ.” މިހެން ބުނުމާއެކު ގޮސް މިޝަލްގެ ގައިމަތީގައި ދެފަރާތަށް ދެފައި ލައިގެން އިށީންދެއްޖެއެވެ.

ފަހަތަށް ޖެހުމަށް މިޝަލް މަސައްކަތްކުރަންފެށިނަމަވެސް ސިބްޢަތުﷲ ގެ ދެއަތުން މިޝަލްގެ ދެއަތުގައި ހިފަހެއްޓިއެވެ. އެއަށްފަހު އޭނާއާއި ދިމާއަށް މިޝަލްގެ ހަށިގަނޑު ގެންނަން ފެށިއެވެ. މިޝަލް އަޑުން އަޑުނަގާފައި ރޯންފެށިއެވެ. ރޮމުން، އާދޭސްކުރަމުން އޭނާ ދޫކޮށްލުމަށް އެދެންފެށިއެވެ.

“ރޮއެފަ ބަހައްޓާ މިޝަލް. އަހަރެން ބޭނުންވަނީ މުޅި މިރޭ ހަތަރުދަމުވެސް މިޝަލް ރޯތަން ދެކެން.” ފޮނިގޮތަކަށް ސިބްޢަތުﷲ ބުންޏެވެ. މިޝަލްގެ ބުރުގާ ދަމައިގަނެ އެއްފަރާތަށް ހޫރާލިއެވެ.

ސިބްޢަތުﷲ ގެ އަމަލުތައް ހުރިގޮތުން މިޝަލް އަށް އިތުރު ހައިރާންކަމެއް ލިބުނެވެ.

“ކޮންމެހެން މާބޮޑަށް ހައިރާންވާނެ ކަމެއްނެތް. އަހަރެން މިއުޅެނީ ކަލޭގެ ރީތިކަމާ، ކަލޭ އަބުރު ވެއްޔާ މޮޑެލަން ހަމަ މިހާރު، މިވަގުތު. މަށާ ދިމާއަށް ކަލެއަށް ކިޔުނުއެއްޗެއްސާމެދު މިރޭ ދެރަވެ ހިތާމަކުރާވަރު ކޮށްލާނަން.” މިހެން ބުނުމާއެކު މިޝަލްގެ ނޭފަތު ކުރީގައި ހިފައި ލަތްކެއް ޖެހިއެވެ. ވީތަދުން މިޝަލް އަށް ހަޅޭއްލަވައިގަނެވުނެވެ.

މިޝަލް ގެ އާދޭހަކަށް، މިޝަލްގެ ރުއިމަކަށް ސިބްޢަތުﷲ ކުޑަނަމަވެސް ސަމާލުކަމެއް ނުދެއެވެ. މިޝަލްގެ ކަރުގައި އޮތް ރަން ފަށުގައި ހިފައި ދަމައިގަންނަމުން ފަށް ކަނޑައިލައިފިއެވެ. ކަންފަތުގައި ލާފައިވާ އެސް ވެސް ނައްޓައިލިއެވެ. މިޝަލްގެ އަތުގައި ހުރި ތަނޑިތަކާއި ކެވެލިތައްވެސް ދަމައިގަތެވެ. ވަމުންދިޔަ ތަދުން މިޝަލް އަށް ހަޅޭއްލެވުން ނޫންކަމެއް ނުކުރެވެއެވެ. އެހެންނަމަވެސް ސިބްޢަތުﷲ ގެ އަމަލުތަކަށް އެއްވެސް ބަދަލެއް ނާދެއެވެ. މިޝަލްގެ ބޮލުގައި ޖަހާފައިވާ ހުޅި ނިއުޅުވައިލައި އިސްތަށިގަނޑު ފަތުރާލިއެވެ. އެދުމައްޗަށް ވައްޓާލައި އަނެއްކާވެސް މިޝަލްގެ ގައިމައްޗަށް އަރައިފިއެވެ. އެވަގުތު މިޝަލް އަށް އިހްސާސް ކުރެވެމުންދިޔައީ  އޭނާއަކީ ޝިކާރަވެރިއެއްގެ އަތްދަށުވެފައިވާ އެއްވެސް ބާރެއް ނެތް ދޫންޏެއް ކަމުގެ ނިކަމެތި އިޙްސާސެވެ.

“ޕްލީޒް.” އަނެއްކާވެސް މިޝަލް އާދޭސްކުރަން ފެށިއެވެ. ނަމަވެސް ސިބްޢަތުﷲ އަކަށް އެއިން އެއްވެސް އަޑެއް ނުއިވެއެވެ. އެނދުގެ ދެފަރާތަށް ފަތުރާލާފައިވާ މިޝަލްގެ އަތްމަތީގައި ސިބްޢަތުﷲ ގެ އަތްތިލަ އަޅައި ބާރުކޮށްލައި މިޝަލްގެ ބޮލާއި ހަމައަށް މިޝަލްގެ ދެއަތް ގެންދިޔައެވެ.

މިޝަލްގެ ކަނދުރާއާއި ދިމާއަށް ސިބްޢަތުﷲ ގުދުވަމުން އޭނާގެ ތުންފަތް ޖައްސައި ބާރުކޮށްލިއެވެ. އެވަގުތު މިޝަލް އަށް ހީވީ ކަނދުރާގައި ހޫނު އެއްޗެއް ޖެއްސިހެންނެވެ. ސިބްޢަތުﷲ ގެ މުށުތެރެއިން ސަލާމަތްވެގެން ދުވެ ރައްކާވާން އޭނާ ކިތަންމެހާވެސް ބޭނުމެވެ. ސިބްޢަތުﷲ ގެ މުށުތެރޭގައި އޮތުން، އޭނާގެ ނޭވާ، އޭނާގެ އެ ބީހިލުން މިޝަލް އަށް ވަނީ ބޮޑު ވޭނަކަށެވެ. އެއްވެސް ރާހަތެއް ނެތް އަނިޔާއަކަށެވެ. އެ ބީހުންތަކުން އިހްސާސް ކުރެވެނީ ސިބްޢަތުﷲ އޭނާދެކެ ކުރާ ނަފުރަތާއި ރުޅިވެރިކަމެވެ. އެހެންނަމަވެސް ކުރާނެ ކަމެއް ނެތެވެ. މިޝަލްގެ ކަނދުރާއާއި ކަންފަތް ދޮށުގައި ސިބްޢަތުﷲ ބޮސްދެމުން ދިޔަޔަސް އެ ބޮސްދިނުމަކީ އޭނާ ފިރިއެއްގެ ފަރާތުން ލިބުމަށް އުއްމީދުކުރި ކަހަލަ ބޮސްދިނުމެއް ނޫނެވެ. ލިބެމުން ދިޔައީ އެއްވެސް އަރާމެއް، ލައްޒަތެއް، ލޯތްބެއް ނެތް ބޮސްދިނުމެކެވެ. އެއީ ރުޅިއާއި އަހުވަދެއްކުމާއި އަނިޔާ އެކުލެވިގެންވާ ބޮސްދިނުމެކެވެ. ސިބްޢަތުﷲގެ ބޯ ތުންފަތް މިޝަލްގެ ކަނދުރާ އާއި ކަރުދޮށުގައި ހާކަމުންދިޔައިރު މިޝަލް އަށް އޮވެވުނީ ފަކުރުން ގޮސް ހޮޑުލަވާގޮތްވެފައެވެ.

“ސިބްތޫ ޕްލީޒް އަހަރެން ދޫކޮށްލާ ހެޔެނުވާނެ.” ހަރަކާތެއް ކޮށްލެވޭތޯ މަސައްކަތް ކުރަމުން މިޝަލް އާދޭސްކުރިއެވެ. އެހެނަސް ސިބްޢަތުﷲ ގެ އަތްދަށުގައި މިޝަލް އަށް އެއްވެސް ހަރަކާތެއް ނުގެނޭވޭވަރަށް، ބާރަށް އޮތީ މިޝަލް ގެ ހަށިގަނޑުގައި ސިބްޢަތުﷲ ހިފަހައްޓާފައެވެ.

މިޝަލް ގެ އާދޭހުން ސިބްޢަތުﷲ އަށް އަރާފައިވާ ފޯރިގަނޑު ހައްތަހާވީ އިތުރެވެ. ދެމުންދިޔަ ބޮސްދިނުން ހުއްޓާލައި މިޝަލް ގެ ކަރުދޮށުގައި ދަތްއަޅަން ފެށިއެވެ. ލޯބިންނެއް ނޫނެވެ. ރުޅިވެރިކަމާ އަނިޔާގެ ދަތްއެޅުންތަކެކެވެ. މިޝަލް އަށް ތަދުކޮށް ރޮއްވުމުގެ އެދުންވެރިކަން ހާސިލްކުރުމުގެ ބޭނުމުގައެވެ. ސިބްޢަތުﷲ ގެ ދެއަތުން މިޝަލްގެ ދެއަތް އެނދާއިލައި ފިއްތާލާފައިވާލެތް ބާރުކަމުން، މިޝަލްގެ އަތުގައި ބާކީހުރި ތަނޑިތަކުގެ ސަބަބުން އަތަށް އަނިޔާވަމުންދިޔައެވެ.

ކުއްލިއަކަށް، ވަރަށް ހުޝިޔާރުކަމާއެކު ސިބްޢަތުﷲ ގެނައި ހަރަކާތަކާއިއެކު މިޝަލް ނަގައި އެނދުމަތީގައި ބޭންދިއެވެ. އެއަށްފަހު މިޝަލްގެ ދެލޮލަށް ވަރަށް ފުން ނަޒަރަކުން ބަލަންފެށިއެވެ.

“މިރޭ ވެގެންދާނީ ވަރަށް ދިގު ރެޔަކަށް.” މިހެން ބުނުމާއެކު މިޝަލް ގެ ހެދުމުގެ ފުރަގަހަށް ސިބްޢަތުﷲ ގެ އަތް ގެންގޮސް ހެދުމުގެ ޒިބު ތިރިއަށް ކަހައިލިއެވެ.

މިޝަލް ގެ ދެލޯ ބޮޑުވެގެންދިޔަ އެވެ. ސިބްޢަތުﷲ ފަހަތަށް ކޮއްޕާލެވޭތޯވެސް މިޝަލް މަސައްކަތް ކުރިއެވެ. ނަމަވެސް ސިބްޢަތުﷲ އަކީ އެއަށްވުރެން މާވަރުގަދަ މީހެކެވެ. މިޝަލްގެ ހެދުން ބާލުވައިލައި އެއްފަރާތަށް ހޫރާލުމަށްފަހު އޭނާގެ މޫނުމަތީގައި ބާރު އެތިފަހަރެއް ސިބްޢަތުﷲ ގެ އަތަށް ލެވުނުހައި ބާރެއްލާފައި އަޅުވައިލިއެވެ. މިފަހަރު މިޝަލްގެ އަނގައިން ފަނޑުފަނޑު އާހެއް ބޭރުވުން ފިޔަވައި އެހެން އަޑެއް ނުއިވެއެވެ. ސިބްޢަތުﷲ ލައިގެން އިން ސޯޓު ބާލައި ހޫރާލަމުން ކޮޓަރީގެ ބޮކި ނިއްވައިލިއެވެ.

މުޅި އެރޭ ހަތަރުދަން މިޝަލް އަށް ހޭދަކުރަން ޖެހުނީ ރުއިމުގައެވެ. ސިބްޢަތުﷲ ގެ މުށުތެރޭގައި އޮވެއެވެ. ބަލިކަށި، ގޮތެއް ނެތް، ކަސްބީ އަންހެނަކަށްވުރެންވެސް ދެރަ ނިކަމެތި ހާލެއްގައެވެ. ސިބްއަތުﷲ ގެ ހަށިގަނޑުން ނިކުންނަމުންދިޔަ ގިނި ހޫނުކަން މިޝަލް އަށް އިހްސާސްކުރެވެމުން ދިޔައީ އެއްވެސް ފޮނި ރާހަތެއް ނެތިއެވެ. އަރާމެއް ނެތިއެވެ. ސިބްޢަތުﷲ ގެ ހަށިގަނޑުން ކޮށްލާ ކޮންމެ ހަރަކާތަކީ ދޮންދަގަނޑެއް މިޝަލްގެ ގަޔަށް ހެރިގެން ދިޔުންފަދަ ކަމެކެވެ. މިނިކާ ޖަނަވާރެއް ފަދައިން މިޝަލްގެ ހަށިގަނޑު ސިބްޢަތުﷲ ނޮޅައި ވީދަމުން، ހަލާކުކުރަމުން، ޖިސްމާނީ އަދި ނަފުސާނީ ޒަޚަމްތައް ދެމުންދިޔައީ ހަމައެކަނި އެންމެ ސަބަބަކަށް ޓަކައެވެ. ސިބްޢަތުﷲ ގެ އެބުނާ ‘އީގޯ’ އަށް ފުދޭވަރު ކޮށްދިނުމަށެވެ.

★★★

ގައިގެ އެތަން މިތަނުގައި އަޅަމުންދާ ވޭނުގައި ކުކުރަމުން ގިސްލަމުންވެސް މިޝަލް އަށް އޮންނަން ޖެހުނީ ސިބްޢަތުﷲ ކައިރީގައެވެ. ސިބްޢަތުﷲ އަށް ނިދުނުފަހުން މިޝަލް އަނެއްފަރާތަށް އެނބުރިގެން އޮވެ އަމިއްލަ ހާލާއި މެދު އެތައް އިރަކު ވިސްނައި ކަރުނަ އޮހޮރިއެވެ. އެހެން އޮވެއޮވެފައި އޭނާ ސިބްޢަތުﷲ އޮތް ފަރާތަށް އެނބުރި ސިބްޢަތުﷲ އަށް ބަލަން ފެށިއެވެ. އޭނާގެ މުޅި ދިރިއުޅުން ހަލާކުކޮށްލުމަށްފަހު އަރާމު ނިންޖެއްގައި ސިބްޢަތުﷲ އެއޮތީ ގުގުރިދަމާފައި ނިދާށެވެ.

މިޝަލް އޭނާގެ ހަފުސްވެފައިވާ ހަށިގަނޑާއި ނަފުސާއި އެކުގައި މަޑުމަޑުން އެނދުން ތެދުވެއްޖެ އެވެ. ބެޑްޝީޓެއް ގައިގައި އޮޅާލަމުން ސިބްޢަތުﷲ އޮތް އެނދާއި ވީހައިވެސް ދުރަކަށް ހިނގައިގަތެވެ. ތަންކޮޅަކަށް ދެވުނުއިރަށް ގައިގައި އެއްވެސް ވަރެއް ނެތުމުން ވެއްޓިއްޖެއެވެ. ބިއްލޫރިން ހަދާފައިވާ ބިތްގަނޑުގެ ކުރިމައްޗަށެވެ. އޭރުވެސް ބޯކޮށް ވާރޭވެހެމުންދެއެވެ. އެއްވެސް ހިފެހެއްޓުމެއް ނެތި އުޑުމަތީގައި ކަޅު ވިލާތަކުން ވާރޭގެ ތިކިތަކެއްގެ ގޮތުގައި ފެން އޮހެމުންދާފަދައިން މިޝަލް ގެ ލޮލުންވެސް އެއްވެސް ހިފެހެއްޓުމެއްނެތި ކަރުނައިގެ ސައިލެއް އޮހޮރެން ފަށައިފިއެވެ.

“ޔާﷲ…. މިއަޅާގެ އަށް ތިޔަ ކުރިމަތިކުރައްވަވަނީ ކޮންފަދަ ބޮޑު އިމްތިހާނެއްތޯ އެވެ؟” އުޑުމައްޗަށް ބަލަން އިނދެފައި ތަޅުންމައްޗަށް މިޝަލް ވެއްޓިގަންނަމުން އިލާހުވަންތަ ރަސްކަލާންގެއަށް ދަންނަވަން ފެށިއެވެ.

މިޝަލް ގެ ހުރިހައި އެއްޗެއް ގެއްލުނީ އެވެ. ކައިވެނި ކުރެވުނީ ލޯބިނުވާ މީހަކާއެވެ. އެމީހާ މިޝަލްގެ އަބުރާއި ޝަރަފާއި ޤަދަރުވެސް ވެއްޔާ މޮޑެލައިފިއެވެ. އެ ނުލަފާ މީހާއަށްޓަކައި އޭނާގެ ހުރިހައި އެއްޗެއް ގެއްލިއްޖެއެވެ. ފުން ނިންޖެއްގައި އޮތް ސިބްޢަތުﷲ އަށް އަނެއްކާވެސް މިޝަލް ބަލަންފެށިއެވެ. ސިބްޢަތުﷲ އެއޮތީ މިޝަލް ގެ ހިތާއި ރޫހް އެތަކެއް އެތިކޮޅު ތަކަކަށް ކުދުކުދި ކޮށްލުމަށްފަހު ނިދާށެވެ. މިޝަލް ދެލޯ މަރައިލިއެވެ. ހުރިހައި ހަރުކަށިކަމެއް، ހުރިހައި ހިނދުކޮޅުތަކެއް އަނެއްކާވެސް އޭނާގެ ލޮލަށް ސިފަވާން ފަށައިފިއެވެ. އޭނާގެ ކައިވެނީގެ ފުރަތަމަ ރޭ، އަލަތު ފިރިމީހާގެ ފަރާތުން ލިބުނު ހިތްދަތި އަނިޔާތަކެވެ. މީގެ އިރުކޮޅެއްކުރިން ހިނގި ކަމެއްނަމަވެސް އަނެއްކާވެސް އެ މަންޒަރުތައް ޚިޔާލުގެ ފީތާފަށުން ދައްކަން ފެށުމާއެކު މިޝަލް އަށް އިތުރު ހިތްދަތިތަކެއް ލިބެމުންދިޔައެވެ.

***~~~***

އާދުވަހަކަށް އިރުއެރީ މިޝަލް އަށް ކިތަންމެހާވެސް ދިގު ރެޔަކަށް ފަހުގައެވެ. ނަމަވެސް ސިބްޢަތުﷲ އެއީ ހަމަ އާދައިގެ ރެޔެކެވެ. އަރާމު ނިންޖަކުން ހޭލެވުމުން ސިބްޢަތުﷲ އަވަސްވެގަތީ ފެންވަރައި ތާހިރުވުމަށެވެ. ފެންވަރައިގެން ނިކުތްއިރު ސިބްޢަތުﷲ ހުރީ ވަރަށް ހަމަޖެހިލާފައެވެ. މިޝަލް ލިބުމުން އޭނާއަށް އެ ހުރެވެނީ ލައްކަ އުފާވެރިކަމަކާ ފޮނިކަމެއް ލިބިފައެވެ. އޭރު މިޝަލް ވެސް ފެންވަރައިގެން ނިކުމެ އޭނާގެ ތެތް އިސްތަށިގަނޑުގައި ފުނާއަޅަން ހުރީ ލޯގަނޑު ކުރިމަތީގައެވެ. ލައިގެން ހުރީ ރަތްކުލައިގެ ހެދުމެކެވެ. މިޝަލް ގެ ތެތް އިސްތަށިގަނޑު ކޮނޑުމައްޗަށް ވައްޓާލާފައި އޮތެވެ. މިޝަލްގެ ލޮލުން ފެންނަނީ ރޭ ހަތަރުދަމު ރުއިކަމުގެ ނިޝާނެވެ. ދެލޯ ހުރީ ރަތްވެފައެވެ. ދުޅަވެފައެވެ. ފުނާއަޅައި ނިމިގެން އާދައިގެ ބުރުގާއެއް ބޮލަށް ވައްޓައިލަމުން ހިނގައިގަތެވެ. އޭރު ސިބްޢަތުﷲ އޭނާ އާއި ދިމާއަށް އަންނަކަން ހަމަ ރަނގަޅަށްވެސް މިޝަލް އަށް އެނގުނެވެ. އެހެންނަމަވެސް އަޅައިވެސް ނުލާ ނިކުންނަން ހިނގައިގަތެވެ.

“ގުޑް މޯރނިން ސިބްޢަތުﷲ ގެ އަނބި ގޮއްޔޭ.” ސަމާސާ މޫޑެއްގައި ސިބްޢަތުﷲ ބުންޏެވެ. މިޝަލް އަނގައިންވެސް ނުބުނެއެވެ.

“ބޮޑުދައިތަ އެބަހުއްޓޯ އަހަރުންގެ އިންތިޒާރުގަ.” ކޮންމެހެން ބުނަން ޖެހޭ ވާހަކައެއް ކަމުން މިޝަލް ބުންޏެވެ. ސިބްޢަތުﷲ އަށް ހުރެވުނީ ހައިރާންވެފައެވެ.

ސިބްޢަތުﷲ އާއި ދިމާއަށް މިޝަލް ބަލައިލިއެވެ. ސިބްޢަތުﷲ ގެ ދެލޮލަށެވެ. ސިބްޢަތުﷲ ހުއްޓިގެން ހުރީ މިޝަލްގެ ކުރިމަތީގައި ހުސްގަޔާ އެވެ. ރޭގައިވެސް ދެއްކި ބިރު މިޝަލް އަށް އޭނާ ދައްކަން ބޭނުންވާތީ އެވެ. ނަމަވެސް މިޝަލް ގެ މޫނުމަތިން އެއްވެސް އަސަރެއް ނުފެނުނެވެ.

“ކަލޭގެ މަންމަ އައި އަހަރުމެން ތިރިއަށް ނުގޮސްގެން ގޮވަން.” އަނެއްކާވެސް މިޝަލް ވާހަކަދެއްކިއެވެ. ޑްރެސިންގ ޓޭބަލް ކައިރިއަށް ގޮސް ތުންފަތުގައި ލިޕް ގްލޮސް ކޮޅެއް ހާކަން ފެށިއެވެ. ތުންފަތުގައި ލިޕް ގްލޮސް ހާކަމުން އޭނާ އަނެއްކާވެސް ސިބްޢަތުﷲ އާއި ދިމާއަށް އެނބުރުނެވެ. އޭރުވެސް ސިބްޢަތުﷲ ހުރި ފިޔަވަޅު މަތީގައި ހުރީއެވެ. މިޝަލް އެނބުރިލުމުން ސިބްޢަތުﷲ އޭނާ އާއި ކައިރިއަށް ޖެހިލިއެވެ. ވަރަށް ބާރަށް މިޝަލްގެ ދެއަތުގައި ހިފެހެއްޓިއެވެ. ވީތަދުން މިޝަލް ގެ އަނގައިން ވައި އަޑެއް ބޭރުވިއެވެ. ތަނޑިތަކުން އޭނާގެ އަތުގައި ރޭގައި ލާފައިހުރި ޒަޚަމް ތަކަށް މިޝަލް އަށް ބަލައިލެވުނެވެ.

“ކަލޭ ކޮންކަމެއް ސާބިތުކުރަން ތިއުޅެނީ؟ ތީ ކޮންހާ ކަންތައްގަނޑެއް؟” މިޝަލް ގެ މޭކަޕާއި ލައިގެންހުރި ހެދުމަށް އިޝާރާތް ކޮށްލަމުން ސިބްޢަތުﷲ ބުންޏެވެ.

“އެއްވެސް ކަމެއް ސާބިތުކުރާކަށް ނޫޅެން. އަހަރުމެން ނުގޮސްގެން މިހާރު އެމީހުން ލަސްވެގެން އުޅޭނެ.” ޖަވާބުދެމުން މިޝަލްގެ އަތް ފޮޅުވައިލިއެވެ.

“އަލަމާރިގަ ހުންނާނެ ކަލޭގެ ގަމީހާ ފަޓުލޫނު ތައްޔާރުކޮށްފަ. ދެން ދޭބަލަ އެއްޗެހި ބަދަލުކޮށްލަން.” ކޮޓަރިން ނިކުންނަމުން ވަރަށް އާދައިގެ ގޮތަކަށް މިޝަލް ބުންޏެވެ. ސިބްޢަތުﷲ އަށް ހުރެވުނީ ބުނާނެ އެއްޗެއް ނޭނގި ހައިރާންވެފައެވެ.

މިޝަލް ނިކުމެގެން ދިޔައިރުވެސް ސިބްޢަތުﷲ އަށް ހުރި ފިޔަވަޅުމަތީގައި ކޮޅަށް ހުރެވުނީއެވެ. މިޝަލް އަށް އެ އައި ބަދަލު އޭނާއަށް ޤަބޫލުކުރަން ދައްޗެވެ. އޭނާ ބޭނުންވީ ނިކަމެތިވެފައިވާ މިޝަލް އެއް ދެކޭށެވެ. ގޮސް ހުސްވެފައިވާ މިޝަލް އެއް ދެކޭށެވެ. ރޭގައި މިޝަލް އަށް އެހާވަރެއް ކޮށްލީވެސް އެބޭނުމުގައެވެ. އެކަމަކު މިއަދު މި ފެނިގެން ދިޔައީ ވަރަށް ހަމަޖެހިލައިގެން ހުރި މިޝަލް އެކެވެ. ގޮތްހުސްވެފައިވާ މިޝަލް އެއް ނޫނެވެ. އޭނާ ބޭނުންވީ މިޝަލްގެ ލޮލުން މިއަދުވެސް ކަރުނަ ފެންނާށެވެ. އެކަމަކު މިޝަލްގެ ލޮލުން ކަރުނައި އެންމެ ނީރުމެއްވެސް ފެންނާކަށް ނެތެވެ.

އަލަމާރި ކައިރިއަށް ގޮސް ދޮރުހުޅުވާފައި ބަލައިލިއިރު އޭނާއަށް އެންމެ ކަމުދާ ގަމީހާއި ފަޓުލޫނު ނުލާހިކު ރީތިކޮށް އިސްތިރިކޮށްފައި އޮތެވެ. އޭނާގެ ހުދު ގަމީހާއި ކަޅު ފަޓުލޫނެވެ. އެއްޗެހި ބަދަލުކޮށްލައި ބޮލުގައި ފުނާއަޅައި ތައްޔާރުވެލިއެވެ. އޭރު އޭނާގެ ސިކުނޑިތެރޭގައި އުފެދިފައިވާ ހައިޖާނުގަނޑުވެސް ކޮންމެވެސް ވަރަކަށް މައިތިރިވެއްޖެ އެވެ.

***~~~***

ދުވަސްތައް ހޭދަވަމުންގޮސް މިޝަލް އާއި ސިބްޢަތުﷲ ގެ ކައިވެންޏެއް މަސްދުވަސް ފާއިތުވެއްޖެއެވެ. ހުރިހައި ކަމެއްވެސް ކުރިއަށްދިޔައީ ހަމަ އާދައިގެ ގޮތަކަށެވެ. ދެމީހުންވެސް ދިރިއުޅެމުން ދިޔައީ އެއް ކޮޓައިއެއްގައި އެހެނަސް ދުރުގައެވެ. ކައިވެނީގެ ފުރަތަމަ ރޭގެ ފަހުން މިޝަލް އާއި ގައިގޯޅިވުމަކަށް ސިބްޢަތުﷲ މަސައްކަތެއް ނުކުރެއެވެ. އެދުވަހަށްފަހުން އޭނާ މިޝަލް އާއި ދިމާއަށް ބަލައިވެސް ނުލައެވެ. ދެމީހުންނަކީވެސް ބީރައްޓެހި ޙަޔާތުގެ ދެބައިވެރީންނެވެ.

ކައިވެނީގެ ފުރަތަމަ ރެޔަށްފަހު އެކަކުވެސް އަނެކަކާއި ކައިރިވާކަށް އަދި ވާހަކަ ދައްކާކަށްވެސް ނޫޅެއެވެ. ދެމީހުންވެސް އެމީހުންގެ މަޤާމުގައި ތިބީ ހަނުއެވެ. ހިތުތެރޭގައި އެތަކެއް ހާސް ޝުޢޫރުތަކަކާއި އުދާސްތަކެއް ފޮރުވައިގެންނެވެ. މިޝަލްގެ ހަނުހުރުން ސިބްޢަތުﷲ އަށް އުނދަގޫކުރަމުން ދިޔައީ އިންތިހާއަށެވެ. މިޝަލް އޭނާ އާއި ވާހަކަދެއްކުމަށް ސިބްޢަތުﷲ ގެ ހިތް އެދެމުންދެއެވެ. އޭނާއާއި ޒުވާބުކޮށް އަރައިރުންވުމަށް އެދެއެވެ. އެހެނަސް މިޝަލްގެ މިޒާޖުން ފެންނަމުންދަނީ އާދަޔާޚިލާފް ހަނުކަމެކެވެ.

***~~~***

ސިބްޢަތުﷲ ކޮޓަރީގެ ދޮރު ހުޅުވައިލިއިރު މިޝަލް ހުރީ ތައްޔާރުވާށެވެ. އޭނާ ލައިގެން ހުރީ ފައިގެ ތަނބިކަށްޓާއި ހަމައަށް ފޯރާވަރުގެ މަޑުފެހިކުލައިގެ ދިގު ފްރޮކެކެވެ. މިޝަލްގެ ކޮންމެ ހަރަކާތަކަށް ބަލަން ސިބްޢަތުﷲ އަށް ހުރި ފިޔަވަޅުމަތީގައި ހުރެވުނީއެވެ. މިޝަލް ބުރުގާ އަޅައި ނިމިގެން އަތުގައި ކެވެލިކޮޅާއި ގަޑި އެޅިއެވެ. ކަރުގައި ރިހިފަށެއް އަޅައި ބުރުގާ  ތެރެއަށް ލިއެވެ. ބޫޓަށް އެރުމަށް އެނބުރިލި ވަގުތު މިޝަލް އަށް ސިބްޢަތުﷲ ފެނުނެވެ. މިޝަލްގެ ކޮންމެ ހަރަކާތަށް ނަޒަރު ހިންގަމުން ދިޔަ ސިބްޢަތުﷲ ގެ ބެލުން އެހެން ދިމާއަކަށް އަވަސް އަވަހަށް އަނބުރާލަމުން އެތެރެއަށް ވަންނަން ހިނގައިގަތެވެ.

“އެބަހުރިން ދޯ؟” ވަރަށް މަޑުމަޑުން މިޝަލް ބުންޏެވެ.

“ހޫމް” ޖަވާބުދެމުން ސިބްޢަތުﷲ ބޫޓު ބާލަން ފެށިއެވެ.

“އަލަމާރީގަ ހުންނާނެ ސިބްޢަތުﷲ ލާންވީ އެއްޗެހި ތައްޔާރުކޮށްފަ. އަހަރެން މިދަނީ ތިރިއަށްދާން. ނިޝާ އިންނާނެ އަހަރެން ނުގޮސްގެން މިހާރު.” މިޝަލް މިހެން ބުނަމުން ކޮޓަރިން ނިކުންނަން ހިނގައިގަތެވެ. ނަމަވެސް އެވަގުތު މިޝަލް ގެ އަތުގައި ސިބްޢަތުﷲ ހިފަމުން އޭނާއާއި ކައިރިއަށް ދަމައިގަތެވެ.

ސިބްޢަތުﷲ އާއި ކައިރިއަށް މިޝަލް ގެނެސް ގައިގައި ޖައްސާލަމުން މިޝަލް ގެ އުނަގަނޑުގައި ދެއަތުން ހިފަހައްޓައިލިއެވެ. އެވަގުތު މިޝަލް އަށް ލިބުނު ހައިރާންކަމުގައި ދެލޯ ބޮޑުކޮށްލެވުނެވެ. ވޭތުވެދިޔަ މަސްދުވަހު ސިބްޢަތުﷲ ގެ ފަރާތުން މިފަދަ ހަރަކާތެއް ފެނިފައެއް ނުވެއެވެ. މިޝަލް ގެ ގައިގައި އިނގިލިކުރި ޖައްސާލާފަވެސް ނުވެއެވެ. އެހެންކަމުން މިޝަލް އަށް ލިބުނީ ކުއްލި ބިރުވެރިކަމެކެވެ. މިޝަލްގެ އުޖާލާ މޫނަށް ބަލައިލަމުން ސިބްޢަތުﷲ ކަރުކެހިލިއެވެ.

“ކީއްކުރަން ކަލޭ ކުރާކަމެއް ތީ؟ ކޮން ކަމަކަށް މާވަރަކަށް ނަލަ ތިހެދެނީ؟” މިޝަލް ލައިގެން ހުރި ހެދުމާއި ކޮށްގެން ހުރި މޭކަޕަށް އިޝާރާތް ކޮށްލަމުން ސިބްޢަތުﷲ ސުވާލުކުރިއެވެ.

“ކަލޭ ކާކަށް ތިއްތި ދައްކައިގެން މާ ސަޅިކަމެއް ދައްކަން ތިއުޅެނީ. ބަލަ އަހަރެން ބުނެފީމެއްނު ތީކީ މާކަ ރީތިމީހެއް ނޫނޭ.” ސިބްޢަތުﷲ ބުންޏެވެ. އެވަގުތު ސިބްޢަތުﷲ ދުރަށް ކޮށްޕައިލަމުން ސިބްޢަތުﷲ ގެ އަތްދަށުން މިޝަލް ސަލާމަތްވިއެވެ.

“މަށަށް އެނގޭ މަށަކީ ރީތި މީހެއް ނޫންކަން. އެހެން ނޫނަސް އަހަރެން މި ރީތިވީކީ ކަލެއަށް ދެއްކޭކަށް ނޫން.” މިޝަލް ލައިގެން ހުރި ހެދުމަށް އިޝާރާތް ކޮށްލަމުން ސިބްޢަތުﷲ އަށް ރައްދުދެމުން ކޮޓަރިން ނިކުމެއްޖެ އެވެ.

މިޝަލް ދިއުމުން ސިބްޢަތުﷲ ހީނލިއެވެ. ނަމަވެސް އިރުކޮޅެއްގެ ތެރޭގައި އެ ހިނިތުންވުން ފަނޑުވެގެން ހިނގައްޖެއެވެ. ފުން ނޭވައެއް ދޫކޮށްލަމުން ފާޚާނާއަށް ވަދެ ބޯ ތެންމާލައިގެން ނިކުމެ އެއްޗެހި ބަދަލުކޮށްލިއެވެ.

މިއަދަކީ ސިބްޢަތުﷲ މޫނު ކުނިކޮށްގެން ހުންނަން ބޭނުންވާ ދުވަހެއް ނޫނެވެ. މިއަދަކީ އޭނާގެ ކޮއްކޮ ނިޝާގެ ކައިވެނީގެ ކުރިން ބާއްވާ ކުޑަކުޑަ ހަފުލާއެއް އޮންނަ ދުވަހެކެވެ. ހުރިހައި ތައްޔާރީތަކެއް މިހާރުވަނީ ކޮށް ނިމިފައެވެ. އެމީހުންގެ ބޮޑު ގެއާއި ގޯތިތެރެ އޮތީ ކުލަބޮކިން ޖަރީކޮށްފައެވެ. ހުރިހައި އެންމެންގެ މޫނުމަތިންވެސް ފެންނަމުން ދަނީ އުފާވެރިކަމުގެ ހިނިތުންވުމެވެ. ނިޝާ ގެ ކައިވެނީގެ ކަންތައްތައް ހަމަޖެހުމުން އެންމެންވެސް ތިބީ އުފަލުންނެވެ. ވޭތުވެދިޔަ އެއްމަސް ތެރޭގައި މިޝަލް ވަނީ ސިބްޢަތުﷲ ގެ ޢާއިލާ ގެ ދިރިއުޅުމަށް ހޭނިފައެވެ. މިހާރު މިޝަލް ގެ އުޅުމާއި ގެވެހިކަން ހުންނަގޮތުން ހީވަނީ ހަމަ އެއާއިލާގެ އަސްލު މެންބަރެއް ހެންނެވެ. އެހެންނަމަވެސް މިޝަލް އަށް އަދިވެސް ހުރެވެނީ ނެގިމަޑުވެފައެވެ. ވިސްނުމެއްގެ ތެރެއަށް ގެއްލެވިފައެވެ. އެއްމަސް ކުރިން ސިބްޢަތުﷲ ގެ އާއިލާ އާއި ބައްދަލުކުރި އަނގަގަދަ، ސަކަ މިޒާޖުގެ މިޝަލްއެއް އަދިވެސް ނުފެނެއެވެ. މިޝަލްގެ ހިނިތުންވުން، މިޝަލްގެ އަޑާއި ކުރިންހުރި ލާނެތްކަމެއް މިހާރަކު ނެތެވެ. އެއްވެސް ކަމެއް ކުރިއަކާއި އެއްގޮތެއް ނޫނެވެ. މިޝަލްގެ ގެއްލިފައިވާ ‘ފަރާތް’ ދުށުމަށް އެންމެންވެސް ބޭނުންވެއެވެ. އެކަމަކު ސިބްޢަތުﷲ ފިޔަވައެވެ.

“އާޗާ.. ފަހަރި ހާދަ ސަޅިއޭ.” މިޝަލް ފެނުމުން ނިޝާ ގޮވައިލިއެވެ. މިޝަލް އާއި ދެބެންގެދެދަރި ހުރިހައި ކުދިންވެސް މިޝަލް އަށް މުޚާޠަބު ކުރަނީ ފަހަރި ކިޔާފައެވެ.

ނިޝާގެ ތަޢުރީފަށް މިޝަލް ހިނިތުންވެލަމުން ނިޝާ ތައްޔާރުކުރަން ފެށިއެވެ. މިޝަލްގެ ދެބެންގެދެދަރި އަންހެން ކުދިންތައްވެސް އެ ކޮޓަރީގައި ތިއްބެވެ. ހުރިހައި އަންހެން ކުދިންގެ މޫނުމަތިންވެސް ފެންނަނީ އުފާވެރިކަމެވެ. މުޅި ގޭތެރެ ވަނީ ހުނުމާއި އުފާވެރިކަމުގެ ބަސްތަކުން ފުރިފައެވެ. ނިޝާ ތައްޔާރުކޮށް ނިމުމުން ހުރިހައި އަންހެންކުދިންތައް ނިޝާ ގޮވައިގެން ތިރިއަށް ދިޔައެވެ. ސިޓިން ރޫމްގައި ތިބީ ހަމައެކަނި އާއިލާގެ މެންބަރުންނާއި ނިޝާގެ ވާންއުޅޭ ފިރިމީހާގެ އާއިލާ މެންބަރުންނެވެ. ނިޝާ ގެ އާއިލާ އިން ބޭނުން ނުވިޔަސް ނިޝާގެ ވާންއުޅޭ ފިރިމީހާގެ އާއިލާއިން ބޭނުންވީ އެންގޭޖްމެންޓް ހަފުލާއެއް ބާއްވާށެވެ. ޒަމާނީ ވިސްނުމަށް ތާއިދު ނުކުރިޔަސް ސިބްޢަތުﷲ އާއި އެއްބަނޑު އެއްބަފާ އަންހެން ކޮއްކޮގެ އުފަލަށްޓަކައި އެމީހުން އެކަމާ އެއްބަސް ވީއެވެ. އެހެންނޫނީ މިއީކީ ދީނީ ހަރުކަށި ސިޔާސަތެއް ގެންގުޅޭ އެ އާއިލާ އެއްގޮތަކަށްވެސް ރުހޭ ކަމެއް ނޫނެވެ.

ސިޓިންގރޫމަށް ވަނުމާއެކު މިޝަލްގެ ލޮލުގައި އަޅައިގަތީ ސިބްޢަތުﷲ އެވެ. ސިބްޢަތުﷲ ލައިގެންހުރި އަތްދިގު ގަމީހާއި ފަޓުލޫނު އޭނާއާއި ގުޅޭލެތް ބޮޑުކަމުން ސިބްޢަތުﷲ ޗާލުކަމާއި ސްމާޓްކަން މިޝަލް އަށް ފާހަގަކުރެވުނެވެ. ސިބްޢަތުﷲ އަށް މިޝަލް ބަލައިލި ވަގުތު ކޮންމެވެސް ކަމަކާ ސިބްޢަތުﷲ ހިނިތުންވެލިއެވެ. އެވަގުތު މިޝަލްއަށް އިސްޖަހައިލެވުނެވެ. ނިޝާ ގެންގޮސް ސޯފާގައި ބޭންދުމާއެކު އާއިލާގެ އަންހެނަކު އައިސް އެންގޭޖްމެންޓް ހަފުލާ ފެށިއެވެ. ނިޝާގެ އިނގިލީގައި އަނގޮޓި އަޅުވައިލުމާއެކު އެންމެންގެ އަތްތިލަބަޑިން މުޅި ސިޓިންގރޫމް ގުގުމާލި ކަހަލައެވެ. ސިބްޢަތުﷲ އާއި މިޝަލް ވެސް އަތްޖަހަމުން އެކަކު އަނެކަކަށް ހިތްގައިމު ހިނިތުންވުމެއް ދިނެވެ. ދެމީހުންނަށް އެކަކު އަނެކަކަށް ރަނގަޅަށް ބަލައިލެވުމާއިއެކު ޖަހަމުންދިޔަ އަތްތިލަބަޑި އަށް ހިނދުކޮޅަކަށް ނަމަވެސް ހުއްޓުމެއްއައި ކަހަލައެވެ.

“ފަހަރީ.” ސިބްޢަތުﷲ ގެ އަނެއް އަންހެން ކޮއްކޮ ނީޝާ ގެ އަޑަށް މިޝަލް އަށް ހޭވެރިކަން ވެއްޖެއެވެ.

ނީޝާ އާއި ދިމާއަށް އެނބުރިލަމުން ނީޝާ އާއެކު މިޝަލްވެސް ހިނގައިގަތެވެ. ރިފްރެޝްމެންޓުގެ ކަންތައްތަކައިގެން މަސްޢޫލުވުމަށެވެ. މިޝަލް އަށް މިހާރު ކުރެވެމުން އެދަނީ ކޮންފަދަ އިހްސާސެއްކަން ޚުދު އޭނާއަށްވެސް ނޭނގެއެވެ. އެ އުފާވެރި މަހެފިލްގައި ހުރިއިރުވެސް އިރުއިރުކޮޅުން މިޝަލްގެ ދެލޮލުން ކަރުނަ ފޫއްދާލައެވެ.

“ފަހަރީ …. އަނެއްކާ އޯކޭތަ؟” މިޝަލް ހުރިގޮތް ފެނިފައި ނީޝާ އަށް އަހައިލެވުނެވެ. އެވަގުތު މިޝަލްގެ ކަރުނުން ފުރެން ކައިރިވެފައިވާ ދެލޯ ފޮހެލަމުން އާނއެކޭ ބުނުމަށް ބޯޖަހައިލި އެވެ.

‘ކަލޭ އެއްވެސް ރީއްޗެއް ނޫން.’

ސިބްޢަތުﷲ ގެ މި ޖުމްލަ މިޝަލްގެ ކަންފަތްދޮށުގައި ގުގުމަންފެށިއެވެ. މިއީ ސިބްޢަތުﷲ އެހެން ބުނުމުން މިޝަލް ދެރަވި ފުރަތަމަ ފަހަރެވެ. ވޭތިވެދިޔަ މަސްދުވަސް ތެރޭގައި ސިބްޢަތުﷲ ގެ އަނގައިން މި ޖުމްލަ އެތައް ފަހަރަކު ބޭރުވި އަޑު އޭނާއަށް ވަނީ އިވިފައެވެ. އެހެންނަމަވެސް މިފަހަރު ނޫނީ އެކަމާ މިޝަލް ހިތުގައެއް ނުޖެހެއެވެ. ދެރައެއް ނުވެއެވެ. އެކަމަކު މިއަދު މިވަނީ ކިހިނެތްކަން ޚުދު އޭނާއަށްވެސް ނޭނގެއެވެ. ތަށިތަށްޓަށް ހެދިކާ އަޅަން ހުރި ނީޝާ އާއި ދިމާއަށް މިޝަލް އެނބުރުނެވެ.

“އޫމް….ނީޝް.” ނީޝާ އަށް މިޝަލް ގޮވައިލިއެވެ. ނީޝާ އަވަސް އަވަހަށް އޭނާގެ ފަހަރިއާއި ދިމާއަށް އެނބުރުނުވެ.

“އަހަރެން…. އަހަރެން އެއްޗެއް އަހައިލަންތަ؟” މިޝަލް ހުއްދައަށް އެދުނެވެ.

“އައްދޭ… ފަހަރި ކޮންމެހެން ހުއްދަ ހޯދަން ޖެހޭތަ؟ ތި އަހަން އުޅޭ އެއްޗެއް އަހާބަލަ ދެންވެސް.” މިޝަލް އާއި ދިމާކޮށްލަމުން މަޖާ ގޮތަކަށް ނީޝާ ޖަވާބުދިނެވެ.

“އަހަރެން….. އަހަރެން….. އަޅެ އަހަރެން މީ ހުތުރު މީހެއްތަ؟” ވަރަށް އުނދަގުލުން މިޝަލް ގެ ހިތަށް އުނދަގޫ ކުރަމުންދިޔަ ސުވާލު ބޭރުކޮށްލިއެވެ. އެވަގުތު ނީޝާގެ ހިނިގަނޑު ފަޅައިގެންގޮސް ބާރަށް ހޭންފެށިއެވެ. ނީޝާ ހޭންފެށުމުން މިޝަލް ގަތީ ބިރެވެ.

“ރީތިހޭ!!؟؟” ހެމުންހެމުން ނީޝާ ވެސް ކުރީ ސުވާލެކެވެ.

ސިބްޢަތުﷲ ގެ ވިހަ ބަސްތައް އަނެއްކާވެސް މިޝަލްގެ ސިކުނޑީގައި ޓަކިދޭންފެށިއެވެ. ނީޝާ ގެ ހުނުމުންވެސް ދޭހަވަނީ ސިބްޢަތުﷲ އެބުނަނީ ތެދުވާހަކައެއް ކަމަށް މިޝަލް އަށް އިތުރަށް ޤަބޫލުކުރެވުނެވެ.

‘އާނއެކެވެ. އަހަންނަކީ ރީތި މީހެއް ނޫނެވެ.’ މިޝަލްގެ ހިތަށް މިހެން އެރުމާއެކު އަނެއްކާވެސް ކަރުނައިން ދެލޯ ފުރިއްޖެއެވެ.

” ‘ރީތި’ މި ލަފުޒަކީވެސް ފަހަރިގެ ކުރިމަތީގަ ހަމައެކަނި ބުނެލެވޭ އާދައިގެ ލަފުޒެއް. ފަހަރި ތީ ރީތީގެ ރާނީއެއްފަދަ ސަޅި ފަހަރިއެއް.” މިޝަލްގެ ގައިގައި ބައްދާލަމުން ނީޝާ ބުންޏެވެ.

ހަމެޖެހުމުގެ ނޭވައެއް މިޝަލް އަށް ލެވުނެވެ. މޫނުމައްޗަށް އުފާވެރިކަމުގެ ހިނިތުންވުމެއް ވެރިވިއެވެ. އުފަލުންހުރެ އެތަނުން ނިކުމެގެން ހިނގައްޖެއެވެ. މިޝަލް ގެ ރީތިކަމާމެދު ނީޝާ ތަޢުރީފުކުރިފަހުން އޭނާއަށް ހުރެވުނީ ހިނިތުންވެވިފައެވެ. މާމައަށް ހެދިކާއާއި ޖޫސް ގެންގޮސްދިނުމަށް ދަނިކޮށް އެދިމާއަށް ސިބްޢަތުﷲ އަންނަތަން ފެނުނެވެ.

“ބަދިގެފަރާތަށް ހިނގާބަލަ މަށަށް ކާއެއްޗެއްދޭން. މިހާ ބޮޑު ކްރައުޑެއް އޮއްވާ މަށަށް ވަރަށް އުނދަގޫވާނެ ކާން.” މިޝަލް ކައިރިއަށް ގޮސް ހުއްޓެމުން ސިބްޢަތުﷲ އެދުނެވެ. މިޝަލް އާނއެކޭ ބުނުމުގެ ގޮތުން ބޯޖަހައިލަމުން މާމައާއި ދިމާއަށް ހިނގައިގަތެވެ.

މާމަ ކައިރީ ހެވިފައި މިޝަލް ހުރިތަން ބަލަން ސިބްޢަތުﷲ އަށް ހުރެވުނެވެ. މާމައަށް ކާއެއްޗެހި ދިނުމަށްފަހު މިޝަލް ދިޔައީ ކާއެއްޗެހި ހުރި މޭޒުކައިރިއަށެވެ. ސިބްޢަތުﷲ އަށް ކާއެއްޗެހި ގެންދިއުމަށް ތަށިތަށްޓަށް ކާއެއްޗެހި އަޅައިންގެން ބަދިގެ ފަރާތަށް ނިކުމެއްޖެއެވެ. އޭރު މިޝަލް ގެ އިންތިޒާރުގައި ބަދިގެފަރާތުގައި ސިބްޢަތުﷲ ހުއްޓެވެ. ސިބްޢަތުﷲ ކައިރީގައި ހެދިކާ ތަށިތަކާއި ޖޫސް ބެހެއްޓުމަށްފަހު ފެން ތަށްޓެއް ބަލައި ދިއުމަށް ހިނގައިގަތެވެ.

“މިތާ އިށީނދެބަލަ.” ފެންތަށްޓެއް ބަލައި ހިނގައިގަތް ވަގުތު ސިބްޢަތުﷲ އެދުނެވެ.

ހައިރާންކަމާއެކު ސިބްޢަތުﷲ އާއި ދިމާއަށް މިޝަލް އަށް ބަލައިލެވުނެވެ. ސިބްޢަތުﷲ ބުނި ޖުމްލަ ތަކުރާރެއް ނުކުރެއެވެ. އަވަސް އަވަހަށް ކާންފެށިއެވެ. މިޝަލް ވެސް އިތުރު ބަހަނާއެއް ނުދައްކައި ސިބްޢަތުﷲ ގެ ކުރިމަތީގައި ހުރި ގޮނޑީގައި އިށީންދެއްޖެއެވެ. ސިބްޢަތުﷲ އަނގައިންވެސް ނުބުނެ ކަމުންގެންދިޔައެވެ. މިޝަލް އަށް ވަމުންދިޔަ އުނދަގުލުން ސަލާމަތްވުމަށް ދެއަތުގެ އިނގިލިތައް މޮޑެންފެށިއެވެ. ދެމީހުންކުރެ އެކަކުވެސް އަނެކަކާ ދިމާއަށް ބަލައިވެސް ނުލައެވެ. އެކަކު އަނެކަކާ އަނގައިންނެއް ނުބުނެއެވެ. އެހެން ނަމަވެސް ގާތުގައި ތިބެވުމުން ދެމީހުންނަށްވެސް ތިބެވުނީ ގޮތް ނޭނގޭ ހިތްހަމެޖެހުމެއްގެ ތެރޭގައެވެ. ސިބްޢަތުﷲ ކައި ނިމެންދެންވެސް މިޝަލް އިނީ ސިބްޢަތުﷲ ގެ ކައިރީގައެވެ.

“އެހެންކަމެއް ބޭނުންތަ؟” ސިބްޢަތުﷲ ކައި ނިމިގެން ތެދުވަން ފެށުމުން މިޝަލް އެހިއެވެ.

“ސައި ތަށްޓެއް.” ސިބްޢަތުﷲ ޖަވާބުގައި ބުންޏެވެ. މިޝަލް ބޯ ޖަހައިލިއެވެ.

މިޝަލް ތެދުވެގެން ސިޓިންގ ރޫމު ތެރޭގައި ކާއެއްޗެހި ބަހައްޓާފައި ހުރި ތަނަށް ހިނގައްޖެއެވެ. ސިބްޢަތުﷲ ބަދިގެ ބައިގެ ދޮރުމަތީގައި މަޑުކޮށްލިއެވެ. ސައިތައްޔާރުކުރުމަށް ހަރަކާތްތެރިވަމުން ދިޔަ މިޝަލް އަށް ސިބްޢަތުﷲ ބަލައިލިއެވެ. ހަމައެއާއެކު އަލުން އަނބުރާގޮސް ގޮނޑީގައި އިށީންދެއްޖެއެވެ. ސީދާ މިޝަލް ފެންނަ ހިސާބަށް ގޮނޑި ދަމައިލަމުން މިޝަލް އަށް ބަލަން ފެށިއެވެ. މިޝަލްގެ ބުރުސޫރަ ރީތި ހަށިގަނޑަށް ސިބްޢަތުﷲ ގެ ނަޒަރު ހިންގައިލިއެވެ. ކައިވެނީގެ ފަހުން، ރުހުމުގެ ލޮލަކުން އެ ހަށިގަނޑަށް ނަޒަރު ހިންގައިލި ފުރަތަމަ ފަހަރެވެ. މިޝަލް ގެ އަތުގައި އަޅާފައިވާ ތަނޑިތަކުން އުފެދެމުންދިޔަ އަޑުން ސިބްޢަތުﷲ ގެ ސިކުނޑިތެރޭގައި ހައިޖާނެއް އުފައްދަމުންދެއެވެ. ކަޅި ޖަހައިނުލައި ސިބްޢަތުﷲ ގެ ނަޒަރު ހުސްކޮށްލާފައިވަނީ މިޝަލް އަށެވެ. އެކަން މިޝަލް އަށްވެސް ފާހަގަކުރެވިއްޖެ އެވެ. ސިބްޢަތުﷲ ބަލަމުންދާކަން އެނގުމުން މިޝަލް އަށް އުނދަގޫވާން ފެށިއެވެ. އާދަޔާޚިލާފް ގޮތްތަކެއް ވާންފެށި އެވެ. މިއަދު މިޝަލް އަށް އެގޮތްތަކެއް ވަމުންދަނީކީ ބިރަކުން ނޫނެވެ. ސިބްޢަތުﷲ ގެ ނަޒަރު ހުސްކޮށްލައިގެން މިޝަލް އަށް ބަލަން އިނީވެސް ތަފާތު ގޮތަކަށެވެ. އެކަމަކުވެސް މިޝަލް އަނެއްފަރާތަށް އެނބުރި ސިބްޢަތުﷲ އާއި ދިމާއަށް ބަލައިލާކަށް ބޭނުމެއް ނުވިއެވެ. ގިރަމުންދިޔަ ސައިތަށްޓަށް ބަލަން ހުރީއެވެ.

“މިޝަލް.” އެންމެފަހުން ސިބްޢަތުﷲ މިޝަލް އަށް ގޮވާލައިފިއެވެ. ދެއަތް ފޮހެލަމުން މަޑުމަޑުން ސިބްޢަތުﷲ އާއި ދިމާއަށް މިޝަލް އެނބުރުނެވެ.

ދެމީހުނަށް ވެސް އެކަކު އަނެކަކަށް ބަލަން އިރުކޮޅެއްވާންދެން ތިބެވުނެވެ.  އެންމެ ކުރިން ދުރަށް ބަލައިލީ މިޝަލް އެވެ. އެހެންނަމަވެސް ސިބްޢަތުﷲ ގެ ނަޒަރު ކަޝިޔާރުކޮށެއް ނުލައެވެ. މިޝަލް އަށް ބަލަން އިނެވެ. އެހެންވެ މިޝަލް ގެ ޠަބީޢަތަށް ހަމަނުޖެހުމެއް އަންނަމުންދިޔައެވެ.

“ކަމެއް ނުވޭ.” ސިބްޢަތުﷲ ބުންޏެވެ. އަނެއްކާވެސް މިޝަލް ސިބްޢަތުﷲ އާއި ދިމާއަށް ބަލައިލަމުން ހަދަންފެށި ސައިތަށި ގިރަންފެށިއެވެ.

މިޝަލްގެ ހިތް ބާރަށް ތެޅެމުން ދަނީއެވެ. ތުރުތުރު އަޅައަޅައި އޮތް އަތަކުން ސައިތަށްޓަށް ހިކިކިރު ކޮޅެއް އަޅައި ސައިތަށި ރަނގަޅަށް ގިރާލުމަށްފަހު ސިބްޢަތުﷲ އާއި ދިމާއަށް ހިނގައިގަތެވެ. އޭރުވެސް މިޝަލް ގެ އަތް ތުރުތުރުލަމުން ދާކަން ތެޅުވެމުންދިޔަ ޖޯޑާއި ވަތުތަށި ހެކިވަމުންދެއެވެ. ސައިތަށި ސިބްޢަތުﷲ ގެ ކުރިމަތީގައި ބަހައްޓަމުން މިޝަލް އަނެއްފަރާތަށް އެނބުރި ހިނގައިގަތެވެ. ނަމަވެސް ހަމަ އެދަނޑިވަޅުގައި ސިބްޢަތުﷲ ގެ އަތުން މިޝަލް ގެ އަތުގެ ކުޑަހުޅުގައި ހިފިއެވެ. އެވަގުތު މިޝަލް އަށް ހީވީ މޭކަށިގަނޑު ފަޅާލާފައި ހަމަ ދެންމެދެންމެ އޭނާގެ ހިތް ނިކުމެދާނެހެންނެވެ.

“ޝުކުރިއްޔާ.” ޝުކުރު އަދާކުރަމުން މިޝަލްގެ އަތުން ސިބްޢަތުﷲ ދޫކޮށްލިއެވެ.

އެއްވެސް އެއްޗެއް ނުބުނެ އަވަސް އަވަހަށް މިޝަލް އެތަނުން ނިކުމެގެން ހިނގައްޖެއެވެ.

***~~~***

ކުޑަކުޑަ ހަފުލާއެއްގެ ނަމުގައ ބޭއްވުނު ބޮޑު ހަފުލާވެސް ނިމިއްޖެއެވެ. ފިރިހެން ކުއްޖާގެ އާއިލާ މީހުން އެނބުރި ހިނގައްޖެއެވެ. ސިބްޢަތުﷲ ގެ ގޭގެ އެކި މީހުންވެސް އެކި ދިމަދިމާއަށް ވަދެއްޖެއެވެ. ނަމަވެސް މިޝަލް ދިޔައީ ބޮޑުދައިތަގެ ކޮޓަރިއަށެވެ. ބައްދަލުކޮށްލަން އެކޮޓަރިއަށް ދިއުމަށް ބުނެފައިވާތީއެވެ.

“ބޮޑުދައިތާ.” ކޮޓަރިއަށް ވަންނަން ފިޔަވަޅެއް އަޅަމުން މިޝަލް ގޮވާލި އެވެ.

“އާދޭ ދަރިފުޅާ.” ކައިރިއަށް ދިއުމަށް އިޝާރާތް ކޮށްލަމުން ބޮޑުދައިތަ ބުންޏެވެ.

ބޮޑުދައިތައާއި ކައިރިއަށް މިޝަލް ޖެހިލިއެވެ. އެނދުގައި އިށީންދެއިން ބޮޑުދައިތަގެ ކުރިމަތީގައި މިޝަލް ވެސް އިށީންދެއްޖެއެވެ. ބޮޑުދައިތަގެ ދެއަތުން މިޝަލްގެ ދެއަތުގައި ހިފައިލަމުން މިޝަލްގެ މޫނަށް ބަލަންފެށިއެވެ.

“އަދިވެސް ބޮޑުދައިތަ ތަ ކިޔަނީ. ދަރިފުޅުގެ މަންމައެއްނު މީ މިހާރު.” ހިނިތުންވަމުން ބޮޑުދައިތަ ބުންޏެވެ. އިތުރު އެއްޗެއް ނުބުނެ މިޝަލް ވެސް އެއްމިޔަކަނުން ހީނލިއެވެ.

“ދަރިފުޅު އުފަލުގަތަ ތިއުޅެނީ؟” މިޝަލްގެ ދެލޮލަށް ބަލަން އިނދެ ބޮޑުދައިތަ ސުވާލުކުރިއެވެ.

“ނިކަން މަންމަ ކައިރީ ބުނެބަލަ، ދަރިފުޅު އުފަލުގަތަ ތިއުޅެނީ؟ އަހަރެންގެ ދަރިފުޅު މިޝަލް އަށް އޯގާތެރިތަ؟ މިޝަލް އަށް އަޅައިލާތަ؟” ބޮޑުދައިތަ ސުވާލު ފުންޏެއް އޮއްސާލިއެވެ.

“އުފާވެރިކަން!…. ހުނ….. އުފާވެރިކަމަކީ ކޮބައިކަން މިހާރު މަށަކަށް ނޭނގޭ!” މިޝަލް ޖަވާބުދިނެވެ. އެވަގުތު މިޝަލް ލޯ ފެންކަޅިވެއްޖެއެވެ.

ބުނާނެ އެއްޗެއް ނޭނގިފައި ބޮޑުދައިތައަށް އިނދެވުނީ އެވެ.

“އަޅެ ކީއްވެގެންތަ ބޮޑުދައިތާ، ކީއްވެތަ؟ ….. ކީއްކުރަންތަ އޭނަ މަށާ ކައިވެނިކުރީކީ؟ އަހަރެންގެ ފަރާތުން އޭނާއަށް ދެވުނީ ކޮން ދެރައެއްކަމެއްވެސް ނޭނގޭއިރު، އެކަމަކު އޭނަ އަހަރެން ބަރުބާދުކޮށްލައިފި. އަހަރެން މިރަށަށް އައިއިރު އެއްގޮތަކަށްވެސް ނުދެނަހުރިން މަށާ ސިބްޢަތުﷲ ގެ ކައިވެންޏަކީ މާކުރިން ހަމަޖައްސާފަ އޮތް ކައިވެންޏެއް ކަމެއް. ބައްޕަ ވެސް އެހެން ނުބުނޭ. އަހަރެން މިތަނަށް އައީ ތިމާގެ މީހުންނާ ބައްދަލުކުރެވޭތީ ވަރަށް އަފަލުން. އެކަމަކު ކުއްލިއަކަށް މިތަނުން އަހަރެންގެ ކައިވެނި ހަމަޖައްސާލައިފި. އަހަރެން ހުރީކީ ކައިވެންޏެއް ކުރަން ތައްޔާރަކަށް ނޫން. ހަމަ އަހާލުމެއް ކަހާލުމެއް ނެތި ކުއްލިއަކަށް ހުރިހާކަމެއް ނިންމީ. މަށަކީވެސް އިންސާނެއް، މެޝިނެއް ނޫން. އެމީހުން ބޭނުންހާ ގޮތަކަށް އަހަރެން ރާވައެއް ނުލެވޭނެ. އެއްވެސް މީހަކު އަހައިވެސް ނުލާ ސިބްޢަތުﷲ މަށަށް ކަމުދޭތޯވެސް. އަހަރެން ހުރީ ބިރުން. އަހަރެން ބޭނުންވީ މިތަނުން ފިލައިގެންދާން. ޗޭނު ޖަހައި ބަންދުވެފައި އިނުމަށް އަހަރެން ބޭނުން ނުވާތީ އެހެން ހެދީ. އަހަރެން ދުވަހަކުވެސް އުއްމީދެއް ނުކުރަން އަޅަކަށް ވާކަށް. އަހަރެން އުއްމީދުކުރީ ބައިވެރިއަކަށް ވުމަށް. އޭނަވެސް ފިރިހެނެއް ފަދައިން ތަންކޮޅެއް ފިރިހެންވެފަ އަހަރެން ކައިރީގައި އިންނަން އެހީކީ ނޫން. އެކަމަކު އޭނަގެ ވެސް ހުންނާނީ މި އާއިލާ ފިރިހެނުންގެ ހުންނަ ހޫނު ލޭތާދޯ. އަހަރެން ގަތްފަ ހުރި ބިރު ފިލުވައިދޭން ޖެހޭ މީހާ ބަދަލުވެގެން ދިޔައީ ބޮޑު ފުރޭތައަކަށް. އަދި މި ކައިވެންޏަށް ފަހު ބޮޑުދައިތަގެ ދަރިފުޅު ބަދަލުވެގެންދިޔައީ ޖަނަވާރަކަށް. ކައިވެނީގެ ފުރަތަމަ ރޭ ކަންތައްވީ ގޮތް އަހަންނަށް ދުވަހަކުވެސް ހަނދާން ނައްތައެއް ނުލެވޭނެ. އެރޭ އޭނާ އަހަންނަށް ކުރި ތަދު. ދިންހާ އަނިޔާ. އެރޭ އޭނާގެ ވިހަގަދަ ބަސްތަކުން އެކަނިވެސް އަހަރެން ކޮށައި ކުދިކުދި ކޮށްލި. އެކަމަކުވެސް އަހަރެން ދިރިއުޅެވޭތޯ ބަލަމުން މި އަންނަނީ. އެކަމަކު އަދިވެސް އޭނައަކީ ހަމަ އޭނަ. އެއްވެސް ބަދަލެއް ނާދޭ. އޭނަ އަހަރެންދެކެ އަންނަ ރުޅިއަކަށް ކުޑަވެސް ބަދަލެއް ނާދޭ. އަހަރުމެން އަންހެނުންނަކީ ބޭނުންގޮތަކަށް މޮޑެލެވޭ ފުށްގަނޑެއް ކަހަލަ ބައެއް ނަމަވެސް މިވީ މަހެއްހައި ދުވަސްތެރޭގަ ވެސް އޭނަ ނޫޅޭ އެއްވެސް ކަމެއް ރަނގަޅުކުރާކަށް. އޭނަ ރުހުމުގަ އަހަންނަށް ގޮވާވެސް ނުލާ. އަހަރުމެންނަކީ އެއް ފުރާޅު ދޮށުގަ ދިރިއުޅެމުން އަންނަ ދެ ބީރައްޓެހިން.”

ރޮމުން، ގިސްލަމުން، ވަރަށް ހިތްވަރާ އަސަރާއެކު މިޝަލް ގެ ހިތުތެރޭގައި ފުނިޖެހިފައިހުރި ޝަކުވާތަކާއި އިލްތިޖާތައް ބޮޑުދައިތައަށް އިއްވައިދީފިއެވެ. އެ އަޑު އަހާނެ ތިންވަނަ ކަންފަތެއް ހުއްޓަސް އަދި ނެތަސް އެކަމާ އެއްވެސް ފަރުވާލެއް ނެތިއެވެ. އެފަދަ ފަރާތެއް ހުރެދާނެކަމަށް ވިސްނައިވެސް ނުލައެވެ.

އެއްވެސް ހިފެހެއްޓުމެއް ނެތި މިޝަލް ގެ ލޮލުން ފައިބަމުންދިޔަ ކަރުނައިން އޭނާގެ ކޯތާފަތް ތެތްމަމުން ދެއެވެ. އަޑު ބެދެން ފެށުމުން ހިންދިރުވައިލުމަށްފަހު އަނެއްކާވެސް ވާހަކަދައްކަން ފެށިއެވެ.

“ސިބްޢަތުﷲ ދެކޭގޮތުން އަހަރެންމީ އޭނާއަށް އެއްވެސް މީހެއް ނޫން. ފަހަރެއްގައި ވެދާނެ އޭނާގެ ނަޒަރުގައިވެސް އަހަންނަކީ އެއްވެސް މީހެއް ނޫންކަމަށްވެސް. ދެން ކީއްކުރަން އަހަރުމެން މިހެން ދިރިއުޅެންވީކީ. ކައިވެނި ކުރެވުނު ދުވަހުން ފެށިގެން އަހަރެން އޭނާދެކެ އިންތިހާއަށް ރުޅިއާދޭ. އެކަމަކު މިހާރު އަހަރެންގެ ހިތަށް ހަމަ އެކައްޗެއްވެސް ނާރާ. ލޯތްބެއްވެސް ނުވަން، ރުޅިއެއްވެސް ނާންނަން. މިގޮތަށް އަހަންނަކަށް ދިރިއެއް ނޫޅެވޭނެ ބޮޑުދައިތާ.” ބާރަށް ރޮއެގަންނަމުން ބޮޑުދައިތަގެ ގައިގާ މިޝަލް ބައްދައިގަތެވެ.

ސިބްޢަތުﷲ އަށް ހުރެވުނީ ގަނޑުވެފައެވެ. ހުއްޓުން އަރާފައެވެ. މިޝަލް ގެ ކޮންމެ ލަފުޒެއް ކަނުލައި އަޑުއަހަން ހުރެވުނީއެވެ. ރަނގަޅެއް ނުބައެއް ސިބްޢަތުﷲ އަށް އަދިވެސް ނޭނގޭ ކަހަލައެވެ. ޤަބޫލުކުރަންވީ ސިބްޢަތުﷲ ގެ ބައްޕަ ކިޔައިދިން ވާހަކަތައް ކަމެއް ނުވަތަ މިޝަލް އެދައްކާ ވާހަކަތަކަށް ބިނާކޮށް ސިބްޢަތުﷲ އަށް ވިސްނޭ އެންމެ ރަނގަޅުގޮތް ކަމެއްވެސް ނޭނގެއެވެ.

ފުން ވިސްނުމެއްގައި ހުރެގެން ސިބްޢަތުﷲ ބޭރަށް ނިކުމެއްޖެއެވެ. މަގުމައްޗަށް ނިކުމެ އެއްވެސް މިސްރާބެއް، އެއްވެސް މަންޒިލެއް ނެތި ހިނގަމުންދިޔައެވެ. ރަނގަޅުގޮތެއް ވިސްނޭތޯއެވެ. މަގުމަތީގައި އިރުކޮޅެއްވާންދެން އެނބުރުމަށްފަހު ގެއަށްވަދެ މިސްރާބުޖެހީ އޭނާގެ ބައްޕަ މިވަގުތު އިންނާނެ ތަނަށެވެ. ގޯތީގެ ބިތްދޮށް ފަރާތުގައި ހުރި ބޮޑު ވަޑާންގެއަށެވެ. ވަޑާންގޭގެ އޮފީސް ބަޔަށް ވަދެ ދޮރުލައްޕައިލިއެވެ. ސިބްޢަތުﷲ ފެނުމުން އޭނާގެ ބައްޕަ ހިނިތުންވެލަމުން ސިބްޢަތުﷲ އިށީންނުމަށް ބުންޏެވެ.

“މިޝަލް ބުނިތަ އަހަންނަކީ އެއްވެސް ތާކުންތާކުޖެހޭ މީހެއް ނޫނޭ؟ އޭނަ ބުނިތަ އަހަންނަކީ ބަލިކަށި މީހެކޭ، އަހަންނަކީ އަމިއްލަ މުހުތާދުގެ އަޅެކޭ؟ މިޝަލް ބުނިތަ އަހަންނަކީ މިޝަލް އާ އެކަށީގެންވާ މީހެއް ނޫނޭ؟” އެއް ނޭވައިން ހުރިހައި ސުވާލެއް ފައްޗަކަށް އަމުނާލަމުން ބައްޕަގެ ކުރިމައްޗަށް އޮއްސާލިއެވެ.

“ދަރިފުޅު ސިބްޢަތުﷲ ކީކޭތަ ތި ކިޔަނީ؟ އެހެން ނޫނަސް މިހާރު ކީއްކުރަންތަ ތިހުރިހައި ސުވާލެއް ތިކުރަނީކީ؟” ސިބްޢަތުﷲ ގެ ބައްޕަވެސް ކުރިމަތިކުރީ ސުވާލުތަކެކެވެ. ގޮނޑިން ތެދުވެގެން ގޮސް ސިބްޢަތުﷲ ހުއްޓުނީ އޭނާގެ ބައްޕަގެ ކައިރީގައެވެ.

“ޕްލީޒް އަހަންނަށް ހަގީގަތް އޮޅުންފިލުވައިދީ ބައްޕާ. މިޝަލް އަކަށް އަސްލު ނޭނގޭ ދޯ އަހަރެމެންގެ ކައިވެންޏަކީ މާކުރިންސުރެ ކުރަން ހަމަޖެހިފަ އޮތް ކައިވެންޏެއް ކަމެއް؟ އޭނާ އުޅުނީ ކުއްޖަކާ ރައްޓެހިވެގެނެއްވެސް ނޫންދޯ؟ ދެން ކީއްވެ ބައްޕަ ދޮގުހެދީ. ބައްޕަ ދެއްކި ހުރިހައި ވާހަކަތަކެއް އެއީ ހުސް ދޮގު ދޯ؟” ރުޅިގަނޑު ކޮންޓްރޯލް ކުރެވޭތޯ މަސައްކަތް ކުރަމުން ސިބްޢަތުﷲ އަނެއްކާވެސް ސުވާލުކުރަން ފެށިއެވެ.

“އާނ އޭނަ ކުއްޖަކާ ރައްޓެއްސެއް ނުވޭ.” ރުންކުރު ރާގެއްގައި ސިބްޢަތުﷲ ގެ ބައްޕަ ނަސީރު އަލީ ބުންޏެވެ. އެވަގުތު ސިބްޢަތުﷲ އަށް ހީވީ އެމީހުންތިބި ކޮޓަރީގެ ފުރާޅު އޭނާގެ ބޯމައްޗަށް ވެއްޓުނުހެންނެވެ.

“ބައްޕާ.” ލިބުނު ކުއްލި ޝޮކާއިއެކު ސިބްޢަތުﷲ ގެ އަނގައިން ވައި އަޑަކުން އޭނާގެ ބައްޕަ އަށް ގޮވާލެވުނެވެ.

“ބައްޕަ ކީއްވެގެން ދޮގުހަދައި އޮޅުވާލީ. އޭރު ބައްޕަ ދެއްކި ވާހަކަތަކުގެ ކޮންމެ ލަފުޒަކީވެސް ދޮގެއް ދޯ.” ރުޅިވެރި ރާގެއްގައި ސިބްޢަތުﷲ އަށް ބުނެވުނެވެ.

“ދަރިފުޅާ. ނިކަން ހޭވެރިކަން ވެފަ ވިސްނާލަބަލަ. ތަންކޮޅެއް ސީރިއަސް ކޮށް މިކަމާ ވިސްނަބަލަ. މިޝަލް ދަރިފުޅުގެ ކައިވެންޏާ ދެކޮޅު ހަދާފަ އޭނަ ބޭނުންވީ އުޅޭނެ ގޮތަކަށް އުޅެން އޭނާގެ ދުނިޔެއަށް ދާން. އޭނަ ބޭނުންވީ ލަންކާގަ ދިރިއުޅެން. އެކަމަކު އެހެން އެކަމެއް ނުވާނެ. އަހަރެމެންގެ އާއިލާ އަށް ނިސްބަތްވާ އަންހެން ކުދިން އާއިލާއިން ބޭރުގެ ކުއްޖަކާ ކައިވެނި ކުރުމަކީ ކޮށްގެންވާނެ ކަމެއް ނޫން. އޭނަ ކައިވެންޏަށް ދެކޮޅު ހަދާފަ ފިލައިގެންދާން އުޅުނީ. އެހެންވެ އަހަރުމެންނަށް މަޖުބޫރުވީ ދަރިފުޅުގެ ޝައުޤުވެރިކަން ވީ އެންމެ އަވަހަކަށް މިކައިވެންޏާމެދު ކޮންމެހެންވެސް ހޯދަން.” ކަންވީގޮތް ސިބްޢަތުﷲ ގެ ބައްޕަ ކިޔައިދިނުމުން ސިބްޢަތުﷲ އަށް ލިބުނީ އިތުރު ހައިރާން ކަމެކެވެ.

“ބައްޕަމެންގެ ތި ބޮޑު އޮޅުވައިލުމުގެ ސަބަބުން އެނގޭތަ އަހަންނަށް މިޝަލް އާމެދު ކަންތައް ކުރެވުނު ގޮތް؟” ހަޅޭއްލަވައިގަންނަމުން ސިބްޢަތުﷲ ބުންޏެވެ.

“ބައްޕާ އަހަންނަށް އޭނަގެ މުޅި ޖިސްމާ ފުރާނައޭ މި ބަރުބާދުކޮށްލެވުނީ. އެވެސް ހަމައެކަނި ބައްޕަ މެން ތިގެންގުޅޭ ހަރުކަށި ބޯދާ އުސޫލުތަކަށް ޓަކައި. ޗީޗީ.” އައި ރުޅިން މޭޒުމަތީގައި ސިބްޢަތުﷲ ގެ އަތުން ބާރަށް ބޮނޑިއެއް އެޅިއެވެ.

“މިހާރު މިޝަލް އަކީ ކުރިން މިގެޔަށް އައި މިޝަލް އެއް ނޫން. އޭނަގެ ހިނިތުންވުން، އޭނަގެ ސަކަ މިޒާޖު، އޭނަގެ އެ އުފާވެރި ވާހަކަތައްވެސް ހަމަ އަހަރެމެންގެ ސަބަބުން ނަގައިލެވުނީ. ހަމަ އަހަރެމެންގެ ސަބަބުން އޭނަގެ އެ އުފާވެރި ހަޔާތް މި ބަރުބާދުކޮށްލެވުނީ. އަހަރެން ހިތަށް އަރަނީ އޭނަގެ ބައްޕަ ކީއްވެގެންބާއޭ މިހުރިހައި ކަމެއް މިގޮތަށް ވާން ދޫކޮށްލީކީ.” ލިބިފައިވާ މޮޅިއާއި ހިތާމަޔާއެކުވެސް ސިބްޢަތުﷲ އަށް ހަމަވިސްނުން ވިސްނެން ފަށައިފިއެވެ.

“ސިބްޢަތުﷲ ތިކަމާ މާބޮޑަށޭ ތި ވިސްނަނީ. މީކީ ތިހާވަރު ވާންޖެހޭހައި ބޮޑު ކަންތައްގަނޑެއް ނޫނޭ. ބަލަ އެއީ އަންހެން ކުއްޖެކޭ. މިހާރު އެއީ ކަލޭގެ އަނބިމީހާއޭ. އެހެންވީމަ ދަރިފުޅު ބޭނުންގޮތަކަށް އޭނަޔާއެކީގަ ދިރިއުޅެވޭތޯ ބެލީމަ ހުންނާނީ ރަނގަޅަށޭ. އަންހެނުންނަކީ އަހަރެމެންގެ ފައިދޮށުގަ ތިބެންޖެހޭ ބައެއްކަން އަބަދުވެސް ހަނދާނުގަ ބަހައްޓައިގެން އުޅުނީމަ ހުންނާނީ ހުރިހައިކަމެއް ރަނގަޅަށް.” ސިބްޢަތުﷲ ގެ ކޮނޑުގައި އަތުން މަޑުމަޑުން ޖަހައިލަމުން އޭނާގެ ބައްޕަ ނަސީރު ބުންޏެވެ.

“ޗީޑި…. ބައްޕަގެ ވިސްނުން ހާދަ ޑީ-ގްރޭޑޭ ދޯ. އެކަމަކު ބުނަން ބައްޕާ، ބައްޕަ ބޭނުންހައި ގޮތަކަށް ދެނެއް ހަމަ އެއްވެސް ކަމެއް ނުވާނެ. މިޝަލް އަކީ ހަމައެކަނި އަންހެންކުއްޖެއް ނޫން. އެއީ އަހަރެން އެކުއްޖެއްދެކެ އިންތިހާއަށް ލޯބިވާ ކުއްޖާ.” ސިބްޢަތުﷲ ބާރަށް ފިލިގަތެވެ. ކުރިމަތީގައި ހުރީ އޭނާގެ ބައްޕަކަންވެސް ހަނދާން ނެތްކަހަލަ އެވެ. އެވަގުތު ސިބްޢަތުﷲ ގެ ލޮލަށް ޖަމާވެފައިހުރި ކަރުނަތައް ކޯތާފަތް މައްޗަށް އޮހެންފަށައިފިއެވެ.

ވަޑާންގޭގެ އިދާރީ ބަޔަށް ވަނުމަށް ސިޑިން އަރައަރައި ހުރި މިޝަލްގެ ކަންފަތުގައި ޖެހުނު ލަފުޒުތައް ތަކުރާރުވާން ފެށިއެވެ.

“މިޝަލް އަކީ ހަމައެކަނި އަންހެންކުއްޖެއް ނޫން. އެއީ އަހަރެން އެކުއްޖެއްދެކެ އިންތިހާއަށް ލޯބިވާ ކުއްޖާ.”

ސިބްޢަތުﷲ ހަޅޭއްލަވައިގަންނަމުން އޭނާގެ ބައްޕައާއި ދިމާއަށް ބުނި ޖުމްލަ ތަކުރާރުކޮށް މިޝަލްގެ ކަންފަތުގައި އަދިވެސް ގުގުމަނީއެވެ. އެވަގުތު ސިޑީގެ އަރިމަތީގައި ހުރި އަތްގަނޑުގައި މިޝަލް އަށް ބާރަށް ހިފަހައްޓައިލެވުނީ އަރިއަޅާލައިގެން ވެއްޓިދާނޭ ހީވެގެންނެވެ. މިޝަލްގެ މޫނުވެސް ވަނީ ކަރުނައިން ފޯވެފައެވެ. ސިބްޢަތުﷲ ގެ އެ ހިތްގައިމު ޖުމްލައިގެ ކޮންމެ ލަފުޒެއް އޭނާގެ ހިތުގެ އެންމެ ފުންމިނަށް ފޯރައިފިއެވެ. އަރާފައިވާ ހުރިހައި އޮޅުމެއް އޮޅުންފިލަން ފަށައިފިއެވެ. މީގެ އިރުކޮޅެއް ކުރިން މިޝަލް އެތަނަށް ދިޔައީ ބޮޑުދައިތަ ބުނެގެން ސިބްޢަތުﷲ އަށް ގޮވުމަށެވެ.

“ބައްޕައަށް އެނގޭތަ މިޝަލް އަކީ އަހަރެން އެންމެ ކުރިންވެސް ލޯބިވި ކުއްޖާ. ބޮޑުބޭބެ ފޮނުވި ފޮޓޯއަކުން މިޝަލް ފެނުނު ދުވަހުން ފެށިގެން އަހަންނަށް މިޝަލް ދެކެ އިންތިހާއަށް ލޯބި ވެވުނު. އެކަމަކު ބައްޕަމެން ތިކުރި ކަމަކުން އަހަރެންގެ އަމަލުތަކުން މިޝަލް ބަރުބާދު ކޮށްލެވިއްޖެ.” ރޮމުން ސިބްޢަތުﷲ ވާހަކަދައްކަމުންދިޔައެވެ.

ސިބްޢަތުﷲ ގެ އަޑު އިވިފައި މިޝަލް އަށް ލޯމަރައިލެވުނެވެ. މަޑުމަޑުން ގިިސްލެވެން ފެށުނެވެ.

“އަހަރެން އޭނައަށް އަނިޔާކުރީކީ ހަމައެކަނި އޭނާގެ ޖިސްމަކަށް ނޫން. އޭނާގެ ރޫހަށްވެސް އަހަރެން ކުރި އަނިޔާގެ އަސަރު ފޯރި. މި ހުރިހައި ކަމެއްގެ ފަހަތުގަ މިވަނީ ހަމަ ބައްޕަ. އަހަރެން ދުވަހަކުވެސް ބައްޕައަށް މަޢާފެއް ނުކުރާނަން.” މިހެން ބުނުމާއެކު ސިބްޢަތުﷲ އެތަނުން ނިކުމެއްޖެއެވެ. އެވަގުތު ސިޑިމަތީގައި އިށީންދެގެން އިން މިޝަލް އަށް ބޭއިޚްތިޔާރުގައި ސިބްޢަތުﷲ ގެ ދެފައިގައި ހިފައިގަނެވިއްޖެއެވެ.

“މިޝަލް.” ސިބްޢަތުﷲ ވަރަށް އަސަރާއެކު މިޝަލް އަށް ގޮވައިލިއެވެ. މިޝަލް އިސްއުފުލައި ބަލައިލިއެވެ. އަވަސް އަވަހަށް ކޮޅަށް ތެދުވެ ކަރުނަ ފޮހެލިއެވެ. ސިބްޢަތުﷲ އަށް ހުރެވުނީ އެވެ. މިޝަލް ގެ އެ ހިތާމަވެރި ދެލޮލަށް ބަލާށެވެ. މިޝަލް އަށްވެސް ސިބްޢަތުﷲ ގެ ދެލޮލަށް ބަލަން ހުރެވުނީއެވެ. ދެމީހުންގެ ނަޒަރު ހުއްޓިފައިވަނީ ނިހާއީ ލޯބިން ފުރިފައިވާ ދެމީހުންގެ ލޮލަށެވެ. އެތައް އިރެއް ވާންދެން އެގޮތުގައި ދެމީހުންނަށް ތިބެވުނީ ލޮލުން ދެމުންދިޔަ ފުން މެސެޖުތަކުން ހިތުގެ އަޑު އިއްވައިދިނުމުގައެވެ.

“މިހާރު މާބޮޑަށްވެސް ދަންވެއްޖެއެއްނު. ހިނގާ ނިދަން ދަމާ.” އެންމެ ފަހުން އެމީހުންގެ މެދުގައިވާ ހަމަހިމޭންކަމުގެ މުޢާމަލާތްކުރުން ފޫ ދުއްވައިލުމަށްފަހު ސިބްޢަތުﷲ ބުންޏެވެ. ސިބްޢަތުﷲ ގެ އަތް މިޝަލް އާއި ދިމާއަށް ދިއްކޮށްލިއެވެ. އެ އަތުގައި މިޝަލް މިފަހަރު ހިފީ ލޯބިންނެވެ. އެއްވެސް ބިރުވެރިކަމެއް، ނަފުރަތެއް ނެތް ޚާލިޞް ހިތަކާއި އެކުގައެވެ.

ދެމީހުން އެކުގައި ހިނގައިގަތީ އެމީހުންގެ ކޮޓަރިއަށް ދިއުމަށެވެ. ދެމީހުންވެސް އަމިއްލަ ޚިޔާލީ ދުނިޔެއެއްގައި ތިބެގެންނެވެ. ކޮޓަރިއަށް ވަދެވުމާއެކު މިޝަލް ކޮޓަރީގެ ދޮރު ލައްޕައިލިއެވެ. ސިބްޢަތުﷲ ގޮސް އެނދުގައި ބުރަކަށި ޖައްސައިލިއެވެ. މިޝަލް މަޑުކޮށްލީ ޑްރެސިން ޓޭބަލް ކައިރީގައެވެ. ބުރުގާ އާއި އަތުގައި ހުރި ތަނޑިތައް ނެގިއެވެ. ކަރުގައި އޮތް ފަށް ނަގައި ޑްރެސިން ޓޭބަލް މަތީގައި ބޭއްވިވަގުތު އަނެއްކާވެސް އޭނާގެ ސިކުނޑީގައި ދައުރުވާން ފެށީ ސިބްޢަތުﷲ ބުނި ޖުމްލައެވެ.

‘އަހަރެން ލޯބިވި ކުއްޖަކީ އެއީ.’

ސިބްޢަތުﷲ އާއި ދިމާއަށް މިޝަލް އެނބުރުނެވެ. އޭރު ސިބްޢަތުﷲ ގެ އަތުކުރީ ގަޑި ނަގައި ސައިޑް ޓޭބަލް މަތީގައި ބާއްވަނީ އެވެ. ސިބްޢަތުﷲ ގެ ހަރަކާތްތަކަށް ބަލަމުން ގޮސް މިޝަލް މަޑުކޮށްލީ އަލަމާރި ކައިރީގައެވެ. ސިބްޢަތުﷲ ގެ ނިދާހެދުން ނަގައި ބޭއްވުމަށްފަހު މިޝަލް ވަނީ ފާޚާނާ އަށެވެ. ދެމީހުންގެ ދެމެދުގައިވަނީ ހަމަހިމޭންކަމުގެ ފާރެއް ލެވިފައެވެ. ކޮޓަރި ތެރެއިން އިވެމުން ދިޔައީ މިޝަލްގެ ފައިގައި އަޅާފައިވާ ކެވެލިކޮޅުގައި ލާފައިވާ ގިގުނިން އިވެމުންދާ ހިތްގައިމު ތަރާނާގެ އަޑު އެކަންޏެވެ.

ދެމީހުންވެސް އެއްޗެއްހި ބަދަލުކޮށްލުމަށްފަހު އިޝާ ނަމާދުކޮށްލިއެވެ. މިޝަލް ނަމާދުކުރަން އިންއިރު ވެސް ޒިކުރު ތަސްބީހަ ކިޔަން އިން ސިބްޢަތުﷲ ގެ ނަޒަރު އެހެން ދެވަނަ ދިމާއަކަށް ނުހުއްޓެއެވެ. ކުރިން ސިބްޢަތުﷲ  ހީކުރީ ބިދޭސީ ޤައުމެއްގައި އުޅެ ބޮޑުވެފައިވާ މިޝަލް އަކީ އެހާ ދީންވެރި ކުއްޖަކަށް ނުވާނެ ކަމަށެވެ. ނަމަވެސް އޭނާގެ މި ހީ ވެސް ވެގެންދިޔައީ މުޅިން ކުށްހީ އަކަށެވެ. މިޝަލް އަށް އިސްލާމް ދީނުގެ މުހިންމުކަން ރަނގަޅަށް އެނގޭކަން ވޭތިވެދިޔަ މަސްދުވަސް ތެރޭގައި ސިބްޢަތުﷲ އަށް އެނގިއްޖެއެވެ.

ޒިކުރު ތަސްބީހަ ކިޔައި ނިމިގެން ގޮސް ސިބްޢަތުﷲ އަނެއްކާވެސް އެނދުގައި ޖައްސާލިއެވެ. މިޝަލް ނަމާދުކޮށް ނިމިގެން ބަލައިލިއިރު ސިބްޢަތުﷲ  އޮތީ ނިތްކުރިމަތީގައި އަތް ބާއްވާލައިގެންނެވެ. މިޝަލް ވެސް ދުއާކޮށް ނިމިގެން ނަމާދުކުރާ މުސައްލަ އޮޅައިލައި އެއްފަރާތެއްގައި ބާއްވަމުން ތެދުވެއްޖެއެވެ. ހޮޅިބުރިތައް ނިއްވައިލައި ނިދާބޮކި ޖައްސާލަމުން ގޮސް އެނދުގައި އޮށޯވެއްޖެއެވެ. އޭނާ އޮންނަ ފަޅީގައެވެ. ދެމީހުން އެކުއެކީގާހެން ރަޖާގަނޑު މައްޗަށް ދަމާލައި ގައިމަތީގައި އެޅިއެވެ. ދެމީހުންގެ ސިކުނޑީގައިވެސް ވަނީ މިރޭ އަޑުއިވުނު ބަސްތަކެވެ. ސިބްޢަތުﷲ އާމެދު މިޝަލްގެ ދުލުން ބޭރުވި ބަސްތަކެވެ. މިޝަލް އާމެދު ސިބްޢަތުﷲ ގެ ދުލުން ބޭރުވި ބަސްތަކެވެ. ދެން ކުރަންވީ ކީއްކަމެއް އެކަކަށްވެސް ނޭނގޭ ކަހަލައެވެ. ދެމީހުންގެ މަންޒިލަކީ އެއް މަންޒިލެއްކަން ސާފުކޮށް އެނގުނަސް އެ މަންޒިލަށް ދަތުރު ފެށުމަށް ދެން ކުރަންވީ ކޮން ކަމެއްކަން ހަމަ އެކަކަށްވެސް ނޭނގޭ ހާލަތެއްގައި ތިބެވުނީއެވެ.

★★★

ނިދީގެ ކަންފުޅެއްވެސް ނެތުމުން މިޝަލް އެނދުން ތެދުވެއްޖެ އެވެ. އޭރުވެސް ސިބްޢަތުﷲ ގެ ބަސްތައް އޭނާގެ ކަންފަތުގައި ގުގުމަމުން ދަނީއެވެ. އެ ލަފުޒުތަކުން މިޝަލްގެ ހަށިގަނޑުގައި ގޮތްނޭނގޭ ޖަޒުބާތެއް ވަނީ އުފައްދާފައެވެ. އަރާމު ނިންޖެއްގެ ތެރެއަށް ޣަރަޤުވެފައި އޮތް ސިބްޢަތުﷲ އަށް މިޝަލް ބަލައިލިއެވެ. ސިބްޢަތުﷲ ގެ މޫނު ސާފުކޮށް ފެންނާން އޮތެވެ. ބޮލުގެ އިސްތަށިގަނޑުން ބައެއް އިސްތަށިތައް ނިތްކުރިމައްޗަށް ވަނީ އެޅިފައެވެ. އެތަން ބަލަން މިޝަލް އަށް އިނދެވުނީއެވެ. މިރޭ ސިބްޢަތުﷲ ގެ މޫނުމަތިން އޭނާއަށް ފެންނަނީ ހިތްގައިމު ސިފައެކެވެ. ލޯބިލޯބި ސިފައެކެވެ. އެ މޫނަށް ބަލަން އިނދެވުނުއިރު މިޝަލްގެ ހިތުގެ ތެޅުންވެސް ހުއްޓިފައިފާ ކަހަލައެވެ. މަޑުމަޑުން މިޝަލް ގެ އަތުން ސިބްޢަތުﷲ ގެ މޫނަށް އެޅިފައިފައި އިސްތަށިކޮޅު އެއްފަރާތް ކޮށްލިއެވެ. ޖެހިލުންވެ އިނދެ ނަމަވެސް އެ އިސްތަށިކޮޅާއި ކުޅެން ފެށިއެވެ.

“އަހަރެން…… އަހަރެން މީތަ…. ސިބްޢަތުﷲ ލޯބިވި މީހަކީ؟” ސިބްޢަތުﷲ ގެ މޫނަށް ނުހަނު ލޯބިން ބަލަމުން މިޝަލް އަށް ސިއްރުސިއްރުން އަހައިލެވުނެވެ.

އެވަގުތު އެއްވެސް ހިފެހެއްޓުމެއް ނެތި މިޝަލްގެ ލޮލުން ކަރުނަ ހިލިއްޖެއެވެ. އަތުގެ ނުފުށުން ކަރުނަފޮދު ފޮހެލަމުން މަޑުމަޑުން ހިނިތުންވެލިއެވެ.

“އަހަރެންވެސް ބޭނުން ސިބްޢަތުﷲ ދެކެ ލޯބިވާން. އިންތިހާއަށް ލޯބިވާން ބޭނުން.” އަނެއްކާވެސް މަޑުމަޑުން މިޝަލް އަށް ބުނެވުނެވެ. ހިނިތުންވަމުންނެވެ.

ނިތްކުރިމަތީގައި އޮތް އިސްތަށިތައް ރަނގަޅުކޮށްލަމުން ސިބްޢަތުﷲ ގެ އޮމާން ސާފު އަދި އެހާމެ ރީތި ނިތްކުރީގައި މިޝަލް ފިރުމައިލިއެވެ. އެވަގުތު މިޝަލްގެ ދެތުންފަތް ތުރުތުރު އަޅަންފެށިއެވެ. އެ ދެތުންފަތް ބޭނުންވަނީ ސިބްޢަތުﷲ ގެ ނިތްކުރީގައި ބޮސްދިނުމަށެވެ. ނަމަވެސް އެކަން ކުރާނެ ހިތްވަރެއް މިޝަލް އަކަށް ނުލިބުނެވެ. ފިރިހެނުންނަށް އަންހެނަކަށް ބޮސްދޭން ކިތަންމެ ފަސޭހަޔަސް އަންހެނަކަށް އެއީ އެހާ ފަސޭހަ ކަމެއް ނޫނެވެ. ޚާއްޞަކޮށް މިޝަލްގެ ދިރިއުޅުން އޮތް ހާލަތުގައެވެ. މިފަދަ ވިސްނުމެއްގައި އިނދެ މަޑުމަޑުން ސިބްޢަތުﷲ އާއި ދިމާއަށް މިޝަލް ގުދުވިއެވެ. މަޑުމަޑުން މިޝަލްގެ ތުންފަތް ސިބްޢަތުﷲ ގެ ނިތްކުރީގައި ޖައްސައި ބާރުކޮށްލިއެވެ. އެގޮތުގައި މަޑުކޮށްގެން އިންދާ އޭނާގެ ލޮލުން އަނެއްކާވެސް ކަރުނަ ހިލިއްޖެއެވެ. ކަރުނަ ތިތްކެއް ސިބްޢަތުﷲ ގެ މޫނަށް ވެއްޓިދާނެތީ ބިރުން ފަހަތަށް ޖެހެވުނެވެ. ސިބްޢަތުﷲ ގެ އަތުގައި ބޯއަޅާލައިގެން އެނދުގެ އެއްފަރާތުގައި އޮށޯވެއްޖެއެވެ. އެއީ ސިބްޢަތުﷲ އާއި އެހާ ކައިރީގައި އެއްވެސް ބިރެއް ނެތި އޭނާ ނިދަން އޮތް ފުރަތަމަ ފަހަރެވެ. މަޑުމަޑުން މިޝަލް ލޯމަރައިލާ ނިދޭތޯ މަސައްކަތްކުރަން ފެށިއެވެ.

މިޝަލް އަށް ނިދުނުތަނާހެން ސިބްޢަތުﷲ ލޯ ހުޅުވައިލިއެވެ. އޭނާގެ މުލައްދަނޑި މަތީގައި ބޯއަޅާލައިގެން ނިދަން އޮތް މިޝަލް އަށް ބަލައިލިއެވެ. ސިބްޢަތުﷲ ގެ އަނެއް އަތުން މިޝަލްގެ ގައިގައި ރަނގަޅަށް ބައްދާލައި ގަޔާއި ކައިރިކޮށްލިއެވެ. އެވަގުތު މިރޭ އޭނާއާއިމެދު މިޝަލް ދެއްކި ވާހަކަތައް ހަނދާނަށް އައިސް އެ ފޮނި ޖުމްލަތަކުން އޭނާގެ ހިތް އުފާކޮށްދޭން ފެށިއެވެ. އަމިއްލަ ނިތްކުރީގައި އަތުގެ އިނގިލިތައް ޖައްސައިލަމުން އެ ނިތްކުރިއަށް މީގެ އިރުކޮޅެއް ކުރިން މިޝަލް ދިން ބޮސްގެ މަތިން ހަނދާންކޮށްލިއެވެ.

“އައި އޭމް ސޮރީ.” ވައިއަޑުން ސިބްޢަތުﷲ ބުންޏެވެ. އޭނާގެ މުލައްދަނޑިމަތީގައި ބޯއަޅާލައިގެން އަރާމު ނިންޖެއްގައި އޮތް މިޝަލް ގެ ނިތްކުރީގައި ވަރަށް ލޯބިން ބޮސްދިނެވެ.

“މިޝަލް އަހަރެންދެކެ ލޯބިވާނެ. އަހަރެން މިޝަލް ދެކެމިވާ ފުން ލޯބި ހާމަކޮށްދޭނަން. ތީ އަހަންނަށް ވަރަށް ޗާލު ކުއްޖެއް. ‘ ♩ ♪ ♫ ♬ ޗާލޭ ކަލާ ހާދަ ޗާލޭ… ♩ ♪ ♫ ♬’ ” އެއްވެސް ބީޓެއް ނެތަސް ސިބްޢަތުﷲ އަށް ކިޔުނު އެންމެ ރީތިކޮށް މަޝްހޫރު ލަވައަކުން ތަންކޮޅެއް ކިޔައިލިއެވެ. ސިބްޢަތުﷲ ގެ އާއިލާ އަކީ ކިތަންމެ ދީންވެރި އާއިލާއަކަސް ސިބްޢަތުﷲ އަކީ މި ޒަމާނުގެ ކުދިންނާ މާބޮޑު ތަފާތުތަކެއް ހުންނަ މީހެއް ނޫނެވެ. ބައްޕަމެންގެ ހަރުކަށި ދީނީ ވިސްނުމާއި ބޯދާ ސިޔާސަތު ތަކުގެ ތެރޭގައި މަޖުބޫރުން ބަނދެވިފައި ހުންނާކަށް ދެނެއް އޭނާ ބޭނުމެއް ނޫނެވެ. މިޝަލްގެ ބޮލުގައި ވަރަށް ލޯބިން ފިރުމައިލަމުން މިޝަލްގެ ގައިގައި ކުރިއަށްވުރެންވެސް ބާރަށް ބައްދައިލިއެވެ.

***~~~***

އަރާމު ނިއްޖަކަށްފަހު ސިބްޢަތުﷲ އަށް ހެއިލެވިއްޖެ އެވެ. ސައިޑް ޓޭބަލް މަތީގައި ހުރި ގަޑިއަށް ބަލައިލަމުން އެނދުން ތެދުވެގެން ގޮސް ސިބްޢަތުﷲ ވަނީ ފާޚާނާ އަށެވެ. ފާޚާނާއިން ނިކުތްއިރު މިޝަލް ވެސް ހޭލައިފިއެވެ. މިޝަލް ތެދުވެގެން ގޮސް އަލަމާރިން ސިބްޢަތުﷲ ލާނެ ޓީޝާޓަކާއި ޖީންސެއް ނަގައި އެނދުމަތީގައި ބޭއްވިއެވެ. އަނެއްކާވެސް ދެމީހުންގެ ދެމެދުގައި ވަނީ ހަނުކަމެވެ. ލޮލުގެ ހިމަކޮޅުން ސިބްޢަތުﷲ އާއި ދިމާއަށް މިޝަލް ބަލައިލިއެވެ. ސިބްޢަތުﷲ ވެސް ވަރަށް ނުކެރިހުރެ މިޝަލް އަށް ބަލައިލިއެވެ. ދެމީހުންވެސް ތިބީ އެކަކު އަނެކަކާއި އަނގައިންބުނަން ޖެހިލުންވެފައެވެ. ދައްކާނެ ވާހަކައެއް ނޭނގިފައެވެ. އަނގައިން ހަމަ އެއްވެސް ބަހެއް ނުބުނެ ދެމީހުންވެސް ތައްޔާރުވެއްޖެއެވެ.

“މިޝަލް.” ކޮޓަރިން ނިކުމެނިކުމެ ހުރި މިޝަލް އަށް ސިބްޢަތުﷲ ގޮވައިލިއެވެ.

“ކޮންއިރަކުންތަ ތި އެންމެން ޝޮޕިން އަށް ދަނީ؟” ސިބްޢަތުﷲ އަހައިލިއެވެ. ދޮރުގެ ތަޅުގައި ހިފަހައްޓާލައިގެން ހުރި މިޝަލް ސިބްޢަތުﷲ އަށް ބަލައިލިއެވެ.

“ނޭނގޭ. އެޔެއް އެނގޭނީ ބޮޑުދައިތައަށް.” ޖަވާބު ދެމުން މިޝަލް ކޮޓަރިން ނިކުމެއްޖެއެވެ.

“ޔާﷲ، ކީއްވެބާ މިޝަލް އާ ވާހަކަ ދައްކަން އަހަންނަށް މިހާރު އުނދަގޫވެގެން މިއުޅެނީ؟” ހިތާހިތާ ސިބްޢަތުﷲ އަށް ބުނެވުނެވެ. ސިބްޢަތުﷲ ކޮންމެހެން ބޭނުންވީކީ މިޝަލް ފިހާރައަށް ދާގަޑި ބަލާކަށް ނޫނެވެ. އޭނާ ބޭނުންވަނީ މިޝަލްގެ ކިބައިން މަޢާފަށް އެދޭށެވެ. އަމިއްލަ އަތުން ހަލާކުކޮށްލެވުނު ދިރިއުޅުން އަލުން އާރާސްތު ކުރާށެވެ. އެކަމަކު އެ ފުރުޞަތު މިޝަލް ދޭނެބާވައެވެ؟

ސިބްޢަތުﷲ ވެސް ކޮޓަރިން ނިކުމެގެން ބޮޑުފެންޑާ އަށް ނިކުމެއްޖެއެވެ. ގޭގެ ހުރިހައި އަންހެންވެރިން ބޮޑުފެންޑާގައި މާ އޮލަ ވާހަކައެއްގައި ތިއްބެވެ. ހުރިހައި އެންމެންވެސް ތިބީ ހެނދުނުގެ ނާސްތާ ކޮށްގެންނެވެ. ސިބްޢަތުﷲ ފިޔަވައެވެ. ހުރިހައި އަންހެންވެރިންގެ މޫނުމަތިންވެސް ފެންނަމުން ދަނީ އުފާވެރިކަމެވެ. ހަފުތާއެއް ފަހުން، ގޭގައި ކުރެވޭ ބޮޑު ކައިވެނީގެ ހަފުލާއަށް ތައްޔާރުވުމުގެ މަސައްކަތުގައި ބިޒީކޮށް ނޫޅޭ ހަމަ އެކަކުވެސް ނެތްކަހަލަ އެވެ.

ކާމޭޒާއި ދިމާއަށް ސިބްޢަތުﷲ ގެ މިސްރާބުހުރިކަން އެނގުމުން މިޝަލް ވެސް އެދިމާއަށް ހިނގައިގަތެވެ. ސިބްޢަތުﷲ ގެ ފަސްފަހަތުންނެވެ. ކާމޭޒު ކައިރީގައި ސިބްޢަތުﷲ މަޑުކޮށްލިއި ވަގުތު އޭނާއަށް ނާސްތާ ތައްޔާރުކޮށްދިނުމަށް މިޝަލް ހަރަކާތްތެރިވާންފެށިއެވެ. މިޝަލް ގެ ކޮންމެ ހަރަކާތަކަށް ސިބްޢަތުﷲ ބަލަމުން ދިޔައީ ހިތްހަމެޖެހުމުގެ ހިނިތުންވުމަކާއި އެކުގައެވެ. ސައިތައްޔާރުކޮށް ނިމިގެން އެތަނުން ދިއުމަށް މިޝަލް މަސައްކަތް ކުރި ނަމަވެސް އޭނާގެ އަތުގައި ސިބްޢަތުﷲ ހިފައި ހުއްޓުވައިފިއެވެ.

“އިށީންދެބަލަ.” ރޭވެސް ބުނިގޮތަށް މިޝަލް ކައިރީގައި އިށީންނުމަށް އެދުނެވެ.

އިތުރު އެއްވެސް އެއްޗެއް ނުބުނެ، ސިބްޢަތުﷲ އާއި ޖެހިގެން ހުރި ގޮނޑީގައި މިޝަލް އިށީންނުމުން ސިބްޢަތުﷲ ސައިބޯން ފެށިއެވެ. އަނެއްކާވެސް ދެމީހުންގެ ދެމެދަށް ރޭގައިވެސް އުފެދުނުފަދަ ހަމަހިމޭންކަމެއް ވެރިވެއްޖެ އެވެ. އެހެންނަމަވެސް މިއަދު އެ ދެމީހުންނަށް އިހްސާސް ކުރެވެމުން ދަނީ ހަމައެކަނި އެ އޮތް ހަމަހިމޭންކަން އެކަންޏެއް ނޫނެވެ. ދެމީހުންނަށް އެކީގައި ތިބެވުމުގެ ފޮނި އިޙްސާސެއްވެސް ކުރެވެމުންދެއެވެ.

ސައިބޮއެ ނިމިގެން ސިބްޢަތުﷲ އަތް ފޮހެލިއެވެ.

“އެހެންކަމެއް ބޭނުންތަ؟” މިޝަލް އަހައިލިއެވެ. ސިބްޢަތުﷲ ނޫނެކޭ ބުނުމަށް ބޯ ހޫރާލިއެވެ.

މިޝަލް ތެދުވެ ތަށިތައް ނަގައިގެން ގެންގޮސް ބަދިގޭ ސިންކަށް ލިއެވެ. ސިންކަށް ތަށިތައް ލާފައި އެނބުރިލި ވަގުތު ސިބްޢަތުﷲ ސައިބުއި ސައިތަށީގެ އެއްބައި ބަހައްޓާފައި ހުރިކަން ފާހަގަ ކުރެވުނެވެ. ތަށި ނަގައި އޭގެއިން އެތިފޮދެއް ބޮއެލަމުން ހިނިތުންވެލިއެވެ. ހިނިތުންވެ ހުރެ ކާމޭޒާއި ދިމާއަށް އެނބުރުނު ވަގުތު ސިބްޢަތުﷲ އޭނާ އާއި ދިމާއަށް ބަލަން ހުއްޓިލައިގެން ހުރިކަން ފާހަގަ ކުރެވުނެވެ. މިޝަލް ގެ ހިތަށް ނުތަނަވަސް ކަމެއް ވެރިވެގެން ދިޔައީ މިޝަލް ކުރި ކަންތައް ސިބްޢަތުﷲ އަށް ފާހަގަކުރެވުނުކަން އެނގުމުންނެވެ. މިޝަލް އާއި ދިމާއަށް ސިބްޢަތުﷲ ފިޔަވަޅެއް އެޅިކަން އެނގުމުން މިޝަލްގެ ނުތަނަވަސްކަން އިތުރުވިއެވެ. ބަދިގޭ ކަބަޑު ޝީޓް މަތީގައި ބާރަށް ހިފަހައްޓާލައިގެން ކޮންމެވެސް ވަރަކަށް ބިރުގެންފައި މިޝަލް އަށް ހުރެވުނީ އެވެ.

“ކިހިނެތްވީ؟” ސިބްޢަތުﷲ އެއްވެސް އެއްޗެއް ނުބުނެ ބަލަން ހުރުމުން މިޝަލް އަށް އަހައިލެވުނެވެ.

“ކަމެއް ނުވޭ.” ކުރު ޖަވާބެއް ދެމުން ސިބްޢަތުﷲ އެތަނުން ނިކުންނަން ހިނގައިގަތެވެ.

★★★

ސިބްޢަތުﷲ ގެ އާއިލާގައި ކުރެވޭ ބޮޑު ކައިވެނީގެ ދުވަސް އަތުވެއްޖެއެވެ. ގަދަ ވިއްސާރަ މޫސުމީ ދުވަހެކެވެ. ބޯކޮށް ވާރޭވެހެއެވެ. ވައިބާރުވެފައި ގުގުރައެވެ. ޖަހާލާ ގަދަ ގުގުރީގެ ސަބަބުން ހަތަރެސްފައި ކޮޅަށް ޖެހޭވަރު ވެއެވެ. ކައިވެނި ކުރަން ހަމަޖައްސާފައި ވަނީ ރަށު ސްކޫލް ހޯލުގައެވެ. ދެ އާއިލާގެ ގިނަ މެންބަރުން ތިބީ ސްކޫލަށް ނުދެވި ގޭގައި ތާށިވެފައެވެ. ނަމަވެސް ބައެއް މީހުން އެމީހަކަށް ދެވުނު ގޮތަކަށް ސްކޫލާއި ދިމާއަށް ދިއުމަށް ވަނީ ނައްޓާލާފައެވެ.

ސިބްޢަތުﷲ ގެ ސައިކަލް ފަހަތުގައި އިނީ މިޝަލް އެވެ. މިޝަލް އިނީ ކުޑައެއް ނަގައިގެން ދެމީހުންނަށް ހިޔާކުރެވޭތޯ މަސައްކަތް ކުރުމުގައެވެ. ނަމަވެސް ޖެހޭ ގަދަވަޔާާއި ވެހެމުންދާ ގަދަ ވިއްސާރައިގެ ސަބަބުން ދެމީހުންތިބީ ގާތްގަނޑަކަށް ތެމި ފޯވެފައެވެ. ސިބްޢަތުﷲ މަސައްކަތް ކުރަމުން ދަނީ ވީހާވެސް ފަރުވާތެރިކަމާއެކު، ދުއްވުނު އެންމެ ބާރަކަށް ސައިކަލު ދުއްވޭތޯ އެވެ. ނަމަވެސް މޫސުން ގޯސްކަމުން ސައިކަލު ކުރިއަށްދާވަރެއްވެސް ނުވެއެވެ.

ބައި ފޫޓަށް ފެންގަނޑު ހެދިފައި އޮތް މަގެއްގެ އަރިމަތިން ވަރަށް ބަލައިގެން ސައިކަލު ދުއްވާލިވަގުތެވެ. ކުއްލިއަކަށް ކަހާލައިގެން ގޮސް ސައިކަލު ޖެހުނީ މަގު ކައިރީގައި ހުރި ރުކެއްގައެވެ. އެވަގުތު މިޝަލް އަށް ހަޅޭއްލަވައިގަނެވުނީ މީން ދުވަހަކު ހަޅޭއް ނުލަވާހާ ބާރަށެވެ. ބުރައިގެން ގޮސް މާދުރަށް ޖެހިފައި އޮތް ސިބްޢަތުﷲ އަށް ހޭވެރިކަން ވެގެން އަވަސްވެގަތީ މިޝަލް ވީ ހިސާބެއް ބެލުމަށެވެ. ސިބްޢަތުﷲ ގެ ބޯ ޖެހުނީ ކައިރީގައި ހުރި ފާރުބުރިއެއްގައެވެ. ޖެހުނުލެތް ބާރުކަމުންނާއި ބޮލަށް ވެފައި ހުރި އައްސިކަމުން އޭނާ ބިރުގަތެވެ. ބޮލުން ލޭ އާދޭތޯ ބަލައިލިއިރު ނަސީބަކުން ލޭގެ އެއްވެސް އަސަރެއް ނެތެވެ.

“މިޝަލް. މިޝަލް…. މިޝަލް” ސައިކަލާއި މާދުރުނޫން ހިސާބަކަށް ބުރައިގެން ގޮސްފައިވާ އޮތް މިޝަލް ކައިރިއަށް ފިރުކެމުން، ދެމެމުން ގޮސް ސިބްޢަތުﷲ މަޑުކޮށްލަމުން މިޝަލް އަށް ގޮވަން ފެށިއެވެ. މިޝަލް ގެ ދެލޯވަނީ މެރިފައެވެ. އެތަން ފެނުމުން ސިބްޢަތުﷲ ގެ ގައިން ހީބިހި ނަގައިގެން ދިޔައެވެ. މިޝަލް ގެ ގައިގައި ކޮއްޓަމުން މިޝަލް އަށް ގޮވަމުން މިޝަލްގެ ހޭވެރިކަން ވޭތޯ ސިބްޢަތުﷲ މަސައްކަތް ކުރަން ފެށިއެވެ.

“ނޫން މިޝަލް. ޕްލީޒް ތިހެން ނުހަދާ. މިޝަލް ލޯ ހުޅުވާލަބަލަ.” މިޝަލް ގެ ހަށިގަނޑުގައި ހިފައި ވަރަށް ބާރަށް ތަޅުވައިގަންނަމުން ސިބްޢަތުﷲ ހަޅޭއްލަވަމުންދިޔައެވެ. އެވަގުތު މިޝަލް ލޯހުޅުވައިލައިފިއެވެ. ހާސްވެ ކަންބޮޑުވެފައިވާ ސިބްޢަތުﷲ އަށް ބަލަން އޮވެވުނެވެ. ސިބްޢަތުﷲ ގެ ދެއަތުން މިޝަލްގެ ދެކޮލާއިއެކުގައި މޫނުގައި ހިފަހައްޓަމުން މިޝަލް ގެ ނިތްކުރިއަށް ދޮނެއް ދީފައި މިޝަލްގެ ގައިގާ ބާރަށް ބައްދައިގަތެވެ.

“އަހަރެން ބިރުން ކިރިޔާ ހަލާކުނުވީ!” މިޝަލް ގެ ގައިގާ ވަރަށް ބާރަށް ބައްދައިގެން އިނދެ ތުރުތުރު އަޅައަޅައި އޮތް އަޑަކުން ސިބްޢަތުﷲ ބުންޏެވެ.

“ސިބުތު ވެސް ބިރުގަނޭތަ؟” ސިބްޢަތުﷲ ގެ ހަށިގަނޑުގައި މިޝަލްގެ ދެއަތުން ބާރަށް ބައްދައިލަމުން އެވަގުތުވެސް ކޮށްލެވުނީ ސަމާސާއެކެވެ. ސިބްޢަތުﷲ އޭނާގެ ގައިގައި އެހާ ވަރަށް ބައްދާލައިގެން ކަންބޮޑުވެފައި އިންތަން ފެނުމުން މިޝަލް އަށް އިނދެވުނީ އާދަޔާޚިލާފް ހިތްހަމަޖެހުމެއް ލިބިފައެވެ.

“މިޝަލް އަށް ވީގޮތެއް ނޭނގުނީމަ ބިރުގަތީ.” ވަރަށް ލޯބިން މިޝަލްގެ ބޮލުގައި ފިރުމަމުން ސިބްޢަތުﷲ ބުންޏެވެ.

“ހަމަ އަސްލުވެސްތަ!؟؟ ސިބްޢަތުﷲ ހަމަ އަސްލުވެސް އަހަންނަށް ވީގޮތެއް ނޭނގިގެން އެހާވަރަށް ކަންބޮޑުވީތަ؟” މިޝަލް ބޭނުންވީ ލިބިފައިވާ ރަނުގެ ފުރުޞަތުގެ ބޭނުން ހިފާށެވެ. ވެހެމުންދިޔަ ބޯ ވާރޭގެ ތެރެއިންވެސް ސިބްޢަތުﷲ ގެ ދެލޯވަނީ ކަރުނައިން ފޯވެފައެވެ. ނަމަވެސް މިޝަލްގެ ސަމާސާ ޖަވާބު އަޑުއިވުމުން ސިބްޢަތުﷲ ގެ މޫނަށް އުފާވެރި ހިނިތުންވުމެއް އައެވެ.

މަގުމަތީގައި ހެދިފައިވާ ފެންކޯރު ތެރޭގައި އެދެމީހުންނަށް އެގޮތުގައި އެތައް އިރަކު ތިބެވުނެވެ. ދެމީހުންވެސް އެކަކު އަނެކަކުގެ ގައިގައި ބައްދަމުން ދިޔައީ ތިބެވުނީ މަގުމަތީގައި ކަންވެސް ހަނދާން ނެތިގެން ކަހަލައެވެ. ދެމީހުންގެ ލޮލުންވެސް އުވާފެރިކަމުގެ ކަރުނަތައް ވާރޭގެ ތިކިތަކާއެކު އޮހެމުން ދިޔައެވެ. އެކަކު އަނެކަކުގެ ގައިގާ ބާރަށް ބައްދާލައިގެން ދެމީހުންގެ ހިތުގެ ވާހަކަތައް އަޑުއަހަމުންދިޔައީ ކިހާއިރެއް ވާންދެން ކަމެއްވެސް އެމީހުންނަކަށް ނޭނގެއެވެ.

“އެއްވެސް ތަނަކަށް ތަދުވިތަ؟ ތަނެއް މަށައިގެން ދިޔަތަ؟ ބޮލަށް ކަމެއް ވިތަ؟” ދެމީހުންނަށް އެއްފަހަރާ ހަމަ އެއް ސުވާލުތަކެއް ކުރެވެން ފެށުނީ އިރުކޮޅެއް ފަހުންނެވެ. ދެމީހުން ނޫނެކޭ ބުނުމަށް ޖަވާބުދިނީވެސް ހަމަ އެކުއެކީގައި ބޯ ހޫރާލަމުންނެވެ.

“އައި އޭމް ސޮރީ.” ރޮއެގަންނަމުން ސިބްޢަތުﷲ ގެ އަނގައިން ކުއްލިއަކަށް ނިކުތީ އެ އަނގައިން ދުވަހަކުވެސް ނިކުމެދާނެކަމަށް މިޝަލް ހީވެސް ނުކުރާ ތިން ލަފުޒެވެ.

“އައި އޭމް ސޮރީ އަހަރެންގެ ފަރާތުން މިޝަލް އަށް ދެވުނު ކޮންމެ އަނިޔާއަކަށް. މިޝަލް ރޮއްވުނީތީ ވެސް ވަރަށް ބޮޑަށް ސޮރީ. މިޝަލްގެ ހަށިގަނޑާއި ރޫހަށް އަހަރެންގެ ސަބަބުން ލިބުނު ކޮންމެ ޒަޚަމަކަށް ވެސް ވަރަށް ބޮޑަށް ސޮރީ.” ވާހަކަ ދައްކަމުން ދިޔައީ ސިބްޢަތުﷲ އެވެ. މިޝަލް އިނީ އަޑުއަހާށެވެ.

މިޝަލްގެ ޖަވާބެއް ނުލިބުމުން ސިބްޢަތުﷲ އަށް މިޝަލް އާއި ދުރަށް ޖެހިލެވުނެވެ. ކަރުނައިން ފޯވެފައިވާ މިޝަލްގެ ދެލޮލަށް ވަރަށް އަސަރާއެކު ސިބްޢަތުﷲ ބަލަންފެށި އެވެ. އަނެއްކާވެސް ސިބްޢަތުﷲ ދެއަތުން މިޝަލްގެ މޫނުގައި ހިފަހައްޓާލަމުން މިޝަލްގެ ކަނާތު ކޮލުގައި ފިރުމަން ފެށިއެވެ.

“މި ލޯބިލޯބި ކޯތާފަތުގަ އަހަރެންގެ މި މުޑުދާރު އަތުން ބޮނޑިއެއް ޖެހުނީތީ ވެސް ވަރަށް ވަރަށް ބޮޑަށް ސޮރީ.” މިހެން ބުނުމާއެކު ސިބްޢަތުﷲ ތުންފަތް މިޝަލް ގެ ކޯތާފަތުގައިި ޖައްސައިލިއެވެ. އެވަގުތު މިޝަލް އަށް ލޯމަރައިލެވުނެވެ.

“އަހަންނަކީ ރީތި މީހެއްވެސް ނޫނެއްނު!” ގިސްލަމުން މިޝަލްގެ ހިތް ބަންޑުންކޮށްލެވުނީ ހަމަ އެންމެ ޖުމްލައަކުންނެވެ. އެވަގުތު ސިބްޢަތުﷲ އަށް ބޭއިޚްތިޔާރުގައި ފަހަތަށް ޖެހިލެވިއްޖެ އެވެ. މިޝަލް އަށް އިނދެވުނީ ރޮވިފައެވެ. މިޝަލް ދެލޯ މަރައިލުމާއެކު ލޮލަށް ޖަމާވެފައިވާ ކަރުނަތައް ދެ ކޯތާފަތް މައްޗަށް އޮހިގެންފިއެވެ.

މިޝަލް އެ ބުނި ޖުމްލައަކީ ތަކުރާރުކޮށް ސިބްޢަތުﷲ ގެ ފަރާތުން މިވީހާ ދުވަހު މިޝަލް އަށް ދޫކުރަމުން ދިޔަ އެންމެ ފުން އަސަރެއް ކުރުވި ޖުމްލައެވެ. ވިހަ ތީރެއް ފަދަ ޖުމްލައެކެވެ. އެ ޖުމްލަ މިޝަލްގެ އަނގައިން އިވުމުން މިފަހަރު ހިތުގައި ޖެހުނީ ސިބްޢަތުﷲ ގެ އެވެ.

“މިޝަލް ވަރަށް ލޯބި.” މިޝަލްގެ މޫނުގައި ހިފަހައްޓާލަމުން ސިބްޢަތުﷲ ވަރަށް މަސްތީ ރާގެއްގައި ބުންޏެވެ. ސިބްޢަތުﷲ ގެ ޖުމްލަ އަޑުއިވުމުން މިޝަލް ލޯހުޅުވައިލި އެވެ. އިވުނު ޖުމްލަ އެއީ ހަމަ އަސްލަށްވެސް އިވުނު ޖުމްލައެއްކަން ޤަބޫލުކުރަން ދަތިވެފައި މިޝަލް އަށް އިނދެވުނެވެ.

“މިޝަލް ތީ އަބަދުވެސް ރީތި ކުއްޖެއް. އަހަރެންގެ އުމުރުން 10 އަހަރުން ފެށިގެން އަހަރެން ހުންނަނީ މިޝަލް އާހެދި މޮޔަވެފަ. އޭރު މިޝަލް އަށް ވާނީ 7 އަހަރު. ލޯތްބަކީ ކޮން އެއްޗެއްކަން ނުވެސް އެނގޭއިރުން ފެށިގެން އަހަންނަށް މިޝަލް ދެކެ ލޯބިވެވިއްޖެ. މިޝަލް ދެކެ އަހަރެން ވާ ލޯތްބާއި އަހަރެން، އެކަނިމާއެކަނި ދޫކޮށްލާފަ އޭރު މިޝަލް ރާއްޖެއިން ބޭރަށް ހިނގައްޖެ. އަހަރެން މުޅި ފުރާވަރު ހޭދަކޮށްލީ މިޝަލް އެނބުރި އަންނާނެ ކަމަށް އިންތިޒާރުކޮށްކޮށް. އެހެން ހުއްޓާ މިޝަލް އައީ. މިޝަލް އައުމުން އަހަރެން ހުރީ ވަރަށް އުފަލުން. އެކަމަކު މިޝަލް އަހަންނާ ގުޅެން ދެކޮޅު ހެދީ. އެހިސާބުން އަހަރެން އެކީ ހަފުސްވި ކަހަލަ. އަހަރެން އެހާލުގައި ހުއްޓާ މިޝަލް އުޅުނީ ފިލައިގެންދާން. އެދަނޑިވަޅުގެ ނާޖާއިޒު ފައިދާ ނަގަން އަހަރެންގެ ބައްޕަ ބުނީ އަހަންނަކީ އެއްވެސް ތާކުންތާކު ޖެހޭ މީހަކަށް ނުވާތީ ކަމަށް މިޝަލް ބުނެފައޭ މިޝަލް އަހަންނާ ގުޅެން ދެކޮޅުހެދީ.” ސިބްޢަތުﷲ ގެ ހިތުގެ އެންމެ ފުނުގައި ފޮރުވައިގެން އުޅުނު ޖަޒުބާތުތައް މިޝަލްގެ ކުރިމައްޗަށް ބަންޑުންކޮށްލިއެވެ. މިޝަލް އިނީ އަޑުއަހާށެވެ.

“އަހަރެންގެ ފަރާތުން މިޝަލް އަށް ވަރަށް އަނިޔާ ދެވިއްޖެ. އައި އޭމް ރިއަލީ ރިއަލީ ސޮރީ.” މިޝަލްގެ ކޮލުގައި ސިބްޢަތުﷲ ގެ އިނގިލިތަކުން ފިރުމަމުން ވަރަށް އަސަރާއެކު އަނެއްކާވެސް މިޝަލްގެ ކިބައިން މަޢާފަށް އެދުނެވެ.

“ސިބްޢަތުﷲ އަސްލު ވަރަށް ގޯސް. އެރޭ އަހަރެންގެ ހުރިހައި ތަނޑިތަކާއެކު އަހަރެންގެ ނަފުސާ ރޫހުވެސް ސިބްޢަތުﷲ ތިހުރީ ފުނޑުފުނޑުކޮށްލާފަ.” ނުރޯން މަސައްކަތް ކުރަމުން މިޝަލް ވަރަށް ހިތްވަރާއެކު ބުންޏެވެ. ނަމަވެސް މިޝަލް އަށް ރޮވިއްޖެއެވެ. އިރުކޮޅެއް ވާންދެން ސިބްޢަތުﷲ ގެ ތަނަވަސް މޭމަތީގައި މިޝަލްގެ މޫނު ފޮރުވައިގެން އިނދެ ރުޔެވެ.

ސިބްޢަތުﷲ ގެ ތަނަވަސް މެޔާއިލައި މިޝަލް ފިއްތާލަމުން އޭނާގެ ފިރިހެންވަންތަ ދެއަތުން މިޝަލްގެ ގައިގާ ވަރަށް ލޯބިން ބައްދާލި އެވެ.

“ތިކަން އެނގޭ. އެހެންވެ އަހަރެން ޕްރޮމިސް ކޮށްފަ ބުނަން ދެން ދުވަހަކުވެސް އަހަރެން ފަރާތުން އެފަދަ ކަމެއް ނުފެންނާނެ.” މިޝަލްގެ އިސްތަށިގަނޑަށް ދޮނެއް ދެމުން ވަރަށް ޔަޤީންކަމާއެކު ސިބްޢަތުﷲ ބުންޏެވެ.

“އެހެންވިޔަސް ހެޔޮ. އަދިވެސް ތީ ގޯސް މީހެއް.” ރޮމުން، ސަމާސާގެ ރާގުގައި ތުއިގޮތަކަށް މިޝަލް ބުންޏެވެ. އެވަގުތު މިޝަލް ބޭނުންވިފަދަ ހިނިތުންވުމެއް ސިބްޢަތުﷲ ގެ މޫނަށް ވެރިވެގެން ދިޔައެވެ.

ރޮމުން، ގިސްލަމުން، ސިބްޢަތުﷲ އަކީ ގޯސް މީހެއްކަމަށް ބުންނަސް މިޝަލްގެ މޫނު ސިބްޢަތުﷲ ގެ މޭތެރޭގައި ފޮރުވައިގެން، ސިބްޢަތުﷲ ގެ ފިރިހެންވަންތަ މުލައްދަނޑީގެ ފުރިހަމަ ހިމާޔަތުގައި މިޝަލް އޮތީ ރައްކާތެރިކަމާއެކުގައެވެ. އެހެން އޮއްވާ ކުއްލިއަކަށް ވަރަށް ބާރަށް ގުގުރާލައިފިއެވެ. އެވަގުތު ސިބްޢަތުﷲ ގެ މޭތެރެއަށް ކުރިއަށްވުރެންވެސް ބޮޑަށް މިޝަލް ބޮނޑިވެގަތެވެ.

“އައި ލަވް ޔޫ.” އެންމެފަހުން ސިބްޢަތުﷲ ގެ ދުލުކުރީގައި މިހާދުވަސް ވާންދެން ގެންގުޅު ތިން ލަފުޒު ބޭރުކޮށްލައިފިއެވެ. އެ ތިން ލަފުޒަކީ އެ އަޑެއް އެހުމަށް މިޝަލް އަށްވެސް މިފަހަކަށް އައިސް އިންތިޒާރު ކުރެވެމުން އައި ތިން ލަފުޒުގެ އަޑެވެ.

ސިބްޢަތުﷲ ގެ ލޯބީގެ އިޒުހާރާއި އެކު މިޝަލް އަށް ޖެހިލެވުނީ ސިބްޢަތުﷲ އާއި ދުރަށެވެ. ސިބްޢަތުﷲ ގެ އެ ޖުމްލަ ޤަބޫލުކުރަން ދަތިވެގެންނެވެ. އެކަމުގެ ޔަޤީންކަން ހޯދުމަށް މިޝަލް ބޭނުންވީ ސިބްޢަތުﷲ ގެ ދެލޮލުން ދޭ މެސެޖް އެއްވެސް ހުރަހެއް ނެތި ދެނެގަންނާށެވެ. އެސްފިޔަވެސް ޖަހައިނުލާ މިޝަލް ބަލަމުން ދިޔައީ ސިބްޢަތުﷲ ގެ ދެދޮލަށެވެ. ހައިރާންވެފައި އިން މިޝަލްގެ މޫނަށް ބަލައިލަމުން ސިބްޢަތުﷲ ހިނިތުންވި އެވެ. އޭނާގެ ދެއަތުން މިޝަލްގެ މޫނުގައި ހިފަހައްޓައިލަމުން އެ މޫނާއި ކައިރިއަށް ސިބްޢަތުﷲ ގެ މޫނު ހަރަކާތްކޮށްލިއެވެ.

“އަހަރެންގެ ރީތީގެ ރާނީދެކެ އަހަރެން ވަރަށް ލޯބިވަން. ހަނދާން ވޭތަ ކުރިން އަހަރެން ބުނީމެއްނު މިޝަލް އުފަންވީ ވެސް އަހަރެންގެ މީހެއްގެ ގޮތުގައޭ. ހަމަ އެގޮތަށް އަހަރެން އުފަންވީވެސް މިޝަލް ދެކެ ލޯބިވުމަށް.” އިއްޔެ އާއި ހަމައަށް ލޯބީގެ އެއްވެސް ކަންފުޅެއް ވެސް ނެތް ސިބްޢަތުﷲ ގެ އަނގައިން މިއަދު ބޭރުވަމުން އެދާ ލޯބީގެ ބަސްތައް އަޑުއަހަން އެސްފިޔަވެސް ޖަހައިނުލާ އަދިވެސް ހައިރާންވެފައި މިޝަލް އަށް އިނދެވުނީ އެވެ.

“އާނ. އަހަރެން އުފަންވީވެސް މިޝަލް އަށް ލޯބިދިނުމަށް. ރުޅިއާއި ނަފުރަތު އޮތް އިރުވެސް އަހަރެންގެ ހިތުގެ އެންމެ ފުނުގައި މިޝަލް އަށްޓަކައި ލޯބި އޮތް. މިޝަލް އަށް އަހަރެންގެ އަތްފައިންނާއި އަހަރެންގެ ބަސްތަކުން އަނިޔާ ދިނުމަށްފަހުވެސް އަހަރެންގެ ހިތުގައި މިޝަލް އަށް އޮތް ލޯބީގެ ބޮޑުކަމުން އަހަންނަށް ގިސްލައި ރޮވުނުވަރު އެނގޭނީ ޚުދު އަހަންނަށް. އަހަރެންގެ ދެލޯ ކަރުނައިން ފުރިގެން ދިޔައީ އަހަރެންގެ ހިތަށް ތަދުވި ވަރުން.” މިޝަލް ދެކެ ސިބްޢަތުﷲ ލޯބިވާ މިންވަރު ބަޔާން ކުރުމުގައި އެންމެ ތަންފުކެއްވެސް ދޫދޭކަށް މިއަދު އޭނާ ބޭނުމެއް ނޫނެވެ. ސިބްޢަތުﷲ ގެ ހިތުގެ އަޑު އިވުމުން މިފަހަރު މިޝަލްގެ މޫނަށް ހިތްގައިމު ހިނިތުންވުމެއް ވެރިވެއްޖެއެވެ.

މިޝަލްގެ މޫނުމަތިން މިފަހަރު ފެނިގެން ދިޔަ ހިނިތުންވުމަކީ އެމީހުންގެ ކައިވެނީގެ ފަހުން މިޝަލްގެ މޫނަށް ވެރިވި ޙަޤީޤީ ފުރަތަމަ ހިނިތުންވުންކަން ސިބްޢަތުﷲ އަށް އެނގުނެވެ.

“އެހެންވީމަ ބުނެބަލަ! … އަހަރެން ދެކެ ލޯބި ވެވިދާނެތަ މިޝަލް އަށް؟” ސިބްޢަތުﷲ ގެ ސުވާލަށް މިޝަލް ޖަވާބު ދިނީ އުފާވެރި ހިނތުންވުމަކާއެކު ސިބްޢަތުﷲ ގެ ގައިގާ ބާރަށް ބައްދާލަމުންނެވެ.

“އައި އޭމް އޮލްރެޑީ އޮން މައި ވޭ ޓު ލަވް ޔޫ.” ކިތަންމެ މަޑުމަޑުން މިޝަލް އެހެން ބުނި ނަމަވެސް ސިބްޢަތުﷲ އަށް ހަމަ ރަނގަޅަށް އެ ޖުމްލަ އިވުނެވެ. އެވަގުތު ހިތްހަމަޖެހުމުގެ ނޭވާއެއް ފަޒާގެ ތެރެއަށް ސިބްޢަތުﷲ ދޫކޮށްލީ ހިތުގެ އަޑިން މާތްﷲ އަށް ޝުކުރުވެރިވަމުން ނުހަނު އުފަލާއެކު ގައެވެ.

“ސިބްތޫ.” ފުދޭވަރަކަށް ބާރަށް މިޝަލް ގޮވައިލި އެވެ. ސިބްޢަތުﷲ ޖަވާބު ދިނީ ހޫމް އަޅަމުންނެވެ.

“ސިބްތޫ.” އަނެއްކާވެސް މިޝަލް ގޮވައިލި އެވެ.

“އަހަރުން މިތަނުން ދެން ނުގޮސް މިހެން ތިބެނީތަ؟” ސަމާސާ ރާގެއްގައި ސުވާލެއް ދޫކޮށްލަމުން ސިބްޢަތުﷲ އާއި ދުރަށް މިޝަލް ޖެހިލިއެވެ.

“އަހަރެން އަބަދުވެސް ބޭނުންވަނީ މިޝަލްގެ މޫނުން ހިނިތުންވުން ފެންނަން. އެންޑް އައި ޕްރޮމިސް މިޝަލްގެ ތި ލޯބިލޯބި ދެލޮލަށް ދެން އެންމެ ކަރުނަފޮދެއް ވެސް އަޔަކަ ނުދޭނަން.” ސިބްޢަތުﷲ ބުންޏެވެ. މިޝަލް ބޯ ޖަހައިލިއެވެ.

“މަށަށް އެނގޭ ތިކަން.” މިޝަލް ޖަވާބުދެމުން ވެއްޓިފައި އޮތް ސައިކަލާއި ދިމާއަށް ހިނގައިގަތެވެ.

“އެކަމަކު މިޝަލް ނުބުނަމެއްނު އަދިވެސް އެހެންނެއް!” މިޝަލްގެ ފަހަތުން ހިނގައިގަންނަމުން ސިބްޢަތުﷲ ޝަކުވާކޮށްލި އެވެ.

“ކޮން އެހެންނެއްތަ؟” އެނގިހުރެ މިޝަލް ކޮށްލީ ސަމާސާއެކެވެ.

“މިބުނީ މިޝަލް އަހަރެންދެކެ ލޯބިވަމެކޭ ބުނި އަޑެއް އަދި އަހަރެންގެ މި ދެކަންފަތަކަށް އަޑެއް ނީ-ވެ-ޔޭ.” ޖުމްލައިގެ ފަހުބަހުގެ އަކުރުތަކަށް ރާގުލާފައި ދަމަމުން ސިބްޢަތުﷲ ވެސް މިޝަލްގެ ސަމާސާގައި ބައިވެރިވި އެވެ. ސިބްޢަތުﷲ އެހެން ބުނުމުން މިޝަލް ބާރަށް ހޭންފެށިއެވެ.

ސިބްޢަތުﷲ މިޝަލް އާއި އަރައިހަމަކޮށްފައި މިޝަލްގެ ކުރިމަތީގައި ހުއްޓުނެވެ. މިޝަލްގެ ހުނުން ދެކިލުމަށެވެ. ހުނުމުގެ އުފާވެރިކަމުން ފަރިވެ ފޮޅިފައިވާ މިޝަލްގެ މޫނު ފެނުމުން ސިބްޢަތުﷲ އަށް ހިނިތުންވެވުނެވެ. މިހާރު އެއީ މީގެ މަހެއްވަރު ކުރިން ފެނުނު މިޝަލް އޭ ސިބްޢަތުﷲ ގެ ހިތަށްއެރި އެވެ.

“އެނގޭތަ؟ މިޝަލް ތިހެން ހެމުންދާއިރު ހާދަ ލޯތްބޭ ހާދަ ޗާލޭ މިޝަލް.” ސިބްޢަތުﷲ ގެ އަނގައިން ތަޢުރީފުގެ ބަސްކޮޅެއް އިވުމުން މިޝަލް އަށް ލިބުނީ ވަރަށް ބޮޑު އުފަލެކެވެ. ލިބުނު އުފާވެރިކަމާއެކު ލަދުވެސް ގެންފިއެވެ. ހުނުން ހުއްޓައިލަމުން މިޝަލް އަށް ލަދުން އިސްޖަހައިލެވިއްޖެ އެވެ.

މިޝަލް އާއި ދިމާއަށް ސިބްޢަތުﷲ އެފަދަ އިޝްޤީ ގޮތަށް ބަލަމުންދާ މިއީ ފުރަތަމަ ފަހަރެވެ. މިއީ ސިބްޢަތުﷲ ގެ ޙައްޤުގައި މިޝަލް ގެ މިޒާޖަށް އެފަދަ ފޮނި ޖަޒުބާތީ ލަދުވެތިކަމެއް އައި ފުރަތަމަ ފަހަރުވެސް މެއެވެ. މިޝަލް އާއި ދިމާއަށް އެގޮތަށް ބަލަން މުޅި އުމުރަށްވެސް ހުންނަން ސިބްޢަތުﷲ ބޭނުމެވެ. ކުއްލިއަކަށް މިޝަލް އަށް އަނގައިލުމެއްވެސް ނެތި އޭނާގެ އުނގަނޑުގައި ހިފާފައި ސިބްޢަތުﷲ އާއި ކައިރިއަށް ގެނެސްފި އެވެ. މިޝަލް އަށް ލިބުނީ ކުއްލި ހައިރާން ކަމެކެވެ. މަގުމަތީގައި މީހެއްގެ ހިލަމެއް ނެތްކަން އެނގޭއިރުވެސް ލަދުންގޮސް މިޝަލް އަށް ހަދާނެގޮތެއްވެސް ނޭނގުނެވެ.

“ކީއްވެ ހުނުން ހުއްޓާލީ؟” މަޑު ފިޔާތޮށި ކުލައިގެ ލިޕްސްޓިކް ޖައްސާފައިވާ މިޝަލްގެ ތުނި ތުންފަތަށް ބަލައިލަމުން ސިބްޢަތުﷲ ސުވާލުކުރިއެވެ.

ސިބްޢަތުﷲ ގެ އެ ކަތި ނަޒަރުން މިޝަލްގެ ކޯތާފަތަށް ޒާތެއްގެ ހޫނުކަމެއް އިޙްސާސް ކުރެވުމާއިއެކު ލަދުން އިސްޖަހައިލިއެވެ. ސިބްޢަތުﷲ އަތުގެ އިނގިލިތަކުން މިޝަލް ގެ އެ މައުސޫމު ތުންފަތުގައި ޖައްސައިލި އެވެ. އެއީ އަދިވެސް ބިކުރުވެރި ދެ ތުންފަތްކަން ސިބްޢަތުﷲ އަށް އެނގެެއެވެ. ސިބްޢަތުﷲ ގެ މަސްތީ ނަޒަރު ހުއްޓާލާފައިވަނީ މިޝަލްގެ ތުންފަތަށެވެ.

“އޯކޭތަ އަހަރެން…؟” ހުއްދަ ނަގަން ނުޖެހުނަސް މިފަހަރު މިޝަލް ގެ ކިބައިން ހުއްދައަށް ސިބްޢަތުﷲ އެދުނެވެ.

މިޝަލް އެއްވެސް އެއްޗެއް ނުބުނެ މަޑުން ހުރީއެވެ. މަސްތީ ޖަޒުބާތުގެ ކަސްތޮޅުގައި އޭނާ ހުރީ ހަމަ ރަނގަޅަށްވެސް ހައްޔަރުވެފައެވެ. އެހެންކަމުން މިޝަލް އަށް ދެލޯ މަރައިލެވުނެވެ. ސިބްޢަތުﷲ ގެ މޫނު މިޝަލް ގެ މޫނާއި ކައިރިކުރަމުންގޮސް މިޝަލްގެ ތުންފަތުގައި ސިބްޢަތުﷲ ގެ ތުންފަތް ޖައްސައިލިއެވެ. މިޝަލް އަށް ހީވީ ކަރަންޓުގައި ޖެހުނު ހެންނެވެ. ސިބްޢަތުﷲ ގެ ތުންފަތުން ކުރަމުންދިޔަ ކޮންމެ ހަރަކާތަށް އިޖާބީ ރައްދަމަލެއް ދެމުން މިޝަލް ވެސް ބޭނުންވީ މަސްތީ އޮއެވަރުގައި ބެހިގެން ދާށެވެ. ނަމަވެސް މިޝަލް އާއި ދުރަށް ސިބްޢަތުﷲ ޖެހިލުމާއެކު މިޝަލްގެ މެރިފައިވާ ދެލޯ ހުޅުވައިލެވުނެވެ. އޭރު މިޝަލްގެ މޫނަށް ބަލަން ސިބްޢަތުﷲ ހެވިފައިހުރީ މިޝަލްގެ މޫނުމަތިން ފެންނަމުންދާ މެސެޖުތައް ދެނެގަތުމަށެވެ. މިޝަލް ވެސް ރަކި ގޮތަކަށް ހިނިތުންވަމުން އަނެއްކާވެސް ބަލައިލެވުނީ ސިބްޢަތުﷲ ތުންފަތަށެވެ.

“އައި ލަވް ޔޫ.” މިޝަލްގެ ގައިގައި ބާާރަށް ބައްދައިގަންނަމުން ސިބްޢަތުﷲ ބުންޏެވެ.

“އައި ލަވް ޔޫ ޓޫ.” މިޝަލް ގެ ޖަވާބުން ސިބްޢަތުﷲ އަށް ލިބުނީ އުފާވެރިކަމުގެ ޝޮކެކެވެ.

“އަދި ބުނެފާނަންތަ!!” އުފަލުން ފޮޅިފައި ހުރެ ސިބްޢަތުﷲ އެދުނެވެ.

“ލަވް ޔޫ ޓޫ.” ލަދުން ހުރެ މިޝަލް ޖަވާބުދެމުން ދުރަށް ޖެހިލިއެވެ.

“ތޭންކްސް.” މިޝަލް އާއި ކައިރިއަށް ޖެހިލަމުން ނިތްކުރިއަށް ދޮނެއް ދެމުން ސިބްޢަތުﷲ ބުންޏެވެ.

“ދެން އަޅެ ހިނގާބަ ދާން.” ސިބްޢަތުﷲ އަށް ވަދެވިފައިހުރި ލޯބީގެ ޢާލަމުން ނިކުންނަން ޖެހުނީ މިޝަލް ޅަވެލަމުން ސިބްޢަތުﷲ ގެ އަތުގައި ހިފައި ދަމައިގަންނަމުން ބުނެލި ޖުމްލައިންނެވެ. އެވަގުތު ވީ އުފަލުން ސިބްޢަތުﷲ އަށް ބާރަށް ހީނގަނެވިއްޖެ އެވެ.

ސައިކަލާއި ހަމައަށް ގޮސް ސައިކަލު ނަގައި ކޮޅަށް ޖެހުމަށްފަހު ސިބްޢަތުﷲ ސައިކަލަށް އަރާ ސްޓާޓް ކުރެވޭތޯ މަސައްކަތް ކުރަން ފެށިއެވެ.

“މީތިގަނޑު ސްޓާޓް ނުވެއްޖެއްޔާ މިޝަލް ޖެހޭނެ މަށާއެކު ގޮސް ހަމަ އެ ފެންގަނޑުގަ އިށީންދެފަ މަ ބުނާ ތާކަށް ދާން.” ސައިކަލް ސްޓާޓް ކުރުމަށް ފައިން ކިކް ޖަހަމުން ފުން މާނައެއް އެކުލެވޭ ޖުމްލައެއް މިޝަލް އަށް އަމާޒުކޮށްލި އެވެ.

“އެހެންތަ. ފެންގަނޑުގަ އިށީންދެފަ ކޮންތާކަށް ދެވޭނީ؟” އެނގިހުރެ މިޝަލް ވެސް ކޮށްލީ ސުވާލެކެވެ.

“އޭރު އަހަރެމެންތިބި އުލްފަތުގެ ގުލްޝަނަށް. އެ ފެންގަނޑަކީ ކިތަންމެ ޗަކަ ފެންގަނޑެއް ނަމަވެސް އެއީ އަހަރުމެންގެ އެންމެ ފުރަތަމަ ލޯބީގެ ބަގީޗާ.” ވަރަށް ބާރަށް ކިކެއް ޖަހަމުން ސިބްޢަތުﷲ ބުންޏެވެ. އެވަގުތު ސައިކަލް ސްޓާޓްވެސް ވެއްޖެ އެވެ.

ސައިކަލް ފަހަތުގައި އިންއިރު މިޝަލް އިނީ ސިބްޢަތުﷲ ގެ ގައިގާ ބާރަށް ބައްދައިގެންނެވެ. އެމީހުންގެ ދެމެދަށް މިހާރު ބޮނބިނަރެއް ވަންނާނެ ޖާގައެއް ދޭކަށްވެސް އެމީހުން ބޭނުމެއް ނޫނެވެ. މިޝަލްގެ މޫނުން މިހާރު ފެންނަނީ ހިތްހަމަ ޖެހުމާއި އުފާވެރިކަމެވެ. ސިބްޢަތުﷲ ގެ އަނގައިން ބޭރުވި ‘ޗާލޭ’ އެ ލަފުޒުގެ ސަބަބުން ހަމައެކަނި އިތުރުވެގެން ދިޔައީ މިޝަލްގެ ޗާލުކަން އެކަންޏެއް ނޫނެވެ. އޭނާގެ ހިތަށް ކުރިން ވެރިވެފައިވާ ޚަރީފު މޫސުމް ވެސް ބަހާރު މޫސުމަށް ބަދަލުވެ މޫސުމްވެސް ޗާލުވެއްޖެ އެވެ.

ސިބްޢަތުﷲ ގެ ކޮނޑުގައި އެލިގަންނަމުން ސައިކަލް ޕެޑަލް މަތީގައި ދެފައި އަޅާފައި މިޝަލް ކޮޅަށް ތެދުވެ ސިބްޢަތުﷲ ގެ މޫނަށް ބަލައިލި އެވެ. އެއީ މީގެ ކުރިން އޭނާގެ ދިރިއުޅުން ނަރަކައަކަށް ހަދައިލި ސިބްޢަތުﷲ އެވެ. ނަމަވެސް މިހާރު އެއީ އޭނާގެ ޙަޔާތަށް ޗާލުކަން ގެނެސްދިން ސިބްޢަތުﷲ އެވެ. ލެއްވި ނިޢުމަތަށް މާާތްﷲ ގެ ކިބަފުޅަށް ހިޔަހާސްފަށުން މިޝަލް ގެ ހިތާހިތުން ޝުކުރުކުރަމުން އަނެއްކާވެސް ސިބްޢަތުﷲ އަށް ބަލައިލިއެވެ.

” ♩ ♪ ♫ ♬ޗާލޭ ކަލާ ހާދަ ޗާލޭ …. ހަނދުވެސް ލަދުން އޮއްސިގެން ދާނޭ.

ނިމުމެއް ނުވާނޭ ބަދަލެއް ނުވާނޭ …. ލޯބިން މިހިތް ފުރިއަރާނޭ ♩ ♪ ♫ ♬”

ސިބްޢަތުﷲ އަށް މިޝަލް ބަލައިލުމާާއެކު ސިބްޢަތުﷲ ގެ ބަރު އަޑުން ރާގު އަޅުވާލާފައި ލަވަކިޔަން ފެށިއެވެ.

ނިމުނީ

ލިޔުންތެރިޔާގެ ފުރަމަލަ

އަޙްމަދު ރަޝީދު

ހުރިހައި ދާއިރާއެއްގެ ލިޔުންތައްވެސް މުނިއަވަސްގެ ފައުންޑަރ އަދި ޗީފް އެޑިޓަރ ލިޔާނެއެވެ.

މި ލިޔުންތެރިޔާގެ ބައެއް އެހެން ލިޔުންތައް

• 20 ޑިސެމްބަރ 2024ޚަބަރު“ސޮރީ” ގެ މަންޒަރެއް!
• 18 ޑިސެމްބަރ 2024ޚަބަރުއައިފިލްމްސް އިން ލޯބިން ބުނެލަނީ ” ލޯބިން…؟ ” ކަމަށް!
• 18 ޑިސެމްބަރ 2024ޚަބަރުއައްޒަ ބަލިވެއިންކަމަށް ބުނެ ނަހޫއަށް “ސޮރީ” ބުނެފި
• 18 ޑިސެމްބަރ 2024ޚަބަރު“ސޮރީ” ފަށައިފި – ޑައިރެކްޓްކުރަނީ ނަހޫ އަދި ރަވީ!